ܨܠܰܘ̈ܳܬܳܐ ܕܡܶܨܛܰܠܝܳܢ ܩܕܳܡ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܺܝܪܳܐ ܐܰܡܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬ̣ܳܐ ܘܳܐܬ̣ܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܥܢܝܢܐ ܕܪܡܫܐ ܩܰܕܡܳܝܰܬ ܡܰܙܡܘܪܳܐ:
ܡܪܝܐ ܩܪܝܬܟ 141, 142, 119: 105-112, 117

ܡܳܪܝܳܐ ܩܪܺܝܬܳܟ ܐܰܢ̱ܬ ܥܢܺܝ̣ܢܝ̱. ܨܽܘ̣ܬ ܡܶܠܰܝ̈ ܘܩܰܒܶܠ܀

ܨܠܽܘܬܝ̱ ܐܰܝܟ ܥܶܛܪܳܐ ܩܕܳܡܰܝܟ. ܩܽܘܪܒܳܢܳܐ ܕܺܐܝ̈ܕܰܝ ܐܰܝܟ ܩܽܘܪܒܳܢܳܐ ܕܪܰܡܫܳܐ. ܐܰܩܺܝܡ ܡܳܪܝܳܐ ܢܳܛܽܘܪܳܐ ܠܦܽܘܡܝ̱ ܘܢܳܛܽܘܪܳܐ ܠܣܶܦܘ̈ܳܬܝ̱ ܕܠܳܐ ܢܶܣܛܶܐ ܠܶܒܝ̱ ܠܡܶܠܬܳܐ ܒܺܝܫܬܳܐ ܘܶܐܥܒܶܕ ܥܒܳܕ̈ܶܐ ܕܥܰܘܠܳܐ܀

ܥܰܡ ܓܰܒܪ̈ܶܐ ܪ̈ܰܫܺܝ̣ܥܶܐ ܠܳܐ ܐܶܬܡܰܠܰܚ ܥܰܡܗܽܘܢ. ܢܰܠܦܰܢܝ̱ ܙܰܕܺܝܩܳܐ ܘܢܰܟܣܰܢܝ̱. ܡܶܫܚܳܐ ܕܪ̈ܰܫܺܝ̣ܥܶܐ ܠܪܺܝܫܝ̱ ܠܳܐ ܢܰܕܗܶܢ ܡܶܛܽܠ ܕܰܨܠܽܘܬܝ̱ ܥܰܠ ܒܺܝܫܽܘܬܗܽܘܢ. ܘܶܐܬܟܠܺܝܘ̱ ܒܺܐܝܕܳܐ ܕܟܺܐܦܳܐ ܕܰܝܳܢܰܝ̈ܗܽܘܢ ܘܰܫܡܰܥ ܡܶܠܰܝ̈ ܕܒܰܣܺܝ̈ܡܳܢ܀

ܐܰܝܟ ܣܶܟܬܳܐ ܕܨܳܪܝܳܐ ܐܰܪܥܳܐ ܐܶܬܒܰܕܰܪܘ̱ ܓܰܪ̈ܡܰܝܗܽܘܢ ܥܰܠ ܦܽܘܡܳܗ̇ ܕܰܫܝܽܘܠ. ܘܶܐܢܳܐ ܠܘܳܬܳܟ ܡܳܪܝܳܐ ܐܰܪܺܝܡܶܬ ܥܰܝ̈ܢܰܝ ܘܰܥܠܰܝܟ ܐܶܬܬܰܟܠܶܬ ܠܳܐ ܬܶܫܕܶܝܗ̇ ܠܢܰܦܫܝ̱܀

ܢܰܛܰܪܰܝܢܝ̱ ܡܶܢ ܐܺܝ̣ܕܳܐ ܕܫܰܒܗܪ̈ܳܢܶܐ ܕܰܛܡܰܪܘ̱ ܠܺܝ̣ ܦܰܚ̈ܶܐ. ܢܶܦܠܽܘܢ ܥܰܘ̈ܳܠܶܐ ܒܰܡܨܺܝ̈ܕܳܬܗܽܘܢ ܥܕܰܡܳܐ ܕܶܐܥܒܰܪ ܐܶܢܳܐ܀

ܒܩܳܠܝ̱ ܠܡܳܪܝܳܐ ܩܪܺܝܬ ܒܩܳܠܝ̱ ܠܡܳܪܝܳܐ ܐܶܬܟܰܫܦܶܬ. ܘܰܐܪܡܺܝܬ ܩܕܳܡܰܘܗ̱ܝ ܬܰܟܫܶܦܬܝ̱ ܘܽܐܘܠܨܳܢܝ̱ ܩܕܳܡܰܘܗ̱ܝ ܚܰܘܺܝܬ. ܟܰܕ ܐܶܬܛܰܪܦܰܬ ܪܽܘܚܝ̱ ܐܰܢ̱ܬ ܝܳܕܰܥ ܐܰܢ̱ܬ ܫܒܺܝ̈ܠܰܝ܀

ܒܽܐܘܪܚܳܐ ܕܗܰܠ̈ܟܳܬܝ̱ ܛܡܰܪܘ̱ ܠܺܝ̣ ܦܰܚ̈ܶܐ. ܚܳܪܶܬ ܠܝܰܡܺܝܢܳܐ ܘܰܚܙܺܝܬ ܘܠܰܝܬ ܕܚܳܟܶܡ ܠܺܝ. ܐܶܒܰܕ ܡܶܢܝ̱ ܒܶܝܬ ܡܰܥܪܩܳܐ ܘܠܰܝܬ ܬܳܒܽܘܥܳܐ ܠܢܰܦܫܝ̱. ܘܰܓܥܺܝܬ ܠܘܳܬܳܟ ܘܶܐܡܪܶܬ ܕܰܐܢ̱ܬ ܗ̱ܽܘ ܣܰܒܪܝ̱ ܘܰܡܢܳܬܝ̱ ܒܰܐܪܥܳܐ ܕܚܰܝ̈ܶܐ܀

ܨܽܘ̣ܬ ܠܒܳܥܽܘܬܝ̱ ܡܶܛܽܠ ܕܶܐܬܡܰܟܟܶܬ ܛܳܒ. ܦܰܨܳܢܝ̱ ܡܶܢ ܪ̈ܳܕܽܘܦܰܝ ܡܶܛܽܠ ܕܰܥܫܶܢܘ̱ ܡܶܢܝ̱. ܐܰܦܶܩ ܢܰܦܫܝ̱ ܡܶܢ ܒܶܝܬ ܚܒܽܘܫܝܳܐ ܕܰܐܘܕܶܐ ܠܰܫܡܳܟ. ܠܺܝ ܢܣܰܟܽܘܢ ܙܰܕܺܝܩܰܝ̈ܟ ܟܰܕ ܬܶܦܪܥܰܢܝ̱܀

ܫܪܳܓܳܐ ܗ̱ܝ ܡܶܠܬܳܟ ܠܪ̈ܶܓܠܰܝ ܘܢܽܘܗܪܳܐ ܠܰܫܒܺܝ̈ܠܰܝ. ܝܺܡܺܝܬ ܘܰܐܫܪܶܬ ܕܶܐܛܰܪ ܕܺܝ̈ܢܶܐ ܕܙܰܕܺܝܩܽܘܬܳܟ. ܐܶܬܡܰܟܟܶܬ ܪܰܘܪܒܳܐܺܝܬ ܡܳܪܝܳܐ ܐܰܚܳܢܝ̱ ܐܰܝܟ ܡܶܠܬܳܟ. ܒܡܶܠܰܘ̈ܗ̱ܝ ܕܦܽܘܡܝ̱ ܨܒܺܝ ܡܳܪܝܳܐ ܘܡܶܢ ܕܺܝܢܰܝ̈ܟ ܐܰܠܶܦܰܝܢܝ̱܀

ܢܰܦܫܝ̱ ܒܺܐܝ̈ܕܰܝܟ ܗܺܝ ܒܟܽܠܙܒܰܢ ܘܢܳܡܽܘܣܳܟ ܠܳܐ ܛܥܺܝܬ. ܣܳܡܘ̱ ܠܺܝ ܚܰܛܳܝ̈ܶܐ ܦܰܚ̈ܶܐ ܘܡܶܢ ܦܽܘܩܕܳܢܰܝ̈ܟ ܠܳܐ ܣܛܺܝܬ. ܝܶܪܬܶܬ ܣܳܗܕܽܘܬܳܟ ܠܥܳܠܰܡ ܡܶܛܽܠ ܕܒܽܘܣܳܡܳܐ ܗ̱ܝ ܕܠܶܒܝ̱. ܐܰܦܢܺܝܬ ܠܶܒܝ̱ ܕܶܐܥܒܶܕ ܦܽܘܩܕܳܢܰܝ̈ܟ ܠܥܳܠܰܡ ܒܰܫܪܳܪܳܐ܀

ܫܰܒܰܚܘ̱ ܠܡܳܪܝܳܐ ܟܽܠܟܽܘܢ ܥܰܡ̱̈ܡܶܐ. ܫܰܒܚܳܝ̈ܗ̱ܝ ܟܽܠܗܶܝܢ ܐܶܡܘ̈ܳܬܳܐ. ܡܶܛܽܠ ܕܥܶܫܢܰܬ ܥܠܰܝܢ ܛܰܝܒܽܘܬܶܗ. ܫܰܪܺܝܪܳܐܺܝܬ ܡܳܪܝܰܐ ܗ̱ܘ ܠܥܳܠܰܡ܀

ܫܽܘܒܚܳܐ ܘܥܶܩܒܳܐ: H

ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ. ܘܰܐܪ̈ܥܳܢܶܐ ܤܶܓܕܬܳܐ ܡܩܰܪܒܺܝܢ. ܠܚܰܕ ܐܺܝܬܝܳܐ ܡܬܽܘܡܳܝܳܐ ܐܰܠܳܗܳܐ ܒܳܪܽܘܝܳܐ ܕܟܽܠܶܗ ܥܳܠܡܳܐ܀

ܣܶܕܪܳܐ ܓܰܘܳܢܳܝܳܐ:

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ. ܘܢܰܨܰܚ ܕܽܘܟܪܳܢ ܩܰܕܺܝܫܰܘ̈ܗܝ ܒܟܽܠ ܐܰܬܰܪ ܘܦܶܢ̈ܝܳܢ ܘܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܪܰܣܶܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܟܰܕ ܥܽܘܗܕܳܢܳܐ ܪܚܺܝܡܳܐ ܘܚܰܒܺܝܒܳܐ ܘܰܡܝܰܩܪܳܐ ܥܳܒܕܺܝܢܰܢ. ܠܗܳܝ ܫܳܘܝܰܬ ܠܛܽܘ̈ܒܶܐ ܘܰܫܒܺܝܚܰܬ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܡܒܰܪܰܟܬܳܐ ܘܰܡܥܰܠܰܝܬܳܐ ܘܰܒܬܽܘܠܰܬ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܥܰܡܳܗ̇ ܕܶܝܢ ܢܶܬܶܥ̱ܗܰܕ ܠܰܢ̈ܒܺܝܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ ܠܶܐܘܰܢܓܶܠܺܝ̈ܣܛܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ. ܠܟܺܐܢ̈ܶܐ ܘܰܠܟܳܗ̈ܢܶܐ ܘܠܰܐܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ ܒܬܽܘ̈ܠܶܐ ܘܩܰܕܺܝ̈ܫܶܐ ܘܢܰܟ̈ܦܶܐ ܘܨܰܝܳܡ̈ܶܐ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܘܟܽܠܗܽܘܢ ܣܳܥܪ̈ܰܝ ܫܰܦܺܝܪ̈ܳܬܳܐ. ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܰܒܬܰܟܫ̈ܦܳܬܗܽܘܢ ܡܩܰܒ̈ܠܳܬܳܐ ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܰܫܒܽܘܩ ܚܰܘܒܰܝ̈ܢ ܘܚܰܣܳܐ ܚܛܳܗܰܝ̈ܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܒܓܽܘܕܰܝ̈ܗܽܘܢ ܕܩܰܕܺܝ̈ܫܰܝܟ ܢܶܬܛܰܟܰܣ ܘܰܒܣܺܝ̈ܥܳܬܗܽܘܢ ܢܶܬܚܰܠܰܛ ܘܒܰܝܢܳܬܗܽܘܢ ܢܶܗܘܶܐ ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀

ܩܠܐ ܩܕܡܝܐ ܒܩ̄: ܒܩܳܠܳܐ ܕܰܡܠܶܝܢ
ܓܘܫܡܐ ܬܡܝܢܝܐ H

ܦܶܬܓܳܡܳܐ: ܒܩܳܠܝ ܠܡܳܪܝܳܐ ܩܪܺܝܬ ܒܩܳܠܝ ܠܡܳܪܝܳܐ ܐܶܬܟܰܫܦܶܬ: ܒܩ̈ܳܠܶܐ ܕܰܡܠܶܝܢ ܬܰܘܕܺܝܬܳܐ ܡܪܰܥܶܐ ܐ̱ܢܳܐ ܠܳܟ. ܡܶܛܽܠ ܚܰܘ̈ܒܰܝ ܘܰܚܛܳܗ̈ܝ ܡܶܬܟܰܫܰܦ ܐ̱ܢܳܐ ܟܰܕ ܓܳܥܶܐ ܐ̱ܢܳܐ. ܡܳܪܝ ܘܰܐܠܳܗܝ ܠܳܐ ܬܶܫܕܶܐ ܡܶܢ ܩܕܳܡܰܝܟ. ܬܝܳܒܽܘܬܳܐ ܘܰܬܘܳܬ ܢܰܦܫܳܐ. ܕܰܡܩܰܪܶܒ ܐ̱ܢܳܐ ܠܳܟ. ܡܶܛܽܠ ܤܽܘܓܳܐܐ ܕܤܰܟܠ̈ܘܳܬܝ ܡܰܠܟܳܐ ܡܫܺܝܚܳܐ ܪܰܚܶܡܥܰܠܝ܀

ܘܰܐܪܡܺܝܬ ܩܕܳܡܰܘܗ̱ܝ ܬܰܟܫܶܦܬܝ: ܒܚܰܘ̈ܒܶܐ ܘܰܚܛܳܗ̈ܶܐ ܕܰܩܢܽܘܡܝ ܡܰܘܕܳܐ ܐ̱ܢܳܐ ܩܕܳܡܰܝܟ. ܘܥܰܠ ܤܽܘܓܳܐܐ ܕܤܰܟܠ̈ܘܳܬܝ ܠܳܐ ܡܟܰܤܶܐ ܐ̱ܢܳܐ ܪܳܚܶܡ ܐ̱ܢܳܫܳܐ. ܐܶܡܪܶܬ ܓܶܝܪ ܐܶܢܗܽܘ ܕܡܰܟܶܣ ܥܰܠ ܤܰܢ̈ܝܳܬܳܐ. ܒܤܽܘܪ̈ܚܳܢܰܝ ܐܰܘܕܶܐ ܠܡܳܪܝܳܐ ܒܪ̈ܰܚܡܰܘܗ̱ܝ ܡܰܐܤܶܐ ܠܺܝ. ܐܳܤܝܳܐ ܕܢܰܦܫ̈ܳܬܰܢ. ܒܒܳܥܽܘ ܡܶܢܳܟ ܪܰܚܶܡܥܠܰܝ܀

ܫܽܘܒܚܳܐ: ܚܰܤܳܐ ܚܰܘ̈ܒܰܝ ܒܛܰܝܒܽܘܬܳܟ ܘܰܫܒܽܘܩ ܠܺܝ ܤܰܟܠܽܘܬܝ. ܐܰܢ̱ܬ ܐܰܠܳܗܳܐ ܡܪܰܚܡܳܢܳܐ ܠܳܐ ܬܰܫܠܶܡܰܝܢܝ ܠܰܒܥܶܠܕܰܪܳܐ. ܕܠܳܐ ܒܰܡܨܺܝܕܬܶܗ ܐܶܬܥܰܪܩܰܠ. ܘܢܰܗܠܽܘܢ ܒܺܝ ܐܳܦ ܝܳܕܽܘ̈ܥܰܝ. ܘܶܐܗܘܶܐ ܠܺܝ ܒܶܙܚܳܐ. ܡܫܺܝܚܳܐ ܐܰܠܳܗܳܐ ܒܬܰܪܥܳܟ ܢܶܩܫܶܬ ܪܰܚܶܡܥܠܰܝ܀

ܡܶܢ ܥܳܠܰܡ: ܒܙܰܒ̈ܢܶܐ ܕܰܡܠܶܝܢ ܥܳܩ̈ܳܬܳܐ ܡܶܬܟܰܫܦܺܝܢܰܢ ܠܳܟ. ܬܳܐ ܡܳܪܝ ܠܺܐܝܳܠܳܐ ܕܥܰܒܕܰܝ̈ܟ. ܘܒܰܥܓܰܠ ܢܩܰܕܡܽܘܢܳܢ ܪ̈ܰܚܡܰܝܟ. ܕܰܕܠܳܐ ܤܳܟܳܐ ܟܪ̈ܺܝܟܳܢ ܠܰܢ ܟܽܠ ܥܳܩ̈ܳܬܳܐ. ܡܳܪܝܳܐ ܠܳܐ ܒܪܽܘܓܙܳܟ ܬܰܟܤܰܢ. ܐܰܝܟ ܕܙܰܡܰܪ ܕܰܘܺܝܕ. ܐܳܦܠܳܐ ܒܚܶܡܬܳܟ ܬܶܪܕܶܐ ܠܰܢ ܡܰܠܟܳܐ ܡܫܺܝܚܳܐ ܪܰܚܶܡܥܠܰܝܢ܀

ܕܝܳܠܕܰܬ ܐܰܠܳܗܳܐ: ܡܶܢ ܦܳܠܳܛܺܝܢ ܕܰܫܡܰܝܳܐ ܥܺܝܪܳܐ ܐܶܫܬܰܕܰܪ. ܠܢܳܨܪܰܬ ܡܕܺܝܢ̱ܬܳܐ ܕܰܓܠܺܝܠܳܐ ܨܶܝܕ ܒܰܪ̱ܬ ܕܰܘܺܝܕ ܛܽܘܒܳܢܺܝܬܳܐ. ܘܶܐܓܰܪܬܳܐ ܕܫܰܝܢܳܐ ܒܺܐܝܕܶܗ ܘܰܡܤܰܒܰܪ ܠܳܗ̇. ܕܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ. ܒܽܘܟܪܳܐ ܕܡܶܢ ܐܰܒܳܐ. ܡܫܺܝܚܳܐ ܐܰܠܳܗܳܐ ܕܰܕܢܰܚ ܡܶܢܳܗ̇ ܪܰܚܶܡܥܠܰܝܢ܀

ܚܙܳܬܶܗ ܒܬܽܘܠܬܳܐ ܠܡܰܠܰܐܟܳܐ ܕܰܥܛܺܝܦ ܓܰܘܙܰܠܬܳܐ. ܘܰܒܕܶܚܠܳܐ ܪܰܒܳܐ ܩܳܡܰܬ ܘܫܰܪܝܰܬ ܕܬܺܐܡܰܪ ܡܰܟܺܝܟܳܐܺܝܬ. ܕܶܐܢ ܦܽܘܫܳܩܳܐ ܠܳܐ ܬܶܬܶܠ ܐܰܝܟܰܢ ܡܰܨܝܳܐ. ܕܢܶܗܘܶܐ ܒܰܛܢܳܐ ܕܠܳܐ ܓܰܒܪܳܐ. ܥܛܶܠ ܠܺܝ ܕܶܐܗܰܝܡܶܢ. ܕܶܐܢܳܐ ܓܰܒܪܳܐ ܠܳܐ ܚܟܺܝܡ ܠܺܝ ܘܰܒܙܽܘܘܳܓܳܐ ܠܳܐ ܪܓܺܝܫܳܐ ܐ̱ܢܳܐ܀

ܬܡܰܗ ܢܽܘܪܳܢܳܐ ܘܶܐܬܕܰܡܰܪ ܒܡܰܠܝܰܬ ܟܽܠ ܫܽܘܦܪ̈ܺܝܢ. ܘܫܰܪܺܝ ܡܡܰܠܶܠ ܬܡܺܝ̈ܗܳܬܳܐ ܘܰܡܦܰܫܶܩ ܠܳܗ̇ ܠܰܓܢܺܝ̈ܙܳܬܳܐ. ܪܽܘܚ ܩܽܘܕܫܳܐ ܢܺܐܬܶܐ ܠܘܳܬܶܟܝ ܘܚܺܝܠ ܥܶܠܳܝܳܐ. ܘܬܺܐܠܕܺܝܢ ܝܰܠܕܳܐ ܕܕܽܘܡܳܪܳܐ. ܒܶܠܥܳܕ ܙܽܘܘܳܓܳܐ. ܡܫܺܝܚܳܐ ܐܰܠܳܗܳܐ ܕܰܠܡܰܠܟܽܘܬܶܗ ܤܽܘܦ ܠܳܐ ܢܶܗܘܶܐ܀

ܟܽܠܗܽܘܢ ܦܽܘ̈ܡܶܐ ܘܠܶܫܳܢ̈ܶܐ ܕܢܽܘܪܳܐ ܘܰܕܪܽܘܚܳܐ. ܕܒܰܡܪ̈ܰܘܡܶܐ ܓܢܺܝ̈ܙܶܐ ܕܰܠܥܶܠ ܛܽܘܒܳܐ ܢܶܬܠܽܘܢ ܠܰܡܒܰܪܰܟܬܳܐ. ܘܟܽܠ ܫܰܪ̈ܒܳܢ ܕܺܐܝܬ ܥܰܠ ܐܰܪܥܳܐ ܐܰܝܟܰܢ ܕܶܐܡܪܰܬ. ܒܰܨܠܰܘ̈ܳܬܳܗ̇ ܡܳܪܶܐ ܟܽܠ. ܫܰܟܶܢ ܒܰܚܢܳܢܳܟ. ܫܽܘܒܩܳܢ ܚܰܘ̈ܒܶܐ ܘܰܚ̈ܛܳܗܶܐ ܠܟܶܢܫܳܐ ܕܙܰܝܰܚ ܝܽܘܡ ܕܽܘܟܪܳܢܳܗ̇܀

ܕܩܰܕܺܝ̈ܫܶܐ: ܫܠܳܡܳܐ ܥܰܡܗܽܘܢ ܕܰܢܒܺܝ̈ܶܐ ܘܕܰܫܠܺܝ̈ܚܶܐ ܘܤܳܗ̈ܕܶܐ. ܐܰܪ̈ܕܺܝܟܠܶܐ ܕܗܰܝܡܳܢܽܘܬܳܐ ܐܳܦ ܥܰܡܽܘ̈ܕܶܐ ܕܥܺܕܰܬ ܩܽܘܕܫܳܐ. ܕܤܰܝܒܰܪܘ ܗ̱ܘܰܘ ܟܽܠ ܐܽܘܠ̈ܨܳܢܺܝܢ ܡܶܛܽܠ ܡܳܪܰܢ. ܘܰܢܦܰܩܝ̈ ܢܰܦ̈ܫܳܬܗܽܘܢ ܒܳܬܪܶܗ. ܐܰܝܟ ܕܙܰܡܰܪ ܕܰܘܺܝܕ. ܡܫܺܝܚܳܐ ܐܰܠܳܗܳܐ ܒܰܨܠܰܘ̈ܳܬܗܽܘܢ ܪܰܚܶܡܥܠܰܝܢ܀

ܒܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܝܟ ܡܶܬܟܰܫܦܺܝܢܰܢ ܠܳܟ. ܝܶܫܽܘܥ ܡܶܠܬܳܐ ܐܰܠܳܗܳܐ ܕܶܐܬܳܐ ܒܚܽܘܒܶܗ ܘܰܗܘܳܐ ܐ̱ܢܳܫܳܐ. ܘܰܕܪܰܫ ܠܰܢ ܐܽܘܪܚܳܐ ܕܚܰܝ̈ܶܐ ܠܒܶܝܬ ܡܰܠܟܽܘܬܳܐ. ܘܰܚܙܰܐܽܘܗ̱ܝ ܤܳܗ̈ܕܶܐ ܒܪ̈ܺܝܟܶܐ. ܘܰܐܘܕܺܝܘ ܘܗܰܝܡܶܢܘ ܒܶܗ. ܡܫܺܝܚܳܐ ܐܰܠܳܗܳܐ ܒܰܨܠܰܘ̈ܳܬܗܽܘܢ ܪܰܚܶܡܥܠܰܝܢ܀

