ܢܽܘܗܳܪܳܐ

ܡܙܰܡܪܳܢܳܐ ܗܰܘ ܕܝܰܘܢܳܐܺܝܬ ܦܣܰܠܛܽܘܣ ܡܶܬܩܪܶܐ܆ ܡܶܬܬܰܣܪܰܚ ܐܰܟܡܰܢ ܕܢܶܗܘܶܐ ܥܳܐܶܠ ܠܡܰܕܒܚܳܐ ܘܰܡܕܰܝܶܠ. ܟܰܕ ܡܫܰܡܶܫ ܩܕܳܡ ܩܰܫܺܝ̈ܫܶܐ ܘܰܡܫܰܡ̈ܫܳܢܶܐ ܒܟܽܠ ܣܽܘܥܪܳܢܳܐ ܕܡܶܬܦܰܩܰܕ ܡܶܢܗܽܘܢ ܟܳܗܢܳܐܺܝܬ. ܘܰܕܢܶܬܢܶܐ ܡܰܙܡܽܘܪ̈ܶܐ ܘܢܺܐܡܰܪ܀

ܘܟܰܕ ܡܶܬܓܒܶܐ ܐ̱ܢܳܫ ܓܰܒܪܳܐ ܥܳܠܡܳܝܳܐ ܕܢܶܗܘܶܐ ܪܰܒܒܰܝܬܳܐ ܠܥܺܕܬܳܐ܆ ܗܺܝ ܗܳܕܶܐ ܬܶܫܡܶܫܬܳܐ ܠܳܚܡܳܐ ܕܢܶܥܒܶܕ ܥܠܰܘܗ̱ܝ ܐܶܦܣܩܽܘܦܳܐ܆ ܟܰܕ ܝܳܗܶܒ ܠܶܗ ܫܽܘܠܛܳܢܳܐ ܕܢܶܥܽܘܠ ܠܡܰܕܒܚܳܐ. ܘܟܽܠܗܶܝܢ ܨܠܰܘ̈ܳܬܳܐ ܢܺܐܡܰܪ ܥܠܰܘܗ̱ܝ ܣܛܰܪ ܡܶܢ ܗܳܝ ܕܠܳܐ ܡܶܬܺܝܗܶܒ ܠܶܗ ܕܢܶܛܥܰܢ ܠܰܟܬܳܒܳܐ ܕܡܰܙܡܽܘܪ̈ܶܐ. ܐܳܦܠܳܐ ܕܢܶܬܶܠ ܫܠܳܡܳܐ ܠܦܳܬܽܘܪ ܚܰܝܶـ̈ܐ. ܘܳܐܦܠܳܐ ܕܢܶܫܬܰܘܬܰܦ ܒܐ̱ܪ̈ܳܙܶܐ ܡܶܢ ܦܳܬܽܘܪ ܚܰܝ̈ܐ܀

ܒܥܶܕܳܢܳܐ ܕܶܝܢ ܕܡܶܬܬܰܣܪܚܳܢܽܘܬܳܐ ܗ̄ܕ̄ ܩܕܳܡ ܫܰܘܬܳܦܽܘܬܳܐ ܕܰܒܐܪ̈ܳܙܶܐ ܩܰܕܺܝ̈ܫܶܐ܆ ܡܫܺܝܓ ܪܺܝܫܟܳܗ̈ܢܶܐ ܨܶܒ̈ܥܳܬܶܗ ܒܰܡܫܰܡܫܳܢܺܝܬܳܐ ܘܠܳܒܶܫ ܬܳܓܳܐ ܘܳܐܚܶܕ ܨܠܺܝܒܳܐ ܘܚܽܘܛܪܳܐ. ܘܰܐܝܢܳܐ ܓܶܝܪ ܕܡܶܬܓܒܶܐ ܠܬܶܫܡܶܫܬܳܐ ܗܳܕܶܐ ܕܰܡܙܰܡܪܳܢܳܐ (ܐܶܢ ܚܰܕ ܢܶܗܘܶܐ ܐܰܘ ܣܰܓܺܝ̈ܐܶܐ) ܡܶܬܩܰܪܰܒ ܠܬܰܚܬ ܡܶܢ ܕܰܪܓܳܐ ܕܰܩܕܳܡ ܬܰܪܥܳܐ ܕܡܰܕܒܚܳܐ ܘܩܳܐܶܡ ܟܰܕ ܓܠܶܐ ܪܺܝܫܶܗ ܘܡܰܪܟܰܢ܆ ܘܪܺܝܫܟܳܗ̈ܢܶܐ ܩܳܐܶܡ ܩܕܳܡ ܦܳܬܽܘܪ ܚܰܝ̈ܐ ܘܟܰܕ ܡܫܰܒܰܚ܆ ܡܨܰܠܶܐ ܨܠܽܘܬܳܐ ܕܫܽܘܪܳܝܳܐ܀

ܨܠܽܘܬܳܐ ܕܫܽܘܪܳܝܳܐ

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܪܺܝܫܟܳܗ̈ܢܶܐ: ܫܰܪܰܪ ܡܳܪܝ ܠܥܺܕܬܳܟ ܩܰܕܺܝܫܬܳܐ܆ ܥܰܠ ܫܽܘܥܳܐ ܠܳܐ ܡܶܙܕܰܥܙܥܳܢܳܐ ܕܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ. ܕܒܳܟ ܬܶܬܚܰܝܰܠܝ ܘܡܶܢܳܟ ܬܩܰܒܶܠܝ ܥܽܘܕܪ̈ܳܢܶܐ ܡܫܰܡ̈ܠܰܝܳܐ܆ ܘܫܽܘܟܳܢ̈ܐ ܐܰܠܳܗܳܝ̈ܐ܆ ܕܰܒܗܽܘܢ ܢܶܬܢܰܗܪܽܘܢ ܝܰܠܕܶܝ̈ܗ ܠܰܡܫܰܡܳܫܽܘ ܒܗܰܝܟܠܳܟ ܩܰܕܺܝܫܳܐ ܕܰܟܝܳܐܺܝܬ ܘܩܰܕܺܝܫܳܐܺܝܬ܆ ܘܰܢܫܰܒܚܽܘܢܳܟ ܥܰܡ ܬܶܓ̈ܡܶܐ ܠܳܐ ܗܽܘܠܳܢܳܝ̈ܐ ܕܰܠܥܶܠ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܩܳܠܳܐ: ܬܡܺܝܢܳܝܳܐ ܩܽܘܩܰܠܺܝܽܘܢ

ܒܡܳܢܳܐ ܡܕܰܟܶܐ ܛܰܠܝܳܐ ܐܽܘܪܚܶܗ ܕܢܶܛܰܪ ܦܽܘܩܕܳܢܰܝ̈ܟ ܗܰܠܶܠܽܘܝܰܗ ܒܟܽܠܶܗ ܠܶܒܝ ܥܰܩܶܒܬܳܟ ܠܳܐ ܬܶܛܥܶܝܢܝ ܡܶܢ ܦܽܘܩܕܳܢܰܝ̈ܟ܀

ܒܠܶܒܝ ܛܰܫܺܝܬ ܡܶܠܰܝ̈ܟ ܕܠܳܐ ܐܶܚܛܶܐ ܠܳܟ ܗܰܠܶܠܽܘܝܰܗ ܒܪܺܝܟ ܐܰܢ̱ܬ ܡܳܪܝܳܐ ܐܰܠܶܦܰܝܢܝ ܦܽܘܩܕܳܢܰܝ̈ܟ܀

ܠܽܐܘܪܚܳܐ ܕܣܳܗܕܽܘܬܳܟ ܪܶܚܡܶܬ ܛܳܒ ܡܶܢ ܟܽܠܶܗ ܥܽܘܬܪܳܐ ܗܰܠܶܠܽܘܝܰܗ ܒܦܽܘܩܕܳܢܰܝ̈ܟ ܪܢܺܝܬ ܘܝܶܕܥܶܬ ܐܽܘܪ̈ܚܳܬܳܟ܀

ܒܢܳܡܘܣܳܟ ܪܢܺܝܬ ܕܠܳܐ ܐܶܛܥܶܐ ܡܶܠܰܝ̈ܟ ܗܰܠܶܠܽܘܝܰܗ ܥܢܺܝ ܠܥܰܒܕܳܟ ܕܺܐܚܶܐ ܘܶܐܛܰܪ ܡܶܠܰܝ̈ܟ܀

ܓܠܺܝ ܥܰܝܢܰܝ̈ ܕܶܐܚܙܶܐ ܬܶܕܡܪ̈ܳܬܳܐ ܕܰܒܢܳܡܽܘܣܳܟ ܗܰܠܶܠܽܘܝܰܗ ܥܳܡܽܘܪܳܐ ܐ̱ܢܳܐ ܥܰܡܳܟ ܠܳܐ ܬܛܰܫܶܐ ܡܶܢܝ ܦܽܘܩܕܳܢܰܝ̈ܟ܀

ܨܒܳܬ ܢܰܦܫܝ ܘܶܐܬܪܰܓܪܓܰܬ ܠܕܺܝܢܰܝ̈ܟ ܒܟܽܠܙܒܰܢ ܗܰܠܶܠܽܘܝܰܗ ܟܐܰܝܬ ܒܥܰܡ̈ܡܶܐ ܘܠܺܝܛܺܝܢ ܐܶܢܽܘܢ ܐܰܝܠܶܝܢ ܕܛܳܥܶܝܢ ܡܶܢ ܦܽܘܩܕ̈ܳܢܰܝܟ܀

ܥܶܩܒܳܐ: ܫܽܘܒܚܳܐ

ܒܰܪܟܽܘܗ̱ܝ ܛܠܳܝ̈ܶܐ ܫܦܰܝ̈ܳܐ ܫܰܘܝ̈ܰܝ ܒܡܶܢܝܳܢ ܬܠܺܝܬܳܝܽܘܬܳܐ ܒܳܪܝܰܬ ܥܳܠ̈ܡܶܐ ܠܰܐܠܳܗܳܐ ܐܰܒܳܐ. ܐܰܘܕܰܘ ܠܡܶܠܬܳܐ ܕܙܳܚ ܘܰܢܚܶܬ ܠܦܽܘܪܩܳܢܰܢ. ܫܰܚܠܦܳܗ ܗ̱ܘܳܐ ܠܓܰܘܙܰܠܬܳܐ ܒܪܽܘܚ ܛܰܠܳܐ ܡܦܰܝܓܳܢܳܐ. ܥܰܡܡ̈ܶܐ ܟܽܠܟܽܘܢ ܒܰܪܶܟܘ ܘܰܐܘܕܰܘ ܠܰܫܡܶܗ ܕܝܳܗܽܘܒܳܐ ܕܚܰܝ̈ܶܐ ܕܟܽܠ ܢܶܫܡܳܐ. ܪܽܘܚܳܐ ܡܩܰܕܶܫ ܟܽܠܳܐ ܒܟܽܠܙܒܰܢ ܘܠܥܳܠܰܡ ܥܳܠܡܺܝܢ܀

