ܨܠܰܘ̈ܳܬܳܐ ܕܡܶܨܛܰܠܝܳܢ ܩܕܳܡ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܺܝܪܳܐ ܐܰܡܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬ̣ܳܐ ܘܳܐܬ̣ܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܰܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܙܡܘܪܐ ܢܐ

ܪܰܚܶܡ ܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬ̣ܳܟ ܘܰܐܝܟ ܣܽܘܓ̣ܳܐܐ ܕܪ̈ܰܚܡܰܝܟ ܠܚܺܝ̣ ܚܛܳܗܰܝ̈܀

ܐܰܣܓܳܐ ܐܰܫܺܝܓ̣ܰܝܢܝ̱ ܡܶܢ ܥܰܘܠܝ̱ ܘܡܶܢ ܚܛܳܗܰܝ̈ ܕܰܟܳܢܝ̱܀

ܡܶܛܽܠ ܕܣܰܟ̣̈ܠܘܳܬ̣ܝ̱ ܝܳܕܰܥ ܐ̱ܢܳܐ ܘܰܚܛܳܗܰܝ̈ ܠܽܘܩܒܰܠܝ̱ ܐܶܢܽܘܢ ܒܟ̣ܽܠ ܙܒܰܢ܇ ܠܳܟ ܒܰܠܚܽܘܕܰܝܟ ܚܛܺܝܬ̣ ܘܒܺܝ̈ܫܳܬ̣ܳܐ ܩܕܳܡܰܝܟ ܣܶܥܪܶܬ̣܀

ܡܶܛܽܠ ܕܬܶܙܕܰܕܰܩ ܒܡܶܠܬ̣ܳܟ ܘܬܶܙܟ̣ܶܐ ܒܕܺܝ̈ܢܰܝܟ܇ ܡܶܛܽܠ ܕܰܒܥܰܘܠܳܐ ܐܶܬ̣ܒܰܛܢܶܬ̣ ܘܒܰܚ̈ܛܳܗܶܐ ܒܛܶܢܬܰܢܝ̱ ܐܶܡܝ̱܀

ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ ܘܟܰܣ̈ܝܳܬ̣ܳܐ ܕܚܶܟ̣ܡܬ̣ܳܟ ܐܰܘܕܰܥܬܳܢܝ̱܇ ܪܽܘܣ ܥܠܰܝ ܒܙܽܘܦܳܟ ܘܶܐܬ̣ܕܰܟܶܐ ܚܰܠܶܠܰܝܢܝ̱ ܒܶܗ ܡܶܢ ܬܰܠܓܳܐ ܐܶܚܘܰܪ܀

ܐܰܣܒܰܥܰܝܢܝ̱ ܒܽܘܣܳܡܳܟ ܘܚܰܕܽܘܬ̣ܳܟ ܘܢܶܚܕܽܘܢ ܓܰܪ̈ܡܰܝ ܡܰܟܺܝ̈ܟ̣ܶܐ܇ ܐܰܗܦܶܟ ܐܰܦܰܝ̈ܟ ܡܶܢ ܚܛܳܗܰܝ̈ ܘܟܽܠܗܶܢ ܣܰܟ̣̈ܠܘܳܬ̣ܝ̱ ܠܚܺܝ܀

ܠܶܒܳܐ ܕܰܟ̣ܝܳܐ ܒܪܺܝ ܒܺܝ ܐܰܠܳܗܳܐ ܘܪܽܘܚܳܟ ܬܩܰܢܬ̣ܳܐ ܚܰܕܶܬ̣ ܒܓ̣ܰܘܝ̱܇ ܠܳܐ ܬܶܫܕܶܝܢܝ̱ ܡܶܢ ܩܕܳܡܰܝܟ ܘܪܽܘܚܳܟ ܩܰܕܺܝܫܳܐ ܠܳܐ ܬܶܣܰܒ ܡܶܢܝ̱܀

ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܪܩܳܢܳܟ ܘܪܽܘܚܳܟ ܡܫܰܒܰܚܬܳܐ ܬܣܰܡܟ̣ܰܢܝ̱܇ ܕܰܐܠܶܦ ܠܥܰܘ̈ܳܠܶܐ ܐܽܘܪܚܳܟ ܘܚܰܛܳܝ̈ܶܐ ܠܘܳܬ̣ܳܟ ܢܶܬܦܢܽܘܢ܀

ܦܰܨܳܢܝ̱ ܡܶܢ ܕܡܳܐ ܐܰܠܳܗܝ̱ ܐܰܠܳܗܳܐ ܕܦܽܘܪܩܳܢܝ̱ ܘܰܢܫܰܒܰܚ ܠܶܫܳܢܝ̱ ܙܰܕܺܝܩܽܘܬ̣ܳܟ܇ ܡܳܪܝܳܐ ܦܬܰܚ ܠܺܝ ܣܶܦ̈ܘܳܬ̣ܝ̱ ܘܦܽܘܡܝ̱ ܢܙܰܡܰܪ ܬܶܫܒ̈ܚܳܬ̣ܳܟ܀

ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ ܐܳܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬ̣ܪܰܥܺܝܬ̣܇ ܕܶܒܚܰܘ̈ܗܝ ܕܰܐܠܳܗܳܐ ܪܽܘܚܳܐ ܗ̱ܝ ܡܰܟܺܝܟ̣ܬܳܐ ܠܶܒܳܐ ܫܚܺܝܩܳܐ ܐܰܠܳܗܳܐ ܠܳܐ ܡܰܣܠܶܐ܀

ܐܰܛܶܐܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܗ̇ ܕܽܐܘܪܺܫܠܶܡ܇ ܗܳܝܕܶܝܢ ܬܶܨܛܒܶܐ ܒܕܶܒ̈ܚܶܐ ܕܩܽܘܫܬܳܐ ܘܰܒܝܰܩ̈ܕܶܐ ܫܰܠ̈ܡܶܐ ܗܳܝܕܶܝܢ ܢܰܣܩܽܘܢ ܬܰܘܪ̈ܶܐ ܥܰܠ ܡܰܕܒܚܳܟ܀

ܡܙܡܘܪܐ ܣܓ H

ܐܰܠܳܗܝ̱ ܐܰܠܳܗܝ̱ ܐܰܢ̱ܬ ܐܶܣܰܟܶܐ ܠܳܟ܀

ܠܳܐ ܬܶܥܽܘܠ ܠܕܺܝܢܳܐ ܥܰܡ ܥܰܒ̈ܕܶܐ ܕܺܝܠܳܟ. ܕܦܰܓܪܳܟ ܡܳܪܝ ܘܰܕܡܳܟ. ܪܰܗܒܽܘܢܳܐ ܝܰܗ̱ܒܬ ܠܗܽܘܢ܀

ܨܰܗܝܳܐ ܗ̱ܝ ܠܳܟ ܢܰܦܫܝ̱ ܘܰܡܣܰܟܶܐ ܠܳܟ ܒܶܣܪܝ̱܇ ܐܰܝܟ ܐܰܪܥܳܐ ܨܗܺܝܬ̣ܳܐ ܘܰܡܛܰܪܰܦܬܳܐ ܕܒܳܥܝܳܐ ܡܰܝ̈ܳܐ܀

ܗܰܒ ܠܰܢ ܘܰܐܫܘܳܐ ܠܰܢ. ܕܢܶܫܡܥܺܝܘ̈ܗܝ ܠܗܰܘ ܩܳܠܳܐ. ܕܬܰܘ ܥܘܽܠܘ ܒܪ̈ܺܝܟܰܘܗ̱ܝ ܕܳܐܒܝ ܝܺܪܰܬܘ ܡܰܠܟܽܘܬܳܐ܀

ܗܳܟ̣ܰܢ ܚܳܪܬ̣ܳܟ ܒܩܽܘ̣ܫܬܳܐ܇ ܕܶܐܚܙܶܐ ܥܽܘܫܢܳܟ ܘܺܐܝܩܳܪܳܟ܀

ܒܬܽܘܠܬܳܐ ܩܰܕܺܝܫܬܳܐ. ܝܳܠܕܰܬ ܐܰܠܳܗܳܐ. ܐܶܬܟܰܫܰܦܝ ܘܰܒܥܳܝ. ܪ̈ܰܚܡܶܐ ܚܠܳܦ ܟܽܠܰܢ܀

ܡܶܛܽܠ ܕܛܳܒܺܝܢ ܪ̈ܰܚܡܰܝܟ ܡܶܢ ܚܰܝ̈ܶܐ܇ ܘܣܶܦ̈ܘܳܬ̣ܝ̱ ܢܫܰܒ̈ܚܳܢܳܟ܀

ܒܶܝܬ ܓܰܘܤܰܢ ܪܳܡܳܐ. ܘܥܽܘܫܢܰܢ ܬܰܩܺܝܦܳܐ. ܐܰܢ̱ܬܝ ܐܺܝܬܰܝܟܝ ܒܟܽܠܙܒܰܢ ܝܳܠܕܰܬ ܐܰܠܳܗܳܐ܀

ܗܳܟܰܢ ܐܶܒܰܪܟܳܟ ܒܚܰܝܰܝ̈. ܘܒܰܫܡܳܟ ܐܰܪܺܝܡ ܐܺܝ̈ܕܰܝ܀

ܢܒܺܝ̈ܶܐ ܘܰܫܠܺܝ̈ܚܶܐ ܘܤܳܗ̈ܕܶܐ ܩܰܕܺܝ̈ܫܶܐ. ܐܶܬܟܰܫܰܦܘ ܘܰܒܥܰܘ. ܪ̈ܰܚܡܶܐ ܚܠܳܦ ܟܽܠܰܢ܀

ܐܰܝܟ ܫܽܘܡܢܳܐ ܘܰܐܝܟ ܬܰܪܒܳܐ ܬܶܕܗܰܢ ܢܰܦܫܝ̱܇ ܘܰܒܣܶܦܘ̈ܳܬ̣ܳܐ ܕܫܽܘܒܚܳܐ ܢܫܰܒܚܳܟ ܦܽܘܡܝ̱܀

ܡܶܢ ܤܳܗ̈ܕܶܐ ܢܶܒܥܶܐ. ܘܰܠܗܽܘܢ ܢܶܬܟܰܫܰܦ. ܘܗܶܢܽܘܢ ܢܶܗܘܽܘܢ ܠܳܟ. ܡܦܺܝ̈ܤܳܢܶܐ ܚܠܳܦܰܝܢ܀

ܐܶܬܕܟܰܪܬܳܟ ܥܰܠ ܬܶܫܘܺܝܬܝ. ܘܰܒܠܰܝ̈ܠܰܘܳܬܳܐ ܪܢܺܝܬ ܒܳܟ܀

ܡܳܐ ܕܠܰܝܬ ܚܰܒܺܝܒܳܐ. ܘܠܳܐ ܪܳܚܡܳܐ ܕܦܳܪܶܩ. ܬܰܡܳܢ ܗܘܺܝ ܠܺܝ ܡܳܪܝ. ܤܢܺܐܓܪܳܐ ܕܒܳܟ ܛܶܦܤܶܬ܀

