ܨܠܰܘ̈ܳܬܳܐ ܕܡܶܨܛܰܠܝܳܢ ܩܕܳܡ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܺܝܪܳܐ ܐܰܡܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬ̣ܳܐ ܘܳܐܬ̣ܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܙܡܘܪܐ ܢܐ

ܪܰܚܶܡ ܥܠܰܝ ܐܰܠܳܗܳܐ ܐܰܝܟ ܛܰܝܒܽܘܬ̣ܳܟ ܘܰܐܝܟ ܣܽܘܓ̣ܳܐܐ ܕܪ̈ܰܚܡܰܝܟ ܠܚܺܝ̣ ܚܛܳܗܰܝ̈܀

ܐܰܣܓܳܐ ܐܰܫܺܝܓ̣ܰܝܢܝ̱ ܡܶܢ ܥܰܘܠܝ̱ ܘܡܶܢ ܚܛܳܗܰܝ̈ ܕܰܟܳܢܝ̱܀

ܡܶܛܽܠ ܕܣܰܟ̣̈ܠܘܳܬ̣ܝ̱ ܝܳܕܰܥ ܐ̱ܢܳܐ ܘܰܚܛܳܗܰܝ̈ ܠܽܘܩܒܰܠܝ̱ ܐܶܢܽܘܢ ܒܟ̣ܽܠ ܙܒܰܢ܇ ܠܳܟ ܒܰܠܚܽܘܕܰܝܟ ܚܛܺܝܬ̣ ܘܒܺܝ̈ܫܳܬ̣ܳܐ ܩܕܳܡܰܝܟ ܣܶܥܪܶܬ̣܀

ܡܶܛܽܠ ܕܬܶܙܕܰܕܰܩ ܒܡܶܠܬ̣ܳܟ ܘܬܶܙܟ̣ܶܐ ܒܕܺܝ̈ܢܰܝܟ܇ ܡܶܛܽܠ ܕܰܒܥܰܘܠܳܐ ܐܶܬ̣ܒܰܛܢܶܬ̣ ܘܒܰܚ̈ܛܳܗܶܐ ܒܛܶܢܬܰܢܝ̱ ܐܶܡܝ̱܀

ܐܰܢ̱ܬ ܕܶܝܢ ܒܩܽܘܫܬܳܐ ܨܒܰܝܬ ܘܟܰܣ̈ܝܳܬ̣ܳܐ ܕܚܶܟ̣ܡܬ̣ܳܟ ܐܰܘܕܰܥܬܳܢܝ̱܇ ܪܽܘܣ ܥܠܰܝ ܒܙܽܘܦܳܟ ܘܶܐܬ̣ܕܰܟܶܐ ܚܰܠܶܠܰܝܢܝ̱ ܒܶܗ ܡܶܢ ܬܰܠܓܳܐ ܐܶܚܘܰܪ܀

ܐܰܣܒܰܥܰܝܢܝ̱ ܒܽܘܣܳܡܳܟ ܘܚܰܕܽܘܬ̣ܳܟ ܘܢܶܚܕܽܘܢ ܓܰܪ̈ܡܰܝ ܡܰܟܺܝ̈ܟ̣ܶܐ܇ ܐܰܗܦܶܟ ܐܰܦܰܝ̈ܟ ܡܶܢ ܚܛܳܗܰܝ̈ ܘܟܽܠܗܶܢ ܣܰܟ̣̈ܠܘܳܬ̣ܝ̱ ܠܚܺܝ܀

ܠܶܒܳܐ ܕܰܟ̣ܝܳܐ ܒܪܺܝ ܒܺܝ ܐܰܠܳܗܳܐ ܘܪܽܘܚܳܟ ܬܩܰܢܬ̣ܳܐ ܚܰܕܶܬ̣ ܒܓ̣ܰܘܝ̱܇ ܠܳܐ ܬܶܫܕܶܝܢܝ̱ ܡܶܢ ܩܕܳܡܰܝܟ ܘܪܽܘܚܳܟ ܩܰܕܺܝܫܳܐ ܠܳܐ ܬܶܣܰܒ ܡܶܢܝ̱܀

ܐܶܠܳܐ ܐܰܗܦܶܟ ܠܺܝ ܒܽܘܣܳܡܳܟ ܘܦܽܪܩܳܢܳܟ ܘܪܽܘܚܳܟ ܡܫܰܒܰܚܬܳܐ ܬܣܰܡܟ̣ܰܢܝ̱܇ ܕܰܐܠܶܦ ܠܥܰܘ̈ܳܠܶܐ ܐܽܘܪܚܳܟ ܘܚܰܛܳܝ̈ܶܐ ܠܘܳܬ̣ܳܟ ܢܶܬܦܢܽܘܢ܀

ܦܰܨܳܢܝ̱ ܡܶܢ ܕܡܳܐ ܐܰܠܳܗܝ̱ ܐܰܠܳܗܳܐ ܕܦܽܘܪܩܳܢܝ̱ ܘܰܢܫܰܒܰܚ ܠܶܫܳܢܝ̱ ܙܰܕܺܝܩܽܘܬ̣ܳܟ܇ ܡܳܪܝܳܐ ܦܬܰܚ ܠܺܝ ܣܶܦ̈ܘܳܬ̣ܝ̱ ܘܦܽܘܡܝ̱ ܢܙܰܡܰܪ ܬܶܫܒ̈ܚܳܬ̣ܳܟ܀

ܡܶܛܽܠ ܕܠܳܐ ܨܒܰܝܬ ܒܕܶܒ̈ܚܶܐ ܐܳܦܠܳܐ ܒܝܰܩ̈ܕܶܐ ܫܰܠ̈ܡܶܐ ܐܶܬ̣ܪܰܥܺܝܬ̣܇ ܕܶܒܚܰܘ̈ܗܝ ܕܰܐܠܳܗܳܐ ܪܽܘܚܳܐ ܗ̱ܝ ܡܰܟܺܝܟ̣ܬܳܐ ܠܶܒܳܐ ܫܚܺܝܩܳܐ ܐܰܠܳܗܳܐ ܠܳܐ ܡܰܣܠܶܐ܀

ܐܰܛܶܐܒ ܒܨܶܒܝܳܢܳܟ ܠܨܶܗܝܽܘܢ ܘܰܒܢܺܝ ܫܽܘܪ̈ܶܗ̇ ܕܽܐܘܪܺܫܠܶܡ܇ ܗܳܝܕܶܝܢ ܬܶܨܛܒܶܐ ܒܕܶܒ̈ܚܶܐ ܕܩܽܘܫܬܳܐ ܘܰܒܝܰܩ̈ܕܶܐ ܫܰܠ̈ܡܶܐ ܗܳܝܕܶܝܢ ܢܰܣܩܽܘܢ ܬܰܘܪ̈ܶܐ ܥܰܠ ܡܰܕܒܚܳܟ܀

ܥܢܝܢܐ ܦܬܓ̄: H

ܐܰܠܳܗܝ ܐܰܠܳܗܝ ܐܰܢ̱ܬ ܐܶܤܰܟܶܐ ܠܳܟ܀

ܢܽܘܗܪܶܗ ܕܥܳܠܡܳܐ. ܒܪܳܐ ܕܰܐܠܳܗܳܐ ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܨܰܗܝܳܐ ܗ̱ܝ ܠܳܟ ܢܰܦܫܝ ܘܰܡܤܰܟܶܐ ܠܳܟ ܒܶܤܪܝ. ܐܰܝܟ ܐܰܪܥܳܐ ܨܗܺܝܬܳܐ ܘܰܡܛܰܪܰܦܬܳܐ ܕܒܳܥܝܳܐ ܡܰܝ̈ܳܐ

ܝܶܫܽܘܥ ܐܰܠܳܗܳܐ. ܢܽܘܗܪܳܐ ܫܰܪܺܝܪܳܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܗܳܟܰܢ ܚܳܪܬܳܟ ܒܩܽܘܫܬܳܐ ܕܶܐܚܙܶܐ ܥܽܘܫܢܳܟ ܘܺܐܝܩܳܪܳܟ܀

ܡܫܺܝܚܳܐ ܐܰܠܳܗܳܐ. ܨܶܡܚܶܗ ܕܰܐܒܳܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܡܶܛܽܠ ܕܛܳܒܺܝ̈ܢ ܪ̈ܰܚܡܰܝܟ ܡܶܢ ܚܰܝ̈ܶܐ. ܘܤܶܦܘ̈ܳܬܝ ܢܫܰܒ̈ܚܳܢܳܟ܀

