ܕܐܪܒܥܝܢ ܣܗ̈ܕܐ
ܩܝܢܬܐ ܚ
ܦܬܓܡܐ:
ܥܳܒܶܕ ܕܺܝ̣ܢܳܐ ܠܰܛܠܺܝ̣̈ܡܶܐ ܘܝܳܗܶܒ ܠܰܚܡܳܐ ܠܟܰܦ̈ܢܶܐ ܗ̄܀
ܨܠܽܘܬܟܽܘܢ ܥܰܡܰܢ ܐܰܪܒܥܺܝܢ ܣܳܗ̈ܕܶܐ ܨܠܽܘܬܟܽܘܢ ܥܰܡܰܢ: ܠܰܨ̈ܠܰܘܳܬܟܽܘܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀
ܒܰܨ̈ܠܰܘܳܬܟܽܘܢ ܡܳܪܝܳܐ ܢܒܰܛܶܠ ܫܰܒܛܳܐ ܕܪܰܘܓܙܳܐ: ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܽܘܢ ܒܗܰܝܡܳܢܽܘܬܳܐ܀
ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ - H
ܐܰܪܒܥܺܝܢ ܓܰܒܪ̈ܶܐ ܓܰܢ̱ܒܳܪ̈ܶܐ ܢܰܚܫܺܝܪ̈ܬܳܢܶܐ. ܩܪܳܒܳܐ ܥܒܰܕܘ̱ ܥܰܡ ܣܳܛܳܢܳܐ ܒܝܰܡܬܳܐ ܕܣܶܒܰܣܛܺܝ. ܒܳܐܕܳܪ ܝܰܪܚܳܐ ܒܡܰܝ̈ܳܐ ܫܕܰܘ ܐܶܢܽܘܢ. ܘܰܢܚܶܬܘ̱ ܓܠܺܝ̈ܕܶܐ ܘܒܰܙܰܥܘ̱ ܦܰܓܪ̈ܰܝܗܽܘܢ. ܘܰܪܕܳܐ ܕܶܡܗܽܘܢ ܥܰܠ ܐܰܪܥܳܐ ܐܰܝܟ ܩܽܘܪ̈ܒܳܢܶܐ. ܘܩܰܒܶܠܬܶܗ ܥܺܕܰܬ ܩܽܘܕܫܳܐ ܘܩܰܪܶܒܬܶܗ ܠܡܰܕܒܚܳܐ ܗ̄ ܨܠܽܘܬܗܽܘܢ ܬܥܰܕܰܪܝ ܠܰܢ܀
ܒܬܪ ܐܘܢܓܠܝܘܢ ܐ̱ܚܪܺܢܳܐ ܒܩ̄: ܩܽܘܩܳܝܳܐ - H
ܡܶܢ ܚܰܡܪܳܐ ܥܨܺܝܪ ܓܳܓܽܘܠܬܳܐ: ܪܘܺܝܘ ܣܳܗ̈ܕܶܐ ܐܰܪܒܥܺܝܢ: ܘܰܒܢܽܘܪ ܚܽܘܒܶܗ ܕܰܡܫܺܝܚܳܐ ܪ̈ܽܘܚܳܬܗܽܘܢ ܐܶܫܬܓܰܪ̈ܝ. ܢܚܶܬܘ̱ ܠܓܰܘ ܝܰܡܬܳܐ: ܘܰܐܣܺܝܦܘ̱ ܠܰܓܠܺܝܕܳܐ ܡܙܰܓ ܒܡܶܝ̈ܗ ܕܶܡܗܽܘܢ. ܘܚܳܒ ܥܽܘܙܳܐ ܕܥܰܪܝܳܐ. ܐܰܩܶܬܘ̱ ܚܰܘܪܳܐ ܠܰܫܡܰܝܳܐ. ܘܰܩܥܰܘ ܟܰܕ ܐܳܡܪܺܝܢ: ܡܶܛܽܠܳܬܳܟ ܡܳܝܬܺܝܢܰܢ ܝܶܫܽܘܥ ܡܰܚܝܳܢܰܢ ܗ̄ܘܗ̄܀