ܡܶܛܽܠ ܕܰܗܘܰܝܬ ܠܺܝ ܡܥܰܕܪܳܢܳܐ܇ ܘܰܒܛܶܠܳܠܳܐ ܕܟܶܢ̈ܦܰܝܟ ܐܶܣܬܰܬܰܪ܀

ܡܳܐ ܕܢܳܗܡܳܐ ܢܽܘܪܳܐ. ܘܬܰܘܩܶܕܝ ܠܪ̈ܰܫܺܝܥܶܐ. ܛܰܠܳܐ ܕܛܰܝܒܽܘܬܳܟ. ܪܽܘܤ ܥܠܰܝ ܕܠܳܐ ܐܺܩܰܕ܀

ܢܶܦܩܰܬ ܢܰܦܫܝ̱ ܒܳܬ̣ܪܳܟ܇ ܘܰܥܠܰܝ ܣܶܡܟܰܬ ܝܰܡܺܝܢܳܟ܀

ܡܳܐ ܕܬܳܩܶܢ ܬܪܽܘܢܽܘܤ: ܕܺܝܠܳܟ ܐܰܠܳܗܳܐ. ܢܩܽܘܡܽܘܢ ܤܳܓܽܘܕܰܝ̈ܟ. ܒܓܰܒܳܐ ܕܝܰܡܺܝܢܳܐ܀

ܗܶܢܽܘܢ ܒܥܰܘ ܕܢܰܘܒܕܽܘܢ ܠܢܰܦܫܝ̱܇ ܘܢܶܥܠܽܘܢ ܒܬܰܚܬܳܝ̈ܬܳܗ̇ ܕܰܐܪܥܳܐ܀

ܡܳܐ ܕܦܳܪܫܰܬ ܬܰܡܳܢ. ܓܕܰܝ̈ܳܐ ܠܤܶܡܳܠܳܐ. ܥܰܡ ܐܶܡܪ̈ܰܝܟ ܐܰܫܘܳܢܝ. ܪܳܥܝܳܐ ܫܡܰܝܳܢܳܐ܀

ܘܢܶܫܬܰܠܡܽܘܢ ܠܚܰܪܒܳܐ ܘܡܶܐܟ̣ܽܘܠܬܳܐ ܠܬܰܥ̈ܠܶܐ ܢܶܗܘܽܘܢ܇ ܘܡܰܠܟܳܐ ܢܶܚܕܶܐ ܒܰܐܠܳܗܳܐ܀

ܡܳܐ ܕܝܳܗܒܰܬ ܐܰܓܪܳܐ. ܠܟܺܐܢ̈ܶܐ ܘܙܰܕܺܝ̈ܩܶܐ. ܢܓܽܘܠܽܘܢ ܥܠܰܝܢ ܪ̈ܰܚܡܰܝܟ. ܡܫܺܝܚܳܐ ܡܠܶܐ ܪ̈ܰܚܡܶܐ܀

ܘܢܶܫܬܰܒܗܰܪ ܟܽܠ ܕܝܳܡܶܐ ܒܶܗ܇ ܡܶܛܽܠ ܕܢܶܣܬܟ̣ܰܪ ܦܽܘܡܗܽܘܢ ܕܕ̈ܰܓܳܠܶܐ܀

ܐܰܢܺܝܚ ܘܚܰܤܳܐ ܠܗܽܘܢ. ܡܳܪܝܳܐ ܠܥܰܢܺܝ̈ܕܰܝܢ. ܕܰܫܟܶܒܘ ܥܰܠ ܤܰܒܪܳܟ. ܘܚܳܝܪܺܝܢ ܠܡܶܐܬܺܝܬܳܟ܀

ܫܽܘܒܚܳܐ ܘܡܶܢ ܥܳܠܰܡ: ܫܽܘܒܚܳܐ ܠܗܰܘ ܕܰܐܘܪܶܒ. ܕܽܘܟܪܳܢ ܝܳܠܶܕܬܶܗ. ܘܢܰܨܰܚ ܠܩܰܕܺܝ̈ܫܶܐ. ܘܢܰܚܶܡ ܠܥܰܢܺܝ̈ܕܶܐ܀

ܡܙܡܘܪܐ: ܩܝܓ

ܫܽܘܒܚܳܐ ܠܒܳܪܽܘܝܶܗ ܕܢܽܘܗܪܳܐ. ܫܰܒܰܚܘ̱ ܥܰܒܕܰܘ̈ܗ̱ܝ ܕܡܳܪܝܳܐ. ܫܰܒܰܚܘ̱ ܠܰܫܡܶܗ ܕܡܳܪܝܳܐ܀

ܢܶܗܘܶܐ ܫܡܶܗ ܕܡܳܪܝܳܐ ܡܒܰܪܰܟ ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ܀

ܡܶܢ ܡܰܕܢܳܚܰܘ̈ܗ̱ܝ ܕܫܶܡܫܳܐ ܘܰܥܕܰܡܳܐ ܠܡܰܥܪ̈ܳܒܰܘܗ̱ܝ. ܪܰܒ ܗ̱ܽܘ ܫܡܶܗ ܕܡܳܪܝܳܐ܀

ܘܪܳܡ ܥܰܠ ܟܽܠܗܽܘܢ ܥܰܡ̱̈ܡܶܐ ܡܳܪܝܳܐ ܘܥܰܠ ܫܡܰܝܳܐ ܐܺܝ̣ܩܳܪܶܗ܀

ܡܰܢܽܘ ܐܰܝܟ ܡܳܪܝܳܐ ܐܰܠܳܗܰܢ ܕܝܳܬܶܒ ܒܪܰܘܡܳܐ ܘܚܳܙܶܐ ܒܥܽܘܡܩܳܐ ܒܰܫܡܰܝܳܐ ܘܒܰܐܪܥܳܐ܀

ܡܪܺܝܡ ܡܶܢ ܩܺܩܰܠܬܳܐ ܠܒܳܝܫܳܐ ܕܢܰܘܬܒܺܝܘܗ̱ܝ ܥܰܡ ܪܰܘܪ̈ܒܳܢܶܐ ܕܥܰܡܳܐ܀

ܡܰܘܬܶܒ ܥܩܰܪܬܳܐ ܒܒܰܝܬܐ. ܘܶܐܡܳܐ ܕܰܒܢܰܝ̈ܳܐ ܟܰܕ ܚܳܕܝܳܐ: ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ ܒܰܪܶܟܡܳܪܝ̱܀

ܘܡܰܩܦܝܢ ܡܙܡ̄ ܕܫܰܒܰܚܘ ܠܡܳܪܝܳܐ ܡ̣ܢ ܫܡܰܝܳܐ ܘܫܰܪܟܐ܀

ܫܽܘܒܚܳܐ ܘܥܶܩܒܳܐ: H

ܐܰܫܘܳܢܝ ܠܗܰܘ ܨܰܦܪܳܐ. ܕܒܶܗ ܚܳܕܶܝܢ ܟܺܐܢ̈ܶܐ. ܘܒܶܗ ܫܳܩܠܺܝܢ ܤܳܗ̈ܕܶܐ. ܐܰܓܪܳܐ ܕܥܰܡܠܰܝ̈ܗܽܘܢ܀

ܤܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀

ܣܶܕܪܳܐ ܓܰܘܳܢܳܝܐ:

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ. ܘܢܰܨܰܚ ܕܽܘܟܪܳܢ ܩܰܕܺܝܫܰܘ̈ܗܝ ܒܟܽܠ ܐܰܬܰܪ ܘܦܶܢ̈ܝܳܢ ܘܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܪܰܣܶܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܟܰܕ ܥܽܘܗܕܳܢܳܐ ܪܚܺܝܡܳܐ ܘܚܰܒܺܝܒܳܐ ܘܰܡܝܰܩܪܳܐ ܥܳܒܕܺܝܢܰܢ. ܠܗܳܝ ܫܳܘܝܰܬ ܠܛܽܘ̈ܒܶܐ ܘܰܫܒܺܝܚܰܬ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܡܒܰܪܰܟܬܳܐ ܘܰܡܥܰܠܰܝܬܳܐ ܘܰܒܬܽܘܠܰܬ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܥܰܡܳܗ̇ ܕܶܝܢ ܢܶܬܶܥ̱ܗܰܕ ܠܰܢ̈ܒܺܝܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ ܠܶܐܘܰܢܓܶܠܺܝ̈ܣܛܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ. ܠܟܺܐܢ̈ܶܐ ܘܰܠܟܳܗ̈ܢܶܐ ܘܠܰܐܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ ܒܬܽܘ̈ܠܶܐ ܘܩܰܕܺܝ̈ܫܶܐ ܘܢܰܟ̈ܦܶܐ ܘܨܰܝܳܡ̈ܶܐ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܘܟܽܠܗܽܘܢ ܣܳܥܪ̈ܰܝ ܫܰܦܺܝܪ̈ܳܬܳܐ. ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܰܒܬܰܟܫ̈ܦܳܬܗܽܘܢ ܡܩܰܒ̈ܠܳܬܳܐ ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܰܫܒܽܘܩ ܚܰܘܒܰܝ̈ܢ ܘܚܰܣܳܐ ܚܛܳܗܰܝ̈ܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܒܓܽܘܕܰܝ̈ܗܽܘܢ ܕܩܰܕܺܝ̈ܫܰܝܟ ܢܶܬܛܰܟܰܣ ܘܰܒܣܺܝ̈ܥܳܬܗܽܘܢ ܢܶܬܚܰܠܰܛ ܘܒܰܝܢܳܬܗܽܘܢ ܢܶܗܘܶܐ ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀

ܩܠܐ ܩܕܡܝܐ ܕܨܦܪܐ
ܒܩ̄: ܐܺܝܢ ܤܳܗ̈ܕܶܐ ܡܶܛܽܠ ܡܳܢܳܐ
ܓܘܫܡܐ ܬܡܝܢܝܐ H

ܦܶܬܓܳܡܳܐ: ܗܳܐ ܠܡܺܝ̈ܬܶܐ ܥܳܒܶܕ ܐܰܢ̱ܬ ܬܶܕܡܪ̈ܳܬܳܐ ܗ̄: ܒܥܶܛܪܳܐ ܕܒܶܤ̈ܡܶܐ ܕܶܐܬܩܰܪܰܒ. ܘܟܳܗ̈ܢܶܐ ܕܩܰܪܒܽܘܗ̱ܝ ܕܽܘܟܪܳܢ ܥܰܢܺܝ̈ܕܶܐ ܥܳܒܕܳܐ ܥܺܕܬܳܐ ܡܗܰܝܡܰܢܬܳܐ. ܕܫܰܝܢܶܗ ܕܰܐܒܳܐ ܢܰܡܠܶܟ ܒܳܗ̇. ܘܒܺܝܫܳܐ ܢܶܤܬܚܶܦ ܘܝܰܠ̈ܕܶܝܗ̇ ܢܰܤܩܽܘܢ ܠܳܟ ܫܽܘܒܚܳܐ ܕܰܐܢ̱ܬ ܗ̱ܽܘ ܡܢܰܚܡܳܢܗܽܘܢ܀

ܓܰܢ̱ܒܳܪ̈ܶܐ ܢܩܽܘܡܽܘܢ ܘܢܰܘܕܽܘܢ ܠܳܟ ܗ̄: ܠܩܰܒܪܳܐ ܢܳܚܶܬ ܫܽܘܠܛܳܢܶܗ. ܕܗܰܘ ܚܰܝܠܳܐ ܡܫܰܒܚܳܐ. ܘܤܳܥܰܪ ܬܰܡܳܢ ܬܶܕܡܽܘܪܬܳܐ ܘܬܳܗܪܺܝܢ ܡܰܠܰܐܟ̈ܶܐ. ܒܓܰܪ̈ܡܶܐ ܙܪ̈ܺܝܩܶܐ ܕܡܶܬܟܰܢܫܺܝܢ ܘܫܽܘܒܚܳܐ ܠܳܒܫܺܝܢ. ܢܰܦܫܳܐ ܘܦܰܓܪܳܐ ܫܰܘܝܳܐܺܝܬ ܘܩܳܝܡܺܝܢ ܕܠܳܐ ܚܒܳܠܳܐ܀

ܫܽܘܒܚܳܐ: ܫܽܘܒܚܳܐ ܠܳܟ ܡܳܪܝ ܕܰܒܩܳܠܳܟ. ܩܳܡ ܠܳܥܳܙܳܪ ܐܰܚܽܘܗ̇ ܕܡܰܪܝܰܡ ܘܰܕܡܳܪܬܳܐ ܡܶܢ ܒܳܬܰܪ ܕܰܤܪܺܝ. ܘܰܒܡܶܠܬܳܟ ܬܽܘܒ ܐܶܬܬܥܺܝܪܰܬ ܒܰܪ̱ܬ ܝܽܘܐܳܪܳܫ. ܘܰܒܩܳܠܳܐ ܐ̱ܚܪܺܢܳܐ ܕܩܳܪܶܝܬ ܩܳܝܡܺܝܢ ܥܰܢܺܝ̈ܕܶܐ܀

ܡܶܢ ܥܳܠܰܡ: ܫܽܘܒܚܳܐ ܠܚܰܝܠܳܐ ܥܶܠܳܝܳܐ. ܕܰܠܒܶܝܬ ܡܺܝ̈ܬܶܐ ܢܚܶܬ ܤܰܥܪܶܗ ܠܳܐܕܳܡ ܥܰܦܪܳܢܳܐ. ܘܗܳܟܰܢ ܐܶܡܰܪ ܠܶܗ. ܠܳܐ ܬܶܟܪܶܐ ܠܳܟ ܥܰܦܪܳܢܳܐ. ܕܥܰܠ ܦܽܘܩܕܳܢܝ ܥܒܰܪܬ. ܕܶܐܢܳܐ ܐ̱ܢܳܐ ܒܪܳܐ ܕܰܐܠܳܗܳܐ ܕܰܡܡܺܝܬ ܐܳܦ ܡܰܚܶܐ܀

ܕܝܳܠܕܰܬ ܐܰܠܳܗܳܐ: ܕܠܳܐ ܩܰܢܝܳܐ ܘܰܕܠܳܐ ܕܝܽܘܬܳܐ ܫܩܰܠ ܓܰܒܪܺܐܝܶܠ. ܐܶܓܰܪܬܳܐ ܕܡܰܠܝܳܐ ܫܰܝܢܳܐ ܘܰܡܛܳܐ ܨܶܝܕ ܡܰܪܝܰܡ. ܘܶܐܡܰܪ ܠܳܗ̇ ܫܠܳܡܳܐ ܥܰܡܶܟܝ ܡܳܪܰܢ ܥܰܡܶܟܝ ܘܡܶܢܶܟܝ ܕܳܢܰܚ ܦܳܪܽܘܩܳܐ ܕܟܽܠܗܶܝܢ ܒܶܪ̈ܝܳܬܳܐ܀

ܟܺܐܦܳܐ ܒܕܰܒܪܳܐ ܝܶܠܕܰܬ ܗ̱ܘܳܬ ܢܰܗܪ̈ܰܘܳܬܳܐ. ܘܨܳܪܰܬ ܛܘܽܦܤܶܟܝ ܓܰܠܝܳܐܺܝܬ ܒܬܽܘܠܬܳܐ ܩܰܕܺܝܫܬܳܐ. ܕܰܕܢܰܚ ܡܶܢܶܟܝ ܒܰܒܪܺܝܬܳܐ. ܒܪܳܐ ܕܰܐܠܳܗܳܐ ܗܽܘܝܽܘ ܟܺܐܦܳܐ ܕܰܫܪܳܪܳܐ. ܐܰܝܟ ܕܶܐܡܰܪ ܦܰܘܠܳܘܣ܀

ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ ܢܗܶܐ ܕܽܘܟܪܳܢܳܐ. ܠܰܒܬܽܘܠܬܳܐ ܕܟܺܝܬܳܐ ܡܰܪܝܰܡ ܝܳܠܕܰܬ ܐܰܠܳܗܳܐ. ܕܕܰܟܝܳܐ ܗ̱ܘܳܬ ܘܩܰܕܺܝܫܳܐ ܗ̱ܘܳܬ ܒܰܒܬܽܘܠܽܘܬܳܗ̇. ܘܫܶܦܪܰܬ ܠܶܗ ܠܰܡܠܶܟ ܡܰܠ̈ܟܶܐ ܘܰܢܚܶܬ ܫܪܳܐ ܒܥܽܘܒܳܗ̇܀

ܡܶܛܽܠܳܬܶܟܝ ܐܳܘ ܒܬܽܘܠܬܳܐ ܡܰܠܝܰܬ ܫܽܘܦܪ̈ܶܐ. ܐܶܬܢܰܒܺܝ ܕܰܘܺܝܕ ܡܰܠܟܳܐ ܘܗܳܟܰܢܳܐ ܐܶܡܰܪ. ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ ܩܰܕܺܝܫܳܐܺܝܬ. ܘܶܐܬܪܰܓܪܰܓ ܡܰܠܟܳܐ ܠܫܽܘܦܪܳܗ̇ ܘܰܢܚܶܬ ܫܪܳܐ ܒܥܽܘܒܳܗ̇܀

ܕܩܰܕܺܝ̈ܫܶܐ: ܥܰܠ ܗܳܝ ܟܺܐܦܳܐ ܕܒܶܝܬ ܫܶܡܥܽܘܢ. ܪܺܝܫ ܬܰܠܡܺܝ̈ܕܶܐ ܒܰܢܝܳܐ ܐ̱ܢܳܐ ܘܠܳܐ ܕܳܚܠܳܐ ܐ̱ܢܳܐ ܥܺܕܬܳܐ ܥܢܳܬ ܘܶܐܡܪܰܬ. ܛܪܰܘ ܒܺܝ ܓܰܠ̱̈ܠܶܐ ܘܡܰܚܫܽܘ̈ܠܶܐ ܘܠܳܐ ܐܰܙܺܝܥܽܘܢܝ. ܘܰܐܩܪܶܒ ܥܰܡܝ ܢܶܤܛܽܘܪ ܠܺܝܛܳܐ ܘܰܗܘܳܬ ܡܰܦܽܘܠܬܶܗ܀

ܒܰܨܠܰܘ̈ܳܬܗܽܘܢ ܕܰܫܠܺܝ̈ܚܶܐ ܬܪܶܥܤܰܪ ܕܰܓܒܰܝܬ ܠܰܬܪܶܥܤܰܪ ܝܰܪ̈ܚܶܐ ܕܫܰܢ̱ܬܳܐ ܒܰܪܶܟ ܒܛܰܝܒܽܘܬܳܟ. ܢܺܐܬܶܐ ܩܰܝܛܳܐ ܒܰܥܝܳܕܶܗ ܘܤܰܬܘܳܐ ܒܙܰܒܢܶܗ. ܘܡܳܪܝܳܐ ܢܶܬܶܠ ܛܳܒ̈ܳܬܶܗ ܘܰܐܪܥܳܐ ܥ̈ܰܠܠܳܬܳܗ̇܀

ܐܺܝܢ ܤܳܗ̈ܕܶܐ ܡܶܛܽܠ ܡܳܢܳܐ ܐܰܤܠܺܝܬܽܘܢܳܝܗ̱ܝ. ܠܥܳܠܡܳܐ ܗܳܢܳܐ ܥܳܒܽܘܪܳܐ ܕܟܽܠ ܐ̱ܢܳܫ ܪܳܚܶܡ ܠܶܗ. ܥܰܠ ܕܰܚܙܰܝܢܳܝܗ̱ܝ ܕܕܰܓܳܠܰܐ ܗ̱ܘ ܒܰܪ̈ܓܺܝܓܳܬܶܗ. ܕܰܠܩܰܕ̈ܡܳܝܶܐ ܘܰܐܚܪ̈ܳܝܶܐ ܕܪܰܚܡܽܘܗ̱ܝ ܤܢܳܐ ܐܶܢܽܘܢ܀

ܚܙܰܐܽܘܗ̱ܝ ܤܳܗ̈ܕܶܐ ܠܰܡܫܺܝܚܳܐ ܕܰܬܠܶܐ ܒܩܰܝܤܳܐ ܘܰܬܪܺܝܥ ܤܶܛܪܶܗ ܒܠܽܘܟܳܝܬܳܐ ܘܪܳܕܶܝܢ ܕܡܳܐ ܘܡܰܝ̈ܳܐ. ܘܰܪܗܶܛܘ ܠܰܒܶܒܘ ܠܰܚ̈ܕܳܕܶܐ ܘܗܳܟܰܢ ܐܶܡܰܪܘ ܬܰܘ ܕܰܢܡܽܘܬ ܡܶܛܽܠ ܡܳܪܰܢ ܐܰܝܟܰܢ ܕܡܺܝܬ ܚܠܳܦܰܝܢ܀

ܕܰܬܝܳܒܽܘܬܳܐ: ܗܳܐ ܬܝܳܒܽܘܬܳܐ ܩܳܪܝܳܐ ܠܳܟ. ܐܳܘ ܚܰܛܳܝܳܐ ܩܽܘܡ ܙܶܠ ܥܰܡܳܗ̇ ܒܚܰܕܽܘܬܳܐ ܘܰܛܦܰܣ ܬܚܶܝܬ ܟܶܢܦܶܝ̈ܗ̇. ܠܳܐ ܬܶܫܬܰܘܕܶܐ ܝܽܘܡ ܡܶܢ ܝܽܘܡ. ܕܗܳܐ ܬܳܐܶܒ ܐ̱ܢܳܐ ܕܶܐܢ ܝܰܘܡܳܢܳܐ ܐܰܘ ܠܰܡܚܳܪ ܡܰܕܪܶܟ ܠܳܟ ܡܰܘܬܳܐ܀

ܠܳܐ ܚܛܳܬ ܠܳܟ ܐܰܪܥܳܐ ܟܽܠܳܗ̇ ܐܰܝܟ ܕܶܐܢܳܐ ܚܛܺܝܬ. ܘܠܳܐ ܐܰܪܓܙܽܘܟ ܟܽܠ ܡܰܪ̈ܳܚܶܐ ܐܰܟܡܳܐ ܕܰܐܪܓܶܙܬܳܟ. ܚܰܝܰܝ̈ ܟܪܶܝܢ ܘܡܰܘܬܳܐ ܩܰܪܺܝܒ ܘܡܳܢܳܐ ܐܶܥܒܶܕ ܒܗܰܘ ܚܽܘܒܳܐ ܕܫܰܠܚܳܟ ܨܶܐܕܰܝܢ ܚܽܘܣ ܘܶܐܬܪܰܚܰܡܥܠܰܝܢ܀

ܗܰܘ ܬܰܠܡܺܝܕܳܐ ܕܰܒܟܳܐ ܗ̱ܘܳܐ ܗܽܘ ܡܰܠܶܦ ܠܳܟ. ܡܽܘܢ ܬܶܥܒܶܕ ܐܳܘ ܚܰܛܳܝܳܐ. ܐܶܢܗܽܘ ܕܬܳܐܶܒ ܐܰܢ̱ܬ. ܟܰܕ ܐܶܫܬܰܥܒܰܕ ܠܰܟܦܽܘܪܝܳܐ ܒܡܶܠܟܶܗ ܕܒܺܝܫܳܐ. ܒܟܳܐ ܒܰܚܢܰܓܬܳܐ. ܘܶܐܬܚܰܤܺܝ ܒܕܶܡ̈ܥܶܐ ܕܒܳܒ̈ܳܬܶܗ܀

ܗܳܘܶܐ ܒܶܟܝܳܐ ܠܚܰܛܳܝ̈ܶܐ ܒܓܰܘ ܒܶܝܬ ܕܺܝܢܳܐ. ܘܡܶܬܒܰܚܪܺܝܢ ܤܽܘܥܪ̈ܳܢܰܝܗܽܘܢ. ܬܰܡܳܢ ܐܰܝܟ ܫܶܡܫܳܐ. ܢܳܦܩܳܐ ܬܒܰܥܬܳܐ ܕܟܺܐܢܽܘܬܳܐ. ܡܶܢ ܕܰܝܳܢܳܐ ܘܠܰܝܬ ܬܰܡܳܢ ܡܰܤܰܒ ܒܰܐܦ̈ܶܐ. ܘܫܽܘܚܕܳܐ ܠܳܐ ܡܩܰܒܠܺܝܢ܀

ܕܥܰܢܺܝ̈ܕܶܐ: ܗܰܘ ܒܳܪܽܘܝܳܐ ܚܰܟܺܝܡܳܐ ܕܒܰܡܗܺܝܪܽܘܬܶܗ. ܟܰܕܢܳܗ̇ ܠܟܽܠܳܗ̇ ܥܳܡܰܪܬܳܐ ܬܚܶܝܬ ܢܺܝܪܶܗ ܕܡܰܘܬܳܐ. ܗܽܘ ܫܳܪܶܐ ܠܡܰܠ̈ܟܶܐ ܪ̈ܳܡܶܐ ܡܶܢ ܕܰܪ̈ܓܰܝܗܽܘܢ. ܘܰܠ̈ܕܰܝܳܢܶܐ ܥܰܙܺܝ̈ܙܶܐ ܡܶܢ ܐܽܘܚܕܳܢܰܝ̈ܗܽܘܢ܀

ܗܰܘ ܕܝܰܗ̱ܒ ܗ̱ܘܳܐ ܢܽܘܗܪܳܐ ܠܤܰܡܝܳܐ. ܘܫܶܡܥܳܐ ܠܕܽܘܓܳܐ. ܘܰܦܫܰܛ ܠܶܫܳܢܶܗ ܕܦܺܐܩܳܐ ܘܠܰܡܫܰܪܝܳܐ ܐܰܚܠܶܡ. ܗܽܘ ܢܶܪܽܘܣ ܛܰܠܳܐ ܕܪ̈ܰܚܡܶܐ ܥܰܠ ܓܰܪ̈ܡܰܝܗܽܘܢ ܕܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܰܫܟܶܒܘ ܥܰܠ ܤܰܒܪܶܗ܀

ܒܥܶܛܪܳܐ ܕܒܶܤ̈ܡܶܐ ܢܶܬܚܰܤܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܕܡܳܟ ܚܰܝܳܐ. ܘܰܢܩܽܘܡܽܘܢ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ. ܘܢܰܤܩܽܘܢ ܠܳܟ ܫܽܘܒܚܳܐ ܡܫܺܝܚܳܐ ܕܰܐܢ̱ܬ ܗ̱ܽܘ ܡܢܰܚܡܳܢܗܽܘܢ܀

ܩܠܐ ܬܪܝܢܐ ܕܨܦܪܐ
ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ
ܓܘܫܡܐ ܬܡܝܢܝܐ H

ܦܶܬܓܳܡܳܐ: ܡܫܰܡ̈ܫܳܢܶܐ ܕܥܳܒܕܺܝܢ ܨܶܒܝܳܢܶܗ ܕܡܳܪܝܳܐ: ܒܨܰܦܪܳܐ ܬܳܒܥܺܝܢ ܠܶܗ ܐܰܓܪܳܐ. ܦܳܥ̈ܠܶܐ ܠܡܳܪܰܢ ܕܰܒܟܰܪܡܶܗ ܦܠܰܚܘ. ܘܳܐܡܪܺܝܢ ܠܶܗ ܕܗܰܒܠܰܢ ܐܰܓܪܳܐ ܕܡܶܢ ܨܰܦܪܳܐ ܠܪܰܡܫܳܐ ܦܠܰܚܢܰܢ. ܘܶܐܡܰܪ ܠܗܽܘܢ ܕܝܳܗܶܒ ܐ̱ܢܳܐ ܠܟܽܘܢ. ܡܶܕܶܡ ܕܰܠܟܽܘܢ ܐܶܫܬܰܘܕܺܝܬ. ܘܬܽܘܒ ܡܰܘܤܶܦ ܐ̱ܢܳܐ ܠܟܽܘܢ ܓܰܠܝܽܘܬ ܐܰܦ̈ܶܐ ܒܢܽܘܚܳܡܳܐ܀

ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ: ܨܰܦܪܶܗ ܕܡܳܪܰܢ ܡܰܛܺܝ ܠܶܗ. ܘܰܛܥܺܝܢ ܛܽܘܒܳܐ ܠܰܕܫܳܘܶܝܢ ܠܶܗ. ܟܽܠ ܕܰܫܩܺܝܠ ܝܽܘܩܪܳܐ ܕܫܶܢܬܳܐ. ܘܠܶܫܳܢܶܗ ܙܳܡܰܪ ܫܽܘܒܚܳܐ. ܥܺܝܪܳܐ ܕܠܳܐ ܕܳܡܶܟ ܝܳܗܶܒ ܚܠܳܦ ܥܰܡܠܰܝ̈ܗܽܘܢ ܦܽܘܪܥܳܢܳܐ ܓܢܽܘܢܳܐ ܘܡܰܠܟܽܘܬܳܐ ܘܚܰܝ̈ܶܐ ܚܰܕ̈ܬܶܐ ܕܠܳܐ ܥܳܒܪܺܝܢ܀

ܫܽܘܒܚܳܐ: ܫܽܘܒܚܳܐ ܠܶܗ ܠܰܒܪܳܐ ܒܽܘܟܪܳܐ. ܕܰܢܚܶܬ ܠܰܫܝܽܘܠ ܘܰܠܡܰܘܬܳܐ ܙܟܳܐ. ܚܙܳܝܗ̱ܝ ܐܳܕܳܡ ܘܶܐܬܒܰܝܰܐ ܒܶܗ. ܘܟܰܦ ܨܰܘܪܶܗ ܘܰܤܓܶܕ ܩܽܘܕܡܰܘܗ̱ܝ ܘܶܐܡܰܪ ܠܶܗ ܫܒܽܘܩ ܠܺܝ ܤܰܟܠܽܘܬܝ ܘܰܐܦܶܩܰܝܢܝ ܡܳܪܝ ܡܶܢ ܗܳܪܟܳܐ. ܘܰܐܦܢܳܢܝ ܥܰܡ ܝܰܠ̈ܕܰܝ. ܠܦܰܪܕܰܝܤܳܐ ܕܢܶܦܩܶܬ ܡܶܢܶܗ܀

ܡܶܢ ܥܳܠܰܡ: ܒܨܰܦܪܳܐ ܢܶܤܓܽܘܕ ܥܰܡ ܥܺܝܪ̈ܶܐ. ܘܰܢܝܰܒܶܒ ܥܰܡ ܡܰܠܰܐܟ̈ܶܐ ܒܪܽܘܚ. ܘܢܶܗܘܶܐ ܚܰܒܪ̈ܶܐ ܒܬܶܫܡܶܫܬܰܢ. ܠܰܢܒܺܝ̈ܶܐ ܐܳܦ ܠܰܫܠܺܝ̈ܚܶܐ ܘܤܳܗ̈ܕܶܐ ܪ̈ܚܽܘܡܰܘܗ̱ܝ ܕܰܡܫܺܝܚܳܐ. ܢܩܰܪܒܽܘܢ ܚܠܳܦܰܝܢ ܒܳܥܽܘܬܳܐ. ܕܫܰܝܢܳܐ ܘܰܫܠܳܡܳܐ. ܠܰܐܪܥܳܐ ܘܟܽܠܗܽܘܢ ܥܳܡܽܘܪ̈ܶܝܗ̇܀

ܕܝܳܠܕܰܬ ܐܰܠܳܗܳܐ: ܨܪܳܐ ܢܽܘܪܳܢܳܐ ܠܓܰܘܙܰܠܬܳܐ ܘܕܳܫ ܥܰܠ ܓܽܘܡܪ̈ܶܐ ܒܰܝܢܳܬ ܓܺܝ̈ܓܠܶܐ. ܘܤܰܕܩܶܗ ܠܳܐܐܰܪ ܟܰܕ ܢܳܚܶܬ. ܘܰܡܛܳܐ ܠܢܳܨܪܰܬ ܨܶܝܕ ܡܰܪܝܰܡ. ܘܶܐܡܰܪ ܠܳܗ̇ ܫܠܳܡܳܐ ܥܰܡܶܟܝ ܡܳܪܰܢ ܥܰܡܶܟܝ ܡܒܰܪܰܟܬܳܐ. ܕܦܺܐܪܳܐ ܕܰܒܟܰܪܤܶܟܝ ܡܰܥܒܰܪ ܚܶܤܕܳܐ ܕܒܶܝܬ ܐܳܕܳܡ܀

ܡܰܢܽܘ ܚܙܳܐ ܬܰܪܬܶܝܢ ܓܽܘܦܢܺܝ̈ܢ. ܕܒܶܐܫܟܳܪܶܗ ܕܡܳܪܝܳܐ ܢܨܺܝ̈ܒܳܢ. ܡܶܢ ܚܰܡܪܳܐ ܕܰܤܓܽܘܠܰܝ̈ܗܶܝܢ. ܒܪܺܝܬܳܐ ܟܽܠܳܗ̇ ܡܶܬܒܰܤܡܳܐ. ܓܽܘܦ̈ܢܶܐ ܡܰܪܝܰܡ ܘܶܐܠܺܝܫܒܰܥ. ܤܓܽܘ̈ܠܶܐ ܡܫܺܝܚܳܐ ܘܝܽܘܚܰܢܳܢ. ܚܰܬܢܳܐ ܘܫܰܘܫܒܺܝܢܳܐ. ܘܡܳܟܽܘܪܳܐ ܕܥܺܕܰܬ ܩܽܘܕܫܳܐ܀

ܒܰܨܠܽܘܬܳܗ̇ ܘܰܒܒܳܥܽܘܬܳܗ̇ ܕܰܒܬܽܘܠܬܳܐ ܩܰܕܺܝܫܬܳܐ ܡܰܪܝܰܡ. ܟܠܺܝ ܡܶܢܰܢ ܒܰܪ ܐܰܠܳܗܳܐ. ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ. ܘܗܰܒܠܰܢ ܝܰܪ̈ܚܶܐ ܕܚܰܕ̈ܘܳܬܳܐ ܘܟܰܗܺܝ̈ܢܳܬܳܐ ܕܰܫ̈ܢܰܝܳܐ. ܘܢܶܗܘ̈ܝܳܢ ܠܰܢܝܳܚܳܟ ܬܶܫܡ̈ܫܳܬܰܢ ܘܰܨܠܰܘ̈ܳܬܰܢ܀

ܒܕܽܘܟܪܳܢܳܗ̇ ܕܰܡܒܰܪܰܟܬܳܐ ܫܡܰܝ̈ܳܐ ܚܳܕܶܝܢ ܘܰܐܪܥܳܐ ܪܳܘܙܳܐ. ܡܶܢ ܥܽܘܒܳܗ̇ ܕܰܟܝܳܐ ܕܢܰܚ ܠܰܢ ܦܳܪܽܘܩܳܐ ܕܡܰܢܗܰܪ ܠܶܗ ܠܥܳܠܡܳܐ. ܒܪܺܝܟ ܗ̱ܽܘ ܕܝܰܗ̱ܒܠܰܢ ܐܶܓܰܪܬܳܐ ܕܒܳܗ̇ ܢܶܬܟܰܬܒ̈ܳܢ ܨܠܰܘ̈ܳܬܰܢ ܘܢܰܤ̈ܩܳܢ ܠܰܐܠܳܗܳܐ ܦܺܝܪܡܳܐ ܕܰܡܠܶܐ ܬܰܪܥܽܘܬܳܐ܀

ܕܩܰܕܺܝ̈ܫܶܐ: ܒܰܫܠܺܝ̈ܚܶܐ ܬܰܘ ܢܶܬܓܰܘܰܣ ܕܒܽܐܘܠܨܳܢܰܝ̈ܗܽܘܢ ܠܰܡܫܺܝܚܳܐ ܫܦܰܪܘ. ܘܡܶܢܶܗ ܩܰܒܶܠܘ ܪܽܘܚܩܽܘܕܫܳܐ. ܘܰܩܠܺܝ̈ܕܶܐ ܕܪܰܘܡܳܐ ܘܥܽܘܡܩܳܐ. ܒܪܺܝܟ ܕܰܐܘܪܶܒ ܐܶܢܽܘܢ ܒܰܐܪܥܳܐ. ܘܰܥܒܰܕ ܐܶܢܽܘܢ ܟܳܪ̈ܽܘܙܶܐ ܘܗܳܐ ܝܰܘܡܳܢ ܢܳܨܚܺܝܢ ܕܽܘܟܪ̈ܳܢܰܝܗܽܘܢ ܒܰܒܪܺܝܬܳܐ܀

ܐܳܡܪܺܝܢ ܠܶܗ ܫܠܺܝ̈ܚܶܐ ܠܡܳܪܰܢ. ܕܟܽܠ ܡܶܕܶܡ ܫܒܰܩܢ ܘܶܐܬܰܝܢ ܒܳܬܪܳܟ. ܠܚܰܪܬܳܐ ܡܳܢܳܐ ܬܶܬܶܠ ܠܰܢ ܕܠܰܤܒܰܪܬܳܟ ܡܰܟܪܙܺܝܢܰܢ. ܘܰܥܢܳܐ ܡܳܪܰܢ ܘܶܐܡܰܪ ܠܗܽܘܢ. ܕܟܽܘܪ̈ܤܰܘܳܬܳܐ ܠܟܽܘܢ ܐܶܬܶܠ. ܕܬܶܬܒܽܘܢ ܘܰܬܕܽܘܢܽܘܢ. ܬܪܶܥܤܰܪ ܫܰܒ̈ܛܶܐ ܕܺܝܤܪܳܐܝܶܠ܀

ܐܳܡܪܺܝܢ ܤܳܗ̈ܕܶܐ ܠܕܰܝܳܢ̈ܶܐ ܕܡܳܪܳܐ ܐܺܝܬ ܠܰܢ ܒܰܫܡܰܝܳܐ ܠܥܶܠ. ܐܳܠܶܦ ܐܰܠ̈ܦܺܝܢ ܡܰܠܰܐܟ̈ܶܐ. ܘܪ̈ܶܒܽܘ ܪ̈ܶܒܘܳܢ ܩܕܳܡܰܘܗ̱ܝ ܩܳܝܡܺܝܢ. ܠܳܐ ܟܳܦܪܺܝܢܰܢ ܒܰܫܪܳܪܶܗ. ܕܠܰܝܬ ܡܳܪܳܐ ܠܒܰܪ ܡܶܢܶܗ. ܘܗܽܘ ܥܳܒܶܕ ܕܺܝܢܳܐ ܠܰܛܠܺܝ̈ܡܶܐ ܡܶܢ ܛܳܠܽܘ̈ܡܶܐ܀

