ܢܽܘܗܳܪܳܐ

ܡܙܰܡܪܳܢܺܝܬܳܐ ܡܶܬܪܰܫܡܳܐ ܐܰܟܡܰܢ ܕܬܶܗܘܶܐ ܬܶܙܡܰܪܝ ܒܥܺܕܬܳܐ. ܐܰܝܕܳܐ ܓܶܝܪ ܕܡܶܬܓܰܒܝܳܐ ܠܬܶܫܡܶܫܬܳܐ ܗܳܕܶܐ (ܐܶܢ ܚܕܳܐ ܬܶܗܘܶܐ ܐܰܘ ܣܰܓܺܝ̈ܐܳܬܳܐ) ܡܶܬܩܰܪܒܳܐ ܠܶܐܣܟܽܘܦܬܳܐ ܕܬܰܪܥܳܐ ܕܡܰܕܒܚܳܐ܆ ܘܩܳܝܡܳܐ ܟܰܕ ܟܣܶܐ ܪܺܝܫܳܗ ܘܡܰܪܟܰܢ܆ ܘܪܺܝܫܟܳܗ̈ܢܶܐ ܡܨܰܠܶܐ ܨܠܽܘܬܳܐ ܗܳܕܶܐ:

ܨܠܽܘܬܳܐ ܕܫܽܘܪܳܝܳܐ

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܪܺܝܫܟܳܗ̈ܢܶܐ: ܫܰܪܰܪ ܡܳܪܝ ܠܥܺܕܬܳܟ ܩܰܕܺܝܫܬܳܐ܆ ܥܰܠ ܫܽܘܥܳܐ ܠܳܐ ܡܶܙܕܰܥܙܥܳܢܳܐ ܕܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ. ܕܒܳܟ ܬܶܬܚܰܝܰܠܝ ܘܡܶܢܳܟ ܬܩܰܒܶܠܝ ܥܽܘܕܪ̈ܳܢܶܐ ܡܫܰܡ̈ܠܰܝܳܐ܆ ܘܫܽܘܟܳܢ̈ܐ ܐܰܠܳܗܳܝ̈ܐ܆ ܕܰܒܗܽܘܢ ܢܶܬܢܰܗܪܽܘܢ ܝܰܠܕܶܝ̈ܗ ܠܰܡܫܰܡܳܫܽܘ ܒܗܰܝܟܠܳܟ ܩܰܕܺܝܫܳܐ ܕܰܟܝܳܐܺܝܬ ܘܩܰܕܺܝܫܳܐܺܝܬ܆ ܘܰܢܫܰܒܚܽܘܢܳܟ ܥܰܡ ܬܶܓ̈ܡܶܐ ܠܳܐ ܗܽܘܠܳܢܳܝ̈ܐ ܕܰܠܥܶܠ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܩܳܠܳܐ: ܬܡܺܝܢܳܝܳܐ ܩܽܘܩܰܠܺܝܽܘܢ

ܒܡܳܢܳܐ ܡܕܰܟܶܐ ܛܰܠܝܳܐ ܐܽܘܪܚܶܗ ܕܢܶܛܰܪ ܦܽܘܩܕܳܢܰܝ̈ܟ ܗܰܠܶܠܽܘܝܰܗ ܒܟܽܠܶܗ ܠܶܒܝ ܥܰܩܶܒܬܳܟ ܠܳܐ ܬܶܛܥܶܝܢܝ ܡܶܢ ܦܽܘܩܕܳܢܰܝ̈ܟ܀

ܒܠܶܒܝ ܛܰܫܺܝܬ ܡܶܠܰܝ̈ܟ ܕܠܳܐ ܐܶܚܛܶܐ ܠܳܟ ܗܰܠܶܠܽܘܝܰܗ ܒܪܺܝܟ ܐܰܢ̱ܬ ܡܳܪܝܳܐ ܐܰܠܶܦܰܝܢܝ ܦܽܘܩܕܳܢܰܝ̈ܟ܀

ܠܽܐܘܪܚܳܐ ܕܣܳܗܕܽܘܬܳܟ ܪܶܚܡܶܬ ܛܳܒ ܡܶܢ ܟܽܠܶܗ ܥܽܘܬܪܳܐ ܗܰܠܶܠܽܘܝܰܗ ܒܦܽܘܩܕܳܢܰܝ̈ܟ ܪܢܺܝܬ ܘܝܶܕܥܶܬ ܐܽܘܪ̈ܚܳܬܳܟ܀

ܒܢܳܡܘܣܳܟ ܪܢܺܝܬ ܕܠܳܐ ܐܶܛܥܶܐ ܡܶܠܰܝ̈ܟ ܗܰܠܶܠܽܘܝܰܗ ܥܢܺܝ ܠܥܰܒܕܳܟ ܕܺܐܚܶܐ ܘܶܐܛܰܪ ܡܶܠܰܝ̈ܟ܀

ܓܠܺܝ ܥܰܝܢܰܝ̈ ܕܶܐܚܙܶܐ ܬܶܕܡܪ̈ܳܬܳܐ ܕܰܒܢܳܡܽܘܣܳܟ ܗܰܠܶܠܽܘܝܰܗ ܥܳܡܽܘܪܳܐ ܐ̱ܢܳܐ ܥܰܡܳܟ ܠܳܐ ܬܛܰܫܶܐ ܡܶܢܝ ܦܽܘܩܕܳܢܰܝ̈ܟ܀

ܨܒܳܬ ܢܰܦܫܝ ܘܶܐܬܪܰܓܪܓܰܬ ܠܕܺܝܢܰܝ̈ܟ ܒܟܽܠܙܒܰܢ ܗܰܠܶܠܽܘܝܰܗ ܟܐܰܝܬ ܒܥܰܡ̈ܡܶܐ ܘܠܺܝܛܺܝܢ ܐܶܢܽܘܢ ܐܰܝܠܶܝܢ ܕܛܳܥܶܝܢ ܡܶܢ ܦܽܘܩܕ̈ܳܢܰܝܟ܀

ܥܶܩܒܳܐ: ܫܽܘܒܚܳܐ

ܒܰܪܟܽܘܗ̱ܝ ܛܠܳܝ̈ܶܐ ܫܦܰܝ̈ܳܐ ܫܰܘܝ̈ܰܝ ܒܡܶܢܝܳܢ ܬܠܺܝܬܳܝܽܘܬܳܐ ܒܳܪܝܰܬ ܥܳܠ̈ܡܶܐ ܠܰܐܠܳܗܳܐ ܐܰܒܳܐ. ܐܰܘܕܰܘ ܠܡܶܠܬܳܐ ܕܙܳܚ ܘܰܢܚܶܬ ܠܦܽܘܪܩܳܢܰܢ. ܫܰܚܠܦܳܗ ܗ̱ܘܳܐ ܠܓܰܘܙܰܠܬܳܐ ܒܪܽܘܚ ܛܰܠܳܐ ܡܦܰܝܓܳܢܳܐ. ܥܰܡܡ̈ܶܐ ܟܽܠܟܽܘܢ ܒܰܪܶܟܘ ܘܰܐܘܕܰܘ ܠܰܫܡܶܗ ܕܝܳܗܽܘܒܳܐ ܕܚܰܝ̈ܶܐ ܕܟܽܠ ܢܶܫܡܳܐ. ܪܽܘܚܳܐ ܡܩܰܕܶܫ ܟܽܠܳܐ ܒܟܽܠܙܒܰܢ ܘܠܥܳܠܰܡ ܥܳܠܡܺܝܢ܀

ܡܶܢܥܳܠܰܡ

ܗܰܘ ܕܺܐܝܬܰܘܗܝ ܓܢܺܝܙܳܐ ܘܰܡܥܰܠܰܝ ܡܶܢ ܟܽܠ. ܗܰܘ ܕܰܡܫܰܡܫܺܝܢ ܠܶܗ ܕܠܳܐ ܫܶܠܝܳܐ ܦܳܠܰܚ̈ܘܳܬܳܐ ܕܡܰܠܰܐܟ̈ܶܐ. ܛܠܳܝ̈ܶܐ ܒܫܰܦܺܝܪܽܘܬ ܕܶܚܠܬܳܐ ܫܰܒܚܽܘܗܝ. ܟܳܗ̈ܢܶܐ ܒܟܽܠܥܶܕܳܢ ܒܰܪܟܽܘܗܝ. ܥܰܡܡ̈ܶܐ ܐܰܘܕܰܘ ܠܶܗ ܘܒܰܪܶܟܘ ܠܰܫܡܶܗ ܠܥܳܠܰܡ ܥܳܠܡܺܝܢ܀

