ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܡܶܠܬܳܐ ܡܫܰܪܝܳܢܳܐ ܘܰܡܫܰܠܡܳܢܳܐ ܕܟܽܠ ܡܶܕܶܡ: ܕܫܘ̣ܪܳܝܳܐ ܘܫܘ̣ܠܳܡܳܐ ܠܶܗ ܠܳܐ ܚܳܫܶܒ: ܘܒܶܝܬ ܐܝ̈ܕܰܘܗ̱ܝ ܗ̣ܘܳܐ ܘܶܐܬ̣ܩܰܝܰܡ ܟܽܠܡܶܕܶܡ ܕܰܗ̣ܘܳܐ: ܘܟܽܠ ܒܶܗ ܡܶܬܬܙܝ̣ܥ ܘܺܐܝܬܰܘܗ̱ܝ ܚܘ̣ܬܳܡܳܐ ܘܫܘ̣ܠܳܡܳܐ ܕܟܽܠ: ܟܰܕ ܗܽܘ̣ ܒܰܠܚܘ̣ܕܰܘܗ̱ܝ ܠܳܐ ܡܶܬܬܰܚܰܡ ܘܠܳܐ ܡܫܰܪܶܐ ܘܠܳܐ ܡܫܰܠܶܡ: ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ: ܗܰܘ̇ ܕܰܒܥܘ̣ܕܪܳܢܳܐ ܘܣܘ̣ܝܳܥܳܐ ܕܛܰܝܒܘ̣ܬܶܗ ܫܰܪܝ̣ܢܰܢ ܒܝܰܘ̈ܡܳܬܳܐ ܗܳܠܶܝܢ ܕܨܰܘܡܳܐ ܕܝ̣ܠܶܗ ܡܳܪܢܳܝܳܐ: ܘܗܳܫܳܐ ܒܰܚܢܳܢܶܗ ܡܰܢܰܥ̣ܢܰܢ ܠܫܘ̣ܠܳܡ ܐܰܪܒܥܝ̣ܢ ܕܝ̣ܠܶܗ ܡܰܠ̈ܝ݂ܰܝ݂ ܙܳܟܘ̣ܬܳܐ ܕܗܽܘ̣ ܡܰܫܘܶܐ ܠܰܢ ܠܦܶܨܚܳܐ ܚܰܝܳܐ ܘܩܰܕܝ̣ܫܳܐ ܘܠܰܩܝܳܡܬܶܗ ܡܫܰܒܰܚܬܳܐ ܒܚܰܕܘ̣ܬܳܐ: ܕܠܶܗ ܩ̈ܳܠܶܐ ܘܫܘ̣ܒܚܳܐ ܘܰܕܩܘ̣ܒܳܠܛܰܝܒܘ̣ܬܳܐ ܡܰܣܩܝ̣ܢܰܢ ܒܗܳܢܳܐ ܥܶܕܳܢܳܐ ܕܩܰܘܡܳܐ ܕܰܬܪܶܝܢ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܣܳܓ̇ܕܝ̣ܢܰܢ ܘܡܰܘܕܶܝܢܰܢ ܘܰܡܫܰܒܚܝ̣ܢܰܢ ܠܡܳܪܘ̣ܬܳܟ ܐܰܠܳܗܰܢ ܣܓܝ̣ܕܳܐ ܝܶܫܘ̣ܥ ܡܫܝ̣ܚܳܐ: ܗܰܘ̇ ܕܝܰܗ̣ܒܬ ܐܰܢ̱ܬ ܠܳܟ ܠܣܘ̣ܪܳܩܳܐ ܨܶܒܝܳܢܳܝܳܐ ܚܠܳܦܰܝܢ: ܘܶܐܬܥܰܛܰܦ̣ܬ ܒܚܘ̣ܒܳܟ ܡܰܟܝ̣ܟܘ̣ܬܰܢ: ܘܰܫܩܰܠ̣ܬ ܥܠܰܝܟ ܟܽܠܗܶܝܢ ܣܰܟ̈ܠܘܳܬܰܢ ܘܰܥ̣ܛܰܝܬ ܒܰܩܢܘ̣ܡܳܟ ܠܟܽܠܗܶܝܢ ܡܶܬܥܰܒܪ̈ܳܢܘܳܬܰܢ: ܘܰܐܣܝ̣ܬ ܘܰܐܚܠܶܡ̣ܬ ܒܰܚܢܳܢܳܐ ܕܒܰܣܝ̣ܡܘ̣ܬܳܟ ܟܽܠܗܶܝܢ ܫܘ̣̈ܡܳܬܰܢ ܘܡܰܚ̈ܘܳܬܰܢ: ܘܰܐܫܠ̣ܶܡܬ ܠܰܢ ܢܳܡܘ̣̈ܣܶܐ ܪ̈ܘ̣ܚܳܢܳܝܶܐ ܕܰܒܗܽܘܢ ܢ̇ܶܕܥܳܟ: ܘܦܘ̣ܩ̈ܕܳܢܶܐ ܡܳܪ̈ܢܳܝܶܐ ܕܰܒܗܽܘܢ ܢ̇ܶܫܦܰܪ ܠܳܟ: ܙܰܒ̈ܢܶܐ ܛܳܒ̈ܶܐ ܘܰܡܩܰܒ̈ܠܶܐ ܕܰܒܗܽܘܢ ܢ̇ܶܬܬܰܓܰܪ ܚܰܝ̈ܶܐ ܚܰܕ̈ܬܶܐ ܠܢܰܦ̈ܫܳܬܰܢ: ܘܥܰܕܥܺܐܕ̈ܶܐ ܦܳܪ̈ܘ̣ܩܳܝܶܐ ܕܰܒܗܽܘܢ ܢ̇ܶܚܕܶܐ ܘܢ̇ܶܫܟܰܚ ܦܘ̣ܪܩܳܢܳܐ ܘܚܰܝ̈ܶܐ: ܘܗܳܫܳܐ ܡܳܪܝܳܐ ܕܰܠܙܰܒܢܳܐ ܗܳܢܳܐ ܡܩܰܒܠܳܐ ܕܨܰܘܡܳܐ ܡܳܪܢܳܝܳܐ ܕܝ̣ܠܳܟ ܫܰܡܠܝ̣ܢܰܢ ܥܰܡ ܣܳܥܘ̣ܪܘ̣ܬܳܐ ܛܳܒܬܳܐ ܕܦܘ̣ܩ̈ܕܳܢܰܝܟ ܡܰܥܒ̈ܕܰܝ ܚܰܝ̈ܶܐ: ܘܡܰܢܰܥ̣ܢܰܢ ܠܚ̈ܰܫܰܝܟ ܣܓܝ̣̈ܕܶܐ ܘܡܰܚ̈ܝܳܢܶܐ ܘܰܠܦܶܨܚܳܐ ܕܝ̣ܠܳܟ ܡ̇ܠܶܐ̣ ܛܘ̣̈ܒܶܐ ܘܒܘ̣̈ܣܳܡܶܐ: ܒܳܥܶܝܢܰܢ ܡܶܢܳܟ ܥܰܡ ܓܥܳܬܳܐ ܫܚܝ̣ܩܬܳܐ ܘܡܰܠܝܰܬ݀ ܣܰܒܪܳܐ ܘܚܘ̣ܒܳܐ ܘܗܰܝܡܳܢܘ̣ܬܳܐ: ܕܠܳܐ ܢ̇ܶܗܘܶܐ ܨܰܘܡܰܢ ܩܕܳܡܰܝܟ ܐܰܝܟ ܨܰܘܡܳܐ ܕܥܰܡܳܐ ܡܡܰܪܡܪܳܢܳܐ ܘܳܐܫ̈ܕܰܝ ܕܡܳܐ: ܘܢ̇ܶܫܬܟܰܚ ܩܕܳܡܰܝܟ ܡܚܰܝ̈ܒܶܐ ܘܰܕܠܳܐ ܐܰܓܪܳܐ: ܠܳܐ ܡܳܪܝ̱ ܢ̣ܶܗܘܶܐ ܨܰܘܡܳܐ ܕܨܳܡܢ̣ܰܢ ܣܪܝ̣ܩܳܐ ܩܕܳܡܰܝܟ ܘܢ̇ܶܫܬܟܰܚ ܒܰܗ̈ܝ̣ܬܶܐ ܘܠܳܐ ܡܩܰܒ̈ܠܶܐ: ܘܠܳܐ ܡܳܪܝ̱ ܢ̣ܶܗܘܶܐ ܨܰܘܡܳܐ ܕܨܳܡ̣ܢܰܢ ܩܕܳܡܰܝܟ ܐܰܝܟ ܨܰܘܡܳܐ ܕܣܳܦܪ̈ܶܐ ܘܕܰܦܪ̈ܝ̣ܫܶܐ ܕܰܟܢܘ̣ܫܬܳܐ: ܘܢ̇ܶܫܡܰܥ ܡܶܢܳܟ ܕܙܶܠܘ̱ ܠܟܽܘܢ ܡܶܢܝ̱ ܕܩܰܒܶܠ̣ܬܽܘܢ ܐܰܓܪܟܽܘܢ ܡ̣ܶܢ ܒܢܰܝ̈ܢܳܫܳܐ: ܠܳܐ ܡܳܪܝ̱ ܢ̣ܶܗܘܶܐ ܨܰܘܡܰܢ ܘܰܨܠܘ̣ܬܰܢ ܩܕܳܡܰܝܟ ܐܰܝܟ ܕܺܐܝܙܒܝ̣ܠ ܡܰܪܳܚܬܳܐ: ܘܢ̇ܶܣܰܒ ܦܘ̣ܪܥܳܢܳܐ ܐܰܒܕܳܢܳܐ ܕܢܰܦ̈ܫܳܬܰܢ: ܠܳܐ ܡܳܪܝ̱ ܢ̣ܶܗܘܶܐ ܨܰܘܡܰܢ ܘܰܨܠܘ̣ܬܰܢ ܐܰܝܟ ܨܰܘܡܳܐ ܕܝܘ̣̈ܕܳܝܶܐ ܩܕܳܡܰܝܟ: ܘܬ̣ܺܐܡܰܪ ܠܰܢ ܕܰܠܡ̈ܰܨܰܘܳܬܳܐ ܘܚܶܪ̈ܝܳܢܶܐ ܘܠܰܡܩܰܦܳܚܘ̣ ܘܰܠܡܶܐܠܰܨ ܠܰܐܚܰܝ̈ܟܽܘܢ ܨܳܡ̣ܬܽܘܢ: ܠܳܐ ܡܳܪܝ̱ ܢ̣ܶܗܘܶܐ ܨܰܘܡܰܢ ܘܫܰܗܪܰܢ ܘܬܶܫܡܶܫܬܰܢ ܐܰܝܟ ܢܳܣ̈ܒܰܝ ܒܰܐܦ̈ܶܐ ܩܕܳܡܰܝܟ: ܘܬ̣ܺܐܡܰܪ ܠܰܢ ܕܰܒܨܰܘܡܟܽܘܢ ܥܰܘ̈ܳܠܶܐ ܐܶܫܬܟܰܚ̣ܬܽܘܢ ܕܥܳܠܒܝ̣ܢ ܐܢ̱ܬܽܘܢ ܠܰܚ̈ܕܳܕܶܐ: ܘܒܳܙܝ̣ܢ ܐܰܢ̱ܬܽܘܢ ܠܝܰܬ̈ܡܶܐ ܘܠܰܐܪ̈ܡܠܳܬܳܐ: ܘܠܳܐ ܚܳܐܢܝ̣ܢ ܐܰܢ̱ܬܽܘܢ ܠܰܐܚܰܝ̈ܟܽܘܢ ܒܨܝ̣ܪ̈ܶܐ: ܠܳܐ ܡܳܪܝ̱ ܢ̣ܶܗܘܶܐ ܨܰܘܡܰܢ ܘܥܰܡ̈ܠܰܝܢ ܩܕܳܡܰܝܟ ܐܰܝܟ ܕܶܐܣܟܝ̣̈ܡܬܳܢܶܐ ܕܚܳܒܫܝ̣ܢ ܕܠܳܒܫܝ̣ܢ ܗ̱ܘܰܘ ܣܰܩܳܐ ܘܰܡܟܝ̣ܟܝ̣ܢ ܗ̱ܘܰܘ ܩܶܛܡܳܐ: ܘܰܡܟܰܡܪܝ̣ܢ ܗ̱ܘܰܘ ܦܰܪ̈ܨܘ̣ܦܰܝܗܽܘܢ ܩܕܳܡ ܐ̱ܢܳܫ̈ܳܐ: ܘܬ̣ܺܐܡܰܪ ܠܰܢ ܡܶܣܟܺܢܳܐܝ̣ܬ ܕܠܰܘ ܨܰܘܡܳܐ ܕܰܓܒܺܝ̇ܬ ܨܳܡ̣ܬܽܘܢ ܐܶܠܳܐ ܕܰܠܩܘ̣ܒܠܳܐ: ܠܳܐ ܡܳܪܝ̱ ܬ̣ܰܣܠܶܐ ܠܰܡܪܰܚܡܳܢܘ̣ܬܰܢ ܐܰܝܟ ܕܰܦܪ̈ܝ̣ܫܶܐ ܕܰܒܝܘ̣ܒܳܒܳܐ ܕܩܰܪܢܳܐ ܥܳܒܕܝ̣ܢ ܗ̱ܘܰܘ ܠܳܗ̇ ܠܙܶܕܩܰܬܗܽܘܢ: ܠܳܐ ܡܳܪܝ̱ ܬ̣ܰܣܠܶܐ ܠܰܨ̈ܠܰܘܳܬܰܢ ܘܒܳܥ̈ܘܳܬܰܢ ܐܰܝܟ ܗܰܘ̇ ܦܪܝ̣ܫܳܐ ܘܢ̇ܶܦܘ̣ܩ ܡ̣ܶܢ ܨܶܝܕ ܟܺܐܢܘ̣ܬܳܟ ܚܰܝܳܒ̈ܶܐ ܒܫܘ̣ܠܳܡ ܐܰܓܘ̣ܢܰܢ: ܠܳܐ ܡܳܪܝ̱ ܬ̣ܰܣܠܶܐ ܠܥܰܡ̈ܠܶܐ ܕܗܰܕܳܡܰܝ̈ܢ ܕܰܠܗܳܢܽܘܢ ܕܰܠܒܰܪ ܡ̣ܶܢ ܦܘ̣ܠܚܳܢܳܟ ܥܡ̣ܰܠܘ̱ ܘܶܐܬ̣ܪܰܚܰܩܘ ܡܶܢܳܟ ܐܰܝܟ ܠܳܐ ܝܺܕܝ̣̈ܥܶܐ: ܠܳܐ ܡܳܪܝ̱ ܢ̇ܶܚܣܰܪ ܠܰܢ ܡܶܫܚܳܐ ܕܢܳܛܘ̣ܪܘ̣ܬ ܦܘ̣ܩ̈ܕܳܢܰܝܟ ܘܢ̇ܶܦܘ̣ܫ ܒܕܘ̣ܘܳܢܳܐ ܕܚܶܫܟܳܐ ܕܠܰܡ̈ܦܺܐܕܰܝܢ ܠܒܰܪ ܡ̣ܶܢ ܬܰܪܥܳܟ ܣܰܟܠܳܐܝ̣ܬ: ܠܳܐ ܡܳܪܝ̱ ܢ̇ܶܫܬܟܰܚ ܒܡܳܐܢ̈ܶܐ ܨ̈ܳܐܶܐ ܐܰܘܟܝ̣ܬ ܕܘ̣ܒܳܪ̈ܶܐ ܫܟܝ̣ܪ̈ܶܐ ܒܶܝܬ ܣܡܝ̣̈ܟܶܐ ܕܡܶܫܬܘ̣ܬܳܟ: ܘܬ̣ܶܦܩܘ̣ܕ ܘܢ̣ܰܦܩܽܘܢܳܢ ܠܒܰܪ ܡ̣ܶܢ ܚܰܓܳܟ ܡܫܰܡ̈ܫܳܢܰܝܟ ܪ̈ܘ̣ܚܳܢܳܝܶܐ ܟܰܕ ܐܰܣܝܪܝ̣ܢܰܢ ܘܢ̇ܶܗܘܶܐ ܒܕܘ̣ܘܳܢܳܐ: ܠܳܐ ܡܳܪܝ̱ ܢ̇ܶܬܛܰܪܰܦ ܐܰܝܟ ܗܰܘ̇ ܥܰܬܝ̣ܪܳܐ ܓܠܝ̣ܙ ܡ̣ܶܢ ܪ̈ܰܚܡܶܐ ܘܢ̇ܶܫܬܰܢܰܩ ܒܨܶܗܝܳܐ ܒܓܺܗܰܢܳܐ ܕܢܘ̣ܪܳܐ ܘܢ̇ܶܓܥܶܐ ܒܚܰܫܳܐ ܟܰܕ ܠܛܘ̣ܦܬܳܐ ܚܕܳܐ ܕܡܰܝ̈ܳܐ ܪܳܓܝ̣ܢܰܢ ܘܠܳܐ ܢ̇ܶܬܥܢܶܐ: ܠܳܐ ܡܳܪܝ̱ ܬ̣ܶܡܢܶܐ ܠܰܢ ܥܰܡ ܠܳܐ ܡܗܰܝ̈ܡܢܶܐ ܘܰܓܠܝ̣̈ܙܰܝ ܡ̣ܶܢ ܛܳܒ̈ܳܬܳܐ: ܕܰܐܚܝ̣ܕ ܠܗܽܘܢ ܕܰܝܘܳܐ ܣܰܗܪܳܢܳܝܳܐ ܘܫܶܢܬܳܢܳܝܳܐ ܕܪ̈ܶܒܝܳܬܳܐ ܘܕܰܩ̈ܨܳܨܶܐ ܘܰܕܥܳܠܘ̣ܒܘ̣ܬܳܐ ܕܺܐܝܬܶܝܗ̇ ܕܶܚܠܰܬ݀ ܦܬܰܟܪ̈ܶܐ ܕܩܳܪܶܝܢ ܘܠܳܐ ܡܶܬܥܢܶܝܢ: ܘܢܳܩܫܝ̣ܢ ܘܠܳܐ ܦܳܬܚܝ̣ܢ ܠܗܽܘܢ ܘܫܳܐܠܝ̣ܢ ܘܠܳܐ ܢܳܣܒܝ̣ܢ: ܘܡܰܘܕܶܝܢ ܘܠܳܐ ܡܶܬܪܰܚܡܝ̣ܢ ܒܪܰܡ ܠܣܳܛܳܢܳܐ ܘܰܠܚܰܝ̈ܠܰܘܳܬܶܗ ܡܶܫܬܰܠܡܝ̣ܢ ܠܬܰܫܢܝ̣ܩܳܐ ܕܰܠܥܳܠܰܡ: ܡܶܛܽܠ ܕܥܰܡܶܗ ܦܠ̣ܰܚܘ̱ ܘܠܶܗ ܣܓ̣ܶܕܘ̱: ܐܶܠܳܐ ܡܶܛܽܠ ܡܪܰܚܡܳܢܘ̣ܬܳܟ ܡܳܪܝܳܐ ܢ̣ܶܬܩܰܒܰܠ ܨܰܘܡܰܢ ܩܕܳܡܰܝܟ ܐܰܝܟ ܨܰܘ̈ܡܶܐ ܕܟܰܫܝ̣ܪ̈ܶܐ ܕܰܐܚܒ̣ܘ̣ܟ: ܘܰܨ̈ܠܰܘܳܬܰܢ ܐܰܝܟ ܨܠܰܘ̈ܳܬܳܐ ܕܡܰܟܝ̣̈ܟܶܐ ܕܪܰܚܡܘ̣ܟ: ܘܫܰܗܪܰܢ ܘܩܰܘܡܰܢ ܕܰܩܕܳܡܰܝܟ ܐܰܝܟ ܕܝ̣ܚܝ̣̈ܕܳܝܶܐ ܘܥܳܢ̈ܘܳܝܶܐ ܕܰܚܦܝ̣ܛܳܐܝ̣ܬ ܦܰܠ̣ܚܘ̣ܟ: ܘܬܶܫܡ̈ܫܳܬܰܢ ܐܰܝܟ ܬܶܫܡ̈ܫܳܬܳܐ ܕܙܰܕܝ̣̈ܩܶܐ ܕܪܰܥܝܽܘ̣ܟ: ܘܰܡܣܰܡܥܠܘ̣ܬܰܢ ܘܰܢܙܝ̣ܪܘ̣ܬܰܢ ܐܰܝܟ ܗܳܢܽܘܢ ܢܙܝ̣ܪ̈ܶܐ ܘܰܥܡܝ̣̈ܠܶܐ ܕܰܟܠ̈ܝ̣ܠܶܐ ܢܣ̣ܰܒܘ̱ ܥܰܠ ܪ̈ܝ̣ܫܰܝܗܽܘܢ ܪܰܗܒܽܘܢܳܐ ܕܟܘ̣ܠܳܠܳܐ ܕܰܠܚܰܪܬܳܐ: ܘܩܰܒܶܠ ܒܛܰܝܒܘ̣ܬܳܟ ܬܘܳܬܰܢ ܘܕܶܡ̈ܥܰܝܢ ܘܰܬܝܳܒܘ̣ܬܰܢ ܘܛܘ̣ܪ̈ܳܦܰܝܢ ܘܐܘ̣ܠ̈ܨܳܢܰܝܢ ܘܓܘ̣ܪ̈ܓܳܚܰܝܢ ܐܰܝܟ ܕܥܰܡܳܐ ܕܢܝ̣̈ܢܘܳܝܶܐ ܘܰܕܚܶܙܰܩܝܳܐ ܡܰܠܟܳܐ ܘܕܰܡܢܰܫܶܐ ܒܪܶܗ: ܡܰܐܠܽܘܢ ܕܕܰܘܝ̣ܕ ܪܰܒܳܐ ܘܰܐܠܳܗܳܝܳܐ: ܘܫܰܘܙܶܒ ܠܰܢ ܡ̣ܶܢ ܬܰܫܢܝ̣ܩܳܐ ܡܰܪܝ̣ܪܳܐ ܕܓܺܗܰܢܳܐ ܘܡ̣ܶܢ ܥܡܝ̣̈ܠܳܬܳܐ ܘܰܚ̈ܢܝ̣ܓܳܬܳܐ ܬܟܝ̣̈ܒܳܬܳܐ ܕܒܰܓܘ̣ܒܳܐ ܬܰܚܬܳܝܳܐ: ܘܡ̣ܶܢ ܒܰܪ̱ܬ ܩܳܠܳܐ ܕܰܦܣܳܩ ܣܰܒܪܳܐ ܕܰܡܫܰܕܪܳܐ ܠܰܐܒܕܳܢܳܐ: ܘܐܰܫܘܳܐ ܠܰܢ ܠܒܰܪ̱ܬ ܩܳܠܳܐ ܡܰܠܝܰܬ݀ ܣܰܒܪܳܐ ܕܰܡܥܰܠܝܳܐ ܠܡܰܠܟܘ̣ܬܳܐ: ܠܒܘ̣ܣܳܡܳܐ ܠܳܐ ܡܶܬܛܠܰܩܳܢܳܐ ܕܒܰܓܢܽܘܢܳܟ ܕܢܘ̣ܗܪܳܐ: ܠܚܰܕܘ̣ܬܳܐ ܠܳܐ ܡܰܘܦܝܳܢܝ̣ܬܳܐ ܕܒܐܘ̣ܪܫܠܶܡ ܚܺܐܪܬܳܐ: ܠܥܘ̣ܒܶܗ ܕܰܐܒܪܳܗܳܡ ܕܺܐܝܣܚܳܩ ܘܰܕܝܰܥܩܘ̣ܒ ܘܰܕܟܽܠܗܽܘܢ ܟܺܐܢ̈ܶܐ ܕܰܐܟܘܳܬܗܽܘܢ ܠܰܟܠ̈ܝ̣ܠܶܐ ܡܰܠ̈ܝ݂ܰܝ݂ ܨܶܡ̈ܚܶܐ ܢܰܨ̈ܝ̣ܚܶܐ: ܠܚܘ̣ܒܳܐ ܕܡܶܢܳܟ ܘܰܠܩܘ̣ܠܳܣܳܐ ܕܡ̣ܶܢ ܠܘܳܬܳܟ ܠܪ̈ܰܚܡܶܐ ܘܪܘ̣ܚܳܦܳܐ: ܘܡ̣ܶܢ ܗܳܪܟܳܐ ܐܰܫܘܳܐ ܠܰܢ ܕܰܢ̇ܥܰܕܥܶܕ ܠܳܟ ܐܰܝܟ ܛܠܳܝ̈ܶܐ ܒܐܘ̣ܫܰܥܢ̈ܶܐ ܫܒܝ̣̈ܚܳܬܳܐ ܘܰܒܠܰܡ̈ܦܺܐܕܶܐ ܢܰܗܝ̣ܪ̈ܶܐ ܘܰܗܕܝ̣ܪ̈ܶܐ ܘܒܰܠܒܘ̣̈ܫܶܐ ܚܶܘܳܪ̈ܶܐ ܘܡܰܦܪ̈ܓܶܐ ܢ̇ܺܐܪܥܳܟ: ܘܰܚܠܘ̣ܛ ܠܩܝ̣̈ܢܳܬܰܢ ܘܠܰܙܡܝ̣ܪ̈ܳܬܰܢ: ܘܰܠܢܶܥ̈ܡܳܬܰܢ ܥܰܡ ܡܰܠܰܐܟ̈ܶܐ ܡܫܰܒ̈ܚܳܢܰܝܟ ܗܳܪܟܳܐ ܘܰܒܥܳܠܡܳܐ ܕܰܥܬܝ̣ܕ: ܘܚܰܣܳܐ ܠܰܢ ܘܰܠܥܰܢܝ̣̈ܕܰܝܢ ܚܰܘ̈ܒܶܐ ܘܰܚ̈ܛܳܗܶܐ ܕܰܣܥ̣ܰܪܢܰܢ ܩܕܳܡܰܝܟ: ܡܶܛܽܠ ܕܛܳܒܳܐ ܐܝ̣ܬܰܝܟ ܘܣܰܓܝ̣ ܪ̈ܰܚܡܶܐ ܘܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܡܰܣܩܝ̣ܢܰܢ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