ܥܽܘܦܳܝܳܐ ܕܓܰܒܪ̈ܶܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܠܓ ـ ܡܛ 1Corinthians 15:34-49

ܡܰܚܺܝܣܽܘ ܠܶܒܰܝܟ̥ܽܘ ܒܙܰܕܺܝܩܽܘܬ̥ܳܐ ܘܠܳܐ ܚܳܛܽܘܬܽܘ. ܟܺܝܬ ܐ̱ܢܳܫ̈ܳܐ ܕܺܝܕܰܥܬ̥ܳܐ ܕܰܐܠܳܗܳܐ ܠܰܝܬ ܐܰܒܒܶܗ. ܠܺܝ ܢܶܟܦܽܘܬ̥ܰܬ̥ܟ̥ܽܘ ܟܳܐܡܰܪ ܐ̱ܢܳܐ. ܟܺܝܬ ܐܢܳܫܳܐ ܡܶܢܟ̥ܽܘ ܕܳܐܡܶܪ: ܐܰܝܕܰܪܒܳܐ ܓܩܰܝܡܺܝ ܐܰ ܡܺܝ̈ܬ̥ܶܐ، ܘܒܰܐܝܢܰܐ ܔܰܣܰܕ ܓܕܳܐܬ̥ܶܢ؟ ܔܶܗܶܠ! ܐܽܘ ܙܰܪܥܳܐ ܕܟܳܙܶܪܥܰܬ ܐܺܝܕ̥ܰܐ ܕܠܳܐ ܡܳܝܶܬ̥، ܠܳܐ ܓܥܳܝܶܫ. ܘܺܐܝ ܢܰܩܩܰܐ ܕܟܳܙܶܪܥܰܬ، ܠܳܐ ܐܽܘ ܔܰܣܰܕܰܐ ܗ̱ܘܳܐ ܕܓܶܕܝܳܪܽܘ ܓܙܶܪܥܰܬ. ܐܶܠܳܐ ܦܪܶܕܳܐ ܙܰܠܛܳܢܺܝܬ̥ܳܐ ܕܚܶܛ̈ܶܐ ܝܰܐ ܕܶܣܥܳܪ̈ܶܐ ܝܰܐ ܕܙܰܕ̈ܳܢܶܐ ܐ̱ܚܪ̈ܶܢܶܐ. ܘܰܐܠܳܗܳܐ ܟ̥ܶܕ ܟܳܐܒܶܥ ܟܳܐܒܶܐ ܠܶܗ ܔܰܣܰܕ. ܘܟܳܐܒܶܐ ܠܟܽܠ ܚܰܕ̱ ܡܰܐ ܙܰܕ̈ܳܢܶـܐ ܐܽܘ ܔܰܣܰܕ ܕܽܐܘ ܟܝܳܢܰܝܕ̥ܶܗ (ܛܰܒܺܝܥܰܝܕ̥ܶܗ). ܠܰܬܝܳܐ ܟܽܠ ܔܰܣܰܕ ܥܰܝܢܺܝ. ܟܺܝܬ ܔܰܣܰܕ ܕܽܐܘ ܐܶܢܣܰܐܢ، ܘܟܺܝܬ ܕܽܐܘ ܛܰܝܪܳܐ، ܘܟܺܝܬ ܕܽܐܘ ܚܰܝܘܰܢ، ܘܟܺܝܬ ܕܰܐܢܢܽܘ̈ܢܶܐ. ܘܟܺܝܬ ܔܰܣܰܐܕ̈ܶܐ ܫܡ̈ܰܝܳܢܶܐ، ܘܟܺܝܬ ܐܰܪ̈ܥܳܢܳܝܶܐ. ܐܶܠܳܐ ܫܶܟܶܠ ܐ̱ܚܪܶܢܳܝܳܐ ܐܽܘ ܫܽܘܒܚܳܐ (ܒܰܗܪܳܐ) ܕܰܫܡܰܝ̈ܳܢܶܐ، ܘܐܚܪܶܢܳܝܳܐ ܐܽܘ ܫܽܘܒܚܳܐ ܕܰܐܢܢܰܪ̈ܥܳܢܳܝܶܐ، ܘܐ̱ܚܪܶܢܳܝܳܐ ܐܽܘ ܫܽܘܒܚܳܐ ܕܺܐܝ ܫܶܡܫܳܐ، ܘܐ̱ܚܪܶܢܳܝܳܐ ܐܽܘ ܫܽܘܒܚܳܐ ܕܽܐܘ ܣܰܗܪܳܐ، ܘܟܺܝܬ ܟܽܘܟܘܳܐ ܕܟܶܬܝܳܐ ܒܰܗܶܪ ܡܶܐ ܟܽܘܟܘܳܐ ܒܽܐܘ ܫܽܘܒܚܳܐ. ܗܰܘܟ̥ܰܐ ܣܬܶܐ ܐܺܝ ܩܝܰܡܬܳܐ ܕܰܐܡܡܺܝ̣ܬ̥ܶܐ. ܓܡܶܙܪܳܥܺܝ ܒܶܚܪܳܘܳܐ ܘܓܰܩܝܡܺܝ ܕܠܳܐ ܚܪܳܘܳܐ. ܓܡܶܙܪܳܥܺܝ ܒܥܰܪܺܝܶܐ ܘܓܩܰܝܡܺܝ ܒܫܽܘܒܚܳܐ. ܓܡܶܙܪܳܥܺܝ ܒܕ̥ܶܥܦܺܝܶܐ ܓܩܰܝܡܺܝ ܒܚܰܝܠܳܐ ܓܡܶܙܪܶܥ ܔܰܣܰܕ ܕܺܐܝ ܢܰܦܫܳܐ (ܔܶܙܕܰܢܺܝ)، ܓܩܳܝܶܡ ܔܰܣܰܕ ܪܽܘܚܰܐܢܺܝ. ܟܺܝܬ ܔܰܣܰܕ ܕܺܐܝ ܢܰܦܫܳܐ (ܔܶܙܕܰܢܺܝ) ܘܟܺܝܬ ܔܰܣܰܕ ܕܺܐܝ ܪܽܘܚܳܐ. ܘܗܰܘܟ̥ܰܐ ܟܬ̥ܺܝܘ «ܐܳܕܳܡ ܐܽܘ ܐܶܢܣܰܐܢ ܩܰܡܳܝܳܐ، ܗܰܘܺܝ ܒܢܰܦܫܳܐ ܘܒܚ̈ܰܝܶܐ». ܐܶܠܳܐ ܐܳܕܳܡ ܐܽܘ ܐ̱ܚܰܪܳܝܳܐ، ܗܰܘܺܝ ܢܰܦܫܳܐ ܕܟܳܐܒܳܐ ܚܰܝ̈ܶܐ. ܐܶܠܳܐ ܐܽܘ ܩܰܡܳܝܳܐ، ܠܰܬܗ̱ܘܰܐ ܪܽܘܚܰܐܢܺܝ ܐܶܠܳܐ ܓܶܣܕܰܐܢܺܝ. ܘܒܶܬ̥ܬ̥ܪ ܐܰܬܺܝ ܐܽܘ ܪܽܘܚܰܐܢܺܝ. ܐܽܘ ܐܶܢܣܰܐܢ ܩܰܡܳܝܳܐ، ܥܰܦܪܳܢܳܐ ܕܡܺܐܝ ܐܰܪܥܳܐ ܗ̱ܘܰܐ. ܐܶܠܳܐ ܐܽܘ ܐܶܢܣܰܐܢ ܕܰܬܪܶܐ ܕܟܶܬܝܳܐ ܡܳܪܝܳܐ، ܡܺܐܝ ܫܡܰܝܳܐ. ܟ̥ܶܕ ܐܰܝܕܰܪܒܳܐ ܕܟܶܬܝܳܐ ܗܰܘܳܐ ܕܡܽܐܘ ܥܰܦܪܳܐ، ܗܰܘܟ̥ܰܐ ܣܬܶܐ، ܐܰ ܥܰܦܪ̈ܳܢܶܐܢܶـܐ. ܘܟ̥ܶـܕ ܐܰܝܕܰܪܒܳܐ ܕܟܶܬܝܳܐ ܗܰܘܳܐ ܕܡܺܐܝ ܫܡܰܝܳܐ، ܗܰܘܟ̥ܰܐ ܣܬܶܐ ܐܰ ܫܡܰܝ̈ܳܢܶܐܢܶـܐ. ܟ̥ܶܕ ܐܰܝܕܰܪܒܳܐ ܕܶܠܘܶܫܠܰܢ ܐܽܘ ܫܶܟܶܠ ܕܰܗ̱ܘܳܐ ܕܡܽܘ ܥܰܦܪܳܐ، ܗܰܘܟ̥ܰܐ ܣܬܶܐ ܓܠܰܘܫܺܝܢܰܐ ܐܽܘ ܫܶܟܶܠ ܬܰܗܘܳܐ ܕܡܺܐܝ ܫܡܰܝܳܐ ܒܰܪܶܟ̥ܡܳܪܝ܀

ܥܽܘܦܳܝܳܐ ܕܢܶܫ̈ܶܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܢܢ ـ ܢܙ 1Corinthians 15:50-57

ܗܰܬ̥ܐ ܟܳܐܡܰܪ ܐ̱ܢܳܐ ܐܰ ܐܰܚܽܘ̈ܢܳܢܰܝܕ̥ܺܝ: ܒܰܣܪܳܐ ܘܰܐܕܡܳܐ، ܡܰܠܟܽܘܬ̥ܳܐ ܕܰܐܠܳܗܳܐ ܠܳܐ ܓܩܽܘܕܪܺܝ ܕܝܶܪܬ̥ܺܝ. ܘܠܳܐ ܐܽܘ ܚܪܳܘܳܐ ܓܩܳܕܶܪ ܕܝܳܪܶܬ̥ ܠܳܐ ܚܪܳܘܳܐ. ܗܰܬ̥ܶܐ ܕܟܳܐܡܰܪ ܐ̱ܢܳܐ ܐܰܠܟ̥ܽܘ ܐ̱ܪܳܙܳܝܳܐ (ܣܶܪ). ܠܳܐ ܟܽܠܰܢ ܓܡܰܝܬ̥ܺܝܢܰܐ ܐܶܠܳܐ ܟܽܠܰܢ ܓܡܺܝܚܰܠܦܺܝܢܰܐ. ܐܺܝ ܢܰܩܩܰܐ ܕܩܳܪܝܳܐ ܐܺܝ ܩܰܪܢܳܐ ܐ̱ܚܰܪܰܝܬܳܐ، ܟ̥ܕܺܝ ܪܶܦܪܰܦܬܳܐ ܕܺܐܝ ܥܰܝܢܳܐ، ܒܢܰܩܩܰܐ ܓܩܰܝܡܺܝܢܰܐ. ܘܰܐܡܡܺܝ̈ܬ̥ܶܐ ܓܩܰܝܡܺܝ ܕܠܳܐ ܚܪܳܘܳܐ، ܘܰܐܚܢܰܐ ܓܡܺܝܚܰܠܦܺܝܢܰܐ. ܘܗܰܢܳܐ ܕܟܳܚܳܪܽܘ ܓܠܳܘܶܫ ܠܳܐ ܚܪܳܘܳܐ. ܘܗܰܢܳܐ ܕܟܳܡܳܝܶܬ̥ ܓܠܳܘܶܫ ܠܳܐ ܡܰܘܬܳܐ. ܐܺܝ ܢܰܩܩܰܐ ܕܠܳܘܶܫ ܗܰܢܳܐ ܕܟܳܚܳܪܽܘ ܠܳܐ ܚܪܳܘܳܐ، ܘܗܰܢܳܐ ܕܟܳܡܳܝܶܬ̥ ܬܳܗ̱ܘܶܐ ܠܳܐ ܡܳܝܽܘܬ̥ܳܐ، ܒܶܬ̥ܬ̥ܶܪ ܓܟܳܡܠܳܐ ܐܺܝ ܡܶܠܬ̥ܰܝܳܐ ܕܶܟܬ̥ܺܝܘܳܐ: «ܕܶܒܠܺܝܥ ܐܽܘ ܡܰܘܬܳܐ ܒܺܐܝ ܙܳܟ̥ܽܘܬ̥ܳܐ (ܓ̥ܠܰܒܬܳܐ). ܐܰܝܟܳܝܳܐ ܐܽܘ ܟܽܘܒܰܝܕ̥ܽܘܟ ܝܰܐ ܡܰܘܬܳܐ؟ ܐܰܝܟܳܝܳܐ ܐܺܝ ܟ̥ܽܘܪܬܺܝܰܝܕܰܟ̥ܝ̱ ܝܰܐ ܫܝܽܘܠ؟» ܐܽܘ ܟܽܘܒܳܐ ܕܺܐܝ ܚܛܺܝܬ̥ܳܐ ܐܽܘ ܡܰܘܬܳܝܳܐ، ܘܽܐܘ ܚܰܝܠܳܐ ܕܺܐܝ ܚܛܺܝܬ̥ܳܐ ܐܽܘ ܩܳܐܢܽܘܢܳܝܳܐ. ܛܰܝܒܽܘܬ̥ܳܐ ܠܰܐܠܳܗܳܐ ܕܗܽܘܠܶܗ ܠܰܢ ܐܺܝ ܐܺܝ ܟ̥ܽܘܪܬܺܝܰܐܬ̥ܶܐ ܒܺܐܝ ܘܰܨܺܝܛܰܐ ܕܡܳܪܰܢ ܝܶܫܽܘܥ ܡܫܺܝܚܳܐ ܒܰܪܶܟ̥ܡܳܪܝ܀

ܥܽܘܦܳܝܳܐ ܕܰܥܠܰܝ̈ܡܶܐ ܘܰܥܠܰܝ̈ܡܳܬܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܒ
ܕ: ܙ ـ ܝܗ 2Corinthians 4:7-15

ܐܺܝ ܟ̥ܶܙܢܰܐܬ̥ܶܐ ܕܟܶܬܠܰܢ، ܠܰܫܰܢ ܕܡܺܝܕ̥ܳܥܳܐ ܕܟܶܬܝܳܐ ܡܽܐܘ ܚܰܝܠܳܐ ܕܺܐܝ ܪܰܒܽܘܬ̥ܳܐ ܕܰܐܠܳܗܳܐ ܘܠܳܐ ܡܶܢܰܢ، ܡܰܚܬܳܐ ܒܽܐܘ ܣܶܦܳܩܳܐ ܕܽܐܘ ܥܰܦܪܳܐ. ܒܟܽܠ ܡܶܕܶܐ ܓܡܺܝܬܰܥܺܝܩܺܝܢܰܐ، ܐܶܠܳܐ ܠܶܓ ܡܶܚܢܳܩܺܝܢܰܐ. ܘܟܰܡܺܝܥܰܕ̥ܒܺܝܢܰܐ، ܐܶܠܳܐ ܠܶܓ ܕ̥ܳܥܦܺܝܢܰܐ. ܓܡܶܪܕ̥ܳܦܺܝܢܰܐ، ܐܶܠܳܐ ܠܰܬܢܰܐ ܠܪܽܘܚܰܝܢܰܐ. ܟܳܡܶܡܚܺܝܢܰܐ ܒܺܐܝ ܐܰܪܥܳܐ، ܐܶܠܳܐ ܠܶܓ ܗܽܘܠܟܺܝܢܰܐ. ܘܠܰܫܰܢ ܕܡܶܓܠܶܢ ܐܰܚ̈ܚܰܝܶܐ ܕܡܳܪܰܢ ܝܶܫܽܘܥ ܡܫܺܝ̣ܚܳܐ ܒܰܦܦܰܓ̥ܪ̈ܰܝܕ̥ܰܢ، ܐܽܘ ܡܰܘܬܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܒܟܽܠ ܙܰܒܢܳܐ ܒܰܦܦܰܓ̥ܪ̈ܝܕ̥ܰܢ ܓܡܰܚܘܺܝܢܰܐ. ܘܰܐܚܢܰܐ ܕܟܶܬܢܰܐ ܒܰܚ̈ܚܰܝܶܐ، ܘܕܟܶܬܢܰܐ ܡܳܝܽܘ̈ܬ̥ܶܐ، ܚܰܬܬܰܐ ܕܐܽܘ ܡܰܘܬܳܐ ܕܝܶܫܽܘܥ ܕܡܶܓܠܶܐ ܒܰܔܰܣܕ̈ܰܝܕܰܢ، ܠܰܫܰܢ ܝܶܫܽܘܥ ܡܫܺܝܚܳܐ، ܠܽܐܘ ܡܰܘܬܳܐ ܟܳܡܺܝܬܰܣܠܡܺܝܢܰܐ. ܘܽܐܘܥܕܳܐ ܐܽܘ ܡܰܘܬܳܐ ܐܶܒܰܢ، ܘܰܐ ܚܰܝ̈ܶܐ ܐܰܒܟ̥ܽܘ ܬ̥ܰܐܒܶܬܢܶـܐ. ܐܰܚܢܰܐ، ܚܕܳܐ ܪܽܘܚܳܐ ܕܺܐܝ ܗܰܝܡܳܢܽܘܬ̥ܳܐ ܟܶܬܰܠܢ، ܘܶܐܒܰܗ̇ ܟܳܡܗܰܝܡܢܺܝܢܰܐ. ܟ̥ܶܕ ܟܬ̥ܺܝܘ: «ܡܗܰܝܡܰܢ ܠܺܝ، ܘܡܰܘܟ̥ܰܐ ܔܓ̥ܶܠ ܐ̱ܢܳܐ» ܟܳܡܗܰܝܡܢܺܝܢܰܐ. ܘܡܰܘܟ̥ܰܐ ܓܡܶܔܓ̥ܳܠܺܝܢܰܐ، ܘܟܳܕ̥ܥܺܝܢܰܐ ܗܰܘܳܐ ܕܡܰܩܶܡ ܠܶܗ ܠܡܳܪܰܢ ܝܶܫܽܘܥ ܡܫܺܝܚܳܐ، ܐܶܠܰܢ ܣܬܶܐ ܓܡܰܩܶܡ، ܘܓܶܡܩܰܕܰܡ ܠܰܢ ܐܰܥܡܰܝܟ̥ܽܘ ܠܓܰܢ̱ܒܶܗ. ܟܽܠ ܡܶܕܶܐ ܠܰܫܰܢܰܝܟ̥ܽܘܝܳܐ. ܐܺܝ ܢܰܩܩܰܐ ܕܙܰܝܕܳܐ ܐܺܝ ܛܰܝܒܽܘܬ̥ܳܐ ܒܓ̥ܰܠܰܒܶܐ، ܓܙܳܝܶـܕ ܣܬܶܐ ܐܽܘ ܫܽܘܒܚܳܐ ܕܠܰܐܠܳܗܳܐ. ܒܰܪܶܟ̥ܡܳܪܝ܀

ܥܽܘܦܳܝܳܐ ܕܫܰܒܪ̈ܶܐ ܘܫܰܒܪ̈ܳܬܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܟ ـ ܟܚ 1Corinthians 15:20-28

