ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܝ: ܐ ـ ܝܚ 2Corinthians 10:1-18

ܐܳܢܳܐ ܦܰܘܠܳܘܣ، ܒܺܐܝ ܢܺܝܚܽܘܬ̣ܳܐ ܘܒܺܝ ܡܰܟܺܝܟܽܘܬ̣ܳܐ ܕܶܡܫܺܝ̣ܚܳܐ ܓܡܶܬܪܰܔܶܐ ܐܢܳܐ ܡܶܢܟܽܘ. ܘܰܠܰܘ ܒܺܐܝ ܦܳܬ̣ܳܐ ܒܰܝܢܰܬ̣ܟ̣ܽܘ ܕܰܥܺܝܦ ܐ̱ܢܳܐ، ܐܶܠܳܐ ܐܺܝ ܢܰܩܩܰܐ ܕܪܰܚܽܘܩܳܐ ܐ̱ܢܳܐ ܟܶܬܠܺܝ ܬܽܘ̣ܟܠܳܢܳܐ ܐܰܥܠܰܝܟ̣ܽܘ. ܟܳܐܒܰܥ ܐ̱ܢܳܐ ܡܶܢܟܽܘ ܕܠܳܐ ܡܶܕ ܐܰܬ̣ܺܝܢܳܐ، ܡܺܝ̣ܬܰܥܶܩ ܐ̱ܢܳܐ ܒܽܐܘ ܬܽܘܟ̣ܠܳܢܳܐ ܕܟܶܬܠܺܝ، ܟ̣ܶܕ ܟܚܳܫܰܘ ܐ̱ܢܳܐ ܕܣܰܡ ܐ̱ܢܳܐ ܔܰܨܰܐܪܰܐ ܥܰܠܰܐ ܐ̱ܢܳܫ̈ܰܢܶܟ ܕܟܳܚܽܘܫܘܺܝ ܠܰܢ ܕܟ̣ܶܕ ܒܽܐܘܔܰܣܰܕ ܟܳܡܗܰܠܟ̣ܺܝ̣ܢܰܐ. ܡܺܝܕ̥ܶܐ ܘܰܠܰܘ ܒܽܐܘ ܔܰܣܰܕ ܟܳܡܗܰܠܟ̣ܺܝܢܰܐ، ܐܶܠܳܐ ܠܳܐ ܟ̣ܶܕ ܠܽܐܘ ܔܰܣܰܕ ܟܳܡܚܰܪܒܺܝܢܰܐ. ܡܺܝܕ̥ܶܐ ܕܽܐܘ ܣܺܝܠܰܚ ܕܽܐܘ ܚܰܪܒܰܝܕ̥ܰܢ، ܠܰܬܝܳܐ ܕܽܐܘ ܔܰܣܰܕ، ܐܶܠܳܐ ܕܽܐܘ ܚܰܝܠܳܐ ܕܰܐܠܳܗܳܝܳܐ. ܘܶܐܒܶܗ ܟܩܳܕܪܺܝܢܰܐ ܕܡܰܚܶܪܘܺܝܢܰܐ ܐܰ ܩܰܠܥܰܐܘ̈ܳܬ̣ܳܐ ܥܰܨܝ̈ܶܐ. ܘܡܰܚܶܪܘܺܝܢܰܐ ܟܽܠ ܚܽܘܫܳ̈ܒܶܐ ܟܶܐܒܰܪ ܕܟܳܥܳܠܶܢ ܡܩܰܒܶܠ ܕܽܐܘ ܡܰܕ̥ܥܳܐ ܕܰܐܠܳܗܳܐ. ܘܨܰܝܕܺܝܢܰܐ ܝܰܐܣܺܝܪ̈ܶܐ ܟܽܠ ܢܺܝ̈ܰܬ ܠܽܘ ܫܡܳܥܳܐ ܕܶܡܫܺܝ̣ܚܳܐ. ܘܡܶܕ ܟܰܡܺܝܠܳܐ ܐܺܝ ܡܶܫܬܰܡܥܳܢܽܘܬ̣ܬܟ̣ܽܘ، ܚܰܕ̥ܺܝܪ̈ܶܢܰܐ ܕܡܶܬܢܰܩܡܺܝܢܰܐ ܡܶܐܟܽܠ. ܒܺܐܝ̣ ܦܳܬ̣ܳܐ ܟܚܰܝܪܺܝܬܽܘ. ܐܶܢ ܐ̱ܢܳܫܳܐ ܬܟ̣ܺܝܠܳܐܝܳܐܝܳܐ ܥܰܠ ܪܽܘܚܶܗ ܕܟܶܬܝܳܐ ܕܶܡܫܺܝ̣ܚܳܐ، ܗܰܢܳܐ ܛܪܳܐܕ̥ܶܥ ܡܶܐ ܪܽܘܚܶܗ، ܟ̣ܶܕ ܕܟܶܬܝܳܐ ܗܺܝܝܶܗ̱ ܕܶܡܫܺܝ̣ܚܳܐ، ܗܰܘܟ̣ܰܢܰܐ ܐܰܚܢܰܐ ܣܬܶܐ. ܘܰܠܰܘ ܕܡܺܝܫܰܒܗܰܪ ܐ̱ܢܳܐ ܡܶܕܶܐ ܙܳܝܽܘܕܳܐ، ܒܽܐܘ ܫܽܘܠܛܳܢܳܐ ܕܗܽܘܠܶܗ ܠܺܝ ܠܡܳܪܰܢ ܠܳܐ ܓܡܺܝܢܰܟܰܦ ܐ̱ܢܳܐ. ܡܺܝܕ̥ܶܐ ܕܠܺܝ ܥܡܰܪܰܬ̣ܟ̣ܽܘ ܗܽܘܠܶܗ ܠܰܢ، ܘܠܳܐ ܠܽܐܘ ܚܪܳܘܰܬ̣ܟ̣ܽܘ. ܕܠܶܐܙܙܶܐ ܡܶܚܫܰܘ ܐ̱ܢܳܐ ܟ̣ܶܕ ܬܶܙܺܝܥܳܐ ܓܡܰܙܶܥ ܐ̱ܢܳܐ ܠܟ̣ܽܘ ܒܰܐܶܓܪ̈ܳܬ̣ܰܝܕܺܝ. ܡܺܝܕ̥ܶܐ ܕܟܺܝܬ ܐ̱ܢܳܫ̈ܳܐ ܕܟܶܐܡܡܺܝ: ܕܰܐܶܓܪ̈ܳܬ̣ܳܐ ܝܰܩܽܘܪ̈ܶܐ ܘܩܰܘ̈ܝܶܐܢܶܐ. ܐܶܠܳܐ ܐܽܘ ܡܰܐܬ̣ܝܳܐ ܕܽܐܘ ܓܽܘܫܡܳܐ ܕ̥ܰܥܺܝܦܝܳܐ، ܘܺܐܝ ܡܶܠܬ̣ܰܝܕ̥ܶܗ ܡܚܰܩܰܪܬܳܝܳܐ. ܐܶܠܳܐ ܗܰܬ̣ܶܐ ܛܪܳܐ ܚܳܫܽܘ ܗܰܘܳܐ ܕܟܳܐܡܶܪ ܗܰܘܟ̣ܰܐ. ܟ̣ܶܕ ܟܶܬܢܰܐ ܒܺܐܝ ܡܶܠܬ̣ܳܐ ܕܺܐܝ̣ ܐܶܓܰܪܬܰܝܕܰܢ ܐܺܝ ܢܰܩܩܰܐ ܕܟܶܬܢܰܐ ܪ̈ܰܚܽܘܩܶܐ، ܗܰܘܟ̣ܰܢܰܐ ܣܬܶܐ ܒܽܐܘ ܥܰܡܰܠ ܐܺܝ ܢܰܩܩܰܐ ܕܟܶܬܢܰܐ ܩܰܪ̈ܺܝ̣ܘܶܐ. ܡܺܝܕ̥ܶܐ ܕܠܳܐ ܓܣܰܝܡܺܝܢܰܐ ܔܰܣܰܐܪܰܐ ܕܚܽܘܫܘܺܝܢܰܐ ܪܽܘܚܰܢ ܥܰܡ ܗܰܢܶܟ ܕܟܳܡܫܰܒܚܺܝ ܪܽܘܚܰܝܝܶܐ ܐܰܘ ܕܣܰܝܡܺܝܢܰܐ ܪܽܘܚܰܢ ܟ̣ܳܬ̣ܰܝܝܶܗ. ܐܶܠܳܐ ܡܺܝܕ̥ܶܐ ܕܗܶܢܢܶܐ ܟܳܡܩܰܝܣܺܝ ܐܰ ܢܢܰܦ̈ܫܳܬ̣ܰܬ̣ܶܗ ܒܪܽܘܚܰܝܝܶܐ ܠܳܐ ܓܦܶܗܡܺܝ. ܐܰܚܢܰܐ ܠܳܐ ܓܡܺܝܫܰܒܗܪܺܝܢܰܐ ܙܶܬ ܡܽܐܘ ܩܰܝܰܐܣܰܝܕ̥ܰܢ. ܐܠܳܐ ܟ̣ܕܽܘ ܩܰܝܰܐܣ ܩܳܢܽܘܢܳܝܳܐ ܕܶܦܠܶܓ̣ܠܶܗ ܠܰܢ ܐܰܠܳܗܳܐ. ܕܡܳܛܺܝܢܰܐ ܗܽܘܠ ܣܶܬܟ̣ܽܘ ܣܬܶܐ ܗܰܘܟ̥ܰܢܰܐ. ܘܠܳܐ ܟܶܕ ܠܶܓ ܡܳܛܝ̣ܢܰܐ ܣܶܬܟ̥ܽܘ ܟܳܡܶܪܟ̥ܺܝ̣ܢܰܐ ܪܽܘܚܰܢ. ܡܰܛܺܝܢܰܐ ܣܬܶܐ ܣܶܬܟ̣ܽܘ ܒܺܐܝ ܟܳܪܽܘܙܽܘܬ̣ܳܐ ܕܽܐܘ ܡܓܰܠܝܶܢ ܕܶܡܫܺܝ̣ܚܳܐ. ܠܳܐ ܓܡܺܝܫܰܒܗܪܺܝܢܰܐ ܠܰܪܘܰܠ ܡܽܐܘ ܩܰܝܰܐܣ ܒܽܐܘ ܬܰܥܒܳܐ ܕܶܐ̱ܚܪ̈ܶܢܶܐ. ܐܶܠܳܐ ܟܶܬܠܰܢ ܣܰܒܪܳܐ، ܐܺܝ ܢܰܩܩܰܐ ܕܝܶܪܘܳܐ ܐܺܝ ܗܰܝܡܳܢܽܘܬ̣ܰܬ̣ܟܽܘ، ܐܰܒܟ̥ܽܘ ܝܶܪܘܺܝܢܰܐ ܟ̣ܕܽܘ ܩܰܝܰܣܰܝܕܰܢ، ܘܟܳܪܙܺܝܢܰܐ ܙܳܝܽܘܕܳܐ ܠܽܘܓܰܒܬܶܪ ܡܶܢܟ̣ܽܘ ܣܬܶܐ܇ ܠܳܐ ܒܽܘ ܩܰܝܰܐܣ ܕܶܐܚܪ̈ܶܢܶܐ܆ ܒܰܐܢܺܝ̣ ܕܟܶܬܢܶܐ ܡܥܰܕܠܶܐ ܡܺܝ̣ܫܰܒܗܪܺܝܢܰܐ! ܐܶܠܳܐ ܗܰܘܳܐ ܕܡܺܝܫܰܒܗܶܪ، ܛܪܳܐ ܒܰܐܠܳܗܳܐ ܡܺܝܫܰܒܗܶܪ. ܠܰܬܝܳܐ ܗܰܘܳܐ ܕܶܡܫܰܒܶܚ (ܕܶܡܘܰܨܶܦ) ܪܽܘܚܶܗ ܢܰܕ̥ܝܦܳܐ ܐܶܠܳܐ ܗܰܘܳܐ ܕܰܐܠܳܗܳܐ ܡܫܰܒܰܚܠܶܗ. ܒܰܪܶܟ̥ܡܳܪܝ ܀