ܫܚܝܡܐ - ܕܢܓܗ ܕܥܪܘܒܬܐ
ܨܠܰܘ̈ܳܬܳܐ ܕܡܶܨܛܰܠܝܳܢ ܩܕܳܡ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ
ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܺܝܪܳܐ ܐܰܡܺܝܢ܀
ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬ̣ܳܐ ܘܳܐܬ̣ܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀
ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀
ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ܀
ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀
ܨܠܽܘܬܳܐ ܡܳܪܳܢܳܝܬܳܐ
ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܥܢܝܢܐ ܕܪܡܫܐ ܩܰܕܡܳܝܰܬ ܡܰܙܡܘܪܳܐ:
ܡܪܝܐ ܩܪܝܬܟ 141, 142, 119: 105-112, 117
ܡܳܪܝܳܐ ܩܪܺܝܬܳܟ ܐܰܢ̱ܬ ܥܢܺܝ̣ܢܝ̱. ܨܽܘ̣ܬ ܡܶܠܰܝ̈ ܘܩܰܒܶܠ܀
ܨܠܽܘܬܝ̱ ܐܰܝܟ ܥܶܛܪܳܐ ܩܕܳܡܰܝܟ. ܩܽܘܪܒܳܢܳܐ ܕܺܐܝ̈ܕܰܝ ܐܰܝܟ ܩܽܘܪܒܳܢܳܐ ܕܪܰܡܫܳܐ. ܐܰܩܺܝܡ ܡܳܪܝܳܐ ܢܳܛܽܘܪܳܐ ܠܦܽܘܡܝ̱ ܘܢܳܛܽܘܪܳܐ ܠܣܶܦܘ̈ܳܬܝ̱ ܕܠܳܐ ܢܶܣܛܶܐ ܠܶܒܝ̱ ܠܡܶܠܬܳܐ ܒܺܝܫܬܳܐ ܘܶܐܥܒܶܕ ܥܒܳܕ̈ܶܐ ܕܥܰܘܠܳܐ܀
ܥܰܡ ܓܰܒܪ̈ܶܐ ܪ̈ܰܫܺܝ̣ܥܶܐ ܠܳܐ ܐܶܬܡܰܠܰܚ ܥܰܡܗܽܘܢ. ܢܰܠܦܰܢܝ̱ ܙܰܕܺܝܩܳܐ ܘܢܰܟܣܰܢܝ̱. ܡܶܫܚܳܐ ܕܪ̈ܰܫܺܝ̣ܥܶܐ ܠܪܺܝܫܝ̱ ܠܳܐ ܢܰܕܗܶܢ ܡܶܛܽܠ ܕܰܨܠܽܘܬܝ̱ ܥܰܠ ܒܺܝܫܽܘܬܗܽܘܢ. ܘܶܐܬܟܠܺܝܘ̱ ܒܺܐܝܕܳܐ ܕܟܺܐܦܳܐ ܕܰܝܳܢܰܝ̈ܗܽܘܢ ܘܰܫܡܰܥ ܡܶܠܰܝ̈ ܕܒܰܣܺܝ̈ܡܳܢ܀
ܐܰܝܟ ܣܶܟܬܳܐ ܕܨܳܪܝܳܐ ܐܰܪܥܳܐ ܐܶܬܒܰܕܰܪܘ̱ ܓܰܪ̈ܡܰܝܗܽܘܢ ܥܰܠ ܦܽܘܡܳܗ̇ ܕܰܫܝܽܘܠ. ܘܶܐܢܳܐ ܠܘܳܬܳܟ ܡܳܪܝܳܐ ܐܰܪܺܝܡܶܬ ܥܰܝ̈ܢܰܝ ܘܰܥܠܰܝܟ ܐܶܬܬܰܟܠܶܬ ܠܳܐ ܬܶܫܕܶܝܗ̇ ܠܢܰܦܫܝ̱܀
ܢܰܛܰܪܰܝܢܝ̱ ܡܶܢ ܐܺܝ̣ܕܳܐ ܕܫܰܒܗܪ̈ܳܢܶܐ ܕܰܛܡܰܪܘ̱ ܠܺܝ̣ ܦܰܚ̈ܶܐ. ܢܶܦܠܽܘܢ ܥܰܘ̈ܳܠܶܐ ܒܰܡܨܺܝ̈ܕܳܬܗܽܘܢ ܥܕܰܡܳܐ ܕܶܐܥܒܰܪ ܐܶܢܳܐ܀
ܒܩܳܠܝ̱ ܠܡܳܪܝܳܐ ܩܪܺܝܬ ܒܩܳܠܝ̱ ܠܡܳܪܝܳܐ ܐܶܬܟܰܫܦܶܬ. ܘܰܐܪܡܺܝܬ ܩܕܳܡܰܘܗ̱ܝ ܬܰܟܫܶܦܬܝ̱ ܘܽܐܘܠܨܳܢܝ̱ ܩܕܳܡܰܘܗ̱ܝ ܚܰܘܺܝܬ. ܟܰܕ ܐܶܬܛܰܪܦܰܬ ܪܽܘܚܝ̱ ܐܰܢ̱ܬ ܝܳܕܰܥ ܐܰܢ̱ܬ ܫܒܺܝ̈ܠܰܝ܀
ܒܽܐܘܪܚܳܐ ܕܗܰܠ̈ܟܳܬܝ̱ ܛܡܰܪܘ̱ ܠܺܝ̣ ܦܰܚ̈ܶܐ. ܚܳܪܶܬ ܠܝܰܡܺܝܢܳܐ ܘܰܚܙܺܝܬ ܘܠܰܝܬ ܕܚܳܟܶܡ ܠܺܝ. ܐܶܒܰܕ ܡܶܢܝ̱ ܒܶܝܬ ܡܰܥܪܩܳܐ ܘܠܰܝܬ ܬܳܒܽܘܥܳܐ ܠܢܰܦܫܝ̱. ܘܰܓܥܺܝܬ ܠܘܳܬܳܟ ܘܶܐܡܪܶܬ ܕܰܐܢ̱ܬ ܗ̱ܽܘ ܣܰܒܪܝ̱ ܘܰܡܢܳܬܝ̱ ܒܰܐܪܥܳܐ ܕܚܰܝ̈ܶܐ܀
ܨܽܘ̣ܬ ܠܒܳܥܽܘܬܝ̱ ܡܶܛܽܠ ܕܶܐܬܡܰܟܟܶܬ ܛܳܒ. ܦܰܨܳܢܝ̱ ܡܶܢ ܪ̈ܳܕܽܘܦܰܝ ܡܶܛܽܠ ܕܰܥܫܶܢܘ̱ ܡܶܢܝ̱. ܐܰܦܶܩ ܢܰܦܫܝ̱ ܡܶܢ ܒܶܝܬ ܚܒܽܘܫܝܳܐ ܕܰܐܘܕܶܐ ܠܰܫܡܳܟ. ܠܺܝ ܢܣܰܟܽܘܢ ܙܰܕܺܝܩܰܝ̈ܟ ܟܰܕ ܬܶܦܪܥܰܢܝ̱܀