ܡܰܢܽܘ ܡܶܫܟܰܚ ܕܢܶܫܬܰܥܶܐ ܥܰܠ ܩܽܘܠܳܤܰܝ̈ܗܽܘܢ. ܕܤܳܗ̈ܕܶܐ ܕܰܐܚܶܒܘ ܠܰܡܫܺܝܚܳܐ ܒܟܽܠܶܗ ܚܰܝܠܳܐ ܕܪ̈ܶܥܝܳܢܰܝܗܽܘܢ. ܘܰܤܢܰܘ ܐܺܝܩܳܪܳܐ ܕܙܰܒܢܳܐ ܡܶܫܬܰܪܝܳܢܳܐ. ܘܰܪܚܶܡܘ ܕܶܚܠܰܬ ܐܰܠܳܗܳܐ. ܡܶܢ ܟܽܠܶܗ ܠܶܒܗܽܘܢ. ܡܫܺܝܚܳܐ ܐܰܠܳܗܳܐ ܒܰܨܠܽܘܬ ܤܳܗܕܰܝ̈ܟ ܪܰܚܶܡܥܠܰܝܢ܀

ܚܙܰܐܽܘܗ̱ܝ ܤܳܗ̈ܕܶܐ ܠܰܡܫܺܝܚܳܐ ܕܰܬܠܶܐ ܥܰܠ ܩܰܝܤܳܐ. ܘܰܬܪܺܝܥ ܤܶܛܪܶܗ ܒܠܽܘܟܳܝܬܳܐ ܘܪܳܕܶܝܢ ܡܶܢܶܗ ܕܡܳܐ ܘܡܰܝ̈ܳܐ. ܘܰܪܗܶܛܘ ܠܰܒܶܒܘ ܠܰܚ̈ܕܳܕܶܐ ܘܗܳܟܰܢ ܐܶܡܰܪܘ. ܕܬܰܘ ܕܰܢܡܽܘܬ ܡܶܛܽܠ ܡܳܪܰܢ. ܐܰܝܟܰܢ ܕܡܺܝܬ ܚܠܳܦܰܝܢ. ܡܫܺܝܚܳܐ ܐܰܠܳܗܳܐ ܒܰܨܠܽܘܬ ܤܳܗܕܰܝ̈ܟ ܪܰܚܶܡܥܠܰܝܢ܀

ܕܰܬܝܳܒܽܘܬܳܐ: ܦܬܰܚ ܠܰܢ ܡܳܪܝ ܬܰܪܥܳܐ ܕܪ̈ܰܚܡܰܝܟ ܐܰܝܟ ܕܰܠܓܰܝܳܤܳܐ. ܘܩܰܒܶܠ ܡܶܢܰܢ ܬܝܳܒܽܘܬܳܐ ܐܰܝܟ ܕܰܠܡܳܟܤܳܐ ܘܗܳܝ ܚܰܛܳܝܬܳܐ. ܘܰܐܝܟ ܕܶܐܬܚܰܤܺܝ ܠܶܗ ܠܫܶܡܥܽܘܢ ܒܳܬܰܪ ܕܰܟܦܰܪ. ܚܰܤܳܐ ܚܰܘܒܰܝ̈ܢ ܘܰܚܛܳܗܰܝ̈ܢ. ܡܳܪܝܳܐ ܡܠܶܐ ܪ̈ܰܚܡܶܐ. ܕܰܐܢ̱ܬ ܗ̱ܽܘ ܨܳܒܶܐ ܒܬܰܝܳܒ̈ܶܐ ܕܳܐܬܶܝܢ ܨܶܐܕܰܝܟ ܒܰܬܝܳܒܽܘܬܳܐ܀

ܡܳܪܝܳܐ ܡܪܰܚܡܳܢܳܐ ܚܽܘܢܰܝܢ ܐܰܝܟ ܕܰܠܓܰܝܳܤܳܐ. ܠܰܘ ܡܶܛܽܠ ܕܫܳܘܶܝܢܰܢ ܐܶܠܳܐ ܡܶܛܽܠ ܛܰܝܒܽܘܬܳܟ. ܕܒܳܗ̇ ܐܶܬܬܰܚܬܺܝܬ ܨܶܝܕ ܓܶܢܤܳܐ ܕܰܒܢܰܝ̈ܢܳܫܳܐ. ܕܬܶܦܪܩܺܝܘܗ̱ܝ ܡܶܢ ܐܳܠܽܘܨܰܘ̈ܗ̱ܝ. ܡܰܘܬܳܐ ܘܤܳܛܳܢܳܐ. ܐܳܤܝܳܐ ܕܢܰܦ̈ܫܳܬܰܢ. ܒܒܳܥܽܘ ܡܶܢܳܟ ܪܰܚܶܡܥܠܰܝܢ܀

ܙܳܥܘ ܢܺܝ̈ܢܘܳܝܶܐ ܡܶܢ ܩܳܠܶܗ ܕܝܰܘܢܳܢ ܒܰܪ ܡܰܬܰܝ. ܘܒܰܬܝܳܒܽܘܬܳܐ ܐܶܬܓܰܘܰܤܘ ܒܫܰܗܪܳܐ ܘܨܰܘܡܳܐ ܘܰܨܠܰܘ̈ܳܬܳܐ. ܘܰܒܕܶܡ̈ܥܶܐ ܘܰܒܚܶܢ̈ܓܳܬܳܐ ܐܶܬܒܰܛܰܠ ܗ̱ܘܳܐ. ܓܙܳܪ ܕܺܝܢܳܐ ܕܰܐܟܪܶܙ ܝܰܘܢܳܢ ܗܦܽܘܟܝܳܐ ܠܢܺܝܢ̈ܘܳܝܶܐ. ܡܶܢ ܒܺܝ̈ܫܳܬܳܐ ܠܛܳܒ̈ܳܬܳܐ. ܒܪܺܝܟ ܚܰܢܳܢܳܐ ܕܰܐܦܢܺܝ ܐܶܢܽܘܢ܀

ܢܩܰܪܶܒ ܟܽܠܰܢ ܬܝܳܒܽܘܬܳܐ ܘܢܶܒܥܶܐ ܒܬܰܟܫܶܦܬܳܐ. ܡܶܢ ܗܰܘ ܡܳܪܳܐ ܡܪܰܚܡܳܢܳܐ ܘܠܳܐ ܬܶܡܰܐܢ ܠܰܢ ܡܶܢ ܕܰܢܦܺܝܤܺܝܘܗ̱ܝ. ܕܰܦܬܺܝܚ ܬܰܪܥܶܗ ܠܬܰܝ̈ܳܒܶܐ ܒܟܽܠ̈ܥܶܕܳܢܺܝܢ. ܘܥܳܢܶܐ ܠܰܐܝܢܳܐ ܕܢܳܩܶܫ ܒܶܗ. ܘܠܳܐ ܟܳܠܶܐ ܪ̈ܰܚܡܰܘܗ̱ܝ. ܡܶܢ ܚܰܛܳܝ̈ܶܐ ܕܩܳܪܶܝܢ ܠܶܗ ܡܶܛܽܠ ܕܛܳܒ ܗ̱ܽܘ ܘܰܡܪܰܚܳܡܢܰܐ ܗ̱ܘ܀

ܕܥܰܢܺܝ̈ܕܶܐ: ܥܒܶܕ ܡܳܪܝ ܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܠܰܕܡܳܟ ܡܚܰܤܝܳܢܳܐ. ܘܡܳܐ ܕܳܐܬܶܐ ܐܰܢ̱ܬ ܒܬܶܫܒܽܘܚܬܳܐ ܥܰܡ ܡܰܠܰܐܟܰܝ̈ܟ. ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ ܒܰܐܦ̈ܶܐ ܓܰܠ̈ܝܳܬܳܐ. ܡܫܺܝܚܳܐ ܐܰܠܳܗܳܐ ܘܢܰܤܩܽܘܢ ܫܽܘܒܚܳܐ ܠܰܐܠܳܗܽܘܬܳܟ܀

ܩܠܐ ܕܬܪܝܢ
ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ ܡܳܪܝܳܐ
ܓܘܫܡܐ ܚܡܝܫܝܐ H

ܦܶܬܓܳܡܳܐ: ܐܺܬܶܐ ܠܒܰܝܬܳܟ ܒܺܐܝܩܳܪܳܐ ܘܶܐܦܪܥܳܟ ܢܶܕܪ̈ܰܝ ܗ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ ܡܳܪܝܳܐ. ܠܡܶܫܰܐܠ ܪ̈ܰܚܡܶܐ ܘܰܚܢܳܢܳܐ ܘܫܽܘܒܩܳܢ ܚܰܘ̈ܒܶܐ. ܢܺܐܬܶܐ ܒܨܰܦܪܳܐ ܘܢܶܤܓܽܘܕ ܠܳܟ ܦܳܪܽܘܩܰܢ ܕܰܐܢ̱ܬ ܗ̱ܽܘ ܚܳܐܶܢ ܠܚܰܛܳܝ̈ܶܐ ܡܶܢ ܚܰܘܒܰܝ̈ܗܽܘܢ܀

ܝܰܗ̱ܒܬ ܝܽܘܬܪܳܢܳܐ ܠܕܳܚ̈ܠܰܝ ܫܡܳܟ ܗ̄: ܛܳܒܳܐ ܕܝܰܗ̱ܒ ܐܰܓܪܳܐ ܒܪܰܡܫܳܐ ܠܟܰܫܺܝܪ̈ܶܐ. ܘܰܐܫܘܺܝ ܬܘܽܒ ܠܰܐܝܠܶܝܢ ܕܶܐܬܰܘ ܒܰܥܤܰܪ ܘܰܚܕܳܐ. ܗܰܒܠܰܢ ܡܳܪܝ ܓܰܠܝܽܘܬ ܐܰܦ̈ܶܐ ܒܢܽܘܚܳܡܳܐ ܕܥܰܡ ܩܰܕ̈ܡܳܝܶܐ ܘܰܐܚܪ̈ܳܝܶܐ ܫܽܘܒܚܳܟ ܢܶܙܡܰܪ܀

ܫܽܘܒܚܳܐ: ܫܽܘܒܚܳܐ ܠܳܟ ܥܺܝܪܳܐ ܕܥܺܝܪ̈ܶܐ ܡܫܰܡܫܺܝܢ ܠܶܗ. ܘܰܒܬܶܫܡܶܫܬܳܐ ܕܰܐܪ̈ܥܳܢܶܐ ܨܳܒܶܐ ܒܪ̈ܰܚܡܰܘܗ̱ܝ. ܩܳܪܶܝܢܰܢ ܠܳܟ ܡܶܢ ܥܽܘܡܩܳܐ ܫܡܰܥ ܩܳܠܰܢ. ܐܰܝܟ ܕܝܰܘܢܳܢ ܕܡܶܢ ܓܰܘ ܝܰܡܳܐ ܩܪܳܟ ܘܰܥܢܰܝܬܳܝܗ̱ܝ܀

ܡܶܢ ܥܳܠܰܡ: ܠܳܟ ܗ̱ܽܘ ܩܳܪܶܝܢ ܕܰܐܠܺܝܨܺܝܢ ܚܰܢܳܢܳܐ. ܘܒܳܟ ܡܶܬܓܰܘܤܺܝܢ ܕܰܡܥܳܩܺܝܢ ܪܳܚܶܡ ܐ̱ܢܳܫ̈ܳܐ. ܗܘܺܝ ܢܳܛܽܘܪܳܐ ܠܚܰܝܰܝ̈ܗܽܘܢ ܒܰܨܠܺܝܒܳܟ. ܘܢܰܛܰܪ ܐܶܢܽܘܢ ܡܶܢ ܒܺܝܫܳܐ ܕܠܳܟ ܗ̱ܽܘ ܡܤܰܟܶܝܢ܀

ܕܝܳܠܕܰܬ ܐܰܠܳܗܳܐ: ܡܒܰܪܰܟܬܳܐ ܕܰܗܘܳܬ ܐܶܡܳܐ ܠܰܐܠܳܗܳܐ. ܒܕܰܟܝܽܘܬܳܐ ܘܩܰܕܺܝܫܽܘܬܳܐ ܕܠܳܐ ܙܽܘܘܳܓܳܐ. ܒܥܳܝ ܪ̈ܰܚܡܶܐ ܒܗܳܢܳܐ ܝܰܘܡܳܐ ܕܕܽܘܟܪܳܢܶܟܝ. ܕܢܶܗܘܶܐ ܒܶܗ ܢܝܳܚܳܐ ܠܡܺܝ̈ܬܶܐ ܘܤܰܒܪܳܐ ܠܚܰܝ̈ܶܐ܀

ܐܶܢ ܦܰܓܪܶܟܝ ܪܰܚܺܝܩ ܡܶܢܰܢ ܩܰܕܺܝܫܬܳܐ. ܨܠܰܘ̈ܳܬܶܟܝ ܥܰܡܰܢ ܐܶܢܶܝܢ ܒܟܽܠ̈ܥܶܕܳܢܺܝܢ. ܠܗܰܘ ܚܰܝܠܳܐ ܟܰܤܝܳܐ ܕܰܢܚܶܬ ܘܰܫܪܳܐ ܒܶܟܝ. ܐܶܬܟܰܫܰܦܝ ܠܶܗ ܩܰܕܺܝܫܬܳܐ ܢܪܰܚܶܡ ܥܠܰܝܢ܀

ܥܰܠ ܒܽܘܪ̈ܟܶܝܗ̇ ܛܥܶܢܬܶܗ ܡܰܪܝܰܡ ܠܰܡܫܺܝܚܳܐ. ܘܚܰܠܒܳܐ ܕܰܟܝܳܐ ܐܰܝܢܶܩܬܶܗ ܠܰܡܬܰܪܤܶܐ ܟܽܠ. ܒܥܰܙܪܽܘܪ̈ܶܐ ܟܪܰܟܬܶܗ ܐܳܦ ܒܽܐܘܪܝܳܐ ܤܳܡܬܶܗ. ܠܗܰܘ ܕܚܰܝܶܕ ܐܰܠܳܗܽܘܬܶܗ ܥܰܡ ܐ̱ܢܳܫܽܘܬܰܢ܀

ܗܘܳܬ ܡܰܪܝܰܡ ܐܶܠܦܳܐ ܕܚܰܝ̈ܶܐ ܒܗܳܢ ܥܳܠܡܳܐ. ܘܰܡܫܺܝܚܳܐ ܗܘܳܐ ܡܰܠܳܚܳܐ ܢܚܶܬ ܘܰܫܪܳܐ ܒܳܗ̇. ܡܰܢܥܰܬ ܘܰܡܛܳܬ ܠܰܠܡܺܐܢܳܐ ܕܚܰܕ̈ܘܳܬܳܐ. ܘܝܶܗܒܰܬ ܥܽܘܬܪܳܐ ܫܡܰܝܳܢܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܕܩܰܕܺܝ̈ܫܶܐ: ܫܠܳܡܳܐ ܥܰܡܳܗ̇ ܕܡܰܫܪܺܝܬܟܽܘܢ ܩܰܕܺܝ̈ܫܶܐ. ܬܰܓܳܪ̈ܶܐ ܛܥܺܝ̈ܢܰܝ ܚܰܝ̈ܶܐ ܠܰܒܢܰܝ̈ܢܰܫܳܐ. ܦܬܰܚܘ ܓܰܙܳܐ ܕܰܨܠܰܘ̈ܳܬܟܽܘܢ ܠܰܤܢܺܝ̈ܩܶܐ. ܘܛܰܪܘ ܐܰܬܪܳܐ ܕܰܫܪܶܝܬܽܘܢ ܒܶܗ ܡܶܢ ܢܶܟ̈ܝܳܢܶܐ܀

