ܐ H

ܟܰܕ ܡܩܰܕܡܺܝܢܰܢ ܡܰܘܪܒܺܝܢܰܢ ܠܶܟܝ ܝܳܠܕܰܬ ܐܰܠܳܗܳܐ ܒܬܽܘܠܬܳܐ. ܘܰܠܗܰܘ ܕܡܶܢܶܟܝ ܐܶܬܺܝܠܶܕ ܒܰܒܤܰܪ ܤܳܓܕܺܝܢܰܢ ܘܰܡܫܰܒܚܺܝܢܰܢ܀

ܟܰܕ ܡܩܰܕܡܺܝܢܰܢ ܤܳܓܕܺܝܢܰܢ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ. ܡܶܛܽܠ ܕܟܰܕ ܐܶܬܒܰܤܰܪܬ ܡܶܢ ܒܬܽܘܠܬܳܐ ܠܥܳܠܡܳܐ ܡܶܢ ܤܳܟܶܗ ܐܰܢܗܰܪܬ܀

ܟܰܕ ܡܩܰܕܡܺܝܢܰܢ ܡܩܰܠܤܺܝܢܰܢ ܠܟܽܘܢ ܢܒܺܝ̈ܶܐ ܘܰܫܠܺܝ̈ܚܶܐ ܘܤܳܗ̈ܕܶܐ. ܘܰܠܗܰܘ ܕܰܚܠܳܦܰܘܗܝ ܚܰܫ̈ܶܐ ܘܽܐܘܠ̈ܨܳܢܶܐ ܤܒܰܠܬܽܘܢ. ܤܳܓܕܺܝܢܰܢ ܘܰܡܫܰܒܚܺܝܢܰܢ܀

ܟܰܕ ܡܩܰܕܡܺܝܢܰܢ ܡܶܬܥܰܗܕܺܝܢܰܢ ܠܟܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ. ܘܰܠܗܰܘ ܕܥܰܠ ܤܰܒܪܶܗ ܫܟܶܒܬܽܘܢ ܘܶܐܬܬܢܺܝܚܬܽܘܢ. ܡܦܺܝܤܺܝܢܰܢ ܕܰܢܚܰܤܶܐ ܠܟܽܘܢ܀

ܫܽܘܒܚܳܐ: ܟܰܕ ܡܩܰܕܡܺܝܢܰܢ ܡܫܰܒܚܺܝܢܰܢ ܠܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ. ܘܠܰܐܒܽܘܟ ܘܰܠܪܽܘܚܳܐ ܕܩܽܘܕܫܳܐ ܤܳܓܕܺܝܢܰܢ ܘܰܡܫܰܒܚܺܝܢܰܢ܀

ܒ H

ܠܥܶܠ ܡܶܢ ܡܶܠܬܳܐ ܕܠܳܐ ܦܽܘܫܳܩܳܐ. ܒܚܰܪܰܬ ܙܰܒ̈ܢܶܐ ܒܓܰܘ ܥܽܘܒܶܟܝ ܐܰܓܶܢ. ܗܰܘ ܕܰܓܢܺܝܙܳܐܺܝܬ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ. ܒܬܶܗܪܳܐ ܪܰܒܳܐ ܘܙܰܘܚܳܐ ܡܶܙܕܰܝܰܚ܀

ܫܠܳܡܠܶܟܝ ܐܳܘ ܐܶܡܳܐ ܡܒܰܪܰܟܬܳܐ. ܒܬܽܘܠܬܳܐ ܕܟܺܝܬܳܐ ܝܳܠܕܰܬ ܐܰܠܳܗܳܐ. ܫܠܳܡܠܶܟܝ ܕܺܝܠܶܕܬܺܝܘܗ̱ܝ ܠܡܶܠܬܳܐ ܡܬܽܘܡܳܝܶܗ ܕܰܐܒܳܐ. ܘܗܳܐ ܟܽܠ ܫܰܪ̈ܒܳܢ ܛܽܘܒܳܐ ܝܳܗ̈ܒܳܢ ܠܶܟܝ܀

ܟܰܕ ܠܰܐܓܽܘܢܳܐ ܕܰܡܠܶܐ ܚܰܫ̈ܶܐ ܥܰܠܬܽܘܢ ܤܳܗ̈ܕܶܐ ܦܰܐܝ̈ܰܝ ܢܶܨܚܳܢ̈ܶܐ. ܙܰܝܢܳܐ ܕܙܳܟܽܘܬܳܐ. ܨܠܺܝܒܳܐ ܩܰܕܺܝܫܳܐ ܢܤܰܒܬܽܘܢ. ܘܒܶܗ ܐܰܒܗܶܬܬܽܘܢ ܠܓܰܒܳܐ ܕܤܶܡܳܠܳܐ܀