ܡܶܢܥܳܠܰܡ

ܗܰܘ ܕܺܐܝܬܰܘܗܝ ܓܢܺܝܙܳܐ ܘܰܡܥܰܠܰܝ ܡܶܢ ܟܽܠ. ܗܰܘ ܕܰܡܫܰܡܫܺܝܢ ܠܶܗ ܕܠܳܐ ܫܶܠܝܳܐ ܦܳܠܰܚ̈ܘܳܬܳܐ ܕܡܰܠܰܐܟ̈ܶܐ. ܛܠܳܝ̈ܶܐ ܒܫܰܦܺܝܪܽܘܬ ܕܶܚܠܬܳܐ ܫܰܒܚܽܘܗܝ. ܟܳܗ̈ܢܶܐ ܒܟܽܠܥܶܕܳܢ ܒܰܪܟܽܘܗܝ. ܥܰܡܡ̈ܶܐ ܐܰܘܕܰܘ ܠܶܗ ܘܒܰܪܶܟܘ ܠܰܫܡܶܗ ܠܥܳܠܰܡ ܥܳܠܡܺܝܢ܀

ܐܚܪܢܐ

ܠܰܐܠܳܗܳܐ ܕܒܰܐܬܽܘܢܳܐ ܕܢܽܘܪܳܐ܆ ܥܰܡ ܛܠܳܝ̈ܶܐ ܒܢ̈ܰܝ ܥܶܒܪ̈ܳܝܶܐ ܐܰܟܚܕܳܐ ܢܚܶܬ ܗ̱ܘܳܐ ܘܩܳܡ܆ ܘܰܠܫܰܠܗܶܒܺܝܬܳܐ ܕܝܳܩܕܳܐ ܠܛܰܠܳܐ ܗܰܢܺܝܐܳܐ ܫܰܚܠܶܦ܆ ܕܠܶܗ ܫܰܒܰܚܘ ܥܰܒܕ̈ܰܘܗ̱ܝ ܘܟܽܠܗܶܝܢ ܒܶܪ̈ܝܳܬܶܗ܆ ܕܝܰܬܺܝܪ ܢܪܰܡܪܶܡ ܘܢܰܘܕܶܐ ܠܰܫܡܶܗ ܩܰܕܺܝܫܳܐ ܠܥܳ݀ܠܡܺܝܢ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܨܠܽܘܬܳܐ

ܡܳܪܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ܆ ܫܰܟܶܢ ܠܥܰܒܕܰܝ̈ܟ ܗܳܠܶܝܢ ܠܰܡܩܰܒܳܠܽܘ ܥܽܘܬܪܳܐ ܕܡܰܘܗ̈ܒܳܬܳܟ ܐܰܠܳܗܳܝܳ̈ܬܳܐ܆ ܐܰܝܟܰܢܳܐ ܕܰܒܕܰܟܝܽܘܬܳܐ ܘܩܰܕܺܝܫܽܘܬܳܐ ܢܰܣܩܽܘܢ ܠܳܟ ܩܽܘܒܳܠܛܰܝܒܽܘܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܗܽܘܢ. ܘܰܐܫܘܳܐ ܠܰܢ ܘܰܠܗܽܘܢ ܠܡܶܦܰܩ ܠܽܐܘܪܥܳܟ ܒܡܶܐܬܺܝܬܳܟ ܬܪܰܝܳܢܺܝܬܳܐ܆ ܘܰܢܫܰܡܫܳܟ ܥܰܡܗܽܘܢ ܕܬܶܓ̈ܡܶܐ ܡܰܠܰܐܟܳܝ̈ܐ ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ ܠܥܳܠܰܡ ܥܳܠܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ: ܒܪܶܟܢܳܐ ܕܚܽܘܣܳܝܳܐ ܗܘܺܝ ܠܺܝ

ܪܺܝܫܟܳܗ̈ܢܶܐ: ܪܰܚܶܡܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬܳܟ܀

ܡܫܰܡ̈ܫܳܢܶܐ: ܚܽܘܣܳܝܳܐ ܗܘܺܝ ܠܺܝ܆ ܐܰܢ̱ܬ ܠܚܽܘܕܰܝܟ ܣܰܓܺܝ ܪ̈ܰܚܡܶܐ ܐܰܠܳܗܳܐ. ܘܩܰܒܶܠܰܝܢܝ ܐܰܝܟ ܕܰܠܗܰܘ ܒܪܳܐ ܐܳܣܽܘܛܳܐ ܘܪܰܚܶܡܥܠܰܝ܀

ܪܺܝܫܟܳܗ̈ܢܶܐ: ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ܀

ܡܫܰܡ̈ܫܳܢܶܐ: ܐܰܒܳܐ ܩܰܕܺܝܫܳܐ܆ ܘܝܳܗܽܘܒܳܐ ܕܩܰܕܺܝܫܽܘܬܳܐ ܐܰܠܳܗܳܐ. ܩܰܕܶܫ ܒܛܰܝܒܽܘܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܡܰܘܗܰܒܬܳܟ ܕܒܳܗ ܢܶܬܩܰܕܰܫ (ܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܠܳܟ ܒܰܠܚܽܘܕܰܝܟ ܚܛܺܝܬ܀

ܡܫܰܡ̈ܫܳܢܶܐ: ܒܪܳܐ ܕܰܒܡܰܘܗܰܒܬܶܗ܆ ܠܰܫܠܺܝ̈ܚܶܐ ܕܺܝܠܶܗ ܚܰܟܶܡ ܐܰܠܳܗܳܐ. ܚܰܟܶܡ ܒܡܰܘܗܰܒܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܪܽܘܚܳܟ ܕܒܳܗ ܢܶܬܚܰܟܰܡ (ܢܶܬܚܰܟܡܽܘܢ)܀

ܪܺܝܫܟܳܗ̈ܢܶܐ: ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ܀

ܡܫܰܡ̈ܫܳܢܶܐ: ܪܽܘܚܳܐ ܕܠܰܫܠܺܝ̈ܚܶܐ܆ ܒܠܶܫܳܢ̈ܐ ܕܢܽܘܪܳܐ ܚܰܟܶܡ ܐܰܠܳܗܳܐ. ܩܰܕܶܫ ܒܡܰܘܗܰܒܬܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܪܽܘܚܳܟ ܕܒܳܗ ܢܶܬܩܰܕܰܫ (ܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܐܰܣܒܰܥܰܝܢܝ ܒܽܘܣܳܡܳܟ ܘܚܰܕܽܘܬܳܟ܀

ܡܫܰܡ̈ܫܳܢܶܐ: ܠܬܰܪ̈ܥܶܐ ܕܰܫܡܰܝ̈ܳܐ܆ ܬܶܦܬܰܚܝ ܛܰܝܒܽܘܬܳܟ ܩܕܳܡܰܝܢ ܐܰܠܳܗܳܐ. ܘܰܐܓܶܢ ܝܰܡܺܝܢܳܟ܆ ܥܰܠ ܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܳܗ ܕܒܳܗ ܢܶܬܒܰܪܰܟ (ܢܶܬܒܰܪܟܽܘܢ)܀

ܪܺܝܫܟܳܗ̈ܢܶܐ: ܠܶܒܳܐ ܕܰܟܝܳܐ ܒܪܺܝ ܒܺܝ ܐܰܠܳܗܳܐ܀

ܡܫܰܡ̈ܫܳܢܶܐ: ܒܶܐܣܛܠܳܟ ܢܶܨܛܰܒܰܬ܆ ܨܰܘܪܳܐ ܕܰܩܕܳܡܰܝܟ ܪܟܺܝܢܽ ܗ̱ܘ ܐܰܠܳܗܳܐ. ܘܚܳܐܰܪ ܠܡܰܘܗܰܒܬܳܟ܆ ܕܒܳܗ ܢܶܨܛܰܒܰܬ ܒܨܶܒ̈ܬܶܐ ܕܪܽܘܚܳܐ ܩܰܕܺܝܫܳܐ܀

ܪܺܝܫܟܳܗ̈ܢܶܐ: ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܘܪܩܳܢܳܟ܀

ܡܫܰܡ̈ܫܳܢܶܐ: ܟܶܢ̈ܫܶܐ ܫܡܰܝܳܢ̈ܶܐ܆ ܡܶܬܦܰܨܚܺܝܢ ܒܫܽܘܡܠܳܝ ܥܰܒܕܳܟ (ܥܰܒܕܰܝ̈ܟ) ܐܰܠܳܗܳܐ. ܘܙܳܡܪܺܝܢ ܬܰܚ̈ܬܳܝܶܐ܆ ܬܶܫܒܽܘܚܬܳܐ ܠܰܕܚܰܠܛܶܗ (ܠܕܰܚܠܰܛ ܐܶܢܽܘܢ) ܒܶܝܬ ܟܶܢܫܰܝ̈ܗܽܘܢ܀

ܪܺܝܫܟܳܗ̈ܢܶܐ: ܦܰܨܳܢܝ ܡܶܢ ܕܡܳܐ ܐܰܠܳܗܝ ܐܰܠܳܗܳܐ ܕܦܽܘܪܩܳܢܝ܀

ܡܫܰܡ̈ܫܳܢܶܐ: ܬܳܡܗܺܝܢ ܢܽܘܪ̈ܳܢܶܐ܆ ܟܰܕ ܨܳܪܶܐ ܠܪܰܘܡܳܐ ܪܽܘܚܳܐ ܩܰܕܺܝܫܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܒܺܐܝܕܰܝ̈ ܪܺܝܫܟܳܗ̈ܢܶܐ ܠܰܕܫܳܐܠܺܝܢ ܠܳܗ܀

ܪܺܝܫܟܳܗ̈ܢܶܐ: ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ ܘܳܐܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬܪܰܥܺܝܬ܀

