ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܝܐ: ܝܘ ـ ܠܓ 2Corinthians 11:16-33

ܢܰܩܩܰܐ ܐ̱ܚܪܶܬܳܐ ܟܳܐܡܰܪ ܐ̱ܢܳܐ: ܐ̱ܢܳܫܳܐ ܠܳܐ ܚܳܫܰܘܠܺܝ ܕܟܶܬ ܐ̱ܢܳܐ ܣܰܟ̣ܠܳܐ. ܐܶܠܳܐ ܡܰܩܒܶܠܽܘܠܺܝ، ܘܰܠܰܘ ܕܗܳܘܶܐ ܟ̣ܶܐ ܣܰܟ̣ܠܳܐ. ܠܰܫܰܢ ܕܳܐ̱ܢܳܐ ܣܬܺܝ ܡܺܝܫܰܒܗܰܪ ܐ̱ܢܳܐ ܐܶܫܡܳܐ. ܐܽܘ ܡܶܕܶܐ ܕܟܳܡܶܔܓ̥ܰܠ ܐ̱ܢܳܐ ܠܳܐ ܟ̣ܶܕ ܐܽܘ ܡܳܪܝܳܐ ܟܳܐܒܶܥ ܟܳܡܶܔܓ̥ܰܠ ܐ̱ܢܐ. ܐܶܠܳܐ ܟܶܕ ܒܔܰܗܰܠܰܐ ܒܽܐܝ ܕܽܘܟܬ̣ܰܬ̣ܶܗ ܕܽܐܘ ܫܽܘܒܗܳܪܳܐ. ܡܺܝܕ̥ܶܐ ܕܓ̥ܰܠܰܒܶܐ ܓܡܺܝܫܰܒܗܪܺܝ ܒܽܐܘ ܔܰܣܰܕ܆ ܐܳܢܳܐ ܣܬܶܐ ܓܡܺܝܫܰܒܗܰܪ ܐ̱ܢܳܐ. ܥܰܠ ܕܒܶܦܨܺܝܚܽܘܬܳܐ ܟܳܡܣܰܝܒܪܺܝ̣ܬܽܘ ܐܰ ܣܰܟ̥̈ܠܶܐ (ܒܶܐܥܰܩ̈ܶܠ)، ܥܰܡܡܰܝܳܐ ܕܟܶܬܬܰܐܬܽܘ̣ ܚܰܟܺܝ̈ܡܶܐ. ܥܰܠ ܕܟܳܡܣܰܝܒܪܺܝܬܽܘ̣ ܚܰܕ̱ ܕܣܰܡܟ̥ܽܘ ܝܰܣܺܝܪ̈ܶܐ، ܘܚܰܕ̱ ܕܳܐܟ̣ܰܠܟ̣ܽܘ، ܘܚܰܕ̱ ܕܡܳܐܝܶܕ ܡܶܢܟ̣ܽܘ، ܘܚܰܕ̱ ܕܥܳܠܶܐ ܐܰܥܠܰܝܟ̣ܽܘ. ܘܚܰܕ̱ ܕܡܳܚܰܠܟ̣ܽܘ ܥܰܠ ܦܳܬ̣ܰܝܟ̣ܽܘ. ܟ̣ܶܕ ܒܢܶܟܦܽܘܬ̥ܳܐ ܟܳܐܡܰܪ ܐ̱ܢܳܐ ܗܰܬܶܐ. ܐܰܚܢܰܐ ܕ̥ܰܥܺܝܦ ܐ̱ܢܰܐ. ܒܟܽܠ ܡܶܕܶܐ ܕܣܳܝܶܡ ܔܰܣܰܪܰܐ ܐ̱ܢܳܫܳܐ، ܒܔܰܗܰܠܰܐ ܟܳܐܡܰܪ ܐ̱ܢܳܐ، ܐܳܢܳܐ ܙܶܬ ܡܺܢܶܗ ܓܣܰܡ ܐܢܳܐ ܔܰܣܰܪܰܐ. ܐܶܢ ܥܶܒܪ̈ܳܝܶܢܶܐ܆ ܐܳܢܳܐ ܣܬܶܐ. ܘܶܐܢ ܡܶܐ ܐܺܝܣܪܳܐܶܝܠ ܢܶܐ، ܐܳܢܳܐ ܣܬܶܐ. ܘܶܐܢ ܡܽܐܘ ܙܰܪܥܳܐ ܕܰܐܒܪܳܗܳܡ ܢܶܐ، ܐܳܢܳܐ ܣܬܶܐ. ܘܶܐܢ ܡܫܰܡ̈ܫܳܢܶܐ ܕܶܡܫܺܝ̣ܚܳܐܢܶܐ، ܒܺܐܝ ܢܶܩܨܰܢܺܝܶܐ ܕܽܐܘ ܗܰܘܢܳܐ ܟܳܐܡܰܪ ܐ̱ܢܳܐ: ܐܳܢܳܐ ܙܶܬ ܡܶܢܢܶܗ. ܒܽܐܘ ܬܰܥܒܳܐ، ܙܶܬ. ܘܒܽܐܘ ܡܰܚܝܳܐ، ܙܶܬ. ܘܒܰܐܚܰܒ̈ܣܰܬ، ܙܶܬ. ܒܰܐܡܡܰܘ̈ܬܶܐ، ܢܰܩ̈ܩܰܬ ܓ̥ܰܠܰܒܶܐ. ܡܰܐ ܝܽܘ̈ܕ̥ܳܝܶܐ، ܚܰܡܶܫ ܢܰܩ̈ܩܰܬ ܐܰܪܒܥܺܝ ܐܰܪܒܥܺܝ ܢܳܩܶܨ ܚܕܳܐ ܐܰܟ̣ܺܝܠܺܝ. ܬܠܳܬ̣ ܢܰܩ̈ܩܰܬ ܒܰܚܰܛܪ̈ܳܬ̣ܳܐ ܡܚܶܐ ܐ̱ܢܳܐ. ܚܕ̥ܳܐ ܢܰܩܩܰܐ ܪܔܶܡ ܐ̱ܢܳܐ. ܬܠܳܬ̣ ܢܰܩ̈ܩܰܬ ܐܺܝ ܓܰܡܡܺܝܶܐ ܬܘܺܝܪܳܐ ܬܰܚܬܺܝ. ܠܰܠܝܳܐ ܘܺܐܝܡܳܡܳܐ ܡܰܥܒܰܪ ܠܺܝ ܒܽܐܘ ܒܰܚܰܪ، ܘܰܐܙܙܺܝ ܒܕܰܪ̈ܒܳܢܶܐ ܓ̥ܰܠܰܒܶܐ ܢܰܩ̈ܩܰܬ. ܒܺܐܝ ܬܰܗܠܺܝܟܰܐ ܕܰܢܰܗܪ̈ܰܘܳܬ̣ܳܐ. ܒܺܐܝ ܬܰܗܠܺܝ̣ܟܰܐ ܕܰܓܰܢܳܘ̈ܶܐ. ܒܺܐܝ ܬܰܗܠܺܝܟܰܐ ܕܡܺܐܝ ܔܶܢܣܺܝܰܝܕܺܝ. ܒܽܐܘ ܟ̣ܰܛܰܪ ܗܰܘܺܝ̣ܢܳܐ ܒܰܘ̈ܰܠܰܝܰܬ. ܘܒܽܐܘ ܟ̣ܰܛܰܪ ܒܺܐܝ ܒܰܪܺܝܶܐ. ܘܒܽܐܘ ܟ̣ܰܛܰܪ ܒܽܐܘ ܒܰܚܰܪ. ܒܽܐܘ ܟ̣ܰܛܰܪ ܕܡܰܐܰܚ̈ܶܐ ܡܕܰܓܠܳܢ̈ܶܐ. ܒܽܐܘ ܥܰܡܠܳܐ ܘܒܽܐܘ ܬܰܥܒܳܐ. ܒܽܐܘ ܫܰܗܪܳܐ ܓ̥ܰܠܰܒܶܐ. ܒܽܐܘ ܟܰܦܢܳܐ ܘܒܽܐܘ ܨܰܗܘܳܐ. ܘܒܽܐܘ ܨܰܘܡܳܐ ܓ̥ܰܠܰܒܶܐ. ܒܽܐܘ ܩܽܘܪܳܐ ܘܒܽܐܘ ܙܰܠܛܳܐ. ܓ̣ܰܝܪ ܡܰܐ ܟ̣ܢܽܘ̈ܫܝܶܐ ܓ̥ܰܠܰܒܶܐ ܕܰܐܥܠܺܝ ܕܟܽܠ ܝܰܘܡܳܐ. ܘܽܐܘ ܔܰܗܕܰܝܕܺܝ ܕܠܰܫܰܢ ܟܽܠܠܶܗ ܐܰ ܥܺـ̈ܕܳܬ̣ܳܐ. ܡܰܢ ܟܳܗ̱ܘܶܐ ܟܰܐܺܝܘܳܐ، ܘܳܐܢܳܐ ܠܳܐ ܓܟܳܝܰܘܠܺܝ؟ ܡܰܢ ܓܡܺܝܫܰܟܶܟ، ܘܳܐܢܳܐ ܠܳܐ ܓܝܳܩܰܕ̥ ܐ̱ܢܳܐ؟ ܐܶܢ ܓܡܰܘܔܶܒ ܫܽܘܒܗܳܪܳܐ، ܓܡܺܝܫܰܒܗܰܪ ܐ̱ܢܳܐ ܒܰܡܶܕ̈ܳܢܶܐ ܕܺܐܝ ܕ̥ܶܥܦܺܝܰܝܕ̥ܺܝ. ܟܳܕ̥ܳܥ ܐܰܠܳܗܳܐ ܐܽܘ ܐܰܒܳܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ ܐܽܘ ܡܒܰܪܟ̣ܳܐ ܕܶܠܥܳܠܰܡ ܥܳܠܡܺܝܢ ܕܠܳܐ ܟܳܡܕܰܓܰܠ ܐ̱ܢܳܐ. ܒܽܐܘ ܫܰܐܡ ܐܽܘ ܘܰܐܠܺܝ ܕܰܐܪܰܛܳܘܣ ܐܽܘ ܡܰܠܟܳܐ ܢܳܛܰܪ ܗ̱ܘܰܐ ܐܺܝ ܘܰܠܰܝܶܐ ܕܽܐܘ ܫܰܐܡ ܕܨܳܝܰܕܠܺܝ. ܡܰܢܚܰܬܬܰܠܠܺܝ ܡܺܐܝ ܟܰܘܘܳܐ ܒܽܐܘ ܣܰܠܳܐ ܡܽܐܘ ܫܽܘܪܳܐ ܘܦܰܠܶܬܢܳܐ ܡܺܐܝܕ̈ܳܬ̥ܶܗ. ܒܰܪܶܟ̥ܡܳܪܝ܀