ܠܳܐ ܡܶܬܛܰܠܡܺܝܢ ܥܰܡܠܰܝ̈ܟܽܘܢ ܩܰܕܺܝ̈ܫܶܐ. ܘܠܳܐ ܥܳܒܰܪ ܡܰܠܟܳܐ ܡܫܺܝܚܳܐ ܕܰܪܚܶܡܬܽܘܢܳܝܗ̱ܝ. ܒܥܺܕܬܳܐ ܤܺܝܡܺܝܢ ܓܰܪ̈ܡܰܝܟܽܘܢ ܕܶܐܬܢܰܨܰܚܘ. ܘܒܰܤܦܰܪ ܚܰܝ̈ܶܐ ܫܡܳܗܰܝ̈ܟܽܘܢ ܪ̈ܚܽܘܡܰܘܗ̱ܝ ܕܰܒܪܳܐ܀

ܩܽܘܡܘ ܤܳܗ̈ܕܶܐ ܘܤܰܬܰܪܽܘܢܳܗ̇ ܠܰܒܪܺܝܬܳܐ. ܡܶܢ ܓܰܠ̱̈ܠܶܐ ܘܡܶܢ ܡܰܚܫܽܘ̈ܠܶܐ ܕܰܟܪ̈ܺܝܟܺܝܢ ܠܳܗ̇. ܐܰܝܟ ܕܤܰܬܰܪ ܗ̱ܘܳܐ ܢܽܘܚ ܟܺܐܢܳܐ ܒܟܶܐܘܶܠܳܐ. ܠܚܰܝ̈ܘܳܬܳܐ ܕܥܰܠܝ̈ ܗ̱ܘܰܝ̈ ܥܰܡܶܗ ܒܝܽܘܡ ܛܰܘܦܳܢܳܐ܀

ܩܥܰܘ ܤܳܗ̈ܕܶܐ ܡܶܢ ܓܰܘ ܢܽܘܪܳܐ ܠܰܐܠܳܗܳܐ. ܕܡܶܛܽܠܳܬܳܟ ܡܳܝܬܺܝܢܰܢ ܬܳܐ ܠܥܽܘܕܪܳܢܰܢ. ܙܳܚ ܘܰܢܚܶܬ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ. ܘܢܽܘܪܳܐ ܕܰܚܙܳܬ ܠܒܳܪܽܘܝܳܗ̇ ܛܰܠܳܐ ܪܶܤܡܰܬ܀

ܕܚܰܕ ܩܢܽܘܡܳܐ: ܐܰܝܟ ܡܰܪܓܳܢܺܝܬܳܐ ܕܟܺܝܬܳܐ ܕܠܳܐ ܡܽܘܡܳܐ. ܕܳܡܶܐ ܫܽܘܦܪܳܟ ܒܶܝܬ ܥܺܝܪ̈ܶܐ ܡܳܪܝ ܓܰܒܪܺܐܶܝܠ. ܘܰܐܝܟ ܦܺܝܪܡܳܐ ܕܰܡܠܶܐ ܒܶܣ̈ܡܶܐ ܘܗܶܪ̈ܽܘܡܶܐ. ܦܳܐܰܚ ܪܺܝܚܳܐ ܕܕܽܘܒܳܪ̈ܰܝܟ ܨܠܽܘܬܳܟ ܥܰܡܰܢ܀

ܥܰܠ ܝܰܡܳܐ ܥܶܒܪܶܬ ܘܥܰܠ ܓܰܠ̱̈ܠܰܘܗ̱ܝ ܕܳܫܶܬ. ܘܰܐܝܟ ܐܶܠܦܶܗ ܕܡܳܪܝ ܝܽܘܚܰܢܳܢ ܠܳܐ ܚܙܺܝܬ ܬܰܡܳܢ. ܛܥܺܝܢܳܐ ܢܒܺܝ̈ܶܐ ܘܰܡܕܰܒܪܳܐ ܠܰܫܠܺܝ̈ܚܶܐ. ܘܰܛܥܺܝܢܳܐ ܓܰܪ̈ܡܶܐ ܕܤܳܗ̈ܕܶܐ ܘܪܳܕܝܳܐ ܠܰܥܕܶܝܢ܀

ܕܰܬܝܳܒܽܘܬܳܐ: ܐܰܠܳܗܳܐ ܫܰܦܝܳܐ ܕܪܳܚܶܡ ܠܰܫܦܰܝ̈ܳܐ. ܗܰܒܠܰܢ ܡܳܪܝ ܫܰܦܝܽܘܬ ܠܶܒܳܐ ܒܟܽܠ̈ܥܶܕܳܢܺܝܢ. ܘܰܐܥܒܰܪ ܡܶܢܰܢ ܡܰܪ̈ܢܝܳܬܳܐ ܤܪ̈ܺܝܩܳܬܳܐ. ܘܟܽܠ ܚܽܘ̈ܫܳܒܶܐ ܘܕܽܘ̈ܘܳܕܶܐ ܕܠܳܟ ܠܳܐ ܫܳܦܪܺܝܢ܀

ܐܰܠܳܗܳܐ ܕܰܐܫܪܺܝ ܫܰܝܢܶܗ ܘܰܫܠܳܡܶܗ. ܒܥܶܠܺܝܬܳܐ ܨܶܝܕ ܬܰܠܡܺܝ̈ܕܰܘܗ̱ܝ ܘܒܰܝܰܐ ܐܶܢܽܘܢ. ܘܗܽܘ ܒܪ̈ܰܚܡܰܘܗ̱ܝ ܢܰܫܪܶܐ ܫܰܝܢܶܗ ܘܰܫܠܳܡܶܗ. ܒܶܝܬ ܡܰܠ̈ܟܶܐ ܕܫܰܓܫܽܘܗ̇ ܠܰܐܪܥܳܐ ܒܰܩܪ̈ܳܒܰܝܗܽܘܢ܀

ܐܰܠܳܗܳܐ ܕܚܳܣ ܥܰܠ ܢܺܝܢܘܶܐ ܚܽܘܣ ܥܠܰܝܢ. ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܶܗ ܕܕܳܪܰܢ ܕܰܚܛܳܐ. ܘܶܐܢ ܬܰܪܥܳܟ ܬܶܐܚܽܘܕ ܒܰܐܦܰܝ̈ܢ ܚܰܢܳܢܳܐ ܒܰܬܪܰܥ ܡܰܢ ܢܺܐܙܰܠ ܢܶܩܽܘܫ ܪܳܚܶܡ ܐ̱ܢܳܫܳܐ܀

ܠܰܘ ܡܶܛܽܠ ܕܰܐܘܚܰܪ ܚܰܬܢܳܐ ܢܶܕܡܰܟ ܠܰܢ. ܕܳܐܬܶܐ ܠܶܗ ܘܳܐܚܶܕ ܬܰܪ̈ܥܶܐ ܕܒܶܝܬ ܡܰܠܟܽܘܬܳܐ. ܘܟܽܠ ܐܰܝܢܳܐ ܕܡܰܘܚܰܪ ܘܳܐܬܶܐ ܢܳܩܶܫ ܒܶܗ. ܠܳܐ ܐ̱ܢܳܫ ܡܶܫܟܰܚ ܕܦܳܬܰܚ ܠܶܗ ܕܩܶܢܛܰܐ ܗ̱ܘ ܪܰܒܳܐ܀

ܕܥܰܢܺܝ̈ܕܶܐ: ܠܥܶܠ ܡܶܢ ܫܽܘܦܪ̈ܶܐ ܕܰܥ̈ܢܳܢܶܐ ܡܶܙܕܰܝܰܚ. ܒܰܪ ܡܰܠܟܳܐ ܕܳܐܬܶܐ ܕܢܶܥܒܶܕ ܚܰܝܰܬ ܡܺܝ̈ܬܶܐ. ܫܳܡܥܺܝܢ ܟܺܐܢ̈ܶܐ ܩܳܠ ܩܰܪܢܳܐ ܕܰܩܕܳܡܰܘܗ̱ܝ. ܘܡܶܬܥܰܛܦܺܝܢ ܐܶܤܛܰܠ ܫܽܘܒܚܳܐ ܘܢܳܦܩܺܝܢ ܠܽܐܘܪܥܶܗ܀