ܡܫܰܡ̈ܫܳܢܶܐ: ܠܳܐ ܡܶܣܬܰܝܟܳܢܳܐ܆ ܒܺܐܝܕܰܝ̈ܳܐ ܕܕܰܟܝ̈ܳܢ ܡܶܬܬܚܶܕ ܪܽܘܚܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܠܪܺܝܫܳܐ ܕܟܳܗ̈ܢܶܐ ܒܰܕܡܽܘܬ ܐܰܗܪܽܘܢ܀

ܪܺܝܫܟܳܗ̈ܢܶܐ: ܐܰܛܐܶܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܝܗ ܕܽܐܘܪܺܫܠܶܡ܀

ܡܫܰܡ̈ܫܳܢܶܐ: ܡܕܰܟܝܳܢܳܐ ܕܚܰܘ̈ܒܶܐ܆ ܒܝܰܕ ܡܰܓܢܳܢܽܘܬܶܗ ܕܪܽܘܚܳܐ ܐܰܠܳܗܳܐ܆ ܕܰܟܳܐ ܒܪܽܘܚܳܦܳܟ܆ ܠܥܰܒܕܳܟ ܕܰܡܣܰܟܶܐ (ܠܥܰܒܕܰܝ̈ܟ ܕܰܡܣܰܟܶܝܢ) ܠܫܽܘܡܠܳܝܳܟ܆ ܕܒܶܗ ܢܶܬܕܰܟܶܐ (ܢܶܬܕܰܟܽܘܢ)܀

ܚܽܘܣܳܝܳܐ

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܽܘܣ ܩܽܘܪܝܶܐܠܶܝܣܽܘܢ܀

ܪܺܝܫܟܳܗ̈ܢܶܐ: ܢܨܰܠܶܐ ܟܽܠܰܢ܆ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀ ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܺܝܽܘܢ

ܬܶܫܒܽܘܚܬܳܐ ܠܗܰܘ ܡܪܰܚܡܳܢܳܐ ܘܣܰܓܺܝ ܛܰܝܒܽܘܬܳܐ܆ ܕܰܠܓܶܢܣܳܐ ܐ̱ܢܳܫܳܝܳܐ ܡܶܢ ܗܳܝ ܕܠܳܐ ܐܺܝܬܰܘܗ̱ܝ ܗ̱ܘܳܐ܆ ܠܘܳܬ ܗܳܝ ܕܢܶܗܘܶܐ ܐܺܝܬܰܘܗ̱ܝ܆ ܐܰܝܬܺܝ. ܟܰܕ ܒܪܳܝܗ̱ܝ ܘܨܰܒܬܶܗ. ܘܬܽܘܒ ܟܰܕ ܫܪܰܥ ܘܰܢܦܰܠ܆ ܦܪܰܩ ܘܰܐܩܺܝܡ. ܘܰܠܘܳܬ ܪܰܘܡܳܐ ܡܥܰܠܝܳܐ ܕܫܽܘܟܳܢܰܘ̈ܗ̱ܝ ܐܰܠܳܗܳܝ̈ܶܐ ܠܡܶܬܩܰܪܳܒܽܘ ܐܰܫܘܺܝ. ܠܳܟ ܡܳܪܝܳܐ ܡܠܶܐ ܪ̈ܰܚܡܶܐ ܘܰܚܢܳܢܳܐ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܒܥܶܕܳܢܳܐ ܗܳܢܳܐ ܥܰܡ ܥܶܛܪܳܐ ܕܒܶܣ̈ܡܶܐ. ܕܰܒܗܽܘܢ ܒܪ̈ܰܚܡܶܐ ܕܺܝܠܳܟ ܡܬܽܘܡܳܝ̈ܶܐ܆ ܬܰܫܘܶܐ ܠܰܡܩܰܒܳܠܽܘ ܘܠܰܡܩܰܪܳܒܽܘ ܠܘܳܬ ܬܶܫܡܶܫܬܶܗ ܕܗܰܝܟܠܳܟ ܕܰܟܝܳܐ ܘܩܰܕܺܝܫܳܐ. ܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ) ܕܗܳܐ ܩܳܐܶܡ (ܩܳܝܡܺܝܢ) ܟܰܕ ܪܟܺܝܢ (ܪܟܺܝܢܺܝܢ) ܩܕܳܡ ܬܪܽܘܢܽܘܣ ܕܪܰܒܽܘܬܳܟ. ܘܰܡܣܰܟܶܐ (ܘܰܡܣܰܟܶܝܢ) ܠܡܰܘܗܰܒܬܳܐ ܫܡܰܝܳܢܺܝܬܳܐ ܕܡܶܢܳܟ. ܕܠܳܟܽ ܗ̱ܘ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܬܶܫܡܶܫܬܳܐ ܗܳܕܶܐ ܪܽܘܚܳܢܳܝܬܳܐ. ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܡܫܰܒܚܳܐ ܠܳܟ ܡܳܪܝ ܫܡܰܝܳܐ ܒܟܶܢ̈ܫܶܐ ܪ̈ܽܘܚܳܢܳܝܶܐ. ܗܳܢܽܘܢ ܕܰܒܩܘܕ̈ܳܫܶܐ ܬܠܺܝܬܳܝܰܝ̈ ܠܶܥ̈ܙܶܐ ܡܒܰܪܟܺܝܢ ܠܪܰܒܽܘܬܳܟ ܠܳܐ ܡܶܬܡܰܠܠܳܢܺܝܬܳܐ. ܘܣܳܓܕܳܐ ܠܳܟ ܐܰܪܥܳܐ ܒܰܒܢܰܝ̈ܢܳܫܳܐ ܗܳܢܽܘܢ ܕܡܶܢܶܗ ܕܥܰܦܪܳܐ ܒܦܽܘܩܕܳܢܳܟ ܐܶܬܒܪܺܝܘ. ܘܰܠܘܳܬ ܬܶܫܡܶܫܬܳܐ ܕܺܝܠܳܟ ܕܰܟܝܳܐܺܝܬ ܘܩܰܕܺܝܫܳܐܺܝܬ ܠܡܶܬܩܰܪܳܒܽܘ ܐܰܫܘܺܝܬ. ܐܰܢ̱ܬ ܡܳܪܝ܆ ܗܰܘ ܕܟܽܠ ܒܳܨܶܐ ܘܟܽܠ ܡܨܶܐ. ܐܰܢ̱ܬ ܕܰܒܝܰܕ ܒܪܳܐ ܕܺܝܠܳܟ ܚܰܒܺܝܒܳܐ: ܡܳܪܝܳܐ ܕܶܝܢ ܕܺܝܠܰܢ ܘܰܐܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܘܰܒܝܰܕ ܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ. ܐܰܓܥܶܠܬ ܫܽܘ̈ܟܳܢܶܐ ܗܳܠܶܝܢ ܪ̈ܽܘܚܳܢܳܝܶܐ ܕܬܶܫܡܶܫܬܳܐ ܗܳܕܶܐ ܠܰܟܝܳܢܳܐ ܬܰܚܽܘܒܳܐ ܕܺܝܠܰܢ ܒܢܰܝ̈ܢܳܫܳܐ ܥܰܦܪ̈ܳܢܶܐ. ܟܰܕ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܡܠܰܝܬ ܡܶܢ ܩܽܘܕ̈ܫܶܐ ܕܺܝܠܳܟ ܠܳܐ ܡܶܬܕܰܪ̈ܟܳܢܶܐ. ܘܒܺܐܝܕܰܝ̈ܗܽܘܢ ܩܠܺܝ̈ܕܶܐ ܪ̈ܽܘܚܳܢܳܝܶܐ ܕܟܳܗܢܽܘܬܳܐ ܡܳܪܰܬ ܓܰـ̈ܙܶܐ ܠܰܢ ܐܰܓܥܶܠܬ ܘܫܰܟܶܢܬ. ܡܰܘܕܶܝܢܰܢ ܠܪ̈ܰܚܡܰܝܟ ܘܰܡܫܰܒܚܺܝܢܰܢ ܠܛܰܝܒܽܘܬܳܟ. ܘܟܰܕ ܡܫܰܪܪܺܝܢܰܢ ܒܣܰܒܪܳܟ ܪܰܒܳܐ. ܘܰܡܚܰܙܩܺܝܢܰܢ ܒܬܽܘܟܠܳܢܳܐ ܕܰܥܠܰܝܟ. ܐܳܫܕܺܝܢܰܢ ܬܰܟܫܶܦܬܳܐ ܘܒܳܥܽܘܬܳܐ ܕܰܡܚܺܝܠܽܘܬܰܢ ܩܕܳܡ ܪܰܒܽܘܬܳܟ. ܘܰܡܦܺܝܣܺܝܢܰܢ ܠܒܰܣܺܝܡܽܘܬܳܟ. ܠܚܺܝ ܚܛܳܗܰܝ̈ܢ ܒܪ̈ܰܚܡܰܝܟ. ܘܰܐܥܒܰܪ ܣܰܟܠܘ̈ܳܬܰܢ ܒܰܚܢܳܢܳܟ. ܚܰܘܳܐ ܠܰܢ ܓܳܡܽܘܪ̈ܶܐ ܘܰܡܫܰܡܠ̈ܝܳܢܶܐ ܕܦܽܘܩܕܳܢܰܝ̈ܟ. ܘܰܡ̈ܠܰܝܳܐ ܘܰܓܡܺܝܪ̈ܶܐ ܒܩܽܘܕ̈ܫܶܐ ܕܺܝܠܳܟ. ܐܰܝܟܰܢܳܐ ܕܢܶܣܦܰܩ ܠܰܡܫܰܡܳܫܽܘ ܩܕܳܡܰܝܟ܆ ܕܠܳܐ ܡܶܨܛܰܠܝܳܢܽܘܬܳܐ ܕܰܠܘܳܬ ܚܰܫ̈ܐ ܕܰܚܒܳܠܳܐ. ܘܠܰܡܫܰܟܳܢܽܘ ܠܥܰܡܳܐ ܕܺܝܠܳܟ ܡܶܢ ܫܽܘܟܳܢ̈ܐ ܕܺܝܠܳܟ ܪ̈ܳܡܶܐ ܘܰܡܥܰܠܰܝ̈ܳܐ. ܘܠܰܡܩܰܪܳܒܽܘ ܠܘܳܬ ܡܰܕܒܚܳܟ ܩܰܕܺܝܫܳܐ. ܠܰܐܝܢܳܐ (ܠܰܐܝܠܶܝܢ) ܕܺܝܕܰܥܬܳܟ ܐܰܠܳܗܳܝܬܳܐ ܡܚܰܘܝܳܐ ܘܰܡܩܰܪܒܳܐ. ܟܰܕ ܗܺܝ ܪܶܚܡܰܬ ܐ̱ܢܳܫܽܘܬܳܟ ܓܳܡܪܳܐ ܘܰܡܫܰܡܠܝܳܐ ܠܶܗ (ܠܗܽܘܢ). ܒܡܶܨܥܳܝܽܘܬܳܐ ܕܰܡܚܺܝܠܽܘܬܰܢ. ܒܗܳܝ ܕܠܰܘ ܡܶܛܽܠ ܕܫܳܘܶܝܢܰܢ ܡܶܬܩܰܪܒܺܝܢܰܢ. ܐܶܠܳܐ ܟܰܕ ܒܰܚܢܳܢܳܟ ܫܦܺܝܥ ܒܡܰܘܗ̈ܒܳܬܳܐ ܡܶܬܚܰܝܠܺܝܢܰܢ. ܥܰܠܗܳܝ ܠܥܰܒܕܳܟ ܗܳܢܳܐ (ܠܥܰܒܕܰܝ̈ܟ ܗܳܠܶܝܢ) ܕܰܠܬܶܫܡܶܫܬܳܐ ܕܰܡܙܰܡܪܳܢܳܐ ܐܶܬܩܪܺܝ (ܕܰܡܙܰܡܪ̈ܳܢܶܐ ܐܶܬܩܪܺܝܘ). ܐܰܫܘܳܐ ܠܰܡܩܰܒܳܠܽܘ ܘܠܰܡܫܰܡܠܳܝܽܘ܆ ܒܡܰܓܢܳܢܽܘܬܳܐ ܕܪܽܘܚܳܟ ܐܰܠܳܗܳܝܳܐ܆ ܘܟܰܕ ܠܦܰܓܪܶܗ (ܠܦܰܓܪ̈ܰܝܗܽܘܢ) ܐܰܠܳܗܳܝܳܐ ܘܰܠܢܰܦܫܶܗ (ܘܰܠܢܰܦ̈ܫܳܬܗܽܘܢ) ܐܰܟܚܕܳܐ ܡܕܰܟܶܐ ܐܰܢ̱ܬ ܡܶܢ ܟܽܠ ܛܽܘܠܫܳܐ ܘܟܽܘܬܡܳܐ ܕܥܰܘܠܳܐ ܘܕܰܚܛܺܝܬܳܐ܆ ܢܶܗܘܶܐ (ܢܶܗܘܽܘܢ) ܒܗܰܝܟܠܳܟ ܩܰܕܺܝܫܳܐ܆ ܐܶܡܪܳܐ ܕܰܟܝܳܐ (ܐܶܡܪ̈ܶܐ ܕܟܰܝܳ̈ܐ) ܕܡܶܬܬܢܺܝܚ ܒܶܗ (ܒܗܽܘܢ) ܨܶܒܝܳܢܳܟ ܛܳܒܳܐ ܘܰܡܩܰܒܠܳܐ ܘܰܒܚܰܝܠܳܟ ܐܰܠܳܗܳܝܳܐ ܢܶܬܚܰܝܰܠ (ܢܶܬܚܰܝܠܽܘܢ) ܘܰܠܘܳܬ ܫܽܘ̈ܟܳܢܶܐ ܕܒܺܝܕܰܥܬܳܐ ܕܺܝܠܳܟ ܐܰܠܳܗܳܝܬܳܐ ܘܪܳܡܰܬ ܡܶܢ ܟܽܠ ܡܶܫܬܰܟܢܺܝܢ܆ ܢܶܬܕܰܪܰܓ (ܢܶܬܕܰܪܓܽܘܢ) ܘܰܚܢܰܢ ܘܗܽܘ (ܘܗܶܢܽܘܢ) ܠܚܰܪܬܳܐ ܛܳܒܬܳܐ ܐܰܝܕܳܐ ܕܰܡܠܺܝܟܳܐ ܠܩܰܕܺܝܫܰܝ̈ܟ ܢܶܫܬܘܶܐ. ܘܢܰܣܶܩ ܫܽܘܒܚܳܐ ܘܬܰܘܕܺܝܬܳܐ܆ ܠܳܟ ܐܰܒܳܐ ܓܢܺܝܙܳܐ ܘܠܳܐ ܡܶܬܕܰܪܟܳܢܳܐ. ܘܠܰܒܪܳܟ ܣܓܺܝܕܳܐ ܘܠܳܐ ܡܶܬܥܰܩܒܳܢܳܐ܆ ܘܰܠܪܽܘܚܳܟ ܩܰܕܺܝܫܳܐ ܘܠܳܐ ܡܶܬܒܰܨܝܳܢܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ܀

ܩܳܠܳܐ ܒܩ̄: ܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܦܶܬܓܳܡܳܐ: ܫܡܰܥܘ ܗܳܕܶܐ ܟܽܠܟܽܘܢ ܥܰܡ̈ܡܶܐ:

ܐܳܡܰܪ ܠܶܗ ܪܰܒ ܪ̈ܳܥܰܘܳܬܳܐ ܠܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ. ܚܙܺܝ ܫܶܡܥܽܘܢ ܡܳܢܳܐ ܥܳܒܶܕ ܐܰܢ̱ܬ ܠܓܽܘܥܠܳܢܳܐ ܕܝܶܗܒܶܬ ܒܺܐܝܕܰܝ̈ܟ܆ ܒܥܺܝܪܽܘܬܳܐ ܛܰܪ ܡܰܪܥܺܝܬܳܟ܆ ܡܶܢ ܣܽܘܓܦܳܢ̈ܶܐ ܘܚܶܪ̈ܝܳܢܶܐ܆ ܕܚܽܘܫܒܳܢܳܐ ܐܺܝܬ ܠܳܟ ܕܬܶܬܶܠ܆ ܩܕܳܡ ܕܰܝܳܢܳܐ ܕܟܺܐܢܽܘܬܳܐ܆ ܕܠܰܝܬ ܒܕܺܝܢܶܗ ܡܰܣܰܒ ܒܰܐܦ̈ܶܐ܀

ܐܰܢܗܰܪܘ ܒܰܪ̈ܩܰܝܟ ܠܬܺܒܶܝܠ:

ܟܬܰܒ ܗ̱ܘܳܐ ܠܶܗ ܦܰܘܠܽܘܣ ܛܽܘܒܳܢܳܐ܆ ܠܛܺܝܡܳܬܶܐܽܘܣ ܬܰܠܡܺܝܕܶܗ܆ ܚܙܺܝ ܐܰܚܽܘܢ ܡܳܢܳܐ ܥܳܒܶܕ ܐܰܢ̱ܬ ܡܶܢ ܥܺܕ̈ܳܬܳܐ ܕܰܡܫܺܝܚܳܐ. ܚܙܺܝ ܠܳܐ ܬܶܬܶܠ ܟܳܗܢܽܘܬܳܐ ܠܳܐ ܠܪ̈ܳܡܶܐ ܘܠܳܐ ܠܙܰܠܺܝ̈ܠܶܐ܆ ܘܠܳܐ ܠܝܰܥ̈ܢܶܐ ܘܠܳܐ ܠܳܐܣܽܘ̈ܛܶܐ܆ ܐܶܠܳܐ ܠܢܺܝ̈ܚܶܐ ܘܡܰܟܺܝ̈ܟܶܐ܆ ܘܟܽܠ ܕܰܕܟܶܐ ܘܰܫܦܶܐ ܘܩܰܕܺܝܫ܀

ܫܘܒܚܐ: ܐܰܠܳܗܳܐ ܕܡܰܠܶܠ ܥܰܡ ܡܽܘܫܶܐ܆ ܒܛܽܘܪ ܣܺܝܢܰܝ ܡܶܢ ܓܰܘ ܣܰܢܝܳܐ܆ ܘܶܐܡܰܪ ܠܶܗ ܕܬܳܐ ܥܽܘܠ ܠܓܰܘ ܡܶܨܪܶܝܢ܆ ܘܰܐܦܶܩ ܠܰܒܢܰܝ̈ ܝܺܣܪܳܐܶܝܠ܆ ܗܽܘ ܢܶܗܘܶܐ ܫܽܘܪܳܐ ܕܫܰܝܢܳܐ܆ ܘܢܳܛܽܘܪܳܐ ܠܥܺܕܰܬ ܩܽܘܕܫܳܐ܆ ܘܬܶܙܡܰܪܝ ܫܽܘܒܚܳܐ ܘܬܰܘܕܺܝܬܳܐ܆ ܠܰܐܒܳܐ ܘܠܰܒܪܳܐ ܘܪܽܘܚܩܽܘܕܫܳܐ܆ ܐ̱ܪܳܙܳܐ ܕܰܬܠܺܝܬܳܝܽܘܬܳܐ܀

ܡܶܢܥܳܠܰܡ: ܚܙܰܘ ܟܳܗ̈ܢܶܐ ܡܳܢܳܐ ܡܫܰܡܫܺܝܬܽܘܢ܆ ܕܰܪ̈ܓܶܐ ܪ̈ܳܡܶܐ ܕܟܳܗܢܽܘܬܳܐ܆ ܕܳܐܣܪܳܐ ܘܫܳܪܝܳܐ ܐܰܝܟ ܕܝܰܗ̱ܒ ܠܳܗ܆ ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܆ ܩܠܺܝ̈ܕܶܐ ܕܪܰܘܡܳܐ ܘܰܕܥܽܘܡܩܳܐ܆ ܗܳܐ ܣܺܝܡܺܝܢ ܒܶܝܬ ܐܺܝܕܰܝ̈ܟܽܘܢ܆ ܘܛܽܘܒܰܝܟܽܘܢ ܟܰܕ ܥܳܒܕܺܝܬܽܘܢ܆ ܨܶܒܝܳܢܶܗ ܕܡܳܪܝܳܐ ܡܳܪܟܽܘܢ܆ ܕܥܰܡܶܗ ܬܶܥܠܽܘܢ ܠܰܓܢܽܘܢܳܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܥܶܛܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܣܰܓܺܝ ܪ̈ܰܚܡܶܐ. ܕܳܐܦ ܗܳܫܳܐ ܒܗܽܘܢ ܒܪ̈ܰܚܡܶܐ ܕܺܝܠܳܟ ܐܰܒܳܗܳܝ̈ܶܐ. ܩܰܒܶܠ ܗܰܢܺܝܳܐܺܝܬ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܰܐܠܳܗܽܘܬܳܟ ܪܳܡܰܬ ܡܶܢ ܟܽܠ܆ ܒܡܶܬܩܰܪܒܳܢܽܘܬܳܐ ܕܰܒܢܰܝ̈ܳܐ ܪ̈ܽܘܚܳܢܳܝܶܐ ܕܰܠܬܶܫܡܶܫܬܳܐ ܗܳܕܶܐ ܙܰܡܢܰܬ ܐܶܢܽܘܢ ܪܶܚܡܰܬ ܐ̱ܢܳܫܽܘܬܳܟ. ܘܰܐܫܘܳܐ ܐܶܢܽܘܢ ܕܰܢܫܰܡܫܽܘܢ ܒܗܰܝܟܠܳܟ ܩܰܕܺܝܫܳܐ ܒܰܡܕܰܝܠܳܢܽܘܬܳܐ ܕܟܺܝܬܳܐ. ܟܰܕ ܡܫܰܒܚܺܝܢ ܘܰܡܪܰܡܪܡܺܝܢ ܠܳܟ. ܥܰܡ ܝܺܚܺܝܕܳܝܳܐ ܒܪܳܟ ܘܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܢܽܘܗܳܪܳܐ

