ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܳܘܣ ܐ
ܘ: ܐ ـ ܝܒ 1Timothy 6:1-12

ܗܰܢܺܝ ܕܟܶܬܢ̈ܶܐ ܬܰܚܬܽܘ ܢܺܝܪܳܐ ܕܺܐܝ ܓܪܰܥܝܽܘܬ̣ܳܐ ܠܰܡܳܪ̈ܰܬ̣ܬ̣ܶܐ، ܐܺܝܩܳܪܳܐ ܟܰܡܺܝܠܳܐ ܛܪܳܐ ܡܝܰܩܪܺܝ. ܠܰܫܰܢ ܕܠܳܐ ܡܺܝܓܰܐܕܶܦ ܐܶܫܡܶܗ ܕܰܐܠܳܗܳܐ ܘܽܐܘ ܝܽܘܠܦܳܢܰܝܕܶܗ. ܘܺܐܝܕ̥ܰܐ ܐܰ ܪ̈ܺܝ̣ܫܳܢܶܐ ܡܗܰܝ̈ܡܢܶܐܢܶܐ، ܛܪܳܐ ܐܰ ܓܪ̈ܶܥܶܐ ܠܳܐ ܡܚܰܩܪܶܢܢܶܐ. ܥܰܠ ܕܟܶܬܢܶܐ ܐܰܢܢܰܚܽܘ̈ܢܳܢܰܬ̥ܬ̥ܶܗ. ܐܶܠܳܐ ܙܶܬ ܛܪܳܐ ܟ̣ܳܕܡܶܢܢܶܐ. ܥܰܠ ܕܶܡܗܰܝ̈ܡܢܶܐ ܘܚܰܒܺܝ̣̈ܒܶܢܶܐ، ܘܟܳܗ̱ܘܶܐ ܐܰܥܠܰܝ̈ܝܶܐ ܦܰܝܕܰܐ ܒܺܐܝ ܟ̣ܶܕܡܰܬ̣ܬ̣ܶܐ. ܗܰܢܺܝ ܡܳܠܰܦ ܘܟܪܰܙ. ܐܶܢ ܟܺܝܬ ܐ̱ܢܳܫܳܐ ܕܟܳܡܳܠܶܦ ܝܽܘܠܦܳܢܳܐ ܐ̱ܚܪܶܢܳܐ، ܘܠܰܬܝܳܐ ܡܘܰܦܩܳܐ ܠܰܡܶـ̈ܠܶܐ ܡܣܰܘ̈ܝܶܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ، ܘܠܽܐܘ ܝܽܘܠܦܳܢܳܐ ܕܺܐܝ ܙܽܘܥܬ̣ܳܐ ܕܰܐܠܳܗܳܐ، ܗܰܢܳܐ ܟܳܗ̱ܘܶܐ ܪܳܡܳܐܢܳܐ (ܟܶܐܒܰܪ) ܘܡܶܕܶܐ ܠܳܐ ܟܳܕ̥ܶܥ. ܘܟܰܐܺܝܘܳܐ ܕܽܐܘ ܥܶܩܳܒܳܐ ܘܕܺܐܝ ܡܔܰܕܰܠܰܐܝܳܐ. ܕܡܶܢܢܶܐ ܟܳܗ̱ܘܶܐ ܚܣܳܡܳܐ، ܘܩܰܠܶܐ، ܘܓܶܕܳܦܳܐ، ܘܦܬܰܟܰܪ ܒܺܝ̣ܫܳܐ، ܘܦܠܺܝܓ̣ܽܘܬ̣ܳܐ ܒܰܝܢܰܐ ܐ̱ܢܳܫ̈ܶܐ. ܗܰܢܺܝ ܐ̱ܢܳܫܶܢ̈ܶܐ ܕܽܐܘ ܦܶܟܪܰܬ̣ܬ̣ܶܐ ܚܰܪܺܝܘܳܐ، ܘܩܛܺܝ̈ܥܶܐܢܶܐ ܡܽܐܘ ܫܪܳܪܳܐ. ܘܟܳܚܽܘܫܘܺܝ، ܕܬܰܔܰܪܰܐܝܳܐ ܐܺܝ ܙܽܘܥܬܳܐ ܕܰܐܠܳܗܳܐ. ܗܰܬ ܪܚܰܩ ܡܰܗ̱ܢܺܝ. ܐܰܚܢܰܐ ܐܺܝ ܬܰܔܰܪܰܝܕܰܢ ܪܰܒܬܳܐܝܳܐ. ܕܟܶܬܝܳܐ ܐܺܝ ܙܽܘܥܬ̣ܳܐ ܕܰܐܠܳܗܳܐ ܥܰܡ ܩܰܢܰܐܥܰܐ. ܥܰܠ ܕܠܳܐ ܡܰܥܒܰܪ ܠܰܢ ܡܶܕܶܐ ܠܽܐܘ ܥܳܠܡܳܐ. ܘܺܝܕ̥ܶܥܬܳܝܳܐ ܣܬܶܐ ܠܳܐ ܓܩܽܘܕܪܺܝܢܰܐ ܕܡܶܦܩܺܝܢܰܐ ܡܶܕܶܐ ܡܶܢܶܗ. ܡܰܗ̱ܘܟ̣ܰܐ ܓܡܰܟܦܶܐܠܰܢ ܐܽܘ ܡܽܘܟܠܳܐ ܘܽܐܘ ܠܘܳܫܳܐ. ܐܰܝܢܰܐ ܕܟܶܐܒܥܺܝ ܕܗܳܘܶܢ ܥܰܬܺܝܪ̈ܶܐ (ܙܰܢܓܺܝܢ)، ܓܢܶܦܠܺܝ ܒܢܶܣܝܽܘ̈ܢܶܐ ܘܒܰܦܰܚ̈ܶܐ ܘܒܪ̈ܰܝܰܐܓܰܬ ܓ̥ܰܠܰܒܶܐ ܕܟܶܬܢܶܐ ܣܰܟ̥̈ܠܶܐ ܘܡܰܕ̥ܺܝܪ̈ܳܢܶܐ ܘܟܳܛܶܡܪܺܝ ܐܰܢ̈ܢܳܫܶܐ ܒܽܐܘ ܚܪܳܘܳܐ ܘܒܽܐܘ ܗܰܠܰܐܟ. ܐܽܘ ܥܶܩܳܪܳܐ ܕܟܽܠܠܶܗ ܐܰ ܒܺܝ̣̈ܫܳܬ̣ܳܐ، ܐܽܘ ܪܚܳܡܳܐ ܕܰܙܙܽܘ̈ܙܶܐܝܳܐ (ܟܰܠܠܰܐ). ܘܟܺܝܬ ܐ̱ܢܳܫ̈ܳܐ ܕܶܪܚܺܝܡܶܢܢܶܐ، ܘܡܺܐܝ ܗܰܝܡܳܢܽܘܬ̣ܳܐ ܛܰܐܥܶܢ، ܘܡܰܥܒܰܪ ܠܶܢ ܪܽܘܚܰܝܝܶܐ ܠܬܰܫܢܺܝ̈ܩܶܐ ܓ̥ܰܠܰܒܶܐ. ܐܶܠܶܐ ܗܰܬ ܝܰܐ ܒܰܪܢܳܫܳܐ (ܐܶܢܣܰܢ) ܕܰܐܠܳܗܳܐ، ܥܪܰܩ ܡܰܗ̱ܢܺܝ، ܘܪܗܰܛ ܒܶܬ̣ܪܺܝ ܙܰܕܺܝܩܽܘܬܳܐ، ܘܒܶܬ̣ܪܺܝ ܟܺܐܢܽܘܬ̣ܳܐ، ܘܒܶܬ̣ܪܺܝ ܗܰܝܡܳܢܽܘܬ̣ܳܐ، ܘܒܶܬ̣ܪܺܝ ܚܽܘܒܳܐ، ܘܒܶܬ̣ܪܺܝ ܡܣܰܝܒܪܳܢܽܘܬ̣ܳܐ، ܘܒܶܬ̣ܪܺܝ ܡܰܟܺܝܟ̣ܽܘܬ̣ܳܐ. ܫܓ̥ܰܠ ܫܽܘܓ̥ܠܳܐ ܛܳܘܳܐ ܕܺܐܝ ܗܰܝܡܳܢܽܘܬ̣ܳܐ. ܘܨܽܘܕ ܐܰ ܚܰܝ̈ܶܐ ܕܶܠܥܳܠܰܡ ܕܰܐܠܶܗ ܩܪܰܬ. ܘܡܰܘܕܶܝܠܳܟ ܬܰܘܕܺܝܬ̣ܳܐ ܛܰܘܬܳܐ ܩܶܡ ܣܳܗ̈ܕܶܐ ܓ̥ܰܠܰܒܶܐ. ܒܰܪܶܟ̥ܡܳܪܝ܀