ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܘܳܣ ܐ
ܓ: ܐ ـ ܝܗ 1Timothy 3:1-15

ܫܪܳܠܳܐܝܳܐ ܐܺܝ ܡܶܠܬ̥ܰܬ̥ܶܐ (ܔܓ̥ܰܠܺܝܶܐ). ܐܺܝܕ̥ܰܐ ܐ̱ܢܳܫܳܐ ܕܪܳܝܰܓܠܶܗ ܩܰܫܽܘܬ̣ܳܐ، ܥܰܡܰܠ ܫܰܦܺܝܪܳܐ ܓܪܳܝܰܓܠܶܗ. ܫܰܦܺܝܪܳܐ ܝܳܐ ܕܗܳܘܶܐ ܐܽܘ ܩܰܫܳܐ ܕܠܳܐ ܥܰܝܒܳܐ. ܘܗܰܘܺܝ ܓܰܘܪܳܐ ܕܶܚܕ̥ܳܐ ܐܰܢ̱ܬ̣ܬܳܐ. ܘܽܐܘ ܗܰܘܢܰܝܕ̥ܶܗ ܡܰܚܺܝܣܳܐ، ܘܥܰܐܩܶܠ، ܘܡܥܰܕܠܳܐ، ܘܪܰܚܳܡܳܐ ܕܰܢܽܘܟ̣ܪ̈ܳܝܶܐ ܘܡܰܠܦܳܢܳܐ. ܘܠܳܐ ܡܕܰܐܘܶܡ ܥܰܠܽܘ ܚܰܡܪܳܐ. ܘܠܳܐ ܪܳܗܛܳܐ ܐܝ̣ܕܶܗ ܠܽܐܘ ܡܚܳܝܳܐ. ܐܶܠܳܐ ܕܗܳܘܶܐ ܡܰܟܺܝ̣ܟ̣ܳܐ، ܘܠܳܐ ܡܩܰܬܠܳܢܳܐ ܘܠܳܐ ܪܰܚܳܡܳܐ ܕܰܙܽܘ̈ܙܶܐ (ܟܰܠܠܰܐ). ܘܡܕܰܒܶܪ ܐܽܘ ܒܰܝܬܰܝܕ̥ܶܗ ܫܰܦܺܝܪܳܐ، ܘܨܳܝܶܕ ܐܰܢܢܰܒܢܰܝ̈ܕ̥ܶܗ ܒܛܰܐܥܰܐ ܘܒܟܽܠܰܗ̱̇ ܐܺܝ ܕܰܟ̥ܝܽܘܬ̣ܳܐ (ܢܰܕ̥ܰܐܦܰܐ). ܐܺܝܕ̥ܰܐ ܐܽܘ ܒܰܝܬܳܐ ܕܪܽܘܚܶܗ ܠܳܐܕ̥ܶܥ ܡܕܰܒܶܪ ܫܰܦܺܝܪܳܐ، ܐܰܝܕܰܪܒܳܐ ܓܩܳܕܶܪ ܐܺܝ ܥܺܕ̱ܬܳܐ ܕܰܐܠܳܗܳܐ ܡܕܰܒܶܪ؟ ܐܽܘ ܩܰܫܳܐ، ܛܪܳܐ ܠܳܐܗ̱ܘܶܐ ܚܰܕ̱ ܕܟܶܬܝܳܐ ܚܰܕ̱ܬ̣ܳܐ ܒܺܐܝ ܗܰܝܡܳܢܽܘܬ̣ܳܐ، ܠܰܫܰܢ ܕܠܳܐ ܡܺܝܪܰܡܪܶܡ (ܟܶܐܒܰܪ) ܘܢܳܦܶܠ ܒܽܐܘ ܚܶܐܟܶܡ ܕܽܐܘ ܫܺܐܕ̥ܳܐ. ܘܫܰܦܺܝܪܳܐ ܝܳܐ ܣܬܶܐ ܕܗܳܘܶܐ ܠܶܗ، ܣܳܗܕܽܘܬ̣ܳܐ ܫܰܦܺܝܪܬܳܐ ܡܶܐ ܠܰܪܘܰܠ، ܚܰܬܬܰܐ ܕܠܳܐ ܢܳܦܶܠ ܒܽܘ ܥܰܝܒܳܐ ܘܒܽܐܘ ܦܰܚܳܐ ܕܽܐܘ ܫܺܐܕܳܐ. ܗܰܘܟ̣ܰܐ ܣܬܶܐ ܫܰܦܺܝܪܳܐܝܳܐ ܕܗܳܘܶܢ ܐܰ ܫܰܡܳܫ̈ܶܐ ܢܰܐܕܺܝ̣̈ܦܶܐ ܘܡܶܚܬܰܪ̈ܡܶܐ. ܘܠܳܐ ܡܶܔܓ̥ܳܠܺܝ ܒܶܬܪܶܐ ܠܶܫܳܢ̈ܶܐ. ܘܠܳܐܗ̱ܘܶܢ ܡܰܝ̈ܠܶܐ ܠܽܐܘ ܚܰܡܪܳܐ ܓ̥ܰܠܰܒܶܐ. ܘܠܳܐ ܪܳܚܡܺܝ ܐܰ ܡܰܢ̈ܦܰܥܰܬ ܚܰܪܰܐܡ. ܐܶܠܳܐ ܕܨܰܝܕܺܝ ܐܽܘ ܐ̱ܪܳܙܳܐ ܕܺܐܝ ܗܰܝܡܳܢܽܘܬ̣ܳܐ ܒܢܺܝܰܐ ܛܰܐܗܶܪ. ܘܗܰܐܢܺܝ ܛܪܳܐ ܒܺܐܝ ܩܰܡܰܝܬܳܐ ܛܪܳܐ ܡܺܝܔܰܪܒܺܝ. ܘܺܐܝܕ̥ܰܐ ܗܰܘܶܢ ܕܠܳܐ ܥܰܝܒܳܐ، ܛܪܳܐ ܒܶܬ̣ܬ̣ܶܪ ܗܳܘܶܢ ܫܰܡܳܫ̈ܶܐ. ܘܗܰܘܟ̣ܰܐ ܣܬܶܐ ܐܰ ܢ̈ܢܶܫܶܐ (ܕܰܐ ܟ̥ܰܕ̈ܳܡܶܐ) ܛܪܳܘܶܢ ܢܰܐܕ̥ܺܝ̈ܦܶܐ، ܘܐܽܘ ܗܰܘܢܰܬ̣ܬ̣ܶܗ ܡܰܚܺܝܣܳܐ. ܘܡܗܰܝ̈ܡܢܶܐ ܒܟܽܠ ܡܶܕܶܐ. ܘܠܳܗ̱ܘܶܢ ܣܰܝ̈ܳܡܶܐ ܕܺܐܝ ܦܶܛܢܰܐ. ܐܰ ܫܰܡ̈ܳܫܶܐ ܛܪܳܘܶܢ ܐܰܝܢܰܐ ܕܶܚܕܳܐ ܐܰܢ̱ܬ̣ܬܳܐ ܗܰܘܺܝ ܠܶܗ. ܘܡܕܰܒܰܪ ܠܶܗ ܐܰܢܢܰܒ̈ܢܰܝܕ̥ܶܗ ܘܽܐܘ ܒܰܝܬܰܝܕ̥ܶܗ ܫܰܦܺܝܪܳܐ. ܡܺܝܕ̥ܶܐ ܕܰܐܝܢܰܐ ܕܗܳܘܶܢ ܫܰܡܳܫ̈ܶܐ ܡܥܰܕ̈ܠܶܐ، ܕܰܪܓ̣ܳܐ ܛܳܘܳܐ ܟܫܳܩܠܺܝ ܠܪܽܘܚܰܝܝܶܗ. ܘܦܳܬ̥̈ܳܬ̥ܶܐ ܓܰܠܝ̈ܶܐ ܓ̥ܰܠܰܒܶܐ ܒܺܐܝ ܗܰܝܡܳܢܽܘܬ̣ܳܐ ܕܝܶܫܽܘܥ ܡܫܺܝ̣ܚܳܐ. ܗܰܢܺܝ ܟܟܳܬ̣ܰܘ ܐ̱ܢܳܐ ܠܳܟ. ܟܶܬܠܺܝ ܣܰܒܪܳܐ ܕܥܰܠ ܩܰܪܺܝܘܳܐ ܐܳܬ̥ܶܐ ܐ̱ܢܳܐ ܣܺܝܕܳܟ. ܘܶܐܢ ܕܡܺܝܥܰܘܰܩܢܳܐ، ܕܶܐܕ̥ܥܰܬ ܐܰܝܕܰܪܒܳܐ ܫܰܦܺܝܪܳܐ ܝܳܐ ܕܫܽܘܓ̥ܠܰܬ ܒܽܐܘ ܒܰܝܬܳܐ ܕܰܐܠܳܗܳܐ، ܕܟܶܬܝܳܐ ܐܺܝ ܥܺܕ̱ܬܳܐ ܕܰܐܠܳܗܳܐ ܐܽܘ ܚܰܝܳܐ، ܘܐܽܘ ܥܰܐܡܽܘܕ ܘܺܐܝ ܫܶܬܶܐܣܬܳܐ ܕܽܐܘ ܫܪܳܪܳܐ. ܒܰܫܪܳܪܳܐ ܪܰܒܳܝܳܐ ܐܽܘ ܐ̱ܪܳܙܰܐܢܳܐ ܕܺܐܝ ܥܰܕܰܐܠܰܐ ܕܰܐܠܳܗܳܐ: ܓܠܶܐ ܒܽܐܘ ܦܰܓ̥ܪܳܐ (ܔܰܣܰܕ). ܘܡܙܰܐܕܶܩ ܒܺܐܝ ܪܽܘܚܳܐ܆ ܘܚܙܶܐ ܠܰܡ̈ܡܰܠܰܐܟ̣ܶܐ. ܘܟܪܺܝܙ ܒܰܝܢܰܐ ܥܰܡ̈ܶܐ. ܘܡܗܰܝܡܶܢ ܒܽܐܘ ܥܳܠܡܳܐ ܘܣܰܐܠܶܩ ܒܫܽܘܒܚܳܐ. ܒܰܪܶܟ̥ܡܳܪܝ܀