ܘܥܰܠ ܐܰܒܓܰܪ ܡܰܠܟܳܐ

ܩܝܢܬܐ ܚ

ܦܬܓܡܐ:

ܚܽܘܪ ܠܘܳܬܶܗ ܘܣܰܒܰܪܘ ܒܶܗ. ܘܰܐܦܰܝ̈ܟܽܘܢ ܠܳܐ ܢܰܚܦܪ̈ܳܢ ܗ̄܀

ܬܒܪܬ‌ܐ:

ܒܪܳܐ ܕܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠ̈ܕܶܝܗ̇ ܒܰܨܠܺܝܒ ܢܽܘܗܪܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܨܠܺܝܒ ܢܽܘܗܪܳܐ܀

ܒܬܪ ܐܘܢܓܠܝܘܢ ܒܩ̄: ܐܶܢܳܐ ܐܢܳܐ ܢܽܘܗܪܳܐ - H

ܩܒܰܥ ܡܽܘܫܶܐ ܚܶܘܝܳܐ ܕܰܢܚܳܫܳܐ. ܠܳܐܣܝܽܘܬܳܐ ܕܥܰܡܳܐ ܒܕܰܒܪܳܐ. ܕܛܽܘܦܣܳܐ ܪܫܰܡ ܕܦܳܪܽܘܩܰܢ ܕܶܐܬܬܠܺܝ ܒܰܨܠܺܝܒܳܐ ܠܦܽܘܪܩܳܢ ܥܳܠ̈ܡܶܐ. ܚܶܘܝܳܐ ܕܺܐܝܬܰܘܗܝ ܗܘܳܐ ܛܽܘܦܣܳܐ: ܐܰܣܺܝ ܢܽܘܟ̈ܬܳܬ ܚܘܰܘ̈ܳܬܳܐ: ܘܰܨܠܺܝܒܳܐ ܚܰܝܳܐ ܕܝܶܫܽܘܥ. ܡܰܐܣܶܐ ܠܦܰܓܪ̈ܶܐ ܘܢܰܦ̈ܫܳܬܳܐ: ܡܶܢ ܢܽܘܟ̈ܬܳܬ ܒܺܝܫܳܐ ܘܡܰܘܬܳܐ܀

ܠܘܛܢܝܐ ܒܩ̄: ܢܶܩܝܳܐ ܗܘܺܝܬ - H

ܒܨܰܘܡܳܐ ܡܶܙܕܰܗܝܳܐ ܢܰܦܫܳܐ: ܘܩܳܢܝܳܐ ܓܶܦ̈ܶܐ ܪ̈ܽܘܚܳܢܶܐ. ܘܰܒܛܰܝܒܽܘܬܳܐ ܡܶܬܩܰܕܫܳܐ: ܘܣܳܠܩܳܐ ܚܳܠܛܳܐ ܒܢܽܘܪ̈ܳܢܶܐ܀

ܢܰܥܺܝܪ ܢܰܦܫܰܢ ܚܰܒܺܝ̣̈ܒܰܝ: ܒܗܳܢܳܐ ܨܰܘܡܳܐ ܩܰܕܺܝܫܳܐ. ܘܢܶܬܚܰܦܰܛ ܥܰܠ ܦܽܘܠܚܳܢܳܐ: ܘܛܳܒ̈ܳܬܳܐ ܢܶܣܰܒ ܢܺܝܫܳܐ܀

ܒܨܰܘܡܳܐ ܢܨܰܚܘ̱ ܟܺܐܢ̈ܶܐ ܩܰܕ̈ܡܶܐ: ܘܶܐܫܬܰܘܙܰܒܘ̱ ܡܶܢ ܐܽܘܠ̈ܨܳܢܶܐ. ܘܨܳܡ ܦܳܪܽܘܩܰܢ ܟܰܕ ܠܳܐ ܣܢܺܝܩ: ܘܶܐܬܢܰܨܰܚ ܥܰܠ ܢܶܣܝܽܘ̈ܢܶܐ܀

ܡܫܺܝܚܳܐ ܕܰܢܚܶܬ ܡܶܢ ܪܰܘܡܳܐ: ܘܰܒܨܰܘܡܶܗ ܙܟܳܐ ܠܪܳܡܽܘܬܳܐ. ܚܰܝܶܠ ܠܰܢ ܕܰܢܨܽܘܡ ܨܰܘܡܳܐ: ܕܰܡܪܰܥܶܐ ܠܰܐܠܳܗܽܘܬܳܐ܀

ܚܘܬܡܐ ܒܩ̄: ܒܬܰܪܥܳܟ ܡܳܪܰܢ - H

ܡܳܐ ܩܰܠܺܝܠ ܓܶܦ̈ܶܐ ܕܨܰܘܡܳܐ: ܕܰܠܥܰܦܪ̈ܳܢܶܐ ܡܰܦܪܰܚ ܠܰܫܡܰܝܳܐ. ܕܟܽܠ ܨܰܝܳܡܳܐ ܕܠܳܐ ܚܳܠܶܛ ܙܺܐܦܳܐ ܒܨܰܘܡܶܗ ܥܰܡ ܪ̈ܽܘܚܳܢܶܐ ܡܶܬܚܰܠܰܛ. ܘܒܰܓܢܽܘܢ ܢܽܘܗܪܳܐ ܙܳܡܰܪ ܬܶܫܒܽܘܚܬܳܐ܀