ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܗ: ܐ ـ ܝ Romans 15:1-10

ܡܰܕܝܽܘܢܢܰܐ ܐܰܚܢܰܐ ܐܰ ܩܰܘ̈ܝܶܐ، ܕܛܳܥܢܺܝܢܰܐ ܐܽܘ ܟܶܘܳܐ ܕܰܟܰܐܺܝ̈ܘܶܐ. ܘܠܳܐ ܠܪܽܘܚܰܢ ܫܳܦܪܺܝܢܰܐ. ܐܶܠܳܐ ܟܽܠ ܚܰܕ̱ ܡܶܢܰܢ ܠܰܫܢ ܐܺܝ ܥܡܰܪܰܐ، ܛܪܳܐ ܒܰܛܰܘ̈ܘܳܬ̥ܳܐ ܫܳܦܶܪ ܠܽܘ ܩܰܪܺܝܘܰܝܕܶܗ. ܥܰܠ ܕܶܡܫܺܝ̣ܚܳܐ ܣܬܶܐ. ܠܳܐ ܠܺܐܝ ܢܰܦܫܰܝܕ̥ܶܗ (ܠܪܽܘܚܶܗ̱) ܫܰܦܶܪ. ܐܶܠܳܐ ܟ̥ܶܕ ܟܬ̣ܺܝܘ: «ܐܽܘ ܥܰܝܒܳܐ ܕܰܡܥܰܝܒܳܢܰܝܕ̥ܳܟ ܢܰܦܶܠ ܐܰܥܠܺܝ». ܟܽܠ ܡܶܕܶܐ ܕܡܶܐ ܡܶܩܶܡ ܟܬ̣ܺܝܘ، ܠܰܫܰܢ ܕܒܺܐܝ ܡܣܰܝܒܪܳܢܽܘܬ̥ܳܐ ܘܒܺܐܝ ܬܰܣܠܺܝܰܐ ܕܰܟܬ̣ܳܘ̈ܶܐ، ܗܳܘܶܐ ܠܰܢ ܣܰܒܪܳܐ، ܘܠܐܽܘ ܝܽܘܠܦܳܢܰܝܕ̥ܰܢ ܟܬ̥ܺܝܘ. ܐܰܠܳܗܳܐ ܕܺܐܝ ܡܣܰܝܒܪܳܢܽܘܬ̣ܳܐ ܘܕܺܐܝ ܬܰܣܠܺܝܰܐ، ܐܳܒܰܠܟ̣ܽܘ ܕܥܰܝܢܺܝ ܡܶܕܶܐ ܡܶܦܬܰܟܪܺܝܬܽܘ ܚܰܕ̱ ܥܰܠܽܘ ܚܰܕ̱ ܒܝܶܫܽܘܥ ܡܫܺܝ̣ܚܳܐ، ܠܰܫܰܢ ܕܶܡܫܰܒܚܺܝܬܽܘ ܠܰܐܠܳܗܳܐ ܐܽܘ ܐܰܒܳܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ ܒܚܰܕ̱ ܦܶܟܶܪ ܘܒܚܰܕ̱ ܦܶܡܳܐ. ܘܥܰܠܠܰܗ̱ܬ̥ܶܐ ܡܰܩܒܶܠܽܘ ܚܰܕ̱ ܠܽܐܘ ܚܰܕ̱ ܟ̥ܶܕ ܡܫܺܝ̣ܚܳܐ ܣܬܶܐ ܡܰܩܒܶܠܶܗ ܠܰܢ ܠܽܐܘ ܫܽܘܒܚܳܐ ܕܰܐܠܳܗܳܐ. ܘܡܰܗ̱ܘܟ̥ܰܐ ܟܳܐܡܰܪ ܐ̱ܢܳܐ: ܠܰܫܰܢ ܕܶܡܬ̥ܰܒܶܬ ܐܰ ܘܰܥܕ̈ܰܬ ܕܰܐܰܒܳܗ̈ܳܬ̥ܳܐ، ܝܶܫܽܘܥ ܡܫܺܝ̣ܚܳܐ ܟ̣ܕܶܡܠܶܗ̱ ܐܺܝ ܓܙܽܘܪܬܳܐ (ܛܰܗܰܐܪܰܐ) ܡܶܚܠܰܦ ܐܽܘ ܫܪܳܪܳܐ ܕܰܐܠܳܗܳܐ، ܘܰܐ ܥܰܡ̈ܶܐ ܕܶܡܫܰܒܚܺܝ ܠܐܰܠܳܗܳܐ ܡܶܚܠܰܦ ܐܰ ܪ̈ܰܚܡܶܐ ܕܗܰܘܶܢ ܐܰܥܠܰܝܝܶܐ ܟ̣ܶܕ ܟܬ̥ܺܝܘ: «ܓܶܡܫܰܒܰܚܢܳܟ ܒܰܐܥܰܡ̈ܶܐ ܘܠܶܐܫܡܳܟ ܓܶܡܙܰܡܰܪ ܐ̱ܢܳܐ». ܒܰܪܶܟ̥ܡܳܪܝ܀