ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܦܺܝܠܺܝ̈ܦܺܝܣܳܝܶܐ
ܐ: ܝܒ ـ ܠ Philippians 1:12-30

ܟܳܒܰܥ ܐ̱ܢܳܐ ܕܶܐܕ̥ܥܺܝܬܽܘ܆ ܐܽܘ ܫܽܘܓ̣ܠܰܝܕܺܝ ܓ̥ܰܠܰܒܶܐ ܟܳܐܬ̣ܶܐ ܠܰܩܩܶܕܕܰܐܡ ܒܽܐܘ ܡܓܰܠܝܶܢ. ܚܰܬܬܰܐ ܐܰ ܬܶܐܣܰܪ̈ܝܳܬ̥ܰܝܕ̥ܺܝ ܓܠܶܢ ܒܶܡܫܺܝ̣ܚܳܐ ܒܽܐܘ ܒܰܝܬܳܐ ܕܺܐܝ ܡܕܺܝܢ̱ܬܳܐ (ܘܰܠܰܐܝܶܐ) ܟܽܠܰܗ̇، ܘܠܟܽܠ ܐ̱ܢܳܫܳܐ. ܘܓ̥ܰܠܒܶܐ ܡܰܐܢܢܰܚ̈ܶܐ ܕܶܒܡܳܪܰܢ ܗܰܘܺܝ ܠܶܢ ܬܽܘܟ̣ܠܳܢܳܐ ܥܰܠܰܐ ܬܐܶܣܰܪ̈ܝܳܬ̥ܰܝܕ̥ܺܝ. ܒܓܰܢ̱ܒܳܪܽܘܬ̣ܳܐ ܪܰܒܬ̣ܳܐ ܕܠܳܐ ܙܽܘܥܬ̣ܳܐ ܡܶܔܓ̥ܰܠܠܶܗ̱ ܐܺܝ ܙܽܘܥܬ̣ܳܐ ܕܰܐܠܳܗܳܐ. ܐܶܠܳܐ ܟܺܝܬ ܐ̱ܢܳܫܳܐ ܡܽܐܘ ܚܣܳܡܳܐ ܘܡܺܐܝ ܥܰܟܣܺܝܶܐ ܟܟܽܘܪܙܺܝ ܥܰܠ ܡܫܺܝ̣ܚܳܐ. ܘܟܺܝܬ ܐ̱ܢܳܫܳܐ ܣܬܶܐ، ܡܶܐ ܨܶܒܝܳܢܳܐ ܛܳܘܳܐ ܘܒܚܽܘ̣ܒܳܐ ܠܶܡܫܺܝܚܳܐ ܟܟܽܘܪܙܺܝ. ܡܺܝܕ̥ܶܐ ܕܟܳܕܥܺܝ ܐܺܝ̣ ܡܕܰܦܰܥܰܝܕ̥ܺܝ ܕܠܽܘ ܡܓܰܠܝܶܢ. ܗܰܢܺܝ ܕܡܺܐܝ ܥܰܟܣܺܝܶܐ ܟܳܟܽܘܪܙܺܝ ܥܰܠ ܡܫܺܝ̣ܚܳܐ܆ ܘܠܰܬܝܳܐ ܡܺܐܝ ܚܽܘܒܳܐ. ܐܶܠܳܐ ܓܡܰܚܬܺܝ ܒܠܶܒܰܝܝܶܗ ܕܡܰܙܺܝܕܺܝ ܥܺܝܩܽܘܬ̣ܳܐ ܥܠܰܐ ܬܶܐܣܰܪ̈ܝܳܬ̥ܰܝܕ̥ܺܝ. ܘܒܰܗ̱ܬ̣ܶܐ ܦܨܺܝ̣ܚܳܝܳܐ ܐ̱ܢܳܐ ܘܓܡܶܦܨܰܚ ܐ̱ܢܳܐ. ܐܺܝܕ̥ܰܐ ܒܣܶܒܒܰܐ ܘܺܐܝܕ̥ܰܐ ܒܰܫܪܳܪܳܐ ܡܫܺܝ̣ܚܳܐ ܕܡܶܟܪܶܙ. ܡܺܝܕ̥ܶܐ ܕܟܳܐܕ̥ܰܥ ܐ̱ܢܳܐ ܒܰܛܰܠܰܒܰܬ̣̈ܟ̣ܽܘ ܘܒܺܐܝ ܡܰܘܗܰܒܬ̣ܳܐ ܕܺܐܝ ܪܽܘܚܳܐ ܕܝܶܫܽܘܥ ܡܫܝ̣ܚܳܐ ܗܰܢܺܝ ܠܰܚܰܝܰܝܕ̥ܺܝܢܶܐ. ܟ̣ܶܕ ܟܶܬܠܺܝ ܣܰܒܪܳܐ ܘܟܳܢܳܛܰܪ ܐ̱ܢܳܐ ܕܶܒܡܶܕܶܐ ܠܳܐ ܡܺܝܢܰܟܰܦ ܐ̱ܢܳܐ، ܐܶܠܳܐ ܒܦ̈ܳܬ̥ܳܬ̥ܶܐ ܓܰܠܝ̈ܶܐ ܟ̣ܶܕ ܒܟܽܠ ܙܰܒܢܳܐ ܗܰܘܟ̣ܰܐ ܐܽܘܥܕܳܐ ܣܬܶܐ، ܝܳܪܽܘ ܐܶܫܡܶܗ ܕܶܡܫܺܝ̣ܚܳܐ ܒܽܐܘ ܦܰܓ̥ܪܰܝܕ̥ܰܢ. ܐܶܢ ܒܰܚ̈ܚܰܝܶܐ ܘܶܐܢ ܒܽܐܘ ܡܰܘܬܳܐ. ܥܰܠ ܕܰܚܚܰܝܰܝ̈ܕܺܝ ܡܫܺܝܚܳܢܶܐ، ܘܽܐܘ ܡܰܘܬܳܐ ܦܰܝܕܰܐܝܳܐ ܐܶܠܺܝ. ܐܶܢ ܒܰܚ̈ܚܰܝܰܐܢܺܝ ܕܽܐܘ ܦܰܓ̥ܪܳܐ܆ ܟܶܬܠܺܝ ܦܺܐܪ̈ܶܐ ܒܰܥ̈ܡܰܠܰܝܕ̥ܺܝ܆ ܠܳܐ ܟܳܐܕ̥ܰܥ ܐ̱ܢܳܐ ܐܰܝܢܰܐ ܡܢܰܩܶܐ ܐ̱ܢܳܐ ܠܺܝ. ܡܰܥܺܝܩܳܐ ܐ̱ܢܳܐ ܡܰܐ ܬܰܪܬܶܐ ܣܬܶܐ. ܟܳܐܒܰܥ ܐ̱ܢܳܐ ܕܡܺܝܫܰܢܶܐ ܐ̱ܢܳܐ ܘܗܳܘܶܐ ܐ̱ܢܳܐ ܥܰܡ ܡܫܺܝ̣ܚܳܐ. ܗܰܬ̣ܶܐ ܛܰܘܝܳܐ ܒܓ̥ܰܠܰܒܶܐ ܐܶܠܺܝ. ܐܶܠܐܳ ܕܦܳܝܰܫ ܐ̱ܢܳܐ ܒܽܐܘ ܔܰܣܰܕ ܣܬܶܐ، ܙܶܬ ܠܰܙܶܡ ܐ̱ܢܳܐ ܠܰܫܰܢܰܝܟ̣ܽܘ. ܗܰܬ̣ܶܐ ܒܰܫܪܳܪܳܐ ܟܳܐܕ̥ܰܥ ܐ̱ܢܳܐ. ܕܦܳܝܰܫ ܐ̱ܢܳܐ ܐܰܥܡܰܝܟ̣ܽܘ، ܠܰܫܰܢ ܐܺܝ ܦܨܺܝܚܽܘܬ̣ܰܬ̣ܟ̣ܽܘ ܘܽܐܘ ܝܺܪܳܘܳܐ ܕܺܐܝ ܗܰܝܡܳܢܽܘܬ̣ܰܬ̣ܟ̣ܽܘ ܓܦܳܝܰܫ ܐ̱ܢܳܐ. ܕܺܐܝ ܢܰܩܩܰܐ ܕܳܐܬ̣ܶܐ ܐ̱ܢܳܐ ܣܶܬܟ̣ܽܘ܆ ܕܙܳܝܶܕ ܐܶܒܝ ܐܽܘ ܫܽܘܒܗܳܪܰܬ̣ܟ̣ܽܘ ܕܶܒܝܶܫܽܘܥ ܡܫܺܝ̣ܚܐ. ܐܶܠܳܐ ܡܗܰܠܶܟ̥ܽܘ ܟ̣ܶܕ ܓܫܳܦܶܪ ܠܽܐܘ ܡܓܰܠܝܶܢ ܕܶܡܫܺܝ̣ܚܳܐ. ܠܰܫܰܢ ܐܺܝ ܢܰܩܩܰܐ ܕܳܐܬ̣ܶܐ ܐ̱ܢܳܐ ܘܚܳܙܶܐ ܐ̱ܢܳܐ ܠܟ̥ܽܘ، ܐܰܘ ܕܗܳܘܶܐ ܐ̱ܢܳܐ ܪܰܚܽܘܩܳܐ ܫܳܡܰܥ ܐ̱ܢܳܐ ܐܰܥܠܰܝܟ̣ܽܘ ܕܟܶܬܗܰܬܽܘ ܒܶܚܕ̥ܳܐ ܪܽܘܚܳܐ ܘܒܶܚܕ̥ܳܐ ܢܰܦܫܳܐ. ܘܟܳܡܔܰܗܕܺܝܬܽܘ ܥܰܡܚ̈ܕ̥ܳܕ̥ܶܐ ܒܺܐܝ ܗܰܝܡܳܢܽܘܬ̣ܳܐ ܕܽܐܘ ܡܓܰܠܝܶܢ. ܘܒܡܶܕܶܐ ܠܳܐ ܙܰܝܥܺܝܬܽܘ ܡܰܗ̱ܢܺܝ ܕܟܳܩܰܝܡܺܝ ܡܩܰܒܶܠ ܕܺܝܕ̥ܰܢ. ܗܰܘܳܐ ܕܟܳܡܰܚܘܶܐ ܐܽܘ ܗܰܠܰܐܟܰܬ̣ܬ̣ܶܗ ܘܽܐܘ ܟ̣ܰܠܐܰܨܰܬ̣ܟ̣ܽܘ ܕܟܶܬܝܳܐ ܡܰܐܠܳܗܳܐ. ܡܺܝܕ̥ܶܐ ܕܗܺܝܘ ܐܠܰܟ̣ܽܘ ܠܰܫܰܢ ܡܫܺܝ̣ܚܳܐ ܠܳܐ ܕܶܡܗܰܝܡܢܺܝܬܽܘ ܐܶܒܶܗ̱ ܒܶܠܚܽܘܕ̥ܶܐ܆ ܐܶܠܳܐ ܗܰܡ ܕܡܺܝܓ̣ܰܡܡܺܝܬܽܘ ܣܬܶܐ ܠܰܫܰܢܶܗ. ܘܕܶܡܣܰܝܒܪܺܝ̣ܬܽܘ ܐܽܘ ܔܰܗܕ ܗܰܘܳܐ ܕܶܚܙܰܠܟ̣ܽܘ ܐܶܒܺܝ. ܘܽܐܘܥܕܳܐ ܓܫܶܡܥܺܝܬܽܘ ܐܰܥܠܺܝ. ܒܰܪܶܟ̥ܡܳܪܝ܀