ܫܪܳܓܳܐ ܗ̱ܝ ܡܶܠܬܳܟ ܠܪ̈ܶܓܠܰܝ ܘܢܽܘܗܪܳܐ ܠܰܫܒܺܝ̈ܠܰܝ. ܝܺܡܺܝܬ ܘܰܐܫܪܶܬ ܕܶܐܛܰܪ ܕܺܝ̈ܢܶܐ ܕܙܰܕܺܝܩܽܘܬܳܟ. ܐܶܬܡܰܟܟܶܬ ܪܰܘܪܒܳܐܺܝܬ ܡܳܪܝܳܐ ܐܰܚܳܢܝ̱ ܐܰܝܟ ܡܶܠܬܳܟ. ܒܡܶܠܰܘ̈ܗ̱ܝ ܕܦܽܘܡܝ̱ ܨܒܺܝ ܡܳܪܝܳܐ ܘܡܶܢ ܕܺܝܢܰܝ̈ܟ ܐܰܠܶܦܰܝܢܝ̱܀
ܢܰܦܫܝ̱ ܒܺܐܝ̈ܕܰܝܟ ܗܺܝ ܒܟܽܠܙܒܰܢ ܘܢܳܡܽܘܣܳܟ ܠܳܐ ܛܥܺܝܬ. ܣܳܡܘ̱ ܠܺܝ ܚܰܛܳܝ̈ܶܐ ܦܰܚ̈ܶܐ ܘܡܶܢ ܦܽܘܩܕܳܢܰܝ̈ܟ ܠܳܐ ܣܛܺܝܬ. ܝܶܪܬܶܬ ܣܳܗܕܽܘܬܳܟ ܠܥܳܠܰܡ ܡܶܛܽܠ ܕܒܽܘܣܳܡܳܐ ܗ̱ܝ ܕܠܶܒܝ̱. ܐܰܦܢܺܝܬ ܠܶܒܝ̱ ܕܶܐܥܒܶܕ ܦܽܘܩܕܳܢܰܝ̈ܟ ܠܥܳܠܰܡ ܒܰܫܪܳܪܳܐ܀
ܫܰܒܰܚܘ̱ ܠܡܳܪܝܳܐ ܟܽܠܟܽܘܢ ܥܰܡ̱̈ܡܶܐ. ܫܰܒܚܳܝ̈ܗ̱ܝ ܟܽܠܗܶܝܢ ܐܶܡܘ̈ܳܬܳܐ. ܡܶܛܽܠ ܕܥܶܫܢܰܬ ܥܠܰܝܢ ܛܰܝܒܽܘܬܶܗ. ܫܰܪܺܝܪܳܐܺܝܬ ܡܳܪܝܰܐ ܗ̱ܘ ܠܥܳܠܰܡ܀
ܫܽܘܒܚܳܐ ܘܥܶܩܒܳܐ: H
ܗܰܘ ܕܰܛܥܺܝܢ ܟܽܠ ܒܶܪ̈ܝܳܬܳܐ. ܩܰܝܣܳܐ ܕܰܨܠܺܝܒܳܐ ܛܰܥܢܶܗ. ܗܰܘ ܚܰܝܳܐ ܘܡܰܥܒܶܕ ܚܰܝ̈ܶܐ ܡܰܘܬܳܐ ܛܥܶܡ ܗܘܳܐ ܒܨܶܒܝܳܢܶܗ. ܗܰܘ ܕܠܳܐ ܐܳܚܕܺܝܢ ܠܶܗ ܣܰܘ̈ܦܶܐ ܘܠܳܐ ܡܣܰܝ̈ܟܳܢ ܠܶܗ ܒܶܪ̈ܝܳܬܳܐ. ܒܩܰܒܪܳܐ ܓܢܶܐ ܗ̱ܘܳܐ ܗܰܘ ܓܰܢ̱ܒܳܪ ܥܳܠ̈ܡܶܐ ܘܒܶܝܬ ܥܰܢܺܝ̈ܕܶܐ ܡܰܓܰܣ ܗܘܳܐ܀
ܣܶܕܪܳܐ ܓܰܘܳܢܳܝܳܐ:
ܦܪܽܘܡܝܽܘܢ
ܬܶܫܒܽܘܚܬܳܐ ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ. ܘܢܰܨܰܚ ܕܽܘܟܪܳܢ ܩܰܕܺܝܫܰܘ̈ܗܝ ܒܟܽܠ ܐܰܬܰܪ ܘܦܶܢ̈ܝܳܢ ܘܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܪܰܣܶܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀
ܣܶܕܪܳܐ
ܟܰܕ ܥܽܘܗܕܳܢܳܐ ܪܚܺܝܡܳܐ ܘܚܰܒܺܝܒܳܐ ܘܰܡܝܰܩܪܳܐ ܥܳܒܕܺܝܢܰܢ. ܠܗܳܝ ܫܳܘܝܰܬ ܠܛܽܘ̈ܒܶܐ ܘܰܫܒܺܝܚܰܬ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܡܒܰܪܰܟܬܳܐ ܘܰܡܥܰܠܰܝܬܳܐ ܘܰܒܬܽܘܠܰܬ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܥܰܡܳܗ̇ ܕܶܝܢ ܢܶܬܶܥ̱ܗܰܕ ܠܰܢ̈ܒܺܝܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ ܠܶܐܘܰܢܓܶܠܺܝ̈ܣܛܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ. ܠܟܺܐܢ̈ܶܐ ܘܰܠܟܳܗ̈ܢܶܐ ܘܠܰܐܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ ܒܬܽܘ̈ܠܶܐ ܘܩܰܕܺܝ̈ܫܶܐ ܘܢܰܟ̈ܦܶܐ ܘܨܰܝܳܡ̈ܶܐ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܘܟܽܠܗܽܘܢ ܣܳܥܪ̈ܰܝ ܫܰܦܺܝܪ̈ܳܬܳܐ. ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܰܒܬܰܟܫ̈ܦܳܬܗܽܘܢ ܡܩܰܒ̈ܠܳܬܳܐ ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܰܫܒܽܘܩ ܚܰܘܒܰܝ̈ܢ ܘܚܰܣܳܐ ܚܛܳܗܰܝ̈ܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܒܓܽܘܕܰܝ̈ܗܽܘܢ ܕܩܰܕܺܝ̈ܫܰܝܟ ܢܶܬܛܰܟܰܣ ܘܰܒܣܺܝ̈ܥܳܬܗܽܘܢ ܢܶܬܚܰܠܰܛ ܘܒܰܝܢܳܬܗܽܘܢ ܢܶܗܘܶܐ ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀
ܩܠܐ ܩܕܡܝܐ ܒܩ̄: ܒܰܕܡܽܘܬ ܒܶܣ̈ܡܶܐ
ܓܘܫܡܐ ܬܡܝܢܝܐ H
ܦܶܬܓܳܡܳܐ: ܨܠܽܘܬܶܟܝ̱ ܫܽܘܪܳܐ ܬܶܗܘܶܐ ܠܰܢ: ܒܬܽܘܠܬܳܐ ܡܰܪܝܰܡ ܗܳܝ ܕܶܐܬܓܰܒܝܰܬ ܡܶܢ ܟܽܠ ܫܰܪ̈ܒܳܢ. ܘܰܗܘܳܬ ܐܶܡܳܐ ܠܰܐܠܳܗܳܐ. ܐܰܦܺܝܤܝ ܘܰܒܥܳܝ ܠܺܝܚܺܝܕܳܝܶܟܝ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ ܒܰܨܠܰܘ̈ܳܬܶܟܝ܀
ܛܽܘܒܰܝܟܝ ܘܛܳܒܬܳܐ ܠܢܰܦܫܶܟܝ: ܛܽܘܒܰܝܟܝ ܡܰܪܝܰܡ ܕܡܶܢ ܛܰܠܝܽܘܬܶܟܝ ܓܒܳܟܝ ܐܰܠܳܗܳܐ. ܘܰܐܘܪܶܒ ܝܰܘܡܳܐ ܕܕܽܘܟܪܳܢܶܟܝ. ܘܗܳܐ ܥܺܕ̈ܳܬܳܐ ܥܰܡ ܕܰܝܪ̈ܳܬܳܐ ܙܳܡܪ̈ܳܢ ܫܽܘܒܚܳܐ. ܠܡܳܪܝܳܐ ܕܰܐܘܪܶܒ ܕܽܘܟܪܳܢܶܟܝ܀
ܫܽܘܒܚܳܐ: ܫܽܘܒܚܳܐ ܠܰܐܒܳܐ ܘܤܶܓܕܬܳܐ ܠܰܒܪܳܐ ܘܬܰܘܕܺܝ ܠܪܽܘܚܳܐ. ܬܠܺܝܬܳܝܽܘܬܳܐ ܡܫܰܒܰܚܬܳܐ. ܩܢܽܘ̈ܡܶܐ ܬܠܳܬܳܐ ܫܡܳܗ̈ܶܐ ܬܠܳܬܳܐ ܚܰܕ ܐܰܠܳܗܳܐ. ܫܰܪܺܝܪܳܐ ܕܠܶܗ ܬܶܫܒܽܘܚܬܳܐ܀
ܡܶܢ ܥܳܠܰܡ: ܫܽܘܒܚܳܟ ܢܶܬܠܳــ̈ـܢ ܟܽܠ ܒܶܪ̈ܝܳܬܳܐ ܡܰܠܟܳܐ ܡܫܺܝܚܳܐ. ܡܰܠܰܐܟ̈ܶܐ ܘܰܒܢܰܝ̈ܢܳܫܳܐ. ܕܰܠܬܶܫܒܽܘܚܬܳܟ ܬܰܩܶܢܬ ܐܶܢܽܘܢ ܘܗܳܐ ܡܰܤܩܺܝܢ ܠܳܟ. ܫܽܘܒܚܳܐ ܒܠܺܠܝܳܐ ܘܒܺܐܝܡܳܡܳܐ܀
ܕܝܳܠܕܰܬ ܐܰܠܳܗܳܐ: ܐܶܡܪܰܬ ܡܰܪܝܰܡ ܕܠܺܝ ܛܽܘܒܰܝ ܠܺܝ ܕܡܰܠܟܳܐ ܝܶܠܕܶܬ. ܕܤܳܓܕܺܝܢ ܠܶܗ ܡܰܠ̈ܟܶܐ ܕܰܐܪܥܳܐ. ܘܰܥܒܺܝܕܳܐ ܐ̱ܢܳܐ ܡܪܰܒܝܳܢܺܝܬܳܐ ܠܗܰܘ ܕܰܒܪܶܡܙܶܗ. ܡܕܰܒܰܪ ܤܰܘ̈ܦܶܐ ܘܦܶܢ̈ܝܳܬܳܐ܀
ܒܝܽܘܡ ܕܽܘܟܪܳܢܳܗ̇ ܕܰܡܒܰܪܰܟܬܳܐ ܒܬܽܘܠܬܳܐ ܡܰܪܝܰܡ. ܚܳܕ̈ܝܳܢ ܟܽܠܗܶܝܢ ܒܶܪ̈ܝܳܬܳܐ. ܘܙܳܡܪ̈ܳܢ ܫܽܘܒܚܳܐ ܠܡܳܪܝܳܐ ܕܰܓܒܳܗ̇ ܘܝܰܩܰܪ ܘܰܐܘܪܶܒ ܝܰܘܡܳܐ ܫܒܺܝܚܳܐ ܕܕܽܘܟܪܳܢܳܗ̇܀
ܒܰܕܡܽܘܬ ܫܶܡܫܳܐ ܕܢܳܚܶܬ ܫܳܪܶܐ ܒܓܰܘ ܥܶܢܰܒܬܳܐ. ܘܰܡܡܰܙܶܓ ܒܳܗ̇ ܚܰܠܝܽܘܬܳܐ. ܗܳܟܰܢ ܡܶܠܬܳܐ ܢܚܶܬ ܡܶܢ ܪܰܘܡܳܐ ܫܪܳܐ ܒܰܒܬܽܘܠܬܳܐ. ܘܰܕܢܰܚ ܡܶܢܳܗ̇ ܘܰܚܬܺܝܡܳܐ܀
ܥܒܶܕ ܠܰܢ ܡܳܪܰܢ ܫܰܘܬܳܦܽܘܬܳܐ ܒܝܽܘܡ ܕܽܘܟܪܳܢܳܗ̇. ܕܶܐܡܳܐ ܒܬܽܘܠܬܳܐ ܕܺܝܠܶܕܬܳܟ. ܒܰܨܠܰܘ̈ܳܬܳܗ̇ ܐܰܥܒܰܪ ܡܶܢܰܢ ܙܰܒ̈ܢܶܐ ܒܺܝ̈ܫܶܐ. ܘܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܀
ܕܩܰܕܺܝ̈ܫܶܐ: ܛܽܘܒ ܠܰܢ̈ܒܺܝܶܐ ܘܛܽܘܒ ܠܰܫܠܺܝ̈ܚܶܐ ܘܛܽܘܒܳܐ ܠܤܳܗ̈ܕܶܐ. ܒܝܰܘܡܶܗ ܪܰܒܳܐ ܕܢܽܘܚܳܡܳܐ. ܕܫܳܡܥܺܝܢ ܠܰܐܒܳܐ ܘܚܳܙܶܝܢ ܠܰܒܪܳܐ ܘܰܠܪܽܘܚܩܽܘܕܫܳܐ. ܕܓܳܕܠܳܐ ܟܠܺܝ̈ܠܶܐ ܠܪ̈ܺܝܫܰܝܗܽܘܢ܀
