ܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܝܐ: ܚ ـ ܟܒ Hebrews 11:8-22

ܒܺܐܝ ܗܰܝܡܳܢܽܘܬ̥ܳܐ ܐܰܒܪܳܗܳܡ ܐܺܝ ܢܰܩܩܰܐ ܕܶܩܪܶܐ ܐܶܠܶܗ، ܫܰܡܶܥ ܘܢܰܦܶܩ ܠܽܐܘ ܐܰܬ̥ܪܰܐ ܗ̱ܘܳܐ، ܕܓܶܕܡܳܝܰܕ ܗ̱ܘܰܝܠܶܗ ܘܰܪܰܐܬ̥ܰܐ. ܘܢܰܦܶܩ، ܘܠܳܐܕ̥ܰܥ ܗ̱ܘܰܐ ܠܰܐܝܟܳܐ ܓܶܐܙܙܶܐ. ܒܺܐܝ ܗܰܝܡܳܢܽܘܬ̥ܳܐ ܗܰܘܺܝ ܢܽܘܟ̥ܪܳܝܳܐ ܒܺܐܝ ܐܰܪܥܰܐܝܳܐ ܕܶܡܘܰܥܕܳܐ ܐܶܠܶܗ ܟ̥ܶܕ ܒܺܐܝ ܢܽܘܟ̥ܪܰܝܬܳܐ. ܘܥܰܐܝܶܫ ܥܰܡ ܐܺܝܣܚܳܩ ܘܝܰܥܩܽܘܒ ܕܟܶܬܗ̱ܘܰܝܢܶܐ ܐܰ ܫܳܪ̈ܺܝ̣ܟܶܐ ܕܥܰܝܢܺܝ ܘܰܥܕ. ܘܢܳܛܰܪ ܗ̱ܘܳܐ ܠܺܐܝ ܘܰܠܰܐܝܶܐ ܕܟܶܬܠܰܗ̇ ܐܰܣܰܐܣ ܩܰܘܝܳܐ، ܘܽܐܘ ܡܰܥܶܡܪܳܢܰܝܕ̥ܰܗ̇ ܘܐܽܘ ܣܰܝܳܡܰܝܕ̥ܰܗ̇ ܐܰܠܳܗܐܝܳܐ. ܒܺܐܝ ܗܰܝܡܳܢܽܘܬ̥ܳܐ ܣܰܪܳܐ ܕܟܶܬܗ̱ܘܰܐ ܥܰܐܓܶܪ، ܡܶܕܠܰܗ̱̇ ܚܰܝܠܳܐ، ܘܡܰܩܒܶܠܰܗ̇ ܙܰܪܥܳܐ. ܘܠܳܐ ܠܓܳܪܰܢ ܕܰܢܢܶܫ̈ܢܰܝܕ̥ܰܗ̇ ܡܰܘܠܰܕܠܰܗ̇. ܡܺܝܕ̥ܶܐ ܕܡܶܬܝܰܩܰܢ ܠܰܗ̇ ܠܰܗ̱ܘܳܐ ܕܶܡܘܰܥܰܕܠܶܗ ܠܰܗ̇. ܡܽܐܘ ܣܰܒܰܒܰܐܢܳܐ ܡܶܐ ܚܰܕ̱ ܕܡܰܐܣܽܗ̱ܘܰܝܠܶܗ، ܟ̥ܕܰܐ ܟܽܘ̈ܟܘܶܐ ܕܒܺܐܝ ܫܡܰܝܳܐ ܡܰܘܠܕܺܝ ܓ̥ܰܠܰܒܶܐ. ܘܟ̥ܕܰܐ ܚܰܒ̈ܒܳܬ̥ܶܐ ܕܽܐܘ ܩܽܘܡ ܕܠܳܐ ܓܡܶܒܢܶܢ. ܒܺܐܝ ܗܰܝܡܳܢܽܘܬ̥ܳܐ ܡܰܐܺܝܬ̥ܺܝ ܗܰܢܺܝ ܟܽܠܠܶܗ، ܘܠܳܐ ܡܶܕܕܶܐ ܐܽܘ ܡܶܕܶܐ ܕܶܡܘܰܥܶܕ ܐܰܠܠܶܗ. ܐܶܠܳܐ ܡܶܐ ܪܽܘܚܩܳܐ ܚܙܰܠܠܶܗ ܘܦܨܺܚܺܝ ܐܶܒܶܗ. ܘܡܰܩܒܰܠܠܶܗ ܕܟܶܬܢܶܐ ܕ̥ܰܝ̈ܦܶܐ ܘܢܽܘܟ̥ܪ̈ܳܝܶܐ ܒܺܐܝ ܐܰܪܥܰܐܬ̥ܶܐ. ܗܰܢܺܝ ܕܗܰܘܟ̥ܰܐ ܐܶܡܡܺܝ ܗ̱ܘܳܐ، ܡܰܚܘܶܢ ܗ̱ܘܰܐ ܥܰܠ ܘܰܠܰܐܝܶܐ ܕܟܶܬܝܳܐ ܥܰܐܺܝܬ ܕܶܐܬ̥ܬ̥ܶܐ ܓܟܽܘܪܟ̥ܺܝ. ܐܶܠܳܐ ܐܺܝܕ̥ܰܐ ܥܰܠܺܝ ܘܰܠܰܐܝܰܐܝܳܐ ܕܟܶܬܝܳܐ ܕܶܐܬ̥ܬ̥ܶܐ ܕܟܽܘܪܟ̥ܺܝ ܗ̱ܘܰܐ، ܟܶܬܘܰܠܠܶܗ ܢܰܩܩܰܐ ܐ̱ܚܪܶܬܳܐ ܦܶܪܨܰܐ ܕܕܳܥܪܺܝܠܰܗ̱̇. ܐܶܠܳܐ ܐܽܘܥܕܳܐ، ܝܺܕܶܥܬܳܝܳܐ، ܛܶܠܒܺܝ ܗ̱ܘܳܐ ܘܰܠܰܐܝܶܐ ܕܟܶܬܝܳܐ ܛܰܘ ܡܰܗ̱ܝܳܐ. ܠܰܗ̱ܝܳܐ ܕܟܶܬܝܳܐ ܒܺܐܝ ܫܡܰܝܳܐ. ܡܽܐܘ ܣܰܒܰܒܰܐܢܳܐ ܠܳܐ ܡܢܰܟܶܦ ܐܰܠܳܗܳܐ ܕܽܐܘ ܐܰܠܳܗܰܬ̥ܬ̥ܶܗ ܕܡܶܩܪܶܐ. ܡܰܗ̱ܘܟ̥ܰܐ ܡܚܰܕ̥ܰܪ ܠܶܗ ܐܰܠܠܶܗ ܐܰܠܳܗܳܐ ܘܠܰܐܝܶܐ. ܒܺܐܝ ܗܰܝܡܳܢܽܘܬ̥ܳܐ ܡܩܰܕܡܠܶܗ ܐܰܒܪܳܗܳܡ ܠܽܐܘ ܡܰܕ̥ܒܚܳܐ، ܐܽܘ ܐܰܒܪܰܝܕ̥ܶܗ ܐܺܝܣܚܳܩ ܐܺܝ ܢܰܩܩܰܐ ܕܶܡܔܰܪܶܒ. ܗܰܘܳܐ ܕܓܶܡܰܩܒܰܠ ܗ̱ܘܰܐ ܐܽܘ ܘܰܥܕ (ܣܳܘܙ) ܘܐ̱ܡܶܪ ܗ̱ܘܰܐ ܐܶܠܶܗ: «ܕܒܺܐܝܣܚܳܩ ܓܡܶܩܪܶܐ ܠܳܟ̥ ܙܰܪܥܳܐ». ܘܡܶܦܬܰܟܰܪܠܶܗ ܠܪܽܘܚܶܗ، ܕܟܺܝܒܶܐ ܐܰܠܳܗܳܐ ܕܰܡܡܺܝ̈ܬ̥ܶܐ ܣܬܶܐ ܕܡܰܩܶܡܡܶܐ. ܡܽܐܘ ܣܰܒܰܒܰܐܢܳܐ ܒܽܐܘ ܡܰܬ̥ܠܳܐ ܕܗܺܝܘ ܐܶܠܶܗ، ܓܪܶܫ ܠܶܗ ܐܽܘ ܐܰܒܪܰܝܕ̥ܶܗ ܡܽܐܘ ܡܰܘܬܳܐ. ܒܺܐܝ ܗܰܝܡܳܢܽܘܬ̥ܳܐ ܡܒܰܪܰܟ̥ ܠܶܗ ܐܺܝܣܚܳܩ، ܠܝܰܥܩܽܘܒ ܘܠܥܺܝܣܽܘ ܠܰܫܰܢ ܐܰ ܙܰܒ̈ܢܶܐ ܕܓܶܕܳܐܬ̥ܶܢ. ܒܺܐܝ ܗܰܝܡܳܢܽܘܬ̥ܳܐ ܐܺܝ ܢܰܩܩܰܐ ܕܝܰܥܩܽܘܒ ܕܶܡܩܰܪܰܘܘܰܝܠܶܗ ܠܽܐܘ ܡܰܘܬܳܐ، ܣܓ̥ܶܕ̥ ܠܶܗ ܥܰܠ ܪܺܝܫܶܗ ܕܺܐܝ ܚܰܛܪܰܝܕ̥ܶܗ ܠܰܐܠܳܗܳܐ، ܘܡܒܰܪܰܟ̥ ܠܶܗ ܠܟܽܠ ܚܰܕ̱ ܡܰܐܢܢܰܒ̈ܢܶܐ ܕܝܰܘܣܶܦ. ܒܺܐܝ ܗܰܝܡܳܢܽܘܬ̥ܳܐ ܐܺܝ ܢܰܩܩܰܐ ܕܝܰܘܣܶܦ ܡܩܰܪܰܘܠܶܗ ܠܽܐܘ ܡܰܘܬܳܐ، ܬ̥ܟܶܪܠܶܗ ܐܺܝ ܢܦܰܩܬܳܐ ܕܰܢܢܰܒ̈ܢܶܐ ܕܺܐܝܣܪܳܐܶܝܠ، ܘܡܳܐܨܶܠܶܐ ܥܰܠܰܐ ܓܰܪ̈ܡܰܝܕ̥ܶܗ. ܒܰܪܶܟ̥ܡܳܪܝ܀

ܒ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܕ: ܝܘ ـ ܝܚ܇ ܗ: ܐ ـ ܗ 2Corinthians 4:16-18, 5:1-5

ܡܽܐܘ ܣܰܒܰܒܰܐܢܳܐ ܠܶܓ ܒܶܛܠܺܝܢܰܐ (ܪܳܦܺܝܢܰܐ). ܘܰܠܰܘ ܐܽܘ ܐܶܢܣܰܢܰܝܕ̥ܰܢ (ܔܰܣܰܕܰܝܕ̥ܰܢ) ܐܽܘ ܒܰܪܳܝܳܐ ܓܚܳܪܽܘ، ܐܶܠܳܐ ܗܰܘܳܐ ܕܠܰܘܓ̥ܶܠ، ܝܰܘܡܳܐ ܒܝܰܘܡܳܐ ܓܡܺܝ̣ܚܰܬ̥ܶܬ̥. ܐܺܝ ܥܺܝܩܽܘܬ̥ܳܐ ܕܽܐܘ ܙܰܒܢܰܐܢܳܐ، ܐܺܝ ܢܰܩܩܰܐ ܕܡܺܝܬܰܟܺܝܠܳܐ ܒܽܐܘ ܫܽܘܒܚܳܐ ܪܰܒܳܐ ܕܠܰܬܠܶܐ ܚܰܪܰܝܬܳܐ، ܘܕܟܶܬܝܳܐ ܚܰܕ̥ܺܝܪܳܐ ܐܶܠܰܢ ܠܥܳܠܰܡ ܥܳܠܡܺܝܢ، ܓ̥ܰܠܰܒܶܐ ܟܪܺܝܬ̥ܳܐܝܳܐ. ܠܳܐ ܒܽܐܘ ܡܶܕܶܐ ܕܟܳܡܶܚܙܶܐ ܟܳܚܰܝܪܺܝܢܰܐ، ܐܶܠܳܐ ܒܽܐܘ ܡܶܕܶܐ ܕܠܶܓ ܡܶܚܙܶܐ. ܐܽܘ ܡܶܕܶܐ ܕܟܳܡܶܚܙܶܐ ܡܘܰܩܩܰܬܝܳܐ، ܐܶܠܳܐ ܐܽܘ ܡܶܕܶܐ ܕܠܶܓ ܡܶܚܙܶܐ، ܠܥܳܠܰܡ ܓܦܳܝܶܫ. ܟܳܕ̥ܥܺܝܢܰܐ ܐܽܘ ܒܰܝܬܰܝܕ̥ܰܢ ܕܒܺܐܝ ܐܰܪܥܰܐܬ̥ܶܐ ܕܟܶܬܝܳܐ ܔܶܣܕܰܢܺܝ، ܐܺܝ ܢܰܩܩܰܐ ܕܚܳܐܪܽܘ، ܟܶܬܠܰܢ ܥܡܰܐܪܰܐ ܡܰܐܠܳܗܳܐ. ܒܰܝܬܳܐ ܐܰܒܰܕܺܝ، ܕܠܳܐ ܣܺܝܡ ܒܰܐܢܢܺܝ̈ܕ̥ܳܬ̥ܳܐ ܕܰܐܢܢܳܫ̈ܶܐ ܒܺܐܝ ܫܡܰܝܳܐ. ܘܡܰܘܟ̥ܰܐ ܡܶܫܬܰܩܢܰܐ، ܘܡܚܰܨܪ̈ܶܐܢܰܐ، ܕܠܰܘܫܺܝܢܰܐ (ܡܰܝܕܺܝܢܰܐ) ܐܽܘ ܒܰܝܬܰܝܕ̥ܰܢ ܕܒܺܐܝ ܫܡܰܝܳܐ. ܡܶܕ ܠܘܶܫܠܰܢ، ܗܰܘ ܓܦܰܝܫܺܝܢܰܐ ܙܰܠܛܳܢ̈ܶܐ. ܘܽܐܘܥܕܳܐ ܕܟܶܬܢܰܐ ܠܘܺܝ̈ܫܶܐ ܐܽܘ ܒܰܝܬܰܐܢܳܐ، ܡܽܐܘ ܝܽܘܩܪܰܝܕ̥ܶܗ ܒܚܰܨܪ̈ܰܬ ܓܡܶܥܛܰܪܕ̥ܺܝ̣ܢܰܐ. ܘܠܳܐ ܟܶܐܒܥܺܝܢܰܐ ܕܫܶܠܚܺܝܢܰܐ ܠܶܗ. ܐܶܠܳܐ ܕܠܰܘܫܺܝܢܰܐ ܠܰܠܥܶܠ ܡܺܢܶܗ. ܠܰܫܰܢ ܗܰܘܳܐ ܕܟܶܬܝܳܐ ܠܳܐ ܡܳܝܽܘܬ̥ܳܐ، ܕܡܶܒܠܶܥ ܒܺܐܝ ܘܰܨܺܝܛܰܐ ܕܰܚܚܰܝ̈ܶܐ. ܘܗܺܝܝܶܐ ܐܰܠܳܗܳܐ ܡܚܰܕܰܪܠܶܗ ܠܰܢ ܠܰܗ̱ܬ̥ܶܐ، ܘܟ̥ܶܐ ܪܰܐܗܺܝܢ (ܟܳܦܺܝܠܳܐ) ܕܰܚܚܰܝ̈ܶܐ، ܗܽܘܠܶܗ ܠܰܢ ܐܺܝ ܪܽܘܚܰܝܕ̥ܶܗ. ܒܰܪܶܟ̥ܡܳܪܝ܀

