ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܙܝ̣ܘܳܐ ܕܚܝ̣ܠܳܐ ܘܥܰܙܝ̣ܙܳܐ: ܘܫܘ̣ܪ̈ܶܝܗ̇ ܕܰܫܝܘ̣ܠ ܒܶܗ ܐܶܣ̣ܬܰܚܰܦܘ̱: ܘܓܰܙ̈ܶܝܗ̇ ܒܶܗ ܐܶܣ̣ܬܰܦܰܩܘ̱ ܘܡܰܠܟܘ̣ܬܶܗ ܕܰܒܥܶܠܕܰܪܳܐ ܡܰܘܬܳܐ ܘܰܚܛܝ̣ܬܳܐ ܒܝܰܕ ܩܶܛܠܶܗ ܡܰܥܒܶܕ ܚܰܝ̈ܶܐ ܐܶܬ̣ܥܰܩܪܰܬ݀ : ܗܰܘ̇ ܕܰܩ̣ܪܳܐ ܠܠܳܥܳܙܳܪ ܪܳܚܡܶܗ ܡ̣ܶܢ ܒܳܬܰܪ ܐܰܪܒܥܳܐ ܝܰܘ̈ܡܝ̣ܢ ܕܰܣ̣ܪܝ̣: ܘܰܒܦܘ̣ܩܕܳܢܶܗ ܢܦ̣ܰܩ ܟܰܕ ܡܚܰܙܰܩ ܘܰܡܗܰܠܶܟ ܗ̱ܘܳܐ ܐܰܝܟ ܕܰܠܬܶܫܒܘ̣ܚܬܳܐ ܕܰܡܢܰܚܡܳܢܶܗ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܘܣܶܓܕܬܳܐ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܥܳܒܘ̣ܕܳܐ ܘܰܡܬܰܩܢܳܢܳܐ ܕܟܽܠܗܶܝܢ ܡܶܬܚ̈ܰܙܝܳܢܝܳܬܳܐ ܟܝ̣ܬ ܘܠܳܐ ܡܶܬܚ̈ܰܙܝܳܢܝܳܬܳܐ: ܗܰܘ̇ ܕܰܒܨܰܠܡܳܟ ܘܒܰܕܡܘ̣ܬܳܟ ܬܰܩܶܢ̣ܬܳܝܗ̱ܝ ܠܒܰܪܢܳܫܳܐ ܩܰܕܡܳܝܳܐ ܘܨܰܒ̣ܶܬܬ ܘܝܰܩ̣ܰܪܬܳܝܗ̱ܝ ܒܫܰܠܝ̣ܛܘ̣ܬ ܒܝܳܬܳܐ: ܘܗܰܕܰܪܬܳܝܗ̱ܝ ܘܩܰܝܶܡ̣ܬܳܝܗ̱ܝ ܒܫܘ̣ܦܪ̈ܶܐ ܡܥܰܠܰܝ̈ܳܐ: ܡ̣ܶܢ ܝܰܩܕܳܢܳܐ ܚܺܐܪܳܝܳܐ ܠܫܰܠܝ̣ܛܘ̣ܬ ܒܝܳܬܶܗ ܐܰܓܥܶܠ̣ܬ: ܐܰܝܟ ܕܢ̣ܶܬܪܚܶܩ ܡ̣ܶܢ ܒܨܝ̣ܪ̈ܳܬܳܐ ܘܚܰܫܳܢܳܝ̈ܳܬܳܐ ܡܕܰܪܓܳܐܝ̣ܬ ܘܢ̣ܶܬܩܰܪܰܒ ܘܢ̣ܶܩܰܦ ܠܰܡܥܰܠ̈ܝܳܬܳܐ ܘܰܐܠܳܗܳܝ̈ܬܳܐ ܒܙܰܒܢܳܐ ܕܙܳܕܶܩ: ܥܰܠ ܕܰܒܣܘ̣ܪܗܳܒܶܗ ܠܢܳܡܘ̣ܣܳܐ ܕܳܫ̣: ܫ̣ܕܳܐ ܗܽܘ̣ ܠܶܗ ܠܰܪ̈ܓܝ̣ܓܳܬܳܐ ܛܰܡ̈ܳܐܬܳܐ ܨܶܒܝܳܢܳܐܝ̣ܬ ܘܥܶܨܝܳܝܳܐ ܐܶܬ̣ܚܙܝ̣ ܘܠܳܐ ܡܶܫܬܰܡܥܳܢܘ̣ܬܳܐ ܚܰܘܝ̣: ܘܡܰܘܬܳܐ ܥܠܰܘܗ̱ܝ ܐܶܫܬܰܠ̣ܰܛ ܘܠܰܚܒܳܠܳܐ ܡܫܰܡܠܝܳܐ ܐܶܬ̣ܬܰܝܬܝ̣: ܘܰܫܪܳܝܳܐ ܕܪܘ̣ܟܳܒܶܗ ܝ̣ܬܰܪ ܘܰܙܪܘ̣ܩܝܳܐ ܘܦܘ̣ܠܗܳܕܳܐ ܕܰܡܢܰܘ̈ܳܬܳܐ ܕܝ̣ܠܶܗ ܐܶܬ̣ܬܰܓܰܪ: ܘܠܶܗ ܘܰܠܟܽܠܰܢ ܝܰܠ̈ܕܰܘܗ̱ܝ ܪܶܥܝܳܐ ܠܡܰܘܬܳܐ ܥܒ̣ܰܕ: ܘܐܘ̣ܟܠܳܐ ܠܰܫܝܘ̣ܠ ܒܳܠܰܥܬܳܐ ܫܰܡ̣ܠܝ̣ ܘܰܓܡ̣ܰܪ: ܘܟܰܕ ܠܟܽܠܶܗ ܗܳܢܳܐ ܐܰܒܕܳܢܳܐ ܠܳܐ ܣܰܝܒ̣ܰܪܬ ܒܪܶܚܡܰܬ݀ ܐ̱ܢܳܫܘ̣ܬܳܟ ܡܶܬܒܰܪܢܫܳܢܘ̣ܬܳܐ ܚܠܳܦܰܘܗ̱ܝ ܐܶܬܥܰܛܰܦ̣ܬ: ܘܟܰܕ ܠܒܶܣܪܳܐ ܢܰܦܫܳܢܳܝܳܐ ܒܛܰܝܒܘ̣ܬܳܟ ܐܶܬ̣ܚܰܝܰܕܬ ܟܝܳܢܳܐܝ̣ܬ ܘܰܩܢܘ̣ܡܳܐܝ̣ܬ ܡ̣ܶܢ ܠܳܐ ܡܢܰܣܰܝܬ݀ ܒܙܘ̣ܘܳܓܳܐ ܒܬܘ̣ܠܬܳܐ ܩܰܕܝ̣ܫܬܳܐ ܡܰܪܝܰܡ: ܘܰܡܕܰܒܪܳܢܳܐܝ̣ܬ ܥܰܡ ܒܢܰܝ̈ܢܳܫܳܐ ܐܶܬܗܰܦܰܟ̣ܬ: ܘܐܘ̣ܪܚܳܐ ܕܦܘ̣ܪܩܳܢܳܐ ܒܰܩܢܘ̣ܡܳܟ ܚܰܘܝ̣ܬ ܘܪܰܗܒܽܘܢܳܐ ܕܰܩܝܳܡܬܰܢ ܘܰܕܚܘ̣ܕܳܬܳܐ ܕܢܰܦ̈ܫܳܬܰܢ ܘܰܕܦܰܓܪ̈ܰܝܢ ܒܰܩܝܳܡܬܳܟ ܬܠܝ̣ܬܳܝܰܬ݀ ܝܰܘ̈ܡܶܐ ܠܰܢ ܐܰܓܥܶܠ̣ܬ: ܘܟܰܕ ܠܘܳܬ ܚܰܫܳܐ ܦܳܪܘ̣ܩܳܝܳܐ ܕܰܚܠܳܦܰܝܢ ܐܶܬ̣ܰܝܬ ܗ̱ܘܰܝܬ: ܒܰܩܝܳܡܬܳܐ ܕܠܳܥܳܙܳܪ ܪܳܚܡܳܟ ܠܗܳܝ ܕܝ̣ܠܳܟ ܩܰܕܶܡ̣ܬ ܫܰܘܕܰܥ̣ܬ ܘܚܰܘܝ̣ܬ ܩܕܳܡ ܟܽܠ ܐ̱ܢܳܫ ܘܓܰܠܝܳܐܝ̣ܬ ܒܗܳܕܶܐ ܠܗܳܝ ܐܰܕܢܰܚ̣ܬ ܘܫ̣ܰܪܰܪܬ: ܗܳܢܳܐ ܓܶܝܪ ܛܘ̣ܦܣܳܐ ܗ̱ܘܳܐ ܕܒܰܪܢܳܫܳܐ ܩܰܕܡܳܝܳܐ: ܗܰܘ̇ ܕܒܰܫܪܳܪܳܐ ܪܳܚܡܳܐ ܘܒܰܝܬܳܝܳܐ ܕܝ̣ܠܳܟ ܐܝ̣ܬܰܘܗ̱ܝ ܗ̱ܘܳܐ: ܘܕܰܡܝܰܩܰܪ ܠܘܳܬܳܟ ܡ̣ܶܢ ܟܽܠܳܗ̇ ܒܪܝ̣ܬܳܐ: ܕܡܶܢܳܟ ܘܒܳܟ ܠܰܗܘܳܝܳܐ ܐܶܬ̣ܬܰܝܬܝ̣: ܘܰܒܫܘ̣ܐܳܠܳܐ ܕܡܶܢܳܟ ܗ̣ܘܳܐ ܡܶܛܽܠ ܩܰܒܪܶܗ ܕܰܐܝܟܳܐ ܐܶܬܬܣܝ̣ܡ: ܠܗܳܝ ܕܰܒܪܝ̣ܫܝ̣ܬ ܠܘܳܬ ܐܳܕܳܡ ܕܰܐܝܟܳܐ ܐܝ̣ܬܰܝܟ ܕܡܶܢܳܟ ܐܶܬ̣ܰܐܡܪܰܬ݀ ܚ̣ܰܕܶܬܬ: ܘܕܰܒܩܳܠܳܐ ܠܚܘ̣ܕ ܩ̣ܪܰܝܬ ܘܰܢܦ̣ܰܩ: ܠܗܳܝ ܕܰܠܚܰܪܬܳܐ ܥܬܝ̣ܕܳܐ ܕܰܠܟܽܠ ܬ̣ܶܗܘܶܐ ܒܩܰܪܳܝܬܳܐ ܐ̱ܚܪܳܝܬܳܐ ܩܰܕܶܡ̣ܬ ܫܰܘܕܰܥ̣ܬ: ܘܕܰܦܩ̣ܰܕܬ ܕܢ̣ܶܫܪܽܘܢ ܡܶܢܶܗ ܐܰܣܘ̣ܪ̈ܶܐ ܘܦܳܣܶܩܳܝ̈ܬܳܐ ܕܰܒܗܽܘܢ ܡܚܰܙܰܩ ܗ̱ܘܳܐ: ܠܰܫܪܳܝܳܐ ܕܢܰܦ̈ܫܳܬܰܢ ܡ̣ܶܢ ܐܰܣܘ̣ܪ̈ܶܐ ܚܰܫܳܢܳܝ̈ܶܐ ܘܙܰܘ̈ܥܶܐ ܒܝ̣̈ܫܶܐ ܘܰܪ̈ܓܝ̣ܓܳܬܳܐ ܫܟܝ̣ܪ̈ܳܬܳܐ ܗܰܘ̇ ܕܰܓܡܝ̣ܪܳܐܝ̣ܬ ܒܗܰܘ̇ ܝܰܘܡܳܐ ܥܬܝ̣ܕ ܕܢ̣ܶܗܘܶܐ ܠܰܢ ܒܰܕܶܩ̣ܬ: ܘܡܶܛܽܠ ܗܳܕܶܐ ܡܶܬܟܰܫܦܝ̣ܢܰܢ ܠܳܟ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܟܰܕ ܫܳܐܠܝ̣ܢܰܢ ܡ̣ܶܢ ܪܶܚܡܰܬ݀ ܐ̱ܢܳܫܘ̣ܬܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܕܰܬ̣ܢܰܚܶܡ ܠܢܰܦ̈ܫܳܬܰܢ ܡ̣ܶܢ ܡܝ̣ܬܘ̣ܬܳܐ ܕܰܚܛܝ̣ܬܳܐ ܘܰܬ̣ܦܰܣܶܩ ܡܶܢܰܢ ܠܰܐܣܘ̣ܪ̈ܶܐ ܕܡܰܘܬܳܐ ܘܕܰܚܛܝ̣ܬܳܐ: ܘܰܠܡܶܐܣܰܪ̈ܝܳܬܳܐ ܕܥܰܘܠܳܐ ܘܰܕܢܶܟܠܳܐ ܡ̣ܶܢ ܗܳܠܶܝܢ ܬ̣ܶܫܪܶܐ ܘܰܬ̣ܫܰܡܰܪ ܠܰܢ ܠܡܺܐܙܰܠ ܒܐܘ̣ܪܚܳܐ ܕܦܘ̣̈ܩܕܳܢܰܝܟ: ܘܠܰܡܗܰܠܳܟܘ̣ ܒܰܫܒܝ̣̈ܠܶܐ ܕܢܳܡܘ̣̈ܣܰܝܟ ܘܰܬ̣ܛܰܝܶܒ ܠܰܢ ܘܰܠܥܰܢܝ̣̈ܕܰܝܢ ܡܗܰܝ̈ܡܢܶܐ: ܠܰܩܝܳܡܬܳܐ ܡܰܠܝܰܬ݀ ܚܰܕ̈ܘܳܬܳܐ ܘܰܡܚܰܪܪ̈ܶܐ ܡ̣ܶܢ ܐܰܣܘ̣ܪ̈ܶܐ ܘܰܦܟܳܪ̈ܶܐ ܕܰܚܛܝ̣ܬܳܐ ܚܰܘܳܐ ܠܰܢ: ܘܰܫܪܳܝܳܐ ܡ̣ܶܢ ܣܘ̣̈ܛܡܶܐ ܘܦܳܣܶܩܝ̈ܳܬܳܐ ܕܰܥܒܳܪ ܢܳܡܘ̣ܣܳܐ ܥܒܶܕ ܠܰܢ: ܘܰܐܫܘܳܐ ܠܰܢ ܘܰܠܗܽܘܢ ܠܩܰܘܡܳܐ ܕܡ̣ܶܢ ܝܰܡܝ̣ܢܳܟ: ܘܰܚܢܰܢ ܘܗܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