ܠܘܛܢܝܐ ܒܩ̄: ܢܶܩܝܳܐ ܗܘܺܝܬ - H
ܠܶܒܫܰܬ ܪܽܘܚܳܐ ܩܰܕܺܝܫܳܐ: ܓܽܘܕܳܐ ܗܳܝ ܕܰܐܪܒܥܺܝܢ ܪܚܺܝܡܬܳܐ: ܘܕܰܪܳܐ ܣܶܕܪܰܬ ܥܰܡ ܒܺܝܫܳܐ. ܒܶܝܬ ܓܰܠ̈ܠܶܐ ܫܓܺܝ̈ܫܶܐ ܕܝܰܡܬܳܐ܀
ܡܳܐ ܒܪ̈ܺܝܟܺܝܢ ܝܰܡܬܳܐ ܫܶܦܥܰܝ̈ܟܝ̱: ܕܒܰܕܡܳܐ ܕܙܰܟܳܝ̈ܶܐ ܨܒܺܝܥܺܝܢ: ܘܰܟܡܳܐ ܩܰܕܺܝܫܺܝܢ ܣܳܦܪ̈ܰܝܟܝ: ܕܰܒܓܰܪ̈ܡܶܐ ܕܣܳܗ̈ܕܶܐ ܩܒܺܝܥܺܝܢ܀
ܒܓܰܘ ܥܽܘܒܶܟܝ̱ ܟܰܘ̈ܟܒܶܐ ܐܰܙܠܶܓܘ̱: ܒܠܺܠܝܳܐ ܕܩܽܘܪܳܐ ܘܥܰܡܛܳܢܳܐ: ܘܰܒܪܰܘܡܶܟܝ̱ ܒܗܶܕܪܳܐ ܐܰܦܪܶܓܘ̱: ܟܠܺܝ̈ܠܶܐ ܐܰܪܒܥܺܝܢ ܕܢܶܨܚܳܢܳܐ܀
ܫܽܘܒܚܳܐ ܠܡܳܪܳܐ ܕܰܗ̈ܘܰܝܳܐ: ܕܝܰܗܒ ܚܰܝܠܶܗ ܒܣܳܗ̈ܕܶܐ ܐܰܪܒܥܺܝܢ. ܘܰܗܘܰܘ ܠܶܗ ܡܳܐܢ̈ܶܐ ܓܒܰܝ̈ܳܐ: ܕܚܰܝ̈ܠܶܐ ܘܳܐܣ̈ܘܳܬܳܐ ܡܰܒܥܺܝܢ܀
ܚܘܬܡܐ ܒܩ̄: ܝܰܘܢܳܐ ܛܠܺܝܬܳܐ - H
ܒܰܟܠܺܝܠܰܝ̈ܟܽܘܢ ܚܳܐܰܪ ܐ̱ܢܳܐ. ܒܚܰܫܰܝ̈ܟܽܘܢ ܡܶܬܒܰܩܶܐ ܐ̱ܢܳܐ. ܒܫܶܢ̈ܕܶܐ ܕܣܰܝܒܰܪܘ̱ ܦܰܓܪ̈ܰܝܟܽܘܢ. ܬܳܗܰܪ ܐ̱ܢܳܐ ܘܡܶܬܕܰܡܰܪ ܐ̱ܢܳܐ. ܠܗܰܘ ܚܰܝܠܳܐ ܟܰܣܝܳܐ ܘܙܰܝܢܳܐ ܚܰܣܺܝܢܳܐ ܛܳܒ ܡܶܬܟܰܫܰܦ ܐ̱ܢܳܐ. ܕܗܽܘ ܢܰܥܬܰܪ ܟܶܢܳܪܝ ܕܶܐܙܡܰܪ ܫܰܪ̈ܒܰܝܟܽܘܢ. ܒܪܺܝܟ ܗܽܘ ܕܚܰܝܶܠܟܽܘܢ. ܘܰܐܘܪܶܒ ܕܽܘܟܪܳܢܟܽܘܢ. ܒܰܫܡܰܝܳܐ ܘܒܰܐܪܥܳܐ. ܣܳܗ̈ܕܶܐ ܢܰܨܺܝ̣̈ܚܶܐ܀