ܗܳܝܕܶܝܢ ܗܰܘ ܕܡܶܬܛܰܝܰܒ ܕܢܶܬܬܰܣܪܰܚ܆ ܩܳܪܶܐ ܠܩܶܪܝܳܢܳܐ ܗܳܢܳܐ ܕܰܡܟܰܢܰܫ ܡܶܢ ܡܰܙܡܽܘܪ̈ܶܐ ܕܕܰܘܺܝܕ ܢܒܺܝܳܐ ܡܫܰܒܚܳܐ܆ ܘܶܐܢ ܣܰܓܺܝܐܺܝܢ ܐܶܢܽܘܢ ܗܳܢܽܘܢ ܕܡܶܬܬܰܣܪܚܺܝܢ܆ ܚܰܕ ܡܶܢܗܽܘܢ ܩܳܪܶܐ ܠܶܗ܆ ܘܶܐܢ ܠܳܐ ܡܶܬܡܰܨܝܳܢܝܳܐ܆ ܚܰܕ ܡܶܢ ܩܠܺܝܪ̈ܺܝܩܳܝܶܐ܀

ܙܽܘܡܳܪܳܐ

ܡܫܰܡ̈ܫܳܢܶܐ: ܚܕܺܝܬ ܟܰܕ ܐܳܡܪܺܝܢ ܗ̱ܘܰܘ ܠܺܝ܆ ܠܒܰܝܬܶܗ ܕܡܳܪܝܳܐ ܐܳܙܺܠ̱ܝܢܰܢ ܗܰܠܶܠܽܘܝܰܗ܀

ܙܽܘܡܳܪܳܐ ܐܚܪܺܢܳܐ

ܡܫܰܡ̈ܫܳܢܶܐ: ܩܳܠܳܐ ܕܫܽܘܒܚܳܐ ܘܰܕܦܽܘܪܩܳܢܳܐ ܒܡܰܫܟܢܳܐ ܕܙܰܕܺܝ̈ܩܶܐ ܪܽܘܚܩܽܘܕܫܳܐ ܒܕܰܘܺܝܕ ܙܶܡܪܰܬ܀

ܡܫܰܡܫܳܢܳܐ: ܩܶܪܝܳܢܳܐ ܡܶܢ ܣܶܦܪܳܐ ܕܡܰܙܡܽܘܪ̈ܶܐ ܕܕܰܘܺܝܕ ܢܒܺܝܳܐ ܐܰܡܺܝܢ ܒܰܪܶܟܡܳܪܝ܀

ܡܫܰܡ̈ܫܳܢܶܐ: ܫܽܘܒܚܳܐ ܠܡܳܪܶܗ ܕܰܢܒܺܝܳܐ ܘܰܥܠܰܝܢ ܪ̈ܰܚܡܰܘܗ̱ܝ ܠܥܳܠܡܺܝܢ܀

ܡܙܡܘܪ̈ܐ: 1: 31 ,26: 6-8 ,27: 4 ,7 ,11 ,13, 28: 6-9

ܒܳܟ ܡܳܪܝܳܐ ܣܰܒܪܶܬ ܠܳܐ ܐܶܒܗܰܬ ܠܥܳܠܰܡ܀ ܐܰܫܝܓܶܬ ܕܰܟܝܳܐܺܝܬ ܐܺܝܕܰܝ̈܆ ܘܶܐܬܟܰܪܟܶܬ ܠܡܰܕܒܚܳܟ ܡܳܪܝܳܐ ܕܶܐܫܡܰܥ ܩܳܠܶܗ ܕܫܽܘܒܚܳܟ ܘܶܐܫܬܰܥܶܐ ܟܽܠܗܶܝܢ ܬܶܕܡܪ̈ܳܬܳܟ. ܡܳܪܝܳܐ ܪܶܚܡܶܬ ܬܶܫܡܶܫܬܶܗ ܕܒܰܝܬܳܟ ܘܰܐܬܪܳܐ ܕܡܰܫܪܝܶܗ ܕܫܽܘܒܚܳܟ܀ ܚܕܳܐ ܓܶܝܪ ܫܶܐܠܶܬ ܡܶܢ ܡܳܪܝܳܐ܆ ܘܠܳܗܽ ܗ̱ܘ ܒܳܥܶܐ ܐ̱ܢܳܐ: ܕܶܐܥܡܰܪ ܒܒܰܝܬܶܗ ܕܡܳܪܝܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈܆ ܘܶܐܚܙܶܐ ܒܒܰܣܺܝܡܽܘܬܶܗ ܕܡܳܪܝܳܐ܆ ܘܶܐܦܩܽܘܕ ܗܰܝܟܠܶܗ܀ ܘܶܐܕܰܒܰܚ ܒܡܰܫܟܢܶܗ ܕܶܒ̈ܚܶܐ ܕܫܽܘܒܚܳܐ܆ ܐܶܫܰܒܰܚ ܘܶܐܙܰܡܰܪ ܠܡܳܪܝܳܐ. ܫܡܰܥ ܡܳܪܝܳܐ ܩܳܠܝ ܡܳܐ ܕܰܩܪܺܝܬܳܟ. ܪܰܚܶܡܥܠܰܝ ܘܰܥܢܺܝܢܝ܀ ܐܰܠܶܦܰܝܢܝ ܡܳܪܝܳܐ ܐܽܘܪܚܳܟ܆ ܘܕܰܒܰܪܰܝܢܝ ܒܰܫܒܺܝܠܰܝ̈ܟ ܬܪ̈ܺܝܨܶܐ܀ ܐܶܢܳܐ ܓܶܝܪ ܗܰܝܡܢܶܬ ܕܶܐܚܙܶܐ ܛܳܒ̈ܬܶܗ ܕܡܳܪܝܳܐ ܒܰܐܪܥܳܐ ܕܚܰܝ̈ܐ܀ ܒܪܺܝܟܽ ܗ̱ܘ ܡܳܪܝܳܐ ܕܫܳܡܰܥ ܩܳܠܳܐ ܕܒܳܥܽܘܬܝ. ܡܳܪܝܳܐ ܥܳܕܽܘܪܝ ܘܰܡܣܰܝܥܳܢܝ܆ ܕܰܥܠܰܘܗ̱ܝ ܐܶܬܬܟܶܠ ܠܶܒܝ܆ ܘܰܫܘܰܚ ܒܶܣܪܝ. ܘܰܒܬܶܫܒܽܘܚܬܳܐ ܐܰܘܕܶܐ ܠܶܗ. ܡܳܪܝܳܐ ܚܰܝܠܰܐ ܗ̱ܘ ܕܥܰܡܶܗ. ܡܣܰܝܥܳܢܳܐ ܕܦܽܘܪܩܳܢܳܐ ܕܰܡܫܺܝܚܶܗ. ܦܪܽܘܩ ܠܥܰܡܳܟ ܘܒܰܪܶܟ ܠܝܳܪܬܽܘܬܳܟ. ܪܥܺܝ ܐܶܢܽܘܢ ܘܕܰܒܰܪ ܐܶܢܽܘܢ ܥܕܰܡܳܐ ܠܥܳܠܰܡ ܒܰܪܶܟܡܳܪܝ܀

ܗܽܘܠܳܠܳܐ ܕܶܐܘܰܢܓܶܠܝܽܘܢ

ܡܫܰܡ̈ܫܳܢܶܐ: ܐܰܘܕܰܘ ܠܶܗ ܒܟܶܢܳܪܳܐ ܘܰܒܩܺܝܬܳܪܳܐ܆ ܕܰܥܣܰܪ ܡܶܢܺܝ̈ܢ ܙܰܡܰܪܘ ܠܶܗ ܗܰܠܶܠܘܝܰܗ܀

ܘܩܳܐܶܡ ܪܺܝܫܟܳܗ̈ܢܶܐ ܡܶܢ ܬܪܽܘܢܺܝܽܘܢ܆ ܘܳܐܬܶܐ ܠܰܩܕܳܡ ܦܳܬܽܘܪ ܚܰܝ̈ܐ܆ ܘܟܰܕ ܐܰܦܰܘܗ̱̈ܝ ܠܡܰܥܪܒܳܐ ܩܳܪܶܐ ܠܶܐܘܰܢܓܶܠܺܝܽܘܢ ܡܶܢ ܠܽܘܩܳܐ ܡܣܰܒܪܳܢܳܐ܀

ܡܫܰܡܫܳܢܳܐ: ܒܰܪܶܟ݂ܡܳܪܝ܆ ܥܰܡ ܫܶܠܝܳܐ ܘܕܶܚܠܬ݂ܳܐ ܘܢܰܟ݂ܦܽܘܬ݂ܳܐ ܢܨܘܬ݂ ܘܢܶܫܡܰܥ ܠܰܣܒܰܪܬ݂ܐ ܕܡ̈ܠܶܐ ܚܰܝܳ̈ܬ݂ܐ ܕܶܐܘܰܢܓܶܠܝܘܢ ܩܰܕܝܫܐ ܕܡܳܪܰܢ ܝܶܫܘܥ ܡܫܝܚܐ ܕܡܶܬ݂ܩܪܶܐ ܥܠܰܝܢ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ. ܘܥܰܡ ܪܽܘܚܳܐ ܕܺܝܠܳܟ݂܀