ܐܽܘܥܕܳܐ ܩܰܐܝܶܡ ܡܫܺܝܚܳܐ ܡܶܐ ܒܰܝܢܰܐ ܡܺܝ̈ܬ̥ܶܐ، ܘܗܰܘܺܝ ܐܽܘ ܩܰܡܳܝܳܐ ܕܰܐ ܕܰܡܺܝ̈ܟ̥ܶܐ (ܡܺܝ̈ܬ̥ܶܐ) ܟ̥ܶܕ ܐܰܝܕܰܪܒܳܐ ܕܒܺܐܝ ܘܰܐܨܺܝܛܰܐ ܕܐܶܢܣܰܢ ܗܰܘܺܝ ܐܽܘ ܡܰܘܬܳܐ، ܗܰܘܟ̥ܰܐ ܣܬܶܐ ܒܺܐܝ ܘܰܐܨܺܝܛܰܐ ܕܐܶܢܣܰܢ، ܓܬܽܘܝܳܐ ܐܺܝ ܩܝܰܡܬܳܐ ܕܰܐܡܡܺܝ̈ܬ̥ܶܐ. ܟ̥ܶܕ ܐܰܝܕܰܪܒܳܐ ܕܒܳܐܕ̥ܳܡ ܟܽܠܠܶܗ ܐܰ ܐ̱ܢܳܫ̈ܶܐ ܓܡܰܝܬܺܝ، ܗܰܘܟ̥ܰܐ ܣܬܶܐ ܒܺܐܝ ܘܰܨܺܝܛܰܐ ܕܶܡܫܺܝܚܳܐ ܟܽܠܠܶܗ ܐܰܢܢܳܫ̈ܶܐ ܓܡܰܝܕܺܝ ܚܰܝ̈ܶܐ ܚܰܕ̱̈ܬ̥ܶܐ. ܐܶܠܳܐ ܟܽܠ ܚܰܕ̱ ܒܽܐܘ ܕܰܘܪܰܝܕ̥ܶܗ. ܡܫܺܝܚܳܐ ܗܰܘܺܝ ܒܰܕܰܐܝܶܐ. ܒܺܐܝ ܩܰܡܰܝܬܳܐ ܡܫܺܝܚܳܐ، ܘܒܶܬ̥ܬ̥ܶܪ ܗܰܢܺܝ ܕܟܶܬܢܶܐ ܕܶܡܫܺܝܚܳܐ ܒܺܐܝ ܡܶܐܬ̥ܰܝܬܰܝܕ̥ܶܗ. ܘܺܐܝ ܢܰܩܩܰܐ ܕܡܰܣܠܶܡ ܐܺܝ ܡܰܠܟܽܘܬ̥ܳܐ ܠܰܐܠܳܗܳܐ ܐܽܘ ܐܰܒܳܐ، ܒܶܬ̥ܬ̥ܶܪ ܓܕܶܐܬ̥ܝܳܐ ܐܺܝ ܐ̱ܚܰܪܰܝܬܳܐ. ܐܺܝ ܢܰܩܩܰܐ ܕܒܳܛܶܠ ܟܽܠ ܪܺܝܫܳܐ، ܘܟܽܠ ܫܽܘܠܛܳܢܳܐ، ܘܟܽܠ ܚܰܝܠܳܐ، ܐܺܝ ܢܰܩܩܰܝܳܐ ܓܡܰܡܠܶܟ ܗܽܘܠ ܕܡܰܚܶܬ ܐܰ ܕܶܔ̤ܡܶܢܰܝ̈ܕ̥ܶܗ ܟܽܠܠܶܗ̱ ܬܰܚܬܶܐ ܪ̈ܰܓ̥ܠܳܬ̥ܶܗ. ܘܽܐܘ ܕܶܔ̣ܡܶܢ ܐ̱ܚܰܪܳܝܳܐ ܕܟܶܬܝܳܐ ܐܽܘ ܡܰܘܬܳܐ، ܓܒܳܛܶܠ. ܡܺܝܕ̥ܶܐ ܕܟܽܠ ܡܶܕܶܐ ܓܡܰܚܶܬ ܬܰܚܬܶܐ ܪ̈ܰܓ̥ܠܳܬ̥ܶܗ. ܘܺܐܝ ܢܰܩܩܰܐ ܕܐ̱ܡܶܪ ܠܶܗ ܟܽܠ ܡܶܕܶܐ ܡܰܛܶܥ ܠܶܗ ܐܶܠܶܗ، ܝܺܕ̥ܶܥܬܳܝܳܐ ܕܠܳܐ ܥܰܠܰܗ̱ܘܳܐ ܕܡܰܛܶܥ ܠܶܗ ܟܽܠ ܐ̱ܡܺܝܪ. ܐܶܠܳܐ ܐܺܝ ܢܰܩܩܰܐ ܕܡܰܛܶܥ ܐܶܠܶܗ ܟܽܠ، ܒܶܬ̥ܬ̥ܶܪ ܗܺܝܝܶܐ ܐܽܘ ܒܪܳܐ ܓܡܰܛܶܥ ܠܰܗ̱ܘܳܐ، ܕܟܽܠ ܡܰܛܶܥ ܠܶܗ ܐܶܠܶܗ. ܠܰܫܰܢ ܕܗܳܘܶܐ ܐܰܠܳܗܳܐ ܕܟܽܠ ܘܒܟܽܠ. ܒܰܪܶܟ̥ܡܳܪܝ܀

ܥܽܘܦܳܝܳܐ ܕܰܒܬܽܘ̈ܠܶܐ ܘܰܒܬܽܘ̈ܠܳܬܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܙ: ܟܗ ـ ܠܗ 1Corinthians 7:25-35

ܥܰܠܺܝ ܒܬ̥ܽܘܠܽܘܬ̥ܳܐ، ܐܰܡܪܳܐ ܡܰܐܠܳܗܳܐ ܠܳܐ ܡܶܕܠܺܝ. ܐܶܠܳܐ ܫܺܝܪܰܐ ܟܳܐܒܶܐ ܐ̱ܢܳܐ. ܟ̥ܶܐ ܓܰܒܪܳܐ ܕܡܺܝܬܰܪܚܶܡ ܐܰܥܠܶܗ ܡܰܐܠܳܗܳܐ ܠܰܫܰܢ ܕܗܳܘܶܐ ܘܰܟܺܝܠܳܐ. ܒܺܐܝ ܩܰܢܰܥܰܝܕ̥ܺܝ ܠܰܫܰܢ ܐܺܝ ܥܺܝܩܽܘܬ̥ܳܐ ܕܽܐܘ ܙܰܒܢܳܐ ܗܰܐܬ̥ܶܐ ܫܰܦܺܝܪܬܳܝܳܐ. ܡܰܐܣܪܳܐ ܗܰܬ ܒܺܐܝ ܐܰܢ̱ܬ̥ܬܳܐ، ܠܶܐܒܥܰܬ ܫܪܳܝܳܐ. ܫܰܪܝܳܐ ܗܰܬ ܡܺܐܝ ܐܰܢ̱ܬ̥ܬܳܐ، ܠܶܐܒܥܰܬ ܐܰܢ̱ܬ̥ܬܳܐ. ܘܺܐܝܕ̥ܰܐ ܡܶܕܠܳܟ̥ ܐܰܢ̱ܬ̥ܬܳܐ ܠܳܐ ܚܰܛܰܬ. ܘܺܐܝܕ̥ܰܐ ܐܺܝ ܒܬ̥ܽܘܠܬܳܐ ܕܡܰܝܕܳܐ ܓܰܘܪܳܐ، ܠܳܐ ܓܚܳܛܝܳܐ. ܐܶܠܳܐ ܗܰܢܺܝ ܕܗܰܘܟ̥ܰܐ ܓܣܰܝܡܺܝ، ܟܳܡܺܝܬܰܥܺܝܩܺܝ ܒܺܐܝ ܐܰܪܥܰܐܬ̥ܶܐ (ܒܽܘ ܔܰܣܰܕ). ܘܳܐܢܳܐ ܓܡܰܪܚܰܡ ܐ̱ܢܳܐ ܐܰܥܠܰܝܟ̥ܽܘ. ܗܰܐܬ̥ܶܐ ܟܳܐܡܰܪ ܐ̱ܢܳܐ ܐܰܢܢܰܚܽܘ̈ܢܳܢܰܝܕ̥ܺܝ. ܐܽܘ ܙܰܒܢܳܐ ܥܰܐܝܶܩ. ܐܰܝܢܰܐ ܕܟܶܬܬܶܐ ܢܶܫ̈ܶܐ، ܛܪܳܗ̱ܘܶܢ ܟ̥ܶܕ ܠܰܬܬܶܐ. ܘܰܐܝܢܰܐ ܕܟܳܒܳܟ̥ܶܢ، ܟ̥ܶܕ ܠܳܐ ܓܒܳܟ̥ܶܢ. ܘܰܐܝܢܰܐ ܕܟܳܡܶܦܨܳܚܺܝ، ܟ̥ܶܕ ܠܳܐ ܓܡܶܦܨܳܚܺܝ. ܘܰܐܝܢܰܐ ܕܟܳܙܰܘܢܺܝ، ܟ̥ܶܕ ܠܳܐ ܓܡܰܟܶܣܒܺܝ. ܘܰܐܝܢܰܐ ܕܟܳܡܶܣܬܰܥܡܠܺܝ ܒܽܐܘ ܥܳܠܡܰܐܢܳܐ، ܠܳܐ ܙܶܬ ܡܽܐܘ ܡܶܕܶܐ ܕܟܳܡܰܘܔܶܒ. ܐܽܘ ܫܶܟܶܠ ܕܽܐܘ ܥܳܠܡܰܐܢܳܐ ܓܥܳܒܶܪ. ܡܽܐܘ ܣܰܒܰܒܰܐܢܳܐ ܟܳܒܰܥ ܐ̱ܢܳܐ ܕܠܳܐ ܡܔܰܗܕܽܘܬܽܘ. ܐܰܝܢܰܐ ܕܠܰܬܠܶܐ ܐܰܢ̱ܬ̥ܬܳܐ، ܓܡܶܦܬܰܟܶܪ ܒܽܐܘ ܡܳܪܰܝܕ̥ܶܗ، ܒܶܐ ܐܰܝܕܰܪܒܳܐ ܓܡܰܪܕ̥ܶܐ ܠܽܐܘ ܡܳܪܰܝܕ̥ܶܗ. ܘܰܐܝܢܰܐ ܕܟܶܬܠܶܗ ܐܰܢ̱ܬ̥ܬܳܐ، ܓܡܶܦܬܰܟܶܪ ܒܽܐܘ ܥܳܠܡܰܐܢܳܐ، ܘܒܶܐ ܐܰܝܕܰܪܒܳܐ ܓܡܰܪܕ̥ܶܐ ܠܺܐܝ ܐܰܢ̱ܬ̥ܬܰܝܕ̥ܶܗ. ܘܡܰܗ̱ܘܟ̥ܰܐ ܐܺܝ ܥܰܠܰܩܰܝܕܶܗ ܓܡܺܝܦܰܠܓ̥ܳܐ ܠܶܬܪܶܐ. ܟܺܝܬܳܐ ܦܽܘܪܫܳܢܳܐ ܒܰܝܢܶܐ ܠܺܐܝ ܓܰܘܶܪܬܳܐ ܘܠܺܐܝ ܒܬ̥ܽܘܠܬܳܐ. ܗܰܝܳܐ ܕܠܳܐ ܡܶܕܠܰܗ̱̇ ܓܰܘܪܳܐ، ܓܡܶܦܬܰܟܪܳܐ ܒܽܐܘ ܡܳܪܰܝܕ̥ܰܗ̱̇، ܠܰܫܰܢ ܕܗܽܘܝܳܐ ܩܰܕܺܝܫܬܳܐ ܒܽܐܘ ܔܰܣܰܕܰܝܕ̥ܰܗ̇ ܘܒܺܐܝ ܪܽܘܚܰܝܕ̥ܰܗ̇. ܘܗܰܝܳܐ ܕܟܶܬܠܰܗ̱̇ ܓܰܘܪܳܐ، ܓܡܶܦܬܰܟܪܳܐ ܒܽܐܘ ܥܳܠܡܳܐ، ܘܒܶܐ ܐܰܝܕܰܪܒܳܐ ܓܫܳܦܪܳܐ ܠܽܐܘ ܓܰܘܪܰܝܕ̥ܰܗ̱̇. ܒܰܪܶܟ̥ܡܳܪܝ܀