ܛܥܺܝܢܺܝܢ ܤܳܗ̈ܕܶܐ ܒܺܐܝܕܰܝ̈ܗܽܘܢ. ܕܡܳܐ ܚܰܤܝܳܐ ܕܡܶܢ ܨܰܘܪ̈ܰܝܗܽܘܢ ܪܕܳܐ. ܘܰܡܩܰܪܒܺܝܢ ܠܶܗ ܠܰܐܠܳܗܳܐ ܐܰܝܟ ܪܽܘܡܝܳܢܳܐ ܘܗܳܟܰܢ ܐܳܡܪܺܝܢ. ܚܽܘܪ ܡܳܪܝ ܒܰܕܡܰܢ ܕܶܐܫܬܰܦܰܥ. ܘܠܳܐ ܟܦܰܪܢܰܢ ܒܳܟ ܒܽܐܘܠ̈ܨܳܢܰܝܢ. ܠܳܐ ܬܰܗܦܶܟ ܐܰܦܰܝ̈ܟ ܡܶܢ ܚܰܛܳܝ̈ܶܐ ܕܩܳܪܶܝܢ ܠܳܟ܀

ܕܚܰܕ ܩܢܽܘܡܳܐ: ܒܪܺܝܟܽ ܗ̱ܘ ܕܫܰܡܠܺܝ ܐܰܓܽܘܢܳܟ. ܘܰܚܬܰܡ ܟܠܺܝܠܳܐ ܕܢܶܨܚܳܢܰܝ̈ܟ. ܐܳܘ ܐܰܬܠܺܝܛܳܐ ܢܰܨܺܝܚܳܐ. ܩܰܕܺܝܫܳܐ ܡܳܪܝ ܒܰܪܨܰܘܡܳܐ. ܗܳܐ ܚܳܕܶܝܢ ܒܶܗ ܒܕܽܘܟܪܳܢܳܟ ܪܰܘܡܳܐ ܘܥܽܘܡܩܳܐ ܘܟܽܠ ܕܰܒܗܽܘܢ. ܘܡܰܤܩܺܝܢ ܬܶܫܒܽܘܚܬܳܐ ܠܰܐܒܳܐ ܘܠܰܒܪܳܐ ܘܪܽܘܚܩܽܘܕܫܳܐ܀

ܦܳܠܚܳܐ ܫܠܺܝܚܳܐ ܡܳܪܝ ܬܳܐܘܡܰܐ ܕܓܰܒܳܢ̱ܪܽܘܬܳܐ ܒܰܩܢܽܘܡܶܗ ܤܥܰܪ. ܘܰܐܦܢܺܝ ܠܥܰܡ̱̈ܡܶܐ ܛܳܥܰܝ̈ܳܐ. ܠܗܰܝܡܳܢܽܘܬܳܐ ܕܰܫܪܳܪܳܐ. ܨܰܠܳܐ ܘܰܒܥܺܝ ܡܶܢ ܡܳܪܳܟ. ܗܰܘ ܕܰܪܚܶܡܬܳܝܗ̱ܝ ܕܰܟܝܳܐܺܝܬ. ܕܰܢܒܰܛܶܠ ܤܶܕ̈ܩܶܐ ܘܚܶܪ̈ܝܳܢܶܐ ܡܶܢ ܓܰܘ ܥܺܕܬܶܗ܀

ܕܰܬܝܳܒܽܘܬܳܐ: ܒܟܽܠܙܒܰܢ ܘܰܒܟܽܠܥܶܕܳܢ: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ. ܒܪܳܐ ܬܰܝܳܒܳܐ ܩܕܳܡ ܐܰܒܽܘܗ̱ܝ ܩܥܳܐ. ܚܛܺܝܬ ܒܰܫܡܰܝܳܐ ܘܰܩܕܳܡܰܝܟ. ܘܠܳܐ ܫܳܘܶܐ ܐ̱ܢܳܐ ܕܰܒܪܳܟ ܐܶܬܩܪܶܐ. ܩܰܒܶܠܰܝܢܝ ܐܰܝܟ ܐܰܓܺܝܪܳܐ ܘܶܐܗܘܶܐ ܒܒܰܝܬܳܟ ܐܰܝܟ ܥܰܒܕܳܐ ܘܰܫܒܽܘܩ ܠܺܝ ܤܰܟܠܽܘܬܝ. ܐܰܢ̱ܬ ܐܰܠܳܗܳܐ ܡܪܰܚܡܳܢܳܐ܀

ܥܰܬܺܝܪܳܐ ܕܠܳܐ ܡܶܬܡܰܤܟܰܢ. ܗܳܐ ܤܢܺܝ̈ܩܶܐ ܥܰܠ ܬܰܪܥܳܟ ܩܳܝܡܺܝܢ. ܦܬܰܚ ܒܶܝܬܓܰܙܳܟ ܥܰܬܺܝܪܳܐ. ܘܡܰܠܳܐ ܠܗܽܘܢ ܤܽܘܢܩܳܢܰܝ̈ܗܽܘܢ. ܘܫܰܡܠܳܐ ܠܘܳܬܗܽܘܢ ܗܳܝ ܡܶܠܬܳܐ. ܕܶܐܡܰܪ ܦܽܘܡܳܟ ܩܰܕܺܝܫܳܐ. ܕܰܩܪܰܘ ܘܥܳܢܶܐ ܐ̱ܢܳܐ. ܘܩܽܘܫܽܘܢ ܘܶܐܢܳܐ ܦܳܬܰܚ ܐ̱ܢܳܐ܀

ܡܳܐ ܕܟܳܐܶܒ ܠܰܢ ܒܳܟܶܝܢܰܢ. ܘܡܳܐ ܕܢܳܚܘ ܟܺܐܒܰܝ̈ܢ ܛܥܰܝܢܳܝܗ̱ܝ ܠܳܐܤܝܳܐ. ܠܳܐ ܐ̱ܢܳܫ ܡܰܝܬܶܐ ܥܰܠ ܒܳܠܶܗ. ܕܚܰܪܬܶܗ ܕܥܳܠܡܳܐ ܒܬܰܪܥܳܐ ܩܳܝܡܳܐ. ܐܰܠܳܗܳܐ ܕܓܰܒܠܶܗ ܠܳܐܕܳܡ. ܠܳܐ ܬܰܪܦܶܐ ܒܰܢ ܐܺܝ̈ܕܰܝܳܐ. ܕܦܰܓܪܳܟ ܐܰܘܟܶܠܬܳܢ. ܘܰܕܡܳܟ ܚܰܝܳܐ ܐܰܫܩܺܝܬܳܢ܀

ܐܰܟܘܳܬܰܢ ܐܺܝܬܰܘܗ̱ܝ ܙܰܒܢܰܢ. ܘܠܰܢ ܕܳܡܶܐ ܕܳܪܳܐ ܕܺܐܝܬܰܝܢ ܒܶܗ. ܥܰܬܺܝܪ̈ܶܐ ܪܚܶܡܘ ܝܰܥܢܽܘܬܳܐ. ܘܡܶܤ̈ܟܺܢܶܐ ܕܰܓܳܠܽܘܬܳܐ. ܘܰܐܝܟ ܚܶܘܝܳܐ ܕܒܳܠܰܥ ܚܰܒܪܶܗ. ܒܳܠܥܺܝܢ ܐ̱ܢܳܫ̈ܳܐ ܠܰܚܕܳܕ̈ܶܐ. ܘܠܳܐ ܤܳܝܡܺܝܢ ܕܺܝܢܶܗ ܕܰܐܠܳܗܳܐ ܩܕܳܡ ܥܰܝ̈ܢܰܝܗܽܘܢ܀

ܕܥܰܢܺܝ̈ܕܶܐ: ܒܪܺܝܟ ܗ̱ܽܘ ܕܰܐܘܪܒܶܗ ܠܢܽܘܚܳܡܰܢ. ܘܰܐܤܓܺܝ ܠܳܗ̇ ܤܰܒܪܳܐ ܠܰܩܝܳܡܬܰܢ. ܘܤܳܗܶܕ ܦܰܘܠܳܘܣ ܛܽܘܒܳܢܳܐ. ܕܡܰܟܶܣ ܠܰܦܠܺܝܓܳܐ ܘܳܐܡܰܪ. ܤܰܟܠܳܐ ܙܰܪܥܳܐ ܕܙܳܪܰܥ ܐܰܢ̱ܬ ܐܶܢ ܠܳܐ ܡܳܐܶܬ ܠܳܐ ܚܳܝܶܐ. ܚܰܘܺܝ ܕܰܒܫܽܘܒܚܳܐ. ܩܳܐܶܡ ܓܶܢܤܳܐ ܕܒܶܝܬ ܐܳܕܳܡ܀

ܥܰܢܺܝ̈ܕܶܐ ܕܰܫܩܰܠܘ ܦܰܓܪܳܟ. ܘܒܰܕܡܳܟ ܚܰܝܳܐ ܬܽܘܒ ܐܶܬܚܰܤܺܝܘ. ܥܒܶܕ ܠܗܽܘܢ ܡܳܪܰܢ ܕܽܘܟܪܳܢܳܐ. ܒܽܐܘܪܺܫܠܶܡ ܗܳܝ ܕܒܰܫܡܰܝܳܐ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ. ܘܦܳܪܫܰܬ ܛܳܒ̈ܶܐ ܡܶܢ ܒܺܝ̈ܫܶܐ. ܒܰܐܦ̈ܶܐ ܓܰܠ̈ܝܳܬܳܐ ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ܀

ܩܽܘܩܠܺܝܳܘܢ ܬܡܺܝܢܳܝܳܐ ܕܟܳܗ̈ܢܶܐ H

ܟܳܗܢܰܝ̈ܟ ܢܶܠܒܫܽܘܢ ܙܰܕܺܝܩܽܘܬܳܐ ܘܙܰܕܺܝ̈ܩܰܝܟ ܫܽܘܒܚܳܐ ܗ̄ ܡܶܛܽܠ ܕܰܘܺܝܕ ܥܰܒܕܳܟ ܠܳܐ ܬܰܗܦܶܟ ܐܰܦܰܘ̈ܗ̱ܝ ܕܰܡܫܺܝܚܳܟ܀