ܐܚܪܢܐ

ܠܰܐܠܳܗܳܐ ܕܒܰܐܬܽܘܢܳܐ ܕܢܽܘܪܳܐ܆ ܥܰܡ ܛܠܳܝ̈ܶܐ ܒܢ̈ܰܝ ܥܶܒܪ̈ܳܝܶܐ ܐܰܟܚܕܳܐ ܢܚܶܬ ܗ̱ܘܳܐ ܘܩܳܡ܆ ܘܰܠܫܰܠܗܶܒܺܝܬܳܐ ܕܝܳܩܕܳܐ ܠܛܰܠܳܐ ܗܰܢܺܝܐܳܐ ܫܰܚܠܶܦ܆ ܕܠܶܗ ܫܰܒܰܚܘ ܥܰܒܕ̈ܰܘܗ̱ܝ ܘܟܽܠܗܶܝܢ ܒܶܪ̈ܝܳܬܶܗ܆ ܕܝܰܬܺܝܪ ܢܪܰܡܪܶܡ ܘܢܰܘܕܶܐ ܠܰܫܡܶܗ ܩܰܕܺܝܫܳܐ ܠܥܳ݀ܠܡܺܝܢ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܨܠܽܘܬܳܐ

ܡܳܪܰܢ ܘܰܐܠܳܗܰܢ ܝܶܫܽܘܥ ܡܫܺܝܚܳܐ܆ ܫܰܟܶܢ ܠܥܰܒܕܰܝ̈ܟ ܗܳܠܶܝܢ ܠܰܡܩܰܒܳܠܽܘ ܥܽܘܬܪܳܐ ܕܡܰܘܗ̈ܒܳܬܳܟ ܐܰܠܳܗܳܝܳ̈ܬܳܐ܆ ܐܰܝܟܰܢܳܐ ܕܰܒܕܰܟܝܽܘܬܳܐ ܘܩܰܕܺܝܫܽܘܬܳܐ ܢܰܣܩܽܘܢ ܠܳܟ ܩܽܘܒܳܠܛܰܝܒܽܘܬܳܐ ܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܗܽܘܢ. ܘܰܐܫܘܳܐ ܠܰܢ ܘܰܠܗܽܘܢ ܠܡܶܦܰܩ ܠܽܐܘܪܥܳܟ ܒܡܶܐܬܺܝܬܳܟ ܬܪܰܝܳܢܺܝܬܳܐ܆ ܘܰܢܫܰܡܫܳܟ ܥܰܡܗܽܘܢ ܕܬܶܓ̈ܡܶܐ ܡܰܠܰܐܟܳܝ̈ܐ ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ ܠܥܳܠܰܡ ܥܳܠܡܺܝܢ܀

ܥܶܢܝܳܢܳܐ ܕܪܰܚܶܡܥܠܰܝ: ܒܪܶܟܢܳܐ ܕܚܽܘܣܳܝܳܐ ܗܘܺܝ ܠܺܝ

ܪܺܝܫܟܳܗ̈ܢܶܐ: ܪܰܚܶܡܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬܳܟ܀

ܡܫܰܡ̈ܫܳܢܶܐ: ܚܽܘܣܳܝܳܐ ܗܘܺܝ ܠܺܝ܆ ܐܰܢ̱ܬ ܠܚܽܘܕܰܝܟ ܣܰܓܺܝ ܪ̈ܰܚܡܶܐ ܐܰܠܳܗܳܐ. ܘܩܰܒܶܠܰܝܢܝ ܐܰܝܟ ܕܰܠܗܰܘ ܒܪܳܐ ܐܳܣܽܘܛܳܐ ܘܪܰܚܶܡܥܠܰܝ܀

ܪܺܝܫܟܳܗ̈ܢܶܐ: ܐܰܣܓܳܐ ܐܰܫܺܝܓܰܝܢܝ ܡܶܢ ܥܰܘܠܝ܀

ܡܫܰܡ̈ܫܳܢܶܐ: ܐܰܒܳܐ ܩܰܕܺܝܫܳܐ܆ ܘܝܳܗܽܘܒܳܐ ܕܩܰܕܺܝܫܽܘܬܳܐ ܐܰܠܳܗܳܐ. ܩܰܕܶܫ ܒܛܰܝܒܽܘܬܳܟ܆ ܠܰܐܡܬܳܟ ܕܰܡܣܰܟܝܳܐ (ܠܰܐܡ̈ܗܳܬܳܟ ܕܰܡܣܰܟ̈ܝܳܢ) ܠܡܰܘܗܰܒܬܳܟ ܕܒܳܗ ܬܶܬܩܰܕܰܫܝ (ܢܶܬܩܰܕ̈ܫܳܢ)܀

ܪܺܝܫܟܳܗ̈ܢܶܐ: ܠܳܟ ܒܰܠܚܽܘܕܰܝܟ ܚܛܺܝܬ܀

ܡܫܰܡ̈ܫܳܢܶܐ: ܒܪܳܐ ܕܰܒܡܰܘܗܰܒܬܶܗ܆ ܠܰܫܠܺܝ̈ܚܶܐ ܕܺܝܠܶܗ ܚܰܟܶܡ ܐܰܠܳܗܳܐ. ܚܰܟܶܡ ܒܡܰܘܗܰܒܬܳܟ܆ ܠܰܐܡܬܳܟ ܕܰܡܣܰܟܝܳܐ (ܠܰܐܡ̈ܗܳܬܳܟ ܕܰܡܣܰܟ̈ܝܳܢ) ܠܪܽܘܚܳܟ ܕܒܳܗ ܬܶܬܚܰܟܰܡܝ (ܢܶܬܚܰܟ̈ܡܳܢ)܀

ܪܺܝܫܟܳܗ̈ܢܶܐ: ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ܀

ܡܫܰܡ̈ܫܳܢܶܐ: ܪܽܘܚܳܐ ܕܠܰܫܠܺܝ̈ܚܶܐ܆ ܒܠܶܫܳܢ̈ܐ ܕܢܽܘܪܳܐ ܚܰܟܶܡ ܐܰܠܳܗܳܐ. ܩܰܕܶܫ ܒܡܰܘܗܰܒܬܳܟ܆ ܠܰܐܡܬܳܟ ܕܰܡܣܰܟܝܳܐ (ܠܰܐܡ̈ܗܳܬܳܟ ܕܰܡܣܰܟ̈ܝܳܢ) ܠܪܽܘܚܳܟ ܕܒܳܗ ܬܶܬܩܰܕܰܫܝ (ܢܶܬܩܰܕ̈ܫܳܢ)܀

ܪܺܝܫܟܳܗ̈ܢܶܐ: ܐܰܣܒܰܥܰܝܢܝ ܒܽܘܣܳܡܳܟ ܘܚܰܕܽܘܬܳܟ܀

ܡܫܰܡ̈ܫܳܢܶܐ: ܠܬܰܪ̈ܥܶܐ ܕܰܫܡܰܝ̈ܳܐ܆ ܬܶܦܬܰܚܝ ܛܰܝܒܽܘܬܳܟ ܩܕܳܡܰܝܢ ܐܰܠܳܗܳܐ. ܘܰܐܓܶܢ ܝܰܡܺܝܢܳܟ܆ ܥܰܠ ܐܰܡܬܳܟ ܕܰܡܣܰܟܝܳܐ (ܠܰܐܡ̈ܗܳܬܳܟ ܕܰܡܣܰܟ̈ܝܳܢ) ܠܳܗ ܕܒܳܗ ܬܶܬܒܰܪܰܟܝ (ܢܶܬܒܰܪ̈ܟܳܢ)܀

ܪܺܝܫܟܳܗ̈ܢܶܐ: ܠܶܒܳܐ ܕܰܟܝܳܐ ܒܪܺܝ ܒܺܝ ܐܰܠܳܗܳܐ܀

ܡܫܰܡ̈ܫܳܢܶܐ: ܒܶܐܣܛܠܳܟ ܢܶܨܛܰܒܰܬ܆ ܨܰܘܪܳܐ ܕܰܩܕܳܡܰܝܟ ܪܟܺܝܢܽ ܗ̱ܘ ܐܰܠܳܗܳܐ. ܘܚܳܐܰܪ ܠܡܰܘܗܰܒܬܳܟ܆ ܕܒܳܗ ܢܶܨܛܰܒܰܬ ܒܨܶܒ̈ܬܶܐ ܕܪܽܘܚܳܐ ܩܰܕܺܝܫܳܐ܀

ܪܺܝܫܟܳܗ̈ܢܶܐ: ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܘܪܩܳܢܳܟ܀

ܡܫܰܡ̈ܫܳܢܶܐ: ܟܶܢ̈ܫܶܐ ܫܡܰܝܳܢ̈ܶܐ܆ ܡܶܬܦܰܨܚܺܝܢ ܒܫܽܘܡܠܳܝ ܐܰܡܬܳܟ (ܐܰܡ̈ܗܳܬܳܟ) ܐܰܠܳܗܳܐ. ܘܙܳܡܪܺܝܢ ܬܰܚ̈ܬܳܝܶܐ܆ ܬܶܫܒܽܘܚܬܳܐ ܠܰܕܚܰܠܛܳܗ (ܠܕܰܚܠܰܛ ܐܶܢܶܝܢ) ܒܶܝܬ ܟܶܢܫܰܝ̈ܗܽܘܢ܀

ܪܺܝܫܟܳܗ̈ܢܶܐ: ܦܰܨܳܢܝ ܡܶܢ ܕܡܳܐ ܐܰܠܳܗܝ ܐܰܠܳܗܳܐ ܕܦܽܘܪܩܳܢܝ܀

ܡܫܰܡ̈ܫܳܢܶܐ: ܬܳܡܗܺܝܢ ܢܽܘܪ̈ܳܢܶܐ܆ ܟܰܕ ܨܳܪܶܐ ܠܪܰܘܡܳܐ ܪܽܘܚܳܐ ܩܰܕܺܝܫܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܒܺܐܝܕܰܝ̈ ܪܺܝܫܟܳܗ̈ܢܶܐ ܠܰܕܫܳܐܠܺܝܢ ܠܳܗ܀

ܪܺܝܫܟܳܗ̈ܢܶܐ: ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ ܘܳܐܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬܪܰܥܺܝܬ܀

ܡܫܰܡ̈ܫܳܢܶܐ: ܠܳܐ ܡܶܣܬܰܝܟܳܢܳܐ܆ ܒܺܐܝܕܰܝ̈ܳܐ ܕܕܰܟܝ̈ܳܢ ܡܶܬܬܚܶܕ ܪܽܘܚܳܐ ܐܰܠܳܗܳܐ. ܘܢܳܚܶܬ ܕܰܢܫܰܟܶܢ܆ ܡܰܘܗܰܒܬܳܐ ܠܪܺܝܫܳܐ ܕܟܳܗ̈ܢܶܐ ܒܰܕܡܽܘܬ ܐܰܗܪܽܘܢ܀

ܪܺܝܫܟܳܗ̈ܢܶܐ: ܐܰܛܐܶܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܝܗ ܕܽܐܘܪܺܫܠܶܡ܀

ܡܫܰܡ̈ܫܳܢܶܐ: ܡܕܰܟܝܳܢܳܐ ܕܚܰܘ̈ܒܶܐ܆ ܒܝܰܕ ܡܰܓܢܳܢܽܘܬܶܗ ܕܪܽܘܚܳܐ ܐܰܠܳܗܳܐ܆ ܕܰܟܳܐ ܒܪܽܘܚܳܦܳܟ܆ ܐܡܬܳܟ ܕܰܡܣܰܟܝܳܐ (ܠܰܐܡ̈ܗܳܬܳܟ ܕܰܡܣܰܟ̈ܝܳܢ) ܠܫܽܘܡܠܳܝܳܟ܆ ܕܒܶܗ ܬܶܬܕܰܟܶܐ (ܢܶܬܕܰܟ̈ܝܳܢ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܫܽܘܒ̈ܚܶܐ ܬܠܺܝ̈ܬܳܝܶܐ܆ ܠܗܰܘ ܚܰܕ ܕܰܬܠܳܬܰܐ ܗ̱ܘ ܘܚܰܕܽ ܗ̱ܘ ܐܰܠܳܗܳܐ܆ ܐܰܒܳܐ ܘܰܒܪܳܐ ܘܪܽܘܚܩܽܘܕܫܳܐ܆ ܚܰܕ ܐܰܠܳܗܳܐ ܫܰܪܺܝܪܳܐ ܕܠܶܗ ܣܳܓܕܺܝܢܰܢ܀

ܚܽܘܣܳܝܳܐ

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܽܘܣ ܩܽܘܪܝܶܐܠܶܝܣܽܘܢ܀

ܪܺܝܫܟܳܗ̈ܢܶܐ: ܢܨܰܠܶܐ ܟܽܠܰܢ܆ ܘܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀ ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܺܝܽܘܢ

ܬܶܫܒܽܘܚܬܳܐ ܠܗܰܘ ܡܪܰܚܡܳܢܳܐ ܘܣܰܓܺܝ ܛܰܝܒܽܘܬܳܐ܆ ܕܰܠܓܶܢܣܳܐ ܐ̱ܢܳܫܳܝܳܐ ܡܶܢ ܗܳܝ ܕܠܳܐ ܐܺܝܬܰܘܗ̱ܝ ܗ̱ܘܳܐ܆ ܠܘܳܬ ܗܳܝ ܕܢܶܗܘܶܐ ܐܺܝܬܰܘܗ̱ܝ܆ ܐܰܝܬܺܝ. ܟܰܕ ܒܪܳܝܗ̱ܝ ܘܨܰܒܬܶܗ. ܘܬܽܘܒ ܟܰܕ ܫܪܰܥ ܘܰܢܦܰܠ܆ ܦܪܰܩ ܘܰܐܩܺܝܡ. ܘܰܠܘܳܬ ܪܰܘܡܳܐ ܡܥܰܠܝܳܐ ܕܫܽܘܟܳܢܰܘ̈ܗ̱ܝ ܐܰܠܳܗܳܝ̈ܶܐ ܠܡܶܬܩܰܪܳܒܽܘ ܐܰܫܘܺܝ. ܠܳܟ ܡܳܪܝܳܐ ܡܠܶܐ ܪ̈ܰܚܡܶܐ ܘܰܚܢܳܢܳܐ ܡܦܺܝܣܺܝܢܰܢ ܘܡܶܬܟܰܫܦܺܝܢܰܢ ܒܥܶܕܳܢܳܐ ܗܳܢܳܐ ܥܰܡ ܥܶܛܪܳܐ ܕܒܶܣ̈ܡܶܐ. ܕܰܒܗܽܘܢ ܒܪ̈ܰܚܡܶܐ ܕܺܝܠܳܟ ܡܬܽܘܡܳܝ̈ܶܐ܆ ܬܰܫܘܶܐ ܠܰܡܩܰܒܳܠܽܘ ܘܠܰܡܩܰܪܳܒܽܘ ܠܘܳܬ ܬܶܫܡܶܫܬܶܗ ܕܗܰܝܟܠܳܟ ܕܰܟܝܳܐ ܘܩܰܕܺܝܫܳܐ. ܠܰܐܡܬܳܟ ܗܳܕܶܐ (ܠܰܐܡ̈ܗܳܬܳܟ ܗܳܠܶܝܢ) ܕܗܳܐ ܩܳܐܶܡ (ܩܳܝ̈ܡܳܢ) ܟܰܕ ܪܟܺܝܢ (ܪ̈ܟܺܝܢܳܢ) ܩܕܳܡ ܬܪܽܘܢܽܘܣ ܕܪܰܒܽܘܬܳܟ. ܘܰܡܣܰܟܝܳܐ (ܘܰܡܣܰܟܝ̈ܳܢ) ܠܡܰܘܗܰܒܬܳܐ ܫܡܰܝܳܢܺܝܬܳܐ ܕܡܶܢܳܟ. ܕܠܳܟܽ ܗ̱ܘ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܬܶܫܡܶܫܬܳܐ ܗܳܕܶܐ ܪܽܘܚܳܢܳܝܬܳܐ. ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܢܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܡܫܰܒܚܳܐ ܠܳܟ ܡܳܪܝ ܫܡܰܝܳܐ ܒܟܶܢ̈ܫܶܐ ܪ̈ܽܘܚܳܢܳܝܶܐ. ܗܳܢܽܘܢ ܕܰܒܩܘܕ̈ܳܫܶܐ ܬܠܺܝܬܳܝܰܝ̈ ܠܶܥ̈ܙܶܐ ܡܒܰܪܟܺܝܢ ܠܪܰܒܽܘܬܳܟ ܠܳܐ ܡܶܬܡܰܠܠܳܢܺܝܬܳܐ. ܘܣܳܓܕܳܐ ܠܳܟ ܐܰܪܥܳܐ ܒܰܒܢܰܝ̈ܢܳܫܳܐ ܗܳܢܽܘܢ ܕܡܶܢܶܗ ܕܥܰܦܪܳܐ ܒܦܽܘܩܕܳܢܳܟ ܐܶܬܒܪܺܝܘ. ܘܰܠܘܳܬ ܬܶܫܡܶܫܬܳܐ ܕܺܝܠܳܟ ܕܰܟܝܳܐܺܝܬ ܘܩܰܕܺܝܫܳܐܺܝܬ ܠܡܶܬܩܰܪܳܒܽܘ ܐܰܫܘܺܝܬ. ܐܰܢ̱ܬ ܡܳܪܝ܆ ܗܰܘ ܕܟܽܠ ܒܳܨܶܐ ܘܟܽܠ ܡܨܶܐ. ܐܰܢ̱ܬ ܕܰܒܝܰܕ ܒܪܳܐ ܕܺܝܠܳܟ ܚܰܒܺܝܒܳܐ: ܡܳܪܝܳܐ ܕܶܝܢ ܕܺܝܠܰܢ ܘܰܐܠܳܗܰܢ ܘܦܳܪܽܘܩܰܢ ܝܶܫܽܘܥ ܡܫܺܝܚܳܐ܆ ܘܰܒܝܰܕ ܡܰܓܢܳܢܽܘܬܳܐ ܕܪܽܘܚܳܐ ܩܰܕܺܝܫܳܐ. ܐܰܓܥܶܠܬ ܫܽܘ̈ܟܳܢܶܐ ܗܳܠܶܝܢ ܪ̈ܽܘܚܳܢܳܝܶܐ ܕܬܶܫܡܶܫܬܳܐ ܗܳܕܶܐ ܠܰܟܝܳܢܳܐ ܬܰܚܽܘܒܳܐ ܕܺܝܠܰܢ ܒܢܰܝ̈ܢܳܫܳܐ ܥܰܦܪ̈ܳܢܶܐ. ܟܰܕ ܠܰܫܠܺܝ̈ܚܶܐ ܕܺܝܠܳܟ ܩܰܕܺܝ̈ܫܶܐ ܡܠܰܝܬ ܡܶܢ ܩܽܘܕ̈ܫܶܐ ܕܺܝܠܳܟ ܠܳܐ ܡܶܬܕܰܪ̈ܟܳܢܶܐ. ܘܒܺܐܝܕܰܝ̈ܗܽܘܢ ܩܠܺܝ̈ܕܶܐ ܪ̈ܽܘܚܳܢܳܝܶܐ ܕܟܳܗܢܽܘܬܳܐ ܡܳܪܰܬ ܓܰـ̈ܙܶܐ ܠܰܢ ܐܰܓܥܶܠܬ ܘܫܰܟܶܢܬ. ܡܰܘܕܶܝܢܰܢ ܠܪ̈ܰܚܡܰܝܟ ܘܰܡܫܰܒܚܺܝܢܰܢ ܠܛܰܝܒܽܘܬܳܟ. ܘܟܰܕ ܡܫܰܪܪܺܝܢܰܢ ܒܣܰܒܪܳܟ ܪܰܒܳܐ. ܘܰܡܚܰܙܩܺܝܢܰܢ ܒܬܽܘܟܠܳܢܳܐ ܕܰܥܠܰܝܟ. ܐܳܫܕܺܝܢܰܢ ܬܰܟܫܶܦܬܳܐ ܘܒܳܥܽܘܬܳܐ ܕܰܡܚܺܝܠܽܘܬܰܢ ܩܕܳܡ ܪܰܒܽܘܬܳܟ. ܘܰܡܦܺܝܣܺܝܢܰܢ ܠܒܰܣܺܝܡܽܘܬܳܟ. ܠܚܺܝ ܚܛܳܗܰܝ̈ܢ ܒܪ̈ܰܚܡܰܝܟ. ܘܰܐܥܒܰܪ ܣܰܟܠܘ̈ܳܬܰܢ ܒܰܚܢܳܢܳܟ. ܚܰܘܳܐ ܠܰܢ ܓܳܡܽܘܪ̈ܶܐ ܘܰܡܫܰܡܠ̈ܝܳܢܶܐ ܕܦܽܘܩܕܳܢܰܝ̈ܟ. ܘܰܡ̈ܠܰܝܳܐ ܘܰܓܡܺܝܪ̈ܶܐ ܒܩܽܘܕ̈ܫܶܐ ܕܺܝܠܳܟ. ܐܰܝܟܰܢܳܐ ܕܢܶܣܦܰܩ ܠܰܡܫܰܡܳܫܽܘ ܩܕܳܡܰܝܟ܆ ܕܠܳܐ ܡܶܨܛܰܠܝܳܢܽܘܬܳܐ ܕܰܠܘܳܬ ܚܰܫ̈ܐ ܕܰܚܒܳܠܳܐ. ܘܠܰܡܫܰܟܳܢܽܘ ܠܥܰܡܳܐ ܕܺܝܠܳܟ ܡܶܢ ܫܽܘܟܳܢ̈ܐ ܕܺܝܠܳܟ ܪ̈ܳܡܶܐ ܘܰܡܥܰܠܰܝ̈ܳܐ. ܘܠܰܡܩܰܪܳܒܽܘ ܠܘܳܬ ܡܰܕܒܚܳܟ ܩܰܕܺܝܫܳܐ. ܠܰܐܝܢܳܐ (ܠܰܐܝܠܶܝܢ) ܕܺܝܕܰܥܬܳܟ ܐܰܠܳܗܳܝܬܳܐ ܡܚܰܘܝܳܐ ܘܰܡܩܰܪܒܳܐ. ܟܰܕ ܗܺܝ ܪܶܚܡܰܬ ܐ̱ܢܳܫܽܘܬܳܟ ܓܳܡܪܳܐ ܘܰܡܫܰܡܠܝܳܐ ܠܶܗ (ܠܗܽܘܢ). ܒܡܶܨܥܳܝܽܘܬܳܐ ܕܰܡܚܺܝܠܽܘܬܰܢ. ܒܗܳܝ ܕܠܰܘ ܡܶܛܽܠ ܕܫܳܘܶܝܢܰܢ ܡܶܬܩܰܪܒܺܝܢܰܢ. ܐܶܠܳܐ ܟܰܕ ܒܰܚܢܳܢܳܟ ܫܦܺܝܥ ܒܡܰܘܗ̈ܒܳܬܳܐ ܡܶܬܚܰܝܠܺܝܢܰܢ. ܥܰܠܗܳܝ ܠܰܐܡܬܳܟ ܗܳܕܶܐ (ܠܰܐܡ̈ܗܳܬܳܟ ܗܳܠܶܝܢ) ܕܰܠܬܶܫܡܶܫܬܳܐ ܕܰܡܙܰܡܪܳܢܺܝܬܳܐ ܐܶܬܩܪܺܝ (ܕܰܡܙܰܡܪ̈ܳܢܝܳܬܳܐ ܐܶܬܩܪ̈ܺܝ). ܐܰܫܘܳܐ ܠܰܡܩܰܒܳܠܽܘ ܘܠܰܡܫܰܡܠܳܝܽܘ܆ ܒܡܰܓܢܳܢܽܘܬܳܐ ܕܪܽܘܚܳܟ ܐܰܠܳܗܳܝܳܐ܆ ܘܟܰܕ ܠܦܰܓܪܳܗ (ܠܦܰܓܪ̈ܰܝܗܶܝܢ) ܐܰܠܳܗܳܝܳܐ ܘܰܠܢܰܦܫܳܗ (ܘܰܠܢܰܦ̈ܫܳܬܗܶܝܢ) ܐܰܟܚܕܳܐ ܡܕܰܟܶܐ ܐܰܢ̱ܬ ܡܶܢ ܟܽܠ ܛܽܘܠܫܳܐ ܘܟܽܘܬܡܳܐ ܕܥܰܘܠܳܐ ܘܕܰܚܛܺܝܬܳܐ܆ ܢܶܗܘܶܐ (ܢܶܗ̈ܘܝܳܢ) ܒܗܰܝܟܠܳܟ ܩܰܕܺܝܫܳܐ܆ ܐܶܡܪܳܐ ܕܟܺܝܬܳܐ (ܐܶܡܪ̈ܶܐ ܕܟܰܝ̈ܳܐ) ܕܡܶܬܬܢܺܝܚ ܒܳܗ (ܒܗܶܝܢ) ܨܶܒܝܳܢܳܟ ܛܳܒܳܐ ܘܰܡܩܰܒܠܳܐ ܘܰܒܚܰܝܠܳܟ ܐܰܠܳܗܳܝܳܐ ܢܶܬܚܰܝܰܠ (ܢܶܬܚܰܝ̈ܠܳܢ) ܘܰܠܘܳܬ ܫܽܘ̈ܟܳܢܶܐ ܕܒܺܝܕܰܥܬܳܐ ܕܺܝܠܳܟ ܐܰܠܳܗܳܝܬܳܐ ܘܪܳܡܰܬ ܡܶܢ ܟܽܠ ܡܶܫܬܰܟܢܺܝܢ܆ ܢܶܬܕܰܪܰܓ (ܢܶܬܕܰܪ̈ܓܳܢ) ܘܰܚܢܰܢ ܘܗܽܘ (ܘܗܶܢܶܝܢ) ܠܚܰܪܬܳܐ ܛܳܒܬܳܐ ܐܰܝܕܳܐ ܕܰܡܠܺܝܟܳܐ ܠܩܰܕܺܝܫܰܝ̈ܟ ܢܶܫܬܘܶܐ. ܘܢܰܣܶܩ ܫܽܘܒܚܳܐ ܘܬܰܘܕܺܝܬܳܐ܆ ܠܳܟ ܐܰܒܳܐ ܓܢܺܝܙܳܐ ܘܠܳܐ ܡܶܬܕܰܪܟܳܢܳܐ. ܘܠܰܒܪܳܟ ܣܓܺܝܕܳܐ ܘܠܳܐ ܡܶܬܥܰܩܒܳܢܳܐ܆ ܘܰܠܪܽܘܚܳܟ ܩܰܕܺܝܫܳܐ ܘܠܳܐ ܡܶܬܒܰܨܝܳܢܳܐ. ܗܳܫܳܐ ܘܰܒܟܽܠܙܒܰܢ ܘܰܠܥܳܠܰܡ ܥܳܠܡܺܝܢ ܐܰܡܺܝܢ ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ܀

