ܡܙܡܘܪܐ: ܝܛ
Psalm 19

ܫܡܰܝ̈ܳܐ ܡܶܫܬܰܥܶܝܢ ܫܽܘܒܚܶܗ ܕܰܐܠܳܗܳܐ: ܘܰܥܒܳܕ ܐܺܝ̣ܕܰܘܗ̱ܝ ܡܚܰܘܶܐ ܪܩܺܝ̣ܥܳܐ܀

ܝܰܘܡܳܐ ܠܝܰܘܡܳܐ ܡܰܒܰܥ ܡܺܐܡܪܳܐ: ܘܠܺܠܝܳܐ ܠܠܺܠܝܳܐ ܡܚܰܘܶܐ ܡܰܕܥܳܐ܀

ܠܰܝܬ ܡܺܐܡܪܳܐ ܐܳܦܠܳܐ ܡ̈ܶܠܶܐ: ܕܠܳܐ ܡܶܫܬܡܰܥ ܩܳܠܗܽܘܢ܀

ܒܟܽܠܳܗ̇ ܐܰܪܥܳܐ ܢܶܦܩܰܬ ܣܒܰܪܬܗܽܘܢ: ܘܰܒܣܰܘ̈ܦܶܝܗ̇ ܕܬܺܒܶܝܠ ܡܶܠܰܝ̈ܗܽܘܢ܀

ܥܰܠ ܫܶܡܫܳܐ ܢܩܰܫ ܡܰܫܟܢܶܗ ܒܗܽܘܢ: ܘܗܽܘ ܐܰܝܟ ܚܰܬܢܳܐ ܕܢܳܦܶܩ ܡܶܢ ܒܶܝܬ ܓܢܽܘܢܳܐ܀

ܢܕܽܘܨ ܐܰܝܟ ܓܰܢ̱ܒܳܪܳܐ ܠܡܶܪܗܰܛ ܐܽܘܪܚܶܗ: ܡܶܢ ܣܰܘ̈ܦܰܝ ܫܡܰܝ̈ܳܐ ܡܰܦܩܶܗ܀

ܘܡܰܣܡܟܶܗ ܥܰܠ ܣܰܘ̈ܦܰܝ ܫܡܰܝ̈ܳܐ: ܘܠܰܝܬ ܕܛܳܫܶܐ ܡܶܢ ܠܰܗܓܶܗ܀

ܢܳܡܽܘܣܶܗ ܕܡܳܪܝܳܐ ܕܠܳܐ ܡܽܘܡ ܘܡܰܦܢܶܐ ܢܰܦܫܳܐ: ܣܳܗܕܽܘܬܶܗ ܕܡܳܪܝܳܐ ܡܗܰܝܡܢܳܐ ܘܰܡܚܰܟܡܳܐ ܝܰܠܽܘ̈ܕܶܐ܀

ܦܽܘ̈ܩܕܳܢܰܘܗ̱ܝ ܕܡܳܪܝܳܐ ܬܪܺܝ̣ܨܺܝܢ ܘܰܡܚܰܕܶܝܢ ܠܶܒܳܐ: ܦܽܘ̣ܩܕܳܢܶܗ ܕܡܳܪܝܳܐ ܓܒܶܐ ܘܡܰܢܗܰܪ ܥܰܝ̈ܢܶܐ܀

ܕܶܚܠܬܶܗ ܕܡܳܪܝܳܐ ܕܰܟܝܳܐ ܘܩܰܝܳܡܳܐ ܠܥܳܠܰܡ: ܕܺܝ̣ܢܰܘ̈ܗ̱ܝ ܕܡܳܪܝܳܐ ܒܩܽܘܫܬܳܐ ܘܟܺܐܢܺܝ̣ܢ ܒܟܽܠ ܡܶܕܶܡ܀

ܘܰܪܓܺܝ̣ܓܺܝ̣ܢ ܡܶܢ ܕܰܗܒܳܐ ܘܡܶܢ ܟܺܐܦ̈ܶܐ ܛܳܒ̈ܳܬܳܐ: ܘܰܚܠܶܝܢ ܡܶܢ ܕܶܒܫܳܐ ܘܡܶܢ ܟܰܟܳܪܺܝ̣ܬܳܐ܀

ܘܳܐܦ ܥܰܒܕܳܟ ܢ̣ܶܙܕܗܰܪ ܒܗܽܘܢ: ܐܶܢ ܢܶܛܰܪ ܐܶܢܽܘܢ ܢܶܬܦܪܰܥ ܣܰܓܺܝ̣܀

ܒܫܳܪ̈ܥܳܬܳܐ ܡܰܢܽܘ ܡܶܣܬܰܟܰܠ: ܘܡܶܢ ܛܰܫ̈ܝܳܬܳܐ ܙܰܟܳܢܝ̱܀

ܐܳܦ ܡܶܢ ܥܰܘܠܳܐ ܚܣܽܘܟܳܝܗ̱ܝ ܠܥܰܒܕܳܟ: ܕܠܳܐ ܢܶܫܬܰܠܛܽܘܢ ܒܺܝ̣ ܒܺܝ̣̈ܫܶܐ ܘܶܐܬܕܰܟܶܐ ܡܶܢ ܚܛܳܗ̈ܶܐ܀

ܢܶܗܘ̈ܝܳܢ ܠܨܶܒܝܳܢܳܟ ܡܶܠܰܘ̈ܗ̱ܝ ܕܦܽܘܡܝ ܘܪܶܢܝܶܗ ܕܠܶܒܝ̱ ܩܕܳܡܰܝܟ ܡܳܪܝܳܐ ܥܳܕܽܘܪܝ̱ ܘܦܳܪܽܘܩܝ̱܀