ܩܝܢܬܐ ܒ

ܦܬܓܡܐ:

ܩܳܠܶܗ ܕܡܳܪܝܳܐ ܥܰܠ ܡܰܝ̈ܳܐ܇ ܐܰܠܳܗܳܐ ܡܫܰܒܚܳܐ ܪܥܶܡ ܗ̄܀

ܬܒܪܬ‌ܐ:

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ̱ ܥܺܕܬܳܐ - H

ܛܳܣܰܬ ܪܽܘܚܳܐ: ܒܶܐܒܪ̈ܶܐ ܫܒܺܝ̈ܚܶܐ ܡܶܢ ܪܰܘܡܳܐ. ܘܥܰܠ ܪܺܝܫܶܗ ܕܰܒܪܳܐ ܫܶܟܢܰܬ: ܘܰܐܝܟ ܕܰܒܨܶܒܥܳܐ ܚܰܘܝܰܬܶܗ. ܘܩܳܠܳܐ ܐܶܬܳܐ ܡܶܢ ܪܰܘܡܳܐ ܕܗܳܢܰܘ ܒܶܪܝ̱ ܘܗܳܢܰܘ ܚܰܒܺܝܒܝ̱. ܒܪܺܝܟ ܕܰܥܡܰܕ ܟܰܕ ܠܳܐ ܣܢܺܝܩ ܗܘܳܐ: ܘܩܰܕܶܫ ܠܰܢ ܡܰܥܡܽܘܕܺܝܬܳܐ. ܕܒܳܗ̇ ܢܶܗܘܶܐ ܠܰܐܒܳܐ ܒܢܰܝ̈ܳܐ. ܘܝܳܪ̈ܽܘܬܶܐ ܕܡܰܠܟܽܘܬ ܪܰܘܡܳܐ܀

ܠܘܛܢܝܐ ܒܩ̄: ܠܟܽܘܢ ܛܽܘܒܰܝܟܽܘܢ - H

ܬܶܗܪܳܐ ܐܶܚܰܕ ܠܒܰܪ ܥܰܩܪܽܘܬܳܐ: ܟܰܕ ܚܙܳܐ ܠܝܶܫܽܘܥ ܒܰܝܢܳܬ ܥܰܡܳܐ: ܩܥܳܐ ܗܳܢܰܘ ܒܪܳܐ ܕܰܐܠܳܗܽܘܬܳܐ: ܘܶܐܡܪܳܐ ܫܳܩܶܠ ܚܛܺܝ̣ܬܶܗ ܕܥܳܠܡܳܐ܀

ܟܽܠ ܡܰܒܽܘ̈ܥܶܐ ܘܥܰܝ̈ܢܳܬܳܐ ܪܬܰܚܘ: ܟܰܕ ܢܚܶܬ ܡܳܪܰܢ ܠܡܶܨܥܰܬ ܡܰܝ̈ܳܐ. ܘܡܶܚܕܳܐ ܕܰܣܠܶܩ ܫܡܰܝ̈ܳܐ ܐܶܬܦܬܰܚܘ: ܘܢܳܕܘ̱ ܡܶܢ ܬܶܗܪܳܐ ܟܽܠܗܽܘܢ ܒܪ̈ܰܝܳܐ܀

ܕܰܨܡܰܚܘ ܒܰܗܪܳܐ ܐܶܬܬܙܺܝܥܘ ܬܗܽܘ̈ܡܶܐ: ܘܰܗܦܰܟܘ ܠܒܶܣܬܪܳܐ ܒܙܰܘܥܳܐ ܪܗܺܝܒܳܐ. ܘܩܳܠܶܗ ܕܰܐܒܳܐ ܗܘܳܐ ܡܶܢ ܡܪ̈ܰܘܡܶܐ: ܕܳܐܡܰܪ ܗܳܢܰܘ ܒܶܪܝ̱ ܚܰܒܺܝܒܳܐ܀

ܒܪܺܝܟ ܗ̱ܘ ܕܰܐܢܗܰܪ ܬܗܽܘ̈ܡܶܐ ܕܢܰܗܪܳܐ: ܟܰܕ ܪܰܒܽܘܬܶܗ ܙܺܝܘܳܗ̇ ܚܰܘܝܰܬ. ܒܪܺܝܟ ܕܰܣܓܶܕܘ ܠܶܗ ܟܰܘܟ̈ܒܶܐ ܘܣܰܗܪܳܐ: ܟܰܕ ܥܰܠ ܪܺܝܫܶܗ ܪܽܘܚܳܐ ܩܰܘܝܰܬ܀

ܚܘܬܡܐ ܒܩ̄: ܐܳܘ ܥܽܘܡܪܳܐ ܕܙܰܒܢܳܐ - H

ܩܳܡ ܥܰܠ ܝܰܕ ܢܰܗܪܳܐ: ܡܳܪܳܐ ܕܝܰܡ̱̈ܡܶܐ ܘܥܰܝ̈ܢܳܬܳܐ. ܗܦܰܟ ܝܽܘܪܕܢܳܢ ܠܒܶܣܬܪܳܐ: ܘܝܰܗܒ ܐܰܬܪܳܐ ܠܰܒܪܳܐ ܕܢܶܣܚܶܐ. ܡܳܐ ܬܡܺܝܗ ܗܽܘ ܚܶܙܘܳܐ: ܕܪܽܘܚܳܐ ܛܳܝܣܳܐ ܐܰܝܟ ܝܰܘܢܳܐ. ܘܰܐܒܳܐ ܡܶܢ ܪܰܘܡܳܐ: ܕܩܳܥܶܐ ܗܳܢܰܘ ܒܶܪܝ ܚܰܒܺܝܒܝ̱܀