ܐܰܠܳܗ ܐܰܠܳܗܝܢ. ܘܡܳܪܶܐ ܡܳܪ̈ܰܘܳܬܳܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܗܳܟܰܢ ܐܶܒܰܪܟܳܟ ܒܚܰܝܰܝ̈. ܘܒܰܫܡܳܟ ܐܰܪܺܝܡ ܐܺܝ̈ܕܰܝ܀

ܕܚܺܝܠܳܐ ܘܰܡܫܰܒܚܳܐ. ܘܤܳܥܰܪ ܬܶܕܡܪ̈ܳܬܳܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܐܰܝܟ ܫܽܘܡܢܳܐ ܘܰܐܝܟ ܬܰܪܒܳܐ ܬܶܕܗܰܢܝ ܢܰܦܫܝ. ܘܰܒܤܶܦ̈ܘܳܬܳܐ ܕܫܽܘܒܚܳܐ ܢܫܰܒܚܳܟ ܦܽܘܡܝ܀

ܕܰܚܛܺܝܬ ܝܳܕܰܥ ܐ̱ܢܳܐ. ܘܥܰܠܗܳܝ ܓܳܥܶܐ ܐ̱ܢܳܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܐܶܬܕܟܰܪܬܳܟ ܥܰܠ ܬܶܫܘܺܝܬܝ. ܘܰܒܠܰܝ̈ܠܰܘܳܬܳܐ ܪܢܺܝܬ ܒܳܟ܀

ܡܰܠܟܳܐ ܕܡܰܠ̈ܟܶܐ. ܘܫܰܠܺܝܛܳܐ ܕܫܰܠܺܝ̈ܛܳܢܶܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܡܶܛܽܠ ܕܰܗܘܰܝܬ ܠܺܝ ܡܥܰܕܪܳܢܳܐ. ܘܰܒܛܶܠܳܠܳܐ ܕܟܶܢܦܰܝ̈ܟ ܐܶܤܬܰܬܰܪ܀

ܥܰܠ ܕܰܚܛܺܝܬ ܘܰܐܤܟܠܶܬ. ܘܥܶܒܪܶܬ ܦܽܘܩܕܳܢܰܝ̈ܟ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܢܶܦܩܰܬ ܢܰܦܫܝ ܒܳܬܪܳܟ. ܘܰܥܠܰܝ ܤܶܡܟܰܬ ܝܰܡܺܝܢܳܟ܀

ܡܶܛܽܠ ܚܛܳܗܰܝ̈. ܘܤܽܘܓܳܐܐ ܕܤܰܟ̈ܠܘܳܬܝ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܗܶܢܽܘܢ ܒܥܰܘ ܕܢܰܘܒܕܽܘܢ ܠܢܰܦܫܝ̱ ܘܢܶܥܠܽܘܢ ܒܬܰܚܬܰܝ̈ܬܳܗ̇ ܕܰܐܪܥܳܐ܀

ܚܳܐܶܢ ܠܚܰܛܳܝ̈ܶܐ. ܘܨܳܒܶܐ ܒܬܰܝ̈ܳܒܶܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܢܶܫܬܰܠܡܽܘܢ ܠܚܰܪܒܳܐ ܘܡܶܐܟܽܘܠܬܳܐ ܠܬܰܥ̈ܠܶܐ ܢܶܗܘܽܘܢ. ܘܡܰܠܟܳܐ ܢܶܚܕܶܐ ܒܰܐܠܳܗܳܐ܀

ܡܳܪܳܐ ܕܥܶܠܳܝ̈ܶܐ. ܘܤܰܒܪܳܐ ܕܬܰܚܬܳܝ̈ܶܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܢܶܫܬܰܒܗܰܪ ܟܽܠ ܕܝܳܡܶܐ ܒܶܗ. ܡܶܛܽܠ ܕܢܶܤܬܟܰܪ ܦܽܘܡܗܽܘܢ ܕܕܰܓ̈ܳܠܶܐ܀

ܡܢܰܚܡܳܢܳܐ ܕܡܺܝ̈ܬܶܐ. ܘܣܰܒܪܳܐ ܕܥܰܢܺܝ̈ܕܶܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܫܽܘܒܚܳܐ ܘܡܶܢ ܥܳܠܰܡ: ܠܚܽܘܕܳܝܳܐ ܕܡܶܣܬܓܶܕ. ܒܰܬܠܺܝܬܳܝܽܘܬܳܐ. ܠܘܳܬܳܟ ܩܰܕܡܶܬ ܪܰܚܶܡܥܠܰܝ܀

ܡܙܡܘܪܐ : ܩܝܓ

ܫܽܘܒܚܳܐ ܠܒܳܪܽܘܝܶܗ ܕܢܽܘܗܪܳܐ. ܫܰܒܰܚܘ̱ ܥܰܒܕܰܘ̈ܗ̱ܝ ܕܡܳܪܝܳܐ. ܫܰܒܰܚܘ̱ ܠܰܫܡܶܗ ܕܡܳܪܝܳܐ܀

ܢܶܗܘܶܐ ܫܡܶܗ ܕܡܳܪܝܳܐ ܡܒܰܪܰܟ ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ܀

ܡܶܢ ܡܰܕܢܳܚܰܘ̈ܗ̱ܝ ܕܫܶܡܫܳܐ ܘܰܥܕܰܡܳܐ ܠܡܰܥܪ̈ܳܒܰܘܗ̱ܝ. ܪܰܒ ܗ̱ܽܘ ܫܡܶܗ ܕܡܳܪܝܳܐ܀

ܘܪܳܡ ܥܰܠ ܟܽܠܗܽܘܢ ܥܰܡ̱̈ܡܶܐ ܡܳܪܝܳܐ ܘܥܰܠ ܫܡܰܝܳܐ ܐܺܝ̣ܩܳܪܶܗ܀

ܡܰܢܽܘ ܐܰܝܟ ܡܳܪܝܳܐ ܐܰܠܳܗܰܢ ܕܝܳܬܶܒ ܒܪܰܘܡܳܐ ܘܚܳܙܶܐ ܒܥܽܘܡܩܳܐ ܒܰܫܡܰܝܳܐ ܘܒܰܐܪܥܳܐ܀

ܡܪܺܝܡ ܡܶܢ ܩܺܩܰܠܬܳܐ ܠܒܳܝܫܳܐ ܕܢܰܘܬܒܺܝܘܗ̱ܝ ܥܰܡ ܪܰܘܪ̈ܒܳܢܶܐ ܕܥܰܡܳܐ܀

ܡܰܘܬܶܒ ܥܩܰܪܬܳܐ ܒܒܰܝܬܳܐ. ܘܶܐܡܳܐ ܕܰܒܢܰܝ̈ܳܐ ܟܰܕ ܚܳܕܝܳܐ: ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ ܒܰܪܶܟܡܳܪܝ̱܀

ܘܡܰܩܦܝܢ ܡܙܡ̄ ܕܫܰܒܰܚܘ ܠܡܳܪܝܳܐ ܡ̣ܢ ܫܡܰܝܳܐ ܘܫܰܪܟܐ܀

ܫܽܘܒܚܳܐ ܥܶܩܒܳܐ: ܩܠܐ ܒܩ̄: H

ܒܗܰܘ ܢܽܘܗܪܳܐ ܓܰܐܝܳܐ ܡܰܠܰܐܟ̈ܶܐ. ܡܫܰܡܫܺܝܢ ܠܰܐܠܳܗܽܘܬܳܟ. ܘܰܒܕܶܢܚܶܗ ܕܨܰܦܪܳܐ ܟܽܠ ܒܶܪ̈ܝܳܢ. ܡܩܰܕ̈ܡܳܢ ܤܳܓ̈ܕܳܢ ܠܺܐܝܩܳܪܳܟ܀

ܤܛܳܘܡܶܢ ܩܰܐܠܳܘܣ ܩܽܘܪܝܶܐܠܰܝܣܳܘܢ܀

ܣܶܕܪܳܐ ܓܰܘܳܢܳܝܐ:

