ܨܠܰܘ̈ܳܬܳܐ ܕܡܶܨܛܰܠܝܳܢ ܩܕܳܡ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܺܝܪܳܐ ܐܰܡܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬ̣ܳܐ ܘܳܐܬ̣ܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܰܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܙܡܘܪܐ ܢܐ H

ܪܰܚܶܡ ܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬ̣ܳܟ ܘܰܐܝܟ ܣܽܘܓ̣ܳܐܐ ܕܪ̈ܰܚܡܰܝܟ ܠܚܺܝ̣ ܚܛܳܗܰܝ̈܀

ܐܰܣܓܳܐ ܐܰܫܺܝܓ̣ܰܝܢܝ̱ ܡܶܢ ܥܰܘܠܝ̱ ܘܡܶܢ ܚܛܳܗܰܝ̈ ܕܰܟܳܢܝ̱܀

ܡܶܛܽܠ ܕܣܰܟ̣̈ܠܘܳܬ̣ܝ̱ ܝܳܕܰܥ ܐ̱ܢܳܐ ܘܰܚܛܳܗܰܝ̈ ܠܽܘܩܒܰܠܝ̱ ܐܶܢܽܘܢ ܒܟ̣ܽܠ ܙܒܰܢ܇ ܠܳܟ ܒܰܠܚܽܘܕܰܝܟ ܚܛܺܝܬ̣ ܘܒܺܝ̈ܫܳܬ̣ܳܐ ܩܕܳܡܰܝܟ ܣܶܥܪܶܬ̣܀

ܡܶܛܽܠ ܕܬܶܙܕܰܕܰܩ ܒܡܶܠܬ̣ܳܟ ܘܬܶܙܟ̣ܶܐ ܒܕܺܝ̈ܢܰܝܟ܇ ܡܶܛܽܠ ܕܰܒܥܰܘܠܳܐ ܐܶܬ̣ܒܰܛܢܶܬ̣ ܘܒܰܚ̈ܛܳܗܶܐ ܒܛܶܢܬܰܢܝ̱ ܐܶܡܝ̱܀

ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ ܘܟܰܣ̈ܝܳܬ̣ܳܐ ܕܚܶܟ̣ܡܬ̣ܳܟ ܐܰܘܕܰܥܬܳܢܝ̱܇ ܪܽܘܣ ܥܠܰܝ ܒܙܽܘܦܳܟ ܘܶܐܬ̣ܕܰܟܶܐ ܚܰܠܶܠܰܝܢܝ̱ ܒܶܗ ܡܶܢ ܬܰܠܓܳܐ ܐܶܚܘܰܪ܀

ܐܰܣܒܰܥܰܝܢܝ̱ ܒܽܘܣܳܡܳܟ ܘܚܰܕܽܘܬ̣ܳܟ ܘܢܶܚܕܽܘܢ ܓܰܪ̈ܡܰܝ ܡܰܟܺܝ̈ܟ̣ܶܐ܇ ܐܰܗܦܶܟ ܐܰܦܰܝ̈ܟ ܡܶܢ ܚܛܳܗܰܝ̈ ܘܟܽܠܗܶܢ ܣܰܟ̣̈ܠܘܳܬ̣ܝ̱ ܠܚܺܝ܀

ܠܶܒܳܐ ܕܰܟ̣ܝܳܐ ܒܪܺܝ ܒܺܝ ܐܰܠܳܗܳܐ ܘܪܽܘܚܳܟ ܬܩܰܢܬ̣ܳܐ ܚܰܕܶܬ̣ ܒܓ̣ܰܘܝ̱܇ ܠܳܐ ܬܶܫܕܶܝܢܝ̱ ܡܶܢ ܩܕܳܡܰܝܟ ܘܪܽܘܚܳܟ ܩܰܕܺܝܫܳܐ ܠܳܐ ܬܶܣܰܒ ܡܶܢܝ̱܀

ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܪܩܳܢܳܟ ܘܪܽܘܚܳܟ ܡܫܰܒܰܚܬܳܐ ܬܣܰܡܟ̣ܰܢܝ̱܇ ܕܰܐܠܶܦ ܠܥܰܘ̈ܳܠܶܐ ܐܽܘܪܚܳܟ ܘܚܰܛܳܝ̈ܶܐ ܠܘܳܬ̣ܳܟ ܢܶܬܦܢܽܘܢ܀

ܦܰܨܳܢܝ̱ ܡܶܢ ܕܡܳܐ ܐܰܠܳܗܝ̱ ܐܰܠܳܗܳܐ ܕܦܽܘܪܩܳܢܝ̱ ܘܰܢܫܰܒܰܚ ܠܶܫܳܢܝ̱ ܙܰܕܺܝܩܽܘܬ̣ܳܟ܇ ܡܳܪܝܳܐ ܦܬܰܚ ܠܺܝ ܣܶܦ̈ܘܳܬ̣ܝ̱ ܘܦܽܘܡܝ̱ ܢܙܰܡܰܪ ܬܶܫܒ̈ܚܳܬ̣ܳܟ܀

ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ ܐܳܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬ̣ܪܰܥܺܝܬ̣܇ ܕܶܒܚܰܘ̈ܗܝ ܕܰܐܠܳܗܳܐ ܪܽܘܚܳܐ ܗ̱ܝ ܡܰܟܺܝܟ̣ܬܳܐ ܠܶܒܳܐ ܫܚܺܝܩܳܐ ܐܰܠܳܗܳܐ ܠܳܐ ܡܰܣܠܶܐ܀

ܐܰܛܶܐܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܗ̇ ܕܽܐܘܪܺܫܠܶܡ܇ ܗܳܝܕܶܝܢ ܬܶܨܛܒܶܐ ܒܕܶܒ̈ܚܶܐ ܕܩܽܘܫܬܳܐ ܘܰܒܝܰܩ̈ܕܶܐ ܫܰܠ̈ܡܶܐ ܗܳܝܕܶܝܢ ܢܰܣܩܽܘܢ ܬܰܘܪ̈ܶܐ ܥܰܠ ܡܰܕܒܚܳܟ܀

ܡܙܡܘܪܐ ܣܓ H

ܐܰܠܳܗܝ̱ ܐܰܠܳܗܝ̱ ܐܰܢ̱ܬ ܐܶܣܰܟܶܐ ܠܳܟ܀

ܠܘܳܬܳܟ ܩܰܕܡܶܬ. ܘܰܩܕܳܡ ܒܺܐܡ ܕܺܝܠܳܟ ܤܶܓܕܶܬ. ܡܰܠܟܳܐ ܫܡܰܝܳܢܳܐ. ܚܰܤܳܐ ܠܺܝ ܟܽܠ ܕܰܚܛܺܝܬ ܠܳܟ܀

ܨܰܗܝܳܐ ܗ̱ܝ ܠܳܟ ܢܰܦܫܝ ܘܰܡܤܰܟܶܐ ܠܳܟ ܒܶܤܪܝ. ܐܰܝܟ ܐܰܪܥܳܐ ܨܗܺܝܬܳܐ ܘܰܡܛܰܪܰܦܬܳܐ ܕܒܳܥܝܳܐ ܡܰܝ̈ܳܐ܀

ܒܨܰܦܪܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܣܰܟ̈ܠܘܳܬܝ̱. ܪܳܚܶܡ ܒܢܰܝ̈ܢܳܫܳܐ. ܚܰܣܳܐ ܠܺܝ ܟܽܠ ܕܰܚܛܺܝܬ ܠܳܟ܀

ܗܳܟܰܢ ܚܳܪܬܳܟ ܒܩܽܘܫܬܳܐ ܕܶܐܚܙܶܐ ܥܽܘܫܢܳܟ ܘܺܐܝܩܳܪܳܟ܀

ܒܪ̈ܰܚܡܶܐ ܕܫܰܠܚܽܘܟ. ܡܶܛܽܠ ܓܶܢܤܰܢ ܚܰܠܳܫܳܐ. ܩܰܒܶܠ ܬܶܫܡܶܫܬܰܢ. ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܀

ܡܶܛܽܠ ܕܛܳܒܺܝ̈ܢ ܪ̈ܰܚܡܰܝܟ ܡܶܢ ܚܰܝ̈ܶܐ. ܘܤܶܦܘ̈ܳܬܝ ܢܫܰܒܚ̈ܳܢܳܟ܀

ܡܶܢܳܟ ܒܳܥܶܐ ܐ̱ܢܳܐ ܘܰܠܪ̈ܰܚܡܰܝܟ ܡܶܬܝܰܐܒ ܐ̱ܢܳܐ. ܛܳܒܳܐ ܘܒܰܣܺܝܡܳܐ. ܚܰܣܳܐ ܠܺܝ ܟܽܠ ܕܰܚܛܺܝܬ ܠܳܟ܀