ܐܰܢ̱ܬܽܘܢ ܐܶܢܽܘܢ ܐܳܤܰܘ̈ܳܬܳܐ ܫܠܺܝ̈ܚܶܐ ܓܒܰܝ̈ܳܐ. ܬܰܠܡܺܝ̈ܕܰܘܗ̱ܝ ܕܳܐܤܝܳܐ ܪܰܒܳܐ. ܘܰܐܝܢܳܐ ܕܩܳܪܶܒ ܨܶܝܕ ܓܰܪ̈ܡܰܝܟܽܘܢ ܒܗܰܝܡܳܢܽܘܬܳܐ. ܢܳܤܶܒ ܡܶܢܟܽܘܢ ܥܽܘܕܪ̈ܳܢܶܐ܀
ܐܳܡܪܺܝܢ ܤܳܗ̈ܕܶܐ ܠܪ̈ܳܕܽܘܦܰܝܗܽܘܢ ܕܠܳܐ ܕܳܚܠܺܝܢܰܢ. ܡܶܢ ܢܽܘܪܳܐ ܘܤܰܝܦܳܐ ܕܰܠܛܺܝܫ. ܕܶܐܢܗܽܘ ܕܦܰܓܪܳܐ ܡܶܬܚܰܒܰܠ ܠܶܗ ܢܰܦܫܳܐ ܚܳܝܳܐ. ܘܙܳܡܪܳܐ ܫܽܘܒܚܳܐ ܘܬܰܘܕܺܝܬܳܐ܀
ܩܛܺܝ̈ܠܺܝܢ ܤܳܗ̈ܕܶܐ. ܡܶܛܽܠ ܡܳܪܗܽܘܢ ܘܰܩܛܺܝܠ ܡܳܪܗܽܘܢ. ܡܶܛܽܠ ܦܽܘܪܩܳܢܶܗ ܕܳܐܕܳܡ. ܒܪܺܝܟ ܕܰܒܩܶܛܠܶܗ ܘܩܶܛܠܳܐ ܕܤܳܗܕܰܘ̈ܗ̱ܝ ܦܰܪܩܳܗ̇ ܠܥܺܕܬܶܗ. ܘܗܳܐ ܙܳܡܪܳܐ ܠܶܗ ܬܶܫܒܽܘܚܬܳܐ܀
ܕܰܬܝܳܒܽܘܬܳܐ: ܛܽܘܒܰܘܗ̱ܝ ܠܰܐܝܢܳܐ ܕܪܰܚܡܳܟ ܡܳܪܰܢ ܛܳܒ ܡܶܢ ܕܰܗܒܳܐ. ܘܛܳܒ ܡܶܢ ܟܺܐܦ̈ܶܐ ܛܳܒ̈ܳܬܳܐ. ܕܰܒܗܳܢ ܥܳܠܡܳܐ ܤܓܳܐ ܐܺܝܩܳܪܶܗ. ܘܰܒܗܰܘ ܕܰܥܬܺܝܕ. ܝܳܪܶܬ ܚܰܝ̈ܶܐ ܕܰܠܥܳܠܳܡ܀
ܟܽܠܶܗ ܥܳܠܡܳܐ ܐܶܢ ܐ̱ܢܳܫ ܢܶܩܢܶܐ ܘܢܰܦܫܶܗ ܢܶܚܤܰܪ. ܠܰܘ ܡܶܕܶܡ ܗ̱ܽܘ ܩܶܢܝܳܢܶܗ. ܗܰܒܠܰܢ ܡܳܪܰܢ ܕܢܶܤܢܶܐ ܠܥܳܠܡܳܐ ܘܢܶܩܢܶܐ ܢܰܦܫܰܢ. ܘܢܺܐܪܰܬ ܚܰܝ̈ܶܐ ܕܰܠܥܳܠܰܡ܀
ܐܶܡܰܪ ܡܳܪܰܢ ܠܗܳܝ ܚܰܛܳܝܬܳܐ ܕܙܶܠܝ ܠܶܟܝ ܐܰܢܬܬܳܐ. ܫܒܺܝ̈ܩܺܝܢ ܚܰܘܒܰܝ̈ܟܝ ܘܰܚܛܳܗܰܝ̈ܟܝ. ܐܰܡܺܝܢ ܐܰܡܺܝܢ ܐܳܡܰܪ ܐ̱ܢܳܐ ܠܶܟܝ ܕܥܰܡ ܟܳܪ̈ܽܘܙܰܝ. ܒܰܤܒܰܪܬܳܐ ܟܳܬܶܒ ܐ̱ܢܳܐ ܠܶܟܝ܀
ܐܳܡܰܪ ܥܺܝܪܳܐ ܠܰܐܪ̈ܝܰܘܳܬܳܐ ܕܗܳܐ ܕܳܢܺܝܐܝܶܠ. ܠܓܽܘܒܳܐ ܢܳܚܶܬ ܨܶܐܕܰܝܟܽܘܢ. ܟܽܘܦܘ ܨܰܘܪ̈ܰܝܟܽܘܢ ܘܰܤܓܽܘܕܽܘܢ ܠܶܗ ܕܢܺܐܡܰܪ ܡܰܠܟܳܐ. ܕܪܰܒ ܐܰܠܳܗܳܟ ܕܳܢܺܝܐܝܶܠ܀
ܕܥܰܢܺܝ̈ܕܶܐ: ܐܰܢܺܝܚ ܡܳܪܝܳܐ ܠܥܰܒ̈ܕܶܐ ܕܺܝܠܳܟ ܒܗܳܝ ܡܰܠܟܽܘܬܳܐ. ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ. ܘܰܟܬܽܘܒ ܐܶܢܽܘܢ ܠܰܫܡܳܗܰܝ̈ܗܽܘܢ ܒܰܤܦܰܪ ܚܰܝ̈ܶܐ. ܒܽܐܘܪܺܫܠܶܡ ܗܳܝ ܕܒܰܫܡܰܝܳܐ܀
ܩܠܐ ܕܬܪܝܢ
ܒܩ̄: ܒܰܥܪܽܘܒܬܳܐ ܒܪܺܝܫܺܝܬ
ܓܘܫܡܐ ܩܕܡܝܐ H
ܦܶܬܓܳܡܳܐ: ܓܒܰܠܬܳܢܝ ܘܤܳܡܬ ܥܠܰܝ ܐܺܝܕܳܟ: ܒܰܥܪܽܘܒܬܳܐ ܒܪܺܝܫܺܝܬ. ܓܰܒܠܶܗ ܐܰܠܳܗܳܐ ܠܳܐܕܳܡ ܡܶܢ ܥܰܦܪܳܐ. ܘܰܢܦܰܚ ܒܶܗ ܪܽܘܚܳܐ. ܘܥܰܒܕܶܗ ܡܰܠܳܠܳܐ ܕܢܶܙܡܰܪ ܠܶܗ ܫܽܘܒܚܳܐ ܗ̄ܘܗ̄ ܘܢܰܘܕܶܐ ܠܓܳܒܽܘܠܶܗ܀
ܡܶܢܝ ܗܘܳܬ ܝܺܕܰܥܬܳܐ ܘܬܶܕܡܽܘܪܬܳܐ: ܒܰܥܪܽܘܒܬܳܐ ܓܰܒܠܶܗ ܐܰܠܳܗܳܐ ܠܳܐܕܳܡ ܘܤܳܡܶܗ ܒܦܰܪܕܰܝܤܳܐ. ܘܦܰܩܕܶܗ ܘܶܐܡܰܪ ܠܶܗ. ܕܟܽܠܗܽܘܢ ܐܺܝ̈ܠܳܢܶܐ ܢܶܗܘܽܘܢ ܠܒܽܘܤܳܡܳܟ ܗ̄ ܡܶܢ ܚܰܕ ܛܰܪ ܢܰܦܫܳܟ ܕܡܰܘܬܳܐ ܟܤܶܐ ܒܓܰܘܶܗ܀
ܫܽܘܒܚܳܐ: ܫܽܘܒܚܳܐ ܠܗܰܘ ܚܰܝܠܳܐ. ܕܰܢܚܶܬ ܡܶܢ ܪܰܘܡܳܐ ܘܒܰܨܠܺܝܒܶܗ ܦܰܪܩܰܢ. ܘܚܰܪܪܰܢ ܡܶܢ ܠܰܘܛܬܳܐ. ܘܰܐܠܶܦ ܠܰܢ ܕܢܶܤܓܽܘܕ ܠܰܨܠܺܝܒܶܗ ܡܪܰܡܪܡܳܐ ܗ̄ܘܗ̄ ܘܢܶܒܪܽܘܟ ܘܢܶܤܓܽܘܕ ܠܶܗ܀
