ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܟܺܐܢܳܐ ܕܰܡܣܰܝܒܰܪ ܥܰܘ̈ܠܰܝܢ: ܠܗܰܘ̇ ܢܰܓܝ̣ܪ ܪܘ̣ܚܳܐ ܕܰܛܥܝ̣ܢ ܚܶܣ̈ܕܰܝܢ: ܠܗܰܘ̇ ܥܰܙܝ̣ܙܳܐ ܕܒܰܣܝ̣ܡܳܐܝ̣ܬ ܡܶܬܚܰܫܰܚ ܥܰܡܰܢ: ܠܗܰܘ̇ ܛܳܒܳܐ ܕܠܳܐ ܪܳܓܶܙ ܥܰܠ ܒܝ̣̈ܫܳܬܰܢ: ܠܗܰܘ̇ ܐܳܣܝܳܐ ܚܰܟܝ̣ܡܳܐ ܕܡܶܬܢܰܚܰܬ ܥܰܡ ܡܚܝ̣ܠܘ̣ܬܰܢ: ܠܗܰܘ̇ ܕܥܳܨܶܒ ܒܰܚܢܳܢܶܗ ܠܰܬܒܝ̣ܪܘ̣ܬܰܢ: ܘܡܰܐܣܶܐ ܡܰܓܳܢ ܟܘ̣ܬܡ̈ܳܬܳܐ ܕܰܚܒܳܪ̈ܳܬܰܢ: ܘܠܳܐ ܡܰܗܦܶܟ ܐܰܦ̈ܰܘܗ̱ܝ ܡ̣ܶܢ ܒܳܥܘ̣ܬܰܢ ܘܡܶܬܪܟܶܢ ܠܰܓܥܳܬܳܐ ܕܰܨ̈ܠܰܘܳܬܰܢ: ܘܝܳܗܶܒ ܩܰܠܝ̣ܠܳܐܝ̣ܬ ܦܘ̣ܢܳܝܳܐ ܕܫܶܐܠ̈ܳܬܰܢ: ܕܠܶܗ ܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܕܢ̣ܶܬܪܰܚܰܡ ܥܰܠ ܟܽܠܰܢ: ܘܢ̣ܰܛܶܠ ܝܰܡܝ̣ܢܶܗ ܥܰܠ ܢܰܦ̈ܫܳܬܰܢ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܰܬܠܳܬܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝ̈ܰܝܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܒܰܠܚܘ̣ܕܰܘܗ̱ܝ ܐܝ̣ܬܰܘܗ̱ܝ ܡܚܰܣܝܳܢܳܐ ܕܫܘ̣ܪ̈ܥܳܬܳܐ ܕܝ̣ܠܰܢ: ܗܰܘ̇ ܕܝܰܬܝ̣ܪ ܡ̣ܶܢ ܕܶܒܚ̈ܶܐ ܢܳܡܘ̣ܣܳܝ̈ܶܐ ܘܛܶܠܳܢܳܝ̈ܶܐ ܘܫܘ̣ܘ̈ܟܳܢܶܐ ܘܦܘ̣ܪ̈ܫܳܢܶܐ ܕܒܰܡܢܰܘ̈ܳܬܳܐ: ܝܰܬܝ̣ܪ ܡ̣ܶܢ ܠܒܘ̣ܢܬܳܐ ܗܳܝ̇ ܕܥܰܡ ܗܳܠܶܝܢ ܡܶܬܩܰܪܒܳܐ ܗ̣ܘܳܬ݀ ܠܪܝ̣ܚܳܐ ܒܰܣܝ̣ܡܳܐ: ܠܗܰܘ̇ ܕܡ̣ܶܢ ܥܘ̣ܬܪܳܐ ܘܬܘ̣ܩܳܢܳܐ ܕܰܡܝܰܬܪܘ̣ܬܳܐ ܥܰܡ ܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܡܩܰܒܶܠ: ܐܰܫܘܳܐ ܠܰܢ ܕܟܰܕ ܡ̣ܶܢ ܟܽܠܗܽܘܢ ܚܰܫ̈ܶܐ ܫܟܝ̣ܪ̈ܶܐ ܡܶܬܕܰܟܶܝܢܰܢ ܘܡ̣ܶܢ ܥܢܳܢܳܐ ܘܥܰܡܛܳܢܳܐ ܕܰܦܪܝ̣ܣܳܐ ܥܰܠ ܠܶܒܰܘ̈ܳܬܰܢ: ܒܳܥ̈ܘܳܬܳܐ ܘܬܰܟܫ̈ܦܳܬܳܐ ܕܝ̣ܠܰܢ ܠܘܳܬܳܟ ܐܰܠܳܗܳܐ ܘܡܳܪܝܳܐ ܕܝ̣ܠܰܢ ܢ̇ܫܰܡܠܶܐ: ܐܰܝܟܰܢܳܐ ܕܢ̇ܶܬܚܰܝܰܠ ܠܡܰܪܟܳܢܘ̣ ܠܘܳܬܰܢ ܪ̈ܰܚܡܶܐ ܘܰܚܢܳܢܳܐ ܗܳܢܽܘܢ ܠܳܐ ܡܶܬܬܟܝ̣̈ܠܳܢܶܐ ܕܒܰܣܝ̣ܡܘ̣ܬܳܟ: ܘܰܠܡܶܬܟܰܫܳܦܘ̣ ܠܪ̈ܰܚܡܰܝܟ: ܕܠܳܐ ܬ̣ܫܰܕܰܪ ܪܶܥܝܳܢܳܐ ܕܝ̣ܠܳܟ ܥܠܰܝܢ ܠܒܝ̣̈ܫܳܬܳܐ ܐܶܠܳܐ ܠܛܳܒ̈ܳܬܳܐ: ܘܰܬܣܝ̣ܡ ܠܰܢ ܠܡܰܕܒܪܳܐ ܠܳܐ ܡܶܬܗܰܠܟܳܢܳܐ ܘܢ̇ܶܗܘܶܐ ܠܳܟ ܠܣܰܒܥܳܐ ܘܰܬ̣ܛܠܰܩ ܠܰܢ ܠܢܘ̣ܪܳܐ ܕܰܛܢܳܢܳܐ ܕܝ̣ܠܳܟ: ܘܢܶܗܘܽܘܢ ܚܰܒܝ̈ܒܶܐ ܐܰܝܟ ܡܰܣ̈ܠܰܝܳܐ: ܝܰܘܡܳܐ ܓܶܝܪ ܡܰܪܝ̣ܪܳܐ ܘܩܰܫܝܳܐ ܣܝ̣ܡ ܥܠܰܝܢ: ܡܶܛܽܠ ܣܰܓܺܝܽܐܘ̣ܬܳܐ ܕܰܚܛܳܗ̈ܶܐ ܘܰܕܣܰܟ̈ܠܘܳܬܳܐ ܕܝ̣ܠܰܢ: ܝܰܘܡܳܐ ܕܪܘ̣ܓܙܳܐ ܘܕܰܐܢܰܢܩܝ̣: ܝܰܘܡܳܐ ܕܣܘ̣ܪܚܳܢܳܐ ܘܕܰܐܒܕܳܢܳܐ: ܝܰܘܡܳܐ ܕܚܶܫܘ̣ܟܳܐ ܘܰܕܥܰܡܛܳܢܳܐ: ܝܰܘܡܰܐ ܗ̱ܘ ܕܰܥܢܳܢܳܐ ܘܰܕܥܰܪܦܶܠܳܐ: ܘܰܐ̱ܚܪܳܝܰܬ݀ ܙܰܒ̈ܢܶܐ: ܡܰܚ̈ܘܳܬܳܐ ܕܝ̣ܠܰܢ ܣܓܺܝ̣̈ ܘܰܒܪܰܘܳܝܽܘ̣ܬܳܐ ܐܶܬ̣ܕܘܺܝ̣ܢܰܢ: ܘܠܳܐ ܐܝ̣ܬ ܢܦܺܐܫܳܐ ܘܠܳܐ ܦܰܪܶܗܣܺܝܰܐ ܠܰܡܩܰܪܳܒܘ̣ ܦܺܐܪ̈ܶܐ ܩܕܳܡܰܝܟ ܘܰܠܡܶܫܟܳܚܘ̣ ܚܢܳܢܳܐ ܘܪ̈ܰܚܡܶܐ: ܐܶܠܳܐ ܗ̣ܘܰܝܢܰܢ ܐܰܝܟ ܥܢܳܢܳܐ ܨܰܦܪܳܝܬܳܐ ܘܰܐܝܟ ܛܰܠܳܐ ܕܡܰܓܗܳܐ ܘܰܐܝܟ ܕܰܚܝ̣ܚܳܐ ܕܡܶܬܢܦܰܚ ܡ̣ܶܢ ܪܘ̣ܚܳܐ ܒܶܐܕܪ̈ܶܐ: ܟܰܕ ܒܘ̣ܝܳܐܳܐ ܡܛܰܫܰܝ ܡ̣ܶܢ ܥܰܝܢܳܐ ܕܝ̣ܠܰܢ: ܘܡܶܛܽܠ ܗܳܝ ܕܰܠܛܰܫ̣ܢܰܢ ܠܚܶܡܬܳܐ ܕܝ̣ܠܳܟ ܘܒܝ̣ܫܬܳܐ ܥܒ̣ܰܕܢܰܢ: ܘܶܐܬ̣ܬܘܝ̣ ܗܳܟܝ̣ܠ ܡܳܪܝܳܐ ܥܰܠ ܗܳܕܶܐ ܘܠܳܐ ܬ̣ܶܪܓܰܙ ܠܥܳܠܰܡܥܳܠܡܝ̣ܢ: ܘܠܳܐ ܠܫܘ̣ܠܳܡܳܐ ܬ̣ܶܦܣܘ̣ܩ ܪ̈ܰܚܡܰܝܟ ܡܶܢܰܢ: ܘܠܳܐ ܬ̣ܶܛܥܶܐ ܠܰܡܪܰܚܳܡܘ̣ ܥܠܰܝܢ: ܐܶܠܳܐ ܒܢܰܦܫܳܐ ܫܚܝ̣ܡܬܳܐ ܘܰܒܪܘ̣ܚܳܐ ܕܡܰܟܝ̣ܟܘ̣ܬܳܐ ܢ̇ܶܬܩܰܒܰܠ ܚܢܰܢ ܘܰܬܝܳܒܘ̣ܬܳܐ ܕܝ̣ܠܰܢ ܩܕܳܡ ܬܶܫܒܘ̣ܚܬܳܐ ܕܝ̣ܠܳܟ: ܘܡܰܠܶܠ ܒܠܶܒܳܐ ܕܥܰܡܳܐ ܕܝ̣ܠܳܟ ܡܫܰܝ̈ܢܳܬܳܐ: ܘܰܡܟܘ̣ܪ ܠܰܢ ܒܙܰܕܝ̣ܩܘ̣ܬܳܐ ܘܰܒܕܝ̣ܢܳܐ ܘܰܒܪ̈ܰܚܡܶܐ ܘܰܒܗܰܝܡܳܢܘ̣ܬܳܐ: ܡܰܢܘ̣ ܓܶܝܪ ܐܰܠܳܗܳܐ ܐܰܟܘܳܬܳܟ ܕܰܡܪܝ̣ܡ ܠܳܐ ܢܳܡܘ̣ܣܳܝ̈ܘܳܬܳܐ: ܘܫܳܒܶܩ ܐܰܢ̱ܬ ܥܰܘܠܳܐ ܕܫܰܪܟܳܐ ܕܝܳܪܬܘ̣ܬܳܟ: ܚܘ̣ܪ ܒܰܢ ܡ̣ܶܢ ܫܡܰܝܳܐ ܕܩܘ̣ܕ̈ܫܶܐ ܕܝ̣ܠܳܟ ܘܶܐܬܚܰܫܰܒ ܥܠܰܝܢ ܡܰܚܫܰܒܬܳܐ ܕܫܰܝܢܳܐ ܘܠܳܐ ܕܒܝ̣ܫܬܳܐ: ܐܰܪܟܶܢ ܡܳܪܝܳܐ ܐܶܕܢܳܟ ܘܰܫܡܰܥ ܠܰܢ: ܦܬܰܚ ܥܰܝܢܳܐ ܕܝ̣ܠܳܟ ܘܰܚܙܝ̣ ܠܐܘ̣ܠ̈ܨܳܢܶܐ ܕܝ̣ܠܰܢ: ܡܶܛܽܠ ܕܣܶܒ̣ܥܰܬ݀ ܢܰܦܫܳܐ ܕܝ̣ܠܰܢ ܒܝ̣̈ܫܳܬܳܐ ܘܚܰܝܰܝ̈ܢ ܠܰܫܝܘ̣ܠ ܩܪܶܒ̣ܘ̱: ܐܶܬܬܢܝ̣ܚ ܡܶܛܽܠ ܫܡܳܐ ܕܝ̣ܠܳܟ: ܘܠܳܐ ܬܶܬ̣ܥܝ̣ܪ ܥܰܠ ܪܘ̣ܫܥܳܐ ܕܝ̣ܠܰܢ: ܐܶܠܳܐ ܐܶܬܬܢܝ̣ܚ ܡ̣ܶܢ ܚܶܡܬܳܐ ܕܪܘ̣ܓܙܳܐ ܕܝ̣ܠܳܟ: ܚܘ̣ܣ ܥܰܠ ܓܒܝ̣ܠܬܳܐ ܕܝ̣ܠܳܟ ܘܡܶܛܽܠ ܕܪ̈ܰܚܡܰܝܟ ܣܰܓܺܝ̈ܺܐܝ̣ܢ: ܘܠܳܐ ܓܳܡܰܪ ܚܢܳܢܳܟ ܡܳܪܝܳܐ: ܒܳܟ ܓܶܝܪ ܚܝܰܝܢܰܢ ܘܡܶܬܬܙܝ̣ܥܳܢܰܢ: ܘܐܝ̣ܬܰܝܢ ܗܰܘ̇ ܕܡ̣ܶܢ ܗܳܝ ܕܠܳܐ ܐܝ̣ܬܰܝܢ ܠܗܳܝ ܕܢ̇ܶܗܘܶܐ ܐܝ̣ܬܰܝܢ ܐܰܝܬܝ̣ܬ ܠܰܢ: ܘܟܰܕ ܐܶܬܚܰܒܠ̣ܢܰܢ ܒܝܰܕ ܚܛܝ̣ܬܳܐ ܡܰܘܬܳܐ ܬܘ̣ܒ ܕܶܝܢ ܡ̣ܶܢܕܪܝܫ ܩ̣ܪܰܝܬ ܠܰܢ ܒܝܰܕ ܡܶܬܒܰܪܢܫܳܢܘ̣ܬܳܟ ܐܰܠܳܗܳܝ̇ܬܳܐ: ܘܒܳܟ ܚܘ̣ܣܳܝܳܐ ܕܝ̣ܠܰܢ ܐܝ̣ܬܰܘܗ̱ܝ ܘܠܰܘ ܒܰܥ̈ܒܳܕܶܐ ܕܝ̣ܠܰܢ: ܘܠܳܟ ܬܶܫܒܘ̣ܚܬܳܐ ܘܬܰܘܕܝ̣ܬܳܐ ܘܩܘ̣ܒܳܠܛܰܝܒܘ̣ܬܳܐ ܡܰܣܩܝ̣ܢܰܢ ܥܰܠ ܟܽܠܗܶܝܢ ܛܰܝܒ̈ܘܳܬܳܐ ܕܝ̣ܠܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