ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܛ: ܐ ـ ܝܗ 2Corinthians 9:1-15

ܥܰܠܺܝ ܬܶܫܡܶܫܬܳܐ ܕܠܰܩܰܕܺܝ̣̈ܫܶܐ، ܙܳܝܽܘܬܬܳܝܳܐ ܕܟܳܬ̣ܰܘ ܐ̱ܢܳܐ ܠܟ̣ܽܘ. ܡܺܝܕ̥ܶܐ ܕܟܳܕ̥ܰܥ ܐ̱ܢܳܐ ܐܽܘ ܔܰܗܕܰܬ̣ܟ̣ܽܘ، ܘܶܐܒܶܗ ܓܡܺܝܫܰܒܗܰܪ ܐ̱ܢܳܐ ܐܰܒܟ̣ܽܘ ܣܰܐ ܡܰܩܶܕܳܘ̈ܢܳܝܶܐ. «ܕܰܐܟܰܐܝܰܐ ܚܰܕ̥ܶܪܬܳܝܳܐ ܡܶܐ ܐܶܫܩܰܕ̥» ܟܳܐܡܰܪ ܐ̱ܢܳܐ. ܘܺܐܝ ܓ̣ܺܝܪܰܬ̣ܟ̣ܽܘ ܡܰܚܶܣܠܰܗ̱̇ ܓ̥ܰܠܳܒ̈ܶܐ. ܡܫܰܕܰܪ ܠܺܝ̣ ܠܰܐܢ̈ܢܰܚ̈ܶܐ. ܕܠܶܐܙܙܶܐ ܡܺܝܦܰܝܩܶܪ ܐܽܘ ܫܽܘܒܗܳܪܰܝܕ̥ܰܢ ܕܰܐܒܟ̣ܽܘ ܡܺܐܝ ܡܰܣܰܠܰܐܬ̣ܶܐ. ܠܰܫܰܢ ܕܗܳܘܶܝܬܽܘ ܚܰܕ̥ܺܝܪ̈ܶܐ. ܟ̣ܶܕ ܐ̱ܡܶܪ ܠܺܝ: ܕܠܶܐܙܙܶܐ ܐܳܬ̥ܶܢ ܐܰܥܡܺܝ ܐܰ ܡܰܩܶܕܽܘ̈ܢܳܝܶܐ، ܘܚܳܙܶܢܟ̥ܽܘ ܠܳܐ ܚܰܕ̥ܺܝܪ̈ܶܐ، ܘܡܺܝܢܰܟܦܺܝܢܰܐ ܐܰܚܢܰܐ. ܠܳܐ ܟܶܐܡܡܺܪ̱ܝܢܰܐ ܗܰܐܬܽܘ ܡܺܝܢܰܟܦܺܝܬܽܘ ܒܽܘ ܫܘ̣ܒܗܳܪܳܐ ܕܶܡܫܰܒܗܪܺܝܢܰܐ. ܘܡܗ̱ܘܟ̥ܰܐ ܚܙܶܐܠܺܝ ܫܰܦܺܝܪܳܐ، ܕܛܳܠܰܒ ܐܢܳܐ ܡܰܢܢܰܐܚ̈ܶܐ، ܕܳܐܬ̣ܶܢ ܡܶܩܶܡ ܡܶܢܺܝ ܓܰܒܰܝܟ̥ܽܘ. ܘܡܚܰܕ̥ܪܺܝ ܡܶܩܶܡ ܐܺܝ ܒܽܘܪܟܬ̣ܰܬ̣ܟ̣ܽܘ. ܗܰܝܳܐ ܕܡܶܐܡܶܩܶܡ ܫܰܡܺܝܥܺܝܬܽܘ ܕܗܽܘܝܳܐ ܚܰܕ̥ܶܪܬܳܐ. ܘܗܰܘܟ̣ܰܐ ܕܗܽܘܝܳܐ ܟ̣ܶܐ ܒܽܘܪܟܬ̣ܳܐ. ܘܠܳܐ ܟ̣ܶܐ ܛܰܡܰܐܥܺܝܶܐ. ܗܰܬ̣ܶܐ ܝܺܕܰܥܽܘ: ܗܰܘܳܐ ܕܙܳܪܶܥ ܐܶܫܡܳܐ، ܐܶܫܡܳܐ ܓܚܳܨܶܕ. ܘܗܰܘܳܐ ܕܙܳܪܶܥ ܒܒܽܘܪܟܬ̥ܳܐ، ܒܒܽܘܪܟܬ̥ܳܐ ܓܚܳܨܶܕ. ܟܽܠ ܚܰܕ̱ ܟ̣ܶܕ ܡܰܚܰܬܠܶܗ ܒܠܶܒܶܗ. ܠܳܐ ܟ̣ܶܕ ܠܳܐ ܡܽܐܘ ܠܶܒܳܐ܆ ܐܰܘ ܡܺܐܝ ܔܶܒܪܺܝܶܐ. ܡܺܐܝܕ̥ܶܐ ܕܰܐܠܳܗܳܐ، ܠܽܐܘ ܡܰܗܽܘܝܳܢܳܐ ܦܨܺܝ̣ܚܳܝܳܐ ܓܪܳܚܶܡ. ܘܓܩܳܕܶܪ ܐܰܠܳܗܳܐ، ܕܡܳܙܶܕ ܐܰܠܟ̥ܽܘ ܟܽܠ ܛܰܝܒܽܘܬ̣ܳܐ. ܕܶܒܟܽܠ ܙܰܒܢܳܐ ܒܟܽܠ ܡܶܕܶܐ ܗܰܘܳܐ ܕܡܰܟܦܶܐ ܐܰܠܟ̣ܽܘ، ܗܳܘܶܐ ܐܠܰܟ̣ܽܘ. ܡܶܙܕܺܝܬܽܘ ܒܟܽܠ ܥܰܡܰܠ ܛܳܘܳܐ. ܟ̣ܶܕ ܕܶܟܬ̣ܺܝܘ: «ܕܶܡܦܰܠܰܓ̣ ܠܶܗ ܘܗܽܘܠܶܗ ܠܰܡܶܣ̈ܟܺܢܶܐ، ܐܺܝ ܙܰܕܺܝܩܽܘܬ̣ܰܝܕ̥ܶܗ ܓܦܰܝܫܳܐ ܠܥܳܠܰܡ». ܘܗܰܘܳܐ ܕܟܳܐܒܶܐ ܙܰܪܥܳܐ ܠܽܐܘ ܙܰܪܳܥܳܐ، ܘܠܰܚܡܳܐ ܠܽܐܘ ܡܽܐܘܟܠܳܐ، ܓܕܳܐܒܶܐ ܘܓܡܳܐܙܶܕ ܐܽܘ ܙܰܪܥܰܬ̣ܟ̣ܽܘ. ܘܓܶܡܪܰܒܶܐ ܐܰ ܦܺܐܪ̈ܶܐ ܕܺܐܝ ܙܰܕܺܝܩܽܘܬ̣ܰܬ̣ܟ̣ܽܘ، ܠܰܫܰܢ ܕܶܒܟܽܠ ܡܶܕܶܐ ܗܳܘܶܝܬܽܘ ܥܰܬܺܝܪ̈ܶܐ ܒܟܽܠ ܡܰܪܕܺܝܶܐ ܕܟܳܡܟܰܡܠܳܐ ܒܺܐܝܕ̥ܰܢ ܬܰܘܕܺܝܬ̣ܳܐ ܠܰܐܠܳܗܳܐ. ܡܺܝܕ̥ܶܐ ܕܽܐܘ ܫܽܘܓ̣ܠܳܐ ܕܺܐܝ ܬܶܫܡܶܫܬܰܬ̣ܶܗ، ܠܳܐ ܐܺܝ ܣܢܽܝܩܽܘܬ̣ܳܐ ܕܰܩܰܕܺܝ̣̈ܫܶܐ ܒܶܠܚܽܘܕ̥ܶܐ ܟܳܡܟܰܡܶܠ، ܐܶܠܳܐ ܓܡܳܐܙܶܕ ܬܰܘܕܺܝܬ̣ܳܐ ܓ̥ܰܠܰܒܶܐ ܠܰܐܠܳܗܳܐ. ܒܽܐܘ ܔܶܪܳܒܳܐ ܕܺܐܝ ܬܶܫܡܶܫܬܰܬ̣ܶܗ ܟܳܡܫܰܒܚܺܝ ܠܰܐܠܳܗܳܐ. ܥܰܠ ܕܫܰܡܺܝܥܺܝܬܽܘ ܠܺܐܝ ܬܰܘܕܺܝ̣ܬܳܐ ܕܽܐܘ ܡܓܰܠܝܶܢ ܕܶܡܫܺܝ̣ܚܳܐ܆ ܘܡܦܰܠܰܓ̣ܟ̣ܽܘ ܒܡܰܪܕܺܝܶܐ ܐܰܠܠܶܗ ܘܠܟܽܠ ܐ̱ܢܳܫܳܐ. ܘܨܠܽܘܬ̣ܳܐ ܟܳܡܩܰܕܡܺܝ ܡܶܚܠܳܦܰܝܟ̣ܽܘ ܒܚܽܘܒܳܐ ܓ̥ܰܠܰܒܶܐ܆ ܥܰܠܺܝ ܛܰܝܒܽܘܬ̣ܳܐ ܕܰܐܠܳܗܳܐ ܐܺܝ ܓ̥ܰܠܰܒܶܐ ܕܣܶܬܟ̣ܽܘ. ܬܰܘܕܺܝ ܠܰܐܠܳܗܳܐ ܥܰܠܺܝ ܡܰܘܗܰܒܬ̣ܰܝܕܶܗ ܕܠܳܐ ܓܡܺܝܬܰܚܟܝܳܐ. ܒܰܪܶܟ̥ܡܳܪܝ܀