ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܗ: ܓ ـ ܟܐ Ephesians 5:3-21

ܟܽܠܰܗ̱̇ ܐܺܝ ܙܳܢܝܽܘܬ̥ܳܐ ܘܟܽܠܰܗ̇ ܐܺܝ ܢܰܔܰܐܣܰܗ̱ ܘܺܐܝ̣ ܛܰܡܰܥܺܝܶܐ܆ ܛܪܳܐ ܐܶܫܡܰܝܝܶܐ ܣܬܶܐ ܠܳܐ ܡܺܝܬܰܘܡܶܪ ܒܰܝܢܰܬ̣ܟ̣ܽܘ. ܟ̣ܶܕ ܓܡܰܠܶܩ ܠܰܩܰܕܺܝ̣̈ܫܶܐ. ܠܳܐ ܣܽܘܥܪ̈ܶܐ، ܘܠܳܐ ܩܰܒܰܐܚܰܐ، ܘܠܳܐ ܟ̥ܰܒܪ̈ܶܐ ܕܺܐܝ ܣܰܦܰܐܗܰܐ، ܘܠܳܐ ܩܰܫܡܰܪܰܐ، ܗܰܢܺܝ ܠܳܐ ܓܠܶܙܡܺܝ. ܐܶܠܳܐ ܡܶܚܠܰܦ ܗܰܢܺܝ ܬܰܘܕܺܝ̣ܬ̣ܳܐ. ܥܰܠ ܕܟܳܕܥܺܝܬܽܘ ܟܽܠ ܐ̱ܢܳܫܳܐ ܕܟܶܬܝܳܐ ܙܰܢܳܝܳܐ ܐܰܘ ܢܰܔܶܣ ܐܰܘ ܛܶܡܰܐܥ ܐܰܘ ܣܳܓ̣ܶܕ ܨܰܠܡܳܐ، ܠܰܬܠܶܗ ܘܰܪܰܐܬ̣ܰܐ ܒܺܐܝ ܡܰܠܟܽܘܬ̣ܳܐ ܕܶܡܫܺܝ̣ܚܳܐ ܘܕܰܐܠܳܗܳܐ. ܐ̱ܢܳܫܳܐ ܠܳܐ ܡܰܛܥܰܠܟ̣ܽܘ ܒܰܔܓ̥ܰܠܺܝ̈ܰܬ ܒܰܛܶܠ. ܥܰܠܰܗ̱ܬ̣ܶܐ ܟܳܐܬ̣ܶܐ ܐܽܘ ܪܽܘܓ̣ܙܳܐ ܕܰܐܠܳܗܳܐ ܥܰܠܰܐ ܐܰܒ̈ܢܶܐ ܠܳܐ ܫܰܡܳܥ̈ܶܐ. ܠܳܐ ܡܺܝܫܰܪܟܺܝܬܽܘ ܐܰܠܠܶܗ̱. ܡܺܝܕ̥ܶܐ ܕܡܶܩܶܡ ܥܽܘܬܡܰܐ ܗ̱ܘܰܝܬܽܘ܆ ܒܰܣ ܐܽܘܥܕܳܐ، ܢܽܘܗܪܳܐ ܒܡܳܪܰܢ ܗܰܬܽܘ. ܘܗܰܠܶܟ̣ܽܘ ܟ̣ܕܰܐܢܢܰܒ̈ܢܶܐ ܕܽܐܘ ܢܽܘܗܪܳܐ. ܡܺܝܕ̥ܶܐ ܕܰܦܺܐܪ̈ܶܐ ܕܽܐܘ ܢܽܘܗܪܳܐ، ܒܺܐܝ ܛܳܘܽܘܬ̣ܳܐ، ܘܒܺܐܝ ܙܰܕܺܝ̣ܩܽܘܬ̣ܳܐ، ܘܒܺܐܝ ܟܺܐܢܽܘܬ̣ܳܐ ܢܶܐ. ܚܙܰܝܽܘ ܡܶܢ ܫܰܦܺܝܪܳܝܳܐ ܩܶܡ ܡܳܪܰܢ. ܠܳܐ ܡܺܝܫܰܪܟܺܝܬܽܘ ܠܰܥ̈ܡܰܐܠܰܬ ܕܺܐܝ ܥܽܘܬܡܰܐ ܕܦܺܐܪ̈ܶܐ ܠܰܝܬ ܐܰܒܒܶܗ. ܐܶܠܳܐ ܡܘܰܒܶܟ̣ܽܘܢܢܶܐ. ܡܺܝܕ̥ܶܐ ܕܽܐܘ ܡܶܕܶܐ ܕܟܳܣܰܝܡܺܝ ܒܶܓܢܽܘܢܶܐ، ܐܽܘ ܡܰܡܪܰܝܕ̥ܶܗ ܚܰܬܬܰܐ ܥܰܝܒܳܝܳܐ. ܗܰܬ̥ܶܐ ܓܡܰܚܽܘܝܳܐ، ܕܟܽܠ ܡܶܕܶܐ ܓܡܺܝܘܰܐܒܶܟ̥ ܘܓܡܶܓܠܶܐ ܡܽܐܘ ܢܽܘܗܪܳܐ. ܡܺܝܕ̥ܶܐ ܕܟܽܠ ܡܶܕܶܐ ܕܟܶܬܝܳܐ ܓܰܠܝܳܐ، ܢܽܘܗܪܳܝܳܐ. ܡܰܘܟ̣ܰܐ ܐ̱ܡܺܝܪ: «ܡܰܚܶܣ ܕܰܡܺܝܟ̣ܳܐ ܘܩܽܘܡ ܡܶܐ ܒܰܝܢܰܐ ܡܺܝ̣̈ܬ̣ܶܐ ܓܡܰܢܗܰܪ ܠܳܟ ܡܫܺܝ̣ܚܳܐ». ܡܔܰܗܶܕܽܘ ܡܳܕܶܝܢ ܐܰܝܕܰܪܒܳܐ ܓܶܡܗܰܠܟ̣ܺܝܬܽܘ ܒܕܶܩܩܰܐ. ܠܳܐ ܟ̣ܕܰܐ ܣܰܟ̣̈ܠܶܐ (ܔܶܗ̈ܶܠ). ܐܶܠܳܐ ܟ̣ܕܰܐ ܚܰܟܺܝ̣̈ܡܶܐ، ܡܶܣܬܰܥܡܶܠܽܘ ܐܽܘ ܙܰܒܢܳܐ ܕܡܶܣܬܰܦܕܽܘܬܽܘ. ܡܺܝܕ̥ܶܐ ܕܰܐܝܰܘ̈ܡܶܐ ܒܝ̣̈ܫܶܐܢܶܐ. ܡܰܘܟ̣ܰܐ ܠܳܐܗ̱ܘܶܝܬܽܘ ܕܠܳܐ ܗܰܘܢܳܐ. ܐܶܠܳܐ ܦܗܰܡܽܘ ܡܶܢܝܳܐ ܐܽܘ ܨܶܒܝܳܢܳܐ ܕܰܐܠܳܗܳܐ. ܠܳܐ ܪܳܘܶܝܬܽܘ ܒܽܐܘ ܚܰܡܪܳܐ ܕܶܐܒܶܗ̱ܝܳܐ ܐܽܘ ܠܳܐ ܐܰܕܰܒ. ܐܶܠܳܐ ܡܶܡܠܶܘܽܘ ܒܺܐܝ ܪܽܘܚܳܐ، ܡܶܔܓ̥ܶܠܽܘ ܥܰܡ ܚـ̈ܕܳܕܶܐ ܒܰܡܡܰܙܡܽܘܪ̈ܶܐ، ܘܒܰܬܶܫܒ̈ܚܳܬ̣ܳܐ، ܘܒܰܙܡܺܝܪ̈ܳܬ̣ܳܐ ܕܺܐܝ ܪܽܘܚܳܐ. ܡܙܰܡܶܪܽܘ ܒܠܶܒܰܝܟ̣ܽܘ ܠܰܐܠܳܗܳܐ. ܡܰܘܕܶܘܽܘ ܒܟܽܠ ܙܰܒܢܳܐ، ܘܥܰܠ ܟܽܠ ܡܶܕܶܐ، ܒܶܫܡܶܗ̱ ܕܡܳܪܰܢ ܝܶܫܽܘܥ ܡܫܺܝ̣ܚܳܐ ܠܰܐܠܳܗܳܐ ܐܽܘ ܐܰܒܳܐ. ܫܡܰܥܽܘ ܚܰܕ̱ ܠܽܐܘ ܚܰܕ̱ ܒܺܐܝ ܚܽܘܒܳܐ ܕܶܡܫܺܝ̣ܚܳܐ. ܒܰܪܶܟ̥ܡܳܪܝ܀