ܕܚܕ ܫܒܪܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܘ: ܐ ـ ܚ Romans 6:1-8

ܐܰܚܰܝ̈: ܡܶܢ ܐܶܡܡܺܝܢܰܐ؟ ܦܰܝܫܺܝܢܰܐ ܒܺܐܝ ܚܛܺܝܬܬ̥ܳܐ، ܠܰܫܰܢ ܕܺܐܝ ܛܰܝܒܽܘܬ̥ܳܐ ܕܙܰܝܕܳܐ؟ ܚܰܐܫܰܐ. ܗܰܢܺܝ ܕܡܰܐܺܝܬ̥ܺܝܢܰܐ (ܟ̥ܰܠܺܝܨܺܝܢܰܐ) ܡܺܐܝ ܚܛܺܝܬ̥ܳܐ، ܐܰܝܕܰܪܒܳܐ ܢܰܩܩܰܐ ܐ̱ܚܪܶܬܳܐ ܥܰܝܫܺܝܢܰܐ ܐܶܒܰܗ̇؟ ܩܰܝ ܠܳܐ ܟܽܘܕ̥ܥܽܘܬܽܘ، ܗܰܢܺܝ ܕܥܰܡܺܝܕ̥ܺܝܢܰܐ ܒܝܶܫܽܘܥ ܡܫܺܝ̣ܚܳܐ، ܒܽܐܘ ܡܰܘܬܰܝܕ̥ܶܗ ܥܰܡܺܝܕ̥ܺܝܢܰܐ؟ ܘܒܺܐܝ ܘܰܐܨܺܝܛܰܐ ܕܺܐܝ ܡܰܥܡܽܘܕܺܝܬ̥ܳܐ، ܐܰܥܡܶܗ ܩܘܺܝܪܺܘܝܢܰܐ ܘܡܰܝܺܬܺܝܢܰܐ. ܟ̥ܶܕ ܐܰܝܕܰܪܒܳܐ ܕܝܶܫܽܘܥ ܡܫܺܝ̣ܚܳܐ ܩܰܐܝܶܡ ܡܶܐ ܒܰܝܢܰܐ ܡܺܝ̣̈ܬ̥ܶܐ ܒܺܐܝ ܬܶܫܒܽܘܚܬܳܐ ܕܽܐܘ ܐܰܒܰܝܕ̥ܶܗ، ܗܰܘܟ̥ܰܐ ܣܬܶܐ ܒܰܐܚ̈ܰܝܶܐ ܚܰܕ̈ܬ̥ܶܐ ܐܰܥܡܶܗ ܡܗܰܠܟ̥ܺܝܢܰܐ. ܐܺܝܕ̥ܰܐ ܒܽܐܘ ܫܶܟܶܠ ܕܽܐܘ ܡܰܘܬܰܝܕ̥ܶܗ ܡܫܰܬܠܺܝܢܰܐ (ܙܪܺܝ̣ܥܺܝܢܰܐ)، ܗܰܘܟ̥ܰܐ ܣܬܶܐ ܒܺܐܝ ܩܝܰܡܬܰܝܕ̥ܶܗ ܓܬܳܗ̱ܘܺܝܢܰܐ. ܟܽܘܕ̥ܥܺܝܢܰܐ ܕܽܐܘ ܐܶܢܣܰܢܰܝܕ̥ܰܢ (ܔܰܣܰܕܰܝܕ̥ܰܢ) ܐܽܘ ܥܰܬܺܝܩܳܐ، ܠܰܫܰܢ ܕܒܳܛܶܠ ܐܽܘ ܔܰܣܰܕ ܕܺܐܝ ܚܛܺܝܬ̥ܳܐ، ܘܢܰܩܩܰܐ ܐ̱ܚܪܶܬܳܐ ܠܳܐ ܟ̥ܳܕܡܺܝܢܰܐ ܠܺܐܝ ܚܛܺܝܬܳܐ، ܨܠܺܝܘ ܐܰܥܡܶܗ. ܐܰܝܢܰܐ ܕܡܰܐܝܶܬ، ܟ̥ܰܐܠܶܨ ܡܺܐܝ ܚܛܺܝܬ̥ܳܐ. ܐܺܝܕ̥ܰܐ ܡܰܝܺܬ̥ܺܝܢܰܐ ܥܰܡ ܡܫܺܝܚܳܐ، ܡܗܰܝܡܢܺܝܢܰܐ ܕܰܐܥܡܶܗ ܣܬܶܐ ܓܥܰܝܫܺܝܢܰܐ. ܒܰܪܶܟ̥ܡܳܪܝ܀

ܕܚܕܐ ܫܒܪܬܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܓ: ܟܓ ـ ܟܛ Galatians 3:23-29

ܐܰܚܰܝ̈: ܡܶܐܩܶܡ ܡܶܕ ܐܶܬ̥ܝܳܐ ܐܺܝ ܗܰܝܡܳܢܽܘܬ̥ܳܐ، ܚܒܺܝ̣̈ܣܶܘܰܝܢܰܐ ܬܰܚܬܽܘ ܩܰܐܢܽܘܢ. ܘܚܒܺܝ̈ܣܶܘܰܝܢܰܐ ܠܺܝ ܗܰܝܡܳܢܽܘܬ̥ܰܝܳܐ ܕܓܶܡܶܓܠܳܝܳܐ ܗ̱ܘܰܐ. ܘܠܰܫܰܢ ܕܡܺܝܒܰܪܺܝܢܰܐ ܒܺܐܝ ܗܰܝܡܳܢܽܘܬ̥ܳܐ، ܐܽܘ ܩܰܐܢܽܘܢ، ܡܗܰܕܝܳܢܳܐ (ܡܐܰܕܒܳܢܳܐ) ܗܰܘܺܝ ܐܶܠܰܢ ܓܰܢ̱ܒ ܡܫܺܝܚܳܐ. ܐܶܠܳܐ ܐܺܝ ܢܰܩܩܰܐ ܕܰܐܬ̥ܝܳܐ ܐܺܝ ܗܰܝܡܳܢܽܘܬ̥ܳܐ، ܠܳܐ ܦܰܐܺܝܫܺܝܢܰܐ ܬܰܚܬܽܘ ܡܗܰܕܝܳܢܳܐ. ܒܺܐܝ ܗܰܝܡܳܢܽܘܬ̥ܳܐ ܕܝܶܫܽܘܥ ܡܫܺܝܚܳܐ، ܟܽܠܟ̥ܽܘ ܐܰܒܢ̈ܶܐ ܕܰܐܠܳܗܳܐ ܗܰܬܽܘ. ܗܰܢܺܝ ܕܒܶܡܫܺܝܚܳܐ ܥܰܡܺܝܕ̥ܽܘܬܽܘ ܘܠܶܡܫܺܝܚܳܐ ܠܘܶܫܟ̥ܽܘ. ܠܰܝܬ ܠܳܐ ܝܽܘܕ̥ܳܝܳܐ ܘܠܳܐ ܐܰܪܡܳܝܳܐ (ܚܰܢܦܳܐ) ܠܰܝܬ ܓܪܶܥܳܐ ܘܠܳܐ ܚܶܐܪ. ܠܰܝܬ ܓܰܘܪܳܐ ܘܠܳܐ ܐܰܢ̱ܬ̥ܬܳܐ. ܟܽܠܟ̥ܽܘ ܚܰܕ̱ ܗܰܬܽܘ ܒܝܶܫܽܘܥ ܡܫܺܝ̣ܚܳܐ. ܐܺܝܕ̥ܰܐ ܕܶܡܫܺܝܚܳܐ ܗܰܬܽܘ، ܡܽܐܘ ܙܰܪܥܳܐ ܕܰܐܒܪܳܗܳܡ ܗܰܬܽܘ، ܘܝܰـܪ̈ܳܬ̥ܶܐ ܗܰܬܽܘ ܕܽܐܘ ܘܰܥܕ. ܒܰܪܶܟ̥ܡܳܪܝ܀