ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܓ: ܕ ـ ܝܚ 2Corinthians 3:4-18

ܟܶܬܠܰܢ ܬܽܘܟ̣ܠܳܢܳܐ ܟ̣ܰܗ̱ܢܳܐ ܒܶܡܫܺܝ̣ܚܳܐ ܣܰܐܠܳܗܳܐ܆ ܠܳܐ ܕܰܐܚܢܰܐ ܓܡܰܟܦܺܝܢܰܐ ܕܡܶܦܬܰܟܪܺܝܢܰܐ ܡܶܕܶܐ ܡܶܩܶܡ ܪܽܘܚܰܢ. ܐܶܠܳܐ ܐܽܘ ܚܰܝܠܰܝܕ̥ܰܢ ܡܰܐܠܳܗܳܝܳܐ. ܗܰܘܳܐ ܕܡܰܫܘܶܠܶܐ ܠܰܢ ܕܗܳܘܶܝܢܰܐ ܡܫܰܡ̈ܫܳܢܶܐ ܕܽܐܘ ܥܰܗܕ ܚܰܕ̱ܬ̣ܳܐ، ܠܳܐ ܒܺܐܝ ܟܬ̣ܰܘܬܳܐ، ܐܶܠܳܐ ܒܺܐܝ ܪܽܘܚܳܐ. ܡܺܝܕ̥ܶܐ ܕܺܐܝ ܟܬ̣ܰܘܬܳܐ ܓܩܳܛܠܳܐ܆ ܐܶܠܐ ܐܺܝ ܪܽܘܚܳܐ ܟܳܐܒܳܐ ܚܰܝ̈ܶܐ. ܐܺܝܕ̥ܰܐ ܐܺܝ ܬܶܫܡܶܫܬܳܐ ܕܽܐܘ ܡܰܘܬܳܐ ܒܺܐܝ ܟܬ̣ܰܘܬܳܐ ܢܩܺܝܫܳܐ ܒܰܟܟܶܐܦ̈ܶܐ ܘܗܰܘܝܳܐ ܒܫܽܘܒܚܳܐ. ܗܽܘܠ ܕܠܳܐ ܩܳܕܪܺܝ ܐܰ ܒ̈ܢܰܝ ܐܺܝܣܪܳܐܶܝܠ ܕܚܰܝܪܺܝ ܒܦܳܬܶܗ ܕܡܽܘܫܶܐ ܡܽܐܘ ܫܽܘܒܚܳܐ ܕܦܳܬ̥ܶܗ ܗܰܘܳܐ ܕܒܰܛܶܠ. ܐܰܝܕܰܪܒܳܐ ܠܳܐ ܟܽܘܝܳܐ ܙܶܬ ܐܺܝ ܬܶܫܡܶܫܬܳܐ ܕܺܐܝ ܪܽܘܚܳܐ ܒܫܽܘܒܚܳܐ. ܡܺܝܕ̥ܶܐ ܕܶܐܢ ܠܺܐܝ ܬܶܫܡܶܫܬܳܐ ܕܺܐܝ ܕܰܝܢܽܘܢܶܐ ܗܰܘܺܝ ܫܽܘܒܚܳܐ. ܚܰܕ̱ ܒܶܟܡܳܐ ܐܺܝ ܟ̣ܶܕܡܰܐ ܕܺܐܝ ܙܰܕܺܝܩܽܘܬ̣ܳܐ ܙܶܬ ܓܬܽܘܝܳܐ ܒܫܽܘܒܚܳܐ. ܡܺܐܝܕ̥ܶܐ ܕܟ̣ܶܕ ܠܳܐ ܡܫܰܒܚܳܐ ܣܬܶܐ ܐܽܘ ܡܶܕܶܐ ܕܶܡܫܰܒܚܳܐ܆ ܠܓܳܪܰܐܢ ܕܽܐܘ ܫܽܘܒܚܰܐܢܳܐ ܐܽܘ ܥܶܠܳܝܳܐ. ܡܺܝܕ̥ܶܐ ܕܶܐܢ ܗܰܘܳܐ ܕܒܰܛܶܠ ܒܫܽܘܒܚܳܐ ܗܰܘܺܝ، ܡܶܩܩܰܐ ܒܽܐܘ ܙܳܝܽܘܕܳܐ ܐܰܝܢܰܐ ܕܦܳܝܶܫ ܕܰܐܝܶܡ ܓܬܳܘܶܐ ܒܫܽܘܒܚܳܐ. ܡܺܝܕ̥ܶܐ ܕܟܶܬܠܰܢ ܐܽܘ ܣܰܒܪܰܢܳܐ ܟܡܶܣܬܰܥܡܠܺܝܢܰܐ ܐܺܝ ܔܰܨܰܪܰܬ̥ܶܐ. ܠܳܐ ܟ̣ܶܐ ܡܽܘܫܶܐ ܕܡܰܚܰܬ ܗ̱ܘܰܐ ܡܰܢܕܶܠܳܐ ܥܰܠ ܦܳܬ̣ܶܗ ܕܠܳܐ ܚܰܝܪܺܝ ܐܰ ܒ̈ܢܰܝ ܝ̣ܣܪܳܐܶܝܠ ܒܺܐܝ ܐ̱ܚܰܪܰܝܬܳܐ ܕܰܗ̱ܘܳܐ ܕܟܳܒܳܛܶܠ. ܐܶܠܳܐ ܣܰܐܡܶܢ ܐܰ ܦܶܟܪ̈ܰܬ̣ܬ̣ܶܗ. ܥܰܠ ܕܗܽܘܠ ܐܰܕܝܰܘܡܰܐ ܐܺܝ ܢܰܩܩܰܐ ܕܟܳܡܶܩܪܶܐ ܐܽܘ ܥܰܗܕ ܥܰܬܺܝ̣ܩܳܐ، ܐܺܝ ܡܰܢܕܶܠܰܝܳܐ ܓܦܰܝܫܳܐ ܐܰܥܠܰܝܝܶܐ. ܘܠܳܐ ܓܠܶܐ ܐܰܠܠܶܗ ܕܒܶܡܫܺܝܚܳܐ ܒܰܛܺܝܠܳܐ. ܘܗܽܘܠ ܠܰܐܕܝܰܘܡܰܐ ܐܺܝ ܢܰܩܩܰܐ ܕܟܳܡܶܩܪܶܐ ܡܽܘܫܶܐ، ܐܺܝ ܡܰܢܕܶܠܳܐ ܡܰܚܰܬܬܳܝܳܐ ܥܰܠ ܠܶܒܰܝܝܶܗ. ܐܺܝ ܢܰܩܩܰܐ ܕܚܰܕ̱ ܡܶܢܢܶܗ ܕܳܥܶܪ ܣܰܐܠܳܗܳܐ܆ ܓܡܺܝܡܳܕܳܐ ܡܶܢܶܗ ܐܺܝ ܡܰܢܕܶܠܳܐ. ܐܽܘ ܡܳܪܝܳܐ ܪܽܘܚܳܝܳܐ. ܘܰܐܝܟܳܐ ܕܟܶܬܝܳܐ ܐܺܝ ܪܽܘܚܳܐ ܕܰܐܠܳܗܳܐ، ܬܰܡܳܝܳܐ ܐܺܝ ܚܺܐܪܽܘܬ̣ܳܐ. ܐܰܚܢܰܐ ܟܽܠܰܢ ܟܚܳܙܶܝܢܰܐ ܐܽܘ ܫܽܘܒܚܳܐ ܕܰܐܠܳܗܳܐ ܒܦܳܬ̣ܳܐ ܓܠܺܝܬ̣ܳܐ ܟ̣ܶܕ ܒܺܐܝ ܡܰܚܙܺܝܬ̣ܳܐ܆ ܘܥܰܝܢܺܝ ܠܺܐܝ ܨܽܘܪܬܰܝܳܐ ܓܡܺܝܫܰܚܠܦܺܝܢܰܐ ܡܶܐ ܫܽܘܒܚܳܐ ܠܫܽܘܒܚܳܐ، ܘܟ̣ܶܕ ܡܰܐܠܳܗܳܐ ܕܟܶܬܝܳܐ ܪܽܘܚܳܐ. ܒܰܪܶܟ̥ܡܳܪܝ܀