ܡܶܢ ܥܳܠܰܡ: ܒܰܥܪܽܘܒܬܳܐ ܦܫܰܛ ܗ̱ܘܳܐ ܐܺܝ̈ܕܰܘܗܝ ܒܰܙܩܺܝܦܳܐ ܡܳܪܗܶܝܢ ܕܒܶܪ̈ܝܳܬܳܐ. ܘܰܚܠܳܦ ܗܰܘ ܦܺܐܪܳܐ ܕܶܐܟܰܠ ܗ̱ܘܳܐ ܐܳܕܳܡ ܡܰܘܬܳܐ ܛܥܶܡ ܕܰܨܒܳܐ ܗ̄ܘܗ̄ ܘܦܰܢܝܶܗ ܠܝܳܪܬܽܘܬܶܗ܀
ܕܝܳܠܕܰܬ ܐܰܠܳܗܳܐ: ܠܺܝ ܢܶܬܠܳــ̈ـܢ ܛܽܘܒܳܐ. ܟܽܠܗܶܝܢ ܫܰܪ̈ܒܳܬܳܐ ܥܢܳܬ ܘܶܐܡܪܰܬ ܡܰܪܝܰܡ. ܕܺܝܠܶܕܬܶܗ ܠܰܒܪܳܐ. ܘܰܡܟܰܪ ܠܶܗ ܥܺܕܬܳܐ ܘܫܽܘܒܚܳܐ ܠܶܗ ܙܳܡܪܳܐ ܗ̄ܘܗ̄ ܠܚܰܬܢܳܐ ܕܗܽܘ ܡܰܟܪܳܗ̇܀
ܡܰܪܝܰܡ ܘܶܐܠܺܝܫܒܰܥ. ܐܶܠ̈ܦܶܐ ܬܡܺܝ̈ܗܳܬܳܐ ܕܰܪ̈ܕܰܝ ܠܰܠܡܺܐܢܳܐ. ܐܶܠܺܝܫܒܰܥ ܝܶܠܕܰܬ. ܟܳܪܽܘܙܳܐ ܘܡܰܪܝܰܡ ܦܳܪܽܘܩܶܗ ܕܥܳܠܡܳܐ ܗ̄ܘܗ̄ ܨܠܽܘܬܗܶܝܢ ܬܥܰܕܰܪܝ ܠܰܢ܀
ܛܽܘܒܰܝܟܝ ܒܰܪ̱ܬ ܟܺܐܢ̈ܶܐ. ܐܶܡܶܗ ܕܰܐܠܳܗܳܐ ܕܪ̈ܰܚܡܶܐ ܗܘܰܘ ܨܶܐܕܰܝܟܝ. ܘܶܐܫܟܰܚܬܝ ܛܰܝܒܽܘܬܳܐ. ܘܰܛܥܶܢܬܝ ܠܰܐܠܳܗܳܐ ܘܰܐܘܪܶܒ ܕܽܘܟܪܳܢܶܟܝ ܗ̄ܘܗ̄ ܒܰܫܡܰܝܳܐ ܘܒܰܐܪܥܳܐ܀
ܠܳܐ ܒܰܒܬܽܘ̈ܠܳܬܳܐ ܘܠܳܐ ܒܰܥܠܰܝ̈ܡܳܬܳܐ ܘܠܳܐ ܒܕܳܪ̈ܶܐ ܩܰܕ̈ܡܶܐ. ܘܠܳܐ ܒܕܰܗܒܳܐ ܤܢܺܝܢܳܐ. ܘܠܳܐ ܒܫܶܡܫܳܐ ܦܰܐܝܳܐ ܐܰܝܟ ܫܽܘܦܪܳܗ̇ ܕܡܰܪܝܰܡ ܗ̄ܘܗ̄ ܙܰܗܝܳܐ ܘܩܰܕܺܝܫܳܐ܀
ܕܩܰܕܺܝ̈ܫܶܐ: ܛܽܘܒܳܐ ܠܰܢ̈ܒܺܝܶܐ. ܘܛܽܘܒܳܐ ܠܰܫܠܺܝ̈ܚܶܐ ܘܛܽܘܒܰܝܗܽܘܢ ܠܤܳܗ̈ܕܶܐ. ܛܽܘܒܰܝܗܽܘܢ ܠܰܐܝܠܶܝܢ. ܕܰܕܠܳܐ ܡܽܘܡ ܐܶܢܽܘܢ ܒܽܐܘܪ̈ܚܳܬܶܗ ܕܡܳܪܝܳܐ ܗ̄ܘܗ̄ ܘܢܳܛܪܺܝܢ ܦܽܘ̈ܩܕܳܢܰܘܗ̱ܝ܀
ܠܟܰܘ̈ܟܒܶܐ ܢܰܗܺܝܪ̈ܶܐ. ܕܳܡܶܝܢ ܒܰܒܪܺܝܬܳܐ ܢܒܺܝ̈ܶܐ ܘܰܫܠܺܝ̈ܚܶܐ. ܘܡܳܪܰܢ ܒܰܤܒܰܪܬܶܗ. ܢܽܘܗܪܳܐ ܩܪܳܐ ܐܶܢܽܘܢ ܕܰܠܥܳܠܡܳܐ ܡܰܢܗܪܺܝܢ ܗ̄ܘܗ̄ ܒܝܽܘܠܦܳܢܗܽܘܢ ܓܰܒܝܳܐ܀
ܐܶܬܚܰܝܰܠܘ ܤܳܗ̈ܕܶܐ ܘܰܢܚܶܬܘ ܠܰܐܓܽܘܢܳܐ ܕܢܶܙܟܽܘܢ ܠܤܳܛܳܢܳܐ. ܘܩܳܠܳܐ ܩܰܕܺܝܫܳܐ. ܐ̱ܬܳܐ ܠܗܽܘܢ ܡܶܢ ܪܰܘܡܳܐ ܕܰܐܢ̱ܬܽܘܢ ܙܳܟܶܝܬܽܘܢ ܗ̄ܘܗ̄ ܘܗܶܢܽܘܢ ܙܟܰܘ ܘܰܢܨܰܚܘ܀
ܤܳܗ̈ܕܶܐ ܒܥܰܘ ܪ̈ܰܚܡܶܐ ܥܰܠ ܕܳܪܰܢ ܕܰܚܛܳܐ. ܕܒܰܨܠܽܘܬܟܽܘܢ ܢܶܬܢܛܰܪ. ܘܢܶܒܗܰܬ ܤܳܛܳܢܳܐ ܘܬܶܦܶܠܝ ܡܰܫܪܺܝܬܶܗ ܒܚܰܝܠܳܐ ܕܰܨܠܽܘܬܟܽܘܢ ܗ̄ܘܗ̄ ܨܠܽܘܬܟܽܘܢ ܬܥܰܕܰܪܝ ܠܰܢ܀
ܕܚܰܕ ܩܢܽܘܡܳܐ: ܟܠܳܐ ܝܶܫܽܘܥ ܒܰܪܢܽܘܢ. ܫܶܡܫܳܐ ܒܰܪܩܺܝܥܳܐ ܘܤܰܗܪܳܐ ܘܠܳܐ ܗܰܠܶܟܘ. ܟܠܺܝ ܡܳܪܝ ܡܶܢ ܥܺܕܬܳܟ. ܫܰܒ̈ܛܶܐ ܘܡܰܚ̈ܘܳܬܳܐ ܒܰܨܠܽܘܬ ܡܳܪܝ ܬܳܐܘܡܰܐ ܗ̄ܘܗ̄ ܘܩܰܕܺܝ̈ܫܶܐ ܚܰܒܪ̈ܰܘܗܝ܀
ܒܝܰܘܡܳܐ ܕܗܳܘܶܐ ܒܶܗ ܕܽܘܟܪܳܢܳܟ ܐܰܒܽܘܢ ܓܰܒܝܳܐ ܡܳܪܝ ܐܰܕܰܝ. ܚܳܕ̈ܝܳܢ ܒܶܪ̈ܝܳܬܳܐ ܘܙܳܡܪ̈ܳܢ ܬܶܫܒܽܘܚܬܳܐ ܠܰܡܫܺܝܚܳܐ ܕܰܐܘܪܒܳܟ ܗ̄ܘܗ̄ ܨܠܽܘܬܳܟ ܬܥܰܕܰܪܝ̱ ܠܰܢ܀
ܕܰܥܪܽܘܒܬܳܐ: ܒܰܥܪܽܘܒܬܳܐ ܐܳܕܳܡ. ܥܒܰܪ ܥܰܠ ܦܽܘܩܕܳܢܳܐ. ܘܰܐܡܠܶܟ ܥܠܰܘܗܝ ܡܰܘܬܳܐ. ܘܒܰܥܪܽܘܒܬܳܐ ܡܳܪܰܢ ܨܰܠܒܽܘܗ̱ܝ ܝܽܘ̈ܕܳܝܶܐ ܘܰܚܝܰܘ ܒܶܗ ܥܳܠ̈ܡܶܐ ܗ̄ܘܗ̄ ܘܰܦܪܰܩ ܠܒܶܪ̈ܝܳܬܳܐ܀