ܪܺܝܫܟܳܗ̈ܢܶܐ: ܐܶܘܰܢܓܶܠܝܽܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܟܳܪܽܘܙܽܘܬ݂ܳܐ ܡܰܚܝܳܢܺܝܬ݂ܳܐ ܕܡܰܬܰܝ ܫܠܺܝܚܳܐ ܕܡܰܟ݂ܪܶܙ ܚܰܝ̈ܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ݂ ܕܶܐܬ݂ܳܐ ܘܰܥܬܺܝܕ ܕܢܺܐܬ݂ܶܐ ܬܶܫܶܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ ܘܥܰܠ ܟܽܠܰܢ ܪ̈ܰܚܡܰܘܗ̱ܝ̱ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܒܙܰܒܢܳܐ ܗܳܟ݂ܺܝܠ ܕܰܡܕܰܒܪܳܢܽܘܬܶܗ ܕܡܳܪܰܢ ܘܰܐܠܳܗܰܢ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܡܶܠܬ݂ܳܐ ܕܚܰܝ̈ܐ ܐܰܠܳܗܳܐ ܕܶܐܬ݂ܒܰܣܰܪ ܡܶܢ ܒܬ݂ܽܘܠܬܳܐ ܩܰܕܺܝܫܬܳܐ ܡܰܪܝܰܡ ܗܳܠܶܝܢ ܕܶܝܢ ܗܳܟ݂ܰܢܐ ܗܘܰ̈ܝ܀

ܐܶܘܰܢܓܶܠܺܝܽܘܢ ܡܶܢ ܠܽܘܩܳܐ ܫܠܺܝܚܳܐ

ܗ: ܐ - ܝܐ ܇ ܝ: ܝܙ ـ ܟܕ

ܗܘܳܐ ܕܶܝܢ ܟܰܕ ܟܢܰܫ ܥܠܰܘܗ̱ܝ ܟܶܢܫܳܐ ܠܡܶܫܡܰܥ ܡܶܠܬܳܐ ܕܰܐܠܳܗܳܐ ܘܗܽܘ ܩܳܐܶܡ ܗ̱ܘܳܐ ܥܰܠ ܝܰܕ ܝܰܡܬܳܐ ܕܓܶܢܶܣܰܪ. ܚܙܳܐ ܣܦܺܝ̈ܢܶܐ ܬܰܪܬܶܝܢ ܕܩܳܝ̈ܡܳܢ ܥܰܠ ܓܶܢ̱ܒ ܝܰܡܬܳܐ ܘܨܰܝܳܕ̈ܶܐ ܕܰܣܠܶܩܘ ܡܶܢܗܶܝܢ ܘܰܡܫܺܝܓܺܝܢ ܡܨܺܝ̈ܕܳܬܗܽܘܢ. ܘܰܚܕܳܐ ܡܶܢܗܶܝܢ ܕܫܶܡܥܽܘܢ ܗ̱ܘܳܬ ܟܺܐܦܳܐ. ܘܰܣܠܶܩ ܝܶܫܽܘܥ ܝܺܬܶܒ ܒܳܗ ܘܶܐܡܰܪ: ܕܢܶܕܒܪܽܘܢܳܗ ܩܰܠܺܝܠ ܡܶܢ ܝܰܒܫܳܐ ܠܡܰܝ̈ܳܐ ܘܝܳܬܶܒ ܗ̱ܘܳܐ ܘܡܰܠܶܦ ܡܶܢ ܣܦܺܝܢ̱ܬܳܐ ܠܟܶܢܫܳܐ. ܘܟܰܕ ܫܬܶܩ ܡܶܢ ܡܰܡܠ̱ܠܶܗ ܐܶܡܰܪ ܠܫܶܡܥܽܘܢ: ܕܒܰܪܘ ܠܥܽܘܡܩܳܐ ܘܰܐܪܡܰܘ ܡܨܺܝܕܬܟܽܘܢ ܠܨܰܝܕܳܐ. ܥܢܳܐ ܫܶܡܥܽܘܢ ܘܶܐܡܰܪ ܠܶܗ: ܪܰܒܺܝ܆ ܠܺܠܝܳܐ ܟܽܠܶܗ ܠܐܺܝܢ ܘܡܶܕܶܡ ܠܳܐ ܐܶܚܰܕܢ܆ ܥܰܠ ܡܶܠܬܳܟ ܕܶܝܢ ܪܳܡܶܐ ܐ̱ܢܳܐ ܡܨܺܝܕܬܳܐ. ܘܟܰܕ ܗܳܕܶܐ ܥܒܰܕܘ܆ ܚܒܰܫܘ ܢܽܘ̈ܢܶܐ ܣܰܓܺܝ̈ܐܶܐ ܕܛܳܒ܆ ܘܡܶܨܛܰܪܝܳܐ ܗ̱ܘܳܬ ܡܨܺܝܕܬܗܽܘܢ. ܘܰܪܡܰܙܘ ܠܚܰܒܪ̈ܰܝܗܽܘܢ ܕܒܰܣܦܺܝܢ̱ܬܳܐ ܐ̱ܚܪܺܬܳܐ ܕܢܺܐܬܽܘܢ ܢܥܰܕܪܽܘܢ ܐܶܢܽܘܢ. ܘܟܰܕ ܐܶܬܰܘ܆ ܡܠܰܘ ܐܶܢܶܝܢ ܣܦܺܝ̈ܢܶܐ ܬܰܪ̈ܬܰܝܗܶܝܢ ܐܰܝܟ ܕܩܰܪ̈ܺܝܒܳܢ ܗ̱ܘܰܝ̈ ܠܡܶܛܒܰܥ. ܟܰܕ ܚܙܳܐ ܕܶܝܢ ܫܶܡܥܽܘܢ ܟܺܐܦܳܐ܆ ܢܦܰܠ ܩܕܳܡ ܪ̈ܶܓܠܰܘܗ̱ܝ ܕܝܶܫܽܘܥ ܘܶܐܡܰܪ ܠܶܗ: ܒܳܥܶܐ ܐ̱ܢܳܐ ܡܶܢܳܟ ܡܳܪܝ܆ ܦܪܽܘܩ ܠܳܟ ܡܶܢܝ ܕܓܰܒܪܳܐ ܐ̱ܢܳܐ ܚܰܛܳܝܳܐ. ܬܶܡܗܳܐ ܓܶܝܪ ܐܰܚܕܶܗ ܗ̱ܘܳܐ ܘܰܠܟܽܠܗܽܘܢ ܕܥܰܡܶܗ ܥܰܠ ܨܰܝܕܳܐ ܗܰܘ ܕܢܽܘ̈ܢܶܐ ܕܨܳܕܘ. ܗܳܟܘܳܬ ܕܶܝܢ ܐܳܦ ܠܝܰܥܩܽܘܒ ܘܰܠܝܽܘܚܰܢܢ ܒܢܰܝ̈ ܙܰܒܕܰܝ ܕܺܐܝܬܰܝܗܽܘܢ ܗ̱ܘܰܘ ܫܰܘ̈ܬܳܦܶܐ ܕܫܶܡܥܽܘܢ. ܐܶܡܰܪ ܕܶܝܢ ܝܶܫܽܘܥ ܠܫܶܡܥܽܘܢ: ܠܳܐ ܬܶܕܚܰܠ. ܡܶܢ ܗܳܫܳܐ܆ ܒܢܰܝ̈ ܐ̱ܢܳܫܳܐ ܬܶܗܘܶܐ ܨܳܐܶܕ ܠܚܰܝ̈ܶܐ. ܘܩܰܪܶܒܘ ܐܶܢܶܝܢ ܣܦܺܝ̈ܢܶܐ ܠܰܐܪܥܳܐ ܘܰܫܒܰܩܘ ܟܽܠ ܡܶܕܶܡ ܘܶܐܬܰܘ ܒܳܬܪܶܗ܀ ܘܰܗܦܰܟܘ ܗܳܢܽܘܢ ܫܰܒܥܺܝܢ ܕܫܰܕܰܪ ܒܚܰܕܽܘܬܳܐ ܪܰܒܬܳܐ ܘܳܐܡܪܺܝܢ ܠܶܗ: ܡܳܪܰܢ ܐܳܦ ܫܺܐܕ̈ܶܐ ܡܶܫܬܰܥܒܕܺܝܢ ܠܰܢ ܒܰܫܡܳܟ. ܗܽܘ ܕܶܝܢ ܐܶܡܰܪ ܠܗܽܘܢ: ܚܳܙܶܐ ܗ̱ܘܺܝܬ ܠܶܗ ܠܣܳܛܳܢܳܐ ܕܰܢܦܰܠ ܐܰܝܟ ܒܰܪܩܳܐ ܡܶܢ ܫܡܰܝܳܐ. ܗܳܐ ܝܳܗܶܒ ܐ̱ܢܳܐ ܠܟܽܘܢ ܫܽܘܠܛܳܢܳܐ ܕܰܗܘܰܝܬܽܘܢ ܕܳܝܫܺܝܢ ܚܘܰܘ̈ܳܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܶܗ ܕܰܒܥܶܠܕܒܳܒܳܐ ܘܡܶܕܶܡ ܠܳܐ ܢܰܗܰܪܟܽܘܢ. ܒܪܰܡ ܒܗܳܕܶܐ ܠܳܐ ܬܶܚܕܽܘܢ ܕܫܺܐܕ̈ܶܐ ܡܶܫܬܰܥܒܕܺܝܢ ܠܟܽܘܢ܆ ܐܶܠܳܐ ܚܕܰܘ ܕܰܫܡܳܗܰܝ̈ܟܽܘܢ ܐܶܬܟܬܶܒܘ ܒܰܫܡܰܝܳܐ. ܒܳܗ ܒܫܳܥܬܳܐ ܪܘܰܙ ܝܶܫܽܘܥ ܒܪܽܘܚܳܐ ܕܩܽܘܕܫܳܐ ܘܶܐܡܰܪ: ܡܰܘܕܶܐ ܐ̱ܢܳܐ ܠܳܟ ܐܳܒܝ ܡܳܪܳܐ ܕܰܫܡܰܝܳܐ ܘܕܰܐܪܥܳܐ ܕܟܰܣܺܝܬ ܗܳܠܶܝܢ ܡܶܢ ܚܰܟܺܝ̈ܡܶܐ ܘܣܰܟܽܘܠ̈ܬܳܢܶܐ ܘܰܓܠܰܝܬ ܐܶܢܶܝܢ ܠܝܰܠܽܘ̈ܕܶܐ. ܐܺܝܢ ܐܳܒܝ܆ ܕܗܳܟܰܢܳܐ ܗܘܳܐ ܨܶܒܝܳܢܳܐ ܩܕܳܡܰܝܟ܀ ܘܶܐܬܦܢܺܝ ܠܘܳܬ ܬܰܠܡܺܝ̈ܕܰܘܗ̱ܝ ܘܶܐܡܰܪ ܠܗܽܘܢ: ܟܽܠ ܡܶܕܶܡ ܐܶܫܬܠܶܡ ܠܺܝ ܡܶܢ ܐܳܒܝ ܘܠܳܐ ܐ̱ܢܳܫ ܝܳܕܰܥ ܡܰܢܽܘ ܒܪܳܐ ܐܶܠܳܐ ܐܶܢ ܐܰܒܳܐ܆ ܘܡܰܢܽܘ ܐܰܒܳܐ ܐܶܠܳܐ ܐܶܢ ܒܪܳܐ܆ ܘܰܠܡܰܢ ܕܶܐܢ ܢܶܨܒܶܐ ܒܪܳܐ ܕܢܶܓܠܶܐ. ܘܶܐܬܦܢܺܝ ܠܘܳܬ ܬܰܠܡܺܝ̈ܕܰܘܗ̱ܝ ܒܰܠܚܽܘܕܰܝܗܽܘܢ ܘܶܐܡܰܪ: ܛܽܘܒܰܝܗܶܝܢ ܠܥܰܝ̈ܢܶܐ ܕܚܳܙ̈ܝܳܢ ܡܶܕܶܡ ܕܰܐܢ̱ܬܽܘܢ ܚܳܙܶܝܢ. ܐܳܡܰܪ ܐ̱ܢܳܐ ܠܟܽܘܢ ܓܶܝܪ ܕܰܢ̈ܒܺܝܶܐ ܣܰܓܺܝ̈ܐܶܐ ܘܡܰܠ̈ܟܶܐ ܨܒܰܘ ܕܢܶܚܙܽܘܢ ܡܶܕܶܡ ܕܚܳܙܶܝܬܽܘܢ ܘܠܳܐ ܚܙܰܘ܆ ܘܰܠܡܶܫܡܰܥ ܡܶܕܶܡ ܕܰܐܢ̱ܬܽܘܢ ܫܳܡܥܺܝܢ ܘܠܳܐ ܫܡܰܥܘ܀