ܗܳܟܰܢ ܐܶܒܰܪܟܳܟ ܒܚܰܝܰܝ̈. ܘܒܰܫܡܳܟ ܐܰܪܺܝܡ ܐܺܝ̈ܕܰܝ܀

ܢܽܘܗܪܳܐ ܘܒܰܪ ܢܽܘܗܪܳܐ ܫܪܶܐ ܒܢܽܘܗܪܳܐ ܘܥܳܡܰܪ ܒܢܽܘܗܪܳܐ. ܐܰܫܘܳܢܝ ܠܗܰܘ ܢܽܘܗܪܳܐ ܕܠܳܐ ܡܰܕܪܶܟ ܠܶܗ ܚܶܫܽܘܟܳܐ܀

ܐܰܝܟ ܫܽܘܡܢܳܐ ܘܰܐܝܟ ܬܰܪܒܳܐ ܬܶܕܗܰܢܝ ܢܰܦܫܝ. ܘܰܒܤܶܦܘ̈ܳܬܳܐ ܕܫܽܘܒܚܳܐ ܢܫܰܒܚܳܟ ܦܽܘܡܝ܀

ܢܽܘܗܪܳܐ ܕܡܰܦܨܰܚ ܠܳܗ̇. ܠܰܒܪܺܝܬܳܐ ܒܥܶܕܳܢ ܨܰܦܪܳܐ. ܘܩܳܝܡܺܝܢ ܟܽܠ ܕܰܥܠܶܝܗ̇. ܘܙܳܡܪܺܝܢ ܫܽܘܒܚܳܐ ܘܬܰܘܕܺܝܬܳܐ܀

ܐܶܬܕܟܰܪܬܳܟ ܥܰܠ ܬܶܫܘܺܝܬܝ. ܘܰܒܠܰܝ̈ܠܰܘܳܬܳܐ ܪܢܺܝܬ ܒܳܟ܀

ܢܽܘܗܪܳܟ ܚܙܳܬ ܬܺܒܶܝܠ. ܘܶܐܬܦܰܨܚܰܬ ܕܰܟܡܺܝܪܳܐ ܗ̱ܘܳܬ. ܘܗܳܐ ܙܳܡܪܳܐ ܫܽܘܒܚܳܐ. ܗܺܝ ܘܝܰܠܕܶܝ̈ܗ̇ ܥܕܰܡܳܐ ܠܥܳܠܰܡ܀

ܡܶܛܽܠ ܕܰܗܘܰܝܬ ܠܺܝ ܡܥܰܕܪܳܢܳܐ. ܘܰܒܛܶܠܳܠܳܐ ܕܟܶܢܦܰܝ̈ܟ ܐܶܤܬܰܬܰܪ܀

ܚܰܤܝܳܐ ܘܩܰܕܺܝܫܳܐ. ܕܢܽܘܪܳܐ ܚܰܝܬܳܐ ܡܫܰܡܫܳܐ ܠܶܗ. ܩܰܒܶܠ ܬܶܫܡܶܫܬܰܢ. ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܀

ܢܶܦܩܰܬ ܢܰܦܫܝ̱ ܒܳܬܪܳܟ ܘܰܥܠܰܝ ܣܶܡܟܰܬ ܝܰܡܺܝܢܳܟ܀

ܐܶܬܕܰܟܪܶܬ ܕܰܚܛܺܝܬ. ܘܰܒܚܰܫܳܐ ܫܦܰܥ̈ܝ ܗ̱ܘܰܝ̈ ܕܶܡ̈ܥܰܝ. ܢܓܽܘܠܽܘܢ ܥܠܰܝ ܪ̈ܰܚܡܰܝܟ. ܝܶܫܽܘܥ ܦܳܪܽܘܩܶܗ ܕܥܳܠܡܳܐ܀

ܗܶܢܽܘܢ ܒܥܰܘ ܕܢܰܘܒܕܽܘܢ ܠܢܰܦܫܝ. ܢܰܥܠܽܘܢ ܒܬܰܚܬܳܝ̈ܬܳܗ̇ ܕܰܐܪܥܳܐ܀

ܫܶܡܥܽܘܢ ܒܓܰܘ ܝܰܡܳܐ. ܡܶܢ ܡܰܚ̈ܫܽܘܠܶܐ ܕܰܠܺܝܬܳܝܗ̱ܝ. ܕܰܠܳܗ̇ ܡܳܪܝ ܠܥܺܕܬܳܟ. ܡܶܢ ܤܶܕ̈ܩܶܐ ܘܡܶܢ ܚܶܪ̈ܝܳܢܶܐ܀

ܢܶܫܬܰܠܡܽܘܢ ܠܚܰܪܒܳܐ ܘܡܶܐܟܽܘܠܬܳܐ ܠܬܰܥ̈ܠܶܐ ܢܶܗܘܽܘܢ. ܘܡܰܠܟܳܐ ܢܶܚܕܶܐ ܒܰܐܠܳܗܳܐ܀

ܚܰܘ̈ܒܰܝ ܤܰܓܺܝܺܐܝ̈ܢ. ܘܒܶܝܬ ܕܺܝܢܳܐ ܗܳܐ ܚܳܝܪܺܝܢ ܠܺܝ. ܢܓܽܘܠܽܘܢ ܥܠܰܝ ܪ̈ܰܚܡܰܝܟ. ܘܚܰܤܳܐ ܠܺܝ ܟܽܠ ܕܰܚܛܺܝܬ ܠܳܟ܀

ܢܶܫܬܰܒܗܰܪ ܟܽܠ ܕܝܳܡܶܐ ܒܶܗ. ܡܶܛܽܠ ܕܢܶܤܬܟܰܪ ܦܽܘܡܗܽܘܢ ܕܕܰܓ̈ܳܠܶܐ܀

ܒܽܐܘܪܺܫܠܶܡ ܕܰܠܥܶܠ. ܘܰܒܥܺܕܬܳܐ ܕܒܶܝܬ ܐܰܪ̈ܥܳܢܶܐ. ܥܒܶܕ ܡܳܪܝ ܕܽܘܟܪܳܢܳܐ ܠܥܰܒܕܰܝ̈ܟ ܕܰܫܟܶܒܘ ܥܰܠ ܤܰܒܪܳܟ܀

ܫܽܘܒܚܳܐ: ܫܽܘܒܚܳܐ ܠܳܟ ܡܳܪܰܢ. ܕܫܽܘܒܚܳܟ ܒܰܐܪܥܳܐ ܘܒܰܫܡܰܝܳܐ. ܘܰܡܫܰܒܚܺܝܢ ܠܰܫܡܳܟ. ܫܡܰܝܳܢ̈ܶܐ ܘܰܐܪ̈ܥܳܢܳܝܶܐ܀

ܡܙܡܘܪܐ: ܩܝܓ H

ܫܽܘܒܚܳܐ ܠܒܳܪܽܘܝܶܗ ܕܢܽܘܗܪܳܐ. ܫܰܒܰܚܘ̱ ܥܰܒܕܰܘ̈ܗ̱ܝ ܕܡܳܪܝܳܐ. ܫܰܒܰܚܘ̱ ܠܰܫܡܶܗ ܕܡܳܪܝܳܐ܀

ܢܶܗܘܶܐ ܫܡܶܗ ܕܡܳܪܝܳܐ ܡܒܰܪܰܟ ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ܀

ܡܶܢ ܡܰܕܢܳܚܰܘ̈ܗ̱ܝ ܕܫܶܡܫܳܐ ܘܰܥܕܰܡܳܐ ܠܡܰܥܪ̈ܳܒܰܘܗ̱ܝ. ܪܰܒ ܗ̱ܽܘ ܫܡܶܗ ܕܡܳܪܝܳܐ܀

ܘܪܳܡ ܥܰܠ ܟܽܠܗܽܘܢ ܥܰܡ̱̈ܡܶܐ ܡܳܪܝܳܐ ܘܥܰܠ ܫܡܰܝܳܐ ܐܺܝ̣ܩܳܪܶܗ܀

ܡܰܢܽܘ ܐܰܝܟ ܡܳܪܝܳܐ ܐܰܠܳܗܰܢ ܕܝܳܬܶܒ ܒܪܰܘܡܳܐ ܘܚܳܙܶܐ ܒܥܽܘܡܩܳܐ ܒܰܫܡܰܝܳܐ ܘܒܰܐܪܥܳܐ܀

ܡܪܺܝܡ ܡܶܢ ܩܺܩܰܠܬܳܐ ܠܒܳܝܫܳܐ ܕܢܰܘܬܒܺܝܘܗ̱ܝ ܥܰܡ ܪܰܘܪ̈ܒܳܢܶܐ ܕܥܰܡܳܐ܀

ܡܰܘܬܶܒ ܥܩܰܪܬܳܐ ܒܒܰܝܬܐ. ܘܶܐܡܳܐ ܕܰܒܢܰܝ̈ܳܐ ܟܰܕ ܚܳܕܝܳܐ: ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ ܒܰܪܶܟܡܳܪܝ̱܀