ܓ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܗ: ܝܒ ـ ܟܐ Romans 5:12-21

ܟ̥ܶܕ ܐܰܝܕܰܪܒܳܐ ܒܺܐܝ ܘܰܨܺܝܛܰܐ ܕܐܶܢܣܰܐܢ ܚܰܕ̱، ܐܺܝ ܚܛܺܝܬ̥ܳܐ ܠܽܐܘ ܥܳܠܡܳܐ ܥܰܒܺܝܪܳܐ، ܘܒܺܐܝ ܘܰܨܺܝܛܰܐ ܕܺܐܝ ܚܛܺܝܬ̥ܳܐ ܐܽܘ ܡܰܘܬܳܐ، ܗܰܘܟ̥ܰܐ ܣܬܶܐ ܡܰܡܠܰܟ ܠܶܗ ܠܐܽܘ ܡܰܘܬܳܐ ܥܰܠ ܟܽܠܠܶܗ ܐܰ ܐ̱ܢܳܫ̈ܶܐ. ܡܺܝܕ̥ܶܐ ܕܟܽܠܠܶܗ ܚܰܛܶܢ. ܘܺܐܝ ܚܛܺܝܬ̥ܳܐ، ܡܶܐܩܶܡ ܡܽܐܘ ܩܰܐܢܽܘܢ ܒܽܐܘ ܥܳܠܡܳܐ ܗ̱ܘܰܐ. ܐܶܠܳܐ ܡܺܝܕ̥ܶܐ ܕܠܰܬܗ̱ܘܰܐ ܩܰܐܢܽܘܢ، ܐܺܝ ܚܛܺܝܬ̥ܳܐ ܠܳܐ ܡܶܚܫܳܘܳܐ ܗ̱ܘܰܐ. ܐܶܠܳܐ ܡܰܡܠܰܟ̥ ܠܶܗ ܠܽܐܘ ܡܰܘܬܳܐ ܡܶܐ ܐܳܕܳܡ ܗܽܘܠ ܡܽܘܫܶܐ، ܘܥܰܠܠܰܗ̱ܢܺܝ ܕܠܳܐ ܚܰܛܶܢ ܗ̱ܘܰܐ ܒܽܐܘ ܫܶܟܶܠ ܕܳܐܕ̥ܳܡ، ܕܶܬܘܶܪ ܗ̱ܘܰܝܠܶܗ ܐܽܘ ܦܽܘܩܕܳܢܳܐ. ܗܰܘܳܐ ܕܡܰܕܶܠ ܗ̱ܘܰܐ ܥܰܠܠܰܗ̱ܘܳܐ ܕܓܶܕܳܐܬ̥ܶܐ. ܐܶܠܳܐ ܐܺܝ ܢܦܰܠܬܳܐ ܠܰܬܝܳܐ ܟ̥ܕܺܝ ܡܰܘܗܰܒܬ̥ܳܐ. ܐܺܝܕ̥ܰܐ ܡܽܐܘ ܣܰܒܰܒ ܕܺܐܝ ܢܦܰܠܬܳܐ ܕܚܰܕ̱ ܓ̥ܰܠܰܒܶܐ ܡܰܝܺܬ̥ܺܝ، ܡܶܩܩܰܐ ܒܶܠܐܰܙܝܰـܕ (ܒܽܘ ܙܳܝܽܘܕܳܐ)، ܐܺܝ ܛܰܝܒܽܘܬ̥ܳܐ ܘܺܐܝ ܡܰܘܗܰܒܬ̥ܳܐ ܕܰܐܠܳܗܳܐ ܡܳܪܰܢ ܝܶܫܽܘܥ ܡܫܺܝܚܳܐ، ܒܓ̥ܰܠܒܶܐ ܓܙܰܝܕܳܐ. ܐܺܝ ܡܰܘܗܰܒܬ̥ܳܐ ܕܰܐܠܳܗܳܐ، ܠܳܐ ܓܡܺܝܬܰܟܺܝܠܳܐ ܥܰܡܺܝ ܚܛܺܝܬܳܐ ܕܽܐܘ ܐܶܢܣܰܢ. ܡܺܝܕ̥ܶܐ ܕܽܐܘ ܚܶܟܶܡ ܕܶܚܟܺܝܡ ܐܶܒܶܗ ܐܽܘ ܡܰܕܝܽܘܢ، ܗܰܘܺܝ ܠܺܝ ܡܰܕܝܽܘܢܺܝܶܐ (ܕܰܝܢܽܘܢܶܐ). ܐܶܠܳܐ ܐܺܝ ܡܰܘܗܰܒܬ̥ܳܐ ܕܗܺܝܘܳܐ ܒܶܬ̥ܬ̥ܶܪ ܡܶܐ ܚܛܳܗ̈ܶܐ ܓ̥ܰܠܰܒܶܐ، ܡܰܡܬܶܠܰܗ̇ ܬܰܒܪܺܝܰܐ (ܛܪܶܠܰܗ̱̇ ܕܡܺܝ̣ܒܰܪܺܝ̣ܢܰܐ). ܐܺܝܕ̥ܰܐ ܡܽܐܘ ܣܰܒܰܒ ܕܺܐܝ ܬܘܰܪܬܳܐ ܕܽܐܘ ܩܰܐܢܽܘܢ ܕܚܰܕ̱، ܡܰܡܠܰܟ ܠܶܗ ܠܽܐܘ ܡܰܘܬܳܐ، ܗܰܘܟ̥ܰܐ ܣܬܶܐ ܒܶܠܐܰܙܝܰܕ (ܒܽܘ ܙܳܝܽܘܕܳܐ) ܗܰܢܺܝ ܕܡܶܕܕܶܐ ܛܰܝܒܽܘܬ̥ܳܐ ܘܡܰܘܗܰܒܬ̥ܳܐ ܕܺܐܝ ܥܰـܕܰܐܠܰܐ، ܒܺܐܝ ܘܰܨܺܝܛܰܐ ܕܡܳܪܰܢ ܝܶܫܽܘܥ ܡܫܝ̣ܚܳܐ ܒܰܐܚ̈ܰܝܶܐ ܓܡܰܡܠܟ̥ܺܝ. ܟ̥ܶܕ ܐܰܝܕܰܪܒܳܐ ܡܽܐܘ ܣܰܒܰܒ ܕܺܐܝ ܢܦܰܠܬܳܐ ܕܚܰܕ̱، ܗܰܘܶܢ ܐܰܢܢܳܫ̈ܶܐ ܟܽܠܠܶܗ ܡܰܕܝܽܘܢ، ܗܰܘܟ̥ܰܐ ܣܬܶܐ ܡܽܐܘ ܣܰܒܰܒ ܕܺܐܝ ܥܰـܕܰܐܠܰܐ ܕܚܰܕ̱، ܟܽܠܠܶܗ ܐܰ ܐ̱ܢܢܳܫ̈ܶܐ ܗܰܘܶܢ ܒܶܐܪܺܝ ܘܡܶܕܕܶܐ ܚܰܝ̈ܶܐ. ܟ̥ܶܕ ܐܰܝܕܰܪܒܳܐ ܕܡܽܐܘ ܣܰܒܰܒ ܕܺܐܝ ܠܳܐ ܛܰܐܥܰܐ ܕܚܰܕ̱، ܗܰܘܶܢ ܐܰܢܢܳܫ̈ܶܐ ܟܽܠܠܶܗ ܚܰܛܳܝ̈ܶܐ، ܗܰܘܟ̥ܰܐ ܣܬܶܐ ܡܽܐܘ ܣܰܒܰܒ ܕܺܐܝ ܛܰܐܥܰܐ ܕܚܰܕ̱، ܟܽܠܠܶܗ ܓܬܳܗ̱ܘܶܢ ܥܶܕ̈ܶܠ. ܐܽܘ ܩܰܐܢܽܘܢ، ܠܰܫܰܢ ܕܙܰܝܕܳܐ ܐܺܝ ܚܛܺܝܬܳܐ ܐܰܬ̥ܺܝ. ܐܶܠܳܐ ܒܺܐܝ ܕܽܘܟܬ̥ܳܐ ܕܙܰܐܺܝܕܳܐ ܐܺܝ ܚܛܺܝܬ̥ܳܐ، ܬܰܡܳܐ ܙܰܐܺܝܕܳܐ ܐܺܝ ܛܰܝܒܽܘܬ̥ܳܐ. (21)ܟ̥ܶܕ ܐܰܝܕܰܪܒܳܐ ܕܒܺܐܝ ܘܰܨܺܝܛܰܐ ܕܺܐܝ ܚܛܺܝܬ̥ܳܐ ܡܰܡܠܰܟ̥ ܠܶܗ ܠܐܽܘ ܡܰܘܬܳܐ، ܗܰܘܟ̥ܰܐ ܣܬܶܐ ܒܺܐܝ ܘܰܨܺܝܛܰܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ ܓܡܰܡܠܟ̥ܳܐ ܐܺܝ ܛܰܝܒܽܘܬ̥ܳܐ ܘܺܐܝ ܥܰـܕܰܐܠܰܐ ܘܐܰ ܚܰܝ̈ܶـܐ ܕܶܠܥܳܠܰܡ. ܒܰܪܶܟ̥ܡܳܪܝ̱܀

ܕ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܗ: ܐ ـ ܝܐ Romans 5:1-11

ܡܺܝܕ̥ܶܐ ܕܒܺܐܝ ܗܰܝܡܳܢܽܘܬ̥ܳܐ ܡܒܰܪܺܝܢܰܐ، ܒܺܐܝ ܘܰܨܺܝܛܰܐ ܕܡܳܪܢ ܝܶܫܽܘܥ ܡܫܺܝܚܳܐ ܓܬܳܗ̱ܘܶܐ ܠܰܢ ܫܠܳܡܳܐ ܓܰܢ̱ܒ ܐܰܠܳܗܳܐ. ܘܒܺܐܝ ܗܰܝܡܳܢܽܘܬ̥ܳܐ ܕܶܐܒܶܗ، ܡܶܕܠܰܢ ܐܺܝ ܛܰܝܒܽܘܬ̥ܰܬ̥ܶܗ ܕܶܐܒܰܗ̇ ܟܳܣܽܘܟܢܺܝܢܰܐ، ܘܟܶܬܠܰܢ ܫܽܘܒܗܳܪܳܐ ܒܽܐܘ ܣܰܒܪܳܐ ܕܺܐܝ ܬܶܫܒܽܘܚܬܳܐ ܕܰܐܠܳܗܳܐ. ܘܠܳܐ ܗܰܬ̥ܶܐ ܒܶܠܚܽܘܕ̥ܶܐ. ܐܶܠܳܐ ܟܶܬܠܰܢ ܫܽܘܒܗܳܪܳܐ ܒܰܥܳܩܳܬ̥ܰܝ̈ܕ̥ܰܢ ܣܬܶܐ. ܡܺܝܕ̥ܶܐ ܕܟܽܘܕ̥ܥܺܝܢܰܐ، ܕܺܐܝ ܥܺܝܩܽܘܬ̥ܳܐ، ܡܣܰܝܒܪܳܢܽܘܬ̥ܳܐ ܟܳܡܟܰܡܠܳܐ ܐܶܒܰܢ. ܘܺܐܝ ܡܣܰܝܒܪܳܢܽܘܬ̥ܳܐ، ܓܛܶܪܝܳܐ ܕܶܡܬܰܚܡܠܺܝܢܰܐ. ܘܽܐܘ ܬܰܚܰܡܡܽܘܠ ܣܰܒܪܳܐ. ܘܐܽܘ ܣܰܒܪܳܐ ܠܳܐ ܟܳܡܢܰܐܟܶܦ. ܡܺܝܕ̥ܶܐ ܕܒܺܐܝ ܘܰܨܺܝܛܰܐ ܕܺܐܝ ܪܽܘܚܳܐ ܩܰܕܺܝܫܳܐ ܕܗܺܝܘܳܐ ܐܶܠܰܢ، ܐܺܝ ܚܽܘܒܳܐ ܕܰܐܠܳܗܳܐ ܩܰܠܺܝܥܳܐ ܥܰܠܰܐ ܠܶܒܰܘ̈ܳܬ̥ܰܝܕ̥ܰܢ. ܡܫܺܝܚܳܐ، ܐܰܚܢܰܐ ܕܟܶܬܗ̱ܘܰܝܢܰܐ ܕ̥ܰܥܺܝܦ ܡܶܚܠܰܦ ܐܰ ܚܰܛܳܝ̈ܶܐ ܟܽܠܠܶܗ، ܒܙܰܒܢܳܐ ܡܥܰܝܢܳܐ ܡܰܝܶܬ̥. ܘܐ̱ܢܳܫܳܐ، ܨܰܥܒܳܝܳܐ ܕܡܳܝܶܬ̥ ܡܶܚܠܰܦ ܐܰ ܚܰܛܳܝ̈ܶܐ. ܡܶܚܠܰܦ ܐܰ ܛܳܘ̈ܶܐ، ܒܰܠܟܺܝ ܐ̱ܢܳܫܳܐ ܣܳܝܶܡ ܔܰܨܰܐܪܰܐ. ܗܰܪܟܶܐ ܓܡܰܚܘܶܐ ܐܰܠܳܗܳܐ ܐܺܝ ܚܽܘܒܰܝܕ̥ܶܗ ܕܓܰܢ̱ܒܰܝܢܰܐ. ܐܺܝܕ̥ܰܐ ܐܰܚܢܰܐ ܕܟܶܬܗ̱ܘܰܝܢܰܐ ܚܰܛܳܝ̈ܶܐ ܡܫܺܝܚܳܐ ܡܰܝܶܬ̥ ܡܶܚܠܳܦܰܝܢܰܐ، ܡܶܩܩܰܐ ܒܶܠܐܰܙܝܰܕ ܐܽܘܥܕܳܐ ܓܡܺܝܒܰܪܺܝܢܰܐ ܒܽܐܘ ܐܰܕܡܰܝܕ̥ܶܗ، ܘܶܐܒܶܗ ܓܟ̥ܳܠܨܺܝܢܰܐ ܡܽܐܘ ܪܽܘܓ̥ܙܳܐ. ܐܺܝܕ̥ܰܐ ܐܰܚܢܰܐ ܕܟܶܬܗ̱ܘܰܝܢܰܐ ܕܶܔ̰ܡܶܢ، ܒܺܐܝ ܘܰܨܺܝܛܰܐ ܕܽܐܘ ܡܰܘܬܳܐ ܕܽܐܘ ܐܰܒܪܰܝܕ̥ܶܗ ܣܶܡܠܶܗ ܐܰܥܡܰܢ ܫܠܳܡܳܐ، ܡܶܩܩܰܐ ܒܶܠܐܰܙܝܰـܕ ܒܽܐܘ ܫܠܳܡܳܐ ܕܰܐ ܚܰܝ̈ܶܐ ܕܽܐܘ ܐܰܒܪܰܝܕ̥ܶܗ ܓܟ̥ܳܠܨܺܝܢܰܐ. ܘܠܳܐ ܗܰܘܟ̥ܰܐ ܒܶܠܚܽܘܕ̥ܶܐ، ܐܶܠܳܐ ܟܶܬܠܰܢ ܫܽܘܒܗܳܪܳܐ ܣܬܶܐ ܒܰܐܠܳܗܳܐ، ܕܒܺܐܝ ܘܰܨܺܝܛܰܐ ܕܡܳܪܰܢ ܝܶܫܽܘܥ ܡܫܺܝܚܳܐ ܐܽܘܥܕܳܐ ܡܰܩܒܶܠܰܢ ܐܽܘ ܫܠܳܡܳܐ. ܒܰܪܶܟ̥ܡܳܪܝ܀

ܗ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܽܘ̈ܠܳܣܳܝܶܐ
ܒ: ܟ ـ ܟܓ܇ ܓ: ܐ ـ ܕ Colossians 2:20-23, 3:1-4

ܐܺܝܕ̥ܰܐ ܥܰܡ ܡܫܺܝܚܳܐ ܡܰܐ ܐܶܣܛܽܘ̈ܟܣܶܐ (ܥܰܢܰܐܨܶܪ̈ ܐܰܘ ܡܰܕ̈ܕܺܝܰܬ) ܕܽܐܘ ܥܳܠܡܰܐܢܳܐ ܡܰܝܺܬ̥ܽܘܬܽܘ، ܩܰܝ ܟ̥ܶܐ ܐ̱ܢܳܫ̈ܶܐ ܕܟܳܡܶܣܬܰܥܡܠܺܝ ܒܽܐܘ ܥܳܠܡܰܢܳܐ ܓܥܰܝܫܽܘܬܽܘ؟ «ܠܰܗ̱ܢܳܐ ܠܳܐ ܡܩܰܕܡܰܬ»، «ܘܗܰܢܳܐ ܠܳܐ ܛܳܥܡܰܬ»، «ܘܠܰܗ̱ܢܳܐ ܠܳܐ ܬܶܒܥܰܬ» ܗܰܢܺܝ ܣܢܺܝܩܽܘܬ̥ܳܐ ܕܟܳܚܽܘܪܘܳܐ، ܘܘܰܐܨܺܝ̈ܰܬ ܘܝܽܘ̈ܠܦܳܢܶـܐ ܕܰܐܢܢܳܫ̈ܶܐܢܶـܐ. ܟܳܡܰܚܘܶܢ ܒܦܳܐܬ̥ܳܐ ܡܰܟܶܟ̥ܬܳܐ ܘܒܙܽܘܥܬ̥ܳܐ ܕܰܐܠܳܗܳܐ، ܕܟܺܝܬ ܐܰܒܒܶܗ ܡܶܠܬ̥ܳܐ ܕܺܐܝ ܚܶܟܡܶܐ، ܘܗܶܢܢܶܗ ܠܳܐ ܓܡܰܪܚܡܺܝ ܥܰܠܽܘ ܔܰܣܰܕ، ܘܒܽܐܘ ܡܶܕܶܐ ܕܠܰܬܝܳܐ ܡܝܰܩܪܳܐ، ܟܽܘܙܙܶܢ ܒܶܬ̥ܪܺܝ ܣܢܺܝܩܽܘܬ̥ܳܐ ܕܽܐܘ ܔܰܣܰܕ. ܐܺܝܕ̥ܰܐ ܩܰܝܺܡܽܘܬܽܘ ܥܰܡ ܡܫܺܝܚܳܐ، ܛܠܰܒܽܘ ܐܽܘ ܡܶܕܶܐ ܕܟܶܬܝܳܐ ܠܰܠܥܶܠ. ܐܺܝ ܕܽܘܟܬ̥ܳܐ ܕܶܡܫܺܝ̣ܚܳܐ ܓܝܳܬܽܘ ܡܽܐܘ ܝܰܡܺܝܢܳܐ ܕܰܐܠܳܗܳܐ. ܘܡܶܦܬܰܟܶܪܽܘ ܒܽܐܘ ܡܶܕܶܐ ܕܠܰܠܥܶܠ، ܘܠܳܐ ܕܒܺܐܝ ܐܰܪܥܳܐ. ܡܺܝܕ̥ܶܐ ܕܡܰܝܺܬ̥ܽܘܬܽܘ، ܘܰܐܚ̈ܚܰܝܰܬ̥ܟ̥ܽܘ ܥܰܡ ܡܫܺܝܚܳܐ ܡܟܰܣ̈ܝܶܢܶܐ ܒܰܐܠܳܗܳܐ. ܘܺܐܝ ܢܰܩܩܰܐ ܕܶܡܫܺܝܚܳܐ ܗܰܘܳܐ ܕܟܶܬܝܳܐ ܐܰ ܚܰܝܰܝ̈ܕܰܢ ܕܡܶܓܠܶܐ، ܐܺܝ ܢܰܩܩܰܝܳܐ ܗܰܬܽܘ ܣܬܶܐ ܓܡܶܓܠܽܘܬܽܘ ܐܰܥܡܶܗ ܒܽܐܘ ܫܽܘܒܚܳܐ. ܒܰܪܶܟ̥ܡܳܪܝ̱܀

