ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܘ: ܐ ـ ܟܙ Romans 16:1-27

ܟܳܡܳܨܶܐ ܐ̱ܢܳܐ ܐܰܠܟ̣ܽܘ ܥܰܠ ܚܳܬ̣ܰܢ ܦܽܘܒܺܝ ܕܟܶܬܝܳܐ ܐܺܝ ܡܫܰܡܫܳܢܺܝܬܳܐ ܕܺܐܝ ܥܺܕܬܳܐ ܕܩܶܢܟܶܪܰܐܣ. ܕܡܰܩܶܒܠܺܝ̣ܬܽܘܠܠܰܗ̇ ܒܡܳܪܰܢ، ܟ̣ܶܕ ܓܡܰܠܶܩ ܠܰܩܰܕܺܝ̣̈ܫܶܐ. ܘܕܶܡܥܰܘܢܺܝ̣ܬܽܘܠܠܰܗ̇ ܒܟܽܠ ܡܶܕܶܐ ܕܡܶܣܢܳܩܳܐ. ܡܺܝܕ̥ܶܐ ܕܗܺܝܝܰܗ̱̇ ܣܬܺܝ ܗܰܘܝܳܐ ܡܥܰܘܢܳܢܺܝܬ̣ܳܐ ܠܓ̣ܰܠܰܒܶܐ، ܘܶܐܠܺܝ ܣܬܶܐ. ܡܫܰܐܶܠܽܘ ܒܽܐܘ ܫܠܳܡܳܐ ܕܰܦܪܺܝܣܩܶܠܰܐ ܘܕܰܐܩܶܠܰܣ ܐܰ ܫ̈ܰܓ̥ܳܠܶܐ ܕܰܐܥܡܺܝ ܒܝܶܫܽܘܥ ܡܫܺܝ̣ܚܳܐ. ܕܗܽܘܠܶܢ ܩܕ̥ܳܠܰܝܝܶܐ ܡܶܚܠܳܦܺܝ. ܠܳܐ ܐܳܢܳܐ ܒܶܠܚܽܘܕ̥ܺܝ ܓܡܰܘܕܶܐ ܐ̱ܢܳܐ ܠܶܢ، ܐܶܠܳܐ ܟܽܠܠܶܗ̱ ܐܰ ܥܺـ̈ܕܳܬ̣ܳܐ ܕܰܥܰܡܡ̈ܶܐ ܣܬܺܝ. ܘܗܰܘܽܘ̣ ܫܠܳܡܳܐ ܠܺܝ ܥܺܕ̱ܬ̣ܳܐ ܕܶܟ̥ܠܺܝ̣ܩܳܐ ܒܽܐܘ ܒܰܝܬܰܬ̣ܬ̣ܶܐ. ܡܫܰܐܶܠܽܘ ܒܽܐܘ ܫܠܳܡܳܐ ܕܽܐܘ ܚܰܒܺܝ̣ܒܰܝܕ̥ܺܝ ܐܶܦܶܢܰܛܳܘܣ، ܕܟܶܬܝܳܐ ܐܽܘ ܩܰܡܳܝܳܐ ܕܰܐܟ̣ܰܐܝܰܐ ܒܶܡܫܺܝ̣ܚܳܐ. ܫܰܐܶܠܽܘ ܒܽܐܘ ܫܠܳܡܳܐ ܕܡܰܪܺܝܰܐ، ܕܓ̥ܰܠܰܒܶܐ ܬܰܥܺܝܒܳܐ ܠܰܫܰܢܰܢ. ܘܡܫܰܐܶܠܽܘ ܒܽܐܘ ܫܠܳܡܳܐ ܕܰܐܢܕܪܽܘܢܺܝܩܳܘܣ ܘܰܕܝܽܘܢܺܝܰܐ ܐܰܢܢܳܫܰܝ̈ܕ̥ܺܝ ܕܶܚܒܺܝܣܺܝ ܐܰܥܡܺܝ، ܘܺܝܕ̥ܺܝ̈ܥܶܢܶܐ ܒܰܫܠܺܝ̣̈ܚܶܐ، ܘܒܶܡܫܺܝ̣ܚܳܐ ܡܶܩܶܡ ܡܶܢܺܝ ܢܶܐ. ܘܫܰܐܶܠܽܘ ܒܽܐܘ ܫܠܳܡܳܐ ܕܰܐܡܦܺܠܝܳܘܣ ܐܽܘ ܚܰܒܺܝܒܰܝܕ̥ܺܝ ܒܡܳܪܰܢ. ܘܫܰܐܶܠܽܘ ܒܽܐܘ ܫܠܳܡܳܐ ܕܽܐܘܪܒܰܢܳܘܣ ܐܽܘ ܫܰܓ̥ܳܠܳܐ ܕܰܐܥܡܰܢ ܒܶܡܫܺܝ̣ܚܳܐ ܘܕܶܐܣܛܰܟܳܘܣ ܐܽܘ ܚܰܒܺܝܒܰܝܕ̥ܺܝ. ܫܰܐܶܠܽܘ ܒܽܐܘ ܫܠܳܡܳܐ ܕܰܐܦܶܠܺܐ ܐܽܘ ܡܢܰܩܝܳܐ ܒܡܳܪܰܢ. ܘܡܫܰܐܶܠܽܘ ܒܽܐܘ ܫܠܳܡܳܐ ܕܰܐܢܢܰܒ̈ܢܶܐ ܕܽܐܘ ܒܰܝܬܳܐ ܕܰܐܪܶܣܛܳܘܒܳܘܠܳܘܣ. ܘܫܰܐܶܠܽܘ ܒܽܐܘ ܫܠܳܡܳܐ ܕܗܶܪܘܺܝܕܽܘܢ ܐܽܘ ܩܰܪܺܝܘܰܝܕ̥ܺܝ. ܘܫܰܐܶܠܽܘ ܒܽܐܘ ܫܠܳܡܳܐ ܕܰܐܢܢܰܒ̈ܢܶܐ ܕܽܐܘ ܒܰܝܬܳܐ ܕܢܰܪܩܺܝܣܽܘܣ ܐܰܝܢܰܐ ܕܟܶܬܢ̈ܶܐ ܒܡܳܪܰܢ. ܫܰܐܶܠܽܘ ܒܽܐܘ ܫܠܳܡܳܐ ܕܰܛܪܽܘܦܶܢܰܐ ܘܕܰܛܪܽܘܦܳܣܰܐ ܕܬܰܥܺܝܒܺܝ ܒܡܳܪܰܢ. ܫܰܐܶܠܽܘ ܒܽܐܘ ܫܠܳܡܳܐ ܕܦܶܪܣܺܝܣ ܐܺܝ ܚܰܒܺܝܒܬܰܝܕ̥ܺܝ، ܕܬܰܥܺܝܒܳܐ ܓ̥ܰܠܰܒܶܐ ܒܡܳܪܰܢ. ܘܫܰܐܶܠܽܘ ܒܽܐܘ ܫܠܳܡܳܐ ܕܪܽܘܦܳܘܣ ܐܽܘ ܡܢܰܩܝܳܐ ܒܡܳܪܰܢ܆ ܘܕܺܐܝ ܐܶܡܰܝܕ̥ܶܗ ܕܟܶܬܝܳܐ ܐܶܡܺܝ. ܫܰܐܶܠܽܘ ܒܽܐܘ ܫܠܳܡܳܐ ܕܰܐܣܽܘܢܩܪܺܛܳܘܣ ܘܦܠܶܓܽܘܢ ܘܰܕܗܶܪܡܺܐ ܘܕܦܰܛܪܳܒܰܐ ܘܕܗܶܪܡܰܐ ܘܕܰܐܢ̈ܢܰܚܶܐ ܕܰܐܥܡܰܝܝܶܐ. ܘܫܰܐܶܠܽܘ ܒܽܐܘ ܫܠܳܡܳܐ ܕܦܺܝ̣ܠܠܽܘܓܳܘܣ ܘܰܕܝܽܘܠܝܰܐ ܘܰܕܢܺܐܪܳܘܣ ܘܕܺܐܝ ܚܳܬ̣ܰܝܕ̥ܶܗ ܘܕܳܠܽܘܡܦܰܐ܆ ܘܕܟܽܠܠܶܗ̱ ܐܰ ܩܰܕܺܝ̣̈ܫܶܐ ܕܰܐܥܡܰܝܝܶܐ. ܘܫܰܐܶܠܽܘ ܒܽܐܘ ܫܠܳܡܳܐ ܚܰܕ̱ ܕܽܐܘ ܚܰܕ̱ ܒܶܢܫܰܩܬܳܐ ܩܰܕܺܝܫܬܳܐ. ܟܳܡܫܰܝܠܺܝ ܒܽܐܘ ܫܠܳܡܰܬ̣ܟ̣ܽܘ، ܟܽܠܠܶܗ ܐܰ ܥܺـ̈ܕܳܬ̣ܳܐ ܕܶܡܫܺܝܚܳܐ. ܟܳܒܰܥ ܐܢܳܐ ܡܶܢܟ̣ܽܘ ܐܰܢܢܰܚܰܝ̈ܕܺܝ، ܕܗܳܘܶܝܬܽܘ ܡܰܚܝ̣̈ܣܶܐ ܡܰܗ̱ܢܺܝ ܕܦܳܠܰܓ̈ܘܳܬ̣ܳܐ ܘ̱ܟܶܫ̈ܠܶܐ ܟܣܰܝܡܺܝ. ܠܰܪܘܰܠ ܡܽܐܘ ܝܽܘܠܦܳܢܳܐ ܕܝܰܠܺܝܦܺܝܬܽܘ ܕܪܽܘܚܩܺܝܬܽܘ ܡܶܢܢܶܐ. ܡܺܝܕ̥ܶܐ ܐܰܝܢܰܐ ܕܟܶܬܢ̈ܶܐ ܗܰܘܟ̣ܰܐ، ܠܳܐ ܟܳܡܫܰܡܫܺܝ (ܟܽܘܕܡܺܝ) ܠܡܳܪܰܢ ܝܶܫܽܘܥ ܡܫܺܝ̣ܚܳܐ، ܐܶܠܳܐ ܠܓܰܘܰܝܝܶܐ. ܘܒܰܔ̈ܓ̥ܰܠܺܝܰܬ ܒܰܣܺܝ̣̈ܡܶܐ ܘܒܰܒܽܘܪ̈ܟܳܬܳܐ، ܟܳܡܰܛܥܶܢ ܐܰ ܠܶܒܰܘ̈ܳܬ̣ܳܐ ܢܰܕ̥ܺܝ̈ܦܶܐ. ܡܺܝܕ̥ܶܐ ܕܺܐܝ ܡܶܫܬܰܡܥܳܢܽܘܬ̣ܰܬ̣ܟ̣ܽܘ، ܠܟܽܠ ܐ̱ܢܳܫܳܐ ܝܺܕܺܝ̣ܥܳܐ. ܓܪܳܚܰܡ ܐ̱ܢܳܐ ܕܗܳܘܶܝܬܽܘ ܚܰܟܺܝ̣̈ܡܶܐ ܠܰܛܰܘ̈ܰܬ̣ܳܐ، ܘܒܰܨܺܝ̣ܛ ܠܰܒܺܝ̣̈ܫܳܬ̣ܳܐ. ܘܽܐܘ ܐܰܠܳܗܳܐ ܕܽܐܘ ܫܠܳܡܳܐ، ܟ̣ܰܐܝ̣ܺܦܳܐ ܕܳܝܶܫ ܐܽܘ ܫܺܐܕܳܐ ܬܰܚܬܶܐ ܪܰܓ̥ܠܰܝܟ̣ܽܘ. ܐܺܝ ܛܰܝܒܽܘܬ̣ܳܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ ܗܽܘܝܳܐ ܐܰܥܡܰܝܟ̣ܽܘ. ܟܳܡܫܰܝܠܺܝ ܒܽܐܘ ܫܠܳܡܰܬ̣ܟ̣ܽܘ، ܛܺܝܡܳܬ̣ܶܐܘܳܣ ܐܽܘ ܫܰܓ̣ܳܠܳܐ ܕܰܐܥܡܺܝ܆ ܘܠܽܘܩܺܝܳܘܣ ܘܺܐܝܰܣܳܘܢ ܘܣܽܘܣܦܰܛܪܳܘܣ ܐܰ ܩܰܪ̈ܺܝܘܰܝܕܺܝ. ܟܳܡܫܰܝܰܠ ܐ̱ܢܳܐ ܒܽܐܘ ܫܠܳܡܰܬ̣ܟ̣ܽܘ، ܐܳܢܳܐ ܛܰܪܛܺܝܳܘܣ ܕܶܟܬ̣ܽܘܠܺܝ ܐܺܝ ܐܶܓܰܪܬ̣ܳܐ ܒܡܳܪܰܢ. ܟܳܡܫܰܝܠܺܝ ܒܽܐܘ ܫܠܳܡܰܬ̣ܟ̣ܽܘ، ܓܰܐܝܳܘܣ ܐܽܘ ܡܰܩܒܠܳܢܰܝܕ̥ܺܝ ܘܕܟܽܠܰܗ̱̇ ܐܺܝ ܥܺܕ̱ܬܳܐ. ܟܳܡܫܰܐܶܝܠ ܒܽܐܘ ܫܠܳܡܰܬ̣ܟ̣ܽܘ ܐܶܪܰܣܛܳܘܣ ܐܽܘ ܘܰܟܺܝ̣ܠܳܐ ܕܰܐܥܠܰܐ ܙܽܘ̈ܙܶܐ ܕܺܐܝ ܡܕܺܝܢ̱ܬܳܐ. ܘܩܽܘܪܰܛܳܘܣ ܐܽܘ ܐܰܚܳܐ. ܠܰܐܠܳܗܳܐ ܕܟܳܩܳܕܶܪ ܕܶܡܬ̣ܰܒܰܬܟ̣ܽܘ ܒܽܐܘ ܡܓܰܠܝܶܢܰܝܕ̥ܺܝ܆ ܗܰܘܳܐ ܕܶܟܪܺܝܙ ܥܰܠ ܝܶܫܽܘܥ ܡܫܺܝ̣ܚܳܐ ܒܽܐܘ ܓܶܠܝܳܢܳܐ ܕܽܐܘ ܐ̱ܪܳܙܳܐ، ܕܡܰܐ ܙܰܒ̈ܢܶܐ ܕܽܐܘ ܥܳܠܡܳܐ ܡܟܰܣܝܳܐ ܗ̱ܘܳܐ. ܐܶܠܳܐ ܓܠܶܐ ܒܽܐܘ ܙܰܒܢܰܢܳܐ ܒܰܟ̈ܬ̣ܳܘܶܐ ܕܰܢܒܺܝ̈ܶܐ܆ ܟ̣ܕܽܘ ܦܽܘܩܕܳܢܳܐ ܕܰܐܠܳܗܳܐ ܕܶܠܥܳܠܰܡ ܝ̣ܺܕ̥ܺܝܥ ܠܟܽܠܠܶܗ ܐܰ ܥܰܡ̱ܡ̈ܶܐ، ܠܽܘ ܫܡܳܥܰܐ ܕܺܐܝ ܗܰܝܡܳܢܽܘܬ̣ܳܐ. ܕܗܽܘܘܶܝܳܐ ܚܰܟܺܝ̣ܡܳܐ ܒܶܠܚܽܘܕܶܗ. ܐܺܝ̣ ܛܰܝܒܽܘܬ̣ܳܐ ܕܝܶܫܽܘܥ ܡܫܺܝ̣ܚܳܐ ܥܰܡ ܟܽܠܟ̣ܽܘ ܠܥܳܠܰܡ ܥܳܠܡܺܝܢ ܐܰܡܺܝܢ. ܒܰܪܶܟ̥ܡܳܪܝ܀