ܝܺܡܳܐ ܡܳܪܝܳܐ ܠܕܰܘܺܝܕ ܒܰܫܪܳܪܳܐ ܕܠܳܐ ܢܶܗܦܽܘܟ ܡܶܢܶܗ ܗ̄ ܕܡܶܢ ܦܺܐܪ̈ܰܝ ܟܰܪܤܳܟ ܐܰܘܬܶܒ ܥܰܠ ܟܽܘܪܤܝܳܟ܀

ܐܶܢ ܢܶܛܪܽܘܢ ܒܢܰܝ̈ܟ ܩܝܳܡܝ ܗ̄ ܘܤܳܗܕܽܘܬܳܐ ܗܳܕܶܐ ܕܡܰܠܶܦ ܐ̱ܢܳܐ ܠܗܽܘܢ܀

ܐܳܦ ܡܶܢ ܒܢܰܝ̈ܗܽܘܢ ܢܶܬܒܽܘܢ ܠܥܳܠܰܡ ܥܳܠܡܺܝܢ ܥܰܠ ܟܽܘܪܤܝܳܟ ܗ̄ ܡܶܛܽܠ ܕܰܨܒܳܐ ܡܳܪܝܳܐ ܒܨܶܗܝܽܘܢ ܘܰܓܒܳܗ̇ ܠܶܗ ܠܒܶܝܬ ܡܰܥܡܪܳܐ܀

ܫܽܘܒܚܳܐ H

ܫܽܘܒܚܳܐ ܘܥܶܩܒܳܐ: ܪ̈ܶܓܠܶܐ ܕܰܕܪ̈ܰܟܝ ܒܒܶܝܬ ܩܽܘܕܫܳܐ. ܒܕܰܟܝܽܘܬܳܐ ܘܩܰܕܺܝܫܽܘܬܳܐ. ܢܕܽܘ̈ܫܳܢ ܬܰܪ̈ܥܰܝ ܦܰܪܕܰܝܤܳܐ. ܘܰܢܕܰܝܪ̈ܳܢ ܥܰܡ ܡܰܠܰܐܟ̈ܶܐ܀

ܣܶܕܪܳܐ ܕܟܳܗ̈ܢܶܐ:

ܦܪܽܘܡܝܽܘܢ

ܠܗܰܘ ܪܰܒܳܐ ܕܟܽܘܡܪ̈ܶܐ ܘܰܡܦܰܠܓܳܢܳܐ ܕܟܰܟܪ̈ܶܐ. ܠܗܰܘ ܕܡܰܣܶܩ ܠܒܳܝܫܳܐ ܡܶܢ ܩܺܩܰܠܬܳܐ ܠܰܬܪܽܘܢܽܘܣ ܕܺܝܠܶܗ ܘܰܡܫܰܠܶܛ ܠܶܗ ܥܰܠ ܒܶܝܬ ܓܰܙܶܗ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܰܚܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܡܳܪܰܢ ܝܶܫܽܘܥ ܡܫܺܝܚܳܐ ܘܫܳܐܠܺܝܢܰܢ ܡܶܢ ܒܰܤܺܝܡܽܘܬܳܟ܆ ܘܡܶܬܟܰܫܦܺܝܢܰܢ ܠܳܟ ܚܢܰܢ ܥܰܒܕܰܝ̈ܟ ܡܟܰܬܡ̈ܶܐ ܘܠܳܐ ܕܟܰܝ̈ܳܐ ܚܠܳܦ ܐܰܚܰܝ̈ܢ ܟܳܗ̈ܢܶܐ ܙܗܰܝ̈ܳܐ ܘܰܡܫܰܡ̈ܫܳܢܶܐ ܕܟܰܝ̈ܳܐ. ܗܳܢܽܘܢ ܕܫܰܡܶܫܘ ܩܕܳܡܰܝܟ ܒܕܰܟܝܽܘܬܳܐ ܘܩܰܕܺܝܫܽܘܬܳܐ ܘܪܰܡܶܫܘ ܘܨܰܦܰܪܘ ܘܪܰܥܝܽܘܟ ܒܕܽܘܒܳܪ̈ܰܝܗܽܘܢ ܚܰܬܺܝ̈ܬܶܐ. ܠܳܐ ܗܳܟܺܝܠ ܬܶܥܽܘܠ ܠܕܺܝܢܳܐ ܥܰܡܗܽܘܢ. ܠܳܐ ܡܳܪܝ ܬܶܬܶܠ ܠܪ̈ܶܓܠܶܐ ܕܰܕܪ̈ܰܟܝ ܥܰܠ ܐܶܤܟ̈ܦܳܬܳܐ ܕܡܰܕܒܚܰܝ̈ܟ ܩܰܕܺܝ̈ܫܶܐ܆ ܕܰܢܕܽܘ̈ܫܳܢ ܥܰܠ ܓܽܘܡܪ̈ܶܐ ܕܫܰܠܗܶܒܺܝܬܳܐ. ܠܳܐ ܡܳܪܝ ܬܫܰܬܶܩ ܠܦܽܘ̈ܡܶܐ ܘܰܠܠܶܫܳܢ̈ܶܐ ܕܙܰܡܰܪܘ ܠܳܟ ܙܡܺܝܪ̈ܳܬܳܐ ܪ̈ܽܘܚܳܢܳܝܳܬܳܐ ܕܢܶܗܘܽܘܢ ܛܡܺܝ̈ܡܶܐ ܘܰܤܟܺܝܪ̈ܶܐ܆ ܘܠܳܐ ܡܳܪܝ ܬܰܚܫܶܟ ܠܥܰܝ̈ܢܶܐ ܕܰܐܨܶܕ̈ܝ ܒܰܟܬܳܒܰܝ̈ܟ ܩܰܕܺܝ̈ܫܶܐ ܕܢܶܗܘ̈ܝܳܢ ܩܶܢ̈ܶܐ ܠܤܳܤܳܐ ܘܰܠܪܳܡܬܳܐ܆ ܘܠܳܐ ܡܳܪܝ ܬܰܪܫܶܠ ܠܺܐܝ̈ܕܰܝܳܐ ܕܰܟ̈ܝܳܬܳܐ ܕܙܰܝܰܚ̈ܝ ܠܐ̱ܪ̈ܳܙܰܝܟ ܩܰܕܺܝ̈ܫܶܐ ܘܰܤܓܺܝ̈ܕܶܐ܆ ܕܢܶܬܩܰܦ̈ܤܳܢ ܡܶܢ ܓܽܘܡܪ̈ܶܐ ܕܫܰܠܗܶܒܺܝܬܳܐ܆ ܐܶܠܳܐ ܗܳܟܺܝܠ ܡܳܪܝ ܫܡܰܥ ܠܬܰܟܫ̈ܦܳܬܰܢ ܡܚܺܝ̈ܠܳܬܳܐ ܕܰܚܠܳܦܰܝܗܽܘܢ. ܘܰܠܚܺܝ ܘܰܫܒܽܘܩ ܟܽܠܗܽܘܢ ܚܛܳܗ̈ܶܐ ܘܤܰܟ̈ܠܘܳܬܳܐ ܕܡܶܢܰܢ ܘܡܶܢܗܽܘܢ ܐܶܤܬܥܰܪ̈ܝ. ܡܶܛܽܠ ܕܛܳܒܳܐ ܘܥܰܬܺܝܪ ܒܡܰܘܗ̈ܒܳܬܳܐ ܘܰܫܦܺܝܥ ܒܫܽܘܟܳܢ̈ܶܐ ܐܺܝܬܰܝܟ ܡܳܪܝܳܐ܆ ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܤܩܺܝܢܰܢ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܠܐ ܒܩ̄ ܕܦܬܰܚ ܠܺܝ ܬܰܪܥܶܗ ܕܰܚܢܳܢܳܟ H

ܓܰܒܠܶܗ ܐܰܠܳܗܳܐ ܠܳܐܕܳܡ ܘܝܳܬܶܒ ܗ̱ܘܳܐ ܘܡܶܬܒܰܩܶܐ ܒܶܗ. ܘܚܳܐܰܪ ܒܶܗ ܕܰܟܡܳܐ ܫܰܦܺܝܪ. ܘܕܳܡܶܐ ܓܒܺܝܠܳܐ ܠܓܳܒܽܘܠܶܗ. ܐܳܙܶܠ ܘܳܐܬܶܐ ܥܰܦܪܳܢܳܐ. ܒܶܝܬ ܐܺܝ̈ܠܳܢܶܐ ܕܦܰܪܕܰܝܤܳܐ. ܬܰܗܺܝܪܺܝܢ ܥܺܝܪ̈ܶܐ ܒܥܰܦܪܳܢܳܐ. ܟܡܳܐ ܐܶܬܪܰܡܪܰܡ܀

ܥܶܠܳܝ̈ܶܐ ܒܟܰܘ ܠܶܗ ܠܳܐܕܳܡ ܟܰܕ ܢܳܦܶܩ ܡܶܢ ܦܰܪܕܰܝܤܳܐ. ܘܺܐܝ̈ܠܳܢܶܐ ܪܟܶܢܘ ܪ̈ܺܝܫܰܝܗܽܘܢ ܟܰܕ ܡܰܪܟܰܢ ܪܺܝܫܶܗ ܘܒܳܟܶܐ. ܘܰܤܪ̈ܳܦܶܐ ܛܪܰܦܘ ܓܶܦܰܝ̈ܗܽܘܢ ܘܫܰܪܺܝܘ ܐܳܡܪܺܝܢ ܠܰܚ̈ܕܳܕܶܐ. ܐܳܘ ܠܪܳܡܳܐ ܕܰܢܦܰܠ ܥܰܠ ܕܰܥܒܰܪ ܦܽܘܩܕܳܢ ܡܳܪܶܗ܀

