ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܶܠܬܳܐ ܡܬܘ̣ܡܳܝܳܐ ܕܰܡܫܰܡ̇ܫܳܐ ܠܶܗ ܒܰܡܪ̈ܰܘܡܶܐ ܒܰܪܬܝ̣ܬܳܐ ܟܽܠܳܗ̇ ܦܳܠܚܘ̣ܬܳܐ ܫܡܰܝܳܢܺܝ̣ܬܳܐ ܘܟܽܠܗܽܘܢ ܬܶܓ̈ܡܶܐ ܥܶܠܳܝ̈ܶܐ ܠܨܶܒܝܳܢܶܗ ܡܫܰܡܠܶܝܢ ܒܕܶܚܠܬܳܐ: ܘܰܨܒ̣ܳܐ ܒܛܳܒܘ̣ܬ ܟܝܳܢܶܗ ܘܪܶܚܡ̣ܰܬ݀ ܐ̱ܢܳܫܘ̣ܬܶܗ ܕܨܶܝܕ ܬܰܚ̈ܬܳܝܶܐ ܢ̣ܶܬܬܰܚܬܶܐ: ܘܰܠܗܳܢܽܘܢ ܕܐܰܒܝ̣ܕܝ̣ܢ ܗ̱ܘܰܘ ܒܰܥܒܳܪ ܦܘ̣ܩܕܳܢܳܐ ܢ̣ܟܢܶܫ: ܘܡܶܢ ܥܰܒܕܘ̣ܬܳܐ ܕܐܳܟܶܠܩܰܪܨܳܐ ܡܳܪܘ̣ܕܳܐ ܢ̣ܚܰܪܰܪ ܘܰܢ̣ܫܰܘܙܶܒ: ܘܡܶܢ ܥܰܒܕܶܗ ܐܰܘܟܝ̣ܬ ܬܰܠܡܝ̣ܕܶܗ ܠܥܰܒ̈ܕܶܐ ܒܝ̣̈ܫܶܐ ܐܰܝܟ ܥܰܒܕܳܐ ܠܩܶܛܠܳܐ ܐܶܙܕܰܒ̣ܰܢ ܕܰܫܦ̣ܰܪ ܠܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܶܠܝܳܐ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܡܰܢܘ̣ ܐܝ̣ܬ ܡܶܠܬܳܐ ܕܣܳܦ̇ܩܳܐ ܐܰܘ ܠܶܫܳܢܳܐ ܠܡܶܫܬܰܥܳܝܘ̣ ܫܰܪܒܳܐ ܕܚܰܫܰܝ̈ܟ ܣܓܝ̣̈ܕܶܐ ܘܦܳܪ̈ܘ̣ܩܳܝܶܐ: ܗܳܠܶܝܢ ܕܰܚܠܳܦܰܝܢ ܣܒܰܠ̣ܬ ܒܨܶܒܝܳܢܳܟ ܡܶܠܬܳܐ ܐܰܠܳܗܳܐ ܡܪܰܝܡܳܐ: ܐܰܘ ܡܰܢ ܣܰܟܘ̣ܠܬܳܢܳܐ ܘܚܰܟܝ̣ܡܳܐ ܡܶܫܟܰܚ ܠܡܶܒ̣ܨܳܐ ܘܰܠܡܶܓܰܫ ܕܝ̣̈ܢܶܐ ܠܳܐ ܡܶܬ̣ܕܰܪ̈ܟܳܢܶܐ ܕܣܘ̣ܪܳܩܳܟ ܠܳܐ ܡܶܬ̣ܡܰܠܠܳܢܳܐ ܕܡܶܛܽܠ ܦܘ̣ܪܩܳܢܳܐ ܕܝ̣ܠܰܢ: ܐܰܘ ܐܰܝܢܳܐ ܗܰܘܢܳܐ ܐܘ ܡܰܚܫܰܒܬܳܐ ܡ̇ܨܶܝܢ̣ ܠܡ̣ܶܥܪܳܐ ܠܪܰܒܘ̣ܬ ܡܺܐܡܰܪ ܡܘ̣ܟܳܟܳܟ ܕܰܗ̣ܘܳܐ ܡܶܛܽܠܳܬܰܢ: ܟܰܕ ܟܽܠܗܶܝܢ ܒܶܪ̈ܝܳܬܳܐ ܕܥܶܠܳܝ̈ܶܐ ܘܰܕܬܰܚ̈ܬܳܝܶܐ ܟܳܘ̇ܙܝ̣ܢ ܘܪܳܥܠܝ̣ܢ ܡ̣ܶܢ ܐܝ̣ܬܘ̣ܬܳܟ: ܥܰܡܳܐ ܒܝ̣ܫܳܐ ܘܰܡܡܰܪܡܪܳܢܳܐ ܕܝܘ̣̈ܕܳܝܶܐ ܛܳܠܡ̈ܰܝ ܛܰܝܒܘ̣ܬܳܟ ܐܶܬܟܰܢ̣ܰܫܘ̱ ܘܰܢܣ̣ܰܒܘ̱ ܡܶܠܟܳܐ ܥܰܡ ܪ̈ܰܒܰܝ ܟܳܗ̈ܢܶܐ ܚܰܢܳܢ ܘܩܰܝܳܦܳܐ ܠܡܰܘܒܳܕܘ̣ܬܳܟ: ܠܳܟ ܕܒܰܙܘܳܪܳܟ ܣܝ̣ܡܳܐ ܬܺܒܶܝܠ ܒܰܡܠܳܐܴܗ̇: ܗܳܝ̇ܕܶܝܢ ܝܺܗܘ̣ܕܳܐ ܣܟܰܪܝܘ̣ܛܳܐ ܗܰܘ̇ ܚܰܕ ܡܶܢ ܓܘ̣ܕܳܐ ܫܠܝ̣ܚܳܝ̇ܬܳܐ ܘܰܓܒܝ̣ܬܳܐ ܗܳܝ̇ ܕܰܓܒ̣ܰܝܬ ܠܬܶܫܡܶܫܬܳܟ ܗܰܘ̇ ܕܢܘ̣ܪܳܐ ܚܰܝܬܳܐ ܡܫܰܡܫܳܐ ܠܳܟ ܒܰܫܡܰܝܳܐ ܟܰܕ ܪܳܥܠܳܐ ܡܶܢ ܓܰܘܙܰܠܬܳܟ: ܗܘ̣ ܡܶܢ ܚܺܐܪܘ̣ܬܶܗ ܗܰܘ̇ ܫ̇ܒܶܐ̣ ܡܶܢ ܪܶܚܡ̣ܰܬ݀ ܟܶܣܦܳܐ: ܫܒ̣ܰܩ ܠܥܘ̣ܬܪܳܟ ܠܳܐ ܡܶܣܬܰܝܟܳܢܳܐ ܘܰܪܗ̣ܶܛ ܠܘܳܬ ܟܶܢܫܳܐ ܕܩܳܛܘ̣̈ܠܶܐ ܒܰܠܘܺܝ̣ܬ ܣܳܛܳܢܳܐ: ܘܟܰܕ ܗ̣ܶܢܽܘܢ ܫ̇ܠܶܝܢ̣ ܘܰܒܗܝ̣ܠܝ̣ܢ ܩ̣ܪܶܒ ܠܘܳܬܗܽܘܢ: ܘܐܶܫ̣ܬܰܘܕܝ̣ ܠܗܽܘܢ ܠܰܡ̣ܙܰܒܳܢܘ̣ܬܳܟ ܐܰܘܟܝ̣ܬ ܡܰܫ̣ܠܡܳܢܘ̣ܬܳܟ ܠܗܽܘܢ ܟܰܕ ܐܳܡܰܪ: ܡܳܢܳܐ ܨܳܒܶܝܢ ܐܰܢ̱ܬܘܢ ܠܡ̣ܶܬܰܠ ܠܝ̣ ܘܐܶܢܳܐ ܡܰܫ̇ܠܶܡ ܐ̱ܢܳܐ ܠܶܗ ܠܟܽܘܢ ܠܝܶܫܘ̣ܥ ܢܳܨܪܳܝܳܐ ܕܠܶܗ ܒܳܥܶܝܢ ܐܰܢ̱ܬܘܢ: ܡܳܢܳܐ ܩܳـܨܶܝܢ ܐܢ̱ܬܽܘܢ ܥܰܡܝ̱ ܕܐܰܫ̇ܠܡܺܝ̣ܘܗ̱ܝ ܠܟܽܘܢ: ܠܗܰܘ̇ ܕܰܫ̣ܪܳܐ ܫܰܒܬܳܐ ܒܰܥܒܳܕܰܘ̈ܗ̱ܝ: ܘܐܶܡ̣ܰܪ ܕܗܘ̣ ܐܝ̣ܬܰܘܗ̱ܝ ܡܳܪܳܗ̇ ܕܫܰܒܬܳܐ: ܡܳܢܳܐ ܝܳܗ̇ܒܝ̣ܢ ܐܰܢ̱ܬܘܢ ܠܝ̣: ܘܐܶܢܳܐ ܡܰܫ̇ܠܶܡ ܐ̱ܢܳܐ ܠܶܗ ܠܟܽܘܢ: ܠܗܰܘ̇ ܕܐܶܡ̣ܰܪ ܕܰܒܪܶܗ ܐ̱ܢܳܐ ܕܐܰܠܳܗܳܐ ܘܡܰܠܟܶܗ ܕܐܝ̣ܣܪܳܐܝܶܠ: ܬܰܠܡܝ̣ܕܶܗ ܐ̱ܢܳܐ ܘܰܬܟܝ̣ܠ ܥܠܰܝ: ܗ̣ܶܢܽܘܢ ܕܶܝܢ ܥܰܡ ܪܘܳܙܳܐ ܕܠܶܒܳܐ ܐܶܫ̣ܬܰܘܕܝ̣ܘ ܠܶܗ ܬܠܳܬܝ̣ܢ ܕܝ̣ܢܳܪ̈ܶܐ ܐܰܘܟܝ̣ܬ ܟܶܣ̈ܦܶܐ: ܘܡ̣ܶܢ ܗܳܝܕܶܝܢ ܒܳܥܶܐ ܗ̱ܘܳܐ ܦܶܠܥܳܐ ܘܙܰܒܢܳܐ ܕܢܰܫ̣ܠܡܳܟ ܗܰܘ̇ ܕܟܘ̣ܪܣܝܳܐ ܒܰܫܡܰܝܳܐ ܡܠ̣ܰܟ݂ܬ ܠܶܗ ܐܰܝܟ ܦܶܛܪܘ̣ܣ ܗܰܘ̇ ܕܫܘ̣ܠܛܳܢܳܐ ܒܰܫܡܰܝܳܐ ܘܒܰܐܪܥܳܐ ܝܰܗ̣ܒܬ ܠܶܗ: ܗܰܘ ܕܒܰܫܡܳܟ ܐܰܣܝ̣ ܟܪ̈ܝ̣ܗܶܐ ܘܰܛܪܰܕ ܕܰܝ̈ܘܶܐ ܘܢܰܚ̣ܶܡ ܡܝ̣̈ܬܶܐ: ܗܰܘ̇ ܕܒܰܚܫܳܡܝ̣ܬܳܐ ܕܝ̣ܠܳܟ ܐ̱ܪܳܙܳܢܳܝܬܳܐ ܫܰܘܬܶܦ̣ܬܳܝܗ̱ܝ: ܘܡܶܢ ܫܝܳܓܬܳܐ ܕܪ̈ܶܓܠܰܘܗ̱ܝ ܠܳܐ ܓܠ̣ܰܙܬܳܝܗ̱ܝ ܘܡܶܢ ܢܣܝ̣ܒܘ̣ܬܳܐ ܕܦܰܓܪܳܟ ܘܰܕܡܳܟ ܚܰܣܝܳܐ ܠܳܐ ܕܚܰܩ̣ܬܳܝܗ̱ܝ: ܐܳܘ ܠܢܰܓܝ̣ܪܘ̣ܬ ܪܘ̣ܚܳܐ ܘܒܰܣܝ̣ܡܘ̣ܬܐ ܕܝ̣ܠܳܟ ܐܰܠܳܗܳܐ: ܕܰܠܗܰܘ̇ ܕܐܰܪܝ̣ܡ ܥܠܰܝܟ ܥܶܩܒܳܐ: ܟܽܠܗܶܝܢ ܐܰܝܠܶܝܢ ܕܰܠܦܶܛܪܘ̣ܣ ܘܚܰܒܪ̈ܰܘܗ̱ܝ ܐܰܓܶܥ̣ܠܬ: ܟܰܕ ܗܘ̣ ܢܶܟܠܳܐ ܐܶܬܚܰܫ̣ܰܒ ܥܠܰܝܟ ܘܰܒܨܶܒܝܳܢܶܗ ܫܰܒ̣ܩܳܟ: ܘܰܠܟܶܢܫܳܐ ܕܨܳܠܘ̣̈ܒܶܐ ܢܩ̣ܶܦ: ܘܥܰܠ ܗܳܕܶܐ ܫܰܘܕܰܥ̣ܬ ܠܟܺܐܦܳܐ ܘܰܠܫܰܪܟܳܐ ܕܚܰܒܪ̈ܰܘܗ̱ܝ ܕܚܰܕ ܡܶܢܟܽܘܢ ܡܛܰܝܰܒ ܕܰܠܒܝ̣̈ܫܶܐ ܢܰܫ̣ܠܡܰܢܝ̱: ܐܶܠܳܐ ܐܰܢ̱ܬܘܢ ܠܳܐ ܬܶܕܚܠܽܘܢ: ܗܰܘ̇ ܕܨܳܒܰܥ ܐܝ̣ܕܶܗ ܒܠܰܓܬܳܐ ܥܰܡܝ̱ ܗܳܢܳܐ ܐܝ̣ܬܰܘܗ̱ܝ ܐܶܙܕܰܗܰܪܘ̱ ܡܶܢܶܗ: ܠܟܽܘܢ ܕܶܝܢ ܐܶܡܰܬܝ̱ ܕܡܶܬܢܰܚܰܡ ܐ̱ܢܳܐ ܠܰܬܠܝ̣ܬܳܝܳܐ ܒܰܫܠܳܡܳܐ ܡܰܦܨܰܚ ܐ̱ܢܳܐ ܘܰܡܚܰܕܶܐ ܐ̱ܢܳܐ ܘܛܰܝܒܘ̣ܬܳܐ ܕܪܘ̣ܚܳܐ ܩܰܕܝ̣ܫܳܐ ܡܳܠܶܐ ܐ̱ܢܳܐ: ܘܡܶܛܽܠ ܗܳܕܶܐ ܒܳܥܶܝܢܰܢ ܡܶܢܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܚܰܢܳܢܳܐ ܘܪܳܚܶܡ ܐ̱ܢܳܫ̈ܳܐ: ܗܰܘ ܕܟܽܠܗܶܝܢ ܐܰܝܠܶܝܢ ܕܚܰܝܳܒ ܗ̱ܘܳܐ ܪܝ̣ܫ ܓܒܝ̣ܠܬܰܢ ܐܳܕܳܡ ܥܠܰܝܟ ܩܰܒܶܠ̣ܬ: ܘܠܰܚ̈ܛܳܗܶܐ ܕܟܽܠܰܢ ܒܰܩܢܘ̣ܡܳܟ ܫܩܰܠ̣ܬ: ܘܒܰܙܩܝ̣ܦܳܟ ܩܒܰܥ̣ܬ: ܐܰܝܟܰܢܳܐ ܕܰܬܚ̣ܰܕܶܬ ܠܘܳܬܰܢ ܦܪ̈ܝ̣ܩܰܝ ܒܰܨܠܝ̣ܒܳܟ: ܘܬܰܫ̣ܘܶܐ ܠܰܢ ܒܛܰܝܒܘ̣ܬܳܟ ܠܒܘ̣ܣܳܡܳܐ ܕܰܚܫܳܡܝ̣ܬܳܐ ܕܝ̣ܠܳܟ ܪܘ̣ܚܳܢܳܝܬܳܐ: ܘܰܠܡ̣ܶܬܬܫܝ̣ܓܳܢܘ̣ܬܳܐ ܕܡܶܢ ܟܽܠܗܶܝܢ ܠܳܐ ܢܳܡܘ̣̈ܣܳܝܘܳܬܰܢ: ܘܰܠܫܰܘܬܳܦܘ̣ܬܳܐ ܡܰܥ̣ܒܕܰܬ݀ ܚܰܝ̈ܶܐ ܕܦܰܓܪܳܟ ܘܰܕܡܳܟ ܡܚܰܣܝܳܢܳܐ: ܟܰܕ ܡܫܰܘܙܶܒ ܐܰܢ̱ܬ ܠܰܢ ܡܶܢ ܦܣܳܩ ܣܰܒܪܳܐ ܗܰܘ̇ ܕܚ̣ܰܫ ܝܺܗܘ̣ܕܳܐ ܕܳܘܝܳܐ: ܘܡܶܢ ܕܝ̣ܢܳܐ ܟܺܐܢܳܐ ܕܰܠܥܳܠܰܡ ܡܦܰܨܶܐ ܐܰܢ̱ܬ ܠܰܢ: ܐܰܫܘܳܐ ܠܰܢ ܘܰܠܥܰܢܝ̣̈ܕܰܝܢ ܠܰܡܢܳܬܳܐ ܕܩܰܕܝ̣̈ܫܰܝܟ ܘܰܠܡܰܦܪܓܘ̣ܬܳܐ ܕܰܚܕܘ̣̈ܓܰܝܟ: ܘܰܠܚܰܕܘ̣ܬܳܐ ܕܥܰܡ ܣܡܝ̣̈ܟܰܝܟ ܒܡܰܠܟܘ̣ܬܳܐ ܫܡܰܝܳܢܝ̣ܬܳܐ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܦܫܽܘ̣ܛ ܡܳܪܝ̱ ܝܰܡܝ̣ܢܳܟ ܗܳܝ̇ ܥܛܝ̣ܦܰܬ݀ ܙܳܟܘ̣ܬܳܐ ܘܡܰܠܝܰܬ݀ ܥܘ̣ܕܪ̈ܳܢܶܐ: ܥܰܠ ܥܰܡܳܐ ܕܝ̣ܠܳܟ ܡܗܰܝܡܢܳܐ ܘܒܰܪܶܟ ܠܟܶܢܫܳܐ ܕܡܰܪܥܝ̣ܬܳܟ: ܘܩܰܒܶܠ ܠܦܝ̣ܪܡܳܐ ܡܶܢ ܐܝ̣̈ܕܰܝܳܐ ܕܝ̣ܠܰܢ ܚܰܠܴ̈ܫܳܬܳܐ ܕܠܳܟ ܐܶܬ̣ܩܰܪܰܒ ܠܰܢܝܳܚܳܐ ܕܡܳܪܘ̣ܬܳܟ: ܒܶܗ ܒܝܰܘܡܳܐ ܗܳܢܳܐ ܕܚܰܫܳܟ ܦܳܪܘ̣ܩܳܝܳܐ ܘܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܘܐܰܫܘܳܐ ܠܰܢ ܕܒܰܒ̈ܢܳܬ ܩ̈ܳܠܶܐ ܩܰܕܝ̣̈ܫܳܬܳܐ: ܘܰܒܠܶܥ̈ܙܶܐ ܪ̈ܘ̣ܚܳܢܳܝܶܐ ܠܰܐܠܳܗܘ̣ܬܳܟ ܢ̇ܗܰܠܶܠ ܘܰܢ̇ܙܰܡܰܪ ܘܰܢ̇ܪܰܡܪܶܡ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