ܒܰܥܪܽܘܒܬܳܐ ܚܙܳܬܶܗ. ܥܺܕܬܳܐ ܠܰܡܫܺܝܚܳܐ ܥܰܠ ܪܺܝܫ ܓܳܓܽܘܠܬܳܐ. ܘܒܶܪܟܰܬ ܤܶܓܕܰܬ ܠܶܗ. ܘܰܥܢܳܬ ܘܶܐܡܪܰܬ ܠܶܗ ܕܠܳܟ ܫܽܘܒܚܳܐ ܡܳܪܝܳܐ ܗ̄ܘܗ̄ ܕܶܐܬܰܝܬ ܘܰܦܪܰܩܬܳܢܝ܀
ܕܰܬܝܳܒܽܘܬܳܐ: ܝܰܘܡܳܐ ܕܡܶܢ ܝܰܘܡܳܐ. ܡܶܫܬܰܘܕܶܐ ܐ̱ܢܳܐ ܡܳܪܝ ܕܠܰܡܚܳܪ ܬܳܐܶܒ ܐ̱ܢܳܐ. ܥܒܰܪܘ ܝܰܘ̈ܡܰܝ ܘܶܐܙܰܠܘ. ܘܚܰܘ̈ܒܰܝ ܩܰܝܳܡܺܝܢ ܢܓܽܘܠܽܘܢ ܥܠܰܝ ܪ̈ܰܚܡܰܝܟ ܗ̄ܘܗ̄ ܘܺܐܚܶܐ ܒܛܰܝܒܽܘܬܳܟ܀
ܡܶܢ ܝܰܡܳܐ ܕܢܽܘܪܳܐ. ܘܡܰܥܒܰܪܬܳܐ ܕܚܺܝܠܬܳܐ ܦܰܨܳܐ ܠܰܢ ܡܳܪܰܢ. ܐܰܝܟ ܕܶܐܬܦܰܨܺܝܘ ܗ̱ܘܰܘ. ܛܠܳܝ̈ܶܐ ܒܰܐܬܽܘܢܳܐ ܒܰܐܪܥܳܐ ܕܒܳܒ̈ܠܳܝܶܐ ܗ̄ܘܗ̄ ܘܰܐܒܗܶܬܘ ܠܟܰܠ̈ܕܳܝܶܐ܀
ܦܪܽܘܣ ܡܳܪܝ ܛܰܝܒܽܘܬܳܟ. ܘܰܐܫܦܰܥ ܡܰܘܗܰܒܬܳܟ ܥܰܠ ܥܳܠܡܳܐ ܟܽܠܶܗ. ܠܡܰܠ̈ܟܶܐ ܬܰܪܥܽܘܬܳܐ. ܘܫܰܝܢܳܐ ܠܥܺܕ̈ܳܬܳܐ ܘܰܐܘܝܽܘܬܳܐ ܠܟܳܗ̈ܢܶܐ ܗ̄ܘܗ̄ ܘܠܰܢ ܫܽܘܒܩܳܢ ܚܰܘ̈ܒܶܐ܀
ܚܒܰܢܳܢܳܐ ܕܳܘܝܳܐ ܢܽܘܚ ܡܶܢ ܒܺܝ̈ܫܳܬܳܐ. ܡܛܳܐ ܠܶܗ ܫܽܘܠܳܡܳܐ. ܓܺܗܰܢܳܐ ܠܚܺܝܡܳܐ. ܘܩܳܪܝܳܐ ܠܪ̈ܰܫܺܝܥܶܐ ܕܰܒܓܰܘܳܗ̇ ܢܺܐܩܕܽܘܢ ܗ̄ܘܗ̄ ܡܳܪܝ ܦܰܨܳܢܝ ܡܶܢܳܗ̇܀
ܕܥܰܢܺܝ̈ܕܶܐ: ܥܰܢܺܝ̈ܕܶܐ ܕܰܫܩܰܠܘ ܦܰܓܪܳܟ ܦܳܪܽܘܩܰܢ. ܘܶܐܫܬܺܝܘ ܕܡܳܟ ܚܰܝܳܐ. ܢܶܫܡܥܽܘܢ ܠܗܰܘ ܩܳܠܳܐ. ܕܬܰܘ ܥܽܘܠܘ ܒܪ̈ܺܝܟܰܘܗܝ ܕܳܐܒܝ̱ ܝܪܰܬܘ̱ ܡܰܠܟܽܘܬܳܐ ܗ̄ܘܗ̄ ܘܚܰܝ̈ܶܐ ܕܠܐ ܥܳܒܪܺܝܢ܀
ܩܽܘܩܰܠܺܝܳܘܢ ܩܕܡܝܐ H
ܡܶܛܽܠܳܬܳܟ ܐܶܬܩܰܛܰܠܢ ܒܟܽܠܝܽܘܡ ܗ̄ܘܗ̄ ܘܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟܤܬܳܐ܀
ܐܶܬܬܥܺܝܪ ܘܠܳܐ ܬܶܕܡܰܟ ܡܳܪܝܳܐ ܗ̄ܘܗ̄ ܥܶܗܰܕܰܝܢ ܘܠܳܐ ܬܶܛܥܶܝܢ܀
ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܰܢ ܗ̄ܘܗ̄ ܘܠܳܐ ܬܶܛܥܶܐ ܡܽܘܟܳܟܰܢ ܘܽܐܘܠܨܳܢܰܢ܀
ܡܶܛܽܠ ܕܡܶܟܰܬ ܥܰܠ ܥܰܦܪܳܐ ܢܰܦܫܰܢ ܗ̄ܘܗ̄ ܘܕܶܒܩܰܬ ܟܰܪܤܰܢ ܠܰܐܪܥܳܐ܀
ܫܽܘܒܚܳܐ H
ܫܽܘܒܚܳܐ ܘܥܶܩܒܳܐ: ܐܳܘ ܤܳܗ̈ܕܶܐ ܩܰܕܺܝ̈ܫܶܐ ܕܤܰܝܒܰܪܘ ܫܶܢ̈ܕܶܐ ܘܽܐܘܠ̈ܨܳܢܶܐ ܡܶܢ ܕܰܝܳܢ̈ܶܐ ܥܰܘ̈ܳܠܶܐ. ܗܳܐ ܢܛܺܝܪ ܗ̱ܽܘ ܦܽܘܪܥܳܢܟܽܘܢ ܒܰܓܢܽܘܢ ܢܽܘܗܪܳܐ ܕܠܳܐ ܡܶܫܬܪܶܐ. ܨܠܽܘܬܟܽܘܢ ܬܶܗܘܶܐ ܠܰܢ ܫܽܘܪܳܐ ܪܳܡܳܐ ܘܒܶܝܬ ܓܰܘܤܳܐ܀
ܣܶܕܪܳܐ ܕܣܳܗ̈ܕܶܐ ܘܕܩܰܕܺܝ̈ܫܶܐ:
ܦܪܽܘܡܝܽܘܢ
ܬܶܫܒܽܘܚܬܳܐ ܠܚܰܕ ܐܰܒܳܐ ܩܰܕܺܝܫܳܐ ܕܰܒܢܰܦ̈ܫܳܬܳܐ ܕܕܳܚ̈ܠܰܘܗ̱ܝ ܥܳܡܰܪ܆ ܠܚܰܕ ܒܪܳܐ ܤܓܺܝܕܳܐ ܕܰܒܓܰܪ̈ܡܶܐ ܕܩܰܕܺܝܫܰܘ̈ܗ̱ܝ ܡܕܰܝܰܪ܆ ܠܚܰܕ ܪܽܘܚܳܐ ܩܰܕܺܝܫܳܐ ܕܰܟܠܺܝ̈ܠܶܐ ܕܫܽܘܒܚܳܐ ܠܰܐܬܠܺܝ̈ܛܰܘܗ̱ܝ ܓܳܕܶܠ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝܺܢ.