ܥܶܢܝܳܢܳܐ ܕܫܰܒܰܚܘ ܠܡܳܪܝܳܐ ܒܪܶܟܢܳܐ ܕܩܰܕܺܝܫܳܐ ܕܰܐܫܪܺܝ

ܪܺܝܫܟܳܗ̈ܢܶܐ: ܫܰܒܰܚܘ ܠܡܳܪܝܳܐ ܒܩܽܘܕܫܶܗ ܫܰܒܚܽܘܗ̱ܝ ܒܰܪܩܺܝܥܳܐ ܕܥܽܘܫܢܶܗ܀

ܡܫܰܡ̈ܫܳܢܶܐ: ܩܰܕܺܝܫܳܐ ܕܰܐܫܪܺܝ ܫܟܺܝܢܬܶܗ܆ ܥܰܠ ܛܽܘܪ ܣܺܝܢܰܝ ܘܩܰܕܫܶܗ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ܆ ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܚܰܝܠܬܳܢܽܘܬܶܗ܆ ܫܰܒܚܽܘܗ̱ܝ ܒܣܽܘܓܐܳܐ ܕܪܰܒܽܘܬܶܗ܀

ܡܫܰܡ̈ܫܳܢܶܐ: ܨܠܳܐ ܪܳܡܳܐ ܥܰܠ ܛܽܘܪ ܣܺܝܢܰܝ܆ ܘܰܐܓܶܢ ܐܺܝܕܶܗ ܥܰܠ ܡܽܘܫܶܐ. ܘܡܽܘܫܶܐ ܣܳܡܳܗ ܥܰܠ ܐܰܗܪܽܘܢ܆ ܘܶܐܬܝܰܒܠܰܬ ܨܶܝܕ ܝܽܘܚܰܢܢ܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܩܳܠܳܐ ܕܩܰܪܢܳܐ. ܫܰܒܚܽܘܗ̱ܝ ܒܩܺܝܬܳܪ̈ܶܐ ܘܰܒܟܶܢܳܪ̈ܶܐ܀

ܡܫܰܡ̈ܫܳܢܶܐ: ܪܽܘܚܳܐ ܩܰܕܺܝܫܳܐ ܕܰܐܓܶܢ܆ ܥܰܠ ܫܠܺܝ̈ܚܶܐ ܒܓܰܘ ܥܶܠܺܝܬܳܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ܆ ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܰܦ̈ܠܰܓܶܐ ܘܒܰܪ̈ܒܺܝܥܶܐ܆ ܫܰܒܚܽܘܗ̱ܝ ܒܡܶܢ̈ܶܐ ܚܰܠ̈ܝܳܬܳܐ܀

ܡܫܰܡ̈ܫܳܢܶܐ: ܪܽܘܚܳܐ ܕܡܰܠܶܠ ܒܰܢ̈ܒܺܝܶܐ܆ ܘܶܐܬܳܐ ܘܰܐܓܶܢ ܥܰܠ ܫܠܺܝ̈ܚܶܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ. ܥܰܠ ܥܰܒܕܶܗ (ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫܟܳܗ̈ܢܶܐ: ܫܰܒܚܽܘܗ̱ܝ ܒܨܺܝܨܠܰܝ̈ ܫܶܡܥܳܐ܆ ܫܰܒܚܽܘܗ̱ܝ ܒܩܳܠܳܐ ܘܒܰܩܥܳܬܳܐ܆ ܟܽܠ ܢܶܫܡܳܐ ܬܫܰܒܰܚܝ ܠܡܳܪܝܳܐ܀

ܡܫܰܡ̈ܫܳܢܶܐ: ܛܳܒܳܐ ܕܰܐܓܥܶܠ ܠܰܫܠܺܝ̈ܚܰܘܗ̱ܝ܆ ܫܽܘܠܛܳܢܳܐ ܕܪܰܘܡܳܐ ܘܥܽܘܡܩܳܐ. ܐܰܫܪܳܐ ܫܟܺܝܢܬܳܟ ܒܛܰܝܒܽܘܬܳܟ܆ ܥܰܠ ܥܰܒܕܳܟ (ܥܰܒܕܰܝ̈ܟ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܫܽܘܒܚܳܐ ܠܰܐܒܐ ܩܰܕܺܝܫܳܐ܆ ܕܫܰܕܰܪ ܠܰܒܪܶܗ ܩܰܕܺܝܫܳܐ. ܘܰܒܝܰܕ ܪܽܘܚܶܗ ܩܰܕܺܝܫܳܐ܆ ܝܳܗܶܒ ܩܽܘܕ̈ܫܶܐ ܠܩܰܕܺܝ̈ܫܶܐ܀

ܪܺܝܫܟܳܗ̈ܢܶܐ: ܡܶܢܥܳܠܰܡ: ܪܽܘܚܳܐ ܩܰܕܺܝܫܳܐ ܕܩܰܕܶܫ܆ ܠܰܫܡܽܘܐܶܝܠ ܡܶܢ ܓܰܘ ܟܰܪܣܳܐ. ܗܽܘ ܢܺܐܬܶܐ ܘܢܶܫܪܶܐ ܘܢܰܓܶܢ. ܥܰܠ ܥܰܒܕܶܗ(ܥܰܒܕܰܘܗ̱̈ܝ) ܘܢܶܬܩܰܕܰܫ (ܘܢܶܬܩܰܕܫܽܘܢ)܀

ܪܺܝܫ ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܽܘܣ܀

ܥܰܡܳܐ: ܩܽܘܪܝܶܠܶܝܣܽܘܢ܀

ܘܟܶܢ ܪܺܝܫ ܡܫܰܡ̈ܫܳܢܶܐ ܡܰܥܶܠ ܠܰܡܙܰܡܪ̈ܳܢܶܐ ܠܡܰܕܒܚܳܐ ܩܰܕܺܝܫܳܐ܆ ܘܰܡܩܰܪܶܒ ܠܗܽܘܢ ܩܕܳܡ ܪܺܝܫ ܟܳܗ̈ܢܶܐ. ܘܪܺܝܫ ܟܳܗ̈ܢܶܐ ܕܶܝܢ ܣܳܐܶܡ ܨܶܒ̈ܥܳܬܳܐ ܕܺܐܝܕܶܗ ܕܝܰܡܺܝܢܳܐ ܥܰܠ ܨܶܕ̈ܥܶܐ ܕܣܶܡܳܠܳܐ ܕܗܰܘ ܕܡܶܣܬܰܦܰܪ ܘܳܐܡܰܪ ܗܳܕܶܐ ܨܠܽܘܬܳܐ ܓܗܺܝܢܳܐܺܝܬ܀