ܩܳܠܳܐ ܒܩ̄: ܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܐܰܠܳܗܳܐ ܕܡܰܠܶܠ ܥܰܡ ܡܽܘܫܶܐ܆ ܒܛܽܘܪ ܣܺܝܢܰܝ ܡܶܢ ܓܰܘ ܣܰܢܝܳܐ܆ ܘܶܐܡܰܪ ܠܶܗ ܕܬܳܐ ܥܽܘܠ ܠܓܰܘ ܡܶܨܪܶܝܢ܆ ܘܰܐܦܶܩ ܠܰܒܢܰܝ̈ ܝܺܣܪܳܐܶܝܠ܆ ܗܽܘ ܢܶܗܘܶܐ ܫܽܘܪܳܐ ܕܫܰܝܢܳܐ܆ ܘܢܳܛܘܪܳܐ ܠܥܺܕܰܬ ܩܽܘܕܫܳܐ܆ ܘܬܶܙܡܰܪܝ ܫܽܘܒܚܳܐ ܘܬܰܘܕܺܝܬܳܐ܆ ܠܰܐܒܳܐ ܘܠܰܒܪܳܐ ܘܪܽܘܚܩܽܘܕܫܳܐ ܐ̱ܪܳܙܳܐ ܕܰܬܠܺܝܬܳܝܽܘܬܳܐ܀

ܫܘܒܚܐ: ܐܶܠܺܝܫܒܰܥ ܐܶܡܶܗ ܕܝܽܘܚܰܢܢ܆ ܘܡܰܪܝܰܡ ܐܶܡܶܗ ܕܰܡܫܺܝܚܳܐ܆ ܒܺܐܪ̈ܳܬܳܐ ܕܰܓܒܳܐ ܠܶܗ ܡܰܠܟܳܐ܆ ܥܰܩܪܽܘܬܳܐ ܘܰܒܬܽܘܠܽܘܬܳܐ. ܕܳܨ ܥܽܘܠܳܐ ܠܽܘܩܒܰܠ ܥܽܘܠܳܐ. ܚܰܕܬܳܐ ܠܽܘܩܒܰܠ ܥܰܬܺܝܩܳܐ܆ ܘܫܐܶܠ ܗ̱ܘܳܐ ܒܰܫܠܳܡܳܐ ܕܡܳܪܶܗ܆ ܘܶܐܡܰܪ ܠܶܗ ܕܬܳܐ ܒܰܫܠܳܡܳܐ܆ ܫܠܳܡܳܟ ܡܫܰܝܶܢ ܒܶܪ̈ܝܳܬܳܐ܀

ܡܫܰܡ̈ܫܳܢܶܐ: ܡܳܪܝܳܐ ܡܪܰܚܡܳܢܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܥܶܛܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܣܰܓܺܝ ܪ̈ܰܚܡܶܐ. ܕܳܐܦ ܗܳܫܳܐ ܒܗܽܘܢ ܒܪ̈ܰܚܡܶܐ ܕܺܝܠܳܟ ܐܰܒܳܗܳܝ̈ܶܐ. ܩܰܒܶܠ ܗܰܢܺܝܳܐܺܝܬ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܰܐܠܳܗܽܘܬܳܟ ܪܳܡܰܬ ܡܶܢ ܟܽܠ܆ ܒܡܶܬܩܰܪܒܳܢܽܘܬܳܐ ܕܰܒܢܰܝ̈ܳܐ ܪ̈ܽܘܚܳܢܳܝܶܐ ܕܰܠܬܶܫܡܶܫܬܳܐ ܗܳܕܶܐ ܙܰܡܢܰܬ ܐܶܢܽܘܢ ܪܶܚܡܰܬ ܐ̱ܢܳܫܽܘܬܳܟ. ܘܰܐܫܘܳܐ ܐܶܢܽܘܢ ܕܰܢܫܰܡܫܽܘܢ ܒܗܰܝܟܠܳܟ ܩܰܕܺܝܫܳܐ ܒܰܡܕܰܝܠܳܢܽܘܬܳܐ ܕܟܺܝܬܳܐ. ܟܰܕ ܡܫܰܒܚܺܝܢ ܘܰܡܪܰܡܪܡܺܝܢ ܠܳܟ. ܥܰܡ ܝܺܚܺܝܕܳܝܳܐ ܒܪܳܟ ܘܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܟܶܢ ܩܳܪܶܐ ܡܫܰܡܫܳܢܳܐ ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ܀

ܙܽܘܡܳܪܳܐ

ܡܫܰܡ̈ܫܳܢܶܐ: ܚܕܺܝܬ ܟܰܕ ܐܳܡܪܺܝܢ ܗ̱ܘܰܘ ܠܺܝ܆ ܠܒܰܝܬܶܗ ܕܡܳܪܝܳܐ ܐܳܙܺܠ̱ܝܢܰܢ ܗܰܠܶܠܽܘܝܰܗ܀

ܡܫܰܡܫܳܢܳܐ: ܡܶܢ ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗ̱ܘܡܳܝܶܐ ܒܰܪܶܟܡܳܪܝ܀

ܡܫܰܡ̈ܫܳܢܶܐ: ܫܽܘܒܚܳܐ ܠܡܳܪܶܗ ܕܰܫܠܺܝܚܳܐ ܨܠܽܘܬܶܗ ܥܰܡܰܢ ܐܰܡܺܝܢ܀

ܪ̈ܽܗ̱ܘܡܳܝܶܐ: ܝܘ: ܐ - ܒ܇ ܟܕ - ܟܙ

ܡܰܓܥܶܠ ܐ̱ܢܳܐ ܠܟܽܘܢ ܕܶܝܢ ܠܦܽܘܒܺܐ ܚܳܬܰܢ: ܕܺܐܝܬܶܝܗ ܡܫܰܡܫܳܢܺܝܬܳܐ ܕܥܺܕܬܳܐ ܕܩܶܢܟܪܶܐܽܘܣ. ܕܰܬܩܰܒܠܽܘܢܳܗ ܒܡܳܪܰܢ ܐܰܝܟ ܕܙܳܕܶܩ ܠܩܰܕܺܝ̈ܫܶܐ܆ ܘܰܒܟܽܠ ܨܒܽܘ ܕܒܳܥܝܳܐ ܡܶܢܟܽܘܢ܆ ܬܩܽܘܡܽܘܢ ܠܳܗ. ܡܶܛܽܠ ܕܳܐܦ ܗܺܝ܆ ܩܳܝܽܘܡܬܳܐ ܗܘܳܬ ܠܣܰܓܺܝ̈ܐܶܐ ܐܳܦ ܠܺܝ܀ ܠܰܐܠܳܗܳܐ ܕܶܝܢ ܗܰܘ ܕܡܶܫܟܰܚ ܕܰܢܫܰܪܰܪܟܽܘܢ ܒܶܐܘܰܢܓܶܠܺܝܽܘܢ ܕܺܝܠܝ ܗܰܘ ܕܶܐܬܟܪܶܙ ܥܰܠ ܝܶܫܽܘܥ ܡܫܺܝܚܳܐ ܒܓܶܠܝܳܢܳܐ ܕܐ̱ܪܳܙܳܐ ܕܡܶܢ ܙܰܒܢܰܝ̈ ܥܳܠ̈ܡܶܐ ܡܟܰܣܰܝ ܗ̱ܘܳܐ. ܐܶܬܓܠܺܝ ܕܶܝܢ ܒܙܰܒܢܳܐ ܗܳܢܳܐ ܒܝܰܕ ܟܬܳܒ̈ܶܐ ܕܰܢܒܺܝ̈ܶܐ ܘܰܒܦܽܘܩܕܳܢܶܗ ܕܰܐܠܳܗܳܐ ܕܰܠܥܳܠܰܡ ܐܶܬܺܝܕܰܥ ܠܟܽܠܗܽܘܢ ܥܰܡ̈ܡܶܐ ܠܡܰܫܡܥܳܐ ܕܗܰܝܡܳܢܽܘܬܳܐ. ܕܗܽܘܝܽܘ ܚܰܟܺܝܡܳܐ ܒܰܠܚܽܘܕܰܘܗ̱ܝ ܫܽܘܒܚܳܐ ܒܝܰܕ ܝܶܫܽܘܥ ܡܫܺܝܚܳܐ ܠܥܳܠܰܡܥܳܠܡܺܝܢ ܐܰܡܺܝܢ܀

ܗܽܘܠܳܠܳܐ ܕܶܐܘܰܢܓܶܠܝܽܘܢ

ܡܫܰܡ̈ܫܳܢܶܐ: ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ܆ ܘܡܰܠܟܬܳܐ ܡܶܢ ܝܰܡܺܝܢܳܟ ܗܰܠܶܠܽܘܝܰܗ܀

ܘܩܳܐܶܡ ܪܺܝܫܟܳܗ̈ܢܶܐ ܡܶܢ ܬܪܽܘܢܺܝܽܘܢ܆ ܘܳܐܬܶܐ ܠܰܩܕܳܡ ܦܳܬܽܘܪ ܚܰܝ̈ܐ܆ ܘܟܰܕ ܐܰܦܰܘܗ̱̈ܝ ܠܡܰܥܪܒܳܐ ܩܳܪܶܐ ܠܶܐܘܰܢܓܶܠܺܝܽܘܢ ܡܶܢ ܡܰܪܩܳܘܣ ܘܠܽܘܩܳܐ ܡܣܰܒܪ̈ܳܢܶܐ܀

ܡܫܰܡܫܳܢܳܐ: ܒܰܪܶܟ݂ܡܳܪܝ܆ ܥܰܡ ܫܶܠܝܳܐ ܘܕܶܚܠܬ݂ܳܐ ܘܢܰܟ݂ܦܽܘܬ݂ܳܐ ܢܨܘܬ݂ ܘܢܶܫܡܰܥ ܠܰܣܒܰܪܬ݂ܐ ܕܡ̈ܠܶܐ ܚܰܝܳ̈ܬ݂ܐ ܕܶܐܘܰܢܓܶܠܝܘܢ ܩܰܕܝܫܐ ܕܡܳܪܰܢ ܝܶܫܘܥ ܡܫܝܚܐ ܕܡܶܬ݂ܩܪܶܐ ܥܠܰܝܢ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ. ܘܥܰܡ ܪܽܘܚܳܐ ܕܺܝܠܳܟ݂܀

ܪܺܝܫܟܳܗ̈ܢܶܐ: ܐܶܘܰܢܓܶܠܺܝܽܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܣܒܰܪܬܳܐ ܡܰܚܝܳܢܺܝܬܳܐ ܡܶܢ ܡܰܪܩܽܘܣ ܘܠܽܘܩܳܐ ܡܣܰܒܪ̈ܳܢܶܐ ܕܰܡܣܰܒܪܺܝܢ ܚܰܝ̈ܶܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ݂ ܕܶܐܬ݂ܳܐ ܘܰܥܬܺܝܕ ܕܢܺܐܬ݂ܶܐ ܬܶܫܶܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ ܘܥܰܠ ܟܽܠܰܢ ܪ̈ܰܚܡܰܘܗ̱ܝ̱ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܒܙܰܒܢܳܐ ܗܳܟ݂ܺܝܠ ܕܰܡܕܰܒܪܳܢܽܘܬܶܗ ܕܡܳܪܰܢ ܘܰܐܠܳܗܰܢ ܘܦܳܪܽܘܩܳܐ ܕܺܝܠܰܢ ܝܶܫܽܘܥ ܡܫܺܝܚܳܐ ܡܶܠܬ݂ܳܐ ܕܚܰܝ̈ܐ ܐܰܠܳܗܳܐ ܕܶܐܬ݂ܒܰܣܰܪ ܡܶܢ ܒܬ݂ܽܘܠܬܳܐ ܩܰܕܺܝܫܬܳܐ ܡܰܪܝܰܡ ܗܳܠܶܝܢ ܕܶܝܢ ܗܳܟ݂ܰܢܐ ܗܘܰ̈ܝ܀

