ܒܫܡ ܐܒܐ ܘܒܪܐ ܘܪܘܚܐ ܩܕܝܫܐ ܚܕ ܐܠܗܐ ܫܪܝܪܐ ܐܡܝܢ܀
ܒܚܝܠ ܐܠܗܐ ܐܒܐ ܡܪܐ ܟܠ ܟܬܒܝܢܢ ܚܘܣ̈ܝܐ ܘܣܕܪ̈ܐ ܘܦܪ̈ܘܡܝܘܢܐ ܘܨܠ̈ܘܬܐ ܘܥܛܪ̈ܐ ܘܚܘܬܡ̈ܐ ܘܦܝܪ̈ܡܐ ܕܨܘܡܐ ܩܕܝܫܐ ܕܐܪܒܥܝܢ ܕܡܪܢ܀

ܩܰܕܡܳܝܰܬ ܨܠܽܘ̣ܬܳܐ ܕܫܽܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ: ܕܥܰܡ ܨܰܘܡܳܐ ܕܡ̣ܶܢ ܠܰܚܡܳܐ ܢ̣ܨܽܘܡ ܦܘ̣ܡܰܢ ܡ̣ܶܢ ܡܰܡܠ̱ܠܳܐ ܣܰܢܝܳܐ: ܘܠܶܫܳܢܰܢ ܡ̣ܶܢ ܕܰܓܳܠܘ̣ܬܳܐ: ܘܠܶܒܰܢ ܡ̣ܶܢ ܚܘ̣ܫ̈ܳܒܶܐ ܒܝ̣̈ܫܶܐ: ܘܢ̇ܶܫܦܰܪ ܠܳܟ ܒܟܰܣ̈ܝܳܬܰܢ ܘܰܒܓܰܠ̈ܝܳܬܰܢ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܝܳܗܽܘ̣ܒܳܐ ܕܢܳܡܘ̣ܣܳܐ ܪܘ̣ܚܳܢܳܝܳܐ: ܘܰܡܒܰܕܩܳܢܳܐ ܕܐܘ̣ܪܚܳܐ ܡܰܚܝܳܢܝ̣ܬܳܐ: ܠܗܰܘ̇ ܕܰܒܝܰܕ ܡܕܰܒܪܳܢܘ̣ܬܳܐ ܕܝ̣ܠܶܗ ܦܳܪܘ̣ܩܳܝܬܳܐ ܫܒܝ̣̈ܠܶܐ ܕܦܘ̣ܪܩܳܢܳܐ ܒܝܰܕ ܨܰܘܡܳܐ ܩܰܕܝ̣ܫܳܐ ܒܰܩܢܘ̣ܡܶܗ ܕܪܰܫ ܠܰܢ: ܙܰܝܢܳܐ ܚܰܝܠܬܳܢܳܐ ܕܥܰܡ ܒܥܶܠܕܒܳܒܳܐ ܢ̇ܰܩܪܶܒ: ܘܐܰܩܝ̣ܡ ܠܰܢ ܡ̣ܶܢ ܡܰܦܘ̣ܠܬܳܐ ܗܳܝ ܕܰܒܝܰܕ ܠܰܥܒܘ̣ܬܳܐ ܕܒܝ̣ܫܳܐ ܥܰܬܶܕ ܠܰܢ: ܘܰܒܝܰܕ ܥܳܢܘܳܝܽܘܬܳܐ ܘܒܰܚܣܝ̣ܠܘ̣ܬܳܐ ܕܡ̣ܶܢ ܗܰܢܺܝܽܐܘ̣ܬܳܐ ܕܘ̣ܒܳܪܳܐ ܡܰܠܰܐܟܳܝܳܐ ܐܰܫܠܶܡ ܠܰܢ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܐܝܟ ܡܰܠܦܳܢܘ̣ܬܳܐ ܕܝ̣ܠܳܟ ܡܰܠܝܰܬ݀ ܚܰܝ̈ܶܐ ܢ̇ܫܰܡܠܶܐ ܠܶܐܣܛܰܕܺܝܽܘܢ ܗܳܢܳܐ ܕܨܰܘܡܳܐ ܩܰܕܝ̣ܫܳܐ: ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܟܰܕ ܡܚܰܣܝܳܢܳܐ ܗܳܘܶܐ ܐܰܢ̱ܬ ܠܰܢ: ܒܗܳܢܳܐ ܥܶܕܳܢܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝܠܰܢ: ܗܰܘ̇ ܝܰܠܕܳܐ ܡܬܘ̣ܡܳܝܳܐ ܘܠܳܐ ܡܶܬܕܰܪܟܳܢܳܐ: ܗܰܘ̇ ܓܢܝ̣ܙܳܐ ܘܪܳܡܳܐ ܘܠܳܐ ܡܶܬܥܰܩܒܳܢܳܐ: ܗܰܘ̇ ܕܶܢܚܳܐ ܫܒܝ̣ܚܳܐ ܠܳܐ ܡܶܬܡܰܫܚܳܢܳܐ: ܗܰܘ̇ ܓܰܐܝܳܐ ܕܓܰܐܝܳܐܝ̣ܬ ܡܶܬܓܰܐܶܐ ܥܰܠ ܬܪܘ̣ܢܘ̣ܣ ܕܫܘ̣ܒܚܶܗ: ܗܰܘ̇ ܕܡܶܛܽܠ ܪܶܚܡܰܬ݀ ܐ̱ܢܳܫܘ̣ܬܶܗ ܪܰܒܬܳܐ ܘܠܳܐ ܡܶܬܡܰܠܠܳܢܝ̣ܬܳܐ ܥܰܠ ܐܰܪܥܳܐ ܐܶܬ̣ܚܙܝ̣: ܘܥܰܡ ܒܢܰܝ̈ܢܳܫܳܐ ܐܶܬ̣ܗܰܦܰܟ: ܘܢܳܡܘ̣̈ܣܶܐ ܘܦܘ̣ܩ̈ܕܳܢܶܐ ܠܰܢ ܐܰܫܠܶܡ̣ܬ: ܟܰܕ ܒܰܓܠܝ̣ܠܳܐ ܐܶܬ̣ܗܰܦܰܟܬ ܐܶܫܟܰܚ̣ܬ ܠܦܝ̣ܠܝ̣ܦܳܘܣ: ܘܰܒܝܰܘܡܳܐ ܬܠܝ̣ܬܳܝܳܐ ܠܩܳܛܢܶܐ ܐܶܙܕܰܡܰܢ̣ܬ: ܗܳܝ ܕܒܳܗ̇ ܡܶܫܬܘ̣ܬܳܐ ܠܐ̱ܢܳܫ̈ܳܐ ܡܶܣ̈ܟܺܢܶܐ ܡܛܰܝܒܳܐ ܗ̱ܘܳܬ: ܕܬܶܬܝ̣ܕܰܥܝ̱ ܪܰܒܘ̣ܬܳܟ ܟܣܝ̣ܬܳܐ: ܘܟܰܕ ܗܶܢܽܘܢ ܣܡܝ̣̈ܟܶܐ ܘܚܰܬܢܳܐ ܥܰܡ ܫܰܘܫܒܝ̣ܢܳܐ ܒܰܚܠܘ̣ܠܳܐ ܥܳܒܘ̣ܪܳܐ ܡܶܬܦܰܨܚܝ̣ܢ ܗ̱ܘܰܘ ܚܰܡܪܳܐ ܐܰܘܦܝ̣ ܠܗ: ܕܨܳܐܰܪ ܠܢܳܡܘ̣ܣܳܐ ܥܰܬܝ̣ܩܳܐ ܕܚܰܡܪܳܐ ܛܳܒܳܐ ܢ̣ܶܬܚܰܘܶܐ: ܡ̣ܶܢܫܶܝܠܝ̱ ܙܡܝ̣̈ܢܶܐ ܥܰܠ ܚܰܬܢܳܐ ܡܪܰܛܢܝ̣ܢ ܗ̱ܘܰܘ: ܘܰܚܠܳܦ ܩܘ̣ܒܳܠܛܰܝܒܘ̣ܬܳܐ ܒܬܰܚܡܶܨܬܳܐ ܘܒܶܗܬܬܳܐ ܠܚܰܬܢܳܐ ܘܒܰܝܬܳܝܰܘ̈ܗ̱ܝ ܪܳܫܶܝܢ ܗ̱ܘܰܘ: ܓܰܠܝܳܐܝ̣ܬ ܠܶܐܡܳܟ ܒܬܘ̣ܠܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ ܐܰܙܝ̣ܥܬ: ܘܰܐܝܟ ܟܢܝ̣ܟܬܳܐ ܕܦܰܪܶܗܣܺܝܰܐ ܩܳܢܝܳܐ ܠܘܳܬܳܟ ܟܰܣܝܳܐܝ̣ܬ ܩܶܪܒ̣ܰܬ݀ ܘܒܰܦܝܳܣܳܐ ܠܘܳܬܳܟ ܐܶܡ̣ܪܰܬ݀ : ܐܳܘ ܒܶܪܝ̱ ܚܰܘܳܐ ܚܰܝܠܳܐ ܕܪܰܒܘ̣ܬܳܟ ܕܠܳܐ ܢܶܒ̣ܗܰܬ ܡܶܣܟܺܢܳܐ ܕܰܩ̣ܪܳܟ ܠܰܚܠܘ̣ܠܶܗ: ܐܰܢ̱ܬ ܕܶܝܢ ܛܳܒܳܐ ܕܠܳܐ ܐܳܠܶܡ ܙܥܝ̣ܦܳܐܝ̣ܬ ܠܘܳܬܳܗ̇ ܦܰܢܝ̣ܬ: ܕܡܳܐ ܠܝ̣ ܘܠܶܟܝ̱ ܐܰܢ̱ܬܬܳܐ ܠܳܐ ܐܶܬ̣ܬ݀ ܫܳܥܬܳܐ ܕܝ̣ܠܝ̱: ܒܕܘ̣ܒܳܪܳܐ ܐ̱ܚܪܺܢܳܐ ܩܳܝܡܳܐ ܗ̱ܘܳܬ݀ ܡܰܪܝܰܡ ܘܰܒܕܘ̣ܒܳܪܳܐ ܐ̱ܚܪܺܢܳܐ ܝܶܫܘܽܥ: ܦܶܩܕܰܬ݀ ܠܶܗ ܐܰܝܟ ܡܫܰܠܰܛܬܳܐ: ܘܰܥܢ̣ܳܬ݀ ܘܶܐܡ̣ܪܰܬ݀ ܠܝܶܫܘܽܥ ܒܰܪ ܚܺܐܪ̈ܶܐ ܠܰܡ ܚܰܡܪܳܐ ܠܰܝܬ ܠܗܽܘܢ: ܘܡܳܪܰܢ ܐܶܡܰܪ ܠܳܗ̇: ܕܡܳܐ ܠܝ̣ ܘܠܶܟܝ̱ ܐܰܢ̱ܬܬܳܐ ܙܥܝ̣ܦܳܐܝ̣ܬ ܦܰܢܝ̣ ܠܳܗ̇: ܒܗܳܝ̇ ܕܡܶܕܶܡ ܐ̱ܢܳܫܳܝܳܐ ܚܶܫܰܬ݀ ܘܰܒܥܳܬ݀ ܒܰܒܪܳܗ̇ ܕܬ̣ܶܫܬܰܒܗܰܪܝ̱: ܠܳܐ ܥܕܰܟܝ̣ܠ ܐܶܬ̣ܬ݀ ܫܳܥܰܬܝ̱: ܟܶܐܡܰܬ ܠܰܡ ܩܰܕܡܳܐܝ̣ܬ ܙܳܕܶܩ ܠܝ̣ ܕܐܰܟ̇ܪܶܙ ܘܟܶܢ ܒܬܶܕܡܪ̈ܳܬܳܐ ܐܶܫܰܪܰܪ ܠܟܳܪܘ̣ܙܘ̣ܬܝ̱: ܡܶܛܽܠ ܕܠܳܐ ܬ̣ܶܒܗܰܬܝ̱ ܘܬ̣ܶܬܟܚܶܕܝ̱ ܫܶܐܠܴ̈ܬܳܗ̇ ܫܰܡܠܝ̣ܬ: ܘܰܒܗܳܕܶܐ ܚܰܘܪܳܐ ܝܰܗ̣ܒܬ ܠܰܓܡܝ̣ܪ̈ܶܐ: ܕܠܳܐ ܢ̣ܶܬܒܰܕܪܽܘܢ ܒܢܳܡܘ̣ܣܳܐ ܕܐܰܒܳܗ̈ܶܐ ܕܰܟܝܳܢܳܐ: ܘܠܰܘ ܠܬܰܠܡܝ̣̈ܕܶܐ ܦܰܩܶܕܬ ܕܢܶܡܠܽܘܢ ܡܰܝ̈ܳܐ: ܐܶܠܳܐ ܠܰܡܫܰܡ̈ܫܳܢܶܐ ܕܐܝ̣ܬܰܝܗܽܘܢ ܣܳܗ̈ܕܶܐ ܢܘ̣ܟܪ̈ܳܝܶܐ: ܡܠܰܘ ܐܶܢܶܝܢ ܠܰܐܓ̈ܳܢܶܐ ܦܳܩܶܕ ܗ̱ܘܰܝܬ: ܐܰܝܟܰܢܳܐ ܕܠܳܐ ܢ̣ܰܣܒܪܽܘܢ ܕܦܰܢܛܰܣܺܝܰܐ ܘܗܰܓܳܓܘ̣ܬܳܐ ܐܝ̣ܬܶܝܗ̇: ܡܠܰܘ ܐܶܢܶܝܢ ܡܰܝ̈ܳܐ ܠܰܐܓ̈ܳܢܶܐ ܐܰܝܟܰܢܳܐ ܕܠܳܐ ܢ̣ܶܗܘܽܘܢ ܐܰܬܪܳܐ ܐܰܘ ܕܘ̣ܟܬܳܐ ܕܢ̣ܶܬܚܰܠܰܛ ܚܰܡܪܳܐ ܐܰܝܟ ܕܰܠܒܶܗܬܬܳܐ ܕܡܰܐܢܺܝ̣̈ܢܳܝܶܐ ܕܰܬܪܶܝܢ ܐܝ̣̈ܬܝܶܐ ܡܰܘܕܶܝܢ: ܛܳܒܳܐ ܘܒܝ̣ܫܳܐ: ܙܠܘ̣ܥܘ̱ ܡܶܟܝ̣ܠ ܘܐܰܝܬܰܘ ܠܪܝ̣ܫ ܛܪܝ̣ܩܠܝ̣ܢܳܐ ܐܳܡܰܪ ܗ̱ܘܰܝܬ: ܘܫܰܘܕܰܥ̣ܬ ܒܗܳܕܶܐ ܕܰܒܦܘ̣ܩܕܳܢܳܐ ܐܶܫܬܰܚ̣ܠܰܦܘ̱ ܡܰܝ̈ܳܐ ܠܚܰܡܪܳܐ: ܫܬܳܐ ܚܰܡܪ̈ܺܝ̣ܢ ܗ̱ܘܰܘ ܐܰܝܟ ܫܶܬ ܐܰܓܳܢ̈ܝ̣ܢ: ܘܛܰܥܡܳܐ ܘܪܝ̣ܚܳܐ ܚܰܕ ܐܝ̣ܬ ܗ̱ܘܳܐ ܠܶܗ: ܩ̣ܪܳܐ ܪܝ̣ܫ ܣܡܳܟܳܐ ܠܚܰܬܢܳܐ ܘܶܐܡ̣ܰܪ ܠܶܗ: ܕܟܽܠ ܐ̱ܢܳܫ ܚܰܡܪܳܐ ܛܳܒܳܐ ܠܘ̣ܩܕܰܡ ܡܳܙܶܓ ܘܗܳܝܕܶܝܢ ܐܰܝܢܳܐ ܕܰܒܨܺܝ̣ܪ: ܐܰܢ̱ܬ ܕܶܝܢ ܢܛܰܪܬܳܝܗ̱ܝ ܠܚܰܡܪܳܐ ܛܳܒܳܐ ܥܕܰܡܳܐ ܠܚܰܪܬܳܐ: ܛܳܒܳܐ ܩ̣ܪܳܝܗ̱ܝ ܒܗܳܝ ܕܥܳܠܶܒ ܗ̱ܘܳܐ ܒܫܘ̣ܦܪܶܗ ܠܚܰܡܪܳܐ ܟܝܳܢܳܝܳܐ: ܘܚܰܕܬܳܐ ܐܝ̣ܬܰܘܗ̱ܝ ܗ̱ܘܳܐ ܕܗܳܫܳܐ ܐܶܬ̣ܥܒܶܕ: ܘܟܰܕ ܒܬܶܕܡܘ̣ܪܬܳܐ ܚܕܰܬܳܐ ܐܶܬ̣ܒܰܣܰܡܘ̱ ܙܡܝ̣̈ܢܶܐ ܚܠܳܦ ܪܶܛܢܳܐ ܫܰܪܝ̣ܘ ܡܫܰܒܚܝ̣ܢ: ܘܛܰܝܒܘ̣ܬܳܐ ܚ̇ܕܰܬܳܐ ܡܩܰܒܠܝ̣ܢ ܘܰܚܠܳܦ ܥܰܬܝ̣ܩܳܐ ܚܰܕ̈ܬܶܐ ܗ̣ܘܰܘ: ܘܒܰܕܓܽܘܢ ܟܰܕ ܒܰܬܡܝ̣̈ܗܳܬܳܟ ܡܳܪܰܢ ܡܶܬܒܰܩܶܝܢܰܢ: ܬܶܫܒܘ̣ܚܬܳܐ ܚܕܰܬܳܐ ܠܡܳܪܘ̣ܬܳܟ ܡܩܰܪܒܝ̣ܢܰܢ ܥܰܡ ܬܰܟܫܶܦܬܳܐ ܘܰܦܝܳܣܳܐ ܫܰܚܠܶܦ ܠܠܶܒܰܘ̈ܳܬܰܢ ܡ̣ܶܢ ܒܝ̣̈ܫܳܬܳܐ ܠܛܳܒ̈ܳܬܳܐ: ܗܰܘ̇ ܕܠܶܗ ܡܶܬܬܚܝ̣ܒܳܐ ܣܶܓ݂ܕܬܳܐ: ܘܫܘ̣ܒܚܳܐ ܘܐܝ̣ܩܳܪܳܐ ܕܢ̇ܰܣܶܩ ܠܟ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ ܡܫܝ̣ܚܳܐ ܐܰܠܳܗܳܐ ܕܝܠܰܢ: ܐܰܝܟ ܕܐܶܫ̣ܬܰܚܠܰܦܘ̱ ܡܰܝ̈ܳܐ ܘܰܗ̣ܘܰܘ ܚܰܡܪܳܐ ܪܝ̣ܫܳܝܳܐ: ܨܒܝ̣ ܘܫܰܚܠܶܦ ܠܰܢ ܡܳܪܝܳܐ ܡ̣ܶܢ ܟܽܠ ܥܒܳܕ̈ܶܐ ܠܳܐ ܢܳܡ̈ܘ̣ܣܳܝܶܐ ܐܰܝܟܰܢܳܐ ܕܢ̇ܶܗܘܶܐ ܡܳܐܢ̈ܶܐ ܕܟܰܝ̈ܳܐ ܕܚܳܫܚܝ̣ܢ ܠܩܘ̣ܒܳܠܳܐ ܕܡܰܘܗ̈ܒܳܬܳܐ ܫܡܰܝܳܢܝ̈ܳܬܳܐ: ܘܰܚܢܰܢ ܘܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ: ܕܢ̇ܰܣܶܩ ܠܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܚܽܘ̣ܬܳܡܳܐ

ܙܡܝ̣ܢܳܐ ܕܙܰܡ̣ܶܢ ܥܰܡ̱̈ܡܶܐ ܠܡܶܫܬܘ̣ܬܶܗ ܘܒܰܙܡܝ̣̈ܢܶܐ ܐܶܬ̣ܡܢܝ̣ ܒܪܶܚܡܰܬ݀ ܐ̱ܢܳܫܘ̣ܬܶܗ: ܙܰܡ̣ܶܢ ܠܟܽܠܰܢ ܒܛܰܝܒܘ̣ܬܳܟ ܠܰܚܠܘ̣ܠܳܐ ܕܝ̣ܠܳܟ ܡܚܰܕܝܳܢܳܐ: ܘܰܠܦܶܨܚܳܐ ܩܰܕܝ̣ܫܳܐ ܕܢ̇ܰܘܕܶܐ ܘܰܢ̇ܫܰܒܚܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