ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܬܶܣܰܠܽܘܢܺܝ̈ܩܳܝܶܐ ܐ
ܗ: ܝܒ ـ ܟܚ 1Thessalonians 5:12-28

ܟܳܒܰܥ ܐܢܳܐ ܡܶܢܟ̣ܽܘ ܕܶܐܕ̥ܥܺܝܬܽܘ ܠܰܗ̱ܢܺܝ ܕܟܳܬܽܘܥܒܺܝ ܐܰܥܡܰܝܟ̥ܽܘ ܘܟܳܡܕܰܒܪܶܢܟ̣ܽܘ، ܘܟܳܡܶܠܦܶܢܟ̣ܽܘ. ܕܶܡܝܰܩܪܺܝܬܽܘܢܢܶܐ ܒܚܽܘܒܳܐ ܙܳܝܽܘܕܳܐ، ܘܠܰܫܰܢ ܐܰ ܥ̈ܡܰܠܰܬ̣ܬ̣ܶܐ ܡܺܝܫܰܝܶܢܽܘ ܐܰܥܡܰܝܝܶܐ. ܟܶܐܒܥܺܝܢܰܐ ܡܶܢܟ̣ܽܘ ܐܢܢܰܚܽܘ̈ܢܳܢܰܝܕܰܢ، ܕܶܐܡܐܰܕܒܺܝܬܽܘ ܠܰܗ̱ܢܺܝ ܕܠܰܬܢܶܐ ܡܪ̈ܰܬܒܶܐ. ܘܕܶܡܣܰܠܶܝܬܽܘ ܐܰ ܙܰܝܳܥ̈ܶܐ، ܘܕܣܶܢܕܺܝܬܽܘ ܐܰ ܕ̥ܰܥܺܝ̣̈ܦ. ܡܣܰܝܒܶܪܽܘ ܟܽܠ ܐ̱ܢܳܫܳܐ. ܗܘܰܐܘܽܘ ܡܰܚܺܝ̈ܣܶܐ، ܕܠܳܐ ܡܰܕܶܥܪܺܝܬܽܘ ܒܺܝ̣ܫܬܳܐ (ܚܰܪܒܳܐ) ܡܶܚܠܰܦ ܒܺܝ̣ܫܬܳܐ. ܐܶܠܳܐ ܒܟܽܠ ܙܰܒܢܳܐ ܪܗܰܛܽܘ ܒܶܬ̣ܪܰܐ ܛܰܘ̈ܳܬ̣ܳܐ، ܓܰܢ̱ܒ ܚܕܳܕ̈ܶܐ ܘܓܰܢ̱ܒ ܟܽܠ ܐ̱ܢܳܫܳܐ. ܒܟܽܠ ܙܰܒܢܳܐ ܡܶܦܨܶܚܽܘ. ܡܨܰܠܶܘܽܘ ܕܠܳܐ ܩܛܳܥܳܐ. ܒܟܽܠ ܡܶܕܶܐ ܡܰܘܕܶܘܽܘ. ܡܺܝܕ̥ܶܐ ܕܗܰܢܳܝܳܐ ܐܽܘ ܨܶܒܝܳܢܳܐ ܕܰܐܠܳܗܳܐ ܒܝܶܫܽܘܥ ܡܫܺܝܚܳܐ ܐܰܒܟ̣ܽܘ. ܐܺܝ ܪܽܘܚܳܐ ܠܳܐ ܡܰܛܦܶܝܬܽܘ. ܐܰ ܢܒܺܝܰܘ̈ܳܬ̣ܳܐ ܠܳܐ ܡܚܰܩܪܺܝܬܽܘ. ܒܟܽܠ ܡܶܕܶܐ ܚܽܘܪܽܘ، ܘܽܐܘ ܫܰܦܺܝܪܳܐ ܨܽܘܕܽܘ. ܪܚܰܩܽܘ ܡܶܐܟܽܠ ܫܶܟܶܠ ܕܺܐܝ ܒܺܝܫܬܳܐ. ܐܰܠܳܗܳܐ ܕܽܐܘ ܫܠܳܡܳܐ ܡܩܰܕܰܫܟ̣ܽܘ ܒܶܓܡܺܝܪܽܘܬ̣ܳܐ܆ ܘܢܳܛܶܪ ܐܺܝ ܪܽܘܚܰܬ̣ܟ̣ܽܘ ܘܺܐܝ ܢܰܦܫܰܬ̣ܟ̣ܽܘ ܘܽܐܘ ܦܰܓ̣ܪܰܬ̣ܟ̣ܽܘ (ܔܰܣܰܕܰܬ̥ܟ̥ܽܘ) ܕܠܳܐ ܥܰܝܒܳܐ ܗܽܘܠ ܠܺܝ ܡܶܐܬ̣ܰܝܬܳܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ. ܫܰܪܺܝܪܳܐܝܳܐ ܗܰܘܳܐ ܕܶܩܪܶܠܰܠܟ̣ܽܘ، ܘܓܶܡܟܰܡܶܠ ܐܽܘ ܡܶܕܶܐ ܕܶܡܫܰܪܶܐܠܶܗ ܐܶܒܶܗ̱. ܐܰܢܢܰܚܽܘ̈ܢܳܢܰܝܕ̥ܺܝ! ܡܨܰܠܶܘܽܘ ܠܰܫܰܢܰܢ. ܡܫܰܐܶܠܽܘ ܒܽܐܘ ܫܠܳܡܳܐ ܕܰܐܢ̈ܢܰܚܶܐ ܟܽܠܠܶܗ ܒܶܢܫܰܩܬܳܐ ܩܰܕܺܝܫܬܳܐ. ܓܡܰܘܡܶܐ ܐ̱ܢܳܐ ܠܟ̣ܽܘ ܒܡܳܪܰܢ، ܕܡܶܩܪܳܝܳܐ ܐܺܝ ܐܶܓܰܪܬ̣ܰܬ̣ܶܐ ܠܟܽܠܠܶܗ ܐܰܢܢܰܚܽܘ̈ܢܳܢܶܐ ܩܰܕܺܝ̣̈ܫܶܐ. ܐܺܝ ܛܰܝܒܽܘܬ̣ܳܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ ܐܰܥܡܰܝܟ̣ܽܘ ܐܰܡܺܝܢ ܀