ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܗ: ܝܒ ـ ܟܐ Romans 5:12-21

ܐܰܝܕܰܪܒܳܐ ܕܶܒܚܰܕ̱ ܒܰܪܢܳܫܳܐ ܥܰܒܺܝܪܳܐ ܐܺܝ ܚܛܺܝܬ̣ܳܐ ܠܽܐܘ ܥܳܠܡܳܐ، ܘܒܺܐܝ ܚܛܺܝܬ̣ܳܐ ܐܽܘ ܡܰܘܬܳܐ، ܗܰܘܟ̣ܰܐ ܒܟܽܠܠܶܗ ܐܰ ܐ̱ܢܳܫ݁̈ܶܐ ܥܰܒܶܪ ܐܽܘ ܡܰܘܬܳܐ، ܥܰܠ ܕܟܽܠܠܶܗ̱ ܚܰܛܶܢ. ܡܺܝܕ̥ܶܐ ܕܗܽܘܠ ܠܽܐܘ ܢܳܡܽܘܣܳܐ ܐܺܝ̣ ܚܛܺܝܬ̣ܳܐ ܒܽܐܘ ܥܳܠܡܳܐ ܗ̱ܘܰܐ، ܠܰܬܗ̱ܘܰܐ ܚܫܽܘܬܳܐ ܚܛܺܝܬܳܐ. ܥܰܠ ܕܠܰܬܗ̱ܘܰܐ ܢܳܡܽܘܣܳܐ. ܐܶܠܳܐ ܡܰܡܠܰܟ̣ ܠܶܗ ܠܽܐܘ ܡܰܘܬܳܐ ܡܶܐ ܐܳܕܳܡ ܘܗܽܘܠ ܠܡܽܘܫܶܐ، ܘܗܰܡ ܥܰܠ ܐܰܝܢܰܐ ܕܠܳܐ ܚܰܛܶܢ. ܥܰܠܽܘ ܕܽܘܡܝܳܐ ܕܽܐܘ ܬܘܳܪܳܐ ܕܽܐܘ ܢܳܡܽܘܣܳܐ ܕܳܐܕ̥ܳܡ ܗܰܘܳܐ ܕܟܶܬܝܳܐ ܐܽܘ ܕܽܘܡܝܳܐ ܬܰܗ̱ܘܳܐ ܕܓܶܕܐܳܬ̣ܶܐ. ܐܶܠܳܐ ܠܰܬܝܳܐ ܟ̣ܕܺܝ ܚܛܺܝܬ̣ܳܐ ܗܰܘܟ̣ܰܐ ܐܺܝ ܡܰܘܗܰܒܬ̣ܳܐ. ܕܶܐܢ ܒܺܐܝ ܚܛܺܝ̣ܬ̣ܳܐ ܕܚܰܕ̱ ܡܰܐܺܝܬ̣ܺܝ ܓ̥ܰܠܰܒܶܐ܆ ܟܡܳܐ ܒܰܟܡܳܐ ܐܺܝ ܛܰܝܒܽܘ̣ܬ̣ܳܐ ܕܰܐܠܳܗܳܐ ܘܺܐܝ ܡܰܘܗܰܒܬ̣ܰܝܕ̥ܶܗ ܒܚܰܕ̱ ܒܰܪܢܳܫܳܐ ܝܶܫܽܘܥ ܡܫܺܝ̣ܚܳܐ ܠܓ̣ܰܠܰܒܶܐ ܙܰܐܝ̣ܕܳܐ. ܘܠܰܬܝܳܐ ܟ̣ܕܺܝ ܚܛܺܝ̣ܬ̣ܳܐ ܕܚܰܕ̱. ܗܰܘܟ̣ܰܐ ܐܺܝ ܡܰܘܗܰܒܬ̣ܳܐ. ܡܺܝܕ̥ܶܐ ܕܽܐܘ ܕܺܝܢܳܐ ܡܶܐܚܰܕ̱ ܗܰܘܺܝ ܠܺܐܝ ܕܰܝܢܽܘܢܶܐ. ܐܶܠܳܐ ܐܺܝ ܡܰܘܗܰܒܬ̣ܳܐ ܡܶܐ ܚܛܳܗ̈ܶܐ ܓ̥ܰܠܳܒܶܐ ܗܰܘܝܳܐ ܠܺܐܝ ܟܺܐܢܽܘܬ̣ܳܐ. ܡܺܝܕ̥ܶܐ ܕܶܐܢ ܒܺܐܝ ܚܛܺܝܬ̣ܳܐ ܕܚܰܕ̱ ܡܰܡܠܰܟ̣ܠܶܗ ܠܽܐܘ ܡܰܘܬܳܐ، ܟܡܳܐ ܝܰܬܺܝܪܳܐܺܝܬ̥ ܐܰܝܢܰܐ ܕܓܶܡܰܝܕܺܝ ܐܽܘ ܩܠܳܥܳܐ ܕܺܐܝ ܛܰܝܒܽܘܬ̣ܳܐ ܘܕܺܐܝ ܡܰܘܗܰܒܬ̣ܳܐ ܘܕܺܐܝ ܙܰܕܺܝܩܽܘܬ̣ܳܐ ܓܡܰܡܠܟ̣ܺܝ ܒܰܚ̈ܚܰܝܶܐ ܒܚܰܕ̱ ܝܶܫܽܘܥ ܡܫܺܝ̣ܚܳܐ. ܟ̣ܶܕ ܐܰܝܕܰܪܒܳܐ ܕܒܺܐܝ ܚܛܺܝ̣ܬ̣ܳܐ ܕܚܰܕ̱ ܕܺܝܢܺܝ ܟܽܠܠܶܗ ܐܰܢܢܳܫ̈ܶܐ، ܗܰܘܟ̣ܰܐ ܒܺܐܝ ܙܰܕܺܝܩܽܘܬ̣ܳܐ ܕܚܰܕ̱، ܗܰܘܺܝ ܙܳܟ̣ܽܘܬܳܐ ܕܰܚ̈ܚܰܝܶܐ ܠܟܽܠܠܶܗ ܐܰ ܐ̱ܢܳܫ̈ܶܐ. ܟ̣ܶܕ ܐܰܝܕܰܪܒܳܐ ܕܒܽܐܘ ܥܶܨܝܰܐܢ ܕܚܰܕ̱، ܓ̥ܰܠܰܒܶܐ ܚܰܛܳܝ̈ܶܐ ܗܰܘܺܝ، ܗܰܘܟ̣ܰܐ ܣܬܶܐ ܒܺܐܝ ܡܶܫܬܰܡܥܳܢܽܘܬ̣ܳܐ ܕܚܰܕ̱ ܓܕܳܗ̱ܘܶܐ ܓ̥ܰܠܳܒܶܐ ܙܰܕܺܝ̣̈ܩܶܐ. ܐܽܘ ܢܳܡܽܘܣܳܐ ܠܰܫܰܢ ܕܙܰܝܕܳܐ ܐܺܝ ܚܛܺܝܬ̣ܳܐ ܐܰܬܺܝ. ܐܶܠܳܐ ܒܺܐܝ ܕܽܘܟܬ̣ܳܐ ܕܙܰܐܺܝܕܳܐ ܐܺܝ ܚܛܺܝܬ̣ܳܐ، ܬܰܡܳܐ ܙܰܐܺܝܕܳܐ ܐܺܝ ܛܰܝܒܽܘܬ̣ܳܐ ܙܶܬ. ܟ̣ܶܕ ܡܰܡܠܰܟ ܠܰܗ̱̇ ܠܺܐܝ ܚܛܺܝ̣ܬ̣ܳܐ ܒܽܐܘ ܡܰܘܬܳܐ، ܗܰܘܟ̣ܰܐ ܓܡܰܡܠܟ̣ܳܐ ܐܺܝ ܛܰܝܒܽܘܬ̥ܳܐ ܒܺܐܝ ܟܺܐܢܽܘܬ̣ܳܐ ܠܰܚ̈ܚܰܝܶܐ ܕܶܠܥܳܠܰܡ ܒܝܶܫܽܘܥ ܡܫܺܝ̣ܚܳܐ ܡܳܪܰܢ. ܒܰܪܶܟ̥ܡܳܪܝ܀