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ. ܘܢܰܨܰܚ ܕܽܘܟܪܳܢ ܩܰܕܺܝܫܰܘ̈ܗܝ ܒܟܽܠ ܐܰܬܰܪ ܘܦܶܢ̈ܝܳܢ ܘܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܪܰܣܶܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܟܰܕ ܥܽܘܗܕܳܢܳܐ ܪܚܺܝܡܳܐ ܘܚܰܒܺܝܒܳܐ ܘܰܡܝܰܩܪܳܐ ܥܳܒܕܺܝܢܰܢ. ܠܗܳܝ ܫܳܘܝܰܬ ܠܛܽܘ̈ܒܶܐ ܘܰܫܒܺܝܚܰܬ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܡܒܰܪܰܟܬܳܐ ܘܰܡܥܰܠܰܝܬܳܐ ܘܰܒܬܽܘܠܰܬ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܥܰܡܳܗ̇ ܕܶܝܢ ܢܶܬܶܥ̱ܗܰܕ ܠܰܢ̈ܒܺܝܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ ܠܶܐܘܰܢܓܶܠܺܝ̈ܣܛܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ. ܠܟܺܐܢ̈ܶܐ ܘܰܠܟܳܗ̈ܢܶܐ ܘܠܰܐܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ ܒܬܽܘ̈ܠܶܐ ܘܩܰܕܺܝ̈ܫܶܐ ܘܢܰܟ̈ܦܶܐ ܘܨܰܝܳܡ̈ܶܐ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܘܟܽܠܗܽܘܢ ܣܳܥܪ̈ܰܝ ܫܰܦܺܝܪ̈ܳܬܳܐ. ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܰܒܬܰܟܫ̈ܦܳܬܗܽܘܢ ܡܩܰܒ̈ܠܳܬܳܐ ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܰܫܒܽܘܩ ܚܰܘܒܰܝ̈ܢ ܘܚܰܣܳܐ ܚܛܳܗܰܝ̈ܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܒܓܽܘܕܰܝ̈ܗܽܘܢ ܕܩܰܕܺܝ̈ܫܰܝܟ ܢܶܬܛܰܟܰܣ ܘܰܒܣܺܝ̈ܥܳܬܗܽܘܢ ܢܶܬܚܰܠܰܛ ܘܒܰܝܢܳܬܗܽܘܢ ܢܶܗܘܶܐ ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀

ܩܠܐ ܩܕܡܝܐ ܕܨܦܪܐ ܒܩ̄: ܕܰܚܛܳܐ ܠܐ ܢܶܚܛܶܐ.
ܓܘܫܡܐ ܬܠܝܬܝܐ H

ܦܶܬܓܳܡܳܐ: ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ ܗ̄: ܒܥܶܕܳܢܶܗ ܕܨܰܦܪܳܐ ܕܡܶܬܬܤܺܝܡܺܝܢ ܒܶܤ̈ܡܶܐ. ܡܰܠܰܐܟ̈ܶܐ ܒܪܰܘܡܳܐ ܬܶܫܒܽܘܚܬܳܐ ܙܳܡܪܺܝܢ. ܟܳܗ̈ܢܶܐ ܒܙܰܗܝܽܘܬܳܐ. ܦܺܝܪ̈ܡܶܐ ܕܚܽܘܤܳܝܳܐ. ܘܰܚܠܳܦ ܚܰܛܳܝ̈ܶܐ ܠܰܐܠܳܗܳܐ ܡܩܰܪܒܺܝܢ ܗ̄ܘܗ̄ ܥܢܺܝ ܐܶܢܽܘܢ ܡܳܪܝܳܐ ܘܦܰܢܳܐ ܫ̈ܶܐܠܳܬܗܽܘܢ܀

ܘܰܓܥܳܬܝ̱ ܠܘܳܬܳܟ ܬܶܥܽܘܠܝ̱ ܗ̄: ܒܥܶܕܳܢܶܗ ܕܨܰܦܪܳܐ ܫܩܰܠ ܐܰܗܪܽܘܢ ܦܺܝܪܡܶܗ. ܘܥܰܠ ܠܰܩܕܽܘܫ ܩܽܘܕܫܺܝ̈ܢ ܕܰܢܪܰܥܶܐ ܠܡܳܪܝܳܐ. ܘܰܐܥܛܰܪ ܒܶܗ ܒܶܣ̈ܡܶܐ ܘܪܰܥܺܝ ܠܰܐܠܳܗܳܐ ܘܰܟܠܳܐ ܡܰܘܬܳܢܳܐ ܡܶܢ ܥܰܡܳܐ ܕܰܐܪܓܙܶܗ ܗ̄ܘܗ̄ ܒܰܛܶܠ ܒܰܚܢܳܢܳܟ ܪܽܘܓܙܳܐ ܡܶܢ ܥܳܠܡܳܐ܀

ܫܽܘܒܚܳܐ: ܫܽܘܒܚܳܐ ܠܰܡܫܺܝܚܳܐ ܕܥܰܠ ܒܺܐܪܳܐ ܝܺܬܶܒ. ܘܰܒܥܶܠܰܬ ܡܰܝ̈ܳܐ ܨܳܕܳܗ̇ ܠܫܰܡܪܳܝܬܳܐ. ܗܽܘ ܫܶܐܠ ܠܳܗ̇ ܡܰܝ̈ܳܐ. ܘܗܺܝ ܠܳܐ ܝܶܗܒܰܬ ܠܶܗ. ܘܗܽܘ ܬܪܰܥ ܡܰܒܽܘܥܳܐ ܕܤܰܡ ܚܰܝ̈ܶܐ ܘܰܐܫܩܝܳܗ̇ ܗ̄ܘܗ̄ ܘܒܰܕܡܳܐ ܕܡܶܢ ܕܰܦܢܶܗ ܥܺܕܬܳܐ ܘܝܰܠܕ̈ܶܝܗ̇ ܦܪܰܩ܀

ܡܶܢ ܥܳܠܰܡ: ܦܺܝܪ̈ܡܶܐ ܕܟܰܝ̈ܳܐ ܕܠܰܫܡܳܟ ܡܶܬܩܰܪܒܺܝܢ. ܐܰܝܟ ܕܰܐܗܪܽܘܢ ܢܶܗܘܽܘܢ ܠܰܢܝܳܚܳܐ ܕܪ̈ܰܚܡܰܝܟ. ܘܰܐܝܟ ܕܶܐܬܟܠܺܝ ܡܰܘܬܳܐ ܡܶܢ ܥܰܡܳܐ ܕܰܐܪܓܙܳܟ. ܒܰܛܶܠ ܒܰܚܢܳܢܳܟ ܪܽܘܓܙܳܐ ܡܶܢ ܥܳܠܡܳܐ ܗ̄ܘܗ̄ ܘܰܐܫܪܳܐ ܒܳܗ̇ ܫܰܝܢܳܐ ܒܥܺܕܬܳܐ ܩܰܕܺܝܫܬܳܐ܀

ܕܝܳܠܕܰܬ ܐܰܠܳܗܳܐ: ܠܶܟܝ ܡܶܬܟܰܫܦܺܝܢܰܢ ܐܶܡܳܐ ܡܒܰܪܰܟܬܳܐ. ܕܰܬܦܺܝܤܺܝܢ ܚܠܳܦܰܝܢ ܠܰܒܪܳܐ ܕܡܶܢܶܟܝ ܕܢܰܚ. ܕܰܒܪ̈ܰܚܡܶܐ ܕܡܶܢܶܗ ܢܶܠܚܶܐ ܐ̱ܫܛܳܪ ܚܰܘܒܰܝ̈ܢ. ܘܡܳܐ ܕܳܐܬܶܐ ܠܚܰܪܬܳܐ ܠܕܺܝܢܳܐ ܠܳܐ ܢܰܥܠܰܢ ܗ̄ܘܗ̄ ܨܠܽܘܬܶܟܝ ܬܶܗܘܶܐ ܠܰܢ ܫܽܘܪܳܐ ܘܒܶܝܬ ܓܰܘܤܳܐ܀

ܐܶܡܰܪܝ ܠܺܝ ܡܰܪܝܰܡ ܥܢܳܢܳܐ ܩܰܠܺܝܠܬܳܐ. ܐܰܝܟܰܢܳܐ ܛܥܶܢܬܺܝܘܗ̱ܝ ܠܗܰܘ ܓܰܢ̱ܒܳܪ ܥܳܠ̈ܡܶܐ. ܓܰܒܪܺܐܝܶܠ ܐܶܬܳܐ ܘܤܰܒܪܰܢܝ ܘܶܐܡܰܪ ܠܺܝ. ܕܡܶܢ ܥܽܘܒܶܟܝ ܕܳܢܰܚ ܦܳܪܽܘܩܶܗ ܕܥܳܠܡܳܐ ܗ̄ܘܗ̄ ܘܗܽܘܝܽܘ ܒܰܫܪܳܪܳܐ ܦܳܪܘܩܶܗ ܕܥܳܠܡܳܐ܀

