ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܥܶܒܪ̈ܳܝܶܐ
ܝܒ: ܝܒ ـ ܟܙ Hebrews 12:12-27

ܡܰܗ̱ܘܟ̣ܰܐ ܐܝܕ̥ܰܝ̈ܟ̣ܽܘ ܐܰ ܪ̈ܰܦܝܶܐ، ܘܒܰܪ̈ܟܳܬ̣ܰܝܟ̣ܽܘ ܐܰ ܡܰܪ̈ܥܠܶܐ ܬ̣ܰܐܒܶܬܽܘ. ܘܣܽܘܡܽܘ ܕܰܪ̈ܒܳܢܶܐ ܡܣܰܘ̈ܝܶܐ ܠܪ̈ܰܓ̥ܠܳܬ̣ܰܝܟ̣ܽܘ. ܠܰܫܰܢ ܕܽܐܘ ܨܰܩܩܰܬ ܠܳܐ ܢܳܦܶܩ ܡܽܐܘ ܕܰܪܒܳܐ. ܐܶܠܳܐ ܕܢܳܝܰܚܠܶܗ. ܪܗܰܛܽܘ ܒܶܬ̣ܪܽܘ ܫܠܳܡܳܐ ܘܒܶܬ̥ܪܺܝ ܩܰܕܺܝܫܽܘܬ̥ܳܐ ܥܰܡ ܟܽܠ ܐ̱ܢܳܫܳܐ. ܕܠܳܐ ܡܺܢܰܗ̱̇ ܐ̱ܢܳܫܳܐ ܠܡܳܪܰܢ ܠܳܐ ܓܚܳܙܶܐ. ܗܘܰܐܘܽܘ ܡܰܚܺܝ̣̈ܣܶܐ، ܠܰܫܰܢ ܕܠܳܐ ܐ̱ܢܳܫܳܐ ܡܶܢܟ̣ܽܘ ܡܶܩܛܶܥ ܡܺܐܝ ܛܰܝܒܽܘܬ̣ܳܐ ܕܰܐܠܳܗܳܐ، ܕܠܶܐܙܙܶܐ ܘܰܪܺܝܕ̥ܳܐ ܡܰܐܺܝܪܳܐ ܝܳܥܶܐ ܘܡܰܥܶܩܟ̣ܽܘ، ܘܶܐܒܶܗ ܓ̥ܰܠܰܒܶܐ ܡܺܝܚܰܪܡܺܝ. ܐܰܘ ܕܠܶܐܙܙܶܗ ܐ̱ܢܳܫܳܐ ܡܶܚܙܶܐ ܐܰܒܟ̣ܽܘ ܙܰܢܳܝܳܐ ܘܪܰܦܝܳܐ ܟ̣ܶܐ ܥܺܝܣܽܘ. ܗܰܘܳܐ ܕܶܒܚܰܕ̱ ܡܽܘܟܠܳܐ ܡܙܰܒܰܢ ܠܶܗ̱ ܐܺܝ ܒܽܘܟ̣ܪܽܘܬ̣ܰܝܕ̥ܶܗ. ܡܺܝܕ̥ܶܐ ܕܟܳܕ̥ܥܺܝܬܽܘ ܣܬܶܐ، ܒܶܬ̣ܶܪ ܐܰܒܶܥ ܗ̱ܘܳܐ ܕܝܳܪܶܬ̣ ܐܺܝ ܒܽܘܟ̣ܪܽܘܬ̣ܳܐ، ܠܳܐ ܡܰܩܒܶܠ. ܘܠܳܐ ܚܙܶܐ ܠܶܗ ܕܽܘܟܬ̣ܳܐ ܠܺܐܝ ܬܝܳܒܽܘܬ̣ܳܐ. ܥܰܡܰܝܳܐ ܕܒܰܐܕܰܡ̈ܥܶܐ ܐܰܒܶܥ ܠܰܗ̱̇. ܠܳܐ ܠܽܘ ܛܽܘܪܳܐ ܕܟܳܝܳܩܶܕ̥ ܒܺܐܝ ܢܽܘܪܳܐ ܡܩܰܕܰܡܟ̣ܽܘ، ܘܠܳܐ ܠܽܐܘ ܥܰܝܡܳܐ، ܘܠܺܐܝ ܥܽܘܬܡܰܐ، ܘܠܽܐܘ ܥܰܠܥܳܠܳܐ، ܘܠܳܐ ܠܽܐܘ ܩܳܠܳܐ ܕܺܐܝ ܩܰܪܢܳܐ، ܘܠܽܐܘ ܩܳܠܳܐ ܕܰܡ̈ܡܶܠܶܐ. ܗܰܢܶܟ ܕܫܰܡܺܝܥܺܝ، ܠܰܐܒܺܝܥܺܝ ܕܡܺܝܬܰܘܙܶܕ، ܘܡܺܝܬܰܔܓ̥ܶܠ ܐܰܥܡܰܝܝܶܗ. ܥܰܠ ܕܠܳܐ ܩܽܘܕܪܺܝ ܗ̱ܘܳܐ ܕܶܡܣܰܝܒܪܺܝ ܐܽܘ ܡܶܕܶܐ ܕܡܰܘܨܶܢ ܐܰܥܠܶܗ. ܘܰܠܰܘ ܚܰܝܘܰܢ ܕܶܡܩܰܕܶܡ ܠܽܐܘ ܛܽܘܪܳܐ ܕܡܶܪܔܶܡ. ܗܰܘܟ̣ܰܐ ܐܺܝ ܚܙܰܝܬܳܐ ܡܰܙܺܝܥܳܢܺܝܬ̣ܳܐ ܗ̱ܘܰܐ. ܚܰܬܬܰܐ ܕܡܽܘܫܶܐ ܐ̱ܡܶܪ ܠܶܗ: ܓܙܳܝܰܥ ܐ̱ܢܳܐ ܘܓܡܰܪܥܰܠ ܐ̱ܢܳܐ. ܐܶܠܳܐ ܗܰܐܬܽܘ ܡܩܰܕܰܡܟ̣ܽܘ ܠܽܐܘ ܛܽܘܪܳܐ ܕܨܶܗܝܘܽܢ ܘܠܺܐܝ ܡܕܺܝܢ̱ܬܳܐ ܕܰܐܠܳܗܳܐ ܐܽܘ ܚܰܝܳܐ. ܘܠܐܽܘܪܫܠܶܡ ܕܒܺܐܝ ܫܡܰܝܳܐ، ܘܠܰܟܶܢ̈ܫܶܐ ܕܰܪ̈ܶܒܘܳܬ̣ܳܐ ܕܰܡܡܰܠܰܐܟ̈ܶܐ. ܘܠܺܐܝ ܥܺܕ̱ܬܳܐ ܕܰܒܽܘܟ̥ܪ̈ܶܐ ܕܟܳܡܶܟܬ̣ܳܘܺܝ ܒܺܐܝ ܫܡܰܝܳܐ، ܘܠܰܐܠܳܗܳܐ ܐܽܘ ܕܰܝܳܢܳܐ ܕܟܽܠ، ܘܠܰܪ̈ܽܘܚܳܬ̣ܳܐ ܕܰܙܰܕܺܝ̣̈ܩܶܐ ܕܟܰܡܺܝܠܺܝ، ܘܠܺܐܝ ܘܰܨܺܝ̣ܛܰܐ ܕܽܐܘ ܥ̱ܰܗܕ (ܡܽܘܩܰܘܠܰܐ) ܚܰܕ̱ܬ̣ܳܐ ܝܶܫܽܘܥ. ܘܠܽܐܘ ܬܶܪܺܝܣܳܐ ܕܽܐܘ ܐܰܕܡܳܐ ܕܟܳܡܶܔܓ̥ܶܠ ܛܰܘ ܡܰܢ ܕܗܳܒܺܝܠ. ܚܽܘܪܽܘ! ܕܠܶܐܙܙܶܐ ܪܳܚܩܺܝܬܽܘ ܡܰܗ̱ܘܳܐ ܕܟܳܡܶܔܓ̥ܶܠ ܐܰܥܡܰܝܟ̣ܽܘ. ܡܺܝܕ̥ܶܐ ܕܶܐܢ ܠܳܐ ܟ̣ܰܐܠܺܝܨܺܝ ܗܰܢܶܟ ܕܪܰܚܺܝܩܺܝ ܡܰܐܗ̱ܘܳܐ ܕܶܔܓ̥ܺܝܠ ܐܰܥܡܰܝܝܶܐ ܒܺܐܝ ܐܰܪܥܳܐ، ܐܰܚܢܰܐ ܙܶܬ ܠܳܐ ܓܟ̣ܽܘܠܨܺܝܢܰܐ ܐܶܢ ܕܡܰܕܶܥܪܺܝܢܰܐ ܦܳܬ̣ܰܢ ܡܰܐܗ̱ܘܳܐ ܕܟܳܡܶܔܓ̥ܶܠ ܐܰܥܡܰܢ ܡܺܐܝ ܫܡܰܝܳܐ. ܗܰܘܳܐ ܕܽܐܘ ܩܳܠܰܝܕܶܗ، ܗܶܙܠܶܗ ܐܺܝ ܐܰܪܥܳܐ. ܐܶܠܳܐ ܐܽܘܥܕܳܐ ܡܘܰܥܰܕ ܠܶܗ ܘܟܳܐܡܶܪ: «ܢܰܩܩܰܐ ܐ̱ܚܪܶܬܳܐ ܓܗܳܝܰܙ ܐܢܳܐ ܠܳܐ ܐܺܝ ܐܰܪܥܳܐ ܒܶܠܚܽܘܕ̥ܶܗ، ܐܶܠܳܐ ܐܺܝ ܫܡܰܝܳܐ ܣܬܶܐ». ܗܰܝܳܐ ܕܐ̱ܡܶܪ ܠܶܗ ܢܰܩܩܰܐ ܐ̱ܚܪܶܬܳܐ، ܟܳܡܰܚܘܝܳܐ ܕܓܶܬܳܗ̱ܘܶܐ ܫܽܘܚܠܳܦܳܐ ܕܰܗ̱ܢܺܝ ܕܟܳܡܺܗܳܙܺܝ (ܐܽܘ ܡܶܕܶܐ ܕܟܶܬܝܳܐ ܟ̥ܠܺܝ̣ܩܳܐ). ܠܰܫܰܢ ܕܒܶܠܚܽܘܕ̥ܶܐ ܦܰܝܫܺܝ، ܗܰܐܢܺܝ ܕܠܳܐ ܓܡܺܝܗܳܙܺܝ. ܒܰܪܶܟ̥ܡܳܪܝ܀