ܘܡܰܩܦܺܝܢ ܡܙ̄ܡ: ܕܫܰܒܰܚܘ ܠܡܳܪܝܳܐ ܡ̣ܢ ܫܡܰܝܐ ܘܫܰܪܟܳܐ܀
ܫܘܒܚܐ ܘܡܢܥܠܡ܀

ܥܩܒܐ: H

ܩܳܠܳܐ ܕܫܽܘܒܚܳܐ ܒܦܽܘܡ ܡܰܠܰܐܟ̈ܶܐ ܐܰܥܺܝܪܰܢܝ ܡܳܪܝ ܕܰܒܨܰܦܪܳܐ ܫܽܘܒܚܳܟ ܐܶܙܡܰܪ. ܦܶܬܚܶܬ ܤܶܦܘ̈ܳܬܝ ܠܰܡܫܰܒܳܚܽܘ ܟܰܕ ܡܰܘܕܶܐ ܐ̱ܢܳܐ ܡܳܪܝ ܘܰܐܠܳܗܝ ܪܰܚܶܡܥܠܰܝ܀

ܤܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀

ܣܶܕܪܳܐ ܓܰܘܳܢܳܝܐ

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ. ܘܢܰܨܰܚ ܕܽܘܟܪܳܢ ܩܰܕܺܝܫܰܘ̈ܗܝ ܒܟܽܠ ܐܰܬܰܪ ܘܦܶܢ̈ܝܳܢ ܘܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܪܰܣܶܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܟܰܕ ܥܽܘܗܕܳܢܳܐ ܪܚܺܝܡܳܐ ܘܚܰܒܺܝܒܳܐ ܘܰܡܝܰܩܪܳܐ ܥܳܒܕܺܝܢܰܢ. ܠܗܳܝ ܫܳܘܝܰܬ ܠܛܽܘ̈ܒܶܐ ܘܰܫܒܺܝܚܰܬ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܡܒܰܪܰܟܬܳܐ ܘܰܡܥܰܠܰܝܬܳܐ ܘܰܒܬܽܘܠܰܬ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܥܰܡܳܗ̇ ܕܶܝܢ ܢܶܬܶܥ̱ܗܰܕ ܠܰܢ̈ܒܺܝܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ ܠܶܐܘܰܢܓܶܠܺܝ̈ܣܛܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ. ܠܟܺܐܢ̈ܶܐ ܘܰܠܟܳܗ̈ܢܶܐ ܘܠܰܐܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ ܒܬܽܘ̈ܠܶܐ ܘܩܰܕܺܝ̈ܫܶܐ ܘܢܰܟ̈ܦܶܐ ܘܨܰܝܳܡ̈ܶܐ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܘܟܽܠܗܽܘܢ ܣܳܥܪ̈ܰܝ ܫܰܦܺܝܪ̈ܳܬܳܐ. ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܰܒܬܰܟܫ̈ܦܳܬܗܽܘܢ ܡܩܰܒ̈ܠܳܬܳܐ ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܰܫܒܽܘܩ ܚܰܘܒܰܝ̈ܢ ܘܚܰܣܳܐ ܚܛܳܗܰܝ̈ܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܒܓܽܘܕܰܝ̈ܗܽܘܢ ܕܩܰܕܺܝ̈ܫܰܝܟ ܢܶܬܛܰܟܰܣ ܘܰܒܣܺܝ̈ܥܳܬܗܽܘܢ ܢܶܬܚܰܠܰܛ ܘܒܰܝܢܳܬܗܽܘܢ ܢܶܗܘܶܐ ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀

ܩܠܐ ܒܩ̄: ܐܝܟ ܦܺܝܪܡܳܐ ܕܩܰܪܶܒ ܐܱܗܪܽܘܢ
ܓܘܫܡܳܐ ܚܡܺܝܫܳܝܳܐ. H

ܦܶܬܓܳܡܳܐ: ܥܢܺܝܢܝ ܡܳܪܝܳܐ ܘܰܫܡܰܥ ܨܠܽܘܬܝ ܗ̄: ܐܰܝܟ ܦܺܝܪܡܶܗ ܕܩܰܪܶܒ ܐܰܗܪܽܘܢ ܦܺܝܪܡܰܢ ܢܶܬܩܰܒܰܠ. ܘܰܐܝܟ ܒܳܥܽܘܬܳܐ ܕܢܺܝ̈ܢܘܳܝܶܐ ܩܰܒܶܠ ܬܶܫܡܶܫܬܰܢ. ܘܰܐܝܟ ܕܰܥܢܰܝܬ ܠܝܰܘܢܳܢ ܒܝܰܡܳܐ. ܥܢܺܝ ܠܥܰܒܕܰܝ̈ܟ ܕܗܳܐ ܩܳܪܶܝܢ ܠܳܟ܀

ܘܰܓܥܳܬܝ ܠܘܳܬܳܟ ܬܶܥܽܘܠܝ ܗ̄: ܥܶܛܪܳܐ ܕܒܶܣ̈ܡܶܐ ܕܩܰܪܶܒܢܰܢ ܠܰܫܡܳܟ ܩܰܕܺܝܫܳܐ. ܪܺܝܚܳܐ ܒܰܣܺܝܡܳܐ ܢܶܗܘܶܐ ܠܰܢܝܳܚܳܐ ܕܪ̈ܰܚܡܰܝܟ. ܘܶܐܬܪܰܥܳܐ ܠܰܢ ܒܰܚܢܳܢܳܟ. ܐܰܠܳܗܰܢ ܣܰܓܺܝ ܪ̈ܰܚܡܶܐ܀

ܫܽܘܒܚܳܐ: ܫܽܘܒܚܳܐ ܠܪ̈ܰܚܡܶܐ ܕܛܰܝܒܽܘܬܳܟ ܝܶܫܽܘܥ ܐܰܠܳܗܳܐ. ܕܰܟܡܳܐ ܫܦܺܝܥܳܐ ܗ̱ܝ ܡܰܘܗܰܒܬܳܟ ܥܰܠ ܥܳܠܡܳܐ ܟܽܠܶܗ. ܘܰܠܢܺܝ̈ܢܘܳܝܶܐ ܕܰܩܪܰܐܽܘܟ. ܫܰܘܙܶܒܬ ܐܶܢܽܘܢ ܡܶܢ ܪܽܘܓܙܳܐ܀

ܡܶܢ ܥܳܠܰܡ: ܢܶܒܤܰܡ ܠܳܟ ܪܺܝܚܶܗ ܕܦܺܝܪܡܰܢ ܐܰܝܟ ܦܺܝܪܡܶܗ ܕܰܐܗܪܽܘܢ. ܘܰܐܝܟ ܦܺܝܪܡܳܐ ܕܩܰܪܶܒ ܙܟܰܪܝܳܐ ܒܓܰܘ ܗܰܝܟܰܠ ܩܽܘܕܫܳܐ. ܘܰܐܝܟ ܨܠܽܘܬܳܐ ܕܨܰܠܺܝ ܦܺܝܢܚܶܣ. ܘܰܟܠܳܐ ܡܰܘܬܳܐ ܡܶܢ ܥܰܡܳܐ܀

ܕܝܳܠܕܰܬ ܐܰܠܳܗܳܐ: ܪܳܡܳܐ ܕܡܶܬܓܰܐܶܐ ܒܫܽܘܒܚܳܐ ܥܰܠ ܟܽܘܪܤܝܳܐ ܪܳܡܳܐ. ܘܰܒܥܽܘܒܳܗ̇ ܕܰܡܒܰܪܰܟܬܳܐ ܫܦܰܪ ܠܶܗ ܘܶܐܙܕܰܝܰܚ. ܐܰܫܪܳܐ ܫܰܝܢܳܟ ܘܰܫܠܳܡܳܟ. ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܀

ܡܳܐ ܠܺܝ ܘܰܠܟܽܘܢ ܝܽܘܕܳܝ̈ܶܐ ܥܢܳܬ ܐܶܡܪܰܬ ܡܰܪܝܰܡ. ܕܶܐܢܳܐ ܚܬܺܝܡܳܢܝ ܘܰܢܛܺܝܪܳܢܝ ܘܠܰܝܬܰܝ ܓܰܝܳܪܬܳܐ. ܨܒܳܐ ܒܺܝ ܡܳܪܝ ܘܰܗܘܺܝܬ ܐܶܡܶܗ. ܘܺܝܢܶܩ ܚܰܠܒܳܐ ܐܰܝܟ ܫܰܒܪܳܐ܀

ܡܶܢ ܒܶܝܬ ܤܶܕܪ̈ܶܐ ܕܓܰܘܙܰܠܬܳܐ ܛܳܣ ܘܰܢܚܶܬ ܥܺܝܪܳܐ. ܘܰܡܛܳܐ ܠܢܳܨܪܰܬ ܨܶܝܕ ܡܰܪܝܰܡ ܘܗܳܟܰܢ ܐܶܡܰܪ ܠܳܗ̇. ܕܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ. ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܀

ܐܰܝܟ ܕܰܫܪܳܬ ܢܽܘܪܳܐ ܒܤܰܢܝܳܐ ܘܤܰܢܝܳܐ ܠܳܐ ܝܺܩܶܕ. ܗܳܟܰܢܳܐ ܢܚܶܬ ܐܰܠܳܗܳܐ. ܘܰܫܪܳܐ ܒܰܒܬܽܘܠܬܳܐ. ܫܦܰܪ ܠܶܗ ܘܶܐܬܺܝܠܶܕ ܡܶܢܳܗ̇. ܘܠܳܐ ܫܪܳܐ ܛܰܒ̈ܥܶܐ ܕܰܒܬܽܘܠܶܝ̈ܗ̇܀

ܕܩܰܕܺܝ̈ܫܶܐ: ܒܰܨܠܰܘ̈ܳܬܗܽܘܢ ܡܳܪܶܐ ܟܽܠ ܕܰܢܒܺܝ̈ܶܐ ܕܪܰܚܡܽܘܟ. ܘܰܒܒܳܥ̈ܘܳܬܗܽܘܢ ܕܰܫܠܺܝ̈ܚܶܐ ܕܰܐܟܪܶܙܘ ܠܰܤܒܰܪܬܳܟ. ܐܰܫܪܳܐ ܫܰܝܢܳܟ ܘܰܫܠܳܡܳܟ. ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܀

ܠܒܶܫܘ ܚܰܝܠܳܐ ܐܰܠܳܗܳܝܳܐ ܤܳܗ̈ܕܶܐ ܩܰܕܺܝ̈ܫܶܐ. ܘܰܢܚܶܬܘ ܩܳܡܘ ܒܶܗ ܒܰܐܓܽܘܢܳܐ ܕܡܰܠ̈ܟܶܐ ܥܰܘ̈ܳܠܶܐ. ܬܪܰܥܘ ܤܶܕܪ̈ܰܘܗ̱ܝ ܕܰܒܥܶܠܕܰܪܳܐ. ܘܰܐܥܕܺܝܘ ܟܠܺܝ̈ܠܶܐ ܕܙܳܟܽܘܬܳܐ܀

ܤܳܗ̈ܕܶܐ ܕܰܤܢܰܘ ܩܶܢܝܳܢ̈ܶܐ ܕܥܳܠܡܳܐ ܥܳܒܽܘܪܳܐ. ܘܰܟܦܰܪܘ ܒܰܐܒܳܗ̈ܶܐ ܘܰܐܚ̈ܶܐ ܘܰܒܓܶܢܤܳܐ ܘܛܽܘܗܡܳܐ. ܘܡܰܘܬܳܐ ܪܚܶܡܘ ܡܶܛܽܠ ܝܶܫܽܘܥ. ܗܳܐ ܢܳܨܚܺܝܢ ܕܽܘܟܪ̈ܳܢܰܝܗܽܘܢ܀

ܚܙܰܐܽܘܗ̱ܝ ܤܳܗ̈ܕܶܐ ܠܰܡܫܺܝܚܳܐ ܕܰܬܠܶܐ ܥܰܠ ܩܰܝܤܳܐ. ܘܰܬܪܺܝܥ ܤܶܛܪܶܗ ܒܠܽܘܟܳܝܬܳܐ ܘܪܳܕܶܝܢ ܕܡܳܐ ܘܡܰܝ̈ܳܐ. ܘܰܪܗܶܛܘ ܠܰܒܶܒܘ ܠܰܚ̈ܕܳܕܶܐ. ܬܰܘ ܕܰܢܡܽܘܬ ܡܶܛܽܠ ܡܳܪܰܢ܀

ܕܰܬܝܳܒܽܘܬܳܐ: ܒܢܽܘܗܪܳܟ ܚܳܙܶܝܢܰܢ ܢܽܘܗܪܳܐ ܝܶܫܽܘܥ ܡܠܶܐ ܢܽܘܗܪܳܐ. ܕܰܐܢܬ ܗ̱ܽܘ ܢܽܘܗܪܳܐ ܫܰܪܺܝܪܳܐ ܕܡܰܢܗܰܪ ܠܟܽܠ ܒܶܪ̈ܝܳܢ. ܐܰܢܗܰܪ ܠܰܢ ܒܢܽܘܗܪܳܟ ܓܰܐܝܳܐ. ܨܶܡܚܶܗ ܕܰܐܒܳܐ ܫܡܰܝܳܢܳܐ܀

ܚܰܤܝܳܐ ܘܩܰܕܺܝܫܳܐ ܕܥܳܡܰܪ ܒܡܶܕܝܳܪ̈ܰܝ ܢܽܘܗܪܳܐ. ܟܠܺܝ ܡܶܢܰܢ ܚܰܫ̈ܶܐ ܒܺܝ̈ܫܶܐ ܘܚܽܘܫܳܒ̈ܶܐ ܤܢܰܝ̈ܳܐ. ܘܗܰܒܠܰܢ ܕܰܒܕܰܟܝܽܘܬ ܠܶܒܳܐ. ܢܶܥܒܶܕ ܥܒ̈ܳܕܶܐ ܕܟܺܐܢܽܘܬܳܐ܀

ܬܰܘ ܚܰܛܳܝ̈ܶܐ ܐܶܬܟܰܫܰܦܘ ܘܰܒܥܰܘ ܫܽܘܒܩܳܢܳܐ. ܕܰܦܬܺܝܚ ܗ̱ܽܘ ܬܰܪܥܶܗ ܕܡܳܪܝܳܐ ܠܰܐܝܢܳܐ ܕܢܳܩܶܫ ܒܶܗ. ܘܟܽܠ ܐܰܝܢܳܐ ܕܫܳܐܶܠ ܢܳܤܶܒ. ܘܰܕܒܳܥܶܐ ܡܶܬܺܝܗܶܒ ܠܶܗ܀

ܐܰܠܳܗܳܐ ܕܩܰܒܶܠ ܐܶܡܪܶܗ ܕܗܳܒܺܝܠ ܬܰܡܺܝܡܳܐ. ܘܩܽܘܪܒܳܢܶܗ ܕܢܽܘܚ ܙܰܕܺܝܩܳܐ ܘܕܶܒܚܶܗ ܕܰܐܒܪܳܗܳܡ. ܩܰܒܶܠ ܨܰܘܡܰܢ ܘܰܨܠܽܘܬܰܢ. ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܀

ܕܥܰܢܺܝ̈ܕܶܐ: ܥܒܶܕ ܡܳܪܝ ܕܽܘܟܪܳܢܳܐ ܛܳܒܳܐ ܠܥܰܢܺܝܕ̈ܶܐ ܡܗܰܝ̈ܡܢܶܐ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܕܡܳܟ ܚܰܝܳܐ. ܘܰܢܩܽܘܡܽܘܢ ܡܶܢ ܝܰܡܺܝܢܳܟ: ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܩܠܐ ܐܚܪܢܐ ܒܩ̄: ܤܳܗ̈ܕܶܐ ܐܰܦܺܝܤܽܘܢܳܝܗܝ
ܒܓܽܘܫܡܳܐ: ܬܪܰܝܳܢܳܐ H

ܦܶܬܓܳܡܳܐ: ܐܰܟܚܕܳܐ ܥܰܬܺܝܪ̈ܶܐ ܘܡܶܣ̈ܟܺܢܶܐ: ܒܨܰܦܪܳܐ ܢܩܰܕܶܡ ܠܰܨܠܽܘܬܳܐ. ܐܰܝܟ ܐܰܒܪܳܗܳܡ ܠܰܥܠܳܬܳܐ ܕܰܒܨܰܦܪܳܐ ܪܰܒܳܐ ܕܳܐܬܶܐ ܢܶܚܙܶܝܘܗ̱ܝ ܠܰܡܫܺܝܚܳܐ. ܘܢܺܐܡܰܪ ܠܰܢ ܬܰܘ ܒܰܫܠܳܡܳܐ. ܦܳܥ̈ܠܶܐ ܛܳܒ̈ܶܐ ܘܟܰܫܺܝܪ̈ܶܐ ܬܰܘ ܥܽܘܠܘ ܝܺܪܰܬܘ ܡܰܠܟܽܘܬܳܐ ܘܚܰܝ̈ܶܐ ܕܠܳܐ ܥܳܒܪܺܝܢ܀

ܗܶܢܽܘܢ ܥܳܒܪܺܝܢ ܘܰܐܢ̱ܬ ܩܰܝܳܡ ܐܰܢ̱ܬ: ܠܺܠܝܳܐ ܥܒܰܪ ܠܶܗ ܐܰܝܟ ܕܰܟܬܺܝܒ. ܘܺܐܝܡܳܡܳܐ ܩܪܶܒ ܘܰܡܛܳܐ ܠܶܗ ܐܶܬܬܥܺܝܪܘ ܐܰܚܰܝ̈ ܩܽܘܡܘ ܨܰܠܰܘ ܥܰܕ ܐܺܝܬ ܠܰܢ ܐܰܬܪܳܐ. ܕܡܳܪܰܢ ܐܶܡܰܪ ܒܰܤܒܰܪܬܶܗ. ܕܩܳܪܶܐ ܠܺܝ ܥܳܢܶܐ ܐ̱ܢܳܐ ܠܶܗ ܘܰܕܢܳܩܶܫ ܦܳܬܰܚ ܐ̱ܢܳܐ ܠܶܗ. ܘܗܳܘܶܝܢ ܥܠܰܘܗ̱ܝ ܪ̈ܰܚܡܶܐ܀