ܤܰܢܝܳܐ ܗܰܘ ܕܰܚܙܳܐ ܡܽܘܫܶܐ ܒܛܽܘܪ ܤܺܝܢܰܝ. ܠܶܟܽܝ ܗ̱ܽܘ ܨܳܐܰܪ ܗ̱ܘܳܐ ܒܬܽܘܠܬܳܐ ܩܰܕܺܝܫܬܳܐ. ܤܰܢܝܳܐ ܪܳܫܶܡ ܗ̱ܘܳܐ ܠܓܽܘܫܡܶܟܝ ܩܰܕܺܝܫܳܐ. ܘܰܒܬܽܘܠܰܝ̈ܟܝ ܛܰܪ̈ܦܰܘܗ̱ܝ ܕܠܳܐ ܐܶܬܚܰܪܰܟܘ ܗ̱ܘܰܘ ܗ̄ܘܗ̄ ܘܢܽܘܪܳܐ ܕܰܒܤܰܢܝܳܐ ܐܰܠܳܗܳܐ ܕܒܶܟܝ ܫܪܳܐ܀

ܒܬܽܘܠܬܳܐ ܩܰܕܺܝܫܬܳܐ ܐܶܡܶܗ ܕܰܡܪܰܝܡܳܐ. ܩܰܪܶܒܝ ܒܳܥܽܘܬܳܐ ܚܠܳܦ ܥܰܘܠܶܗ ܕܥܳܠܡܳܐ. ܕܗܳܐ ܙܰܘܥ̈ܶܐ ܩܫܰܝ̈ܳܐ ܘܰܩܪ̈ܳܒܶܐ ܘܩܺܐܪ̈ܤܶܐ. ܚܕܺܝܪܺܝܢ ܠܳܗ̇ ܠܰܐܪܥܳܐ ܘܰܒܚܰܫܳܐ ܝܳܬܒܳܐ ܗ̄ܘܗ̄ ܨܠܽܘܬܶܟܝ ܬܶܗܘܶܐ ܠܰܢ ܫܽܘܪܳܐ ܘܒܶܝܬ ܓܰܘܤܳܐ܀

ܕܩܰܕܺܝ̈ܫܶܐ: ܫܽܘܒܚܳܐ ܠܰܡܫܺܝܚܳܐ ܕܥܰܠ ܦܰܤܰܬ ܐܺܝ̈ܕܰܘܗ̱ܝ. ܒܢܳܗ̇ ܠܥܺܕܰܬ ܩܽܘܕܫܳܐ ܘܰܐܬܩܶܢ ܒܳܗ̇ ܡܰܕܒܚܳܐ. ܘܤܳܡ ܒܳܗ̇ ܤܺܝ̈ܡܳܬܳܐ ܢܒܺܝ̈ܶܐ ܘܰܫܠܺܝ̈ܚܶܐ. ܘܤܳܗ̈ܕܶܐ ܩܰܕܺܝ̈ܫܶܐ ܕܰܢܨܰܚܘ ܘܶܐܬܟܰܠܰܠܘ ܗ̄ܘܗ̄ ܒܪܺܝܟ ܕܰܒܢܳܗ̇ ܠܥܺܕܬܶܗ ܘܰܐܬܩܶܢ ܒܳܗ̇ ܡܰܕܒܚܳܐ܀

ܡܰܢ ܐܶܢܽܘܢ ܗܳܠܶܝܢ ܕܒܰܥ̈ܢܳܢܶܐ ܦܳܪܚܺܝܢ. ܐܶܡܰܪ ܐܶܫܰܥܝܳܐ ܕܰܚܙܳܐ ܠܢܰܨܺܝ̈ܚܶܐ. ܗܳܠܶܝܢ ܐܺܝܬܰܝܗܽܘܢ ܢܒܺܝ̈ܶܐ ܘܰܫܠܺܝ̈ܚܶܐ. ܘܤܳܗ̈ܕܶܐ ܩܰܕܺܝ̈ܫܶܐ ܕܰܢܨܰܚܘ ܘܶܐܬܟܰܠܰܠܘ ܗ̄ܘܗ̄ ܕܡܶܢ ܤܰܘ̈ܦܶܐ ܠܤܰܘ̈ܦܶܐ ܢܳܨܰܚ ܕܽܘܟܪܳܢܗܽܘܢ܀

ܐܶܡܰܪܘ ܠܺܝ ܤܳܗ̈ܕܶܐ ܡܳܢܰܘ ܤܽܘܟܳܝܟܽܘܢ. ܕܗܳܠܶܝܢ ܐܽܘܠܨܳܢ̈ܶܐ ܤܰܝܒܰܪܘ ܦܰܓܪ̈ܰܝܟܽܘܢ. ܐܺܝܬܰܘܗ̱ܝ ܤܽܘܟܳܝܰܢ ܡܳܐ ܕܥܰܝܢܳܐ ܠܳܐ ܚܙܳܬ. ܘܶܐܕܢܳܐ ܠܳܐ ܫܶܡܥܰܬ ܘܥܰܠ ܠܶܒܳܐ ܠܳܐ ܤܠܶܩ ܗ̄ܘܗ̄ ܡܶܕܶܡ ܕܶܐܫܬܰܘܕܺܝ ܐܰܠܳܗܳܐ ܠܪ̈ܳܚܡܰܘܗ̱ܝ܀

ܤܳܗ̈ܕܶܐ ܕܰܐܝܟ ܒܶܣ̈ܡܶܐ ܥܰܠ ܢܽܘܪܳܐ ܢܦܰܠܬܽܘܢ ܘܠܰܐܪ̈ܒܰܥܦܶܢܝܳܬܳܐ ܦܳܚ ܪܺܝܚܶܗ ܕܚܽܘܒܟܽܘܢ. ܐܰܦܺܝܤܘ ܠܰܡܫܺܝܚܳܐ ܕܢܰܫܦܰܥ ܒܽܘܪ̈ܟܳܬܶܗ. ܥܰܠ ܥܺܕܬܳܐ ܘܝܰܠܕܶܝ̈ܗ̇ ܕܓܰܪ̈ܡܰܝܟܽܘܢ ܝܰܩܪܰܬ ܗ̄ܘܗ̄ ܕܝܰܩܪܰܬ ܓܰܪ̈ܡܰܝܟܽܘܢ ܫܰܝܢܳܐ ܢܰܡܠܶܟ ܒܳܗ̇܀

ܕܚܰܕ ܩܢܽܘܡܳܐ: ܟܽܠܗܽܘܢ ܐܰܠܺܝ̈ܨܶܐ ܒܳܟ ܗ̱ܽܘ ܡܶܬܓܰܘܤܺܝܢ. ܓܰܒܝܳܐ ܡܳܪܝ ܫܶܡܥܽܘܢ ܦܰܢܳܐ ܫ̈ܶܐܠܳܬܗܽܘܢ. ܠܰܟܪ̈ܺܝܗܶܐ ܐܰܤܳܐ ܘܰܠܓܰܪ̈ܒܶܐ ܕܰܟܳܐ. ܘܠܰܐܝܠܶܝܢ ܕܡܶܬܢܰܤܶܝܢ ܡܶܢ ܕܰܝ̈ܘܶܐ ܚܰܪܰܪܘ ܗ̄ܘܗ̄ ܨܠܽܘܬܳܟ ܬܶܗܘܶܐ ܠܰܢ ܫܘܽܪܳܐ ܘܒܶܝܬ ܓܰܘܤܳܐ܀

ܝܰܡܺܝܢܶܗ ܕܡܳܪܳܟ ܓܰܒܝܳܐ ܡܳܪܝ ܐܰܒܚܰܝ. ܐܰܓܢܰܬ ܥܰܠ ܥܳܢܳܐ ܕܙܰܝܚܰܬ ܕܽܘܟܪܳܢܳܟ. ܘܥܰܦܝܰܬ ܒܺܐܝܩܳܪܳܐ ܠܦܰܓܪܳܟ ܩܰܕܺܝܫܳܐ. ܘܗܳܐ ܙܳܡܪܳܐ ܫܽܘܒܚܳܐ ܠܰܡܫܺܝܚܳܐ ܕܰܐܘܪܒܳܟ ܗ̄ܘܗ̄ ܨܠܽܘܬܳܟ ܬܶܗܘܶܐ ܠܰܢ ܫܽܘܪܳܐ ܘܒܶܝܬ ܓܰܘܤܳܐ܀

ܕܨܰܦܪܳܐ: ܒܥܶܕܳܢܶܗ ܕܨܰܦܪܳܐ ܩܰܕܶܡ ܗ̱ܘܳܐ ܕܰܘܺܝܕ. ܠܒܰܝܬܶܗ ܕܰܐܠܳܗܳܐ ܘܫܰܪܺܝ ܕܰܢܦܺܝܤܺܝܘܗ̱ܝ. ܡܶܠܰܝ̈ ܨܽܘܬ ܡܳܪܝܳܐ ܘܶܐܤܬܰܟܰܠ ܒܰܗܓܳܝ. ܘܨܽܘܬ ܠܩܳܠܳܐ ܕܰܓܥܳܬܝ ܦܳܪܽܘܩܶܗ ܕܥܳܠܡܳܐ ܗ̄ܘܗ̄ ܘܰܐܫܘܳܢܝ ܠܫܽܘܒܩܳܢܳܐ ܕܰܚ̈ܛܳܗܶܐ ܕܤܶܥܪܶܬ܀

ܐܶܢ ܗܳܢܳܐ ܨܰܦܪܳܐ ܕܺܐܝܬܰܘܗ̱ܝ ܥܳܒܽܘܪܳܐ. ܪܰܕܦܶܗ ܠܚܶܫܽܘܟܳܐ ܘܰܐܢܗܰܪ ܠܶܗ ܠܥܳܠܡܳܐ. ܟܡܳܐ ܪܰܒ ܗ̱ܽܘ ܨܰܦܪܳܐ ܕܳܐܬܶܐ ܒܶܗ ܡܳܪܝܳܐ. ܘܰܡܢܰܚܶܡ ܡܺܝ̈ܬܶܐ ܘܰܡܟܰܠܶܠ ܤܳܗ̈ܕܶܐ ܗ̄ܘܗ̄ ܡܟܰܠܶܠ ܤܳܓܽܘܕܰܘ̈ܗ̱ܝ ܚܽܘܣ ܘܶܐܬܪܰܚܰܡܥܠܰܝܢ܀

ܕܰܬܝܳܒܽܘܬܳܐ: ܬܰܪܥܶܗ ܕܰܐܠܳܗܳܐ ܟܽܠܫܳܥ ܪ̈ܰܚܡܶܐ ܡܠܶܐ. ܘܰܐܝܢܳܐ ܕܢܳܩܶܫ ܒܶܗ ܥܳܢܶܐ ܠܶܗ ܡܳܪܝܳܐ. ܤܳܗܶܕ ܓܰܝܳܤܳܐ ܘܡܳܟܤܳܐ ܘܚܰܛܳܝܬܳܐ. ܕܰܒܝܰܕ ܕܡܶܥܰܝ̈ܗܽܘܢ ܚܰܘܒܰܝ̈ܗܽܘܢ ܐܶܫܬܒܶܩܘ ܗ̄ܘܗ̄ ܫܒܽܘܩ ܠܰܢ ܐܰܟܘܳܬܗܽܘܢ ܦܳܪܽܘܩܶܗ ܕܥܳܠܡܳܐ܀

ܕܰܚܛܳܐ ܠܳܐ ܢܶܚܛܶܐ ܘܰܕܠܳܐ ܚܛܳܐ ܢܶܙܕܗܰܪ. ܟܺܐܢܽܘܬܳܐ ܒܬܰܪܥܳܐ ܚܽܘܫܒܳܢܳܐ ܥܳܒܕܳܐ. ܘܰܠܒܺܝܟܳܐ ܩܰܢܝܳܐ ܒܝܰܡܺܝܢܳܗ̇ ܘܟܳܬܒܳܐ. ܤܽܘܥܪ̈ܳܢܶܐ ܕܟܽܠܢܳܫ ܘܒܰܐܦ̈ܶܐ ܠܳܐ ܢܳܤܒܳܐ ܗ̄ܘܗ̄ ܝܳܕܰܥ ܟܰܣ̈ܝܳܬܳܐ ܚܽܘܣ ܘܶܐܬܪܰܚܰܡܥܠܰܝܢ܀

ܒܨܶܒܝܳܢܝ ܚܳܛܶܐ ܐ̱ܢܳܐ ܒܨܶܒܝܳܢܝ ܬܳܐܶܒ ܐ̱ܢܳܐ. ܥܶܠܬܳܐ ܐܰܚܺܝܕ ܐ̱ܢܳܐ ܕܰܫܒܳܢܝ ܤܳܛܳܢܳܐ. ܘܳܝܠܺܝ ܥܰܠ ܕܰܚܛܺܝܬ ܘܳܝܠܺܝ ܕܠܳܐ ܬܳܒܶܬ. ܘܳܝܠܺܝ ܡܶܢ ܕܺܝܢܳܐ ܕܗܳܘܶܐ ܠܫܽܘܠܳܡܳܐ ܗ̄ܘܗ̄ ܕܰܝܳܢܳܐ ܟܺܐܢܳܐ ܚܽܘܣ ܘܶܐܬܪܰܚܰܡܥܠܰܝ܀

ܠܘܳܬܳܟ ܡܳܪܝ ܢܺܐܬܶܐ. ܘܰܒܬܰܪܥܳܟ ܢܶܩܽܘܫ. ܘܫ̈ܶܐܠܳܬܳܐ ܕܟܽܠܰܢ ܡܶܢܳܟ ܡܶܬܝܰܗܒܳܢ. ܕܫܳܐܶܠ ܓܶܝܪ ܢܳܤܶܒ ܘܰܕܒܳܥܶܐ ܡܶܫܟܰܚ. ܘܰܕܢܳܩܶܫ ܒܬܰܪܥܳܐ ܕܪ̈ܰܚܡܶܐ ܩܕܳܡܰܘܗ̱ܝ ܦܬܺܝܚ ܗ̄ܘܗ̄ ܒܪܺܝܟ ܕܰܦܬܺܝܚ ܬܰܪܥܶܗ ܠܚܰܛܳܝ̈ܶܐ ܕܬܳܝܒܺܝܢ܀

ܕܥܰܢܺܝ̈ܕܶܐ: ܢܶܬܕܟܰܪ ܒܰܨܠܽܘܬܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ. ܘܠܳܐ ܢܶܛܥܶܐ ܐܶܢܽܘܢ ܕܡܶܢ ܒܰܝܢܳܬܰܢ ܦܪܰܫܘ. ܥܰܠ ܡܰܕܒܰܚ ܩܽܘܕܫܳܐ ܫܡܳܗܰܝ̈ܗܽܘܢ ܢܶܬܕܟܰܪ ܘܰܒܟܽܠ ܥܶܕܳܢܺܝ̈ܢ ܢܝܳܚܳܐ ܢܶܗܘܶܐ ܠܗܽܘܢ ܗ̄ܘܗ̄ ܘܢܰܤܩܽܘܢ ܠܳܟ ܫܽܘܒܚܳܐ ܕܰܐܢ̱ܬ ܗ̱ܽܘ ܡܢܰܚܡܳܢܗܽܘܢ܀

ܩܠܐ ܕܬܪܝܢ
ܒܩ̄: ܫܠܳܡܶܗ ܕܰܐܒܳܐ
ܓܘܫܡܐ ܬܡܝܢܝܐ H

ܦܶܬܓܳܡܳܐ: ܐܰܝܟ ܨܶܒܝܳܢܶܗ ܕܰܐܠܳܗܳܐ: ܒܥܶܕܳܢ ܨܰܦܪܳܐ ܕܡܶܬܦܰܬܚܺܝܢ ܬܰܪ̈ܥܰܝ ܪܰܘܡܳܐ ܠܰܨܠܽܘܬܳܐ. ܩܰܒܶܠ ܡܳܪܰܢ ܬܶܫܡܶܫܬܰܢ ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ. ܘܰܥܒܶܕ ܤܰܒܪܳܐ ܘܦܽܘܪܩܳܢܳܐ. ܠܢܰܦ̈ܫܳܬܳܐ ܕܰܡܦܺܝ̈ܤܳܢ ܠܳܟ܀

ܡܶܐܬܳܐ ܐܳܬܶܐ ܒܚܰܕܽܘܬܳܐ: ܨܰܦܪܶܗ ܕܡܳܪܰܢ ܡܰܛܺܝ ܠܶܗ ܘܡܶܢܫܶܠܝ̱ ܕܳܢܰܚ ܦܳܪܽܘܩܳܐ. ܘܰܠܟܺܐܢ̈ܶܐ ܝܳܗܶܒ ܐܰܓܪܳܐ. ܛܽܘܒܰܘܗ̱ܝ ܠܰܐܝܢܳܐ ܕܶܐܬܟܰܫܰܪ. ܘܰܠܺܐܝ ܒܟܰܪܡܶܗ ܕܰܡܫܺܝܚܳܐ. ܕܢܳܤܶܒ ܐܰܓܪܶܗ ܡܰܠܝܳܐܺܝܬ܀