ܡܫܰܡ̈ܫܳܢܶܐ: ܩܽܘܪܝܶܠܶܝܣܽܘܢ܀

ܒܳܬܰܪ ܗܳܠܶܝܢ ܡܰܥܠܝܢ ܠܶܗ ܠܡܰܕܒܚܳܐ

ܓܗܳܢܬܳܐ

ܐܰܠܳܗܳܐ ܗܰܘ ܕܰܒܛܰܝܒܽܘܬܳܟ ܠܳܐ ܡܶܬܡܰܫܚܳܢܺܝܬܳܐ܆ ܘܰܒܝܰܕ ܪܶܚܡܰܬ ܐ̱ܢܫܳܘܬܳܟ ܠܳܐ ܡܶܬܬܰܘܝܳܢܺܝܬܳܐ. ܝܰܗ̱ܒܬ ܫܽܘܟܳܢ̈ܐ ܘܡܰܘܗ̈ܒܳܬܳܐ ܦܪ̈ܺܝܫܳܬܳܐ. ܠܺܐܝܩܳܪܳܐ ܘܦܽܘܪܩܳܢܳܐ ܕܺܝܠܰܢ ܒܢܰܝ̈ܢܳܫܳܐ. ܩܰܒܶܠ ܠܗܳܢܳܐ ܥܰܒܕܳܟ (ܠܗܳܠܶܝܢ ܥܰܒܕܰܝ̈ܟ) ܘܒܰܪ (ܘܒܢܰܝ̈) ܕܶܐܬܦܪܶܫ ܕܢܶܗܘܶܐ ܕܰܢܕܽܘܫ (ܕܶܐܬܦܪܶܫܘ ܕܢܶܗܽܘܘܢ ܕܰܢܕܽܘܫܽܘܢ) ܐܶܣܟܦ̈ܬܶܗ ܕܡܰܕܒܚܳܟ ܩܰܕܺܝܫܳܐ. ܘܰܥܒܶܕܳܝܗ̱ܝ ܡܕܰܝܠܳܢܳܐ ܙܗܺܝܪܳܐ (ܘܰܥܒܶܕ ܐܶܢܽܘܢ ܡܕܰܝ̈ܠܳܢܶܐ) ܒܫܰܦܺܝܪܽܘܬ ܡܛܰܟܣܽܘܬܳܐ ܦܐܺܝܬܳܐ܆ ܕܗܳܠܶܝܢ ܕܶܐܬܦܣܶܣܶܝ̈ܢ ܠܶܗ ܠܰܡܫܰܡܠܳܝܽܘ. ܟܰܕ ܡܫܰܟܶܢ ܐܰܢ̱ܬ ܠܶܗ (ܠܗܽܘܢ) ܕܰܒܕܶܚܠܬܳܐ ܡܶܬܩܰܠܣܳܢܺܝܬܳܐ ܘܦܰܪܶܗܣܺܝܰܐ ܕܰܡܚܰܪܪܳܐ ܡܶܢ ܡܒܰܣܪܳܢܽܘܬܳܐ܆ ܢܩܽܘܡ (ܢܩܽܘܡܽܘܢ) ܠܓܰܘ ܡܶܢ ܣܶܦܶـ̈ܐ ܕܡܰܕܒܚܳܟ ܩܰܕܺܝܫܳܐ. ܐܰܝܟܰܢܳܐ ܕܰܒܟܽܠܡܶܕܶܡ ܘܰܒܟܽܠ ܐ̱ܢܳܫ ܢܶܫܬܰܒܰܚ ܫܡܳܟ ܗܰܘ ܠܳܐ ܡܶܬܕܰܪܟܳܢܳܐ. ܥܰܠ ܐܰܦܰܝ̈ ܟܽܠܗܶܝܢ ܛܰܝܒ̈ܘܳܬܳܟ ܕܰܠܘܳܬ ܓܶܢܣܰܢ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܬܠܳܝܬܳܐ

ܪܺܝܫܟܳܗ̈ܢܶܐ: ܡܶܛܽܠ ܕܰܐܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ ܐܺܝܬܰܝܟ܆ ܘܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܡܶܢ ܟܽܠ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܥܰܡܳܐ: ܘܥܰܡ ܪܽܘܚܳܐ ܕܺܝܠܳܟ܀

ܟܶܢ܆ ܪܺܝܫ ܟܳܗ̈ܢܶܐ ܢܳܣܶܒ ܠܡܰܣܦܳܪܳܐ ܒܺܐܝܕܶܗ܆ ܘܰܡܣܰܦܰܪ ܠܣܰܥܪܳܐ ܕܪܺܝܫܶܗ ܕܡܶܣܬܰܦܪܳܢܳܐ ܨܠܺܝܒܳܐܺܝܬ ܟܰܕ ܐܳܡܰܪ:

ܪܺܝܫܟܳܗ̈ܢܶܐ: ܡܶܣܬܰܦܰܪ (ܦܠܳܢ) ܡܶܬܪܫܶܡ ܡܙܰܡܪܳܢܳܐ ܠܥܺܕܬܳܐ ܩܰܕܺܝܫܬܳܐ ܕܰ(ܦܠܳܢܺܝܬ) ܕܰܒܕܽܘܟܬܳܐ (ܦܠܳܢܺܝܬ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܒܰܫܡܳܐ ܕܰܐܒܳܐ ♱

ܥܰܡܳܐ: ܐܰܡܺܝܢ.

ܪܺܝܫܟܳܗ̈ܢܶܐ: ܘܕܰܒܪܳܐ ♱

ܥܰܡܳܐ: ܐܰܡܺܝܢ.

ܪܺܝܫܟܳܗ̈ܢܶܐ: ܘܰܕܪܽܘܚܳܐ ܚܰܝܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀ ♱

ܥܰܡܳܐ: ܐܰܡܺܝܢ.

ܘܒܳܬܰܪ ܗܳܕܶܐ܆ ܪܺܝܫ ܟܳܗ̈ܢܶܐ ܐܳܚܶܕ ܒܺܐܝܕܶܗ ܕܝܰܡܺܝܢܳܐ܆ ܕܪܳܥܳܐ ܝܰܡܺܝܢܳܝܬܳܐ ܕܗܰܘ ܕܡܶܣܬܰܦܰܪ ܘܳܐܡܰܪ ܨܠܽܘܬܳܐ ܗܳܕܶܐ ܟܰܕ ܬܳܠܶܐ ܩܳܠܶܗ܀

ܬܠܳܝܬܳܐ

ܪܺܝܫܟܳܗ̈ܢܶܐ: ܢܶܬܶܠ ܠܳܟ (ܠܟܽܘܢ) ܡܳܪܝܳܐ ܕܰܟܝܽܘܬ ܗܰܠ̈ܟܳܬܳܐ. ܘܰܬܪܺܝܨܽܘܬܳܐ ܕܕܽܘܝ̈ܳܠܶܐ. ܘܦܰܪܶܗܣܺܝܰܐ ܕܰܒܡܰܥܰܠܬܳܐ܆ ܘܩܰܘܡܳܐ ܕܰܒܡܰܕܒܚܳܐ ܕܺܝܠܶܗ ܩܰܕܺܝܫܳܐ. ܐܰܝܟܰܢܳܐ ܕܬܶܗܘܶܐ (ܕܬܶܗܽܘܘܢ) ܕܡܽܘܬܳܐ ܫܰܦܝܪܬܳܐ. ܘܬܰܦܢܟܳܐ ܝܰܡܺܝܢܳܝܳܐ. ܠܗܳܢܽܘܢ ܕܒܳܟ (ܕܰܒܟܽܘܢ) ܡܶܬܒܰܩܶܝܢ. ܘܟܽܠܰܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܘܪܽܘܡܪܳܡܳܐ ܠܳܐ ܡܶܬܦܰܣܩܳܢܳܐ. ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܣܓܺܝܕܳܐ ܘܠܳܐ ܡܶܬܕܰܪܟܳܢܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܘܶܐܢ ܣܰܓܺܝ̈ܐܶܐ ܐܺܝܬܰܝܗܽܘܢ ܗܳܢܽܘܢ ܕܡܶܬܬܰܣܪܚܺܝܢ܆ ܥܰܠ ܚܰܕ ܚܰܕ ܡܶܢܗܽܘܢ ܡܫܰܡܠܶܐ ܪܺܝܫܟܳܗ̈ܢܶܐ ܗܳܠܶܝܢ ܕܰܐܡܺܝܪ̈ܳܢ: ܐܰܘܟܺܝܬ ܚܠܳܦ ܟܽܠ ܚܰܕ ܐܳܡܰܪ ܓܗܳܢܬܳܐ: ܐܰܠܳܗܳܐ ܗܰܘ ܕܰܒܛܰܝܒܽܘܬܳܟ ܘܫܪ̄. ܘܰܡܣܰܦܰܪ ܣܰܥܪܶܗ ܟܰܕ ܐܳܡܰܪ: ܡܶܣܬܰܦܰܪ ܘܫܪ̄. ܟܶܢ ܐܳܚܶܕ ܒܝܰܡܺܝܢܶܗ ܘܳܐܡܰܪ: ܢܶܬܶܠ ܠܳܟ ܡܳܪܝܳܐ ܘܫܪ̄܀
ܪܺܝܫ ܟܳܗ̈ܢܶܐ ܢܳܣܶܒ ܠܟܽܘܬܺܝܢܳܐ ܒܺܐܝܕܰܘܗ̱̈ܝ ܘܰܡܒܰܪܶܟ ܥܠܶܝܗ ܕܰܕܠܳܐ ܡܪܰܚܦܳܢܽܘܬܳܐ ܘܝܳܗܶܒ ܠܶܗ ܠܪܺܝܫ ܡܫܰܡ̈ܫܳܢܶܐ ܕܢܰܥܛܦܺܝܘܗ̱ܝ ܠܰܡܙܰܡܪܳܢܳܐ.
ܘܳܐܦ ܪܺܝܫܟܳܗ̈ܢܶܐ ܝܳܗܶܒ ܠܶܗ ܟܬܳܒܳܐ ܕܡܰܙܡܽܘܪ̈ܶܐ ܕܢܶܛܥܢܺܝܘܗ̱ܝ ܥܰܠ ܕܪ̈ܳܥܰܘܗ̱ܝ. ܘܒܳܬܰܪܟܶܢ ܝܳܗܶܒ ܡܶܬܬܰܣܪܚܳܢܳܐ ܫܠܳܡܳܐ ܠܦܳܬܽܘܪ ܚܰܝ̈ܶܐ ܘܢܳܫܶܩ ܠܝܰܡܺܝܢܶܗ ܕܪܺܝܫ ܟܳܗ̈ܢܶܐ. ܘܰܒܥܶܕܳܢ ܫܰܘܬܳܦܽܘܬܳܐ ܡܫܰܘܬܶܦ ܠܶܗ ܪܺܝܫ ܟܳܗ̈ܢܶܐ ܥܰܡ ܩܠܺܝܪ̈ܺܝܩܽܘ ܘܝܳܗܒܺܝܢ ܠܶܗ ܫܠܳܡܳܐ ܒܢܰܝ̈ ܬܶܫܡܶܫܬܶܗ܀
ܟܶܢ ܝܳܗܶܒ ܠܶܗ ܪܺܝܫܟܳܗ̈ܢܶܐ ܠܰܡܙܰܡܪܳܢܳܐ ܚܰܕܬܳܐ܆ ܟܬܺܝܒܬܳܐ ܕܡܶܬܬܰܣܪܚܳܢܽܘܬܶܗ܆ ܕܬܶܬܢܛܰܪܝ ܠܘܳܬܶܗ ܐܰܝܟ ܕܰܠܣܳܗܕܽܘܬܳܐ܀

ܫܠܶܡ ܛܶܟܣܳܐ ܕܰܪܫܳܡ ܡܙܰܡܪ̈ܳܢܶܐ