ܟܰܕ ܒܰܥܒܳܪ ܦܽܘܩܕܳܢܶܗ ܕܳܐܕܳܡ ܐܰܡܠܶܟ ܡܰܘܬܳܐ ܥܰܠ ܟܽܠܗܽܘܢ ܝܰܠ̈ܕܰܘܗܝ. ܦܶܤܳܐ ܡܛܳܐ ܠܳܟ ܡܳܪܝ ܕܬܶܗܘܶܐ ܡܰܢܝܰܐ ܒܰܩܒܺܝܪ̈ܶܐ. ܘܬܶܫܬܶܐ ܠܟܳܤܳܐ ܗܰܘ ܕܰܡܙܰܓ ܐܳܕܳܡ܀

ܫܽܘܒܚܳܐ: ܢܰܤܶܩ ܫܽܘܒܚܳܐ ܠܰܐܒܳܐ ܓܢܺܝܙܳܐ. ܘܢܶܤܓܽܘܕ ܠܰܒܪܳܐ ܕܦܰܪܩܰܢ ܒܰܨܠܺܝܒܶܗ. ܘܢܰܘܕܶܐ ܠܪܽܘܚܩܽܘܕܫܳܐ. ܬܠܺܝܬܳܝܽܘܬܳܐ ܩܰܕܺܝܫܬܳܐ. ܚܰܕ ܐܰܠܳܗܳܐ ܕܠܶܗ ܗ̱ܽܘ ܡܫܰܒܚܺܝܢܰܢ܀

ܓ H

ܫܠܳܡܠܶܟܝ ܟܢܺܝܟܬܳܐ. ܒܬܽܘܠܬܳܐ ܝܳܠܕܰܬ ܐܰܠܳܗܳܐ ܐܶܡܳܐ ܠܳܐ ܡܙܰܘܰܓܬܳܐ. ܘܠܶܟܝ ܗ̱ܺܝ ܡܰܘܪ̈ܒܳܢ ܟܽܠ ܒܶܪ̈ܝܳܬܳܐ. ܐܶܡܶܗ ܕܢܽܘܗܪܳܐ ܡܬܽܘܡܳܝܳܐ܀

ܐܰܢ̱ܬܝ ܗ̱ܺܝ ܢܽܘܗܪܳܐ ܕܰܐܝܠܶܝܢ ܕܝܳܬܒܺܝܢ ܒܚܶܫܽܘܟܳܐ ܘܗܶܕܪܳܐ ܘܫܽܘܒܗܳܪܳܐ ܕܰܡܗܰܝ̈ܡܢܶܐ. ܘܠܶܟܝ ܗ̱ܺܝ ܡܰܘܪ̈ܒܳܢ ܟܽܠ ܒܶܪ̈ܝܳܬܳܐ. ܐܶܡܶܗ ܕܢܽܘܗܪܳܐ ܡܬܽܘܡܳܝܳܐ܀

ܤܳܗ̈ܕܶܐ ܒܪ̈ܺܝܟܶܐ. ܕܰܐܩܠܺܝܘ ܥܰܠ ܚܰܫ̈ܶܐ ܘܫܶܢ̈ܕܶܐ ܘܟܽܠ ܐܽܘܠ̈ܨܳܢܺܝܢ ܤܰܝܒܰܪܘ. ܘܗܳܐ ܡܶܢ ܓܰܪ̈ܡܰܝܗܽܘܢ ܢܳܒܥܺܝܢ. ܥܽܘܕܪ̈ܳܢܶܐ ܠܰܒܢܰܝ̈ܢܳܫܳܐ܀

ܥܒܶܕ ܡܳܪܝ ܒܪ̈ܰܚܡܰܝܟ. ܢܝܳܚܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܡܚܰܤܝܳܢܳܐ܀

ܫܽܘܒܚܳܐ: ܫܽܘܒܚܳܐ ܠܰܐܒܳܐ. ܘܬܰܘܕܺܝܬܳܐ ܠܰܒܪܳܐ ܕܡܶܢܶܗ ܘܰܠܪܽܘܚ ܩܽܘܕܫܳܐ ܗܽܘܠܳܠܳܐ. ܐ̱ܪܳܙܳܐ ܕܰܬܠܺܝܬܳܝܽܘܬܳܐ ܚܰܕ ܐܰܠܳܗܳܐ ܫܰܪܺܝܪܳܐ܀