ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܒ: ܝܙ ـ ܟܐ܇ ܓ: ܐ ـ ܝܘ Galatians 2:17-21, 3:1-16

ܐܶܢ ܕܶܐܒܥܺܝܢܰܐ ܕܡܺܝܙܰܕܩܺܝܢܰܐ (ܕܡܺܝܒܰܪܺܝܢܰܐ) ܒܶܡܫܺܝ̣ܚܳܐ، ܘܡܰܚܘܺܝ̣ܢܰܐ ܪܽܘܚܰܢ ܚܰܛܳܝ̈ܶܐ، ܩܰܝ ܡܫܺܝ̣ܚܳܐ ܡܫܰܡܫܳܢܳܐ ܕܺܐܝ ܚܛܺܝܬ̣ܳܐܝܳܐ؟ ܚܰܐܫܰܐ. ܡܺܝܕ̥ܶܐ ܕܶܐܢ ܠܰܐܝܢܰܐ ܕܡܰܚܪܰܘܠܺܝ ܢܰܩܩܰܐ ܐ̱ܚܪܶܬܳܐ ܐܰܠܠܶܗ ܕܡܰܥܡܰܪܢܳܐ، ܒܰܗܕܶܐ ܟܳܡܰܚܘܶܐ ܐ̱ܢܳܐ ܥܰܠ ܪܽܘܚܺܝ، ܕܶܬܘܶܪ ܠܺܝ̣ ܐܽܘ ܦܽܘܩܕܳܢܳܐ. ܡܺܝܕ̥ܶܐ ܕܡܰܝܶܬ̣ ܐ̱ܢܳܐ ܒܽܐܘ ܢܳܡܽܘܣܳܐ، ܠܽܐܘ ܢܳܡܽܘܣܳܐ܆ ܕܚܳܝܶܐܢܳܐ ܠܰܐܠܳܗܳܐ. ܘܥܰܡ ܡܫܺܝ̣ܚܳܐ ܨܠܽܘ ܐ̱ܢܳܐ. ܡܰܘܟ̥ܰܐ، ܠܳܐ ܐܳܢܳܐ ܓܚܳܝܶܐ ܐ̱ܢܳܐ، ܐܶܠܳܐ ܡܫܺܝ̣ܚܳܐ ܓܚܳܝܶܐ (ܓܥܳܝܶܫ) ܐܶܒܺܝ. ܐܽܘ ܡܶܕܶܐ ܕܟܳܚܳܝܶܐ ܐ̱ܢܳܐ ܐܽܘܥܕܳܐ ܒܽܐܘ ܔܰܣܰܕ، ܟܚܳܝܶܐ ܐ̱ܢܳܐ ܒܺܐܝ ܗܰܝܡܳܢܽܘܬ̣ܳܐ ܕܽܐܘ ܒܪܳܐ ܕܰܐܠܳܗܳܐ. ܗܰܘܳܐ ܕܶܪܚܶܡܠܶܠܺܝ ܘܗܽܘܠܶܗ ܪܽܘܚܶܗ ܡܶܚܠܳܦܺܝ. ܠܳܐ ܓܕ̥ܳܠܰܡ ܐ̱ܢܳܐ ܐܺܝ ܛܰܝܒܽܘܬ̣ܳܐ ܕܰܐܠܳܗܳܐ. ܐܺܝܕ̥ܰܐ ܕܒܽܐܘ ܢܳܡܽܘܣܳܐ ܕܗܽܘܝܳܐ ܗ̱ܘܰܐ ܐܺܝ ܙܰܕܺܝܩܽܘܬ̣ܳܐ، ܐܺܝ ܢܰܩܩܰܝܳܐ ܡܫܺܝ̣ܚܳܐ ܕܠܳܐ ܣܰܒܰܒ ܡܰܐܝܶܬ̣. ܝܰܐ ܓܰܠܰܛܳܝ̈ܶܐ ܕܠܳܐ ܗܰܘܢܳܐ. ܡܰܢ ܡܚܰܪܰܫܠܰܠܟ̣ܽܘ؟ ܟܰܐܠܶܐ ܡܨܰܘܪܳܐ ܩܶܡ ܥܰܝܢܰܝ̈ܟ̣ܽܘ ܝܶܫܽܘܥ ܡܫܺܝ̣ܚܳܐ ܨܠܺܝܘܳܐ. ܟܳܐܒܰܥ ܐ̱ܢܳܐ ܗܰܬ̥ܶܐ ܒܶܠܚܽܘܕ̥ܶܐ ܕܳܐܕ̥ܰܥ ܐ̱ܢܳܐ ܡܶܢܟ̣ܽܘ: ܗܰܠ ܡܰܥ̈ܡܰܠܰܬ ܕܽܐܘ ܢܳܡܽܘܣܳܐ ܡܶܕܟ̣ܽܘ ܐܺܝ ܪܽܘܚܳܐ؟ ܝܰܐ ܡܽܐܘ ܫܡܳܥܳܐ ܕܺܐܝ ܗܰܝܡܳܢܽܘܬ̣ܳܐ؟ ܩܰܝ ܗܰܘܟ̥ܰܐ ܣܰܟ̣̈ܠܶܐ ܗܰܐܬܽܘ؟ ܒܶܬ̣ܬ̣ܶܪ ܕܶܡܫܰܪܰܠܟ̣ܽܘ (ܒܕܰܠܟ̥ܽܘ) ܒܺܐܝ ܪܽܘܚܳܐ܆ ܘܽܐܘܥܕܳܐ ܒܽܐܘ ܔܰܣܰܕ ܟܶܒܥܽܘܬܽܘ ܕܶܡܟܰܡܠܺܝܬܽܘ؟ ܩܰܝ ܗܰܢܺܝ ܟܽܠܠܶܗ ܒܰܠܰܫ ܡܣܰܝܒܰܪܟ̣ܽܘ؟ ܐܺܝܕ̥ܰܐ ܕܗܳܘܶܐ ܒܰܠܰܫ܆ ܗܰܘܳܐ ܕܗܽܘܠܶܗ ܠܟ̣ܽܘ ܐܺܝ ܪܽܘܚܳܐ، ܘܟܣܳܝܶܡ ܚܰܝ̈ܠܶܐ ܐܰܒܟ̣ܽܘ܆ ܡܰܥ̈ܡܰܠܰܬ ܕܽܐܘ ܢܳܡܽܘܣܳܐܢܶܐ، ܝܰܐ ܡܽܐܘ ܫܡܳܥܳܐ ܕܺܐܝ ܗܰܝܡܳܢܽܘܬ̣ܳܐܢܶܐ؟ ܐܰܒܪܳܗܳܡ ܡܗܰܝܡܰܢ ܠܶܗ̱ ܒܰܐܠܳܗܳܐ، ܚܫܺܝܘܳܐ ܐܶܠܶܗ ܙܰܕܺܝܩܽܘܬ̣ܳܐ. ܗܰܬ̥ܶܐ ܓܡܰܚܽܘܝܳܐ، ܕܗܰܢܺܝ ܕܟܶܬܢܶܐ ܡܺܐܝ ܗܰܝܡܳܢܽܘܬ̣ܳܐ، ܗܶܢܢܶܢܶܐ ܐܰܢܢܰܒ̈ܢܶܐ ܕܰܐܒܪܳܗܳܡ. ܡܺܝܕ̥ܶܐ ܕܽܘܟܬ̣ܳܘܳܐ ܡܶܐܩܶܡ ܚܙܶܐܠܶܗ ܕܰܐܠܳܗܳܐ ܒܺܐܝ ܗܰܝܡܳܢܽܘܬ̣ܳܐ ܓܶܡܙܰܕܶܩ ܐܰ ܥܶܡ̈ܶܐ. ܡܶܐܩܶܡ ܡܒܰܫܰܪܠܶܗ ܐܰܒܪܳܗܳܡ: «ܕܶܐܒܳܟ̥ ܓܡܺܝܒܰܪܟ̥ܺܝ ܟܽܠܠܶܗ ܐܰ ܥܰܡ̈ܶܐ». ܡܰܘܟ̥ܰܐ ܐܰ ܡܗܰܝ̈ܡܢܶܐ ܓܡܺܝܒܰܪܟ̣ܺܝ ܥܰܡ ܐܰܒܪܳܗܳܡ ܐܽܘ ܡܗܰܝܡܢܳܐ. ܗܰܪܟܶܐ ܓܡܰܚܘܶܐ، ܕܟܽܠܠܶܗ ܗܰܢܺܝ ܕܟܳܬܶܒܥܺܝ̣ ܠܰܡܰܥ̈ܡܰܠܰܬ ܕܽܐܘ ܢܳܡܽܘܣܳܐ، ܬܰܚܬܺܝ ܠܰܥܢܶܐܢܶܐ. ܡܺܝܕ̥ܶܐ ܕܶܟܬ̣ܺܝܘ: «ܠܺܝܛܳܐܝܳܐ ܟܽܠ ܡܰܢ ܕܠܳܐ ܣܳܝܶܡ ܟܽܠ ܡܶܕܶܐ ܕܶܟܬ̣ܺܝܘ ܒܽܐܘ ܢܳܡܽܘܣܰܐܢܳܐ». ܐܶܠܳܐ ܚܰܕ̱ ܠܳܐ ܓܡܺܝܙܰܕܶܩ ܒܽܐܘ ܢܳܡܽܘܣܳܐ ܣܰܐܠܳܗܳܐ. ܗܰܬ̥ܶܐ ܓܠܺܝܬ̣ܳܝܳܐ ܘܟܳܐܡܶܪ: «ܐܽܘ ܙܰܕܺܝܩܳܐ ܒܺܐܝ ܗܰܝܡܳܢܽܘܬ̣ܳܐ ܓܚܳܝܶܐ». ܐܽܘ ܢܳܡܽܘܣܳܐ ܠܰܬܝܳܐ ܡܺܐܝ ܗܰܝܡܳܢܽܘܬ̣ܳܐ. ܐܶܠܐܳ ܗܰܘܳܐ ܕܣܳܝܶܡ ܐܽܘ ܡܶܕܶܐ ܕܶܟܬ̣ܺܝܘ ܐܶܒܶܗ ܓܚܳܝܶܐ ܐܶܒܶܗ. ܡܫܺܝ̣ܚܳܐ ܙܘܶܢܠܶܗ ܠܰܢ ܡܺܐܝ ܠܰܘܛܬ̣ܳܐ (ܠܰܥܢܶܐ) ܕܽܐܘ ܢܳܡܽܘܣܳܐ، ܘܗܰܘܺܝ ܡܶܚܠܳܦܰܢ ܠܰܘܛܬ̥ܳܐ. ܥܰܠ ܕܶܟܬܺܝܘ: «ܠܺܝܛܳܝܳܐ ܟܽܠ ܡܰܢ ܕܡܺܝܥܰܠܶܩ ܥܰܠܽܘ ܩܰܝܣܳܐ». ܐܺܝ ܒܽܘܪܟܬ̣ܳܐ ܕܰܐܒܪܳܗܳܡ ܠܰܥܰܡ̈ܶܐ، ܒܝܶܫܽܘܥ ܡܫܺܝ̣ܚܳܐ ܗܰܘܝܳܐ، ܠܰܫܰܢ ܕܡܰܝܕܺܝܢܰܐ ܒܺܐܝ ܗܰܝܡܳܢܽܘܬ̣ܳܐ ܐܽܘ ܘܰܥܕ ܕܺܐܝ ܪܽܘܚܳܐ. ܒܰܪܶܟ̥ܡܳܪܝ܀