ܫܽܘܒܚܳܐ: ܫܽܘܒܚܳܐ ܠܰܬܠܺܝܬܳܝܽܘܬܳܐ. ܕܗܺܝ ܩܳܝܡܳܐ ܠܰܢ ܒܶܝܬ ܕܺܝܢܳܐ ܫܽܘܒܚܳܐ ܠܰܬܠܺܝܬܳܝܽܘܬܳܐ. ܕܗܺܝ ܫܳܒܩܳܐ ܚܰܘ̈ܒܰܝܢ. ܫܽܘܒܚܳܐ ܠܳܟ ܐܰܠܳܗܳܐ. ܕܟܽܠ ܐܰܝܢܳܐ ܕܰܡܗܰܝܡܶܢ ܒܳܟ ܠܳܐ ܡܰܕܪܶܟ ܠܶܗ ܚܶܫܽܘܟܳܐ ܕܢܽܘܗܪܳܟ ܡܕܰܝܰܪ ܒܶܗ܀

ܡܶܢ ܥܳܠܰܡ: ܪܽܘܚܳܐ ܐܺܝܬܰܘܗ̱ܝ ܐܰܠܳܗܳܐ. ܘܤܳܓܽܘܕ̈ܶܐ ܕܪܽܘܚܳܐ ܒܳܥܶܐ ܛܽܘܒܰܘܗ̱ܝ ܠܰܐܝܢܳܐ ܕܤܳܓܶܕ ܠܶܗ ܒܪܽܘܚܳܐ ܘܒܰܫܪܳܪܳܐ. ܤܓܶܕܘ ܠܶܗ ܢܒܺܝ̈ܶܐ ܒܪܽܘܚܳܐ. ܘܰܫܠܺܝ̈ܚܶܐ ܒܪܽܘܚܳܐ ܕܩܽܘܕܫܳܐ. ܘܗܳܐ ܤܳܓܕܳܐ ܥܺܕܬܳܐ ܘܝܰܠܕܶܝ̈ܗ̇ ܒܪܽܘܚܳܐ ܘܒܰܫܪܳܪܳܐ܀

ܕܝܳܠܕܰܬ ܐܰܠܳܗܳܐ: ܡܶܢ ܐܰܒܳܐ ܡܳܪܳܐ ܕܢܰܚ ܠܰܢ. ܘܡܶܢ ܒܰܪ̱ܬ ܕܰܘܺܝܕ ܦܳܪܽܘܩܳܐ ܘܡܶܢ ܒܶܝܬܠܚܶܡ ܠܰܚܡܳܐ ܕܚܰܝ̈ܶܐ ܠܥܰܡ̱̈ܡܶܐ ܕܗܰܝܡܶܢܘ ܒܶܗ. ܤܓܺܝܕ ܐܰܒܳܐ ܕܫܰܕܰܪ ܠܰܒܪܶܗ. ܒܪܺܝܟܳܐ ܗ̱ܝ ܡܰܪܝܰܡ ܕܺܝܠܶܕܬܶܗ ܘܛܽܘܒܳܐ ܠܥܺܕܬܳܐ ܕܩܰܒܶܠܬܶܗ ܘܗܳܐ ܙܳܡܪܳܐ ܫܽܘܒܚܳܐ܀

ܠܡܰܪܓܳܢܺܝܬܳܐ ܕܠܳܐ ܡܽܘܡܳܐ. ܕܰܒܬܳܓܶܗ ܕܡܰܠܟܳܐ ܤܺܝܡܳܐ ܕܳܡܝܳܐ ܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ ܐܰܠܳܗܳܐ. ܕܰܠܟܽܠ ܓܰܒܺܝ̈ܢ ܡܶܬܗܰܦܟܳܐ. ܘܙܺܝܘܳܗ̇ ܡܰܢܗܰܪ ܐܰܝܟ ܫܶܡܫܳܐ ܘܝܽܘܡ ܕܽܘܟܪܳܢܳܗ̇ ܗܳܐ ܢܳܨܰܚ ܒܰܫܡܰܝܳܐ ܘܒܰܐܪܥܳܐ܀

ܟܽܠ ܫܰܪ̈ܒܳܢ ܥܰܡ ܟܽܠ ܥܰܡ̱̈ܡܺܝܢ. ܢܶܬܠܽܘܢ ܠܳܗ̇ ܛܽܘܒܳܐ ܠܡܰܪܝܰܡ ܕܰܫܘܳܬ ܕܬܶܗܘܶܐ ܠܶܗ ܐܶܡܳܐ ܠܰܒܪܳܐ ܕܰܐܠܳܗܳܐ. ܕܢܰܚ ܡܶܢܳܗ̇ ܘܠܳܐ ܐܶܬܚܰܒܰܠܘ. ܛܰܒ̈ܥܶܐ ܢܛܺܝܪ̈ܶܐ ܕܰܒܬܽܘܠܶܝ̈ܗ̇ ܘܝܽܘܡ ܕܽܘܟܪܳܢܳܗ̇ ܗܳܐ ܢܳܨܰܚ ܒܰܫܡܰܝܳܐ ܘܒܰܐܪܥܳܐ܀

ܥܰܠ ܒܶܝܬܠܚܶܡ ܥܳܒܰܪ ܗ̱ܘܺܝܬ. ܘܩܳܠܳܐ ܫܶܡܥܶܬ ܒܰܡܥܰܪܬܳܐ ܡܰܪܝܰܡ ܕܰܡܢܰܨܪܳܐ ܠܰܒܪܳܗ̇ ܘܗܳܟܰܢ ܐܳܡܪܳܐ ܠܶܗ. ܛܽܘܒܰܝ ܒܶܪܝ ܕܰܗܘܺܝܬ ܐܶܡܳܟ. ܛܽܘܒܰܝ ܕܰܐܝܢܶܩܬܳܟ ܚܰܠܒܳܐ ܘܶܐܢ ܪܶܡܙܳܟ ܠܳܐ ܡܰܦܶܣ ܠܺܝ ܠܳܐ ܩܳܪܒܳܢܝ ܨܶܐܕܰܝܟ܀

ܕܩܰܕܺܝ̈ܫܶܐ: ܬܪܶܥܤܰܪ ܐܳܤܰܘ̈ܳܬܳܐ. ܫܰܕܰܪ ܡܳܪܰܢ ܝܶܫܽܘܥ ܠܰܐܪ̈ܒܰܥܦܶܢܝܳܢ ܕܰܒܪܺܝܬܳܐ ܘܗܳܟܰܢ ܐܶܡܰܪ ܠܗܽܘܢ. ܛܪܽܘܕܘ ܫܺܐܕ̈ܶܐ ܡܶܢ ܐ̱ܢܳܫ̈ܳܐ. ܘܰܐܤܰܘ ܠܰܐܝܠܶܝܢ ܕܰܟܪܺܝܗܺܝܢ ܡܰܓܳܢ ܢܤܰܒܬܽܘܢ ܡܰܘܗܰܒܬܳܐ ܡܰܓܳܢ ܗܰܒܽܘܢܳܗ̇܀

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ. ܕܰܒܝܰܡܳܐ ܘܝܰܒܫܳܐ ܫܰܠܺܝܛ ܘܰܓܒܳܐ ܠܶܗ ܐ̱ܢܳܫ̈ܳܐ ܦܫܺܝ̈ܛܶܐ ܕܢܶܗܘܽܘܢ ܟܳܪ̈ܽܘܙܰܘܗ̱ܝ. ܡܶܢ ܝܰܡܳܐ ܓܒܳܐ ܠܶܗ ܦܶܛܪܽܘܣ. ܘܡܶܢ ܒܶܝܬ ܐܽܘܪ̈ܚܳܬܳܐ ܦܰܘܠܳܘܣ ܘܰܥܒܰܕ ܐܶܢܽܘܢ ܟܳܪ̈ܽܘܙܶܐ ܕܥܺܕܬܳܐ ܩܰܕܺܝܫܬܳܐ܀

ܤܳܗ̈ܕܶܐ ܐܰܦܺܝܤܘܢܳܝܗ̱ܝ ܠܰܐܠܳܗܳܐ ܡܶܛܽܠܳܬܰܢ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ ܒܰܡܪܰܚܡܳܢܽܘܬܶܗ. ܘܰܢܦܰܨܶܐ ܠܰܢ ܡܶܢ ܕܺܝܢܳܐ. ܕܗܳܘܶܐ ܠܚܰܪܬܳܐ ܕܝܰܘ̈ܡܳܬܳܐ ܘܢܶܚܙܶܝܟܽܘܢ ܡܳܐ ܕܫܳܩܠܺܝܬܽܘܢ ܟܠܺܝ̈ܠܶܐ ܕܙܳܟܽܘܬܳܐ܀

