ܬܶܫܡܶܫܬܳܐ ܩܰܕܡܳܝܬܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܗ: ܐ ـ ܘ Romans 15:1-6

ܡܰܕܝܽܘܢ ܢܰܐ ܐܰܚܢܰܐ ܐܰ ܩܰܘ̈ܝܶـܐ، ܕܛܳܥܢܺܝܢܰܐ ܐܽܘ ܟܶـܘܳܐ ܕܰܐ ܕ̥ܰܐܥܺܝܦ، ܘܠܳܐ ܠܪܽܘܚܰܢ ܫܳܦܪܺܝܢܰܐ. ܐܶܠܳܐ ܟܽܠ ܚܰܕ̱ ܡܶܢܰܢ ܠܰܫܰܢ ܐܺܝ ܥܡܰܪܰܐ، ܛܪܳܐ ܒܰܛܰܘ̈ܳܬ̥ܳܐ ܫܳܦܶܪ ܠܽܐܘ ܩܰܪܺܝܘܰܕ̥ܶܗ. ܡܺܝܕ̥ܶܐ ܕܶܡܫܺܝܚܳܐ ܣܬܶܐ ܠܳܐ ܠܪܽܘܚܶܗ ܫܰܦܶܪ. ܥܰܠ ܕܶܟܬ̥ܺܝܘ «ܐܺܝ ܥܰܐܪܺܝܶܐ ܕܰܡܚܰܩܪ̈ܳܢܰܝܕ̥ܽܘܟ̥ ܢܰܦܺܝܠܳܐ ܐܰܥܠܺܝ» ܟܽܠ ܡܶܕܶܐ ܕܡܶܐ ܡܶܩܶܡ ܟܬ̥ܺܝܘ، ܠܰܫܰܢ ܐܽܘ ܝܽܘܠܦܳܢܰܝܕ̥ܰܢ ܟܬ̥ܺܝܘ. ܠܰܫܰܢ ܕܒܺܐܝ ܡܣܰܝܒܪܳܢܽܘܬ̥ܳܐ، ܘܒܺܐܝ ܣܰܗܰܐܠܰܐ ܕܰܟܬ̥ܳܘ̈ܶܐ، ܣܰܒܪܳܐ ܗܳܘܶܐ ܠܰܢ. ܐܽܘ ܐܰܠܳܗܳܐ ܕܺܐܝ ܡܣܰܝܒܪܳܢܽܘܬ̥ܳܐ ܘܕܺܐܝ ܣܰܗܰܐܠܰܐ، ܐܳܒܰܠܟ̥ܽܘ ܕܡܶܦܬܰܟܪܽܘܬܽܘ ܒܺܐܝܬܬܺܝܦܰܩ ܚܰܕ ܥܰܠܽܘ ܚܰܕ ܒܝܶܫܽܘܥ ܡܫܺܝܚܳܐ. ܠܰܫܰܢ ܕܟܽܠܟ̥ܽܘ ܒܚܰܕ̱ ܦܶܡܳܐ ܕܶܡܫܰܒܚܽܘܬܽܘ ܠܽܐܘ ܐܰܠܳܗܳܐ ܐܽܘ ܐܰܒܳܐ ܕܡܳܪܰܢ ܝܶܫܽܘܥ ܡܫܺܝܚܳܐ. ܒܰܪܶܟ̥ܡܳܪܝ܀

ܬܶܫܡܶܫܬܳܐ ܬܪܰܝܳܢܺܝܬܳܐ

ܐܶܓܰܪܬܳܐ ܕܝܰܥܩܽܘܒ ܫܠܺܝܚܳܐ
ܗ: ܝ ـ ܟ James 5:10-20

