ܦܪܽܘ̣ܡܝܽܘܢ

ܬܶܫܒܽܘ̣ܚܬܳܐ: ܠܗܰܘ̇ ܚܰܝܳܐ ܒܰܟܝܳܢܶܗ ܘܝܳܗܘ̣ܒܳܐ ܕܚܰܝ̈ܶܐ: ܠܗܰܘ̇ ܣܰܒܪܳܐ ܕܡܝ̣̈ܬܶܐ ܘܢܘ̣ܚܳܡܳܐ ܕܕܰܡ̈ܟܶܐ: ܠܗܰܘ̇ ܩܝܳܡܬܳܐ ܕܰܩܒܝ̣ܪ̈ܶܐ: ܘܡܰܦܨܚܳܢܳܐ ܕܰܫܟܝ̣̈ܒܰܝ ܥܰܦܪܳܐ: ܠܗܰܘ̇ ܢܘ̣ܗܪܳܐ ܘܨܶܡܚܳܐ ܡܰܢܗܪܳܢܳܐ ܕܚܶܫܘ̣̈ܟܶܐ: ܘܛܰܠܳܐ ܡܦܰܝܓܳܢܳܐ ܕܰܚܒܝ̣̈ܫܶܐ: ܠܗܰܘ̇ ܩܳܛܘ̣ܠܶܗ ܕܡܰܘܬܳܐ ܘܰܡܣܰܦܩܳܢܳܐ ܕܰܫܝܘ̣ܠ: ܠܗܰܘ̇ ܡܚܰܕܬܳܢܳܐ ܕܨܰܠܡܶܗ: ܘܰܡܩܝ̣ܡܳܢܳܐ ܕܰܓܒܝ̣ܠܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܦܶܠܓܶܗ ܕܝܰܘܡܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܡܰܢܘ̣ ܐܝ̣ܬ ܗܰܘܢܳܐ ܘܡܶܠܬܳܐ ܕܣܳܦܩܳܐ ܠܡܶܬܢܳܐ ܐܝܠܶܝܢ ܕܰܗ̣ܘܰܝ̈ ܐܶܬܡܳܠ ܘܝܰܘܡܳܢܳܐ ܥܰܠ ܗܰܘ̇ ܝܰܠܕܳܐ ܓܢܝ̣ܙܳܐ ܘܠܳܐ ܡܶܬ̣ܗܰܘܢܳܢܳܐ ܘܠܳܐ ܡܶܬ̣ܡܰܠܠܳܢܳܐ: ܐܶܬܡܳܠ ܥܪܘ̣ܒܬܳܐ ܕܚܰܝ̈ܶܐ ܘܕܝ̣ܢܳܐ ܕܰܨܠܝ̣ܒܘ̣ܬܳܐ: ܘܝܰܘܡܳܢܳܐ ܫܰܒܬܳܐ ܕܫܰܝܢܳܐ ܘܕܰܒܗܝ̣ܠܘ̣ܬܳܐ: ܐܶܬܡܳܠ ܣܳܦܪ̈ܶܐ ܘܩܰܫܝ̣̈ܫܶܐ ܘܪ̈ܝ̣ܫܰܝ ܟܳܗ̈ܢܶܐ ܡܡܰܝܩܝ̣ܢ ܗ̱ܘܰܘ: ܘܝܰܘܡܳܢܳܐ ܡܝ̣̈ܬܶܐ ܥܓܝ̣̈ܢܰܝ ܕܰܚܝ̣ܚܳܐ ܡܫܰܒܚܝ̣ܢ ܗ̱ܘܰܘ: ܐܶܬܡܳܠ ܫܘ̣̈ܥܶܐ ܦܩ̣ܰܥܘ̱ ܘܰܐܦܰܝ̈ ܬܰܪܥܳܐ ܕܗܰܝܟܠܳܐ ܐܶܨܛܰܪܝ̣: ܝܰܘܡܳܢܳܐ ܩܰܒܪ̈ܶܐ ܐܶܬܦ̣ܰܬܰܚܘ̱ ܒܚܰܕܘ̣ܬܳܐ: ܐܶܬܡܳܠ ܓܰܢ̱ܒܳܪܳܐ ܥܰܦܝ̣ܩ ܗ̱ܘܳܐ ܐܶܣܛܘ̣ܢܳܐ: ܘܝܰܘܡܳܢܳܐ ܒܓܰܘ ܫܝܘ̣ܠ ܥܰܠ ܕܰܚܝ̣ܚܶܗ ܕܳܐܕܳܡ ܪܡܶܐ: ܐܶܬܡܳܠ ܥܪܘ̣ܒܬܳܐ ܡܰܠ̣ܝܰܬ݀ ܚܰܫ̈ܶܐ ܘܟܰܪܝܘ̣ܬܳܐ ܘܰܟܡܝ̣ܪܘ̣ܬܳܐ: ܘܝܰܘܡܳܢܳܐ ܫܰܒܬܳܐ ܕܰܣܒܰܪܬܳܐ: ܐܶܬܡܳܠ ܙܳܩܘ̣̈ܦܶܐ ܠܝ̣̈ܛܶܐ ܡܶܫ̣ܬܰܢܶܝܢ ܗ̱ܘܰܘ: ܘܝܰܘܡܳܢܳܐ ܡܝ̣̈ܬܶܐ ܡܶܬ̣ܢܰܚܡܝ̣ܢ ܘܰܒܚܰܕܘ̣ܬܳܐ ܡܫܰܒܚܝ̣ܢ: ܐܶܬܡܳܠ ܥܪܘ̣ܒܬܳܐ ܒܟܶܢ̈ܫܶܐ ܕܰܡܒܰܙܚ̈ܳܢܶܐ ܪܳܝܒܳܐ ܗ̱ܘܳܬ݀ ܫܝܘ̣ܠ ܕܡܝ̣̈ܬܶܐ ܕܡܶܣ̣ܬܰܦܩܳܐ ܗ̱ܘܳܬ݀ ܡ̣ܶܢ ܩܕܳܡ ܓܰܢ̱ܒܳܪܳܐ ܕܥ̣ܰܠ ܠܳܗ̇: ܝܰܘܡܳܢܳܐ ܫܝܘ̣ܠ ܐܰܝܟ ܢܝ̣ܣܳܢ ܐܰܦ̣ܪܓܰܬ݀ ܗ̱ܘܳܬ݀ ܒܣܘ̣̈ܠܳܩܶܐ ܘܰܐܝܟ ܗܰܒ̈ܳܒܶܐ ܡܝ̣̈ܬܶܐ ܫܘܰܚ̣ܘ̱ ܟܰܕ ܪܳܘܙܝ̣ܢ ܡ̣ܶܢ ܩܰܒܪ̈ܰܝܗܽܘܢ: ܝܰܘܡܳܢܳܐ ܫܶܬܩܳܐ ܥܰܠ ܐܰܪܥܳܐ ܐܰܓܶܢ ܗ̱ܘܳܐ: ܘܰܠܬܰܚܬ ܡܶܢܳܗ̇ ܪܒܳܒܬܳܐ ܒܫܘ̣̈ܩܶܐ ܕܰܫܝܘ̣ܠ ܐܶܫܰܬ̣ܡܥܰܬ݀ : ܝܰܘܡܳܢܳܐ ܗܳܡܳܢ ܕܰܩܒܝ̣ܪ̈ܶܐ ܐܶܬܟܰܡ̣ܪܰܬ݀ ܕܰܚ̣ܙܳܬ݀ ܕܐܶܬ̣ܦܟܰܪ ܡܰܘܬܳܐ ܘܶܐܫ̣ܬܪܝ̣ ܐܳܕܳܡ: ܝܰܘܡܳܢܳܐ ܫܝܘ̣ܠ ܕܰܫܟܝ̣̈ܒܶܐ ܐܶܣܰܬ̣ܚܦܰܬ݀ ܕܝܶܕܥ̣ܰܬ݀ ܕܰܦܢ̣ܳܬ݀ ܫܒܝ̣ܬܳܐ ܠܰܐܬܪܳܗ̇ ܩܰܕܡܳܝܳܐ: ܝܰܘܡܳܢܳܐ ܝܘ̣̈ܕܳܝܶܐ ܠܩܰܒܪܳܐ ܕܚܰܬܢܳܐ ܫܡܰܝܳܢܳܐ ܚܰܬ̣ܶܡܘ̱: ܘܩܶܣܛܘ̣ܢܳܪ̈ܶܐ ܕܢܳܛܘ̣ܪ̈ܶܐ ܢܶܗ̣ܘܽܘܢ ܠܶܗ ܥܠܰܘܗ̱ܝ ܙܗܝ̣ܪܳܐܝ̣ܬ ܐܰܩܝ̣ܡܘ̱: ܝܰܘܡܳܢܳܐ ܥܓܝ̣̈ܢܰܝ ܕܰܚܝ̣ܚܳܐ ܫܘ̣ܒܚܳܐ ܒܦܘ̣ܡܗܽܘܢ ܪܳܥܶܡ ܗܘܳܐ ܕܰܢܚ̣ܶܬ ܨܶܝܕܰܝܗܽܘܢ ܡܚܰܕܬܳܢܳܐ ܕܝܘ̣ܩܢܰܝ̈ܗܽܘܢ: ܝܰܘܡܳܢܳܐ ܟܽܠܗܽܘܢ ܫܟܝ̣̈ܒܶܐ ܒܰܚܕܳܐ ܒܰܪ̱ܬ݀ ܩܳܠܳܐ ܫܰܘܝܳܐܝ̣ܬ ܢܰـܼܙܥܩܽܘܢ: ܕܰܒܪܝ̣ܟ ܗ̱ܘ̣ ܐܝ̣ܩܳܪܶܗ ܕܡܳܪܝܳܐ ܡ̣ܶܢ ܐܰܬܪܶܗ ܠܥܳܠܰܡ: ܘܳܐܦ ܚܢܰܢ ܡܶܬ̣ܟܰܫܦܝ̣ܢܰܢ ܩܕܳܡܰܝܟ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܠܳܟ ܡܩܰܪܒܝ̣ܢܰܢ: ܐܰܫܘܳܐ ܠܰܢ ܠܣܳܥܘ̣ܪܘ̣ܬܳܐ ܗܳܝ̇ ܬܡܝ̣ܗܬܳܐ ܕܡܶܢܳܟ ܡܳܪܝܳܐ܇ ܗܳܝ̇ ܕܠܰܢ ܡܫܰܟܢܳܐ ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܘܫܰܟܶܢ ܠܰܢ ܕܥܰܡܳܟ ܢܶܚ̇ܕܶܐ ܘܳܐܦ ܒܰܩܝܳܡܬܳܟ ܢ̇ܕܘ̣ܨ ܘܰܒܢܘ̣ܚܳܡܳܟ ܫܘ̣ܒܚܳܐ ܢ̇ܶܙܡܰܪ: ܘܰܠܥܰܢܝ̣̈ܕܰܝܢ ܡܗܰܝ̈ܡܢܶܐ ܪܰܣܶܣ ܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܘܰܐܢܝ̣ܚ ܢܰܦܫ̈ܳܬܗܽܘܢ ܒܡܰܠܟܘ̣ܬܳܟ ܗܳܝ̇ ܫܡܰܝܳܢܝ̣ܬܳܐ: ܘܰܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