ܐܶܘܰܢܓܶܠܺܝܽܘܢ ܡܶܢ ܠܽܘܩܳܐ ܘܡܰܪܩܳܘܣ ܫܠܺܝ̈ܚܶܐ

ܡܰܪܩܳܘܣ: ܓ: ܠܐ - ܠܗ ܇ ܠܽܘܩܳܐ: ܝ: ܠܚ ـ ܡܒ

ܘܶܐܬܰܘ ܐܶܡܶܗ ܘܰܐܚܰܘ̈ܗ̱ܝ ܩܳܝܡܺܝܢ ܠܒܰܪ܆ ܘܫܰܕܰܪܘ ܕܢܶܩܪܽܘܢܳܝܗ̱ܝ ܠܗܽܘܢ. ܝܳܬܶܒ ܗ̱ܘܳܐ ܕܶܝܢ ܚܕܳܪܰܘܗ̱ܝ ܟܶܢܫܳܐ ܘܶܐܡܰܪܘ ܠܶܗ: ܗܳܐ ܐܶܡܳܟ ܘܰܐܚܰܝ̈ܟ ܠܒܰܪ ܒܳܥܶܝܢ ܠܳܟ. ܘܰܥܢܳܐ ܘܶܐܡܰܪ ܠܗܽܘܢ: ܡܰܢܺ ܗ̱ܝ ܐܶܡܝ ܘܡܰܢ ܐܶܢܽܘܢ ܐܰܚܰܝ̈. ܘܚܳܪ ܒܰܐܝܠܶܝܢ ܕܝܳܬܒܺܝܢ ܠܘܳܬܶܗ ܘܶܐܡܰܪ: ܗܳܐ ܐܶܡܝ ܘܗܳܐ ܐܰܚܰܝ̈. ܡܰܢ ܕܢܶܥܒܶܕ ܓܶܝܪ ܨܶܒܝܳܢܶܗ ܕܰܐܠܳܗܳܐ ܗܽܘܝܽܘ ܐܳܚܝ ܘܚܳܬܝ ܘܶܐܡܝ܀ ܘܰܗܘܳܐ ܕܟܰܕ ܗܶܢܽܘܢ ܪܳܕܶܝܢ ܒܽܐܘܪܚܳܐ܆ ܥܰܠ ܠܰܩܪܺܝܬܳܐ ܚܕܳܐ ܘܰܐܢ̱ܬܬܳܐ ܕܰܫܡܳܗ ܡܳܪܬܳܐ ܩܰܒܶܠܬܶܗ ܒܒܰܝܬܳܗ. ܘܺܐܝܬ ܗ̱ܘܳܬ ܠܳܗ ܚܳܬܳܐ ܕܰܫܡܳܗ ܡܰܪܝܰܡ܆ ܘܶܐܬܳܬ ܝܶܬܒܰܬ ܠܳܗ ܠܘܳܬ ܪ̈ܶܓܠܰܘܗ̱ܝ ܕܡܳܪܰܢ ܘܫܳܡܥܳܐ ܗ̱ܘܳܬ ܡܶܠܰܘ̈ܗ̱ܝ. ܡܳܪܬܳܐ ܕܶܝܢ ܥܰܢܝܳܐ ܗ̱ܘܳܬ ܒܬܶܫܡܶܫܬܳܐ ܣܰܓܺܝܐܬܳܐ܆ ܘܶܐܬܳܬ ܐܳܡܪܳܐ ܠܶܗ: ܡܳܪܝ܆ ܠܳܐ ܒܛܺܝܠ ܠܳܟ܆ ܕܚܳܬܝ ܫܒܰܩܬܰܢܝ ܒܰܠܚܽܘܕܰܝ ܠܰܡܫܰܡܳܫܽܘ. ܐܶܡܰܪ ܠܳܗ ܡܥܰܕܪܳܐ ܠܺܝ: ܥܢܳܐ ܕܶܝܢ ܝܶܫܽܘܥ ܘܶܐܡܰܪ ܠܳܗ: ܡܳܪܬܳܐ ܡܳܪܬܳܐ܆ ܝܳܨܦܰܬܝ ܘܰܪܗܺܝܒܰܬܝ ܥܰܠ ܣܰܓܺܝ̈ܐܳܬܳܐ. ܚܕܳܐ ܗ̱ܝ ܕܶܝܢ ܕܡܶܬܒܰܥܝܳܐ܆ ܡܰܪܝܰܡ ܕܶܝܢ ܡܢܳܬܳܐ ܛܳܒܬܳܐ ܓܒܳܬ ܠܳܗ ܗܳܝ ܕܠܳܐ ܬܶܬܢܣܶܒܝ ܡܶܢܳܗ܀

ܗܳܝܕܶܝܢ ܪܺܝܫ ܟܳܗ̈ܢܶܐ܆ ܣܳܐܶܡ ܨܶܒ̈ܥܳܬܳܐ ܕܺܐܝܕܶܗ ܕܝܰܡܺܝܢܳܐ ܥܰܠ ܨܶܕ̈ܥܶܐ ܕܣܶܡܳܠܳܐ ܕܗܳܝ ܕܡܶܣܬܰܦܪܳܐ ܘܳܐܡܰܪ ܗܳܕܶܐ ܨܠܽܘܬܳܐ ܓܗܺܝܢܳܐܺܝܬ܀

ܓܗܳܢܬܳܐ

ܐܠܳܗܳܐ ܗܰܘ ܕܰܒܛܰܝܒܽܘܬܳܟ ܠܳܐ ܡܶܬܡܰܫܚܳܢܺܝܬܳܐ܆ ܘܰܒܝܰܕ ܪܶܚܡܰܬ ܐ̱ܢܳܫܽܘܬܳܟ ܠܳܐ ܡܶܬܬܰܘܝܳܢܺܝܬܳܐ. ܝܰܗ̱ܒܬ ܫܽܘܟܳܢ̈ܐ ܘܡܰܘܗ̈ܒܳܬܳܐ ܦܪ̈ܺܝܫܳܬܳܐ. ܠܺܐܝܩܳܪܳܐ ܘܦܽܘܪܩܳܢܳܐ ܕܺܝܠܰܢ ܒܢܰܝ̈ܢܳܫܳܐ. ܩܰܒܶܠ ܠܗܳܕܶܐ ܐܰܡܬܳܟ (ܠܗܳܠܶܝܢ ܐܰܡܗ̈ܳܬܳܟ ܕܶܐܬܦܰܪ̈ܫܰܝ) ܠܰܡܙܰܡܰܪܘ ܒܥܺܕܬܳܟ ܩܰܕܺܝܫܬܳܐ. ܘܰܥܒܶܕܶܝܗ ܙܗܺܝܪܬܳܐ (ܘܰܥܒܶܕ ܐܶܢܶܝܢ ܙܗܺܝܪ̈ܳܬܳܐ) ܒܫܰܦܺܝܪܽܘܬ ܡܛܰܟܣܽܘܬܳܐ ܦܐܺܝܬܳܐ܇ ܕܗܳܠܶܝܢ ܕܶܐܬܦܣܶܣܶܝ̈ܢ ܠܳܗ (ܠܗܶܝܢ) ܠܰܡܫܰܡܠܳܝܽܘ. ܟܰܕ ܡܫܰܟܶܢ ܐܰܢ̱ܬ ܠܳܗ (ܠܗܶܝܢ) ܕܰܒܕܶܚܠܬܳܐ ܡܶܬܩܰܠܣܳܢܺܝܬܳܐ ܘܦܰܪܶܗܣܺܝܰܐ ܕܰܡܚܰܪܪܳܐ ܡܶܢ ܡܒܰܣܪܳܢܽܘܬܳܐ܆ ܬܩܽܘܡܝ (ܢܩܽܘ̈ܡܳܢ) ܒܬܶܫܡܶܫܬܳܐ ܕܰܦܪܺܝܫܳܐ ܠܳܗ (ܠܗܶܝܢ) ܐܰܝܟܰܢܳܐ ܕܰܒܟܽܠܡܶܕܶܡ ܘܰܒܟܽܠ ܐ̱ܢܳܫ ܢܶܫܬܰܒܰܚ ܫܡܳܟ ܗܰܘ ܠܳܐ ܡܶܬܕܰܪܟܳܢܳܐ. ܥܰܠ ܐܰܦܰܝ̈ ܟܽܠܗܶܝܢ ܛܰܝܒ̈ܘܳܬܳܟ ܕܰܠܘܳܬ ܓܶܢܣܰܢ. ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܬܠܳܝܬܳܐ

ܪܺܝܫܟܳܗ̈ܢܶܐ: ܡܶܛܽܠ ܕܰܐܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ ܐܺܝܬܰܝܟ܆ ܘܠܳܟ ܦܐܶܐ ܫܽܘܒܚܳܐ ܘܺܐܝܩܳܪܳܐ ܘܣܶܓܕܬܳܐ ܡܶܢ ܟܽܠ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܪܺܝܫܟܳܗ̈ܢܶܐ: ܫܠܳܡܳܐ ܠܟܽܠܟܽܘܢ܀