ܠܰܫܰܢ ܕܩܽܘܕܪܽܘܬܽܘ ܕܶܡܣܰܝܒܪܽܘܬܽܘ ܐܰ ܬܰܔܰܐܪ̈ܶܒ، ܡܽܘܕܽܘ ܐܰ ܢܒ̈ܺܝܶܐ ܡܰܬ̥ܠܳܐ (ܨܶܪܬܳܐ) ܠܰܫܰܢܰܝܟ̥ܽܘ. ܗܰܢܺܝ ܕܡܶܔܓ̥ܰܠܠܶܐ ܒܶܫܡܶܗ ܕܡܳܪܝܳܐ. ܟܰـܠܶܐ ܟܳܐܒܺܝܢܰܐ ܛܽܘܒܳܐ، ܠܰܗ̱ܢܺܝ ܕܶܡܣܰܝܒܰܪܪܶܗ. ܘܫܰܡܺܝܥܽܘܬܽܘ ܐܺܝ ܡܣܰܝܒܪܳܢܽܘܬ̥ܳܐ ܕܺܐܝܽܘܒ، ܘܺܐܝ ܐ̱ܚܰܪܰܝܬܳܐ ܕܣܶܡܠܶܗ ܠܶܗ ܐܰܠܳܗܳܐ ܚܶܙܝܰܠܟ̥ܽܘ. ܡܺܝܕ̥ܶܐ ܕܶܡܪܰܚܡܳܢܳܐ ܘܡܰܫܶܦܩܳܢܳܝܳܐ ܐܽܘ ܡܳܪܝܳܐ. ܡܶܩܶܡ ܡܶܐ ܟܽܠ ܡܶܕܶܐ ܐܰܢܢܰܚܽܘ̈ܢܳܢܰܝܕ̥ܺܝ، ܠܳܐ ܝܳܡܽܘܬܽܘ ܠܳܐ ܒܺܐܝ ܫܡܰܝܳܐ، ܘܠܳܐ ܒܺܐܝ ܐܰܪܥܳܐ. ܘܠܳܐ ܒܐܺܝܡܰܢ ܐ̱ܚܪܶܢܳܐ. ܐܶܠܳܐ ܛܪܽܗ̱ܘܶܐ ܐܽܘ ܟ̥ܰܒܪܰܬ̥ܟ̥ܽܘ، ܐܺܝܢ (ܐܶ) ܐܺܝܢ، ܘܠܳܐ ܠܳܐ. ܠܰܫܰܢ ܕܠܳܐ ܡܶܚܟܳܡܽܘܬܽܘ ܒܽܐܘ ܚܶܟܶܡ. ܐܺܝܕ̥ܰܐ ܐ̱ܢܳܫܳܐ ܡܶܢܟ̥ܽܘ ܬܳܗ̱ܘܶܐ ܒܥܺܝܩܽܘܬ̥ܳܐ، ܛܪܳܐ ܡܨܰܠܶܐ. ܘܺܐܝܕ̥ܰܐ ܕܗܳܘܶܐ ܦܨܺܝ̣ܚܳܝܳܐ، ܛܪܳܐ ܡܙܰܡܶܪ. ܘܺܐܝܕ̥ܰܐ ܕܗܳܘܶܐ ܟܰܐܺܝܘܳܐ، ܛܪܳܐ ܩܳܪܶܐ ܠܰܐ ܩܰܫ̈ܶـܐ (ܣܰܘ̈ܶܐ) ܕܺܐܝ ܥܺܕܬܳܐ، ܠܰܫܰܢ ܕܶܡܨܰܠܶܢ ܐܰܥܠܶܗ، ܘܡܶܫܚܺܝ̣ ܠܶܗ ܒܽܐܘ ܡܶܫܚܳܐ، ܒܶܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܘܺܐܝ ܨܠܽܘܬ̥ܳܐ ܕܺܐܝ ܗܰܝܡܳܢܽܘܬ̥ܳܐ ܓܡܰܢܺܝܚܳܐ ܠܰܗ̱ܘܳܐ ܕܟܶܬܝܳܐ ܟܰܐܺܝܘܳܐ، ܘܡܳܪܰܢ ܓܡܰܩܶܡ ܠܶܗ. ܘܺܐܝܕ̥ܰܐ ܚܛܳܗ̈ܶܐ ܣܶܡܠܶܗ ܓܡܶܓ̥ܦܳܪܺܝܠܶܗ ܢܶـܐ. ܡܶܥܬܰܪܶܦܽܘ ܒܰܚܛܳܗ̈ܰܬ̥ܟ̥ܽܘ ܓܰܢ̱ܒ ܚܕ̥ܳܕ̥̈ܶܐ. ܘܠܰܫܰܢ ܕܢܳܝܰܚܟ̥ܽܘ، ܡܨܰܠܶܘܽܘ ܠܶܚܕ̥ܳܕ̥̈ܶܐ. ܪܰܒܳܐܝܳܐ ܐܽܘ ܚܰܝܠܳܐ ܕܺܐܝ ܨܠܽܘܬ̥ܳܐ ܗܰܝܳܐ ܕܽܐܘ ܙܰܕܺܝܩܳܐ ܕܶܡܨܰܠܶܗ ܠܰܗ̇. ܐܺܠܺܝܳܐ ܣܬܶܐ ܐܶܢܣܰܐܢ ܡܓ̥ܰܡܡܳܐ ܟ̥ܳܐܬ̥ܰܢ ܗ̱ܘܰܐ. ܐܶܠܳܐ ܡܨܰܠܶܐ ܠܶܗ، ܠܰܫܰܢ ܕܠܳܐ ܢܳܚܶܬ ܡܰܛܪܳܐ ܥܰܠܺܝ ܐܰܪܥܳܐ. ܘܠܳܐ ܢܰܚܶܬ ܬܠܳܬ ܐܶܫ̈ܢܶܐ ܘܶܐܫܬܳܐ ܝܰܪ̈ܚܶܐ. ܘܢܰܩܩܰܐ ܐ̱ܚܪܶܬܳܐ ܡܨܰܠܶܐ ܠܶܗ، ܐܰ ܫܡ̈ܰܝܳܐ ܗܽܘܘܶܗ ܡܰܛܪܳܐ، ܘܺܐܝ ܐܰܪܥܳܐ ܗܽܘܠܰܗ̇ ܦܺܐܪ̈ܶܐ. ܒܰܪܶܟ̥ܡܳܪܝ܀

ܬܶܫܡܶܫܬܳܐ ܬܠܺܝܬܳܝܬܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܘ: ܐ ـ ܗ 2Corinthians 6:1-5

ܟ̥ܶܐ ܡܥܰܘ̈ܢܳܢܶܐ ܟܳܛܶܠܒܺܝܢܰܐ ܡܶܢܟ̥ܽܘ، ܕܠܳܐ ܡܰܟ̥ܠܽܘܬܽܘ ܡܶܢܟ̥ܽܘ ܐܺܝ ܛܰܝܒܽܘܬ̥ܳܐ ܕܰܐܠܳܗܳܐ ܗܰܝܳܐ ܕܡܰܩܒܰܠܟ̥ܽܘ. ܘܐܡܶܪ ܠܶܗ: «ܒܽܐܘ ܙܰܒܢܳܐ ܡܥܰܝܢܳܐ ܡܔܰܘܰܒܠܺܝ ܠܳܟ̥. ܘܒܽܐܘ ܝܰܘܡܳܐ ܕܽܐܘ ܟ̥ܰܠܰܐܨ ܡܥܰܘܰܢܠܺܝ ܠܳܟ». ܟܰܠܶܐ ܐܽܘܥܕܳܝܳܐ ܐܽܘ ܝܰܘܡܳܐ ܡܥܰܝܢܳܐ. ܘܟܰܠܶܐ ܐܽܘܥܕܳܝܳܐ ܐܽܘ ܝܰܘܡܳܐ ܕܽܐܘ ܟ̥ܰܠܰܐܨ. ܠܰܫܰܢ ܕܠܳܐܗ̱ܘܶܐ ܩܶܣܽܘܪ ܒܺܐܝ ܟ̥ܶܕܡܰܝܕ̥ܰܢ، ܕܠܶܐܙܙܶܐ ܗܳܘܽܘܬܽܘ ܣܰܒܰܒ ܠܺܐܝ ܬܶܪܒܰܠܬܳܐ ܕܐ̱ܢܳܫܳܐ! ܐܶܠܳܐ ܒܟܽܠ ܡܶܕܶܐ ܡܰܚܘܺܝܢܰܐ ܪܽܘܚܰܢ، ܕܟܶܬܢܰܐ ܐܰ ܟ̥ܰܕ̈ܳܡܶܐ ܕܰܐܠܳܗܳܐ. ܒܺܐܝ ܡܣܰܝܒܪܳܢܽܘܬ̥ܳܐ ܓ̥ܰܠܰܒܶܐ، ܘܒܰܐ ܥܳܩ̈ܳܬ̥ܳܐ، ܘܒܰܐ ܬܰܔܰܐܪ̈ܶܒ، ܘܒܰܐ ܚܰܒ̈ܣܰܬ ܘܒܽܐܘ ܓܶܪܓܳܫܳܐ، ܘܒܰܐ ܩܰܝ̈ܕܶܐ (ܕ̥ܰܪܒܳܐ ܕܰܐ ܩܰܡܔܺܝܪ̈ܶܐ)، ܘܒܰܫܓܽܘ̈ܫܝܶܐ، ܘܒܽܐܘ ܬܰܥܒܳܐ، ܘܒܽܐܘ ܫܰܗܪܳܐ ܘܒܽܐܘ ܨܰܘܡܳܐ. ܒܰܪܨܰܘܡܳܐ. ܒܰܪܶܟ̥ܡܳܪܝ܀

ܬܶܫܡܶܫܬܳܐ ܪܒܺܝܥܳܝܬܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܓ: ܝܐ ـ ܝܕ Romans 13:11-14

ܝܺܕܰܥܽܘ ܐܰܚܽܘ̈ܢܳܢܶܐ! ܕܡܰܛܺܝ ܐܽܘ ܙܰܒܢܳܐ ܘܺܐܝ ܣܰܥܰܐܝܶܐ ܕܡܰܚܺܝܣܺܝܢܰܐ ܡܺܐܝ ܫܰܢܬ̥ܰܝܕ̥ܰܢ. ܡܺܐܝܕ̥ܶܐ ܕܽܐܘܥܕܳܐ ܡܩܰܕܰܡܠܶܐ ܐܽܘ ܟ̥ܰܠܰܨܰܝܕ̥ܰܢ (ܐܰ ܚܰܝ̈ܶܐ) ܙܶܬ ܡܺܐܝ ܢܰܩܩܰܐ ܕܶܡܗܰܝܡܰܢ ܠܰܢ. ܐܽܘ ܠܰܠܝܳܐ ܫܰܦ̊ܶܥ، ܘܽܐܘ ܐܺܝܡܳܡܳܐ ܡܩܰܕܰܡ ܠܶܗ. ܡܚܰܠܩܺܝܢܰܐ ܡܶܢܰܢ ܐܰ ܥܡ̈ܰܠܰܬ ܕܺܐܝ ܥܶܬܡܰܐ، ܘܠܰܘܫܺܝܢܰܐ ܐܽܘ ܣܺܝܠܰܚ ܕܽܐܘ ܢܽܘܗܪܳܐ. ܘܟ̥ܶܕ ܒܽܐܘ ܫܶܟܶܠ ܕܽܐܘ ܐܺܝܡܳܡܳܐ ܡܗܰܠܟ̥ܺܝܢܰܐ. ܠܳܐ ܒܽܐܘ ܙܡܳܪܳܐ، ܘܠܳܐ ܒܽܐܘ ܪܘܳܝܳܐ (ܫܬܳܝܳܐ)، ܘܠܳܐ ܒܽܐܘ ܕܡܳܟ̥ܳܐ ܢܰܔܶܣ، ܘܠܳܐ ܒܽܐܘ ܚܣܳܡܳܐ ܘܒܺܐܝ ܥܰܟܣܺܐܝܶܐ. ܐܶܠܳܐ ܠܘܰܫܽܘ ܠܡܳܪܰܢ ܝܶܫܽܘܥ ܡܫܺܝܚܳܐ، ܘܠܳܐ ܡܔܰܗܕܽܘܬܽܘ ܠܰܫܰܢ ܐܰ ܪ̈ܰܝܰܐܓܰܬ ܕܽܐܘ ܔܰܣܰܕ. ܒܰܪܶܟ̥ܡܳܪܝ܀

ܬܶܫܡܶܫܬܳܐ ܚܡܺܝܫܳܝܬܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܘ: ܝ ـ ܟ Ephesians 6:10-20

ܡܽܐܘܥܕܳܐ ܐܰ ܐܰܚܽܘ̈ܢܳܢܰܝܕ̥ܺܝ، ܡܰܩܘܶܐܘܽܘ ܪܽܘܚܰܝܟ̥ܽܘ ܒܽܐܘ ܚܰܝܠܳܐ ܕܡܳܪܰܢ. ܘܠܰܫܰܢ ܕܩܽܘܕܪܽܘܬܽܘ ܩܰܝܡܽܘܬܽܘ ܡܩܰܒܶܠ ܕܰܐ ܨܰܢܰܐܝ̈ܶܥ ܕܽܐܘ ܫܺܐܕ̥ܳܐ، ܠܘܰܫܽܘ ܐܽܘ ܣܺܝܠܰܚ ܕܰܐܠܳܗܳܐ. ܡܺܐܝܕ̥ܶܐ ܕܽܐܘ ܚܰܪܒܰܬ̥ܟ̥ܽܘ ܠܰܬܝܳܐ ܥܰܡ ܒܰܣܪܳܐ ܘܰܕܡܳܐ. ܐܶܠܳܐ ܥܰܡܰܐ ܩܽܘ̈ܘܰܬ، ܘܥܰܡܰܐ ܫܰܠܺܝ̣̈ܛܳܢܶܐ، ܘܥܰܡܰܐ ܐܰܡܶܪ̈ ܕܽܐܘ ܥܳܠܡܰܐܢܳܐ ܐܽܘ ܥܰܬܽܘܡܳܐ، ܘܥܰܡܰܐ ܪ̈ܽܘܚܶܐ ܒܺܝ̣̈ܫܳܬ̥ܳܐ ܕܟܶܬܢܶܐ ܬܰܚܬܺܝ ܫܡܰܝܳܐܝܳܐ. ܡܰܗ̱ܘܟ̥ܰܐ ܠܘܰܫܽܘ ܐܽܘ ܣܺܝܠܰܚ ܕܰܐܠܳܗܳܐ. ܘܠܰܫܰܢ ܕܩܽܘܕܪܽܘܬܽܘ ܩܰܝܡܽܘܬܽܘ ܡܩܰܒܶܠ ܕܽܐܘ ܒܺܝ̣ܫܳܐ، ܘܬܳܗ̱ܘܽܘܬܽܘ ܩܺܝ̣̈ܡܶܐ ܘܚܰܕ̥ܺܝܪ̈ܶܐ ܠܟܽܠ ܡܶܕܶܐ. ܚܽܘܨܽܘ ܚܰܨܰܝܟ̥ܽܘ ܒܺܐܝ ܚܰܩܩܺܝܶܐ. ܘܺܐܝ ܙܰܕܺܝ̣ܩܽܘܬ̥ܳܐ ܛܪܽܗ̱ܘܝܳܐ ܟ̥ܕܺܝ ܒܰܕܠܶܐ ܕܽܐܘ ܚܰܕܺܝܕ ܐܰܥܠܰܝܟ̥ܽܘ. ܠܘܰܫܽܘ ܒܪ̈ܰܓ̥ܠܳܬ̥ܰܝܟ̥ܽܘ ܐܽܘ ܬܰܚܕ̥ܺܝܪ ܕܽܐܘ ܡܓܰܠܝܶܢ ܕܟܶܬܝܳܐ ܐܽܘ ܫܠܳܡܳܐ. ܘܠܰܫܰܢ ܕܩܽܘܕܪܽܘܬܽܘ ܡܰܛܦܽܘܬܽܘ ܐܰ ܓܶܐܪ̈ܶܐ ܡܰܘܩܕ̥̈ܳܢܶܐ ܕܽܐܘ ܒܺܝ̣ܫܳܐ، ܡܽܘܕܶܢܟ̥ܽܘ ܥܰܡܰܗ̱ܢܺܝ ܐܺܝ ܡܶܪܛܰܠܶܐ ܕܺܐܝ ܗܰܝܡܳܢܽܘܬ̥ܳܐ. ܘܡܰܚܶܬܽܘ ܒܪܺܝܫܰܝܟ̥ܽܘ ܐܺܝ ܟܶܡܡܶܐ ܕܽܐܘ ܚܰܕܺܝܕ ܕܟܶܬܝܳܐ ܐܽܘ ܟ̥ܰܠܰܨ. ܘܡܽܘܕܽܘ ܐܽܘ ܣܰܝܦܳܐ ܕܺܐܝ ܪܽܘܚܳܐ ܕܟܶܬܝܳܐ ܐܺܝ ܡܶܠܬ̥ܳܐ ܕܰܐܠܳܗܳܐ. ܒܰܨ̈ܠܰܘܳܬ̥ܳܐ ܘܒܰܛܰܠܰܒ̈ܰܬ̥ܟ̥ܽܘ ܟܽܠܠܶܐ. ܡܨܰܠܶܘܽܘ ܒܟܽܠ ܙܰܒܢܳܐ ܒܺܐܝ ܪܽܘܚܳܐ. ܒܰܨܠܰܘ̈ܳܬ̥ܳܐ ܫܗܰܐܪܽܘ ܕܰܐܝܶܡ. ܘܒܟܽܠ ܘܰܟ̥ܬ ܡܨܰܠܶܘܽܘ ܘܡܶܬܪܰܔܶܘܽܘ، ܠܰܫܰܢ ܐܰ ܩܰܕܺܝ̣̈ܫܶܐ ܟܽܠܠܶܗ. ܠܰܫܰܢ ܕܩܳܕܰܪ ܐ̱ܢܳܐ ܡܶܔܓ̥ܰܠ ܐ̱ܢܳܐ ܘܟܳܪܰܙ ܐ̱ܢܳܐ ܐܽܘ ܐ̱ܪܳܙܳܐ (ܣܶܪ) ܕܺܐܝ ܒܶܫܪܰܐ ܒܫܶܟܶܠ ܓܰܠܝܳܐ، ܛܠܰܒܽܘ ܡܶܚܠܳܦܺܝ. ܘܚܰܬܬܰܐ ܕܩܳܕܰܪ ܐ̱ܢܳܐ، ܐܳܢܳܐ ܕܟܶܬܢܳܐ ܡܰܣܪܳܐ ܒܰܐ ܙܶܢܶܔܶܪ̈ ܘܽܐܘ ܩܰܐܣܶܕ ܕܺܐܝ ܣܒܰܪܬ̥ܳܐ، ܠܰܫܰܢ ܕܶܡܒܰܫܰܪܢܰܗ̇ ܓܰܠܝܳܐܺܝܬ، ܟ̥ܕܽܘ ܡܶܕܶܐ ܕܟܳܡܰܘܔܶܒ، ܡܶܬܪܰܔܶܘܽܘ ܡܶܚܠܳܦܺܝ ܣܬܶܐ. ܒܰܪܶܟ̥ܡܳܪܝ܀