ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܳܣܝܳܐ ܕܣܰܓܺܝ̈ܺܐܝ̣ܢ ܣܰܡ̱̈ܡܳܢܰܘܗ̱ܝ ܕܰܠܓܰܪ̈ܒܶܐ ܒܡܶܠܬܶܗ ܕܰܟܝ̣: ܠܰܡܫܰܪ̈ܰܝܳܐ ܡܫܰܠܛܳܐܝ̣ܬ ܐܰܩܝ̣ܡ: ܠܰܣ̈ܡܰܝܳܐ ܦܘ̣ܬܳܚ ܥܰܝ̈ܢܶܐ ܫܰܟ̣ܶܢ: ܘܰܠܡܳܟ̈ܣܶܐ ܘܚܰܛܳܝ̈ܶܐ ܫܒ̣ܰܩ ܚܰܘ̈ܒܰܝܗܽܘܢ: ܕܰܟܳܐ ܠܰܢ ܡ̣ܶܢ ܟܽܠܳܗ̇ ܚܛܝ̣ܬܳܐ ܡܰܘܒܕܳܢܝ̣ܬܳܐ: ܘܰܐܢܗܰܪ ܠܥܰܝ̈ܢܶܐ ܡܶܬܝܰܕܥܳܢ̈ܝܳܬܳܐ ܕܢܰܦ̈ܫܳܬܰܢ ܕܢ̇ܰܘܕܶܐ ܠܳܟ ܘܢ̇ܶܣܓܘ̣ܕ ܠܳܟ ܘܰܢ̇ܫܰܒܳܚܟ ܗܳܫܳܐ ܘܰܒܟܽܠܙܒܰܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܐܳܣܝܳܐ ܛܳܒܳܐ ܕܟܰܕ ܠܳܐ ܒܥ̣ܰܝܢܳܝܗ̱ܝ ܐܶܫܬ̣ܟܰܚ ܠܰܢ: ܘܟܰܕ ܠܳܐ ܐܰܪܓܶܫ̣ܢܰܢ ܒܶܗ ܐܶܫܬ̣ܰܘܫܰܛ ܠܰܢ: ܘܰܒܚܰܪܬܳܐ ܕܙܰܒ̈ܢܶܐ ܟܰܕ ܨܒ̣ܳܐ ܕܢ̣ܶܦܪܩܰܢ ܐܶܬܢܰܚ̣ܰܬ ܠܘܳܬܰܢ ܒܚܘ̣ܒܶܗ ܘܰܐܚܠ̣ܶܡ ܟܘ̣ܪ̈ܗܳܢܰܝܢ ܒܣܰܡܳܐ ܕܰܚܢܳܢܶܗ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܽܘ̣ܒܚܳܐ ܠܳܟ ܐܰ‌ܠܳܗܳܐ ܡܶܠܬܳܐ ܕܶܐܫ̣ܬܰܕܰܪܬ ܡ̣ܶܢ ܥܘ̣ܒܶܗ ܕܰܐܒܳܐ ܠܘܳܬܰܢ ܚܘ̣ܒܳܢܳܐܝ̣ܬ ܐܰܝܟܰܢܳܐ ܕܬ̣ܰܐܣܶܐ ܠܟܺܐܒ̈ܶܐ ܘܰܠܟܘ̣ܪ̈ܗܳܢܶܐ ܕܓ̥ܶܢܣܳܐ ܕܝ̣ܠܰܢ ܡܚܝ̣ܠܳܐ ܐܰܟܝ̣ܦܳܐܝ̣ܬ: ܐܰܢ̱ܬ ܗ̱ܘ̣ ܕܰܒܩܳܛܢܶܐ ܡܕܝ̣ܢ̱ܬܳܐ ܕܰܓܠܝ̣ܠܳܐ ܡܰܝ̈ܳܐ ܠܚܰܡܪܳܐ ܫܰܚ̣ܠܶܦܬ ܐܰ‌ܠܳܗܳܐܝ̣ܬ: ܘܰܐܬ̣ܗܰܪܬ ܐܶܢܽܘܢ ܠܰܣܡܝ̣̈ܟܶܐ ܒܬܶܕܡܘ̣ܪܬܳܐ ܕܰܣܥ̣ܰܪܬ ܡܕܰܒܪܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܓܰܪܒܳܐ ܛܪܝ̣ܕܳܐ ܘܰܢܕܝ̣ܕܳܐ ܘܡܰܣܠܝܳܐ ܕܰܟܝ̣ܬ ܒܡܶܠܬܳܟ ܦܳܩܘ̣ܕܳܐܝ̣ܬ ܘܰܒܡܶܢܝܳܢܳܐ ܕܰܒܢܰܝ̈ ܫܰܪܒܬܶܗ ܛܰܟܶܣ̣ܬܳܝܗ̱ܝ ܣܕܝ̣ܪܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܡܫܰܪܝܳܐ ܕܰܪܡܶܐ ܗ̱ܘܳܐ ܒܥܰܪܣܳܐ ܕܟܘ̣ܪ̈ܗܳܢܶܐ ܐܰܪܟܶܢ̣ܬ ܡܰܫܡܰܥܬܳܟ ܠܘܳܬܶܗ ܘܨܳܬ̣ܬ ܐܶܢܶܝܢ ܠܚܶܢ̈ܓ̥ܳܬܶܗ ܘܰܠܬܶܢ̈ܚܳܬܶܗ ܒܰܣܝ̣ܡܳܐܝ̣ܬ: ܘܟܰܕ ܒܶܟ̥ܝܳܐ ܘܕܶܡ̈ܥܶܐ ܠܶܐܕ̈ܢܶܐ ܕܐ̱ܢܳܫ̈ܳܐ ܡܰܫܡܰܥ ܗ̱ܘܳܐ ܡܰܪܝ̣ܪܳܐܝ̣ܬ: ܡܶܠܬܳܐ ܕܝܶܢ ܕܝ̣ܠܳܟ ܒܰܣܝ̣ܡܰܬ݀ ܩܳܠܳܐ ܐܶܡ̣ܰܪܬ ܦܫܝ̣ܩܳܐܝ̣ܬ: ܕܩܘ̣ܡ ܫܩܘ̣ܠ ܥܰܪܣܳܟ ܘܙܶܠ ܠܒܰܝܬܳܟ ܦܨܝ̣ܚܳܐܝ̣ܬ ܘܰܠܟܺܐܒ̈ܶܐ ܘܰܠܟܘ̣ܪ̈ܗܳܢܶܐ ܐܰܥܪܶܩ̣ܬ ܡܶܢܶܗ ܡܫܰܡܠܝܳܐܝ̣ܬ: ܘܚܰܘܝ̣ܬܳܝܗ̱ܝ ܚܠܝ̣ܡܳܐ ܠܥܝ̣ܢ ܥܰܡܳܐ ܫܰܪܝ̣ܪܳܐܝ̣ܬ: ܟܰܕ ܠܗܳܝ ܬܘ̣ܒ ܕܠܳܐ ܢ̣ܶܚܛܶܐ ܡܶܢܳܟ ܠܘܳܬܶܗ ܡܶܬܰܐܡܪܳܐ ܗ̱ܘܳܬ݀ ܐܰܝܟ ܐܰ‌ܠܳܗܳܐ ܦܳܩܘ̣ܕܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܬܪܶܝܢ ܣܡܰܝ̈ܳܐ ܕܰܒܥ̣ܰܘ ܡܶܢܳܟ ܢܘ̣ܗܪܳܐ ܡܶܬܟܰܫܦܳܢܳܐܝ̣ܬ: ܐܶܡ̣ܰܪܬ ܠܘܳܬܗܽܘܢ ܕܶܐܢܗܽܘ̣ ܕܰܬ̣ܗܰܝܡܢܽܘܢ ܡ̇ܨܶܐ̣ ܐ̱ܢܳܐ ܗܳܕܶܐ ܠܡܶܣܥܰܪ ܚܰܝܠܬܳܢܳܐܝ̣ܬ: ܢ̣ܶܗܘܶܐ ܠܟܽܘܢ ܐܰܝܟ ܗܰܝܡܳܢܘ̣ܬܟܽܘܢ ܘܥܰܠ ܕܗܰܝܡ̣ܶܢܘ̱ ܐܶܬ̣ܦܰܬܰܚ̈ܝ̱ ܥܰܝܢܰܝ̈ܗܽܘܢ ܘܰܚ̣ܙܰܘ ܢܘ̣ܗܪܳܐ ܬܰܩܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܣܰܡܝܳܐ ܕܡ̣ܶܢ ܟܪܶܣ ܐܶܡܶܗ ܣܳܡ̣ܬ ܒܳܒ̈ܳܬܳܐ ܒܥܰܝ̈ܢܰܘܗ̱ܝ ܐܰܝܠܶܝܢ ܕܠܳܐ ܐܶܬܝ̣ܗܶܒ ܗ̱ܘܰܝ̈ ܠܶܗ ܟܝܳܢܳܐܝ̣ܬ: ܘܛܝ̣ܢܳܐ ܓܒܰܠ̣ܬ ܡ̣ܶܢ ܪܘ̣ܩܳܐ ܕܝ̣ܠܳܟ ܘܛܳܫ̣ܬ ܥܠܰܝܗܶܝܢ ܘܶܐܡ̣ܰܪܬ ܠܶܗ ܦܳܩܘ̣ܕܳܐܝ̣ܬ ܕܙܶܠ ܐܰܫܝ̣ܓ ܒܡܰܝ̈ܳܐ ܕܫܝ̣ܠܘܽܚܳܐ ܘܶܐܙ̣ܰܠ ܘܐܰܫܝ̣ܓ ܘܰܚ̣ܙܳܐ ܢܰܗܝ̣ܪܳܐܝ̣ܬ: ܫܰܘܕܰܥ̣ܬ ܘܚܰܘܝ̣ܬ ܒܝܰܕ ܗܳܕܶܐ ܠܟܽܠ ܐ̱ܢܳܫ ܓܰܠܝܳܐܝ̣ܬ ܕܐܰܢ̱ܬ ܗ̱ܘ̣ ܐܝ̣ܬܰܝܟ ܗܰܘ̇ ܕܡ̣ܶܢ ܒܪܝ̣ܫܝ̣ܬ ܡ̣ܶܢ ܛܝ̣ܢܳܐ ܐܰܬܩܶܢ̣ܬܳܝܗ̱ܝ ܠܒܰܪܢܳܫܳܐ ܥܳܒܘ̣ܕܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܟܢܰܥܢܳܝܬܳܐ ܕܰܩܥ̣ܳܬ݀ ܒܳܬܪܳܟ ܡܶܛܽܠ ܒܰܪܬܳܗ̇ ܕܡ̣ܶܢ ܫܺܐܕܳܐ ܡܶܬܕܰܒܪܳܐ ܗ̱ܘܳܬ݀ ܩܰܫܝܳܐܝ̣ܬ: ܚܘ̣ܪܳܪܳܐ ܕܡ̣ܶܢ ܡܰܥܒܕܳܢܘ̣ܬܶܗ ܕܒܝ̣ܫܳܐ ܫܰܟܶܢ̣ܬ ܠܳܗ̇ ܡܫܰܡܠܝܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܡܡܰܚܰܝܬܳܐ ܕܩܶܪܒ̣ܰܬ݀ ܠܟܶܢܦܳܐ ܕܡܰܪܛܘ̣ܛܳܟ ܟܰܣܝܳܐܝ̣ܬ ܐܰܪܕܝ̣ܬ ܠܳܗ̇ ܥܘ̣ܕܪܳܢܳܐ: ܘܝܶܒܫ̣ܰܬ݀ ܡܰܪܕܝ̣ܬܳܐ ܕܰܕܡܳܐ ܕܡܶܫܬܰܚܩܳܐ ܗ̱ܘܳܬ݀ ܣܰܓܺܝܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܒܰܣܦܝ̣ܢ̱ܬܳܐ ܥܰܠ ܣܡܳܟܳܐ ܕܒܶܣܰܕܝܳܐ ܕܡܶܟ̣ܬ ܐ̱ܢܳܫܳܐܝ̣ܬ ܘܪ̈ܘ̣ܚܶܐ ܘܓܰܠ̱̈ـܠܶܐ ܘܡܰܚ̈ܫܘ̣ܠܶܐ ܕܝܰܡܳܐ ܕܡܶܬܒܰܥܪܪܝ̣ܢ ܗ̱ܘܰܘ ܩܰܫܝܳܐܝ̣ܬ: ܘܶܐܠܦܳܐ ܕܡܶܬܢܰܘܓܳܐ ܗ̱ܘܳܬ݀ ܠܡܶܬܛܒܳܥܘ̣ ܐܰܝܠܶܝܢ ܕܰܒܓܰܘܳܗ̇ ܒܙܰܘܥܬܳܐ ܗ̱ܘܰܘ ܪܬܝ̣ܬܳܐܝ̣ܬ: ܘܐܰܢ̱ܬ ܐܰܝܟ ܠܳܐ ܝܳܕܘ̣ܥܳܐ ܫܰܬܝ̣ܩ ܗ̱ܘܰܝܬ ܒܗܝ̣ܠܳܐܝ̣ܬ: ܐܰܢ̱ܬ ܕܰܠܟܽܠ ܝܳܕܰܥ ܐܰ‌ܠܳܗܳܐܝ̣ܬ ܐܰܝܟܰܢܳܐ ܕܬܶܬ̣ܚܙܶܐ ܬܶܕܡܘ̣ܪܬܳܐ ܠܟܽܠܗܽܘܢ ܐܰܝܠܶܝܢ ܕܬܰܡܳܢ ܗ̱ܘܰܘ ܓܰܠܝܳܐܝ̣ܬ: ܘܰܩ̣ܪܶܒܘ̱ ܬܰܠܡܝ̣̈ܕܰܝܟ ܘܰܐܥܝ̣ܪܘ̣ܟ ܐܰܝܟ ܕܡ̣ܶܢ ܫܶܢܬܳܐ ܕܰܚܘ̣ܠܬܳܢܳܐܝ̣ܬ ܘܰܩܥ̣ܰܘ ܘܶܐܡ̣ܰܪܘ̱ ܡܳܪܰܢ ܡܳܪܰܢ ܥܰܕܪ ܠܰܢ ܕܗܳܐ ܐܳܒ̇ܕܝ̣ܢܰܢ ܟܘ̣ܠܳܢܳܐܝ̣ܬ: ܘܩܳܡ̣ܬ ܘܰܟ̣ܐܰܝܬ ܒܪܘ̣ܚܳܐ ܘܝܰܡܳܐ ܘܰܫܠܝ̣ܘ ܘܰܫܓܝ̣ܫܘ̣ܬ ܡܰܚ̈ܫܘ̣ܠܶܐ ܩܳܡ̣ܰܬ݀ ܗ̱ܘܳܬ݀ ܢܝ̣ܚܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܥܰܒܕܶܗ ܕܩܶܢܛܪܘ̣ܢܳܐ ܐܰܝܢܳܐ ܕܝܰܩܝ̣ܪ ܗ̱ܘ̣ ܥܠܰܘܗ̱ܝ ܕܰܥܒܝ̣ܕ ܗ̱ܘܳܐ ܒܝ̣ܫܳܐܝ̣ܬ: ܐܶܡ̣ܰܪܬ ܒܡܶܠܬܳܐ ܘܐܶܬ̣ܐܰܣܝ̣ ܡ̣ܶܢ ܟܘ̣ܪܗܳܢܶܗ ܩܰܠܝ̣ܠܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܓܰܒܪܳܐ ܕܝܰܒܝ̣ܫܳܐ ܗ̱ܘܳܬ݀ ܐܝ̣ܕܶܗ ܐܰܝܟ ܐ̱ܢܳܫ ܒܡܶܠܬܳܐ ܒܰܠܚܘ̣ܕ ܦܰܩ̣ܶܕܬ ܕܢ̣ܶܦܫܛܝ̣ܗ̇ ܘܶܐܬܦܰܫ̣ܛܰܬ݀ ܬܰܩܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܒܰܪܬܶܗ ܕܝܘܽܐܳܪܳܫ ܕܡܰܝ݂ܺـܝ̣ܬܳܐ ܗ̱ܘܳܬ݀ ܢܰܚܶܡ̣ܬ ܡܳܪܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܥܠܰܝܡܳܐ ܒܪܳܗ̇ ܕܰܐܪܡܰܠܬܳܐ ܥܰܠ ܬܰܪܥܳܐ ܕܢܰܐܝܺܢ ܡܕܝ̣ܢ̱ܬܳܐ ܐܰܚܝ̣ܬܳܝܗ̱ܝ ܫܰܪܝ̣ܪܳܐܝ̣ܬ: ܘܨܳܪܬ ܘܚܰܘܝ̣ܬ ܠܰܢ ܒܝܰܕ ܗܳܕܶܐ ܩܝܳܡܬܳܐ ܕܦܰܓܪ̈ܶܐ ܕܝ̣ܠܰܢ ܚܰܬܝ̣ܬܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰ‌ܠܠܳܥܳܙܳܪ ܪܳܚܡܳܟ ܟܰܕ ܨܒ̣ܰܝܬ ܕܰܬ̣ܥܝ̣ܪܝ̣ܘܗ̱ܝ ܘܬ̣ܰܥܕܝ̣ܘܗ̱ܝ ܡ̣ܶܢ ܐܝ̣̈ܕܰܝ ܡܰܘܬܳܐ ܝܰܥܢܳܐ ܕܕܰܒ̣ܪܶܗ ܩܛܝ̣ܪܳܐܝ̣ܬ: ܕܰܡܰܥ̣ܬ ܘܨܰܠܝ̣ܬ ܕܰܐܝܟܳܐ ܣܳܡܬܘ̣ܢܳܝܗ̱ܝ ܫܰܐܶܠ̣ܬ ܐ̱ܢܳܫܳܐܝ̣ܬ: ܟܰܕ ܐܰܙܥܶܩ̣ܬ ܒܩܳܠܳܟ ܥܰܙܝ̣ܙܳܐ ܘܶܐܡ̣ܰܪܬ ܠܳܥܳܙܳܪ ܩܘ̣ܡ ܡ̣ܶܢ ܩܰܒܪܳܐ ܪܗܝ̣ܒܳܐܝ̣ܬ: ܘܰܒܝܰܕ ܬܰܪ̈ܬܰܝܗܝܢ ܣܥ̣ܰܪܬ ܘܚܰܘܝ̣ܬ ܐܰܢ̱ܬ ܐܝ̣ܬܰܝܟ ܐܰ‌ܠܳܗܳܐ ܕܶܐܬܒܰܣ̣ܰܪܬ ܠܳܐ ܡܶܬܦܰܠܓܳܢܳܐܝ̣ܬ ܘܠܳܐ ܡܶܫܬܰܚܠܦܳܢܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܠܶܓܝܽܘܢ ܕܫܺܐܕ̈ܶܐ ܪܕܰܦ̣ܬ ܘܰܐܦܶܩ̣ܬ ܡ̣ܶܢ ܓܒܝ̣ܠܬܳܟ ܐܰ‌ܠܳܗܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܒܰܪܢܳܫܳܐ ܕܢܳܚܶܬ ܗܘܳܐ ܡ̣ܶܢ ܐܘ̣ܪܶܫܠܶܡ ܠܺܐܝܪܝ̣ܚܘ̣ ܛܪܝ̣ܕܳܐܝ̣ܬ: ܘܡ̣ܶܢ ܓܰܝ̈ܳܣܶܐ ܡܶܬܝܰܕ̈ܥܳܢܶܐ ܐܶܬ̣ܡܰܚܝ̣ ܡܰܪܳܚܳܐܝ̣ܬ: ܘܰܐܫܠ̣ܚܘ̣ܗ̱ܝ ܡ̣ܶܢ ܐܶܣܛܠܳܐ ܫܒܝ̣ܚܬܳܐ ܕܛܰܝܒܘ̣ܬܳܐ ܘܫܰܒ̣ܩܘ̣ܗ̱ܝ ܟܰܕ ܩܰܠܝ̣ܠ ܩܰܝܳܡܳܐ ܒܶܗ ܢܰܦܫܳܐ ܕܳܘܝܳܐܝ̣ܬ: ܘܐܶܬܪܰܚܰܡ̣ܬ ܥܠܰܘܗ̱ܝ ܘܰܥܨܰܒ̣ܬ ܡܚܰܘ̈ܳܬܶܗ ܘܥܰܠ ܟܰܬ̈ܦܳܬܳܟ ܛܥܶܢ̣ܬܳܝܗ̱ܝ ܚܰܒܝ̣ܒܳܐܝ̣ܬ: ܘܰܠܦܘ̣ܬܩܳܝܳܐ ܟܳܗܢܳܐ ܐܰܫܠܶܡ̣ܬܳܝܗ̱ܝ ܘܰܬܪܶܝܢ ܕܝ̣ܢܳܪ̈ܝ̣ܢ ܝܰܗ̣ܒܬ ܠܶܗ ܦܰܓܪܳܟ ܘܰܕܡܳܟ ܘܶܐܡ̣ܰܪܬ ܕܝ̣ܨܰܦ ܕܝ̣ܠܶܗ ܚܦܝ̣ܛܳܐܝ̣ܬ: ܘܶܐܢ ܡܶܕܶܡ ܐ̱ܚܪܝ̣ܢ ܬ̣ܰܦܶܩ ܥܠܰܘܗ̱ܝ ܡܳܐ ܕܳܐܬܶܐ ܐ̱ܢܳܐ ܝܳܗܶܒ ܐ̱ܢܳܐ ܠܳܟ ܥܦܝ̣ܦܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܠܰܚܡܳܬܶܗ ܕܦܶܛܪܘ̣ܣ ܕܪܰܡܝܳܐ ܗ̱ܘܳܬ݀ ܒܶܐܫܳܬܳܐ ܡܫܰܠܗܒܳܐܝ̣ܬ ܐܰܝܟ ܐܳܣܝܳܐ ܐܶܚ̣ܰܕܬ ܒܺܐܝܕܳܗ̇ ܘܡ̣ܶܢ ܡܰܪܥܳܗ̇ ܘܟܘ̣ܪܗܳܢܳܗ̇ ܐܰܩܝ̣ܡܬܳܗ̇ ܚܠܝ̣ܡܳܐܝ̣ܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܙܳܢܝ̣ܬܳܐ ܡܰܣܠܰܝܬܳܐ ܐܰܝ̇ܕܳܐ ܕܰܠܪ̈ܰܚܡܶܐ ܣܰܓܺܝ̈ܶܐܐ ܥܰܪܦ̣ܰܬ݀ ܘܦܰܠ̣ܓ̥ܰܬ݀ ܘܨܳܕܰܬ݀ ܐܶܢܽܘܢ ܠܰܐܒܕܳܢܳܐ ܟܘ̣ܠܳܢܳܐܝ̣ܬ: ܒܝܰܕ ܡܶܬܬܰܘܝܳܢܘ̣ܬܳܐ ܘܒܶܟܝܳܐ ܡܰܪܝ̣ܪܳܐ ܘܕܶܡ̈ܥܶܐ ܕܶܐܫ̣ܕܰܬ݀ ܚܢܝ̣ܓ̥ܳܐܝ̣ܬ ܫܒܰܩ̣ܬ ܠܳܗ̇ ܣܘ̣ܓܳܐܐ ܕܚܰܘ̈ܒܶܝܗ ܘܰܚ̈ܛܳܗܶܝܗ̇ ܡܪܰܚܡܳܢܳܐܝ̣ܬ: ܘܟܰܕ ܟܽܠܗܶܝܢ ܗܳܠܶܝܢ ܫܒܝ̣̈ܚܳܬܳܐ ܘܬܶܕܡܪ̈ܳܬܳܐ ܬܡܝ̣̈ܗܳܬܳܐ ܣܥ̣ܰܪܬ ܠܘܳܬ ܓܶܢܣܰܢ ܡܚܝ̣ܠܳܐ ܚܘ̣ܒܳܢܳܐܝ̣ܬ: ܒܳܥܶܝܢܰܢ ܘܡܰܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܠܳܟ ܡܶܬܚܰܢܳܢܳܐܝ̣ܬ: ܐܶܬ̣ܪܟܶܢ ܐܳܦ ܗܳܫܳܐ ܡܳܪܝܳܐ ܠܘܳܬܰܢ ܨܠܝ̣ܠܳܐܝ̣ܬ ܘܨܘܽܬ ܠܬܶܢ̈ܚܳܬܳܐ ܕܡܰܪܥܝ̣ܬܳܟ ܕܡܶܬܟܰܫܦܳܐ ܠܳܟ ܚܢܝ̣ܓܳܐܝ̣ܬ: ܒܰܨܠ̈ܰܘܳܬܳܐ ܘܬܶܢܚ̈ܳܬܳܐ ܘܬܰܟܫ̈ܦܳܬܳܐ ܕܒܶܐܒܪ̈ܶܐ ܚܠܝ̣̈ܡܶܐ ܡܶܬܥܰܠܶܝܢ ܠܘܳܬܳܟ ܩܰܠܝ̣ܠܳܐܝ̣ܬ: ܘܠܳܐ ܬ̣ܚܘ̣ܪ ܒܚܰܘ̈ܒܰܝܢ ܘܒܰܚ̈ܛܳܗܰܝܢ ܟܺܐܢܘ̣ܬܳܟ ܬܪܝ̣ܨܳܐܝ̣ܬ ܘܐܳܦ ܠܳܐ ܒܣܰܟܠ̈ܘܳܬܰܢ ܘܒܝ̣̈ܫܳܬܰܢ ܚܰܬܝ̣ܬܳܐܝ̣ܬ: ܘܠܳܐ ܢ̣ܶܬܠܚܶܡ ܥܠܰܝܢ ܪܘ̣ܓܙܳܟ ܬܳܒܘ̣ܥܳܐܝ̣ܬ: ܐܶܠܳܐ ܐܰܪܟܶܢ ܐܶܕܢܳܟ ܘܨܘܽܬ ܠܩ̈ܳܠܶܐ ܕܝ̣ܠܰܢ ܕܠܳܟ ܡܦܝ̣ܣܝ̣ܢܰܢ ܪܰܥܘ̣ܡܳܐܝ̣ܬ: ܘܰܦܬܰܚ ܠܰܢ ܬܰܪܥܳܐ ܕܪ̈ܰܚܡܰܝܟ ܡܰܠܝܳܐܝ̣ܬ ܘܢ̣ܺܐܬܶܐ ܚܢܳܢܳܟ ܠܺܐܝܳܠܰܢ ܡܥܰܕܪܳܢܳܐܝ̣ܬ ܘܚܰܠܶܠ ܠܰܢ ܡ̣ܶܢ ܟܘ̣ܬܡ̈ܳܬܳܐ ܒܙܘ̣ܦܳܟ ܡܳܪܘ̣ܩܳܐܝ̣ܬ: ܘܚܰܘܰܪܰܝܢ ܡ̣ܶܢ ܣܰܢ̈ܝܳܬܰܢ ܒܰܪܣܳܣܳܟ ܢܰܩܕܳܐܝ̣ܬ: ܘܢ̣ܶܬܩܰܕܫܽܘܢ ܪ̈ܶܓܫܰܝܢ ܒܚܘ̣ܒܳܟ ܓܡܝ̣ܪܳܐܝ̣ܬ: ܘܢ̣ܶܙܕܰܗ̈ܝܳܢ ܢܰܦ̈ܫܳܬܰܢ ܒܰܚܢܳܢܳܟ ܬܡܝ̣ܗܳܐܝ̣ܬ: ܡܶܛܽܠ ܕܰܐܢ̱ܬ ܐܝ̣ܬܰܝܟ ܥܳܨܘ̣ܒܳܐ ܕܰܐܝܠܶܝܢ ܕܰܬܒܝ̣ܪܝ̣ܢ ܟܰܣܝܳܐܝ̣ܬ ܘܡܶܫܟܚܳܢܳܐ ܕܰܐܝܠܶܝܢ ܕܰܐܒܝ̣ܕܝ̣ܢ ܠܚܘ̣ܕܳܐܝ̣ܬ: ܘܥܰܠ ܐܰܦܰܝ̈ ܗܳܠܶܝܢ ܬܶܫܒܘ̣ܚܬܳܐ ܡܰܣܩܝ̣ܢܰܢ ܠܳܟ ܠܳܐ ܣܰܒܥܳܐܝ̣ܬ: ܘܠܰܐܒܘ̣ܟ ܕܫܰܠܚ̣ܳܟ ܠܦܘ̣ܪܩܳܢܰܢ ܠܳܐ ܡܶܬܦܰܣܩܳܢܳܐܝ̣ܬ: ܘܰܠܪܘ̣ܚܳܐ ܩܰܕܝ̣ܫܳܐ ܫ̇ܘܶܐ̣ ܠܳܟ ܒܐܘ̣ܣܺܝܰܐ ܐܰܡܝ̣ܢܳܐܝ̣ܬ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܫܺܝ̣ܚܳܐ ܦܝ̣ܪܡܳܐ ܕܬܰܪܥܘ̣ܬܳܐ ܕܗܽܘ̣ ܒܰܚܢܳܢܶܗ ܚܰܣܝ̣ ܟܘ̣ܬܡ̈ܳܬܳܐ ܕܒܶܝܬ ܐܳܕܳܡ: ܘܒܰܡܕܰܒܪܳܢܘ̣ܬܶܗ ܕܒܰܒܣܰܪ ܕܰܟܝ̣ ܓܰܪ̈ܒܶܐ: ܘܦܰܬ̣ܰܚ ܠܰܣ̈ܡܰܝܳܐ ܘܰܐܫܡ̣ܰܥ ܕܘ̣ܓ̈ܶܐ: ܘܢܰܚ̣ܶܡ ܥܰܢܝ̣̈ܕܶܐ: ܘܚܰܘܝ̣ ܕܗܽܘ̣ ܐܝ̣ܬܰܘܗ̱ܝ ܦܳܪܘ̣ܩܶܗ ܕܥܳܠܡܳܐ ܘܢܘ̣ܗܪܳܐ ܕܰܡܗܰܝ̈ܡܢܶܐ ܩܰܒܶܠ ܦܝ̣ܪܡܰܢ ܘܶܐܬܬܢܝ̣ܚ ܒܒܳܥ̈ܘܳܬܰܢ: ܘܚܰܣܳܐ ܚ̈ܛܳܗܰܝܢ ܘܰܕܥܰܢܝ̣̈ܕܰܝܢ: ܘܰܐܫܘܳܐ ܠܰܢ ܘܰܠܗܽܘܢ ܠܫܘ̣ܒܚܳܐ ܕܪܰܒܘ̣ܬܳܟ ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