ܣܶܕܪܳܐ
ܟܰܕ ܠܰܢܒܺܝ̈ܶܐ ܘܠܰܫܠܺܝ̈ܚܶܐ ܘܰܠܤܳܗ̈ܕܶܐ ܩܰܕܺܝ̈ܫܶܐ ܡܩܰܠܤܺܝܢܰܢ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܪܰܡܪܡܺܝܢܰܢ. ܡܶܠܬܳܐ ܡܰܢ ܒܨܺܝܪܳܐ ܘܬܰܪܥܺܝܬܳܐ ܒܰܤܝܳܢܳܐ ܕܰܚܛܺܝܬܳܐ ܛܰܒܺܝܥܳܐ. ܘܕܰܬܩܰܠܶܤܝ ܐܶܢܽܘܢ ܐܰܝܟ ܕܘܳܠܝܳܐ ܘܙܳܕܩܳܐ ܠܳܐ ܡܰܨܝܳܐ. ܘܟܰܕ ܡܦܺܝ̈ܤܳܢܶܐ ܘܒܰܥܳܝ̈ܶܐ ܚܠܳܦܰܝܢ ܥܒܺܝ̈ܕܺܝܢ ܘܥܰܠ ܓܰܙܰܝ̈ ܡܳܪܗܽܘܢ ܫܰܠܺܝ̈ܛܺܝܢ. ܒܰܕܓܽܘܢ ܨܠܰܘ̈ܳܬܰܢ ܠܘܳܬܗܽܘܢ ܢܩܰܪܶܒ ܘܬܰܟܫ̈ܦܳܬܰܢ ܠܘܳܬܗܽܘܢ ܢܫܰܘܫܶܛ ܐܰܝܟܰܢܳܐ ܕܗܶܢܽܘܢ ܢܶܫܶܐܠܽܘܢ ܡܶܢ ܡܳܪܗܽܘܢ ܕܰܢܫܰܟܶܢ ܠܰܢ ܒܝܰܕ ܨܠܰܘ̈ܳܬܗܽܘܢ ܚܽܘܤܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ. ܠܰܢ ܘܰܠܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ. ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܤܶܩ ܫܽܘܒܚܳܐ ܘܢܶܬܶܠ ܬܰܘܕܺܝܬܳܐ ܠܰܐܒܳܐ ܤܓܺܝܕܳܐ ܡܢܰܨܚܳܢܗܽܘܢ. ܘܠܰܒܪܳܐ ܫܒܺܝܚܳܐ ܡܟܰܠܠܳܢܗܽܘܢ ܘܰܠܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܕܰܐܓܽܘܢܰܝ̈ܗܽܘܢ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀
ܩܠܐ ܒܩ̄: ܣܳܗܕܰܘ̈ܗܝ ܐܰܢܬܽܘܢ H
ܤܳܗܕܰܘ̈ܗܝ ܐܰܢ̱ܬܽܘܢ ܕܺܝܚܺܝܕܳܝܳܐ ܪ̈ܚܽܘܡܰܘܗ̱ܝ ܐܰܢ̱ܬܽܘܢ ܕܒܽܘܟܪܶܗ ܕܥܶܠܳܝܳܐ. ܕܡܶܛܽܠܳܬܶܗ ܐܶܬܩܰܛܰܠܬܽܘܢ ܘܡܶܛܽܠ ܚܽܘܒܶܗ ܚܰܫ̈ܶܐ ܤܰܝܒܰܪܬܽܘܢ. ܘܡܶܛܽܠܳܬܶܗ ܠܕܶܒܚܬܳܐ ܐܶܬܩܰܪܰܒܬܽܘܢ. ܒܪܺܝܟ ܕܰܐܘܪܶܒ ܕܽܘܟܪ̈ܳܢܰܝܟܽܘܢ܀
ܛܽܘܒ ܠܰܢ̈ܒܺܝܶܐ ܘܛܽܘܒ ܠܰܫܠܺܝ̈ܚܶܐ ܘܛܽܘܒܳܐ ܠܤܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ. ܕܫܳܡܥܺܝܢ ܠܰܐܒܳܐ ܘܚܳܙܶܝܢ ܠܰܒܪܳܐ ܘܰܠܪܽܘܚܩܽܘܕܫܳܐ ܕܓܳܕܠܳܐ ܟܠܺܝ̈ܠܰܝܗܽܘܢ. ܘܥܳܐܠܺܝܢ ܝܳܪܬܺܝܢ ܠܗܰܘ ܛܽܘܒܳܐ ܕܥܰܝܢܳܐ ܠܳܐ ܚܙܳܬ ܘܶܐܕܢܳܐ ܕܒܶܤܪܳܐ ܠܳܐ ܫܶܡܥܰܬ܀
ܫܽܘܒܚܳܐ: ܫܽܘܒܚܳܐ ܠܳܟ ܡܳܪܝ ܕܰܒܟܽܠܕܳܪ̈ܺܝܢ ܐܺܝܬ ܠܳܟ ܟܺܐܢ̈ܶܐ ܕܰܡܪܰܥܶܝܢ ܠܰܫܡܳܟ. ܒܕܳܪ̈ܶܐ ܩܰܕ̈ܡܶܐ ܢܽܘܚ ܘܰܐܒܪܳܗܳܡ ܘܺܐܝܤܚܳܩ ܘܝܰܥܩܽܘܒ ܘܡܽܘܫܶܐ ܘܺܐܠܺܝܳܐ. ܘܰܒܗܳܢ ܕܳܪܳܐ ܢܦܺܝܤܽܘܢܳܟ ܤܳܗ̈ܕܶܐ ܒܪ̈ܺܝܟܶܐ ܒܰܕܡܳܐ ܕܰܐܪܕܺܝܘ ܨܰܘܪ̈ܰܝܗܽܘܢ܀
ܡܶܢ ܥܳܠܰܡ: ܐܰܪܒܰܥ ܐܰܦܺܝ̈ܢ ܐܺܝܬ ܒܰܒܪܺܝܬܳܐ ܘܒܰܐܪ̈ܒܥܳܬܰܝܗܶܝܢ ܐܺܝܬ ܠܰܢ ܥܽܘܕܪ̈ܳܢܶܐ. ܡܶܢ ܡܰܕܢܚܳܐ ܬܳܐܘܡܰܐ ܫܠܺܝܚܳܐ ܘܡܶܢ ܡܰܥܪܒܳܐ ܫܶܡܥܽܘܢ ܕܶܐܤܛܽܘܢܶܗ. ܘܡܶܢ ܓܰܪܒܝܳܐ ܐܰܪܒܥܺܝܢ ܤܳܗ̈ܕܶܐ ܩܰܕܺܝ̈ܫܶܐ. ܘܡܶܢ ܬܰܝܡܢܳܐ ܡܳܪܝ ܝܽܘܚܰܢܳܢ܀
ܫܰܘܬܶܦ ܠܰܢ ܡܳܪܝ ܒܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ. ܒܰܨܠܰܘ̈ܳܬܗܽܘܢ ܚܰܤܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀
ܒܰܨܠܽܘܬ ܐܶܡܳܟ ܥܰܡ ܕܰܢܒܺܝ̈ܶܐ ܘܫܠܺܝ̈ܚܶܐ ܘܤܳܗ̈ܕܶܐ. ܠܚܰܝ̈ܶܐ ܢܰܛܰܪ ܘܰܠܥܰܢܺܝ̈ܕܶܐ ܚܰܤܳܐ ܒܪ̈ܰܚܡܰܝܟ܀
ܡܳܐ ܦܐܶܐ ܘܰܪܓܺܝܓ ܝܽܘܡ ܕܽܘܟܪܳܢܳܗ̇ ܕܰܡܒܰܪܰܟܬܳܐ: ܒܬܽܘܠܬܳܐ ܡܰܪܝܰܡ ܕܰܗܘܳܬ ܐܶܡܳܐ ܠܒܰܪ ܐܰܠܳܗܳܐ. ܒܰܨܠܰܘ̈ܳܬܳܗ̇ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ: ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܗ̇ ܒܗܰܝܡܳܢܽܘܬܳܐ܀
ܡܳܐ ܫܰܦܺܝܪܳܐ ܥܺܕܬܳܐ ܒܥܺܐܕܶܝ̈ܗ̇ ܘܰܕܠܳܐ ܥܺܐܕ̈ܶܐ: ܤܺܝܡ ܒܳܗ̇ ܨܠܺܝܒܳܐ ܘܰܤܕܺܝܪ̈ܳܢ ܒܳܗ̇ ܡܰܪ̈ܓܳܢܝܳܬܳܐ. ܡܶܢ ܚܰܕ ܓܰܒܳܐ ܢܒܺܝ̈ܶܐ ܫܠܺܝ̈ܚܶܐ ܘܤܳܗ̈ܕܶܐ ܒܪ̈ܺܝܟܶܐ: ܒܓܰܒܳܐ ܐ̱ܚܪܺܢܳܐ ܚܰܫܰܘ̈ܗܝ ܕܰܒܪܳܐ ܘܰܙܩܺܝܦܽܘܬܶܗ܀
ܡܳܐ ܫܰܦܺܝܪ ܗܽܘ ܤܰܒܪܳܐ ܛܳܒܳܐ ܕܰܥܒܰܕ ܡܳܪܰܢ: ܠܡܺܝ̈ܬܶܐ ܕܒܰܫܝܽܘܠ ܟܰܕ ܐܰܝܟ ܡܺܝܬܳܐ ܥܰܠ ܨܶܐܕܰܝܗܽܘܢ. ܕܗܳܐ ܩܛܺܝܠ ܡܰܘܬܳܐ ܬܰܘ ܦܽܘܩܘ ܝܳܪ̈ܬܶܐ ܠܰܬܚܽܘܡܰܝ̈ܟܽܘܢ: ܘܰܙܡܰܪܘ ܫܽܘܒܚܳܐ ܠܗܰܘ ܕܰܦܪܰܩܟܽܘܢ ܡܶܢ ܫܰܒܳܝܳܐ܀
ܡܳܐ ܫܰܦܺܝܪ̈ܺܝܢ ܥܺܝܪ̈ܰܝ ܪܰܘܡܳܐ ܕܰܡܫܰܡܫܺܝܢ ܠܶܗ: ܠܪܳܡܳܐ ܒܰܐܬܪܶܗ ܟܰܕ ܩܳܥܶܝܢ ܠܶܗ ܩܰܕܺܝܫ ܩܰܕܺܝܫ. ܩܰܕܺܝܫ ܡܳܪܝܳܐ ܡܰܘܪܶܒ ܕܽܘܟܪܳܢ ܟܽܠ ܩܰܕܺܝ̈ܫܰܘܗܝ: ܩܽܘܕ̈ܫܶܐ ܬܠܳܬܳܐ ܠܚܰܕ ܩܰܕܺܝܫܳܐ ܠܶܗ ܬܶܫܒܽܘܚܬܳܐ܀
ܠܥܶܠ ܒܰܫܡܰܝܳܐ ܘܗܳܪܟܳܐ ܒܥܺܕܬܳܐ ܢܗܶܐ ܕܽܘܟܪܳܢܳܐ܀
ܠܰܡܒܰܪܰܟܬܳܐ ܘܰܠܩܰܕܺܝ̈ܫܶܐ ܘܰܠܥܰܢܺܝ̈ܕܶܐ܀
ܡܳܪܰܢ ܝܶܫܽܘܥ ܡܫܺܝܚܳܐ
ܡܳܪܰܢ ܝܶܫܽܘܥ ܡܫܺܝܚܳܐ: ܬܰܪܥܳܐ ܕܪܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܆ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬܪܰܚܰܡܥܠܰܝܢ܀
