ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܒܨܶܒܝܳܢܳܟ ܡܳܪܝ̱ ܐܶܬ̣ܰܝܬ ܠܚܰܫܳܐ: ܘܰܒܚܘ̣ܒܳܟ ܐܶܬܛܰܝܰܒ̣ܬ ܠܩܶܛܠܳܐ ܘܪܶܓܬܳܐ ܪܰܓ̣ܬܳܟ ܕܬ̣ܶܐܟܘ̣ܠ ܦܶܨܚܳܐ ܥܰܡ ܬܰܠܡܝ̣̈ܕܰܝܟ: ܘܬܰܫ̣ܠܶܡ ܠܗܽܘܢ ܓܘ̣ܥܠܳܢܳܐ ܛܳܒܳܐ ܕܣܝ̣̈ܡܳܬܳܐ ܕܐ̱ܪ̈ܳܙܰܝܟ: ܘܚܰܘܝ̣ܬ ܠܗܽܘܢ ܫܪܳܪܳܐ ܕܡܘ̣ܟܳܟܳܟ: ܘܕܺܝܰܬܝ̣ܩܺܝ̣ ܚ̇ܕܰܬܳܐ ܕܡܰܘܬܳܟ: ܫܘ̣ܒܚܳܐ ܠܳܟ ܕܠܳܐ ܡܶܬܕܰܪܟܳܐ ܚܶܟܡܬܳܟ: ܘܠܳܐ ܡܶܬ̣ܒܨܶܝܢ ܕܝ̣̈ܢܰܝܟ: ܘܠܳܐ ܡܶܣܬܰܝܟܳܐ ܪܶܚܡܰܬ݀ ܐ̱ܢܳܫܘ̣ܬܳܟ ܘܪܰܒ ܥܘ̣ܬܪܳܐ ܕܛܰܝܒܘ̣ܬܳܟ: ܡܒܰܪܰܟ ܐܰܢ̱ܬ ܡ̣ܶܢ ܟܽܠ ܕܰܒ̣ܪܰܝܬ ܘܰܦܪܰܩ̣ܬ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܕܶܒܚܳܐ ܚܰܝܳܐ ܘܰܡܩܰܒܠܳܢܳܐ ܕܕܶܒ̈ܚܶܐ: ܠܗܰܘ̇ ܙܘ̣ܦܳܐ ܡܚܰܣܝܳܢܳܐ ܘܰܪܣܳܣܳܐ ܡܕܰܟܝܳܢܳܐ: ܠܗܰܘ̇ ܕܗܘ̣ ܠܶܗ ܕܒ̣ܰܚ ܒܪܰܘܡܳܗ̇ ܕܓܳܓܘ̣ܠܬܳܐ ܡܶܛܽܠ ܦܘ̣ܪܩܳܢܰܢ: ܘܒܰܕܒܝ̣ܚܘ̣ܬܶܗ ܚ̣ܰܣܝ̣ ܘܩ̣ܰܕܶܫ ܠܢܰܦ̈ܫܳܬܳܐ ܕܝ̣ܠܰܢ ܘܢܰܓ̣ܕܰܢ ܠܣܶܓܕܬܳܐ ܕܐܝ̣ܩܳܪܶܗ: ܘܦܰܪܩ̣ܰܢ ܒܰܨܠܝ̣ܒܶܗ ܙܰܟܳܝܳܐ ܘܐܰܚ̣ܝܰܢ ܒܡܰܘܬܶܗ ܡܰܥܒܶܕ ܚܰܝ̈ܶܐ: ܘܐܰܩܝ̣ܡܰܢ ܒܰܩܝܳܡܬܶܗ ܡܫܰܒܰܚܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܫܽܘ̣ܒܚܳܐ ܘܠܳܟ ܬܰܘܕܝ̣ܬܳܐ ܝܶܫܘ̣ܥ ܡܫܝ̣ܚܳܐ: ܚܰܝܠܳܐ ܘܚܶܟܡܬܳܐ ܕܐܰܠܳܗܳܐ ܘܐܰܒܳܐ: ܨܶܡܚܳܐ ܫ̇ܘܶܐ̣ ܒܐܘ̣ܣܺܝܰܐ ܠܝܳܠܘ̣ܕܶܗ: ܢܘ̣ܗܪܳܐ ܦܨܝ̣ܚܳܐ ܕܐܰܦ̣ܨܰܚ ܠܟܽܠܳܗ̇ ܒܪܝ̣ܬܳܐ ܒܡܶܬܓܰܫܡܳܢܘ̣ܬܶܗ ܕܡܶܢ ܒܬܘ̣ܠܬܳܐ: ܡܩܰܒܶܠ ܩܘ̣̈ܕܳܫܶܐ ܕܰܣܪ̈ܳܦܶܐ ܕܩܰܒ̣ܶܠ ܥܠܰܘܗ̱ܝ ܚܰܫܳܐ ܘܡܰܘܬܳܐ ܘܪܰܥܝ̣ ܠܰܐܒܘ̣ܗ̣ܝ ܥܰܡ ܐܳܕܳܡ ܚܰܝܳܒܳܐ: ܡܩܰܒܶܠ ܕܶܒ̈ܚܶܐ ܘܩܘ̣ܪ̈ܒܳܢܶܐ: ܕܢܰܓ݂ܕܶܗ ܚܘ̣ܒܶܗ ܕܢܶܗ̣ܘܶܐ ܕܶܒܚܳܐ ܚܠܳܦ ܚܰܛܳܝ̈ܶܐ: ܘܫܰܝܶܢ ܠܡܰܨܘ̣ܬܳܐ ܗܳܝ̇ ܕܰܐܫ̣ܪܶܩ ܚܶܘܝܳܐ ܠܚܰܘܳܐ ܒܶܝܬ ܐܝ̣ܠܳܢ̈ܶܐ ܕܦܰܪܕܰܝܣܳܐ: ܟܳܗܢܳܐ ܡܫܰܒܚܳܐ ܘܪܝ̣ܫ ܟܘ̣ܡܪ̈ܶܐ ܫܡܰܝܳܢܳܐ ܕܒܰܕܒܝ̣ܚܘ̣ܬܶܗ ܫܰܟ̣ܶܢ ܚܘ̣ܣܳܝܳܐ ܠܓܶܢܣܰܢ ܚܰܠܳܫܳܐ: ܟܰܣܝܳܐ ܘܠܳܐ ܡܶܬ̣ܚܰܙܝܳܢܳܐ ܕܐܶܬ̣ܚܙܝ̣ ܥܰܡܰܢ ܐܰܟܘܳܬܰܢ: ܕܰܢܥ̣ܰܠܶܐ ܠܰܢ ܠܰܐܬܪܰܢ ܩܰܕܡܳܝܳܐ: ܘܠܳܐ ܚܳܫܘ̣ܫܳܐ ܘܠܳܐ ܡܳܝܘ̣ܬܳܐ ܕܰܕܪܰܫ̣ ܐܘ̣ܪܚܳܐ ܠܘ̣ܩܒܰܠ ܡܰܘܬܳܐ: ܘܰܒܕܘ̣ܪ̈ܟܳܬܶܗ ܩܰܕܝ̣̈ܫܳܬܳܐ ܥܰܩ̣ܪܳܗ̇ ܠܠܰܘܛܬܳܐ ܡܶܢ ܐܰܪܥܳܐ: ܐܳܣܝܳܐ ܕܰܟܪ̈ܝ̣ܗܶܐ ܘܥܳܨܘ̣ܒܳܐ ܕܰܡܡܰܚܰܝ̈ܳܐ ܕܰܥܒ̣ܰܕ ܬܶܕܡܪ̈ܳܬܳܐ ܒܥܳܠܡܳܐ: ܘܰܒܫܘ̣ܠܳܡܳܐ ܕܟܽܠܳܗ̇ ܡܕܰܒܪܳܢܘ̣ܬܳܐ ܦܳܪܘ̣ܩܳܝ̇ܬܳܐ ܐܶܬ̣ܩܪܝ̣ ܠܚܰܫܳܐ ܒܨܶܒܝܳܢܶܗ: ܘܰܩܕܳܡ ܚܰܫܶܗ ܦܳܪܘ̣ܩܳܝܳܐ ܩ̣ܰܕܶܡ ܐܶܡ̣ܰܪ ܠܬܰܠܡܝ̣̈ܕܰܘܗ̱ܝ ܓܒܰܝ̈ܳܐ ܘܩܰܕܝ̣̈ܫܶܐ: ܕܡ̣ܶܐܪܰܓ ܪܰܓ̣ܬܰܢܝ̱ ܝܰܘܡܳܢܳܐ ܕܶܐܟ̇ܘ̣ܠ ܥܰܡܟܽܘܢ ܐܶܡܰܪ ܦܶܨܚܳܐ ܐܝܟ ܢܳܡܘ̣ܣܳܐ: ܝܰܘܡܳܢܳܐ ܐܶܡ̣ܰܪ ܡܳܪܰܢ ܠܬܰܠ̈ܡܝ̣ܕܰܘܗ̱ܝ: ܕܙܶܠܽܘܢ ܛܰܝܶܒܘ̱ ܠܝ̣ ܒܥܶܠܝ̣ܬܳܐ ܕܐܶܟ̇ܘ̣ܠ ܥܰܡܟܽܘܢ ܗܳܢܳܐ ܦܶܨܚܳܐ ܩܕܳܡ ܕܶܐܚܰܫ: ܝܰܘܡܳܢܳܐ ܐܶܬ̣ܬܰܩܰܢ ܠܶܗ ܒܰܝܬܳܐ ܙܥܘ̣ܪܳܐ ܠܗܰܘ̇ ܕܰܒܢ̣ܳܐ ܒܰܝܬܶܗ ܕܥܳܠܡܳܐ ܡܶܢ ܒܪܝ̣ܫܝ̣ܬ: ܘܰܡ̣ܬܰܚ ܫܡܰܝܳܐ ܬܰܛܠܝ̣ܠܶܗ ܘܐܰܬ̣ܩܶܢ ܐܰܪܥܳܐ ܘܫܶܬܶܐܣܰܘ̈ܗ̣ܝ: ܘܰܐܫ̣ܪܝ̣ ܒܓܰܘܶܗ ܠܪܝ̣ܫܳܐ ܕܛܘ̣ܗ̈ܡܶܐ ܘܰܕܫܰܪ̈ܒܳܬܳܐ ܐܳܕܳܡ: ܝܰܘܡܳܢܳܐ ܢܦ̣ܰܩ ܫܶܡܫܳܐ ܕܙܰܕܝ̣ܩܘ̣ܬܳܐ ܘܰܕܒ̣ܰܪ ܥܰܡܶܗ ܠܫܳܥܰܘ̈ܗ̱ܝ ܢܰܗܝ̣ܪ̈ܳܬܳܐ ܕܢ̣ܺܐܙܰܠ ܢܶܥ̣ܒܶܕ ܥܺܐܕܳܐ ܒܶܝܬ ܚܶܫܘ̣̈ܟܶܐ: ܘܢ̣ܶܐܟܘ̣ܠ ܐܶܡܪܳܐ ܒܰܚܫܳܡܝ̣ܬܳܐ ܗܳܝ̇ ܐ̱ܪܙܳܢܳܝ̇ܬܳܐ: ܝܰܘܡܳܢܳܐ ܒܶܝܬ ܪ̈ܰܡܫܶܐ ܐܰܣܡ̣ܶܟ ܠܰܒܢܰܝ̈ ܐ̱ܪܳܙܶܗ ܥܰܠ ܦܳܬܘ̣ܪܶܗ ܘܐܰܠ̣ܶܦ ܐܶܢܽܘܢ ܐ̱ܪܳܙܳܐ ܚ̣ܰܕܬܳܐ ܕܥܺܕܬܶܗ ܘܚܰܘܝ̣ ܐܶܢܽܘܢ ܐܘ̣ܪܚܳܐ ܕܰܫܪܳܪܳܐ: ܝܰܘܡܳܢܳܐ ܡܰܠܟܳܐ ܫܡܰܝܳܢܳܐ ܡܚ̣ܳܐ ܣܶܕܘ̣ܢܳܐ ܒܚܰܨܰܘ̈ܗ̱ܝ ܘܫܰܡ̣ܶܫ ܗ̱ܘܳܐ ܩܕܳܡ ܣܡܝ̣̈ܟܶܐ ܒܫܳܪܘ̣ܬܳܐ: ܝܰܘܡܳܢܳܐ ܬܗ̣ܰܪܘ̱ ܚܰܝ̈ܠܰܘܳܬܳܐ ܫܡܰܝ̈ܳܢܶܐ: ܕܰܚ̣ܙܰܘ ܠܡܳܪܗܽܘܢ ܕܰܟܒܝ̣ܢ ܣܶܕܘ̣ܢܳܐ ܐܰܝܟ ܥܰܒܕܳܐ ܘܡܰܪܟܰܢ ܪܝ̣ܫܶܗ ܩܕܳܡ ܬܰܠܡܝ̣̈ܕܰܘܗ̱ܝ ܘܰܡܫܝ̣ܓ ܪ̈ܶܓܠܰܝܗܽܘܢ: ܝܰܘܡܳܢܳܐ ܫܺܐܕ̈ܶܐ ܚܬܝ̣ܪ̈ܶܐ ܘܡܳܪ̈ܘ̣ܕܶܐ ܕܐܶܬ̣ܬܪܝ̣ܡܘ̱ ܐܰܝܟ ܓܶܢܣܰܢ ܒܗ̣ܶܬܘ̱ ܘܰܐܚܦ̣ܰܪܘ̱ ܘܰܢܦ̣ܰܠܘ̱ ܡܶܢ ܕܰܪ̈ܓܰܝܗܽܘܢ ܕܰܚ̣ܙܰܘ ܠܥܰܦܪܳܐ ܫܝ̣ܛܳܐ ܘܛܝ̣ܢܳܐ ܓܒܝ̣ܠܳܐ ܕܡܬ̣ܝܰܩܰܪ ܗ̱ܘܳܐ ܡܶܢ ܓܳܒܘ̣ܠܶܗ: ܝܰܘܡܳܢܳܐ ܐܶܟ̣ܰܠ ܡܳܪܰܢ ܦܶܨܚܳܐ ܙܥܘ̣ܪܳܐ ܘܛܘ̣ܦܣܳܐ ܗ̣ܘܳܐ ܠܰܢ: ܗܘ̣ ܦܶܨܚܳܐ ܪܰܒܳܐ ܘܫܰܪܝ̣ܪܳܐ ܘܰܚܠ̣ܰܛ ܦܶܨܚܳܐ ܒܦܶܨܚܳܐ: ܘܰܡ̣ܙܰܓ ܥܰܕܥܺܐܕܳܐ ܒܥܰܕܥܺܐܕܳܐ: ܝܰܘܡܳܢܳܐ ܒܶܝܬ ܪ̈ܰܡܫܶܐ ܚܠ̣ܰܛ ܡܳܪܰܢ ܡܪܳܪ̈ܶܐ ܒܗܳܝ̇ ܡܶܐܟܘ̣ܠܬܳܐ ܕܶܐܡܰܪ ܦܶܨܚܳܐ ܘܡ̣ܰܪ̈ܝ̱ ܫܶܢ̈ܶܐ ܕܰܫܠܝ̣ܚܘ̣ܬܳܐ: ܝܰܘܡܳܢܳܐ ܬܰܠܡܝ̣̈ܕܶܐ ܩܰܕܝ̣̈ܫܶܐ ܥܰܒ̣ܕܘ̣ܗ̱ܝ ܪܰܡܫܳܐ ܘܠܶܠܝܳܐ ܕܥܳܩܬܳܐ ܘܰܕܟܰܪܝܘ̣ܬܳܐ ܟܰܕ ܫܡܰܥ̣ܘ̱ ܡܶܢ ܪܰܒܗܽܘܢ ܕܚܰܕ ܡܶܢܟܽܘܢ ܡܰܫ̇ܠܶܡ ܠܝ̣ ܠܰܙܩܝ̣ܦܳܐ ܘܡܰܘܬܳܐ: ܘܰܒܚܰܫܳܐ ܘܰܡܪܳܪ̈ܶܐ ܐܰܟ̣ܠܘ̣ܗ̇ ܠܰܚܫܳܡܝ̣ܬܳܐ: ܝܰܘܡܳܢܳܐ ܚܰܬ̣ܶܡܬܳܗ̇ ܡܳܪܰܢ ܠܕܺܝܰܬܝ̣ܩܝ̣ ܥܰܬܝ̣ܩܬܳܐ: ܘܫܰܪܝ̣ ܕܢ̣ܶܪܫܘ̣ܡ ܠܰܚ̇ܕܰܬܳܐ ܘܢ̣ܰܠܶܦ ܠܰܒܢܰܝ̈ ܒܰܝܬܳܐ ܕܗܰܝܡܳܢܘ̣ܬܳܐ: ܝܰܘܡܳܢܳܐ ܡܳܪܰܢ ܦܰܓܪܶܗ ܩ̣ܨܳܐ ܘܰܡ̣ܙܰܓ ܠܰܕܡܶܗ ܘܦܰܠ̣ܶܓ ܠܰܬܪܶܥܣܪܬܳܐ ܘܐܶܡ̣ܰܪ ܠܗܽܘܢ: ܕܗܳܢܰܘ ܦܰܓܪܝ̱ ܩܰܕܝ̣ܫܳܐ ܘܕܶܡܝ̱ ܝܰܩܝ̣ܪܳܐ ܝܳܗܶܒ ܐ̱ܢܳܐ ܠܟܽܘܢ ܪܰܗܒܘ̣ܢܳܐ ܕܚܰܝ̈ܶܐ ܚ̣ܰܕ̈ܬܶܐ: ܕܰܒܗܽܘܢ ܢ̣ܶܬܚܰܣܽܘܢ ܚܰܛܳܝ̈ܶܐ ܘܢ̣ܶܬܩܰܕܫܽܘܢ ܬܰܝ̈ܳܒܶܐ: ܗܳܢܰܘ ܐ̱ܪܳܙܳܐ ܩܰܕܝ̣ܫܳܐ ܕܠܶܗ ܐܶܬ̣ܪܰܓܪܰܓܘ̱ ܟܺܐܢ̈ܶܐ ܘܙܰܕܝ̣̈ܩܶܐ ܘܨܳܪܘ̱ ܕܶܡ̈ܘܳܬܶܗ ܒܓܶܠ̈ܝܳܢܰܝܗܽܘܢ ܫܰܦܝ̣ܪ̈ܶܐ: ܗܳܢܰܘ ܐ̱ܪܳܙܳܐ ܩܰܕܝ̣ܫܳܐ ܕܨܳܪܘ̱ ܛܘ̣ܦܣܶܗ ܗܳܒܝ̣ܠ ܐܶܡܪܳܐ ܬܰܡܝ̣ܡܳܐ ܒܰܕܒܝ̣ܚܘ̣ܬܶܗ ܟܰܕ ܐܶܬ̣ܕܒܰܪ ܠܢܶܟܣܬܳܐ ܐܰܝܟ ܕܶܒܚܳܐ ܫܰܠܡܳܐ: ܗܳܢܰܘ ܐ̱ܪܳܙܳܐ ܩܰܕܝ̣ܫܳܐ ܕܪܰܫܡ̣ܶܗ ܢܘ̣ܚ ܙܰܕܝ̣ܩܳܐ ܒܟܶܘܶܝܠܳܐ ܘܙܰܝܰܚ ܛܘ̣̈ܦܣܶܐ ܥܰܠ ܡܳܡ̈ܘ̣ܠܶܐ: ܗܳܢܰܘ ܐ̱ܪܳܙܳܐ ܐܰܠܳܗܳܝܳܐ ܕܰܒܛܶܟܣܶܗ ܩܳܐܶܡ ܗ̱ܘܳܐ ܡܰܠܟܝ̣ܙܕܶܩ ܟܘ̣ܡܪܳܐ ܪܰܒܳܐ: ܘܠܰܚܡܳܐ ܚܰܡܝ̣ܥܳܐ ܘܚܰܡܪܳܐ ܩ̣ܰܪܶܒ ܒܟܘ̣̈ܗܳܢܰܘܗ̱ܝ ܪ̈ܘ̣ܚܳܢܳܝܶܐ ܠܶܗ ܨܳܐܰܪ ܗ̱ܘܳܐ: ܗܳܢܰܘ ܥܰܕܥܺܐܕܳܐ ܫܒܝ̣ܚܳܐ ܕܫܰܡ̣ܶܫ ܐ̱ܪܳܙܶܗ ܐܰܒܪܳܗܳܡ ܥܰܠ ܪܝ̣ܫ ܛܘ̣ܪܳܐ ܕܐܳܡܘ̣ܪ̈ܳܝܶܐ ܟܰܕ ܨܒ̣ܳܐ ܕܢܶܕܒܘ̣ܚ ܠܐܝ̣ܣܚܳܩ ܒܪܶܗ ܗܰܘ̇ ܕܳܐܦ ܕܒܶܗ ܡܶܢ ܩܶܛܠܳܐ ܐܶܫ̣ܬܰܘܙܰܒ: ܗܳܢܰܘ ܥܺܐܕܳܐ ܩܰܕܝ̣ܫܳܐ ܕܨܳܪܶܗ ܡܘ̣ܫܶܐ ܢܒܺܝܳܐ ܒܶܝܬ ܡܶܨܪ̈ܳܝܶܐ ܒܶܐܡܰܪ ܦܶܨܚܳܐ ܕܰܕܒ̣ܰܚ ܘܪܰܣ̣ܘ̱ ܕܡܶܗ ܥܰܠ ܬܰܪ̈ܥܰܝܗܽܘܢ ܒܢܰܝ̈ ܝܰܥܩܘܒ̇: ܘܒܶܗ ܐܶܬ̣ܦܰܨܝ̣ܘ ܡܶܢ ܡܚܰܒܠܳܢܳܐ ܕܰܩ̣ܛܰܠ ܟܽܠܗܽܘܢ ܒܘ̣ܟܪ̈ܶܐ ܕܐܰܪܥܳܐ ܕܡܶܨܪܶܝܢ: ܗܳܢܰܘ ܝܰܘܡܳܐ ܫܒܝ̣ܚܳܐ ܕܠܶܗ ܪܫ̣ܰܡ ܝܶܫܘ̣ܥ ܒܰܪܢܽܘܢ ܒܰܦܩܰܥܬܳܐ ܕܐܝ̣ܪܝ̣ܚܘ̣ ܟܰܕ ܐܳܡܰܪ ܠܰܒܢܰܝ̈ ܥܰܡܶܗ ܕܟܘ̣ܣܘ̱ ܡܶܢ ܥܳܢ̈ܳܐ ܘܡܶܢ ܬܰܘܪ̈ܶܐ ܘܰܥܒܶܕܘ̱ ܦܶܨܚܳܐ ܠܡܳܪܝܳܐ ܐܰܠܳܗܟܽܘܢ ܒܰܐܪܒܰܥܶܣܪܶܐ ܒܪܰܡܫܳܐ ܒܝܰܪܚܳܐ ܩܰܕܡܳܝܳܐ: ܗܳܢܰܘ ܐ̱ܪܳܙܳܐ ܪܰܒܳܐ ܘܩܰܕܝ̣ܫܳܐ ܕܠܶܗ ܨܳܐܰܪ ܗ̱ܘܳܐ ܫܶܡܫܽܘܢ ܓܰܒܝܳܐ ܒܶܐܡܰܪ ܚܰܠܒܳܐ ܕܒܶܗ ܚܰܝܶܒ ܠܓܰܢ̱ܒܳܪ̈ܶܐ ܘܥܘ̣ܪ̈ܠܶܐ ܕܰܦܠܰܫ̈ܬܳܝܶܐ: ܗܳܢܰܘ ܕܶܒܚܳܐ ܫܡܰܝܳܢܳܐ ܕܨܳܪ ܢܰܦܬܰܚ ܛܘ̣ܦܣܶܗ ܟܰܕ ܕܒܰܚ̣ ܠܒܰܪܬܶܗ ܕܶܒܚܳܐ ܠܡܳܪܝܳܐ ܚܠܳܦ ܙܳܟܘ̣ܬܳܐ: ܗܳܢܰܘ ܐ̱ܪܳܙܳܐ ܩܰܕܝ̣ܫܳܐ ܕܰܚ̣ܙܳܐ ܐܶܫܰܥܝܳܐ ܢܒܺܝܳܐ ܒܰܩܕܘ̣ܫܩܘ̣̈ܕܫܝ̣ܢ ܟܰܕ ܩܰܒ̣ܶܠ ܓܡܘ̣ܪܬܳܐ ܒܟܰܠܒܬܳܐ ܕܢܘ̣ܪܳܐ ܡܶܢ ܣܪܳܦܳܐ ܕܚܰܦܝ̣ ܐܰܦܰܘ̈ܗ̱ܝ ܕܠܳܐ ܢ̣ܚܘ̣ܪ ܒܪܰܒܘ̣ܬܳܐ ܕܬܶܕܡܘ̣ܪܬܶܗ ܕܐ̱ܪܳܙܳܐ: ܗܳܢܰܘ ܪܰܡܫܳܐ ܐ̱ܚܪܳܝܳܐ ܕܒܶܗ ܦܶܨܚܳܐ ܕܡܶܨܪܶܝܢ ܫܰܩ̣ܠ ܫܘ̣ܠܳܡܳܐ ܘܰܥܒ̣ܰܪ̈ܝ̱ ܛܶܠܳܢ̈ܝܳܬܳܐ ܘܰܫܠ̣ܶܡܘ̱ ܛܘ̣ܦ̈ܣܶܐ ܕܢܳܡܘ̣ܣܳܐ ܘܐܶܣܰܬ̣ܝܰܟܘ̱ ܟܽܠܗܽܘܢ ܐ̱ܪ̈ܳܙܶܐ ܘܦ̈ܶܠܳܐܬܳܐ: ܐܳܘ ܠܥܺܐܕܳܐ ܗܳܢܳܐ ܫܒܝ̣ܚܳܐ ܕܐܰܢܗ̣ܰܪ ܠܥܳܠܡܳܐ ܒܫܘ̣̈ܟܳܢܰܘܗ̱ܝ ܐܰܠܳܗ̈ܳܝܶܐ ܘܪ̈ܘ̣ܚܳܢܳܝܶܐ: ܐܳܘ ܠܐ̱ܪܳܙܳܐ ܗܳܢܳܐ ܪܰܒܳܐ ܘܰܬܡܝ̣ܗܳܐ ܕܐܶܬ̣ܓܠܝ̣ ܘܐܶܫ̣ܬܰܟܰܢ ܠܥܺܕܬܳܐ ܩܰܕܝ̣ܫܬܳܐ ܝܰܘܡܳܢܳܐ: ܐܳܘ ܠܝܰܘܡܳܐ ܗܳܢܳܐ ܩܰܪܝܳܐ ܘܩܰܕܝ̣ܫܳܐ ܕܒܶܗ ܕܢܰܚ̣ ܠܰܢ ܣܰܒܪܳܐ ܕܦܘ̣ܪܩܳܢܳܐ: ܕܕܰܟܝ̣ ܒܰܕܡܶܗ ܦܪ̈ܘ̣ܣܬܕܶܐ ܕܠܶܒܰܘ̈ܳܬܰܢ: ܘܒܶܗ ܐܶܬ̣ܩܰܕܰܫ̈ܝ̱ ܢܰܦ̈ܫܳܬܰܢ ܘܐܶܬ̣ܡܫܰܚ̈ܝ̱ ܣܶܦ̈ܘܳܬܰܢ: ܝܰܬܝ̣ܪ ܡܶܢ ܕܡܶܗ ܕܶܐܡܪܳܐ ܗܰܘ̇ ܕܟܳܠܶܐ ܗ̱ܘܳܐ ܠܰܡܚܰܒܠܳܢܳܐ ܡܶܢ ܥܰܡܳܐ ܐܝ̣ܣܰܪܐܠܳܝܳܐ: ܒܪܝ̣ܟ ܦܶܨܚܳܟ ܫܡܰܝܳܢܳܐ ܕܐܰܦ̣ܨܰܚ ܠܰܢ ܒܥܰܕܥܺܐܕܶܗ ܐܰܠܳܗܳܝܳܐ ܘܚ̣ܰܪܪܰܢ ܡ̣ܶܢ ܫܘ̣ܥܒܳܕܳܐ ܕܡܰܘܬܳܐ ܘܣܳܛܳܢܳܐ: ܒܪܝ̣ܟ ܗ̱ܘ̣ ܠܰܚܡܳܐ ܫܡܰܝܳܢܳܐ ܕܰܢܚ̣ܶܬ ܡ̣ܶܢ ܪܰܘܡܳܐ ܘܰܚܠ̣ܰܛ ܦܰܓܪܶܗ ܒܦܰܓܪ̈ܰܝܢ ܘܰܡ̣ܙܰܓ ܠܰܕܡܶܗ ܒܗܰܕܳܡܰܝ̈ܢ ܘܥܰܒ̣ܕܰܢ ܠܶܗ ܐܰܚ̈ܶܐ ܘܰܒܢܰܝ̈ܳܐ ܠܝܳܠܘ̣ܕܶܗ ܫܡܰܝܳܢܳܐ: ܘܡܶܛܽܠ ܗܳܕܶܐ ܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܳܟ ܐܳܘ ܪܳܚܶܡ ܐ̱ܢܳܫܳܐ ܗܰܘ̇ ܕܟܽܠܗܶܝܢ ܗܳܠܶܝܢ ܣܥ̣ܰܪܬ ܘܫܰܡܠܝ̣ܬ ܡܶܛܽܠܳܬܰܢ: ܠܳܐ ܡܳܪܝ̱ ܬܰܗ̣ܦܶܟ ܥܰܕܥܺܐܕܰܝ̈ܢ ܠܶܐܒܠܳܐ ܘܟܰܪܝܘ̣ܬܳܐ ܐܰܝܟ ܥܰܡܳܐ ܗܰܘ̇ ܡܡܰܪܡܪܳܢܳܐ ܗܰܘ̇ ܕܠܳܐ ܗܰܝܡ̣ܶܢ ܒܳܟ: ܠܳܐ ܬܰܦ̣ܩܰܢ ܟܺܐܢܘ̣ܬܳܟ ܡܶܢ ܒܶܝܬ ܓܢܽܘܢܳܟ ܘܠܳܐ ܬܰܣ̣ܠܶܐ ܠܰܢ ܡܶܢ ܝܳܪܬܘ̣ܬܳܟ: ܐܰܝܟ ܕܰܐܣܠܝ̣ܬ ܠܗܳܢܽܘܢ ܕܒܰܙ̣ܰܚܘ̱ ܒܳܟ ܘܒܰܡܕܰܒܪܳܢܘ̣ܬܳܟ: ܠܳܐ ܡܳܪܝ̱ ܬ̣ܢܰܟܪܶܐ ܠܰܢ ܡܶܢ ܚܘ̣ܠܛܳܢܳܟ: ܘܠܳܐ ܬ̣ܶܦܪܘ̣ܫ ܠܰܢ ܡܶܢ ܡܶܢܝܳܢܳܐ ܕܶܐܡܪ̈ܶܐ ܕܝ̣ܠܳܟ ܒܰܕܡܘ̣ܬ ܝܺܗܘ̣ܕܳܐ ܡܰܫܠܡܳܢܳܐ ܗܰܘ̇ ܕܐܶܬܢܰܟ̣ܪܝ̣ ܡ̣ܶܢ ܒܰܝܬܳܝܘ̣ܬܳܟ ܘܐܶܬ̣ܦܪܶܫ ܡܶܢ ܡܶܢܝܳܢܳܐ ܕܰܫܠܝ̣ܚܘ̣ܬܳܐ: ܐܶܠܳܐ ܩܰܒܶܠ ܬܶܫܡ̈ܫܳܬܰܢ ܘܶܐܬܪܰܥܳܐ ܒܰܨܠܰܘ̈ܬܰܢ ܐܰܝܟ ܕܦܝ̣ܢܚܶܣ ܓܰܒܝܳܐ ܘܚܶܙܰܩܝܳܐ ܡܰܠܟܳܐ ܡܗܰܝܡܢܳܐ ܘܟܽܠܗܽܘܢ ܡܢܝ̣̈ܚܳܢܶܐ ܕܝ̣ܠܳܟ: ܘܩܰܒܶܠ ܠܥܶܛܪܳܐ ܕܒܶܣ̈ܡܶܐ ܕܰܡܩܰܪܒܝ̣ܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ ܐܝܟ ܐܰܗܪܽܘܢ ܟܳܗܢܳܐ ܙܰܗܝܳܐ ܘܟܽܠܗܽܘܢ ܠܶܘ̈ܳܝܶܐ ܒܢܰܝ̈ ܛܶܟܣܶܗ: ܘܩܰܒܶܠ ܡܳܪܝ̱ ܠܩܘ̣ܪ̈ܒܳܢܶܐ ܘܪ̈ܝ̣ܫܝܳܬܳܐ ܘܡܰܥܣܳܪ̈ܶܐ ܕܡ̣ܶܢ ܡܰܪܥܝ̣ܬܳܟ ܠܰܢܝܳܚܳܟ ܡܶܬܩܰܪܒܝ̣ܢ ܒܥܺܐܕܳܐ ܗܳܢܳܐ ܡܳܪܳܢܳܝܳܐ ܒܐܝ̣̈ܕܰܝܢ ܚܰܛܝ̈ܳܬܳܐ: ܐܰܝܟ ܕܩܰܒܶܠ̣ܬ ܡܶܢ ܡܰܠܟܝ̣ܙܕܶܩ ܟܘ̣ܡܪܳܐ ܪܰܒܳܐ ܘܨܳܪ ܐ̱ܪܳܙܳܐ ܕܝܰܬܝ̣ܪ ܪܰܒ ܕܰܚܠܳܦ ܝܰܠ̈ܕܶܝܗ̇ ܥܺܕܬܳܐ ܡܩܰܪܒܳܐ ܠܳܟ: ܢܰܛܰܪ ܐܶܢܽܘܢ ܡܶܢ ܟܽܠܗܽܘܢ ܢܶܟܝܳܢܰܘ̈ܗ̱ܝ ܕܒܝ̣ܫܳܐ: ܘܡܶܢ ܟܽܠܗܽܘܢ ܫܰܒ̈ܛܶܐ ܘܡܰܚ̈ܘܳܬܳܐ ܕܪܘ̣ܓܙܳܐ: ܩܰܒܶܠ ܡܳܪܝ̱ ܠܰܦܝܳܣܳܐ ܘܓܘ̣ܪܓܳܚܳܐ ܕܥܰܡܳܐ ܘܝܳܪܬܘ̣ܬܳܐ ܕܝ̣ܠܳܟ ܛܒܝ̣ܥܰܬ݀ ܒܰܫܡܳܟ ܩܰܕܝ̣ܫܳܐ ܘܰܙܒܝ̣ܢܰܬ݀ ܒܰܕܡܳܟ ܝܰܩܝ̣ܪܳܐ: ܣܥܘ̣ܪ ܠܰܟܪ̈ܝ̣ܗܶܐ ܒܰܚܢܳܢܳܟ: ܘܐܰܪܘܰܚ ܠܰܐܠܝ̣̈ܨܶܐ ܒܩܳܝܘ̣ܡܘ̣ܬܳܟ: ܣܡܘ̣ܟ ܠܢܰܦ̈ܠܶܐ ܒܝܰܡܝ̣ܢܳܟ: ܘܫܰܪܰܪ ܠܰܕܩܳܝ̇ܡܝ̣ܢ ܒܣܰܒܪܳܟ: ܘܰܥܒܶܕ ܕܘ̣ܟܪܳܢܳܐ ܛܳܒܳܐ ܘܥ̱ܘ̣ܗܕܳܢܳܐ ܫܰܦܝ̣ܪܳܐ ܥܰܠ ܡܰܕܒܚܳܟ ܡܠܝ̣ܠܳܐ ܘܕܰܠܥܶܠ ܡܶܢ ܫܡܰܝܳܐ: ܠܰܐܒܳܗܰܝ̈ܢ ܘܠܰܐܚܰܝ̈ܢ ܘܰܠܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܕܰܫܟܶܒ̣ܘ̱ ܥܰܠ ܣܰܒܪܳܟ ܒܗܰܝܡܳܢܘ̣ܬܳܐ ܕܰܫܪܳܪܳܐ: ܘܰܚܢܰܢ ܘܗ̣ܶܢܽܘܢ ܢܶܫ̇ܬܘܶܐ ܠܥܺܐܕܳܟ ܗܰܘ̇ ܕܠܳܐ ܥܳܒܰܪ ܘܠܳܐ ܡܶܫ̣ܬܪܶܐ ܘܚܰܕ̈ܘܳܬܶܗ ܠܳܐ ܦܳܛܪ̈ܳܢ: ܘܬܰܡܳܢ ܐܰܟܚܕܳܐ ܢ̇ܫܰܒܚܳܟ ܠܳܐ ܫܰܠܘܳܐܝ̣ܬ ܒܣܶܕܪܳܐ ܕܰܡܫܰܒ̈ܚܳܢܰܝܟ ܪ̈ܘ̣ܚܳܢܳܝܶܐ ܘܰܫܡܰܝ̈ܳܢܶܐ: ܘܠܰܐܒܘ̣ܟ ܗܰܘ̇ ܠܳܐ ܚܰܫܳܢܳܝܳܐ ܘܛܘ̣ܦܣܳܢܳܝܳܐ ܕܫܰܠ̣ܚܳܟ ܠܦܘ̣ܪܩܳܢܰܢ: ܘܰܠܪܘ̣ܚܳܟ ܩܰܕܝ̣ܫܳܐ ܕܰܫ̇ܘܶܐ̣ ܠܳܟ ܒܐܘ̣ܣܺܝܰܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܥܶܛܪܳܐ ܗܰܢܺܝܳܐܐ ܘܪܝ̣ܚܳܐ ܒܰܣܝ̣ܡܳܐ ܘܦܝ̣ܪܡܳܐ ܡܪܰܥܝܳܢܳܐ ܗ̣ܘܳܐ ܩܶܛܠܳܟ ܡܰܚܝܳܢܳܐ ܡܶܠܬܶܗ ܕܐܰܒܳܐ ܫܡܰܝܳܢܳܐ: ܘܒܶܗ ܐܶܬ̣ܕܰܟܝ̣ ܐܳܐܰܪ ܕܐܶܬ̣ܛܰܡܰܐܐ ܒܕܶܒ̈ܚܶܐ ܕܚܰܝ̈ܘܳܬܳܐ ܚܰܪ̈ܫܳܬܳܐ: ܘܐܶܬ̣ܩܰܕܫܰܬ݀ ܐܰܪܥܳܐ ܕܰܢ̣ܛܰܦ ܥܠܶܝܗ̇ ܕܡܳܟ ܚܰܝܳܐ: ܐܰܢ̱ܬ ܡܳܪܝ̱ ܩܰܒܶܠ ܠܦܝ̣ܪܡܳܐ ܗܳܢܳܐ ܕܰܡܩܰܪܒܳܐ ܠܳܟ ܥܺܕܬܳܐ ܩܰܕܝ̣ܫܬܳܐ ܚܠܳܦ ܚܘ̣ܣܳܝܳܐ ܕܝܰܠ̈ܕܶܝܗ̇: ܘܢ̣ܶܗܘܶܐ ܠܰܢܝܳܚܳܟ ܘܰܠܬܰܪܥܘ̣ܬܳܟ ܘܰܠܢܘ̣ܛܳܪܳܐ ܕܚܰܝ̈ܶܐ ܘܰܠܫܘ̣ܒܩܳܢܳܐ ܕܰܚ̈ܛܳܗܶܐ: ܘܕܘ̣ܟܪܳܢܳܐ ܛܳܒܳܐ ܢܶܗ̣ܘܶܐ ܠܥܰܢܝ̣̈ܕܶܐ ܡܗܰܝ̈ܡܢܶܐ ܕܐܰܘܕܝ̣ܘ ܒܳܟ ܒܚܰܝܰܝ̈ܗܽܘܢ ܘܰܫܦ̣ܰܪܘ̱ ܠܳܟ ܒܕܘ̣ܒܳܪ̈ܰܝܗܽܘܢ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