ܫܽܘܒܚܳܐ: ܒܥܶܕܳܢ ܨܰܦܪܳܐ ܠܳܟ ܫܽܘܒܚܳܐ. ܡܶܢ ܥܶܠܳܝ̈ܶܐ ܘܬܰܚܬܳܝ̈ܶܐ. ܒܪܳܐ ܕܝܳܬܶܒ ܡܶܢ ܝܰܡܺܝܢܳܐ. ܕܰܒܦܽܘܩܕܳܢܳܟ ܐܶܬܒܰܛܰܠܘ. ܚܶܫܟܳܐ ܘܡܰܘܬܳܐ ܘܤܳܛܳܢܳܐ. ܘܰܐܡܠܶܟ ܢܽܘܗܪܳܟ ܥܰܠ ܬܺܒܶܝܠ܀

ܡܶܢ ܥܳܠܰܡ: ܒܥܶܕܳܢ ܨܰܦܪܳܐ ܢܶܤܓܽܘܕ ܠܶܗ. ܠܗܳܢܳܐ ܡܳܪܳܐ ܡܪܰܚܡܳܢܳܐ. ܕܡܶܢ ܥܳܠܰܡ ܠܰܝܬ ܐܰܟܘܳܬܶܗ ܫܰܒܛܶܗ ܬܳܠܶܐ ܘܠܳܐ ܡܳܚܶܐ. ܡܶܨܒܳܐ ܨܳܒܶܐ ܕܢܶܪܕܶܐ ܠܰܢ ܫܽܘܒܚܳܐ ܠܶܗ ܕܰܡܪܰܚܡܳܢܰܐ ܗ̱ܘ܀

ܕܝܳܠܕܰܬ ܐܰܠܳܗܳܐ: ܫܠܳܡܶܗ ܕܰܐܒܳܐ ܡܶܢ ܪܰܘܡܳܐ. ܒܝܰܕ ܓܰܒܪܺܐܶܝܠ ܐܶܫܬܰܕܰܪ. ܠܘܳܬ ܡܰܪܝܰܡ ܛܽܘܒܳܢܺܝܬܳܐ. ܡܠܶܐ ܗ̱ܘܳܐ ܦܽܘܡܶܗ ܕܢܽܘܪܳܢܳܐ. ܫܠܳܡܳܐ ܘܤܰܒܪܳܗ̇ ܘܶܐܡܰܪ ܠܳܗ̇. ܕܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ܀

ܬܶܡܗܰܬ ܡܰܪܝܰܡ ܘܶܐܬܕܰܡܪܰܬ. ܒܡ̈ܶܠܶܐ ܕܡܰܠܶܠ ܓܰܒܪܺܐܶܝܠ. ܘܶܐܬܒܰܝܢܰܬ ܕܚܰܝܠܳܐ ܫܪܶܐ ܒܳܗ̇. ܦܶܬܚܰܬ ܦܽܘܡܳܗ̇ ܘܶܐܡܪܰܬ ܠܶܗ. ܕܗܳܐ ܐܶܢܳܐ ܐܰܡܬܶܗ ܕܡܳܪܳܟ. ܢܶܗܘܶܐ ܠܺܝ ܐܰܝܟܰܢ ܕܶܐܡܰܪܬ܀

ܒܢܺܝܤܳܢ ܤܰܒܰܪ ܓܰܒܪܺܐܶܝܠ ܒܟܳܢܽܘܢ ܚܙܰܝܢܰܢ ܡܰܘܠܳܕܳܟ. ܝܰܠܕܳܐ ܫܒܺܝܚܳܐ ܕܡܶܢ ܐܰܒܳܐ. ܦܺܐܪܳܐ ܪܓܺܝܓܳܐ ܕܡܶܢ ܡܰܪܝܰܡ . ܕܰܩܛܰܦ̈ܝ ܡܶܢܶܗ ܒܶܪ̈ܝܳܬܳܐ. ܘܰܚ̈ܝܰܝ ܒܶܗ ܥܕܰܡܳܐ ܠܥܳܠܰܡ܀

ܒܗܰܝܟܰܠ ܩܽܘܕܫܳܐ ܒܓܰܘ ܢܳܨܪܰܬ. ܟܰܕ ܩܳܝܡܳܐ ܗ̱ܘܳܬ ܒܰܪ̱ܬ ܕܰܘܺܝܕ. ܥܺܝܪܳܐ ܕܰܡܥܰܛܰܦ ܢܽܘܗܪܳܐ. ܤܰܒܪܳܗ̇ ܘܗܳܟܰܢ ܐܶܡܰܪ ܠܳܗ̇. ܕܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ. ܦܳܪܽܘܩܳܐ ܕܟܽܠ ܒܶܪ̈ܝܳܬܳܐ܀

ܕܩܰܕܺܝ̈ܫܶܐ: ܫܠܳܡܳܐ ܥܰܡܗܽܘܢ ܕܰܢܒܺܝ̈ܶܐ. ܫܠܳܡܳܐ ܥܰܡܗܽܘܢ ܕܰܫܠܺܝ̈ܚܶܐ. ܘܰܫܠܳܡܳܐ ܥܰܡܗܽܘܢ ܕܤܳܗ̈ܕܶܐ. ܕܪܰܚܡܽܘܗ̱ܝ ܠܡܳܪܶܗ ܕܰܫܠܳܡܳܐ. ܘܰܫܠܳܡܳܐ ܠܥܺܕܰܬ ܩܽܘܕܫܳܐ. ܕܥܳܡܪܺܝܢ ܒܳܗ̇ ܒܢܰܘ̈ܗ̱ܝ ܕܰܫܠܳܡܳܐ܀

ܟܡܳܐ ܝܳܐܶܐ ܠܰܡܫܰܒܳܚܽܘ. ܒܗܳܢܳܐ ܗܰܝܟܠܳܐ ܩܰܕܺܝܫܳܐ. ܕܺܐܝܬ ܒܶܗ ܢܒܺܝ̈ܶܐ ܘܰܫܠܺܝ̈ܚܶܐ ܘܺܐܝܬ ܒܶܗ ܤܳܗ̈ܕܶܐ ܩܰܕܺܝ̈ܫܶܐ. ܘܡܰܬܩܰܢ ܒܶܗ ܡܰܕܒܰܚ ܩܽܘܕܫܳܐ. ܚܽܘܤܳܝܳܐ ܠܝܰܠܕܰܘ̈ܗ̱ܝ ܕܳܐܕܳܡ܀

ܤܳܗ̈ܕܶܐ ܕܠܳܐ ܤܳܡܬܽܘܢ ܒܶܣ̈ܡܶܐ ܩܕܳܡ ܕܶܚ̈ܠܳܬܳܐ ܤܪ̈ܺܝܩܳܬܳܐ. ܡܰܠ̈ܟܶܐ ܡܪܺܝܡܺܝܢ ܬܳܓܰܝ̈ܗܽܘܢ ܘܤܳܓܕܺܝܢ ܩܽܘܕܡܰܬ ܓܰܪ̈ܡܰܝܟܽܘܢ. ܘܪܺܝܚܳܐ ܚܰܠܝܳܐ ܕܩܶܛܠܰܝ̈ܟܽܘܢ. ܒܰܕܡܽܘܬ ܗܶܪ̈ܽܘܡܶܐ ܦܳܐܰܚ܀

ܠܰܘ ܐܰܢ̱ܬܽܘܢ ܒܰܠܚܽܘܕܰܝܟܽܘܢ. ܤܳܗ̈ܕܶܐ ܥܰܠܬܽܘܢ ܠܰܐܓܽܘܢܳܐ. ܕܡܳܪܟܽܘܢ ܥܰܡܟܽܘܢ ܥܳܐܶܠ ܗ̱ܘܳܐ. ܘܰܡܠܰܒܶܒ ܪ̈ܶܥܝܳܢܰܝܟܽܘܢ. ܘܕܰܚܙܳܐ ܚܽܘܒܟܽܘܢ ܫܰܪܺܝܪܳܐ. ܝܰܩܰܪ ܘܰܐܘܪܶܒ ܕܽܘܟܪܳܢܟܽܘܢ܀

ܕܰܬܝܳܒܽܘܬܳܐ: ܡܳܪܰܢ ܬܺܐܬܶܐ ܡܰܠܟܽܘܬܳܟ. ܘܢܶܗܘܶܐ ܒܰܐܪܥܳܐ ܨܶܒܝܳܢܳܟ. ܐܰܟܡܳܐ ܕܺܐܝܬܰܘܗ̱ܝ ܒܰܫܡܰܝܳܐ. ܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ. ܘܰܠܢܶܤܝܽܘܢܳܐ ܠܳܐ ܬܰܥܠܰܢ. ܐܶܠܳܐ ܦܰܨܳܢ ܡܶܢ ܒܺܝܫܳܐ܀

ܡܳܪܰܢ ܟܰܪܡܰܐ ܗ̱ܘ ܒܰܫܪܳܪܳܐ. ܘܰܐܒܳܐ ܐܺܝܬܰܘܗ̱ܝ ܦܰܠܳܚܳܐ. ܐܰܚܰܝ̈ ܢܶܗܘܶܐ ܒܶܗ ܓܽܘ̈ܦܢܶܐ. ܕܬܶܤܰܩܝ ܡܶܢܰܢ ܪܺܝܫܺܝܬܳܐ. ܫܰܗܪܳܐ ܘܨܰܘܡܳܐ ܘܰܨܠܽܘܬܳܐ. ܘܩܽܘܪ̈ܒܳܢܶܐ ܕܙܰܕܺܝܩܽܘܬܳܐ܀

ܐܶܫܬܰܥܳܐ ܠܰܢ ܓܰܝܳܤܳܐ ܥܰܠ ܦܰܐܝܽܘܬܶܗ ܕܦܰܪܕܰܝܤܳܐ. ܘܚܰܘܳܐ ܠܰܢ ܐܺܝܠܳܢ ܚܰܝ̈ܶܐ ܕܢܶܩܛܽܘܦ ܡܶܢܶܗ ܪܺܝܫܺܝܬܳܐ. ܫܰܗܪܳܐ ܘܨܰܘܡܳܐ ܘܰܨܠܽܘܬܳܐ. ܘܩܽܘܪ̈ܒܳܢܶܐ ܠܰܡܠܶܟ ܡܰܠ̈ܟܶܐ܀

ܗܳܝ ܛܰܝܒܽܘܬܳܐ ܕܢܰܛܰܪܬܶܗ. ܠܕܰܘܺܝܕ ܡܰܠܟܳܐ ܡܶܢ ܫܳܐܘܳܠ. ܗܺܝ ܬܢܰܛܰܪܝ ܠܥܺܕܬܳܐ ܘܝܰܠܕܶܝ̈ܗ̇. ܠܟܳܗ̈ܢܶܐ ܬܶܗܘܶܐ ܩܽܘܝܳܡܳܐ. ܘܰܠܙܰܕܺܝ̈ܩܶܐ ܪܽܘܡܪܳܡܳܐ. ܘܰܠܚܰܛܳܝ̈ܶܐ ܫܽܘܒܩܳܢܳܐ܀

ܕܥܰܢܺܝ̈ܕܶܐ: ܢܶܬܕܟܰܪ ܐܶܢܽܘܢ ܠܰܐܒܳܗܰܝ̈ܢ ܕܡܰܠܦܺܝܢ ܗ̱ܘܰܘ ܠܰܢ ܟܰܕ ܚܰܝܺܝ̈ܢ. ܕܢܶܗܘܶܐ ܒܢܰܝ̈ܳܐ ܠܰܐܠܳܗܳܐ. ܒܪܳܐ ܕܰܐܠܳܗܳܐ ܢܢܺܝܚ ܐܶܢܽܘܢ. ܒܗܳܝ ܡܰܠܟܽܘܬܳܐ ܕܰܫܡܰܝܳܐ. ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ܀

ܩܽܘܩܰܠܝܳܘܢ
ܒܪܟܢܐ ܬܡܝܢܝܐ H

ܠܳܐ ܬܶܚܤܰܡ ܒܪ̈ܰܫܺܝܥܶܐ ܗ̄ ܘܠܳܐ ܬܶܛܰܢ ܒܥܳܒ̈ܕܰܝ ܥܰܘܠܳܐ܀

ܡܶܛܽܠ ܕܰܐܝܟ ܓ̈ܶܠܶܐ ܒܰܥܓܰܠ ܝܳܒܫܺܝܢ ܗ̄ ܘܰܐܝܟ ܝܽܘܪܩܳܐ ܕܥܶܤܒܳܐ ܚܳܡܶܝܢ܀

ܣܰܒܰܪ ܒܰܐܠܳܗܳܐ ܘܰܥܒܶܕ ܛܳܒܬܳܐ ܗ̄ ܥܡܰܪ ܒܰܐܪܥܳܐ ܘܰܒܥܺܝ ܗܰܝܡܳܢܽܘܬܳܐ܀

ܤܰܒܰܪ ܒܡܳܪܝܳܐ ܘܢܶܬܶܠ ܠܳܟ ܫܶܐܠܬܶܗ ܕܠܶܒܳܟ ܗ̄ ܬܪܽܘܨ ܩܕܳܡ ܡܳܪܝܳܐ ܐܽܘܪܚܳܟ ܘܤܰܒܰܪ ܒܶܗ܀

ܫܽܘܒܚܳܐ ܘܥܶܩܒܳܐ: H

ܒܥܶܕܳܢ ܨܰܦܪܳܐ ܡܩܰܕ̈ܡܳܢ ܤܳܓ̈ܕܳܢ ܒܶܪ̈ܝܳܬܳܐ. ܠܗܰܘ ܕܰܪܕܰܦ ܡܶܢܗܶܝܢ ܚܶܫܽܘܟܳܐ ܘܰܡܫܰܒ̈ܚܳܢ. ܫܽܘܒܚܳܐ ܠܳܟ ܐܰܠܳܗܳܐ܀

ܣܶܕܪܳܐ ܕܰܬܝܳܒܽܘܬܳܐ

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܪܳܡܳܐ ܘܰܡܥܰܠܝܳܐ ܒܺܐܝܬܽܘܬܶܗ ܕܡܶܢ ܚܰܝ̈ܠܰܘܳܬܳܐ ܥܶܠܳܝ̈ܶܐ ܡܶܙܕܰܝܰܚ ܘܡܶܢ ܐܰܪ̈ܥܳܢܳܝܶܐ ܡܶܣܬܓܶܕ ܘܡܶܫܬܰܒܰܚ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ

ܣܶܕܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܘܡܶܬܟܰܫܦܺܝܢܰܢ ܠܳܟ ܕܰܬܒܰܪܶܟ ܠܥܰܒ̈ܕܰܝܟ ܘܣܳܓܽܘܕܰܝ̈ܟ ܗܳܢܽܘܢ ܕܶܐܬܟܰܢܰܫܘ ܒܰܫܡܳܟ ܩܰܕܺܝܫܳܐ ܕܙܰܝܢܳܐ ܪܽܘܚܳܢܳܝܳܐ ܢܶܠܒܫܽܘܢ ܘܚܽܘܒܳܐ ܘܰܐܘܝܽܘܬܳܐ ܢܶܬܥܰܛܦܽܘܢ. ܠܒܺܝܫܳܐ ܘܰܠܚܰܝܠܶܗ ܢܶܙܟܽܘܢ. ܘܥܰܠ ܦܳܬܽܘܪܳܐ ܕܺܝܠܳܟ ܪܽܘܚܳܢܳܝܳܐ ܢܶܬܒܰܣܡܽܘܢ. ܚܰܣܳܐ ܚܰܘܒܰܝ̈ܗܽܘܢ ܫܒܽܘܩ ܒܽܘܨܳܪ̈ܰܝܗܽܘܢ ܘܰܐܥܒܰܪ ܣܰܟ̈ܠܘܳܬܗܽܘܢ ܒܣܽܘܓܳܐܐ ܕܪ̈ܰܚܡܰܝܟ. ܘܫܽܘܒܚܳܐ ܘܪܽܘܡܪܳܡܳܐ ܢܰܣܶܩ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܠܐ ܒܩ̄: ܫܠܳܡܶܗ ܕܰܐܒܳܐ H

ܒܥܶܕܳܢ ܨܰܦܪܳܐ ܐܶܫܬܰܕܪܰܬ. ܝܰܘܢܳܐ ܡܶܢ ܨܶܝܕ ܢܽܘܚ ܟܺܐܢܳܐ. ܡܶܛܽܠ ܡܰܝ̈ܳܐ ܕܛܰܘܦܳܢܳܐ. ܘܗܶܦܟܰܬ ܝܰܘܢܳܐ ܠܟܶܐܘܶܠܳܐ. ܟܰܕ ܛܥܺܝܢܳܐ ܛܰܪܦܳܐ ܕܙܰܝܬܳܐ. ܐܳܬܳܐ ܕܫܰܝܢܳܐ ܘܕܰܫܠܳܡܳܐ܀

ܒܥܶܕܳܢ ܨܰܦܪܳܐ ܐܶܬܚܰܙܝܰܬ. ܐܳܬܳܐ ܕܫܰܝܢܳܐ ܒܰܫܡܰܝܳܐ. ܩܶܫܬܳܐ ܕܢܽܘܪܳܐ ܕܰܡܬܺܝܚܳܐ. ܘܺܝܡܳܐ ܦܽܘܡܶܗ ܕܥܶܠܳܝܳܐ. ܕܠܳܐ ܐܶܥܒܶܕ ܬܽܘܒ ܛܰܘܦܳܢܳܐ. ܡܶܟܺܝܠ ܘܰܥܕܰܡܳܐ ܠܥܳܠܰܡ܀