ܤܳܠܩܺܝܢ ܗ̱ܘܰܘ ܤܳܗ̈ܕܶܐ ܒܪ̈ܺܝܟܶܐ. ܠܽܐܘܪܺܫܠܶܡ ܗܳܝ ܕܒܰܫܡܰܝܳܐ ܘܦܶܓܥܰܬ ܒܗܽܘܢ ܪܽܘܚܳܐ ܕܩܽܘܕܫܳܐ ܘܒܰܫܠܳܡܗܽܘܢ ܫܶܐܠܰܬ. ܬܰܘ ܒܰܫܠܳܡ ܐܰܚܰܝ̈ ܘܰܒ̈ܢܰܝ: ܒܢܰܘ̈ܗܝ ܕܰܓܢܽܘܢܳܐ ܫܡܰܝܳܢܳܐ ܬܰܘ ܥܽܘܠܘ ܝܺܪܰܬܘ ܡܰܠܟܽܘܬܳܐ ܘܚܰܝ̈ܶܐ ܕܠܳܐ ܥܳܒܪܺܝܢ܀

ܕܚܰܕ ܩܢܽܘܡܳܐ: ܛܽܘܒܰܝܟ ܐܰܒܽܘܢ ܛܽܘܒܳܢܳܐ. ܢܰܨܺܝܚܳܐ ܡܳܪܝ ܒܰܪܨܰܘܡܳܐ ܕܠܳܐ ܟܰܬܡܳܟ ܥܳܠܡܳܐ ܒܺܝܫܳܐ ܒܟܽܠܗܶܝܢ ܪ̈ܓܺܝܓܳܬܶܗ. ܕܰܐܝܟ ܨܶܦܪܳܐ ܦܠܰܛܬ ܡܶܢ ܦܰܚܰܘ̈ܗ̱ܝ. ܘܰܠܚܽܘܪܒܳܐ ܥܪܰܩܬ ܘܶܐܫܬܰܘܙܰܒܬ. ܘܝܽܘܡ ܕܽܘܟܪܳܢܳܟ ܗܳܐ ܢܳܨܰܚ ܒܰܫܡܰܝܳܐ ܘܒܰܐܪܥܳܐ܀

ܛܽܘܒܳܢܳܐ ܡܳܪܝ ܓܰܒܪܺܐܝܠ. ܒܥܺܝ ܪ̈ܰܚܡܶܐ ܡܶܢ ܐܰܠܳܗܳܐ ܠܟܶܢܫܳܐ ܕܙܰܝܰܚ ܕܽܘܟܪܳܢܳܟ ܘܶܐܬܳܐ ܠܥܰܕܥܺܐܕܳܟ. ܫܠܳܡܳܐ ܘܫܰܝܢܳܐ ܢܫܰܟܶܢ ܠܰܢ. ܘܰܫܢܰܝ̈ܳܐ ܟܰܗܺܝ̈ܢܳܬܳܐ ܡܶܢ ܒܶܝܬ ܓܰܙܶܗ ܥܰܬܺܝܪܳܐ ܕܰܡܠܶܐ ܥܽܘܕܪ̈ܳܢܶܐ܀

ܐܶܠܺܝܳܐ ܢܒܺܝܳܐ ܐܰܟܤܶܗ. ܠܳܐܚܳܒ ܡܰܠܟܳܐ ܥܰܘܳܠܳܐ ܘܠܳܛܳܗ̇ ܠܺܐܝܙܒܺܝܠ ܫܳܛܺܝܬܳܐ ܕܓܶܙܡܰܬ ܥܰܠ ܚܰܝܰܘ̈ܗ̱ܝ. ܘܩܰܕܺܝܫܳܐ ܡܳܪܝ ܒܰܪܨܰܘܡܳܐ. ܠܳܛܶܗ ܗ̱ܘܳܐ ܠܡܰܪܩܺܝܰܢܳܘܣ ܘܰܠܒܰܪ̱ܬ ܙܰܘܓܶܗ ܡܰܪܳܚܬܳܐ. ܘܠܰܬܪ̈ܰܝܗܽܘܢ ܐܰܘܒܶܕ܀

ܡܨܰܒܬܳܐ ܫܡܰܝܳܐ ܒܢܰܗܺܝܪ̈ܶܐ. ܡܨܰܒܬܳܐ ܐܰܪܥܳܐ ܒܗܰܒܳܒܶܝ̈ܗ̇. ܘܢܰܨܺܝܚܳܐ ܡܳܪܝ ܓܶܘܰܪܓܺܝܣ ܡܨܰܒܰܬ ܒܕܶܡ ܨܰܘܪܶܗ. ܥܳܒܪܳܐ ܫܡܰܝܳܐ ܘܢܰܗܺܝܪ̈ܶܝܗ̇. ܘܒܳܛܠܳܐ ܐܰܪܥܳܐ ܘܗܰܒܳܒܶܝ̈ܗ̇ ܘܕܽܘܟܪܳܢܶܗ ܕܤܳܗܕܳܐ ܕܰܢܨܰܚ ܠܥܳܠܰܡ ܠܳܐ ܥܳܒܰܪ܀

ܕܰܬܝܳܒܽܘܬܳܐ: ܡܶܢ ܓܽܘܒܳܐ ܕܕܽܘܘܳܢܳܐ. ܘܡܶܢ ܤܝܳܢܳܐ ܕܰܚܒܳܠܳܐ ܘܡܶܢ ܚܶܫܽܘܟܳܐ ܒܰܪܳܝܳܐ ܦܰܨܳܐ ܠܰܢ ܡܳܪܰܢ. ܘܡܳܐ ܕܗܳܘ̈ܝܳܢ ܦܳܤܺܝ̈ܩܳܬܳܐ. ܘܫܳܩܠܺܝܢ ܤܳܗ̈ܕܶܐ ܟܠܺܝ̈ܠܰܝܗܽܘܢ ܥܰܡܗܽܘܢ ܢܶܥܽܘܠ ܠܰܓܢܽܘܢܳܐ. ܘܢܶܙܡܰܪ ܠܳܟ ܫܽܘܒܚܳܐ܀

ܡܶܢ ܗܳܢ ܥܳܠܡܳܐ ܥܳܒܽܘܪܳܐ. ܘܡܶܢ ܩܶܢܝܳܢܳܐ ܕܠܳܐ ܡܩܰܘܶܐ. ܛܽܘܒܰܘܗ̱ܝ ܠܰܐܝܢܳܐ ܕܩܳܢܶܐ ܠܶܗ ܪܳܚܡܳܐ ܐܰܠܳܗܳܐ. ܕܰܒܚܰܝ̈ܰܘܗ̱ܝ ܗܳܘܶܐ ܥܰܡܶܗ. ܘܰܒܡܰܘܬܶܗ ܠܳܐ ܡܰܪܦܶܐ ܠܶܗ ܘܰܒܝܰܘܡܳܐ ܕܗܳܘܶܐ ܕܺܝܢܳܐ ܥܳܒܶܕ ܥܠܰܘܗ̱ܝ ܪ̈ܰܚܡܶܐ܀

ܛܽܘܒ ܠܰܐܝܢܳܐ ܕܰܫܒܰܩ ܠܰܐܚܽܘܗ̱ܝ. ܤܰܟܠܽܘܬܶܗ ܡܳܐ ܕܰܐܤܟܶܠ ܒܶܗ ܕܳܐܦ ܗܽܘ ܩܳܪܶܐ ܠܰܐܠܳܗܳܐ ܘܥܳܒܶܕ ܥܠܰܘܗ̱ܝ ܪ̈ܰܚܡܶܐ. ܕܡܳܪܰܢ ܐܶܡܰܪ ܒܰܤܒܰܪܬܶܗ. ܛܽܘܒܰܝܗܽܘܢ ܠܰܡܪ̈ܰܚܡܳܢܶܐ ܕܰܥܠܰܝܗܽܘܢ ܢܶܗܘܽܘܢ ܪ̈ܰܚܡܶܐ. ܒܝܰܘܡܶܗ ܕܢܽܘܚܳܡܳܐ܀

ܠܰܘ ܡܶܛܽܠ ܙܰܕܺܝ̈ܩܶܐ. ܐܶܬܺܝܬ ܐܶܡܰܪ ܡܳܪܰܢ. ܐܶܠܳܐ ܡܶܛܽܠ ܚܰܛܳܝ̈ܶܐ ܕܢܶܗܘܽܘܢ ܬܰܝ̈ܳܒܶܐ. ܕܗܳܐ ܦܬܺܝܚ ܗ̱ܽܘ ܬܰܪܥܶܗ ܕܡܳܪܝܳܐ. ܚܰܛܳܝ̈ܶܐ ܬܽܘܒܽܘܢ ܘܰܚܝܰܘ. ܕܠܳܐ ܨܳܒܶܐ ܐ̱ܢܳܐ ܒܡܰܘܬܰܝ̈ܟܽܘܢ ܐܶܡܰܪ ܐܰܠܳܗܳܐ܀

ܕܥܰܢܺܝ̈ܕܶܐ: ܢܶܬܕܟܰܪ ܐܶܢܽܘܢ ܠܰܐܒܳܗܰܝ̈ܢ. ܕܡܰܠܦܺܝܢ ܗ̱ܘܰܘ ܠܰܢ ܟܰܕ ܚܰܝܺܝܢ ܕܢܶܗܘܶܐ ܒܢܰܝ̈ܳܐ ܠܰܐܠܳܗܳܐ ܒܗܳܢ ܥܳܠܡܳܐ ܕܥܳܒܰܪ. ܒܪܳܐ ܕܰܐܠܳܗܳܐ ܢܢܺܝܚ ܐܶܢܽܘܢ. ܒܗܳܝ ܡܰܠܟܽܘܬܳܐ ܕܰܫܡܰܝܳܐ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ ܒܥܳܠܡܳܐ ܕܠܳܐ ܥܳܒܰܪ܀

