ܩܝܢܬܐ ܓ

ܦܬܓܡܐ:

ܐܰܢܬ ܒܥܽܘܫܢܳܟ ܦܪܰܫܬ ܝܰܡܳܐ: ܘܪܰܨܶܨܬ ܪ̈ܺܝܫܰܝܗܽܘܢ ܕܬܰܢܝ̣̈ܢܶܐ ܒܡܰܝ̈ܐ ܗ̄܀

ܬܒܪܬ‌ܐ:

ܒܪܳܐ ܕܒܰܥܡܳܕܗ ܦܰܪܩܳܗ̇ ܠܥܺܕܬܗ ܡܶܢ ܛܳܥܝܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠܕ̈ܝܗ̇ ܒܰܥܡܳܕܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫܡܰܝ̈ܢܶܐ ܘܠܐܰܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠܕܶܝ̈ܗ̇ ܒܰܥܡܳܕܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܠܳܟ ܡܳܪܝܳܐ ܩܳܪܝܢܰܢ

ܒܥܰܝܢܳܐ ܕܰܢܒܺܝܽܘܬܳܐ ܚܙܳܐ ܒܰܪ ܐܺܝܫܰܝ. ܠܰܡܫܺܝܚܳܐ ܕܶܐܬܳܐ ܕܢܶܥܡܰܕ ܒܓܰܘ ܝܽܘܪܕܢܳܢ ܢܰܗܪܳܐ. ܬܗܰܪ ܡܶܢ ܙܺܝܘܶܗ ܡܫܰܒܚܳܐ ܘܫܰܪܺܝ ܩܳܥܶܐ. ܚܙܰܐܽܘܟ ܡܰܝ̈ܳܐ ܐܰܠܳܗܳܐ. ܚܙܰܐܽܘܟ ܘܶܐܣܬܰܪܰܕ. ܘܰܥܢܳܢ̈ܶܐ ܙܪ̈ܰܦܝ ܗܘܰܝ̈ ܡܶܢ ܛܰܠܳܟ: ܘܰܬܗܽܘ̈ܡܶܐ ܐܶܬܬܙܺܝܥܘ ܡܶܢ ܩܽܘܕܡܰܝܟ. ܘܝܰܗܒܘ̱ ܩܳܠܳܐ ܫܡܰܝ̈ ܫܡܰܝ̈ܳܐ. ܫܽܘܒܚܳܐ ܠܫܳܠܽܘܚܳܟ܀

ܠܘܛܢܝܐ ܒܩ̄: ܠܡܕܝܚ ܐܠܪܒ

ܐܰܠܳܗ ܟܽܘܠܳܐ ܫܦܰܪ ܠܶܗ ܘܓܰܒܠܰܢ: ܒܕܽܘܡܝܳܐ ܕܨܰܠܡܶܗ ܦܰܐܝܳܐ. ܚܣܰܡ ܒܰܢ ܒܺܝܫܳܐ ܘܰܢܦܰܠ ܚܰܒܠܰܢ: ܒܰܣܝܳܢ ܡܽܘܡ̈ܶܐ ܣܢܰܝ̈ܳܐ܀

ܘܡܳܪܰܢ ܒܰܣܚܳܬ ܡܰܝ̈ܳܐ ܡܰܪܩܰܢ: ܘܥܰܒܕܰܢ ܠܰܐܒܽܘܗܝ ܒܢܰܝ̈ܳܐ. ܘܰܒܝܰܕ ܕܶܒܚܶܗ ܚܰܝܳܐ ܦܰܪܩܰܢ: ܘܰܠܡܰܠܟܽܘܬܶܗ ܩܪ̈ܰܝܳܐ܀

ܡܶܢ ܥܰܬܺܝ̣̈ܩܶܐ ܚܰܕ̈ܬܶܐ ܗܘܰܝܢܰܢ: ܒܝܰܠܕܳܐ ܕܡܶܢ ܓܰܘ ܡܰܝ̈ܳܐ. ܘܣܰܒܪܳܐ ܛܳܒܳܐ ܕܚܰܝ̈ܶܐ ܩܢܰܝܢܰܢ: ܒܡܶܐܟܰܠ ܦܰܓܪܶܗ ܚܰܝܳܐ܀

ܒܪܺܝܟ ܒܰܪ ܛܳܒܳܐ ܕܰܐܪܟܶܢ ܫܽܘܒܚܶܗ: ܘܶܐܬܳܐ ܕܢܶܒܕܽܘܩ ܠܕܺܝܠܶܗ. ܒܪܺܝܟܺܝܢ ܪ̈ܰܚܡܰܘܗܝ ܕܰܒܝܰܕ ܕܶܒܚܶܗ: ܚܰܣܺܝ ܠܥܳܠܡܳܐ ܟܽܠܶܗ܀

ܚܘܬܡܐ ܒܩ̄: ܐܰܒܳܐ ܟܬܰܒ ܗ̱ܘܐ

ܬܶܗܪܳܐ ܪܰܒܳܐ ܘܕܽܘܡܳܪܳܐ. ܚܙܺܝܬ ܐܰܚܰܝ̈ ܥܰܠ ܝܽܘܪܕܢܳܢ ܢܰܗܪܳܐ. ܐܰܒܳܐ ܟܰܕ ܩܳܥܶܐ. ܘܰܒܪܳܐ ܟܰܕ ܥܳܡܶܕ. ܘܪܽܘܚܳܐ ܕܩܽܘܕܫܳܐ ܐܰܝܟ ܝܰܘܢܳܐ. ܢܶܚܬܰܬ ܗܘܳܬ ܘܥܰܠ ܪܺܝܫܶܗ ܫܶܟܢܰܬ܀