ܫܽܘܒܚܳܐ: ܒܥܶܕܳܢ ܨܰܦܪܳܐ ܨܰܠܺܝ ܗ̱ܘܳܐ. ܡܽܘܫܶܐ ܓܰܒܝܳܐ ܒܪܺܝܫ ܛܽܘܪܳܐ. ܘܰܥܢܳܝܗ̱ܝ ܬܰܡܳܢ ܐܰܠܳܗܳܐ. ܘܝܰܗ̱ܒ ܠܶܗ ܚܽܘܛܪܳܐ ܘܫܽܘܠܛܳܢܳܐ. ܕܢܶܚܽܘܬ ܢܶܦܪܽܘܩ ܠܺܝܤܪܳܐܝܶܠ. ܡܶܢ ܥܰܒܕܽܘܬܳܐ ܕܡܶܨܪ̈ܳܝܶܐ܀

ܡܶܢ ܥܳܠܰܡ: ܒܥܶܕܳܢ ܨܰܦܪܳܐ ܙܰܡܰܪ ܗ̱ܘܳܐ. ܕܰܘܺܝܕ ܡܰܠܟܳܐ ܒܩܺܝܬܳܪܶܗ. ܙܡܺܝܪ̈ܳܬܳܐ ܕܪܽܘܚܳܐ ܕܩܽܘܕܫܳܐ. ܘܰܟܢܰܫ̈ܝ̱ ܘܶܐܬܰܝ̈ ܚܰܝ̈ܘܳܬܳܐ. ܠܩܳܠ ܚܰܠܝܽܘܬܳܐ ܕܦܶܬܓܳܡܰܘ̈ܗ̱ܝ. ܟܰܕ ܐܳܡܰܪ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ H

ܡܳܪܰܢ ܐܶܬܪܰܚܰܡܥܠܰܝܢ ܒܗܳܢܳܐ ܨܰܦܪܳܐ ܥܳܒܽܘܪܳܐ܀

ܘܰܒܗܰܘ ܨܰܦܪܳܐ ܕܠܳܐ ܥܳܒܰܪ: ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀

ܒܨܰܦܪܳܐ ܡܩܰܕ̈ܡܳܢ ܒܶܪ̈ܝܳܬܳܐ: ܘܢܳܩ̈ܫܳܢ ܒܬܰܪܥܳܟ ܚܰܢܳܢܳܐ. ܕܬܶܬܶܠ ܠܗܶܝܢ ܡܶܢ ܒܶܝܬܓܰܙܳܟ: ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܀

ܐܺܝܙܓܰܕܶܗ ܕܨܰܦܪܳܐ ܡܰܛܺܝ: ܘܩܺܝܬܳܪܳܐ ܕܫܽܘܒܚܳܐ ܒܺܐܝܕܶܗ. ܢܳܩܶܫ ܒܶܗ ܘܰܡܥܺܝܪ ܕܰܡ̈ܟܶܐ: ܕܩܽܘܡܘ ܫܰܒܰܚܘ ܕܰܡܛܳܐ ܢܽܘܗܪܳܐ܀

ܡܶܢ ܨܰܦܪܳܐ ܠܨܰܦܪܳܐ ܤܰܟܺܝܬ: ܠܦܽܘܪܩܳܢܳܟ ܪܳܚܶܡ ܐ̱ܢܳܫܳܐ. ܒܨܰܦܪܳܐ ܪܰܒܳܐ ܡܳܐ ܕܳܐܬܶܝܬ: ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀

ܒܗܳܢܳܐ ܨܰܦܪܳܐ ܐܶܫܰܒܚܳܟ: ܘܰܒܗܰܘ ܕܰܥܬܺܝܕ ܐܶܪܰܡܪܡܳܟ. ܘܒܰܬܪܶܝܢ ܨܰܦܪ̈ܺܝܢ ܠܳܟ ܫܽܘܒܚܳܐ: ܡܳܪܳܐ ܕܰܬܪ̈ܰܝܗܽܘܢ ܥܳܠ̈ܡܶܐ܀

ܐܰܝܟ ܕܰܦܢܳܬ ܝܰܘܢܳܐ ܨܶܝܕ ܢܽܘܚ ܟܺܐܢܳܐ: ܟܰܕ ܛܥܺܝܢܳܐ ܛܰܪܦܳܐ ܕܙܰܝܬܳܐ܀

ܗܳܟܰܢ ܬܶܦܢܶܐ ܒܳܥܽܘܬܰܢ: ܟܰܕ ܫܩܺܝܠܳܐ ܚܢܳܢܳܐ ܘܪ̈ܰܚܡܶܐ܀

ܛܳܒ ܠܡܰܘܕܳܝܽܘ ܠܡܳܪܝܳܐ:

ܟܳܗܢܳܐ: ܛܳܒ ܠܡܰܘܕܳܝܽܘ ܠܡܳܪܝܳܐ:

ܥܰܡܳܐ: ܘܰܠܡܶܙܡܰܪ ܠܰܫܡܳܟ ܡܪܰܝܡܳܐ ܠܰܡܚܰܘܳܝܽܘ ܒܨܰܦܪܳܐ ܛܰܝܒܽܘܬܳܟ ܘܗܰܝܡܳܢܽܘܬܳܟ ܒܠܰܝ̈ܠܰܘܳܬܳܐ܀

ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ. ܡܳܪܝܳܐ ܚܽܘܢܳܝܗ̱ܝ ܠܥܰܡܳܐ ܕܺܝܠܳܟ. ܡܳܪܝܳܐ ܚܰܤܳܐ ܘܰܫܒܽܘܩ ܚܛܳܗ̈ܶܐ ܕܟܽܠܰܢ. ܩܰܕܺܝܫܳܐ ܐܰܓܶܢ ܥܠܰܝܢ ܝܰܡܺܝܢܳܟ. ܘܰܐܤܳܐ ܟܪܺܝܗܽܘܬܰܢ ܡܶܛܽܠ ܫܡܳܐ ܕܺܝܠܳܟ܀

ܩܰܕܺܝܫܰܬ ܐܰܠܳܗܳܐ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܰܘ̈ܳܬܳܐ ܕܡܶܨܛܰܠܝܳܢ ܒܚܰܪܰܬ݀ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.

ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.

ܢܚܶܬ̣ ܡܶܢ ܫܡܰܝܳܐ ܘܶܐܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܶܐܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.

ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.

ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀

ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ̣ ܗ̄ܘܗ̄ ܘܡܰܠܟܬ̣ܳܐ ܡܶܢ ܝܰܡܺܝܢܳܟ܀

ܘܰܛܥܳܝ ܥܰܡܶܟ̣ܝ̱ ܘܒܶܝܬ̣ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓ̣ܪܰܓ̣ ܡܰܠܟܳܐ ܠܫܽܘܦܪܶܟ̣ܝ̱܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܩܰܪܶܒܝ̱ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬ̣ܰܢ܇ ܘܰܨܠܽܘܬ̣ܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬ̣ܰܢ܀

ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬ̣ܽܘܠܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ̣ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬ̣ܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀

ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܝܳܠܕܰܬ ܐܰܠܳܗܳܐ

ܗܰܘ ܪܺܝܫ ܡܰܠܰܐܟ̣̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ̣ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟ̣ܝ̱ ܘܡܶܢܶܟ̣ܝ̱ ܕܳܢܰܚ܀

ܫܽܘܒܚܳܐ: ܐܶܠܦܳܐ ܗܘܳܬ̣ ܡܰܪܝܰܡ܇ ܛܶܥܢܰܬ̣ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬ̣ܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀

ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ

ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀

ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ܘܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀

ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ

ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀

ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀

ܫܠܳܡ ܠܶܟܝ

ܫܠܳܡ ܠܶܟ̣ܝ ܒܬ̣ܽܘܠܬܳܐ ܡܰܪܝܰܡ ܡܰܠܝܰܬ̣ ܛܰܝܒܽܘܬ̣ܳܐ. ܡܳܪܰܢ ܥܰܡܶܟܝ. ܡܒܰܪܰܟ̣ܬܳܐ ܐܰܢ̱ܬܝ ܒܢܶܫ̈ܶܐ. ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟ̣ܝ̱. ܡܳܪܰܢ ܝܶܫܽܘܥ. ܐܳܘ ܩܰܕܺܝܫܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ. ܨܰܠܳܝ ܚܠܳܦܰܝܢ ܚܰܛܳܝ̈ܶܐ. ܗܳܫܳܐ ܘܰܒܫܳܥܰܬ ܘܡܰܘܬܰܢ ܐܰܡܺܝܢ܀