ܘ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܘ: ܐ ـ ܚ Romans 6:1-8

ܡܶܢ ܐܶܡܡܺܝܢܰܐ؟ ܦܰܝܫܺܝܢܰܐ ܒܺܐܝ ܚܛܺܝܬ̥ܳܐ، ܠܰܫܰܢ ܕܺܐܝ ܛܰܝܒܽܘܬ̥ܳܐ ܕܙܰܝܕܳܐ؟ ܚܰܐܫܰܐ. ܗܰܢܺܝ ܕܡܰܐܺܝܬ̥ܺܝܢܰܐ (ܟ̥ܰܠܺܝܨܺܝ̣ܢܰܐ) ܡܽܐܘ ܣܰܒܰܒ ܕܺܐܝ ܚܛܺܝܬ̥ܳܐ، ܐܰܝܕܰܪܒܳܐ ܢܰܩܩܰܐ ܐ̱ܚܪܶܬܳܐ ܥܰܝܫܺܝܢܰܐ ܐܶܒܰܗ̇؟ ܩܰܝ ܠܳܐ ܟܽܘܕ̥ܥܽܘܬܽܘ، ܗܰܢܺܝ ܕܥܰܡܺܝܕ̥ܺܝܢܰܐ ܒܝܶܫܽܘܥ ܡܫܺܝ̣ܚܳܐ، ܒܽܐܘ ܡܰܘܬܰܝܕ̥ܶܗ ܥܰܡܺܝܕ̥ܺܝܢܰܐ؟ ܘܒܺܐܝ ܘܰܨܺܝܛܰܐ ܕܺܐܝ ܡܰܥܡܽܘܕܺܝܬ̥ܳܐ، ܐܰܥܡܶܗ ܩܘܺܝܪܺܘܝܢܰܐ ܘܡܰܝܺܬ̥ܺܝܢܰܐ. ܟ̥ܶܕ ܐܰܝܕܰܪܒܳܐ ܕܝܶܫܽܘܥ ܡܫܺܝ̣ܚܳܐ ܩܰܐܝܶܡ ܡܶܐ ܒܰܝܢܰܐ ܡܺܝ̣̈ܬ̥ܶܐ ܒܺܐܝ ܬܶܫܒܽܘܚܬܳܐ ܕܽܐܘ ܐܰܒܰܝܕܶܗ (ܒܰܐܒܰܝܕ̥ܶܗ̱)، ܗܰܘܟ̥ܰܐ ܣܬܶܐ ܒܰܐܚ̈ܰܝܶܐ ܚܰܕ̈ܬ̥ܶܐ ܐܰܥܡܶܗ ܓܡܰܗ̱ܠܟ̥ܺܝܢܰܐ. ܐܺܝܕ̥ܰܐ ܒܽܐܘ ܫܶܟܶܠ ܕܽܐܘ ܡܰܘܬܰܝܕ̥ܶܗ ܡܫܰܬܠܺܝܢܰܐ (ܙܪܺܝܥܺܝ̣ܢܰܐ)، ܗܰܘܟ̥ܰܐ ܣܬܶܐ ܒܺܐܝ ܩܝܰܡܬܰܝܕ̥ܶܗ ܓܬܳܗ̱ܘܺܝܢܰܐ. ܟܽܘܕ̥ܥܺܝܢܰܐ ܕܽܐܘ ܐܶܢܣܰܢܰܝܕ̥ܰܢ (ܔܰܣܰܕܰܝܕ̥ܰܢ) ܐܽܘ ܥܰܬܺܝܩܳܐ ܨܠܺܝܘ ܐܰܥܡܶܗ، ܠܰܫܰܢ ܕܒܳܛܶܠ ܐܽܘ ܔܰܣܰܕ ܕܺܐܝ ܚܛܺܝܬ̥ܳܐ، ܘܢܰܩܩܰܐ ܐ̱ܚܪܶܬܳܐ ܠܳܐ ܟ̥ܳܕܡܺܝܢܰܐ ܠܺܐܝ ܚܛܺܝܬ̥ܳܐ. ܐܰܝܢܰܐ ܕܡܰܝܶܬ̥، ܟ̥ܰܐܠܶܨ ܡܺܐܝ ܚܛܺܝܬ̥ܳܐ. ܐܺܝܕ̥ܰܐ ܡܰܝܺܬ̥ܺܝܢܰܐ ܥܰܡ ܡܫܺܝܚܳܐ، ܡܗܰܝܡܢܺܝܢܰܐ ܕܰܐܥܡܶܗ ܣܬܶܐ ܓܥܰܝܫܺܝܢܰܐ. ܒܰܪܶܟ̥ܡܳܪܝ܀

ܙ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܬܶܣܰܠܽܘܢܺܝ̈ܩܳܝܶܐ ܐ
ܗ: ܐ ـ ܝܐ 1Thessalonians 5:1-11

ܥܰܠܐܰ ܙܰܒ̈ܢܶܐ ܘܥܰܠܰܐ ܘܰܟ̥̈ܬܰܬ، ܠܰܬܬܰܬܽܘ ܣܢܺܝ̣̈ܩܳܝܶܐ ܕܟܳܬ̥ܰܘ ܐ̱ܢܳܐ ܠܟ̥ܽܘ ܐܰܢܢܰܚܽܘ̈ܢܳܢܰܝܕ̥ܺܝ. ܗܰܬܽܘ ܟܽܘܕ̥ܥܽܘܬܽܘ ܒܶܫܪܳܪܳܐ، ܕܽܐܘ ܝܰܘܡܳܐ ܕܡܳܪܢ، ܟ̥ܕܽܘ ܓܰܢܳܘܳܐ ܗܰܘܟ̥ܰܐ ܒܠܰܠܝܳܐ ܓܕܳܐܬ̥ܶܐ. ܓܕܶܐܡܡܶܢܟ̥ܽܘ ܫܠܳܡܳܐܝܳܐ ܘܫܰܝܢܳܐܝܳܐ، ܘܒܶܬ̥ܬ̥ܶܪ ܔ̣ܓ̥ܰܦܶܠ ܓܩܳܝܶܡ ܐܰܥܠܰܝܝܶܗ ܐܽܘ ܗܰܠܐܰܟ، ܟ̥ܕܰܐ ܩܳܠܶܢ̈ܔܰܬ ܕܰܥܠܺܝ ܛܥܶܢܬܳܐ، ܘܠܶܓ ܟ̥ܽܘܠܨܺܝ. ܗܰܢ̱ܬܽܘ ܐܰܢܢܰܚܽܘ̈ܢܳܢܰܝܕ̥ܺܝ، ܠܳܐ ܦܰܐܺܝܫܽܘܬܽܘ ܒܺܐܝ ܥܶܬܡܰܐ ܕܽܐܘ ܝܰܘܡܰܐ ܗ̱ܘܳܐ، ܚܰܬܬܰܐ ܕܶܟ̥ܕܽܘ ܓܰܢܳܘܳܐ ܕܡܳܛܰܠܟ̥ܽܘ. ܟܽܠܟ̥ܽܘ ܐܰܢܢܰܒ̈ܢܶܐ ܕܽܐܘ ܐܺܝܡܳܡܳܐ، ܘܰܐܢܢܰܒ̈ܢܶܐ ܕܽܐܘ ܢܽܘܗܪܳܐ ܗܰܬܽܘ. ܘܠܰܬܬܰܬܽܘ ܐܰܢܢܰܒ̈ܢܶܐ ܕܺܐܝ ܥܶܬܡܰܐ، ܘܰܐܢܢܰܒ̈ܢܶܐ ܕܽܐܘ ܠܰܠܝܳܐ. ܡܰܗ̱ܘܟ̥ܰܐ، ܠܳܐ ܕܶܡܟ̥ܺܝܢܰܐ ܟ̥ܕܰܐ ܐ̱ܚܪ̈ܶܢܶܐ. ܐܶܠܳܐ ܕܗܳܘܺܝܢܰܐ ܡܰܚܺܝ̣̈ܣܶܐ ܘܗܰܘܢܰܢ ܒܪܺܝ̣ܫܰܝܢܰܐ. ܐܰܝܢܰܐ ܕܟܳܕܶܡܟ̥ܺܝ، ܒܠܰܠܝܳܐ ܟܳܕܶܡܟ̥ܺܝ. ܘܰܐܝܢܰܐ ܕܟܳܪܳܘܳܢ، ܒܠܰܠܝܳܐ ܟܳܪܳܘܶܢ. ܐܰܚܢܰܐ ܐܰܢܢܰܒ̈ܢܶܐ ܕܽܐܘ ܐܺܝܡܳܡܳܐܢܰـܐ، ܓܠܳܙܳܡ ܕܗܳܘܺܝܢܰܐ ܡܰܚܺܝ̈ܣܶܐ ܒܰܦܬܰܟܰܪ̈ܰܝܕ̥ܰܢ. ܘܠܰܘܫܺܝܢܰܐ ܐܺܝ ܒܰܕܠܶܐ ܕܽܐܘ ܚܰܕܺܝܕ، ܕܟܶܬܝܳܐ ܐܺܝ ܗܰܝܡܳܢܽܘܬ̥ܳܐ ܘܺܐܝ ܚܽܘܒܳܐ. ܘܡܰܚܬܺܝܢܰܐ ܒܪܺܝܫܰܢ ܐܺܝ ܟܶܐܡܡܶܐ ܕܽܐܘ ܚܰܕܺܝܕ ܕܟܶܬܝܳܐ ܐܽܘ ܣܰܒܪܳܐ ܕܰܚ̈ܚܰܝܶܐ. ܡܺܝܕ̥ܶܐ ܕܰܐܠܳܗܳܐ، ܠܳܐ ܠܐܽܘ ܪܽܘܓ̥ܙܳܐ ܡܰܚܰܬܠܶܐ ܠܰܢ، ܐܶܠܳܐ ܠܰܫܰܢ ܕܶܡܩܰܝܙܢܺܝܢܰܐ ܐܰ ܚܰܝ̈ܶܐ (ܟ̥ܰܠܰܐܨ) ܕܡܳܪܰܢ ܝܶܫܽܘܥ ܡܫܺܝܚܳܐ. ܗܰܘܳܐ ܕܡܰܝܶܬ̥ ܥܰܠ ܦܳܬ̥ܰܢ. ܐܺܝܕ̥ܰܐ ܐܰܚܢܰܐ ܕܰܡܺܝ̣̈ܟ̥ܶܐ ܘܺܐܝܕ̥ܰܐ ܡܰܚܺܝ̣̈ܣܶܐ، ܐܰܥܡܶܗ ܓܥܰܝܫܺܝ̣ܢܰܐ (ܓܡܰܝܕܺܝ̣ܢܰܐ ܚܰܝ̈ܶܐ). ܡܰܗ̱ܘܟ̥ܰܐ ܡܣܰܗܶܠܽܘ ܚܰܕ̱ ܠܽܐܘ ܚܰܕ̱، ܘܡܰܥܡܶܪܽܘ ܚܰܕ̱ ܠܽܐܘ ܚܰܕ، ܟ̥ܕܽܐܘ ܡܶܕܶܐ ܕܟܳܣܰܝܡܽܘܬܽܘ. ܒܰܪܶܟ̥ܡܳܪܝ܀

ܚ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܬܶܣܰܠܽܘܢܺܝ̈ܩܳܝܶܐ ܒ
ܒ: ܐ ـ ܝܐ 2Thessalonians 2:1-11

ܟܶܒܥܺܝܢܰܐ ܡܶܢܟ̥ܽܘ ܐܰܢܢܰܚܘ̈ܢܳܢܰܝܕ̥ܺܝ، ܥܰܠܺܝ ܡܶܐܬ̥ܰܝܬܳܐ ܕܡܳܪܰܢ ܝܶܫܽܘܥ ܡܫܺܝܚܳܐ، ܘܥܰܠܺܝ ܠܬܰܡܬܰܝܕ̥ܰܢ ܕܶܠܓܰܢ̱ܒܶܗ، ܟ̥ܶܕ ܐܰܬ̥ܺܝ ܐܶܓܰܪܬ̥ܳܐ ܡܶܐ ܓܰܢ̱ܒܰܢ، ܘܟܰܠܶܐ ܡܰܛܺܝ ܐܽܘ ܝܰܘܡܳܐ ܕܡܳܪܰܢ، ܕܟ̥ܰܐܺܝܦܳܐ ܠܳܐ ܡܺܝܗܳܙܽܘܬܽܘ ܒܰܦܬܰܟܰܪ̈ܰܬ̥ܟ̥ܽܘ. ܘܠܳܐ ܙܰܝܥܽܘܬܽܘ ܠܳܐ ܡܶܐ ܡܶܠܬ̥ܳܐ، ܘܠܳܐ ܡܶܐ ܪܽܘܚܳܐ. ܕܠܶܐܙܙܶܐ ܐ̱ܢܳܫܳܐ ܡܰܛܥܰܠܟ̥ܽܘ ܒܚܰܕ̱ ܡܰܐ ܫܶܟ̈ܠܰܐܢܺܝ. ܡܺܝܕ̥ܶܐ ܕܒܺܐܝ ܩܰܡܰܝܬܳܐ، ܐܺܝܕ̥ܰܐ ܕܠܳܐ ܡܶܓܠܶܐ ܐܽܘ ܐܶܢܣܰܐܢ ܕܺܐܝ ܚܛܺܝܬ̥ܳܐ ܐܽܘ ܒܪܳܐ ܕܽܐܘ ܗܰܐܠܰܟ، ܗܰܘܳܐ ܐܽܘ ܡܰܛܝܳܥܳܢܳܐ، ܘܗܰܘܳܐ ܕܟܳܩܳܝܶܡ ܡܩܰܒܶܠ ܕܟܽܠ ܡܰܢ ܕܶܟܡܶܩܪܶܐ ܐܰܠܳܗܳܐ ܘܩܰܕܺܝ̣ܫܳܐ، ܚܰܬܬܰܐ ܒܽܐܘ ܗܰܝܟܠܳܐ ܕܰܐܠܳܗܳܐ ܟ̥ܶܐ ܐܰܠܳܗܳܐ ܕܝܳܬܽܘ. ܘܕܳܐܡܶܪ ܥܰܠ ܪܽܘܚܶܗ ܕܟܶܬܝܳܐ ܐܰܠܳܗܳܐ. ܩܰܝ ܠܳܐ ܟܳܐܬ̥ܶܐ ܠܒܳܠܰܝܟ̥ܽܘ، ܐܺܝ ܢܰܩܩܰܐ ܕܟܶܬܗ̱ܘܰܝܢܳܐ ܓܰܢ̱ܒܰܝܟ̥ܽܘ، ܗܰܢܺܝ ܐ̱ܡܺܝܪܺܝ ܗ̱ܘܰܝܠܺܝ ܐܰܠܟ̥ܽܘ؟ ܘܽܐܘܥܕܳܐ ܟܽܘܕ̥ܥܽܘܬܽܘ ܡܶܢܝܳܐ ܕܟܳܡܰܟܠܶܐ ܠܶܗ، ܠܰܫܰܢ ܕܠܳܐ ܡܶܓܠܶܐ ܡܶܩܶܡ ܡܽܐܘ ܙܰܒܢܰܝܕ̥ܶܗ. ܐܽܘ ܐ̱ܪܳܙܳܐ (ܣܶܪ) ܕܺܐܝ ܚܛܺܝܬܳܐ ܡܶܐ ܙܰܘܢܳܐ ܒܕܶܠܶܗ ܕܫܳܓ̥ܶܠ. ܐܺܝ ܢܰܩܩܰܐ ܗܰܘܳܐ ܕܟܳܡܰܟܠܶܐ ܠܶܗ ܕܡܶܬܠܶܐ ܡܺܐܝ ܚܳܠܳܐ، ܒܶܬ̥ܬ̥ܶܪ ܓܡܶܓܠܶܐ ܐܽܘ ܡܰܚܪܘܳܢܳܐ. ܗܰܘܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܓܡܰܣܶܦ ܠܶܗ ܒܺܐܝ ܪܽܘܚܳܐ ܕܦܶܡܶܗ، ܘܓܶܡܒܰܛܶܠܶܗ ܒܺܐܝ ܡܶܐܬ̥ܰܝܬܰܝܕ̥ܶܗ. ܐܺܝ ܡܶܐܬ̥ܰܝܬܳܐ ܬܰܗ̱ܘܳܐ ܒܽܐܘ ܚܰܝܠܳܐ ܕܽܐܘ ܫܺܐܕ̥ܳܐܝܳܐ. ܘܓܬܽܘܝܳܐ ܒܚܰܝܠܳܐ، ܘܒܥܶܔܽܘ̈ܒܰܬܰܬ، ܘܒܬܶܕ̥ܡܪ̈ܳܬ̥ܳܐ ܕܽܐܘ ܕܽܘܓܠܳܐ. ܘܺܐܝ ܛܳܥܝܽܘܬ̥ܳܐ ܕܺܐܝ ܚܛܺܝܬ̥ܳܐ ܟܽܠܰܗ، ܓܡܰܡܠܟ̥ܳܐ ܥܰܠܰܐ ܗܰܠܺܝ̣̈ܟܶܐ. ܘܥܰܠ ܕܠܳܐ ܡܰܩܒܰܠܠܶܗ ܐܺܝ ܚܽܘܒܳܐ ܕܺܐܝ ܥܰܕܰܐܠܰܐ، ܕܶܐܒܰܗ̇ ܟܶـܬ ܗ̱ܘܰܐ ܐܽܘ ܟ̥ܰܠܰܨ، ܠܰܫܰܢ ܕܶܐܙܙܶܢ ܒܶܬ̥ܪܺܝ ܕܽܘܓܠܳܐ، ܓܶܡܫܰܕܶܪ ܐܰܠܳܗܳܐ ܚܰܝܠܳܐ ܕܺܐܝ ܛܳܥܝܽܘܬ̥ܳܐ (ܗܰܠܰܐܟ). ܘܓܡܶܚܟܳܡܺܝ ܟܽܠܠܶܗ ܗܰܢܺܝ ܕܠܳܐ ܡܗܰܝܡܰܢܢܶܐ ܒܽܐܘ ܫܪܳܪܳܐ، ܐܶܠܳܐ ܡܢܰܩܰܠܠܶܗ ܐܺܝ ܚܛܺܝܬܳܐ. ܒܰܪܶܟ̥ܡܳܪܝ܀