ܩܽܘܩܰܠܝܳܘܢ ܬܪܝܢܐ H

ܡܶܠܰܝ̈ ܨܽܘܬ ܡܳܪܝܳܐ ܘܶܐܣܬܰܟܰܠ ܒܰܗܓܳܝ ܗ̄ ܘܨܽܘܬ ܠܩܳܠܳܐ ܕܰܓܥܳܬܝ ܡܰܠܟܝ̱ ܘܰܐܠܳܗܝ̱܀

ܡܶܛܽܠ ܕܰܠܘܳܬܳܟ ܗܘ ܡܨܰܠܶܐ ܐ̱ܢܳܐ ܗ̄ ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ̱܀

ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ ܗ̄ ܡܶܛܽܠ ܕܰܐܠܳܗܳܐ ܐܰܢ̱ܬ ܘܠܳܐ ܨܳܒܶܐ ܪܽܘܫܥܳܐ܀

ܠܳܐ ܢܶܥܡܰܪ ܥܰܡܳܟ ܒܺܝܫܳܐ ܗ̄ ܘܠܳܐ ܢܩܽܘܡܽܘܢ ܫܰܒܗܪ̈ܳܢܶܐ ܩܕܳܡ ܥܰܝ̈ܢܰܝܟ܀

ܫܽܘܒܚܳܐ ܘܥܶܩܒܳܐ: H

ܠܬܰܚܬ ܡܶܢ ܥܽܘܡܩܰܘ̈ܗ̱ܝ ܕܰܬܗܽܘܡܳܐ ܥܰܡ ܝܰܘܢܳܢ ܢܒܺܝܳܐ ܡܰܙܥܶܩ ܐ̱ܢܳܐ: ܕܢܰܗܪ̈ܰܘܳܬܳܐ ܚܰܕܪܽܘܢܝ. ܘܚܰܝܽܘܬܳܐ ܡܚܰܒܠܳܢܺܝܬܳܐ ܐܶܟܰܠܬܰܢܝ. ܘܰܐܝܟܰܢܳܐ ܐܺܝܬ ܠܺܝ ܗܳܫܳܐ ܕܰܡܛܰܒܰܥ ܐ̱ܢܳܐ ܒܠܶܒܳܐ ܕܝܰܡ̱̈ܡܶܐ. ܐܶܠܳܐ ܕܰܐܙܥܶܩ ܘܺܐܡܰܪ ܡܶܢ ܚܒܳܠܳܐ ܡܳܪܝ ܕܰܠܳܢܝ ܝܶܫܽܘܥ ܫܽܘܒܗܳܪܳܐ ܕܚܰܝ̈ܰܝ܀

ܐܚܪܢܐ: H

ܒܢܰܝ̈ܳܐ ܕܰܐܒܳܐ ܫܡܰܝܳܢܳܐ. ܐܰܝܠܶܝܢ ܕܨܶܒܝܳܢܶܗ ܕܡܳܪܝܳܐ ܥܳܒܕܺܝܢ. ܫܰܒܰܚܽܘܢܳܝܗ̱ܝ ܘܰܐܘܕܰܘ ܠܶܗ ܘܪܰܡܪܡܽܘܗ̱ܝ ܘܒܰܪܟܽܘܗ̱ܝ ܠܥܳܠܰܡ ܥܳܠܡܺܝܢ܀

ܣܶܕܪܳܐ ܕܰܬܝܳܒܽܘܬܳܐ:

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܪܳܡܳܐ ܘܰܡܥܰܠܝܳܐ ܒܺܐܝܬܽܘܬܶܗ ܕܡܶܢ ܚܰܝ̈ܠܰܘܳܬܳܐ ܥܶܠܳܝ̈ܶܐ ܡܶܙܕܰܝܰܚ ܘܡܶܢ ܐܰܪ̈ܥܳܢܳܝܶܐ ܡܶܣܬܓܶܕ ܘܡܶܫܬܰܒܰܚ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ

ܣܶܕܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܘܡܶܬܟܰܫܦܺܝܢܰܢ ܠܳܟ ܕܰܬܒܰܪܶܟ ܠܥܰܒ̈ܕܰܝܟ ܘܣܳܓܽܘܕܰܝ̈ܟ ܗܳܢܽܘܢ ܕܶܐܬܟܰܢܰܫܘ ܒܰܫܡܳܟ ܩܰܕܺܝܫܳܐ ܕܙܰܝܢܳܐ ܪܽܘܚܳܢܳܝܳܐ ܢܶܠܒܫܽܘܢ ܘܚܽܘܒܳܐ ܘܰܐܘܝܽܘܬܳܐ ܢܶܬܥܰܛܦܽܘܢ. ܠܒܺܝܫܳܐ ܘܰܠܚܰܝܠܶܗ ܢܶܙܟܽܘܢ. ܘܥܰܠ ܦܳܬܽܘܪܳܐ ܕܺܝܠܳܟ ܪܽܘܚܳܢܳܝܳܐ ܢܶܬܒܰܣܡܽܘܢ. ܚܰܣܳܐ ܚܰܘܒܰܝ̈ܗܽܘܢ ܫܒܽܘܩ ܒܽܘܨܳܪ̈ܰܝܗܽܘܢ ܘܰܐܥܒܰܪ ܣܰܟ̈ܠܘܳܬܗܽܘܢ ܒܣܽܘܓܳܐܐ ܕܪ̈ܰܚܡܰܝܟ. ܘܫܽܘܒܚܳܐ ܘܪܽܘܡܪܳܡܳܐ ܢܰܣܶܩ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܠܐ: ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗܝ
ܒܪܶܟܢܳܐ ܬܪܰܝܳܢܳܐ H

ܒܨܰܦܪܳܐ ܩܪ̈ܰܝ ܗ̱ܘܰܝ̈ ܩܰܪ̈ܢܳܬܳܐ ܘܰܢܦܰܠܘ ܫܽܘܪ̈ܶܝܗ̇ ܕܺܐܝܪܺܝܚܽܘ. ܘܰܩܥܳܐ ܥܰܡܳܐ ܕܺܝܤܪܳܐܝܶܠ ܕܡܳܪܝܰܐ ܗ̱ܘ ܐܰܠܳܗܳܐ. ܒܨܰܦܪܳܐ ܐܰܪܺܝܡܘ ܩܳܠܰܝ̈ܟܽܘܢ. ܐܰܚܰܝ̈ ܘܰܙܡܰܪܘ ܠܶܗ ܫܽܘܒܚܳܐ. ܠܰܐܠܳܗܳܐ ܕܢܶܥܒܶܕ ܪ̈ܰܚܡܶܐ ܥܰܠ ܥܳܠܡܳܐ ܟܽܠܶܗ܀

ܒܨܰܦܪܳܐ ܨܰܠܺܝ ܕܳܢܺܝܐܝܶܠ. ܒܓܰܘ ܓܽܘܒܳܐ ܕܰܐܪ̈ܝܰܘܳܬܳܐ. ܘܰܒܨܰܦܪܳܐ ܨܰܠܺܝ ܝܰܘܢܳܢ ܒܶܐܫܬܶܗ ܕܰܬܗܽܘܡܳܐ. ܠܝܰܘܢܳܢ ܕܰܠܺܝܬ ܡܶܢ ܝܰܡܳܐ. ܘܰܠܕܳܢܺܝܐܝܶܠ ܡܳܢ ܓܽܘܒܳܐ. ܘܠܰܢ ܦܰܨܳܐ ܠܰܢ ܡܶܢ ܒܺܝܫܳܐ ܘܶܐܬܪܰܚܰܡܥܠܰܝܢ܀

ܫܽܘܒܚܳܐ: ܫܽܘܒܚܳܐ ܠܳܐܤܝܳܐ ܫܡܰܝܳܢܳܐ. ܕܰܢܚܶܬ ܡܶܢ ܪܰܘܡܳܐ ܠܥܽܘܡܩܳܐ. ܕܢܰܐܤܶܐ ܟܺܐܒ̈ܶܐ ܘܟܽܘܪ̈ܗܳܢܶܐ ܕܓܶܢܤܳܐ ܕܒܶܝܬ ܐܳܕܳܡ. ܦܓܰܥܘ ܒܶܗ ܓܰܪ̈ܒܶܐ ܘܶܐܬܕܰܟܺܝܘ. ܘܰܤܡܰܝ̈ܳܐ ܘܰܚܙܰܘ ܢܽܘܗܪܳܐ. ܘܳܐܦ ܚܰܛܳܝܬܳܐ ܕܩܶܪܒܰܬ ܠܶܗ ܢܶܤܒܰܬ ܫܽܘܒܩܳܢܳܐ܀

