ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܣܳܥܘ̣ܪܳܐ ܕܬܶܕܡܪ̈ܳܬܳܐ ܫܒܝ̣̈ܚܳܬܳܐ: ܘܥܳܒܽܘ̇ܕܳܐ ܕܰܬܡܝ̣̈ܗܳܬܳܐ ܠܳܐ ܡܶܬܕܰܪ̈ܟܳܢܝܳܬܳܐ: ܠܗܰܘ̇ ܕܚܰܝ̈ܠܰܘܳܬܳܐ ܫܡܰܝ̈ܳܢܶܐ ܪܳܥܠܝ̣ܢ ܡ̣ܶܢ ܙܝ̣ܘܶܗ ܠܳܐ ܡܶܬܡܰܠܠܳܢܳܐ ܘܰܐܝܟ ܒܰܪܢܳܫܳܐ ܫܚܝ̣ܡܳܐ ܐܶܙܕܰܡ̣ܰܢ ܠܡܶܫܬܘ̣ܬܳܐ ܕܰܒܩܳܛܢܶܐ: ܠܗܰܘ̇ ܕܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ ܒ̣ܪܳܐ ܘܰܐܬ̣ܩܶܢ ܟܽܠܗܽܘܢ ܗܘܰܝ̈ܳܐ: ܘܰܒܪܶܡܙܳܐ ܕܨܶܒܝܳܢܶܗ ܫܰܚ̣ܠܶܦ ܠܡܰܝ̈ܳܐ ܘܰܗ̣ܘܰܘ ܚܰܡܪܳܐ ܪܝ̣ܫܳܝܳܐ: ܠܗܰܘ̇ ܕܠܶܗ ܡܶܬܬܚܝ̣ܒܳܐ ܣܶܓ݂ܕܬܳܐ ܘܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝܠܰܢ ܗܰܘ̇ ܝܰܡܳܐ ܠܳܐ ܡܶܬܡܰܫܚܳܢܳܐ ܕܪܶܚܡܰܬ݀ ܐ̱ܢܳܫܘ̣ܬܳܐ: ܗܰܘ̇ ܕܰܩܕܳܡ ܙܰܒܢ̈ܶܐ ܘܰܪ̈ܦܳܦܶܐ ܡ̣ܶܢ ܐܰܒܳܐ ܝ̣ܠܝ̣ܕ ܡܬܘ̣ܡܳܐܝ̣ܬ ܐܰܝܟ ܕܠܰܝܬ ܠܗܰܘܢܳܐ ܠܡܰܕܪܳܟܽܘ̣: ܒܚܰܪܬܳܐ ܕܶܝܢ ܕܙܰܒ̈ܢܶܐ ܟܰܕ ܨܒ̣ܳܐ ܒܛܰܝܒܘ̣ܬܶܗ ܕܠܰܢ ܡ̣ܶܢ ܬܰܢܝ̣ܢܳܐ ܐܳܟܶܠܩܰܪܨܳܐ ܢ̣ܰܥܕܶܐ: ܐܶܬ̣ܝ̣ܠܶܕ ܡ̣ܶܢ ܒܬܘ̣ܠܬܳܐ ܡܰܠܝܰܬ݀ ܛܰܝܒܘ̣ܬܳܐ ܠܥܶܠ ܡ̣ܶܢ ܟܝܳܢܳܐ ܟܰܕ ܠܳܐ ܫܪܳܐ ܛܰܒ̈ܥܶܐ ܕܰܒܬܘ̣̈ܠܶܝܗ̇: ܚܰܝ̈ܠܰܘܳܬܳܐ ܥܶܠܳܝ̈ܶܐ ܪܳܐܬܝ̣ܢ ܡ̣ܶܢ ܙܝ̣ܘܶܗ ܘܚܰܠܒܳܐ ܝܳܢܶܩ ܗ̱ܘܳܐ ܐܰܝܟ ܝܰܠܘ̣ܕܳܐ: ܣܪ̈ܳܦܶܐ ܡܩܰܕܫܝ̣ܢ ܠܶܗ ܟܰܕ ܟܳܘܙܝ̣ܢ ܕܰܢ̣ܚܘ̣ܪܽܘܢ ܒܶܗ ܐܰܝܟ ܫܝ̣ܛܳܐ ܒܥܰܙܪܘ̣ܪ̈ܶܐ ܡܬܟܰܪܰܟ ܗ̱ܘܳܐ: ܐܰܒܘ̣ܗ̱ܝ ܒܐܝ̣̈ܕܰܘܗ̱ܝ ܒ̣ܪܳܐ ܟܽܠܗܶܝܢ ܒܶܪ̈ܝܳܬܳܐ: ܘܝܰܘܣܶܦ ܡܶܣܬܒ݂ܰܪ ܗ̱ܘܳܐ ܕܐܝ̣ܬܰܘܗ̱ܝ ܐܰܒܘ̣ܗ̱ܝ: ܘܟܰܕ ܐܶܬ̣ܪܰܒܝ̣ ܒܡܘ̣ܫ̈ܚܳܬܳܐ ܐ̱ܢܳܫܳܝ̈ܳܬܳܐ ܘܡܰܠܝ̣ ܒܰܩܢܘ̣ܡܶܗ ܢܳܡܘ̣ܣܳܐ ܕܡܽܘܫܶܐ ܟܺܐܢܳܐܝ̣ܬ: ܨܒ̣ܳܐ ܕܢܰܘܕܰܥ ܠܰܒܢܰܝ̈ܢܳܫܳܐ ܒܝܰܕ ܐܳܬܘ̈ܳܬܳܐ ܘܬܶܕܡܪ̈ܳܬܳܐ ܕܗܘ̣ܝܽܘ̣ ܡܳܪܳܐ ܕܟܽܠ: ܘܐܰܠܳܗܳܐ ܕܥܰܠ ܟܽܠ: ܘܡܶܛܽܠ ܕܰܒܥ̣ܳܐ ܕܰܢ̣ܚܰܘܶܐ ܕܟܽܠ ܡܶܕܶܡ ܫܰܦܝ̣ܪܳܐ ܐܰܬ̣ܩܶܢ ܐܰܒܳܐ ܒܐܝ̣̈ܕܰܘܗ̱ܝ: ܠܡܶܫܬܘ̣ܬܳܐ ܕܩܳܛܢܶܐ ܐܶܙ̣ܕܰܡܰܢ ܥܰܡ ܐܶܡܶܗ ܘܬܰܠܡܝ̣̈ܕܰܘܗ̱ܝ: ܡܰܠܰܐܟ̈ܶܐ ܘܥܝ̣ܪ̈ܰܝ ܪܰܘܡܳܐ ܐܶܬ̣ܕܰܡܰܪܘ̱ ܒܡܳܪܗܽܘܢ ܟܰܕ ܚ̣ܙܰܐܘܽܘ̣ܗ̱ܝ ܕܰܐܝܟ ܒܰܪܢܳܫܳܐ ܫܚܝ̣ܡܳܐ ܒܶܝܬ ܒܢܰܝ̈ ܐ̱ܢܳܫ̈ܳܐ ܣܡܝ̣ܟ ܗ̱ܘܳܐ: ܪ̈ܝ̣ܫܰܝ ܡܰܠܰܐܟ̈ܶܐ ܪܳܬܘ̱ ܘܰܬ̣ܗܰܪܘ̱: ܟܪ̈ܘ̣ܒܶܐ ܐܶܬ̣ܪܗܶܒܘ̱: ܠܶܓܝ̈ܽܘ̣ܢܶܐ ܠܳܐ ܡܶܬܚܰܙܝܳܢܝ̈ܳܬܳܐ ܫܰܒ̣ܰܚܘ̱: ܟܰܕ ܚ̣ܙܰܘ ܠܒܳܪܘ̣ܝܗܽܘܢ ܕܰܒܡܶܫܬܘ̣ܬܳܐ ܐܰܪܥܳܢܳܝܬܳܐ ܐܰܝܟ ܚܰܕ ܡ̣ܶܢ ܫܝ̣̈ܛܶܐ ܝ̣ܬܶܒ ܗ̱ܘܳܐ: ܟܰܕ ܕܶܝܢ ܒܪܶܡܙܶܗ ܐܰܘܦܝ̣ ܗ̱ܘܳܐ ܚܰܡܪܳܐ: ܦܩ̣ܰܕ ܕܢ̣ܶܡܠܽܘܢ ܡܰܝ̈ܳܐ ܠܰܐܓ̈ܳܢܶܐ: ܘܰܒܝܰܕ ܪܶܡܙܶܗ ܐܶܫ̣ܬܰܚܠܰܦܘ̱ ܘܰܗ̣ܘܰܘ ܚܰܡܪܳܐ ܪܝ̣ܫܳܝܳܐ: ܚ̣ܙܳܐ ܚܰܬܢܳܐ ܘܰܚܕܝ̣ ܘܐܳܦ ܟܰܠܬܳܐ ܕܳܨܰܬ݀ : ܒܢܰܝ̈ ܓܢܘ̣ܢܳܐ ܪܳܘܙܝ̣ܢ: ܘܰܩܪ̈ܰܝܳܐ ܕܕܳܝ̇ܨܝ̣ܢ: ܗܳܢܽܘܢ ܕܰܟܢܝ̣ܫܝ̣ܢ ܗ̱ܘܰܘ ܘܰܡܫܰܒܚܝ̣ܢ: ܝܳܠܕܰܬ݀ ܐܰܠܳܗܳܐ ܘܰܫܠܝ̣̈ܚܶܐ ܕܰܦܨܺܝ̣ܚܝ̣ܢ: ܘܟܰܕ ܡ̣ܶܢ ܗܳܢܳܐ ܠܗܳܢܳܐ ܡܶܬܝܰܒܰܠ ܗ̱ܘܳܐ ܠܰܚ̈ܕܳܕܶܐ ܐܳܡ̇ܪܝ̣ܢ ܗ̱ܘܰܘ: ܚܙܝ̣ ܪܝ̣ܚܶܗ ܟܡܳܐ ܒܰܣܝ̣ܡ: ܘܗܘ̣ ܓܰܘܢܶܗ ܟܡܳܐ ܫܰܦܝ̣ܪ: ܘܰܚܙܳܬܶܗ ܟܡܳܐ ܫܒܝ̣ܚܳܐ: ܗܳܕܶܐ ܬܶܕܡܘ̣ܪܬܳܐ ܠܥܶܠܳܝ̈ܶܐ ܘܰܠܬܰܚ̈ܬܳܝܶܐ ܐܰܬ̣ܗܪܰܬ݀: ܠܝܽܘ̣ܕ̈ܳܝܶܐ ܛܳܠܘ̣̈ܡܶܐ ܐܰܟܡ̣ܪܰܬ݀ ܟܰܕ ܕܘ̣ܡܳܪܳܐ ܗܳܢܳܐ ܠܟܽܠ ܐ̱ܢܳܫ ܡܶܫܬܡܰܥ ܗ̱ܘܳܐ: ܚܕܘ̣̈ܓܶܐ ܘܰܙܡܝ̣̈ܢܶܐ ܩܕܳܡ ܟܽܠ ܐ̱ܢܳܫ ܡܶܫܬܰܥܶܝܢ ܗ̱ܘܰܘ: ܟܰܕ ܛܰܥܡ̣ܶܗ ܕܚܰܡܪܳܐ ܠܟܽܠ ܐ̱ܢܳܫ ܡܰܬܗܰܪ ܗ̱ܘܳܐ: ܟܰܕ ܝܘ̣ܩܢܳܐ ܕܰܚܙܳܬܶܗ ܠܟܽܠܢܳܫ ܡܰܬܡܰܗ ܗ̱ܘܳܐ: ܟܰܕ ܐܰܝܟ ܕܡ̣ܶܢ ܚܰܕ ܦܘ̣ܡܳܐ ܟܽܠܶܗ ܚܠܘ̣ܠܳܐ ܠܰܫܡܶܗ ܡܫܰܒܰܚ ܗ̱ܘܳܐ: ܐܶܡܰܬܝ̱ ܕܰܚ̣ܙܰܘ ܟܳܗ̈ܢܶܐ ܙܺܐܦܳܢ̈ܶܐ ܕܶܐܬ̣ܓܠܝ̣ ܫܪܳܪܶܗ ܕܰܒܪܳܐ: ܗܶܢܽܘܢ ܒܶܗܬܰܬ݀ ܐܰܦ̈ܶܐ ܐܶܬ̣ܟܰܣܝ̣ܘ: ܐܶܡܰܬܝ̱ ܕܟܰܠܬܳܐ ܥܰܡ ܚܰܬܢܳܐ ܠܰܫܪܳܪܶܗ ܢܩ̣ܶܦܘ̱: ܐܶܡܰܬܝ̱ ܕܬܰܠܡܝ̣̈ܕܰܘܗ̱ܝ ܚ̣ܙܰܘ ܫܘ̣ܒܚܶܗ ܘܗܰܝܡ̣ܶܢܘ̱ ܒܶܗ: ܐܶܡܰܬܝ̱ ܕܒܳܐܣ̈ܘܳܬܳܐ ܘܬܶܕܡܪ̈ܳܬܳܐ ܫܰܪܝ̣ ܕܢܶܓܠܶܐ ܢܰܦܫܶܗ: ܐܶܡܰܬܝ̱ ܕܰܐܝܟ ܡܰܒܘ̣ܥܳܐ ܟܽܠ ܚܘ̣ܠ̈ܡܳܢܝ̣ܢ ܡ̣ܶܢܗ ܪܳܕܶܝܢ ܗ̱ܘܰܘ: ܐܶܡܰܬܝ̱ ܕܡܝ̣̈ܬܶܐ ܒܩܳܠܶܗ ܡܶܬܢܰܚܡܝ̣ܢ ܗ̱ܘܰܘ: ܐܶܡܰܬܝ̱ ܕܝܰܡܳܐ ܕܥܘ̣ܕܪ̈ܳܢܶܐ ܡ̣ܶܢܗ ܓܳܐܰܚ ܗ̱ܘܳܐ: ܐܶܡܰܬܝ̱ ܕܢܘ̣ܗܪܳܐ ܘܚܰܝ̈ܶܐ ܘܚܰܕ̈ܘܳܬܳܐ ܠܟܽܠ ܗܳܘܶܐ ܗ̱ܘܳܐ ܘܰܠܟܽܠ ܐܝ̣ܬܰܘܗ̱ܝ: ܘܒܰܕܓܽܘܢ ܡܶܬܟܰܫܦܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܒܗܳܢܳܐ ܝܰܘܡܳܐ ܕܫܘ̣ܪܳܝ ܣܳܥܘ̣ܪܘ̣ܬ ܬܶܕܡܪ̈ܳܬܳܟ ܕܳܐܦ ܠܰܢ ܬ̣ܫܰܚܠܶܦ ܡ̣ܶܢ ܒܝ̣̈ܫܳܬܳܐ ܠܛܳܒ̈ܳܬܳܐ: ܒܒܶܝܬ ܓܢܘ̣ܢܳܐ ܕܝ̣ܠܳܟ ܫܡܰܝܳܢܳܐ ܐܰܫܪܳܐ ܠܰܢ: ܒܕܘ̣ܝܳܪܳܐ ܗܰܘ̇ ܥܕܶܢܳܝܳܐ ܫܰܘܬܶܦ ܠܰܢ: ܒܗܰܝܡܳܢܘ̣ܬܳܐ ܕܒܳܟ ܫܰܪܰܪ ܠܰܢ: ܒܘܰܥܕܳܐ ܕܩܰܕܝ̣̈ܫܰܝܟ ܐܰܣܡܶܟ ܠܰܢ: ܒܰܙܡܝ̣̈ܢܰܝ ܡܶܫܬܘ̣ܬܳܟ ܚܰܠܶܛ ܠܰܢ: ܒܰܚܕܘ̣̈ܓ݂ܰܝܟ ܫܰܪܝ̣ܪ̈ܶܐ ܡܢܝ̣ ܠܰܢ: ܒܛܰܠܳܟ ܗܰܢܺܝܳܐܐ ܦܰܝܶܓ ܠܰܢ: ܒܝܳܪܬܘ̣ܬܳܐ ܕܰܓ݂ܒܰܝ̈ܟ ܐܰܥܡܰܪ ܠܰܢ: ܒܰܟܠܝ̈ܠܶܐ ܕܙܳܟܘ̣ܬܳܐ ܟܰܠܶܠ ܠܰܢ: ܒܰܠܡܺܐܢܳܐ ܕܫܰܝܢܳܐ ܐܰܢܝ̣ܚ ܠܰܢ: ܒܡܶܫܬܘ̣ܬܳܟ ܫܡܰܝܳܢܝ̣ܬܳܐ ܚܰܕܳܐ ܠܰܢ: ܒܢܘ̣ܗܪܳܐ ܕܡ̣ܶܢ ܝܰܡܝ̣ܢܳܟ ܐܰܦܨܰܚ ܠܰܢ: ܣܡܘ̣ܟ ܠܣܳܒ̈ܶܐ ܘܠܰܡܚܝ̈ܠܶܐ ܒܚܰܝܠܳܟ: ܥܰܕܰܪ ܠܰܟܪ̈ܝ̣ܗܶܐ ܘܠܰܐܠܝ̣̈ܨܶܐ: ܦܰܪܢܶܣ ܘܙܽܘܢ ܠܒܳܝ̈ܫܶܐ ܘܡܶܣ̈ܟܺܢܶܐ: ܨܒܝ̣ ܘܟܰܢܶܫ ܠܛܳܥܰܝ̈ܳܐ ܘܠܰܐܒܝ̣̈ܕܶܐ: ܩܰܝܶܡ ܠܝܰܬܡ̈ܶܐ ܘܠܰܐܪ̈ܡܠܬܳܐ: ܪܰܚܶܡ ܥܰܠ ܡܰܣܟ̈ܠܳܢܐ: ܫܒܘ̣ܩ ܠܚܰܛܳܝ̈ܶܐ: ܬ̣ܶܗܘܶܐ ܛܰܝܒܘ̣ܬܳܟ ܡܚܰܣܝܳܢܝ̣ܬܳܐ ܘܐܳܦ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝܡ̈ܢܶܐ: ܘܰܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܘܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