ܩܽܘܩܠܺܝܳܘܢ ܚܡܝܫܝܐ H

ܡܳܪܝܳܐ ܫܡܰܥ ܨܠܽܘܬܝ̱ ܗ̄ ܘܰܓܥܳܬܝ̱ ܠܘܳܬܳܟ ܬܶܥܽܘܠܝ̱܀

ܠܳܐ ܬܰܗܦܶܟ ܐܰܦܰܝ̈ܟ ܡܶܢܝ ܒܝܰܘܡܳܐ ܕܽܐܘܠܨܳܢܝ ܗ̄ ܐܶܠܳܐ ܐܰܪܟܶܢ ܠܺܝ ܐܶܕܢܳܟ ܒܝܰܘܡܳܐ ܕܶܐܩܪܶܝܟ ܘܒܰܥܓܰܠ ܥܢܺܝܢܝ܀

ܡܶܛܽܠ ܕܰܓܡܰܪܘ ܒܬܶܢܳܢܳܐ ܝܰܘ̈ܡܰܝ ܗ̄ ܘܓܰܪ̈ܡܰܝ ܚܘܰܪܘ ܐܰܝܟ ܡܰܘ̈ܩܕܶܐ܀

ܚܡܳܐ ܠܶܒܝ ܐܰܝܟ ܥܶܤܒܳܐ ܘܺܝܒܶܫ ܗ̄ ܡܶܛܽܠ ܕܰܛܥܺܝܬ ܡܶܐܟܽܘܠܬܶܗ ܕܠܰܚܡܝ܀

ܫܽܘܒܚܳܐ ܘܥܶܩܒܳܐ:

ܩܰܒܶܠ ܡܳܪܰܢ ܬܶܫܡܶܫܬܰܢ ܘܰܨܠܰܘ̈ܳܬܰܢ. ܐܰܝܟ ܕܡܽܘܫܶܐ ܘܰܐܝܟ ܕܺܐܠܺܝܳܐ. ܘܰܐܝܟ ܕܰܐܗܪܽܘܢ ܟܳܗܢܳܐ ܙܰܗܝܳܐ. ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܐ̱ܚܪܺܢܳܐ: H

ܚܰܕܪܽܘܢܝ ܡܳܡܽܘܠܰܘ̈ܗ̱ܝ ܕܰܬܗܽܘܡܳܐ. ܘܰܩܒܽܘܪܬܳܐ ܟܰܪܤܶܗ ܕܢܽܘܢܳܐ ܤܶܦܩܰܬ ܠܺܝ. ܐܶܢܳܐ ܕܶܝܢ ܓܥܺܝܬ ܒܰܚܢܰܓܬܳܐ ܠܘܳܬܳܟ ܦܳܪܶܩ ܒܢܰܝ̈ܢܳܫܳܐ. ܕܰܦܪܰܩܬ ܘܫܰܘܙܶܒܬܰܢܝ ܝܰܡܺܝܢܳܟ ܪܳܡܬܳܐ ܡܳܪܶܐ ܟܽܠ܀

ܣܶܕܪܳܐ ܕܰܬܝܳܒܽܘܬܳܐ:

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܪܳܡܳܐ ܘܰܡܥܰܠܝܳܐ ܒܺܐܝܬܽܘܬܶܗ ܕܡܶܢ ܚܰܝ̈ܠܰܘܳܬܳܐ ܥܶܠܳܝ̈ܶܐ ܡܶܙܕܰܝܰܚ ܘܡܶܢ ܐܰܪ̈ܥܳܢܳܝܶܐ ܡܶܣܬܓܶܕ ܘܡܶܫܬܰܒܰܚ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ

ܣܶܕܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܘܡܶܬܟܰܫܦܺܝܢܰܢ ܠܳܟ ܕܰܬܒܰܪܶܟ ܠܥܰܒ̈ܕܰܝܟ ܘܣܳܓܽܘܕܰܝ̈ܟ ܗܳܢܽܘܢ ܕܶܐܬܟܰܢܰܫܘ ܒܰܫܡܳܟ ܩܰܕܺܝܫܳܐ ܕܙܰܝܢܳܐ ܪܽܘܚܳܢܳܝܳܐ ܢܶܠܒܫܽܘܢ ܘܚܽܘܒܳܐ ܘܰܐܘܝܽܘܬܳܐ ܢܶܬܥܰܛܦܽܘܢ. ܠܒܺܝܫܳܐ ܘܰܠܚܰܝܠܶܗ ܢܶܙܟܽܘܢ. ܘܥܰܠ ܦܳܬܽܘܪܳܐ ܕܺܝܠܳܟ ܪܽܘܚܳܢܳܝܳܐ ܢܶܬܒܰܣܡܽܘܢ. ܚܰܣܳܐ ܚܰܘܒܰܝ̈ܗܽܘܢ ܫܒܽܘܩ ܒܽܘܨܳܪ̈ܰܝܗܽܘܢ ܘܰܐܥܒܰܪ ܣܰܟ̈ܠܘܳܬܗܽܘܢ ܒܣܽܘܓܳܐܐ ܕܪ̈ܰܚܡܰܝܟ. ܘܫܽܘܒܚܳܐ ܘܪܽܘܡܪܳܡܳܐ ܢܰܣܶܩ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܠܐ ܒܩ̄: ܡܫܰܠܶܡ ܢܽܘܗܪܶܗ H

ܦܶܬܓܳܡܳܐ: ܡܳܐ ܛܳܒ ܘܡܳܐ ܫܰܦܺܝܪ: ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ ܫܰܡܠܳܐ ܥܰܡܰܢ ܛܰܝܒܽܘܬܳܟ. ܘܒܰܛܶܠܳܝܗ̱ܝ ܠܒܺܝܫܳܐ ܡܶܢܰܢ ܕܟܽܠ ܫܳܥ ܦܰܚ̈ܶܐ ܨܳܠܶܐ ܠܰܢ. ܨܠܺܝܒܳܟ ܢܶܗܘܶܐ ܡܢܰܛܪܳܢܰܢ ܘܰܡܤܰܬܪܳܢܰܢ ܒܠܺܠܝܳܐ ܘܒܺܐܝܡܳܡܳܐ܀

ܢܒܰܪܟܰܢ ܘܢܰܢܗܰܪ ܐܰܦܰܘ̈ܗ̱ܝ ܒܰܢ: ܒܪܺܝܟ ܪܰܡܫܳܟ ܕܰܡܟܰܢܶܫ ܠܰܢ. ܘܰܨܠܺܝܒܳܟ ܕܰܡܢܰܛܰܪ ܠܰܢ. ܒܪܺܝܟܳܐ ܗ̱ܝ ܝܰܡܺܝܢܳܟ ܡܳܪܰܢ ܕܰܠܤܳܗ̈ܕܶܐ ܟܠܺܝ̈ܠܶܐ ܓܶܕܠܰܬ. ܘܚܰܝܠܰܬ ܐܶܢܽܘܢ ܒܰܐܓܽܘܢܳܐ ܘܓܶܕܠܰܬ ܤܳܡܰܬ ܟܠܺܝ̈ܠܶܐ ܒܪ̈ܺܝܫܰܝܗܽܘܢ܀

ܫܽܘܒܚܳܐ: ܩܪܳܟ ܐܺܝܽܘܒ ܡܶܢ ܩܺܝܩܰܠܬܳܐ ܘܕܳܢܺܝܐܝܶܠ ܡܶܢ ܓܰܘ ܓܽܘܒܳܐ. ܬܠܳܬܳܐ ܩܪܰܐܽܘܟ ܒܰܐܬܽܘܢܳܐ ܘܡܶܢ ܢܽܘܪܳܐ ܦܰܨܺܝܬ ܐܶܢܽܘܢ. ܘܰܚܢܰܢ ܡܚܺܝ̈ܠܶܐ ܘܚܰܛܳܝ̈ܶܐ ܩܳܪܶܝܢܰܢ ܠܳܟ ܐܶܬܪܰܚܰܡܥܠܰܝܢ܀