ܡܶܢ ܥܳܠܰܡ: ܡܶܢ ܫܡܰܝܳܐ ܡܰܠܰܐܟ̈ܶܐ. ܘܡܶܢ ܐܰܪܥܳܐ ܒܢܰܝ̈ܢܳܫܳܐ. ܡܩܰܕܡܺܝܢ ܤܳܓܕܺܝܢ ܠܺܐܝܩܳܪܳܟ ܟܰܕ ܩܳܥܶܝܢ ܘܳܐܡܪܺܝܢ. ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬܳܢܳܐ ܩܰܕܺܝܫܰܬ ܠܳܐ ܡܳܝܽܘܬܳܐ. ܕܶܐܨܛܠܶܒܬ ܘܰܦܪܰܩܬ ܠܰܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ H

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܪ̈ܰܚܡܶܐ. ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܡܳܪܳܐ ܕܨܰܦܪ̈ܶܐ ܘܰܡܛܰܟܣܳܢܳܐ ܕܟܽܠ ܥܶܕܳܢܺܝ̈ܢ: ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܕܢܰܚ ܒܺܝ ܡܳܪܰܢ ܘܶܐܢܗܰܪ ܡܶܢܳܟ ܐܰܝܟ ܐܺܝܡܳܡܳܐ: ܕܢܰܗܺܝܪܳܐܺܝܬ ܐܶܙܡܰܪ ܫܽܘܒܚܳܟ ܟܰܕ ܬܳܗܰܪ ܐ̱ܢܳܐ. ܢܥܺܝܪܰܢܝ ܨܰܦܪܳܐ ܥܰܠ ܬܶܫܒܽܘܚܬܳܐ ܕܰܐܠܳܗܽܘܬܳܟ: ܘܰܒܥܶܢܝܳܢܳܐ ܕܡܺܐܡܪܳܟ ܐܶܪܗܰܛ ܝܰܘܡܳܐ ܟܽܠܶܗ܀

ܥܰܡ ܐܺܝܡܳܡܳܐ ܢܽܘܗܪܳܟ ܢܶܕܢܰܚ ܥܰܠ ܚܽܘܫܳܒܰܝ̈ܢ: ܘܰܠܛܶܠܳــ̈ـܠܶܐ ܕܛܽܘܥܝܰܝ ܢܶܛܪܽܘܕ ܡܶܢ ܢܰܦ̈ܫܳܬܰܢ. ܢܗܰܪ̈ܝ ܒܶܪ̈ܝܳܬܳܐ ܐܰܢܗܰܪ ܥܰܡܗܶܝܢ ܠܶܒܰܘ̈ܳܬܰܢ: ܕܰܢܫܰܒܚܽܘܢܳܟ ܥܰܡ ܐܺܝ̈ܡܳܡܶܐ ܘܠܰܝ̈ܠܰܘܳܬܳܐ܀

ܫܘܚܠܦܐ:

ܗܳܐ ܛܥܺܝܢ ܨܰܦܪܳܐ ܦܺܝܪܡܳܐ ܕܰܟܝܳܐ ܕܰܢܩܰܪܶܒ ܠܳܟ: ܢܩܰܪܶܒ ܐܳܦ ܚܢܰܢ ܟܽܠ ܬܰܘܕܺܝܬܳܐ ܕܡܶܬܬܚܺܝܒܳܐ ܠܳܟ. ܕܰܒܦܽܘܩܕܳܢܳܟ ܥܶܒܪܰܬ ܫܶܢܬܶܗ ܕܠܺܠܝܳܐ ܡܶܢܰܢ. ܐܰܥܒܰܪ ܥܰܡܳܗ̇ ܚܛܺܝܬܳܐ ܕܡܳܚܝܳܐ ܘܰܡܫܺܝܡܳܐ ܠܰܢ܀

ܢܫܰܒܚܽܘܢܳܟ ܡܳܪܝ ܨܰܦܪ̈ܶܐ ܘܪ̈ܰܡܫܶܐ ܒܫܽܘܚܠܳܦܰܝ̈ܗܽܘܢ: ܘܰܢܩܰܪܒܽܘܢ ܠܳܟ ܥܶܛܪ̈ܶܐ ܚܠܰܝ̈ܳܐ ܕܪ̈ܽܘܡܝܳܢܰܝܗܽܘܢ. ܢܫܰܒܚܽܘܢ ܟܳܗ̈ܢܶܐ ܘܰܡܫܰܡ̈ܫܳܢܶܐ ܘܟܽܠܳܗ̇ ܥܺܕܬܳܐ: ܠܳܟ ܕܰܐܦܨܰܚܬ ܠܰܢ ܒܢܽܘܗܪܳܟ ܓܰܐܝܳܐ ܘܠܳܟ ܬܶܫܒܽܘܚܬܳܐ܀

ܢܽܘܗܪܳܐ ܕܡܰܢܗܰܪ ܠܟܽܠ ܒܶܪ̈ܝܳܬܳܐ ܒܥܶܕܳܢ ܨܰܦܪܳܐ܀

ܐܰܢܗܰܪ ܗܰܘܢܰܝ̈ܢ ܕܢܰܘܕܶܐ ܠܳܟ ܡܳܪܝ ܥܰܠ ܛܰܝܒܽܘܬܳܟ܀

ܛܳܒ ܠܡܰܘܕܳܝܽܘ ܠܡܳܪܝܳܐ:

ܟܳܗܢܳܐ: ܛܳܒ ܠܡܰܘܕܳܝܽܘ ܠܡܳܪܝܳܐ:

ܥܰܡܳܐ: ܘܰܠܡܶܙܡܰܪ ܠܰܫܡܳܟ ܡܪܰܝܡܳܐ ܠܰܡܚܰܘܳܝܽܘ ܒܨܰܦܪܳܐ ܛܰܝܒܽܘܬܳܟ ܘܗܰܝܡܳܢܽܘܬܳܟ ܒܠܰܝ̈ܠܰܘܳܬܳܐ܀

ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ. ܡܳܪܝܳܐ ܚܽܘܢܳܝܗ̱ܝ ܠܥܰܡܳܐ ܕܺܝܠܳܟ. ܡܳܪܝܳܐ ܚܰܤܳܐ ܘܰܫܒܽܘܩ ܚܛܳܗ̈ܶܐ ܕܟܽܠܰܢ. ܩܰܕܺܝܫܳܐ ܐܰܓܶܢ ܥܠܰܝܢ ܝܰܡܺܝܢܳܟ. ܘܰܐܤܳܐ ܟܪܺܝܗܽܘܬܰܢ ܡܶܛܽܠ ܫܡܳܐ ܕܺܝܠܳܟ܀

ܩܰܕܺܝܫܰܬ ܐܰܠܳܗܳܐ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܰܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܰܘ̈ܳܬܳܐ ܕܡܶܨܛܰܠܝܳܢ ܒܚܰܪܰܬ݀ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.

ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.

ܢܚܶܬ̣ ܡܶܢ ܫܡܰܝܳܐ ܘܶܐܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܶܐܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.

ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.

ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀

ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ̣ ܗ̄ܘܗ̄ ܘܡܰܠܟܬ̣ܳܐ ܡܶܢ ܝܰܡܺܝܢܳܟ܀

ܘܰܛܥܳܝ ܥܰܡܶܟ̣ܝ̱ ܘܒܶܝܬ̣ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓ̣ܪܰܓ̣ ܡܰܠܟܳܐ ܠܫܽܘܦܪܶܟ̣ܝ̱܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܩܰܪܶܒܝ̱ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬ̣ܰܢ܇ ܘܰܨܠܽܘܬ̣ܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬ̣ܰܢ܀

ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬ̣ܽܘܠܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ̣ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬ̣ܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀

ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܝܳܠܕܰܬ ܐܰܠܳܗܳܐ

ܗܰܘ ܪܺܝܫ ܡܰܠܰܐܟ̣̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ̣ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟ̣ܝ̱ ܘܡܶܢܶܟ̣ܝ̱ ܕܳܢܰܚ܀

ܫܽܘܒܚܳܐ: ܐܶܠܦܳܐ ܗܘܳܬ̣ ܡܰܪܝܰܡ܇ ܛܶܥܢܰܬ̣ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬ̣ܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀

ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ

ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀

ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ܘܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀

ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ

ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀

ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀

ܫܠܳܡ ܠܶܟܝ

ܫܠܳܡ ܠܶܟ̣ܝ ܒܬ̣ܽܘܠܬܳܐ ܡܰܪܝܰܡ ܡܰܠܝܰܬ̣ ܛܰܝܒܽܘܬ̣ܳܐ. ܡܳܪܰܢ ܥܰܡܶܟܝ. ܡܒܰܪܰܟ̣ܬܳܐ ܐܰܢ̱ܬܝ ܒܢܶܫ̈ܶܐ. ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟ̣ܝ̱. ܡܳܪܰܢ ܝܶܫܽܘܥ. ܐܳܘ ܩܰܕܺܝܫܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ. ܨܰܠܳܝ ܚܠܳܦܰܝܢ ܚܰܛܳܝ̈ܶܐ. ܗܳܫܳܐ ܘܰܒܫܳܥܰܬ ܘܡܰܘܬܰܢ ܐܰܡܺܝܢ܀