ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܥܝܳܐ ܛܳܒܳܐ ܕܰܢܦ̣ܰܩ ܒܰܒܥܳܬܳܗ̇ ܕܥܳܢܶܗ: ܘܟܰܢ̣ܶܫ ܡܒܰܕܪܘ̣ܬܰܢ ܒܝܰܨܝ̣ܦܘ̣ܬܶܗ: ܘܐܰܦܢܝ̣ ܛܪܝ̣ܕܘ̣ܬܰܢ ܒܰܡܪܰܚܡܳܢܘ̣ܬܶܗ: ܠܗܰܘ̇ ܚܰܝܘ̣ܣܬܳܢܳܐ ܕܐܰܥܒ̣ܰܪ ܥܳܩ̈ܳܬܰܢ ܒܰܚܢܳܢܶܗ: ܘܐܰܦ̣ܨܰܚ ܟܡܝ̣ܪܘ̣ܬܰܢ ܒܰܣܒܰܪܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܫܘ̣ܒܩܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܒܪܳܐ ܡܬܘ̣ܡܳܝܳܐ ܡܶܠܬܳܐ ܕܐܰܠܳܗܳܐ ܐܒܳܐ: ܗܰܘ̇ ܕܐܝ̣ܬܰܘܗ̱ܝ ܡ̣ܶܢ ܒܪܝ̣ܫܝ̣ܬ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ: ܗܰܘ̇ ܕܡܶܛܽܠ ܛܰܝܒܘ̣ܬܳܟ ܕܰܠܘܳܬܰܢ ܨܠܝ̣ܒܳܐ ܦܳܪܘ̣ܩܳܝܳܐ ܣܰܝܒ̣ܰܪܬ ܚܠܳܦܰܝܢ: ܘܒܰܩܒܘ̣ܪܬܳܟ ܡܰܚܝܳܢܝ̣ܬܳܐ ܠܰܚܒܳܠܳܐ ܕܰܒܩܰܒܪ̈ܶܐ ܫ̣ܪܰܝܬ: ܘܰܒܡܰܥܰܠܬܳܟ ܕܠܰܫܝܘ̣ܠ ܫܘ̣ܪ̈ܶܐ ܪ̈ܳܡܶܐ ܘܠܳܐ ܡܶܬ̣ܚܰܣ̈ܢܳܢܶܐ ܥܩ̣ܰܪܬ: ܘܒܰܩܝܳܡܬܳܟ ܕܡ̣ܶܢ ܒܶܝܬ ܡܝ̣̈ܬܶܐ ܐܰܩܝ̣ܡܬ ܠܓܶܢܣܳܐ ܕܝ̣ܠܰܢ ܕܐܰܥܬ̣ܩܰܬ݀ : ܒܳܟ ܒܝܰܕ ܡܥܝ̣ܢܳܐ ܡܰܥ̣ܒܕܰܬ݀ ܚܰܝ̈ܶܐ ܕܡ̣ܶܢ ܕܰܦܢܳܟ ܪܕܳܐ: ܡܪܰܩ̣ܬ ܘܚ̣ܰܕܶܬܬ ܘܰܥܒ̣ܰܕܬܳܢ ܒܢܰܝ̈ܳܐ ܕܝܳܪܬܘ̣ܬܳܟ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܒܟܽܠܙܒܰܢ ܒܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܢ̇ܝܰܩܰܪ ܠܰܡܥܝ̣ܢܳܐ ܗܳܕܶܐ ܪܘ̣ܚܳܢܳܝܬܳܐ ܗܳܝ̇ ܕܡ̣ܶܢ ܫܡܰܝܳܐ ܪܳܕܝܳܐ: ܘܰܠܢܶܨ̈ܒܳܬܳܐ ܐܰܝܠܶܝܢ ܕܡܶܢܳܗ̇ ܡܶܬ̣ܝܰܠ̈ܕܳܢ ܘܫܳܬܝ̈ܳܢ ܠܰܫܡܰܝܳܐ ܡܫܰܕܪ̈ܳܢ: ܝ̣ܕܝ̣ܥܳܐܝ̣ܬ ܒܝܰܘܡܳܐ ܗܳܢܳܐ ܕܐܝ̣ܬܰܘܗ̱ܝ ܫܘ̣ܡܠܳܝ ܨܰܘܡܳܐ ܩܰܕܝ̣ܫܳܐ ܘܚܰܫܳܐ ܦܳܪܘ̣ܩܳܝܳܐ ܕܰܠܘܳܬ ܚܙܳܬܳܐ ܕܐܶܡܳܐ ܚܰܒܝ̣ܒܬܳܐ ܢ̣ܶܬܦܢܶܐ: ܘܗܰܒܠܰܢ ܡܳܪܰܢ ܕܰܐܟܡܳܐ ܕܐܰܫܘܝ̣ܬ ܠܰܢ ܠܫܘ̣ܠܳܡ ܨܰܘܡܳܐ ܩܰܕܝ̣ܫܳܐ: ܐܰܫܘܳܐ ܠܰܢ ܕܢܶܚ̇ܕܶܐ ܒܡܰܠܟܘ̣ܬܳܟ ܫܡܰܝܳܢܝ̣ܬܳܐ: ܘܰܐܝܟ ܕܡܰܛܺܝ̣ܬ ܠܰܢ ܒܚܘ̣ܒܳܟ ܕܰܢ̇ܫܰܡܠܶܐ ܠܪܶܗܛܶܗ ܕܨܰܘܡܳܐ ܩܰܕܝ̣ܫܳܐ: ܐܰܫܘܳܐ ܠܰܢ ܕܠܰܫ̈ܡܰܝ ܩܰܝܛܘ̣ܢܳܟ ܢ̇ܶܬܥܰܠܶܐ ܠܘܳܬ ܐܝ̣ܠܳܢܳܐ ܕܚܰܝ̈ܶܐ ܡܶܢܶܗ ܢ̇ܶܩܛܘ̣ܦ ܦܺܐܪܳܐ ܕܠܳܐ ܡܶܬܚܰܒܠܳܢܳܐ ܐܰܝܟܰܢܳܐ ܕܐܰܠܶܦ̣ܬ ܠܰܢ ܒܨܰܘܡܳܐ ܢ̇ܶܕܚܘ̣ܩ ܡܶܢܰܢ ܟܽܠ ܚܘ̣̈ܫܳܒܶܐ ܒܝ̣̈ܫܶܐ ܘܰܚܣܳܡܳܐ ܘܪܶܛܢܳܐ: ܘܫܰܡܠܝ̣ܬ ܥܰܡܰܢ ܟܰܕ ܪܰܚܝ̣ܩܝ̣ܢܰܢ ܡ̣ܶܢ ܟܽܠ ܨܳܐܝ̈ܘܳܬܳܐ ܕܰܡܣܰܓ̈ܦܳܢ ܠܰܢ: ܐܰܫܘܳܐ ܠܰܢ ܠܗܰܘ̇ ܦܶܨܚܳܐ ܦܨܝ̣ܚܳܐ ܕܡܰܦܨܰܚ ܠܰܓܡܝ̣ܪ̈ܶܐ ܒܰܐܬܪܳܐ ܕܢܘ̣ܗܪܳܐ: ܘܰܡܛܰܝܰܒ ܠܟܺܐܢ̈ܶܐ ܕܰܦܠ̣ܰܚܘ̱ ܒܶܐܫܟܳܪܳܟ ܡܶܢ ܨܦܰܪ ܠܰܪܡܶܫ: ܘܡܶܢ ܒܳܬܰܪ ܩܪܳܒܳܐ ܘܐܰܓܘ̣ܢܳܐ ܕܰܣܒܰܠ̣ܘ̱ ܡ̣ܶܢ ܒܝ̣ܫܳܐ: ܘܰܐܫܘܳܐ ܠܰܢ ܕܟܰܕ ܒܬܰܪ̈ܥܶܐ ܫܒܝ̣̈ܚܶܐ ܘܡܰܠ̈ܝܰܝ ܙܰܕܝ̣ܩܘ̣ܬܳܐ ܥܳܐܠܝ̣ܢܰܢ ܢ̇ܩܰܪܶܒ ܠܰܢ ܕܘ̣ܟܣܳܐ ܠܳܐ ܡܶܬܢܰܟܝܳܢܳܐ ܘܰܕܠܳܐ ܦܣܳܩ ܗܰܘ̇ ܕܝܰܗ̣ܒܶܗ ܠܰܢ ܠܕܘ̣ܟܳܝܳܐ ܡ̣ܶܢ ܚܛܝ̣ܬܳܐ: ܟܰܕ ܠܟܽܠ ܥܳܩܬܳܐ ܐܪܥܳܢܳܝ̇ܬܳܐ ܘܚܰܫ̈ܶܐ ܚܰܝܘ̣̈ܬܳܢܳܝܶܐ ܫܳܪܶܝܢܰܢ ܡܶܢܰܢ: ܘܠܰܪ̈ܓܝ̣ܓܳܬܳܐ ܗܰܢܺܝ̈ܳܐܬܳܐ ܕܚܰܫ̈ܶܐ ܕܒܶܣܪܳܐ ܡܛܰܠܩܝ̣ܢܰܢ: ܠܰܚܛܘ̣̈ܦܝܶܐ ܡܰܘ̈ܒܕܳܢܶܐ ܘܰܠܥܳܠܘ̣ܒܘ̣ܬܳܐ ܘܰܠܚܶܡܬܳܐ ܒܰܥܪܝ̣ܪܳܝܬܳܐ ܘܠܰܐܟܬܳܢܘ̣ܬܳܐ ܡܰܘܠܕܰܬ݀ ܡܰܘܬܳܐ: ܠܡܰܪܝ̣ܪܘ̣ܬܳܐ ܐܦ ܠܨܘ̣ܚܝ̣ܬܳܐ ܗܳܝ̇ ܕܰܒܠܶܫܳܢܳܐ ܢܳܦܩܳܐ ܘܡܶܪܬܳܐ ܐܫ̇ܕܳܐ ܥܰܠ ܣܰܪ̈ܝ̣ܟܶܐ: ܐܰܝܟܰܢܳܐ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢ̇ܶܬܶܠ ܫܘ̣ܒܩܳܢܳܐ ܘܰܫܠܳܡܳܐ ܠܰܚ̈ܕܳܕܶܐ: ܟܰܕ ܝܳܗܶܒ ܐܰܢ̱ܬ ܠܰܢ ܡ̣ܶܢ ܡܰܥܰܠܬܰܢ ܕܰܠܗܳܪܟܳܐ: ܗܳܝ̇ ܕܐܝ̣ܬܶܝܗ̇ ܐ̱ܪܳܙܳܐ ܕܦܘ̣ܢܳܝܰܢ ܕܰܠܥܶܠ ܐܳܦ ܡܰܥܰܠܬܳܐ ܫܰܪܝ̣ܪܬܳܐ ܕܠܰܓܢܽܘܢܳܟ ܫܒܝ̣ܚܳܐ: ܘܥܰܡ ܒܬܘ̣̈ܠܳܬܳܐ ܚܰܟܝ̣̈ܡܳܬܳܐ ܢ̇ܶܣܰܒ ܢܰܗܝ̣ܪ̈ܶܐ ܕܢܰܦ̈ܫܳܬܰܢ: ܘܰܠܒܘ̣ܣܳܡܳܐ ܗܰܘ̇ ܛܘ̣ܒܬܳܢܳܐ ܢܶܫ̇ܬܘܶܐ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܒܰܪܶܟܡܳܪܝ̱܀

ܫܠ̣ܶܡ ܟܬܳܒܳܐ ܕܚܽܘ̣ܣ̈ܳܝܶܐ ܕܨܰܘܡܳܐ ܩܰܕܝ̣ܫܳܐ ܕܰܐܪܒܥܝ̣ܢ ܘܰܕܚܰܫܳܐ ܦܳܪܘ̣ܩܳܝܳܐ ܘܠܰܐܠܳܗܳܐ ܫܘ̣ܒܚܳܐ ܒܪܰܘܡܳܐ