ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܝܓ: ܛ ـ ܟܗ Hebrews 13:9-25

ܒܶܬ̣ܪܰܐ ܝܽܘ̈ܠܦܳܢܶܐ ܡܫܰܟ̈ܠܶܐ ܘܢܽܘܟ̣ܪ̈ܳܝܶܐ ܠܶܐܙܙܳܟ̣ܽܘ. ܫܰܦܺܝܪܳܝܳܐ ܕܒܺܐܝ ܛܰܝܒܽܘܬ̣ܳܐ ܡܰܩܘܺܝܢܰܐ ܠܶܒܰܢ ܘܠܳܐ ܒܰܡܽܘ̈ܟܠܳܢܶܐ. ܥܰܠ ܕܠܳܐ ܡܥܰܘܢܺܝ ܗܰܢܺܝ ܕܶܡܗܰܠܰܟ̣ܟܶܐ ܐܰܒܒܶܗ̱. ܟܶܬܠܰܢ ܡܰܕܒܚܳܐ، ܕܠܰܬܬܶܐ ܫܽܘܠܛܳܢܳܐ ܕܳܐܟ̣ܠܺܝ ܡܶܢܶܗ ܗܰܢܺܝ ܕܒܽܐܘ ܡܰܫܟܢܳܐ ܟܟ̣ܽܘܕܡܺܝ. ܡܺܝܕ̥ܶܐ ܕܰܚܰܝܶـ̈ܘܶܢ ܗܰܢܺܝ ܕܡܰܥܒܰܪ ܗ̱ܘܳܐ ܐܽܘ ܐܰܕܡܰܬ̣ܬ̣ܶܐ ܐܽܘ ܪܰܒܳܐ ܕܰܟܽܘܡܪ̈ܶܐ ܠܽܐܘ ܒܰܝܬܳܐ ܡܩܰܕܫܳܐ ܡܶܚܠܰܦ ܐܰ ܚܛܳܗ̈ܶܐ، ܐܽܘ ܒܰܨܪܰܬ̣ܬ̣ܶܗ ܠܰܪܘܰܠ ܡܺܐܝ ܡܰܫܪܺܝܬ̥ܳܐ ܝܳܩܰܕ ܗܘܳܐ. ܥܰܠܠܰܗ̱ܬ̣ܶܐ ܝܶܫܽܘܥ ܣܬܶܐ ܠܰܫܰܢ ܕܶܡܩܰܕܶܫ ܠܽܐܘ ܥܰܡܰܝܕ̥ܶܗ ܒܽܐܘ ܐܰܕܡܰܝܕ̥ܶܗ، ܠܰܪܘܰܠ ܡܺܐܝ ܡܕ̥ܺܝܢ̱ܬܳܐ ܛܥܶܡ ܠܶܗ ܚܰܫܳܐ. ܢܶܦܩܺܝܢܰܐ ܐܰܚܢܰܐ ܣܬܶܐ ܓܰܢ̱ܒܶܗ ܠܰܪܘܰܠ ܡܺܐܝ ܡܰܫܪܺܝܬ̣ܳܐ، ܐܰܚܢܰܐ ܛܰܥܳܢ̈ܶܐ ܕܽܐܘ ܥܰܝܒܰܝܕܶܗ. ܡܺܝܕ̥ܶܐ ܕܠܰܬܠܰܢ ܘܰܠܰܝܶܐ ܕܟܳܦܰܝܫܳܐ ܗܰܪܟܶܐ. ܐܶܠܳܐ ܓܢܶܛܪܺܝܢܰܐ ܠܰܗ̱ܝܳܐ ܕܓܶܕܶܐܬ̣ܝܳܐ. ܘܥܰܠ ܐܺܝܕ̥ܶܗ ܒܟܽܠ ܙܰܒܢܳܐ ܡܶܣܩܺܝܢܰܐ ܕܶܒܚ̈ܶܐ ܕܽܐܘ ܫܽܘܒܚܳܐ ܠܰܐܠܳܗܳܐ. ܝܰܐܢܺܝ ܐܰ ܦܺܐܪ̈ܶܐ ܕܣܰܒ̈ܒܳܬ̣ܰܢ ܕܟܳܡܰܘܕܶܢ ܠܐܽܘ ܐܶܫܡܰܝܕܶܗ. ܠܳܐ ܛܳܥܶܝܬܽܘ ܐܺܝ ܡܪܰܚܡܳܢܽܘܬ̣ܳܐ ܘܺܐܝ ܡܥܰܕܪܳܢܽܘܬ̣ܳܐ ܕܰܡܶܣ̈ܟܺܢܶܐ. ܡܺܝܕ̥ܶܐ ܕܰܐܠܳܗܳܐ ܒܗܰܘܟ̣ܰܐ ܕܶܒܚ̈ܶܐ ܓܪܳܕ̥ܶܐ. ܡܰܛܺܝܥܽܘ ܘܫܡܰܥܽܘ ܠܰܡܕܰܒܪ̈ܳܢܰܬ̣ܟ̣ܽܘ. ܡܺܝܕ̥ܶܐ ܕܟܳܫܽܘܗܪܺܝ ܡܶܚܠܰܦ ܐܰ ܢܰܦ̈ܫܳܬ̣ܰܬ̣ܟ̣ܽܘ ܟ̣ܶܐ ܐ̱ܢܳܫ̈ܶܐ ܕܟܳܒܺܝ ܐܽܘ ܚܰܣܰܒܰܬ̣ܟ̣ܽܘ. ܠܰܫܰܢ ܕܒܶܦܨܺܝ̣ܚܽܘܬ̣ܳܐ ܣܰܝܡܺܝ ܐܽܘ ܫܽܘܓ̥ܠܰܬ̥ܬ̥ܶܗ، ܘܠܳܐ ܒܚܰܨܪ̈ܰܬ. ܡܺܝܕ̥ܶܐ ܕܗܰܬ̣ܶܐ ܠܳܐ ܣܰܝܡܽܘܬܽܘ، ܠܶܓ ܡܶܣܬܰܦܕܽܘܬܽܘ. ܡܨܰܠܶܘܽܘ ܐܰܥܠܰܢ. ܡܺܝܕ̥ܶܐ ܕܶܬܟ̥ܺܝܠܳܝܶܢܰܐ ܕܢܺܝܰܐ ܛܰܘܬܳܐ ܟܶܬܠܰܢ. ܘܟܳܪܳܚܡܺܝܢܰܐ ܕܶܒܟܽܠ ܡܶܕܶܐ ܫܰܦܺܝܪܳܐ ܡܺܝܕܰܒܪܺܝܢܰܐ. ܒܽܐܘ ܙܳܝܽܘܕܳܐ ܟܳܒܰܥ ܐ̱ܢܳܐ ܡܶܢܟ̣ܽܘ ܕܗܰܬ̣ܶܐ ܣܰܝܡܺܝܬܽܘ، ܠܰܫܰܢ ܕܟ̣ܰܐܺܝ̣ܦܳܐ ܕܳܥܰܪ ܐ̱ܢܳܐ ܣܶܬܟ̣ܽܘ. ܐܽܘ ܐܰܠܳܗܳܐ ܕܽܐܘ ܫܠܳܡܳܐ ܗܰܘܳܐ ܕܡܳܣܰܩ ܠܶܗ ܡܒܰܝܢܰܐ ܡܺܝ̣̈ܬ̣ܶܐ ܠܽܐܘ ܪܳܥܝܳܐ ܪܰܒܳܐ ܕܺܐܝ ܡܰܪܥܺܝܬ̣ܳܐ ܒܽܐܘ ܐܰܕܡܳܐ ܕܽܐܘ ܥ̱ܰܗܕ ܕܶܠܥܳܠܰܡ ܕܟܶܬܝܳܐ ܝܶܫܽܘܥ ܡܫܺܝ̣ܚܳܐ ܡܳܪܰܢ، ܣܰܡܟ̣ܽܘ ܓܡܺܝܪ̈ܶܐ ܒܟܽܠ ܥܰܡܰܠ ܛܳܘܳܐ ܕܣܰܝܡܺܝܬܽܘ ܐܽܘ ܨܶܒܝܳܢܰܝܕ̥ܶܗ. ܗܺܝܝܶܗ̱ ܣܳܝܶܡ ܐܶܒܰܢ، ܐܽܘ ܡܶܕܶܐ ܕܟܶܬܝܳܐ ܫܰܦܺܝܪܳܐ ܩܽܘܡܶܗ ܒܝܶܫܽܘܥ ܡܫܺܝ̣ܚܳܐ، ܕܶܐܠܶܗ ܫܽܘܒܚܳܐ ܠܥܳܠܰܡ ܥܳܠܡܺܝܢ ܐܰܡܺܝܢ. ܟܳܒܰܥ ܐ̱ܢܳܐ ܡܶܢܟ̣ܽܘ ܐܰܢܢܰܚܰܝ̈ܕ̥ܺܝ، ܕܶܡܣܰܝܒܪܺܝܬܽܘ ܐܺܝ ܡܶܠܬ̣ܳܐ ܕܽܐܘ ܒܽܘܝܳܐܳܐ (ܣܰܗܰܐܠܰܐ). ܥܰܠ ܕܶܒܟܰܪܝܳܐ ܟܬ̥ܽܘܠܺܝ ܐܠܰܟ̣ܽܘ. ܝܺـܕ̥ܰܥܽܘ ܕܶܫܪܶܐ ܐܰܚܽܘܢܰܢ ܛܺܝܡܳܬܶܐܘܳܣ. ܘܶܐܢ ܕܳܐܬ̣ܶܐ ܟ̣ܰܐܺܝܦܳܐ ܐܰܥܡܶܗ ܟܚܳܙܶܐ ܐ̱ܢܳܐ ܠܟ̣ܽܘ. ܡܫܰܐܶܠܽܘ ܒܽܐܘ ܫܠܳܡܳܐ ܕܟܽܠܠܶܗ̱ ܐܰ ܡܕܰܒܪ̈ܳܢܰܬ̣ܟ̣ܽܘ، ܘܕܟܽܠܠܶܗ ܐܰ ܩܰܕܺܝ̣̈ܫܶܐ. ܟܽܠܠܶܗ ܕܡܶܐ ܐܺܝ̣ܛܰܠܝܰܐ ܟܳܡܫܰܝܠܺܝ ܒܽܐܘ ܫܠܳܡܰܬ̣ܟ̣ܽܘ. ܛܰܝܒܽܘܬ̣ܳܐ ܥܰܡ ܟܽܠܟ̣ܽܘ ܐܰܡܺܝܢ. ܒܰܪܶܟ̥ܡܳܪܝ ܀