ܚܽܘܒܳܟ ܐܰܚܬܳܟ ܡܶܢ ܐܰܬܪܳܟ ܨܶܐܕܰܝܢ ܡܳܪܝ܆ ܕܰܒܝܰܕ ܡܰܘܬܳܟ ܐܶܬܒܰܛܠܰܬ ܡܺܝܬܽܘܬܰܢ ܐܶܬܪܰܚܰܡܥܠܰܝܢ܀
ܩܰܕܺܝܫܰܬ ܐܰܠܗܳܐ. ܩܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀
ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀
ܫܽܘܒܚܳܐ ܠܳܟ ܐܰܠܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀
ܨܠܽܘܬܳܐ ܡܳܪܳܢܳܝܬܳܐ
ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܨܠܰܘ̈ܳܬܳܐ ܕܡܶܨܛܰܠܝܳܢ ܒܚܰܪܰܬ݀ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ
ܩܳܢܽܘܢܳܐ ܕܗܰܝܡܳܢܽܘܬܳܐ
ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.
ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.
ܢܚܶܬ̣ ܡܶܢ ܫܡܰܝܳܐ ܘܶܐܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܶܐܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.
ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.
ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀
ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ
ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ̣ ܗ̄ܘܗ̄ ܘܡܰܠܟܬ̣ܳܐ ܡܶܢ ܝܰܡܺܝܢܳܟ܀
ܘܰܛܥܳܝ ܥܰܡܶܟ̣ܝ̱ ܘܒܶܝܬ̣ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓ̣ܪܰܓ̣ ܡܰܠܟܳܐ ܠܫܽܘܦܪܶܟ̣ܝ̱܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܩܰܪܶܒܝ̱ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬ̣ܰܢ܇ ܘܰܨܠܽܘܬ̣ܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬ̣ܰܢ܀
ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬ̣ܽܘܠܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ̣ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬ̣ܳܐ ܘܫܰܒ̈ܛܶܐ ܕܪܽܘܓ̣ܙܳܐ܀
ܐ̱ܚܪܺܢܳܐ ܒܫܽܘܠܳܡܳܐ
ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀
ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܕܝܳܠܕܰܬ ܐܰܠܳܗܳܐ
ܗܰܘ ܪܺܝܫ ܡܰܠܰܐܟ̣̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ̣ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟ̣ܝ̱ ܘܡܶܢܶܟ̣ܝ̱ ܕܳܢܰܚ܀
ܫܽܘܒܚܳܐ: ܐܶܠܦܳܐ ܗܘܳܬ̣ ܡܰܪܝܰܡ܇ ܛܶܥܢܰܬ̣ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬ̣ܳܐ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀
ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ
ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀
ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ܘܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀
ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ
ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀
ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀
ܐ̱ܚܪܺܢܳܐ ܒܫܽܘܠܳܡܳܐ
ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀
ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀
ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:
ܥܶܩܒܳܐ
ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀
ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ
ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀
ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀
ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ
ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀
ܫܠܳܡ ܠܶܟܝ
ܫܠܳܡ ܠܶܟ̣ܝ ܒܬ̣ܽܘܠܬܳܐ ܡܰܪܝܰܡ ܡܰܠܝܰܬ̣ ܛܰܝܒܽܘܬ̣ܳܐ. ܡܳܪܰܢ ܥܰܡܶܟܝ. ܡܒܰܪܰܟ̣ܬܳܐ ܐܰܢ̱ܬܝ ܒܢܶܫ̈ܶܐ. ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟ̣ܝ̱. ܡܳܪܰܢ ܝܶܫܽܘܥ. ܐܳܘ ܩܰܕܺܝܫܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ. ܨܰܠܳܝ ܚܠܳܦܰܝܢ ܚܰܛܳܝ̈ܶܐ. ܗܳܫܳܐ ܘܰܒܫܳܥܰܬ ܘܡܰܘܬܰܢ ܐܰܡܺܝܢ܀