8 ܕܟܳܢܽܘܢ ܐ̱ܚܪܳܝ

ܩܝܢܬܐ ܚ

ܦܬܓܡܐ:

ܡܶܛܽܠܬܳܟ ܐܶܬܩܛܰܠܰܢ ܒܟܽܠܝܽܘܡ: ܘܶܐܬܚܫܰܒܰܢ ܐܰܝܟ ܐܶܡܪ̈ܶܐ ܠܢܶܟܣܬܳܐ ܗ̄܀

ܬܒܪܬ‌ܐ:

ܨܠܽܘܬܳܟ ܥܰܡܰܢ ܒܽܘܟܪܳܐ ܕܣܳܗ̈ܕܶܐ ܨܠܽܘܬܳܟ ܥܰܡܰܢ: ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܨܠܰܘ̈ܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ: ܡܶܢܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀

ܒܬܪ ܐܘܢܓܠܝܘܢ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ - H

ܒܩܶܛܠܶܗ ܕܶܐܣܛܶܦܰܢܳܘܣ ܡܶܬܒܰܩܶܐ ܗܘܺܝܬ. ܘܰܐܚܕܰܢܝ̱ ܬܶܗܪܳܐ ܘܕܽܘܡܳܪܳܐ ܕܰܟܡܳܐ ܡܣܰܝܒܰܪ ܗ̱ܘܳܐ. ܒܟܺܐܦ̈ܶܐ ܪܳܓܡܺܝܢ ܗܘܰܘ ܠܶܗ ܘܗܽܘ ܡܨܰܠܶܐ ܗܘܳܐ. ܕܡܳܪܰܢ ܝܶܫܽܘܥ ܫܒܽܘܩ ܠܗܽܘܢ ܡܶܛܽܠ ܕܠܳܐ ܝܳܕܥܺܝܢ. ܐܳܘ ܠܥܰܒܕܳܐ ܕܰܠܡܳܪܶܗ ܕܳܡܶܐ. ܕܟܰܕ ܡܳܐܶܬ ܥܠܰܝܗܽܘܢ ܡܨܰܠܶܐ ܗܘܳܐ. ܫܰܘܬܶܦ ܠܰܢ ܒܰܨܠܰܘ̈ܳܬܶܗ ܝܶܫܽܘܥ ܡܠܶܐ ܪ̈ܰܚܡܶܐ܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܩܽܘܩܳܝܳܐ - H

ܬܠܳܬܳܐ ܛܰܒ̈ܥܶܐ ܫܰܪܺܝܪ̈ܶܐ ܐܺܝܬܰܝܗܽܘܢ ܣܳܗ̈ܕܶܐ. ܘܠܳܐ ܡܨܶܐ ܒܺܝܫܳܐ ܢܳܟܽܘܠܳܐ ܥܳܐܶܠ ܒܰܝܢܳܬܗܽܘܢ. ܩܛܺܝ̣ܠ ܝܽܘܚܰܢܳܢ ܒܣܰܝܦܶܗ ܕܗܶܪܳܘܕܶܣ. ܘܶܐܣܛܶܦܰܢܳܘܣ ܒܰܪܓܽܘܡܝܳܐ ܕܟܺܐܦ̈ܶܐ. ܘܡܳܪܝ ܓܶܘܰܪܓܺܝܣ ܢܰܨܺܝܚܳܐ ܡܶܢ ܓܺܝܓܠܳܐ ܠܣܰܝܦܳܐ. ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ܘܗ̄܀

ܠܘܛܢܝܐ ܒܩ̄: ܢܶܩܝܳܐ ܗ̱ܘܺܝܬ - H

ܒܽܘܟܪܳܐ ܕܣܳܗ̈ܕܶܐ ܐܶܣܛܶܦܰܢܳܘܣ: ܕܥܰܠ ܩܽܘܫܬܳܐ ܪܓܽܘܡܝܳܐ ܩܰܒܶܠ. ܘܗܶܐ ܡܶܬܒܰܣܰܡ ܒܰܓܢܽܘܢܳܐ: ܥܰܡ ܪܰܒܶܗ ܚܰܬܢܳܐ ܕܪܰܘܡܳܐ܀