ܡܶܢ ܥܳܠܰܡ: ܗܳܐ ܨܳܝܬܺܝܢ ܥܺܝܪ̈ܰܝ ܪܰܘܡܳܐ. ܠܩܳܠ ܬܶܫܡܶܫܬܳܐ ܕܰܐܪ̈ܥܳܢܶܐ. ܘܳܐܡܪܺܝܢ ܟܡܳܐ ܒܰܤܺܝܡ ܩܳܠܳܐ. ܕܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ. ܕܰܒܟܶܢܳܪ̈ܶܐ ܪ̈ܽܘܚܳܢܶܐ ܙܳܡܪܺܝܢ ܫܽܘܒܚܳܐ ܘܡܰܤܩܺܝܢ ܬܰܘܕܺܝܬܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ H

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ: ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܡܳܪܝܳܐ ܡܳܪܰܢ ܡܳܪܳܐ ܕܥܺܝܪ̈ܶܐ ܘܰܕܡܰܠܰܐܟ̈ܶܐ. ܫܡܰܥ ܒܳܥܽܘܬܳܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܡܳܪܝ ܘܰܥܠܰܝ ܚܽܘܣ ܘܺܐܚܶܐ ܒܪ̈ܰܚܡܶܐ ܕܡܶܢ ܝܰܡܺܝܢܳܟ: ܘܠܳܐ ܐܶܫܬܰܢܰܩ ܐܰܝܟ ܥܰܬܺܝܪܳܐ ܒܓܰܘ ܓܺܗܰܢܳܐ. ܒܶܐܠܦܳܐ ܕܡܰܝ̈ܳܐ ܠܝܰܡܳܐ ܕܢܽܘܪܳܐ ܗܰܒܠܺܝ ܕܶܐܥܒܰܪ: ܘܠܳܐ ܢܟܽܘܡ ܥܠܰܝ ܐܰܬܪܳܐ ܥܰܤܩܳܐ ܕܫܰܠܗܶܒܺܝܬܳܐ܀

ܡܰܥܡܽܘܕܺܝܬܳܐ ܬܤܰܬܪܰܢܝ ܬܰܡܳܢ ܡܶܢ ܝܰܩܕܳܢܳܐ: ܘܬܶܦܪܽܘܤܝ ܟܶܢܦܶܝ̈ܗ̇ ܥܰܠ ܓܰܘܙܰܠܬܳܐ ܡܳܐ ܕܥܳܒܰܪ ܐ̱ܢܳܐ. ܗܳܕܶܐ ܡܥܺܝܢܳܐ ܕܡܰܝ̈ܳܐ ܚܰܝ̈ܶܐ ܬܶܬܠܰܘܶܐ ܠܺܝ: ܘܠܳܐ ܡܳܪܝ ܐܶܗܘܶܐ ܤܢܺܝܩܳܐ ܬܰܡܳܢ ܒܶܝܬ ܨܰܗܘܳܢ̈ܶܐ܀

ܠܳܐ ܡܳܪܝ ܐܶܒܥܶܐ ܡܰܝ̈ܳܐ ܬܰܡܳܢ ܡܶܢ ܐܰܒܪܳܗܳܡ: ܕܶܐܬܢܰܤܝܰܬ ܠܳܗ̇ ܕܰܐܝܢܳܐ ܕܫܳܐܶܠ ܠܳܐ ܝܳܗܒܺܝܢ ܠܶܗ. ܘܶܐܢ ܢܳܦܠܳܐ ܠܺܝ ܐܽܘܪܚܳܐ ܠܢܽܘܪܳܐ ܒܥܰܘܠܳܐ ܕܺܐܝ̈ܕܰܝ: ܐܶܚܙܶܝܟ ܬܰܡܳܢ ܐܰܝܟ ܚܰܢܰܢܝܳܐ ܠܰܪܒܺܝܥܳܝܳܐ܀

ܢܫܰܒܚܳܟ ܠܶܫܳܢܝ ܥܰܡ ܕܰܛܠܳܝ̈ܶܐ ܕܒܶܝܬ ܚܰܢܰܢܝܳܐ: ܘܢܰܘܕܶܐ ܠܳܟ ܦܽܘܡܝ ܥܰܡ ܕܳܢܺܝܐܝܶܠ ܡܶܢ ܓܰܘ ܓܽܘܒܳܐ. ܡܶܢ ܬܰܫܢܺܝܩܶܗ ܕܗܰܘ ܥܰܬܺܝܪܳܐ ܦܰܨܳܐ ܠܰܢ ܡܳܪܝ: ܘܥܰܡ ܠܳܥܳܙܳܪ ܗܰܘ ܡܶܤܟܺܢܳܐ ܫܽܘܒܚܳܟ ܢܶܙܡܰܪ܀

ܡܫܺܝܚܳܐ ܕܫܰܠܺܝܛ ܥܰܠ ܡܰܠܟܽܘܬܳܐ ܘܥܰܠ ܓܺܗܰܢܳܐ. ܡܶܢ ܓܺܗܰܢܳܐ ܦܰܨܳܐ ܠܰܢ ܡܳܪܝ ܘܪܰܚܶܡܥܠܰܝܢ܀

ܡܳܪܰܢ ܝܶܫܽܘܥ ܡܫܺܝܚܳܐ

ܡܳܪܰܢ ܝܶܫܽܘܥ ܡܫܺܝܚܳܐ: ܬܰܪܥܳܐ ܕܪܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܆ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬܪܰܚܰܡܥܠܰܝܢ܀

ܚܽܘܒܳܟ ܐܰܚܬܳܟ ܡܶܢ ܐܰܬܪܳܟ ܨܶܐܕܰܝܢ ܡܳܪܝ܆ ܕܰܒܝܰܕ ܡܰܘܬܳܟ ܐܶܬܒܰܛܠܰܬ ܡܺܝܬܽܘܬܰܢ ܐܶܬܪܰܚܰܡܥܠܰܝܢ܀

ܩܰܕܺܝܫܰܬ ܐܰܠܗܳܐ. ܩܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܰܘ̈ܳܬܳܐ ܕܡܶܨܛܰܠܝܳܢ ܒܚܰܪܰܬ݀ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.

ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.

ܢܚܶܬ̣ ܡܶܢ ܫܡܰܝܳܐ ܘܶܐܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܶܐܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.

ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.

ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀

ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ̣ ܗ̄ܘܗ̄ ܘܡܰܠܟܬ̣ܳܐ ܡܶܢ ܝܰܡܺܝܢܳܟ܀

ܘܰܛܥܳܝ ܥܰܡܶܟ̣ܝ̱ ܘܒܶܝܬ̣ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓ̣ܪܰܓ̣ ܡܰܠܟܳܐ ܠܫܽܘܦܪܶܟ̣ܝ̱܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܩܰܪܶܒܝ̱ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬ̣ܰܢ܇ ܘܰܨܠܽܘܬ̣ܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬ̣ܰܢ܀

ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬ̣ܽܘܠܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ̣ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬ̣ܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀

ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܝܳܠܕܰܬ ܐܰܠܳܗܳܐ

ܗܰܘ ܪܺܝܫ ܡܰܠܰܐܟ̣̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ̣ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟ̣ܝ̱ ܘܡܶܢܶܟ̣ܝ̱ ܕܳܢܰܚ܀

ܫܽܘܒܚܳܐ: ܐܶܠܦܳܐ ܗܘܳܬ̣ ܡܰܪܝܰܡ܇ ܛܶܥܢܰܬ̣ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬ̣ܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀

ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ

ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀

ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ܘܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀

ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ

ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀

ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀

ܫܠܳܡ ܠܶܟܝ

ܫܠܳܡ ܠܶܟ̣ܝ ܒܬ̣ܽܘܠܬܳܐ ܡܰܪܝܰܡ ܡܰܠܝܰܬ̣ ܛܰܝܒܽܘܬ̣ܳܐ. ܡܳܪܰܢ ܥܰܡܶܟܝ. ܡܒܰܪܰܟ̣ܬܳܐ ܐܰܢ̱ܬܝ ܒܢܶܫ̈ܶܐ. ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟ̣ܝ̱. ܡܳܪܰܢ ܝܶܫܽܘܥ. ܐܳܘ ܩܰܕܺܝܫܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ. ܨܰܠܳܝ ܚܠܳܦܰܝܢ ܚܰܛܳܝ̈ܶܐ. ܗܳܫܳܐ ܘܰܒܫܳܥܰܬ ܘܡܰܘܬܰܢ ܐܰܡܺܝܢ܀