ܛ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܳܘܣ ܒ
ܒ: ܕ ـ ܝܓ 2Timothy 2:4-13

ܠܰܝܬ ܥܰܣܟܰܪ ܕܩܳܕܶܪ ܫܳܦܶܪ ܠܰܗ̱ܘܳܐ ܕܶܡܢܰܩܶܐ ܠܶܗ، ܐܺܝܕ̥ܰܐ ܕܡܰܣܶܪ ܪܽܘܚܶܗ ܒܰܡܡܶܕ̈ܳܢܶܐ ܕܽܐܘ ܥܳܠܡܳܐ. ܘܠܳܐ ܐ̱ܢܳܫܳܐ ܟܺܝܒܶܐ ܕܡܳܝܶܕ ܐܺܝ ܪܺܝܫܳܢܽܘܬ̥ܳܐ، ܐܺܝܕ̥ܰܐ ܕܠܳܐ ܡܗܰܠܶܟ̥ ܠܓܳܪܰܢ ܕܽܐܘ ܩܰܐܢܽܘܢ. ܐܽܘ ܕܰܘܳܪܳܐ ܕܟܳܬܳܥܶܒ، ܓܠܳܙܶܡ ܒܺܐܝ ܩܰܡܰܝܬܳܐ ܗܺܝܝܶܗ ܐܳܟ̥ܶܠ ܡܰܐ ܦܺܐܪ̈ܰܝܕ̥ܶܗ̱ (ܦܶܟܺܝܶܐ) ܦܗܰܡ ܐܽܘ ܡܶܕܶܐ ܕܟܳܐܡܰܪ ܐ̱ܢܳܐ، ܘܗܺܝܝܶܐ ܡܳܪܰܢ ܓܕܳܐܒܶܐ ܠܳܟ̥ ܚܶܟܡܶܐ ܒܟܽܠ ܡܶܕܶܐ. ܟ̥ܕܺܝ ܒܶܫܪܰܐ (ܡܓܰܠܝܽܘܢ) ܕܶܡܒܰܫܰܪ ܠܺܝ، ܡܰܡܬܺܝ ܠܒܳܠܳܟ̥ ܕܡܳܪܰܢ ܝܶܫܽܘܥ ܡܫܺܝܚܳܐ، ܗܰܘܳܐ ܕܟܶܬܝܳܐ ܡܽܐܘ ܙܰܪܥܳܐ ܕܕܰܘܺܝܕ، ܩܰܐܝܶܡ ܡܶܐ ܒܰܝܢܰܐ ܡܺܝ̈ܬ̥ܶܐ. ܘܠܰܫܰܢܰܗ̇ ܟܳܡܬܰܚܡܰܠ ܐ̱ܢܳܐ ܐܰ ܕ̥ܰܪ̈ܒܶܐ ܕܰܩܩܰܝ̈ܕܶܐ (ܙܶܢܶܐܔܶܪ̈)، ܟ̥ܶܐ ܣܰܝܳܡܳܐ ܕܰܒܒܺܝ̈ܫܳܬ̥ܳܐ. ܐܶܠܳܐ ܐܺܝ ܡܶܠܬ̥ܳܐ ܕܰܐܠܳܗܳܐ ܠܳܐ ܚܒܺܝܣܳܐ. ܡܽܐܘ ܣܰܒܰܒܰܐܢܳܐ ܠܰܫܰܢ ܐܰ ܡܢܰܩ̈ܝܶܐ، ܟܽܠ ܡܶܕܶܐ ܟܳܡܣܰܝܒܰܪ ܐ̱ܢܳܐ. ܚܰܬܬܰܐ ܕܗܶܢܢܶܐ ܣܬܶܐ، ܒܺܐܝ ܘܰܐܨܺܝܛܰܐ ܕܡܳܪܰܢ ܝܶܫܽܘܥ ܡܫܺܝܚܳܐ، ܕܡܰܝܕܺܝ ܚܰܝ̈ܶܐ (ܟ̥ܳܠܨܺܝ) ܘܫܽܘܒܚܳܐ ܕܶܠܥܳܠܰܡ. ܡܶܬܝܰܩܶܢܽܘ ܠܺܝ ܡܶܠܬ̥ܳܐ. ܐܺܝܕ̥ܰܐ ܡܰܐܺܝܬ̥ܺܝܢܰܐ ܐܰܥܡܶܗ، ܡܗܰܝܡܢܺܝܢܰܐ ܕܰܐܥܡܶܗ ܣܬܶܐ ܓܡܰܝܕܺܝܢܰܐ ܚܰܝ̈ܶܐ.. ܘܺܐܝܕ̥ܰܐ ܕܶܡܣܰܝܒܪܺܝܢܰܐ، ܓܡܰܡܶܠܟ̥ܺܝܢܰܐ ܐܰܥܡܶܗ. ܘܺܐܝܕ̥ܰܐ ܕܟܳܦܪܺܝܢܰܐ ܐܶܒܶܗ، ܗܺܝܝܶܐ ܣܬܶܐ ܓܟܳܦܶܪ ܐܶܒܰܢ. ܘܺܐܝܕ̥ܰܐ ܕܠܳܐ ܡܗܰܝܡܢܺܝܢܰܐ ܐܶܒܶܗ، ܗܺܝܝܶܐ ܢܰܩܩܰܐ ܐ̱ܚܪܶܬܳܐ ܒܺܐܝ ܗܰܝܡܳܢܽܘܬ̥ܰܝܕ̥ܶܗ ܓܦܳܝܶܫ. ܡܺܐܝܕ̥ܶܐ ܕܗܺܝܝܶܐ، ܠܰܝܒܶܐ ܕܟܳܦܶܪ ܒܪܽܘܚܶܗ. ܒܰܪܶܟ̥ܡܳܪܝ܀