ܐܰܩܶܬ ܚܰܘܪܳܐ ܒܰܡܪ̈ܰܘܡܶܐ: ܚܙܳܐ ܠܰܫܡܰܝ̈ܳܐ ܕܰܦܬܺܝ̣ܚܺܝܢ. ܘܰܠܝܶܫܽܘܥ ܕܩܳܐܶܡ ܒܗܶܕܪܳܐ: ܡܶܢ ܝܰܡܺܝܢܳܐ ܕܫܳܠܽܘܚܶܗ܀

ܢܗܰܪ̈ܝ ܐܰܦܰܘܗ̈ܝ ܘܰܠܒܶܫ ܚܰܝܠܳܐ: ܘܰܣܒܰܠ ܡܰܘܬܳܐ ܕܰܪܓܽܘܡܝܳܐ. ܘܥܰܡ ܫܽܘܢܳܝ ܢܰܦܫܶܗ ܨܰܠܺܝ̣: ܩܰܒܶܠ ܪܽܘܚܝ̱ ܡܳܪܝ ܚܰܢܳܢܳܐ܀

ܐܳܘ ܠܣܳܗܕܳܐ ܕܒܰܐܓܽܘܢ ܡܰܘܬܳܐ: ܡܨܰܠܶܐ ܗܘܳܐ ܥܰܠ ܪ̈ܳܓܽܘܡܰܘܗܝ. ܒܕܽܘܡܝܳܐ ܕܪܰܒܶܗ ܕܒܰܨܠܺܝ̣ܒܳܐ: ܡܨܰܠܶܐ ܗܘܳܐ ܥܰܠ ܨܳܠܽܘܒܰܘ̈ܗܝ܀

ܚܘܬܡܐ ܒܩ̄: ܗܰܒܠܰܢ ܡܳܪܰܢ - H

ܣܒܰܠ ܠܰܪܓܽܘܡܝܳܐ ܒܽܘܟܪܳܐ ܕܣܳܗ̈ܕܶܐ. ܘܰܒܚܽܘܒܳܐ ܡܨܰܠܶܐ ܥܰܠ ܪ̈ܳܓܽܘܡܰܘܗܝ. ܕܶܐܬܕܰܡܺܝ ܗܘܳܐ ܠܝܶܫܽܘܥ ܪܰܒܶܗ. ܕܰܨܠܺܝ̣ܒ ܘܰܡܨܰܠܶܐ ܥܰܠ ܨܳܠܽܘܒܰܘ̈ܗܝ܀

ܚܘܬܡܐ ܐܚܪܢܐ ܒܩ̄: ܐܳܘ ܬܰܓܳܪ̈ܶܐ - H

ܬܗܰܪܘ ܡܰܠܰܐܟ̈ܶܐ: ܒܕܰܪܳܐ ܕܒܽܘܟܪܳܐ ܕܣܳܗ̈ܕܶܐ. ܕܟܰܕ ܪܳܓܡܺܝܢ ܠܶܗ. ܘܒܳܥܶܐ ܠܗܽܘܢ ܫܽܘܒܩܳܢܳܐ. ܘܰܒܪܽܘܚܳܐ ܚܙܳܐ ܠܝܶܫܽܘܥ ܡܳܪܶܗ: ܕܩܳܐܶܡ ܗܘܳܐ ܡܶܢ ܝܰܡܺܝܢ ܐܰܒܽܘܗܝ: ܘܰܒܚܽܘܒܶܗ ܪܘܺܝ ܘܰܩܥܳܐ. ܡܳܪܝ ܝܶܫܽܘܥ ܩܰܒܶܠ ܪܽܘܚܝ̱܀