ܩܝܢܬܐ ܗ

ܦܬܓܡܐ:

ܢܶܚܕܶܐ ܛܽܘܪܳܐ ܕܨܶܗܝܽܘܢ: ܘܰܢܕܽܘ̈ܨܳܢ ܒ̈ܢܳܬ ܝܺܗܽܘܕܳܐ ܗ̄܀

ܬܒܪܬ‌ܐ:

ܨܠܽܘܬܟܶܝܢ ܥܰܡܰܢ ܩܰܕܺܝ̈ܫܳܬܳܐ ܨܠܽܘܬܟܶܝܢ ܥܰܡܰܢ: ܠܰܨ̈ܠܰܘܳܬܟܶܝܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܨ̈ܠܰܘܳܬܟܶܝܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ: ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܶܝܢ ܒܗܰܝܡܳܢܽܘܬܳܐ܀

ܒܬܪ ܐܘܢܓܠܝܘܢ ܒܩ̄: ܙܳܕܶܩ ܕܢܶܗܘܶܐ - H

ܠܛܽܘܪܳܐ ܕܝܺܗܽܘܕ: ܒܛܺܝܠܳܐܝܺܬ ܣܶܠܩܰܬ ܡܰܪܝܰܡ ܠܘܳܬ ܐܶܠܺܝܫܒܰܥ: ܘܰܛܥܺܝܢܳܐ ܗܘܳܬ: ܒܥܽܘܒܳܗ̇ ܕܰܟܝܳܐ ܠܰܡܫܺܝܚܳܐ ܦܳܪܶܩ ܥܳܠ̈ܡܶܐ. ܕܳܨ ܝܽܘܚܰܢܳܢ ܠܰܫܠܳܡܳܐ ܕܡܳܪܶܗ. ܘܰܩܥܳܬ ܣܳܒܬܳܐ ܒܪܽܘܚܳܐ ܟܰܕ ܐܳܡܪܳܐ: ܒܪܺܝܟܰܬܝ̱ ܒܢܶܫ̈ܶܐ: ܘܰܒܪܺܝܟ ܦܺܐܪܳܐ ܕܰܒܟܰܪܣܶܟܝ̱: ܡܶܢ ܐܰܝܡܶܟܳܐ ܠܺܝ ܗܳܕܶܐ: ܕܡܳܪܝ ܘܶܐܡܶܗ ܢܺܐܬܽܘܢ ܨܶܐܕܰܝ. ܘܰܩܥܳܬ ܡܰܪܝܰܡ: ܡܰܘܪܒܳܐ ܢܰܦܫܝ̱ ܠܡܳܪܝܳܐ: ܗ̄ ܘܠܶܗ ܬܶܫܒܽܘܚܬܳܐ܀

ܠܘܛܢܝܐ ܒܩ̄: ܢܶܩܝܳܐ ܗܘܺܝܬ - H

ܒܛܽܘܪܳܐ ܕܺܝܗܽܘܕ ܝܰܘܡܳܢܳܐ: ܢܳܨܚܺܝܢ ܩ̈ܳܠܶܐ ܕܚܰܕܽܘܬܳܐ. ܒܒܰܛܢܳܐ ܕܣܰܒܰܪ ܢܽܘܪܳܢܳܐ: ܠܥܰܩܪܽܘܬܳܐ ܘܰܒܬܽܘܠܽܘܬܳܐ܀

ܛܽܘܒܰܝܟܝ̱ ܡܰܪܝܰܡ ܘܪܰܒ ܛܽܘܒܶܟܝ̱: ܡܶܢ ܛܽܘܒܳܐ ܕܟܽܠܗܽܘܢ ܒܪ̈ܰܝܳܐ. ܘܰܒܪܺܝܟ ܦܺܐܪܳܐ ܕܰܒܟܰܪܣܶܟܝ̱: ܡܳܪܳܐ ܕܰܐܪܥܳܐ ܘܕܰܫܡܰܝܳܐ܀

ܡܶܢ ܐܰܝܡܶܟܳܐ ܠܺܝ ܗܳܕܶܐ: ܕܶܐܡܶܗ ܕܡܳܪܝ ܬܺܐܬܶܐ ܨܶܐܕܰܝ. ܥܽܘܠܳܐ ܕܰܒܥܽܘܒܝ̱ ܗܳܐ ܚܳܕܶܐ: ܡܶܢ ܕܰܢܦܰܠ ܫܠܳܡܶܟܝ̱ ܒܶܐܕ̈ܢܰܝ܀

ܠܡܳܪܝܳܐ ܡܰܘܪܒܳܐ ܕܺܝܠܝ ܢܰܦܫܳܐ: ܗܰܘ ܕܰܥܒܰܕ ܠܘܳܬܝ ܪܰܘܪ̈ܒܳܬܳܐ. ܕܠܺܝ ܗܽܘ ܢܶܬ̈ܠܳܢ ܡܶܢ ܗܳܫܳܐ: ܛܽܘܒܳܐ ܟܽܠܗܶܝܢ ܫܰܪ̈ܒܳܬܳܐ܀

ܚܘܬܡܐ ܒܩ̄: ܗܰܒܠܰܢ ܡܳܪܰܢ - H

ܡܰܢ ܢܶܬܶܠ ܠܺܝ ܕܡܳܪܝ ܥܰܡ ܐܶܡܶܗ: ܢܺܐܬܽܘܢ ܠܰܫܠܳܡܳܐ ܕܒܰܪܬ ܡܶܣ̈ܟܺܢܶܐ. ܗܳܐ ܡܶܢ ܕܰܢܦܰܠ ܫܠܳܡܶܟܝ̱ ܒܶܐܕ̈ܢܰܝ: ܕܳܨ ܥܽܘܠܳܐ ܒܟܰܪܣܳܐ ܠܺܐܝܩܳܪ ܡܳܪܶܗ܀

ܚܘܬܡܐ ܐܚܪܢܐ ܒܩ̄: ܒܰܥܪܽܘܒܬܳܐ ܒܪܺܝܫܺܝܬ - H

ܡܰܪܝܰܡ ܘܶܐܠܺܝܫܒܰܥ ܐܶܠ̈ܦܶܐ ܬܡܺܝ̈ܗܳܬܳܐ ܕܰܪ̈ܕܰܝ ܠܰܠܡܺܐܢܳܐ. ܐܶܠܺܝܫܒܰܥ ܝܶܠܕܰܬ ܟܳܪܽܘܙܳܐ ܘܡܰܪܝܰܡ ܦܳܪܽܘܩܶܗ ܕܥܳܠܡܳܐ ܗ̄ܘܗ̄ ܨܠܽܘܬܗܶܝܢ ܬܥܰܕܰܪܝ ܠܰܢ܀