ܫܽܘܒܚܳܐ: ܩܪܳܝܗ̱ܝ ܡܳܪܰܢ ܠܳܐܕܳܡ ܐܳܕܳܡ ܠܡܳܢܳܐ ܒܰܫܝܽܘܠ ܕܰܡܺܝܟ ܐܰܢ̱ܬ ܩܽܘܡ. ܫܡܰܥ ܐܳܕܳܡ ܩܳܠܶܗ ܕܰܒܪܳܐ ܘܫܰܪܺܝ ܕܢܺܐܡܰܪ ܗܳܟܰܢܳܐ. ܟܡܳܐ ܒܰܤܺܝܡ ܩܳܠܳܐ ܗܳܢܳܐ. ܘܰܟܡܳܐ ܚܰܠ̈ܝܳܢ ܢܶܥ̈ܡܳܬܶܗ. ܘܕܳܡܶܐ ܗܳܢ ܩܳܠܳܐ ܠܗܰܘ ܕܰܩܪܳܢܝ ܒܶܝܬ ܐܺܝ̈ܠܳܢܶܐ܀

ܡܢܥܠܡ: ܐܶܡܰܪ ܐܳܕܳܡ ܠܰܐܠܳܗܳܐ. ܒܒܳܥܽܘ ܡܶܢܳܟ ܡܳܪܳܐ ܕܥܳܠ̈ܡܶܐ. ܗܰܒܠܺܝ ܐܶܦܢܶܐ ܠܗܰܘ ܐܰܬܪܳܐ ܕܚܶܘܝܳܐ ܘܚܰܘܳܐ ܡܶܢܶܗ ܐܰܦܩܽܘܢܝ. ܘܟܰܪܝܳܐ ܠܺܝ ܥܰܠ ܦܰܐܝܽܘܬܶܗ. ܕܠܰܝܬ ܐܰܟܘܳܬܶܗ ܒܰܒܪܺܝܬܳܐ. ܛܽܘܒܰܝܗܽܘܢ ܠܟܺܐܢ̈ܶܐ. ܕܫܳܪܶܝܢ ܒܶܗ ܥܕܰܡܳܐ ܠܥܳܠܰܡ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ H

ܠܟܳܗܢܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ. ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝ̈ܫܶܐ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ. ܘܡܰܠܒܶܫ ܠܗܽܘܢ ܐܶܤܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܚܰܬܢܳܐ ܡܫܺܝܚܳܐ ܩܪܺܝ ܠܫܰܡܳܫܰܝ̈ܟ ܡܶܢ ܐܰܒܕܳܢܳܐ: ܘܰܐܥܺܝܪ ܠܟܳܗ̈ܢܰܝܟ ܕܰܒܓܰܘ ܩܰܒܪ̈ܶܐ ܟܒܺܝ̈ܢܺܝܢ ܚܶܫܟܳܐ. ܕܠܳܐ ܐܶܬܚܰܕܺܝܘ ܒܰܪ̈ܓܺܝܓܳܬܳܐ ܥܳܒܽܘܪ̈ܝܳܬܳܐ: ܦܪܽܘܥ ܛܳܒ̈ܬܳܐ ܠܽܐܘܠ̈ܨܳܢܰܝܗܽܘܢ ܡܶܛܽܠ ܚܽܘܒܳܟ܀

ܐܰܪܥܳܐ ܐܶܡܗܽܘܢ ܗܘܳܬ ܬܰܫܘܺܝܬܳܐ ܠܗܰܕܳܡܰܝ̈ܗܽܘܢ: ܘܓܰܘܢܳܐ ܟܡܺܝܪܳܐ ܐܶܬܥܰܛܰܦܘ ܗ̱ܘܰܘ ܥܰܠ ܓܽܘܫܡܰܝ̈ܗܽܘܢ. ܕܠܰܝ̈ܠܰܝ ܐܺܝܡܳܡ ܒܰܙܡܺܝܪ̈ܳܬܳܟ ܐܰܡܺܝ̈ܢܺܝܢ ܗ̱ܘܰܘ: ܐܰܫܘܳܐ ܐܶܢܽܘܢ ܠܩܰܘܡܳܐ ܦܨܺܝܚܳܐ ܕܡܶܢ ܝܰܡܺܝܢܳܟ܀

ܕܢܰܟܪܺܝܘ ܡܶܢܗܽܘܢ ܠܰܪ̈ܓܺܝܓܳܬܳܐ ܥܳܒܽܘܪ̈ܝܳܬܳܐ: ܢܶܬܬܢܺܝܚܽܘܢ ܒܶܗ ܒܰܓܢܽܘܢ ܢܽܘܗܪܳܐ ܡܠܶܐ ܓܶܐܘ̈ܳܬܳܐ. ܟܠܺܝܠܳܐ ܦܰܐܝܳܐ ܕܰܥܠܰܝܡܽܘܬܳܐ ܫܳܛܽܘܗ̱ܝ ܘܰܥܒܰܪܘ: ܘܰܙܩܰܦܘ ܢܰܦܫܗܽܘܢ ܠܰܪ̈ܓܺܝܓܳܬܳܐ ܘܠܰܫܡܳܟ ܐܰܚܶܒܘ܀

ܫܽܘܒܚܳܐ ܠܰܐܒܳܐ ܕܰܗܘܰܝܬܽܘܢ ܠܶܗ ܦܳܥ̈ܠܶܐ ܛܳܒ̈ܶܐ: ܘܤܶܓܕܬܳܐ ܠܰܒܪܳܐ ܕܡܶܛܽܠ ܚܽܘܒܶܗ ܒܥܳܠܡܳܐ ܟܦܰܪܬܽܘܢ. ܬܰܘܕܺܝ ܠܪܽܘܚܳܐ ܕܰܒܩܺܝ̈ܢܳܬܟܽܘܢ ܫܰܡܶܫܬܽܘܢܳܝܗ̱ܝ: ܒܪܺܝܟ ܕܰܡܚܰܕܶܬ ܝܽܘ̈ܩܢܶܐ ܪ̈ܚܺܝܡܶܐ ܕܦܰܪ̈ܨܽܘܦܰܝܟܽܘܢ܀

ܠܳܐ ܡܳܪܝ ܢܶܫܡܰܥ ܠܗܳܝ ܒܰܪ̱ܬ ܩܳܠܳܐ ܕܰܦܤܳܩ ܤܰܒܪܳܐ܀

ܕܰܐܘܕܺܝܢܰܢ ܒܳܟ ܡܳܪܝ ܐܰܘܕܳܐ ܒܰܢ ܘܪܰܚܶܡܥܠܰܝ܀

ܛܳܒ ܠܡܰܘܕܳܝܽܘ ܠܡܳܪܝܳܐ:

ܟܳܗܢܳܐ: ܛܳܒ ܠܡܰܘܕܳܝܽܘ ܠܡܳܪܝܳܐ:

ܥܰܡܳܐ: ܘܰܠܡܶܙܡܰܪ ܠܰܫܡܳܟ ܡܪܰܝܡܳܐ ܠܰܡܚܰܘܳܝܽܘ ܒܨܰܦܪܳܐ ܛܰܝܒܽܘܬܳܟ ܘܗܰܝܡܳܢܽܘܬܳܟ ܒܠܰܝ̈ܠܰܘܳܬܳܐ܀

ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ. ܡܳܪܝܳܐ ܚܽܘܢܳܝܗ̱ܝ ܠܥܰܡܳܐ ܕܺܝܠܳܟ. ܡܳܪܝܳܐ ܚܰܤܳܐ ܘܰܫܒܽܘܩ ܚܛܳܗ̈ܶܐ ܕܟܽܠܰܢ. ܩܰܕܺܝܫܳܐ ܐܰܓܶܢ ܥܠܰܝܢ ܝܰܡܺܝܢܳܟ. ܘܰܐܤܳܐ ܟܪܺܝܗܽܘܬܰܢ ܡܶܛܽܠ ܫܡܳܐ ܕܺܝܠܳܟ܀

ܩܰܕܺܝܫܰܬ ܐܰܠܳܗܳܐ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܰܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܰܘ̈ܳܬܳܐ ܕܡܶܨܛܰܠܝܳܢ ܒܚܰܪܰܬ݀ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.

ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.

ܢܚܶܬ̣ ܡܶܢ ܫܡܰܝܳܐ ܘܶܐܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܶܐܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.

ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.

ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀

ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ̣ ܗ̄ܘܗ̄ ܘܡܰܠܟܬ̣ܳܐ ܡܶܢ ܝܰܡܺܝܢܳܟ܀

ܘܰܛܥܳܝ ܥܰܡܶܟ̣ܝ̱ ܘܒܶܝܬ̣ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓ̣ܪܰܓ̣ ܡܰܠܟܳܐ ܠܫܽܘܦܪܶܟ̣ܝ̱܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܩܰܪܶܒܝ̱ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬ̣ܰܢ܇ ܘܰܨܠܽܘܬ̣ܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬ̣ܰܢ܀

ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬ̣ܽܘܠܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ̣ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬ̣ܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀

ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܝܳܠܕܰܬ ܐܰܠܳܗܳܐ

ܗܰܘ ܪܺܝܫ ܡܰܠܰܐܟ̣̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ̣ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟ̣ܝ̱ ܘܡܶܢܶܟ̣ܝ̱ ܕܳܢܰܚ܀

ܫܽܘܒܚܳܐ: ܐܶܠܦܳܐ ܗܘܳܬ̣ ܡܰܪܝܰܡ܇ ܛܶܥܢܰܬ̣ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬ̣ܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀

ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ

ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀

ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ܘܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀

ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ

ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀

ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀

ܫܠܳܡ ܠܶܟܝ

ܫܠܳܡ ܠܶܟ̣ܝ ܒܬ̣ܽܘܠܬܳܐ ܡܰܪܝܰܡ ܡܰܠܝܰܬ̣ ܛܰܝܒܽܘܬ̣ܳܐ. ܡܳܪܰܢ ܥܰܡܶܟܝ. ܡܒܰܪܰܟ̣ܬܳܐ ܐܰܢ̱ܬܝ ܒܢܶܫ̈ܶܐ. ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟ̣ܝ̱. ܡܳܪܰܢ ܝܶܫܽܘܥ. ܐܳܘ ܩܰܕܺܝܫܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ. ܨܰܠܳܝ ܚܠܳܦܰܝܢ ܚܰܛܳܝ̈ܶܐ. ܗܳܫܳܐ ܘܰܒܫܳܥܰܬ ܘܡܰܘܬܰܢ ܐܰܡܺܝܢ܀