ܥܰܡܳܐ: ܘܥܰܡ ܪܽܘܚܳܐ ܕܺܝܠܳܟ܀

ܟܶܢ܆ ܪܺܝܫ ܟܳܗ̈ܢܶܐ ܢܳܣܶܒ ܠܡܰܣܦܳܪܳܐ ܒܺܐܝܕܶܗ܆ ܘܰܡܣܰܦܰܪ ܠܣܰܥܪܳܐ ܕܪܺܝܫܳܗ ܕܡܶܣܬܰܦܪܳܢܺܝܬܳܐ ܨܠܺܝܒܳܐܺܝܬ ܟܰܕ ܐܳܡܰܪ:

ܪܺܝܫܟܳܗ̈ܢܶܐ: ܡܶܣܬܰܦܪܳܐ (ܦܠܳܢܺܝܬ) ܘܡܶܬܪܰܫܡܳܐ ܡܙܰܡܪܳܢܺܝܬܳܐ ܠܥܺܕܬܳܐ ܩܰܕܺܝܫܬܳܐ ܕܰ(ܦܠܳܢܺܝܬ) ܕܰܒܕܽܘܟܬܳܐ (ܦܠܳܢܺܝܬ)܀

ܡܫܰܡ̈ܫܳܢܶܐ: ܒܰܪܶܟܡܳܪܝ܀

ܪܺܝܫܟܳܗ̈ܢܶܐ: ܒܰܫܡܳܐ ܕܰܐܒܳܐ ♱

ܥܰܡܳܐ: ܐܰܡܺܝܢ.

ܪܺܝܫܟܳܗ̈ܢܶܐ: ܘܕܰܒܪܳܐ ♱

ܥܰܡܳܐ: ܐܰܡܺܝܢ.

ܪܺܝܫܟܳܗ̈ܢܶܐ: ܘܰܕܪܽܘܚܳܐ ܚܰܝܳܐ ܩܰܕܺܝܫܳܐ ܠܚܰܝ̈ܶܐ ܕܰܠܥܳܠܰܡ ܥܳܠܡܺܝܢ܀ ♱

ܥܰܡܳܐ: ܐܰܡܺܝܢ.

ܘܒܳܬܰܪ ܗܳܟܰܢ܆ ܪܺܝܫܟܳܗ̈ܢܶܐ ܐܳܚܶܕ ܒܺܐܝܕܳܗ ܕܝܰܡܺܝܢܳܐ: ܕܪܳܥܳܐ ܝܰܡܺܝܢܳܝܬܳܐ ܕܗܳܝ ܕܡܶܣܬܰܦܪܳܐ ܘܳܐܡܰܪ ܨܠܽܘܬܳܐ ܗܳܕܶܐ ܟܰܕ ܬܳܠܶܐ ܩܳܠܶܗ܀

ܬܠܳܝܬܳܐ

ܪܺܝܫܟܳܗ̈ܢܶܐ: ܢܶܬܶܠ ܠܶܟܝ (ܠܟܶܝܢ) ܡܳܪܝܳܐ ܕܰܟܝܽܘܬ ܗܰܠ̈ܟܳܬܳܐ܆ ܘܰܬܪܺܝܨܽܘܬܳܐ ܕܕܽܘܝ̈ܳܠܶܐ܆ ܐܰܝܟܰܢܳܐ ܕܬܶܗܘܶܐ (ܕܬܶܗܘܶܝ̈ܢ) ܕܡܽܘܬܳܐ ܫܰܦܝܪܬܳܐ܆ ܘܬܰܦܢܟܳܐ ܝܰܡܺܝܢܳܝܳܐ ܠܗܳܢܽܘܢ ܕܒܶܟܝ (ܕܰܒܟܶܝܢ) ܡܶܬܒܰܩܶܝܢ. ܘܟܽܠܰܢ ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ ܘܪܽܘܡܪܳܡܳܐ ܠܳܐ ܡܶܬܦܰܣܩܳܢܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ ܣܓܺܝܕܳܐ ܘܠܳܐ ܡܶܬܕܰܪܟܳܢܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܘܶܐܢ ܣܰܓܺܝ̈ܐܳܬܳܐ ܐܶܢܶܝܢ ܗܳܢܶܝܢ ܕܡܶܬܬܰܣܪ̈ܚܳܢ܆ ܥܰܠ ܚܕܳܐ ܚܕܳܐ ܡܶܢܗܶܝܢ܆ ܡܫܰܡܠܶܐ ܪܺܝܫܟܳܗ̈ܢܶܐ ܗܳܠܶܝܢ ܕܰܐܡܺܝܪ̈ܳܢ. ܐܰܘܟܺܝܬ ܚܠܳܦ ܟܽܠ ܚܕܳܐ ܐܳܡܰܪ ܨܠܽܘܬܳܐ: ܐܰܠܳܗܳܐ ܗܰܘ ܕܰܒܛܰܝܒܽܘܬܳܟ ܘܫܪ̄. ܘܰܡܣܰܦܰܪ ܣܰܥܪܳܗ ܟܰܕ ܐܳܡܰܪ: ܡܶܣܬܰܦܪܳܐ ܘܫܪ̄. ܟܶܢ ܐܳܚܶܕ ܒܝܰܡܺܝܢܳܗ ܘܳܐܡܰܪ: ܢܶܬܶܠ ܠܶܟܝ ܡܳܪܝܳܐ ܘܫܪ̄.
ܪܺܝܫ ܟܳܗ̈ܢܶܐ ܢܳܣܶܒ ܠܟܽܘܬܺܝܢܳܐ ܒܺܐܝܕܰܘܗ̈ܝ ܘܰܡܒܰܪܶܟ ܥܠܶܝܗ ܕܰܕܠܳܐ ܡܪܰܚܦܳܢܽܘܬܳܐ ܘܝܳܗܶܒ ܠܳܗ ܠܪܺܝܫܰܬ ܡܫܰܡܫܳܢ̈ܝܳܬܳܐ ܕܬܰܠܒܫܺܝܗ ܠܰܡܙܰܡܪܳܢܺܝܬܳܐ ܚܕܰܬܳܐ܀
ܘܳܐܦ ܪܺܝܫܟܳܗ̈ܢܶܐ ܝܳܗܶܒ ܠܳܗ ܟܬܳܒܳܐ ܕܡܰܙܡܽܘܪ̈ܶܐ ܕܬܶܛܥܢܺܝܘܗ̱ܝ ܥܰܠ ܕܪ̈ܳܥܶܝܗ.
ܘܒܳܬܰܪܟܶܢ܆ ܢܳܫܩܳܐ ܠܝܰܡܺܝܢܶܗ ܕܪܺܝܫ ܟܳܗ̈ܢܶܐ. ܘܰܒܥܶܕܳܢ ܫܰܘܬܳܦܽܘܬܳܐ ܡܫܰܘܬܶܦ ܠܳܗ ܪܺܝܫ ܟܳܗ̈ܢܶܐ ܥܰܡ ܩܠܺܝܪ̈ܺܝܩܽܘ ܘܝܳܗܒܺܝܢ ܠܳܗ ܫܠܳܡܳܐ ܒܢܰܝ̈ ܬܶܫܡܶܫܬܳܗ܀ ܟܶܢ ܝܳܗܶܒ ܠܳܗ ܪܺܝܫܟܳܗ̈ܢܶܐ ܠܰܡܙܰܡܪܳܢܺܝܬܳܐ ܚܕܰܬܳܐ܆ ܟܬܺܝܒܬܳܐ ܕܡܶܬܬܰܣܪܚܳܢܽܘܬܳܗ ܕܬܶܬܢܛܰܪܝ ܠܘܳܬܳܗ ܐܰܝܟ ܕܰܠܣܳܗܕܽܘܬܳܐ܀

ܫܠܶܡ ܛܶܟܣܳܐ ܕܰܪܫܳܡ ܡܙܰܡܪ̈ܳܢܝܳܬܳܐ