ܩܰܕܡܳܝܰܬ݀ ܨܠܽܘ̣ܬܳܐ ܕܫܽܘ̣ܪܳܝܳܐ

ܐܰܢܺܝܚ ܘܒܰܝܰܐܐ ܒܰܚܢܳܢܳܟ ܡܫܺܝܚܳܐ ܐܰܠܳܗܳܐ ܠܥܰܒܕܰܝ̈ܟ ܘܣܳܓܽܘ̈ܕܰܝܟ: ܕܰܫܟܶܒܘ̱ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܕܗܳܐ ܚܳܝܪܺܝܢ ܘܰܡܣܰܟܶܝܢ ܠܡܽܘܠܟܳܢܳܐ ܕܒܽܘܣܳܡܰܝ̈ܟ ܫܡܰܝ̈ܳܢܶܐ ܘܠܳܐ ܡܶܫܬܰܚܠ̈ܦܳܢܶܐ: ܡܫܺܝܚܳܐ ܐܰܠܳܗܳܐ ܕܶܐܬܳܐ ܠܦܽܘܪܩܳܢܰܢ: ܘܰܥܬܺܝܕ ܕܢܺܐܬܶܐ ܠܢܽܘܚܳܡܰܢ ܘܰܠܚܽܘܕܳܬܰܢ: ܡܫܺܝܚܳܐ ܡܳܪܰܢ ܘܐܰܠܳܗܰܢ܀

ܦܪܽܘ̣ܡܝܽܘܢ

ܬܶܫܒܽܘܚܬܳܐ ܠܗܰܘ ܡܰܠܟܳܐ ܫܡܰܝܳܢܳܐ ܕܰܩ̣ܪܳܐ ܠܰܐܪ̈ܥܳܢܶܐ ܠܡܶܫܬܽܘܬܳܐ ܕܬܶܫܒܽܘܚܬܶܗ: ܘܙܰܡܶܢ ܠܬܰܚܬܳܝ̈ܶܐ ܠܰܚܠܽܘܠܳܐ ܕܪܰܒܽܘܬܶܗ: ܘܬܰܩܶܢ ܠܥܰܦܪ̈ܳܢܶܐ ܣܶܒܶܠܬܳܐ ܕܦܽܘܩ̈ܕܳܢܶܐ ܕܢܶܬܕܰܪܓܽܘܢ ܠܘܳܬܶܗ: ܘܰܡܠܰܟ ܠܣܳܓܽܘ̈ܕܰܘܗ̱ܝ ܡܰܠܟܽܘܬܶܗ ܘܶܐܫܬܰܘܕܺܝ ܠܕܳܚ̈ܠܰܘܗ̱ܝ ܒܽܘܣܳܡܶܗ: ܘܰܡܒܰܣܶܡ ܠܰܪ̈ܚܽܘܡܰܘܗ̱ܝ ܒܰܓܢܽܘܢܶܗ: ܕܠܶܗ ܝܳܐܶܐ ܫܽܘܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ: ܡܳܪܶܗ ܕܥܳܠܡܳܐ ܩܰܕܡܳܝܳܐ ܣܳܓܕܺܝܢܰܢ ܠܰܫܡܳܐ ܡܫܰܒܚܳܐ ܕܰܐܠܳܗܽܘܬܳܟ: ܘܡܰܘܕܶܝܢܰܢ ܠܐ̱ܪ̈ܳܙܶܐ ܟܣܰܝ̈ܳܐ ܕܺܐܝܬܽܘܬܳܟ: ܡܦܺܝܣܺܝܢܰܢ ܠܟܺܐܢܽܘܬܳܟ ܕܚܺܝܠܬܳܐ ܘܰܡܫܰܒܰܚܬܳܐ ܘܡܶܬܟܰܫܦܺܝܢܰܢ ܠܛܰܝܒܽܘܬܳܟ ܡܰܠܝܰܬ݀ ܪ̈ܰܚܡܶܐ ܘܰܚܢܳܢܳܐ: ܕܰܬܪܰܚܶܡ ܘܰܬܚܽܘܣ ܥܰܠ ܓܒܺܝܠܬܳܐ ܕܐ̱ܢܳܫܽܘܬܰܢ: ܒܗܰܘ ܝܰܘܡܳܐ ܪܰܒܳܐ ܕܒܶܗ ܡܶܬܚܙܶܐ ܙܺܝܘܳܐ ܡܫܰܒܚܳܐ ܕܰܐܠܳܗܽܘܬܳܟ: ܕܳܐܬܶܐ ܥܰܠ ܥܢܳܢ̈ܰܝ ܫܡܰܝܳܐ ܒܚܰܝܠܳܐ ܕܡܰܠܰܐܟ̈ܶܐ ܘܟܶܢ̈ܫܶܐ ܫܓܺܝܪ̈ܶܐ ܕܓܰܘܙܰܠܬܳܐ ܕܰܡܙܰܝܚܺܝܢ ܠܢܺܝܫܶܗ ܪܰܒܳܐ ܕܰܨܠܺܝܒܳܐ: ܕܕܳܢܰܚ ܒܪܺܝܫܳܗ̇ ܕܡܰܕܢܚܳܐ: ܕܡܶܬܚܰܕܰܬ ܥܳܠܡܳܐ ܕܰܒܠܺܝ: ܘܰܢܩܽܘܡܽܘܢ ܒܶܗ ܥܰܢܺܝ̈ܕܶܐ ܕܥܰܡܗܽܘܢ ܕܚܰܝ̈ܶܐ ܢܶܦܩܽܘܢ ܠܐܘܪܥܳܗ̇ ܕܗܳܝ ܪܰܒܽܘܬܳܐ ܕܳܐܬܝܳܐ ܒܫܽܘܒܚܳܐ ܕܬܶܥܒܶܕ ܕܺܝܢܳܐ ܘܙܰܕܺܝܩܽܘܬܳܐ: ܐܳܬܶܐ ܩܕܳܡܰܘܗ̱ܝ ܩܳܠܳܐ ܫܒܺܝܚܳܐ ܕܰܡܙܺܝܥ ܠܰܐܪܥܳܐ ܒܥܰܙܺܝܙܽܘܬܶܗ: ܥܳܩܰܪ ܛܽܘܪ̈ܶܐ: ܡܰܚܪܶܒ ܝܰܒܫܳܐ: ܡܰܘܒܶܫ ܝܰܡܳܐ: ܩܳܦܶܠ ܫܡܰܝܳܐ: ܟܳܪܶܟ ܪܩܺܝܥܳܐ: ܡܰܚܫܶܟ ܫܶܡܫܳܐ: ܡܰܦܛܰܪ ܣܰܗܪܳܐ: ܡܰܦܶܠ ܟܰܘܟ̈ܒܶܐ ܡ̣ܶܢ ܣܶܕܪ̈ܰܝܗܽܘܢ: ܙܳܥܶܩ ܩܳܠܳܐ ܕܚܺܝܠܳܐ ܕܩܰܪ̈ܢܳܬܳܐ: ܕܝܽܘܒܳܒܳܐ ܘܰܕܫܺܝܦܽܘܪܳܐ ܒܦܽܘܡܳܐ ܕܚܰܝܠܰܘ̈ܳܬܳܐ ܘܰܕܠܶܓܝܽܘ̈ܢܰܘܗ̱ܝ ܩܰܕܺܝ̈ܫܳܬܳܐ: ܦܳܩܥܺܝܢ ܫܽܘ̈ܥܶܐ ܒܩ̈ܳܠܰܝ ܪ̈ܰܥܡܶܐ ܕܟܶܢ̈ܫܶܐ ܕܢܽܘܪܳܐ ܝܳܩܶܕܬܳܐ ܡ̣ܶܢ ܦܽܘ̈ܡܰܝܗܽܘܢ: ܡܶܬܦܬܰܚ ܦܽܘܡܳܐ ܕܗܰܘܬܳܐ ܕܡܺܝ̈ܬܶܐ: ܫܝܽܘܠ ܒܳܠܰܥܬܳܐ ܕܬܶܓܣܶܐ ܘܬܰܦܶܩܝ̱ ܡܺܝ̈ܬܶܐ ܛܡܺܝܪ̈ܶܐ ܡܶܢ ܓܰܘ ܩܰܒܪ̈ܶܐ: ܓܳܐܰܚ ܓܶܢܣܶܗ ܕܳܐܕܳܡ: ܚܰܝ̈ܶܐ ܘܡܺܝ̈ܬܶܐ ܫܰܘܝܳܐܝ̣ܬ ܕܒܰܪܦܳܦ ܥܰܝܢܳܐ ܢܶܦܩܽܘܢ ܢܩܰܒܠܽܘܢ ܠܒܰܪ ܐܰܠܳܗܳܐ: ܕܳܐܬܶܐ ܒܫܽܘܒܚܳܐ: ܕܰܢܩܺܝܡ ܐܶܢܽܘܢ ܡ̣ܶܢ ܥܰܦܪܳܐ ܡ̣ܶܢ ܕܰܚܺܝܚܳܐ: ܦܳܪܚܺܝܢ ܒܟܽܠܶܗ ܥܳܠܡܳܐ ܥܺܝܪ̈ܶܐ ܕܢܽܘܪܳܐ ܘܰܕܪܽܘܚܳܐ: ܘܟܶܢ̈ܫܶܐ ܕܫܰܠܗܶܒܺܝܬܳܐ ܠܰܡܟܰܢܳܫܽܘ ܠܟܽܠܗܽܘܢ ܒܢܰܝ̈ܢܳܫܳܐ ܠܕܺܝܢܳܐ ܕܚܺܝܠܳܐ ܕܟܺܐܢܽܘܬܳܐ: ܥܳܐܶܠ ܐܳܕܳܡ ܘܚܰܘܳܐ ܘܥܰܡܗܽܘܢ ܒܥܶܠܕܰܪܳܐ ܗܰܘ ܕܰܐܛܥܺܝ ܐܶܢܽܘܢ: ܗܳܒܶܝܠ ܩܛܺܝܠܳܐ ܩܰܕܡܳܝܳܐ ܘܥܰܡܶܗ ܩܳܐܝܶܢ ܐܰܚܽܘܗ̱ܝ: ܐܳܬܶܐ ܟܽܠܶܗ ܕܳܪܳܐ ܕܰܒܢ̈ܰܝ ܫܺܝܬ ܒܫܽܘܦܪܳܐ ܕܩܰܕܺܝܫܽܘܬܳܐ ܘܥܰܡܗܽܘܢ ܕܳܪܳܐ ܦܰܚܙܳܐ ܕܰܒܢ̈ܰܝ ܩܳܐܝܶܢ ܩܳܛܽܘܠܳܐ: ܐܳܬܶܐ ܢܽܘܚ ܟܺܐܢܳܐ ܘܰܬܪܺܝܨܳܐ: ܥܰܡܶܗ ܒܢ̈ܰܝ ܕܳܪܳܐ ܛܰܡܳܐܐ ܕܝܽܘܒܺܝܠ ܪܰܦܝܳܐ ܘܰܕܬܽܘܒܰܠܩܺܝܢ: ܐܳܬܶܐ ܐܰܒܪܳܗܳܡ ܐܰܒܳܐ ܕܥܰܡ̱̈ܡܶܐ ܒܗܰܝܡܳܢܽܘܬܶܗ: ܘܥܰܡܶܗ ܡܰܠܟ̈ܶܐ ܒܺܝ̈ܫܶܐ ܦܶܪܥܽܘܢ ܘܰܐܒܺܝܡܰܠܰܟ: ܐܳܬܶܐ ܐܺܝܽܘܒ ܙܰܕܺܝܩܳܐ ܘܰܒܢܰܘ̈ܗ̱ܝ ܒܫܽܘܦܪܳܐ ܕܰܐܬܠܺܝܛܽܘܬܳܐ ܘܥܰܡܗܽܘܢ ܣܳܛܳܢܳܐ ܪܺܝܫܳܐ ܕܟܽܠܳܗ̇ ܛܽܘܥܝܰܝ: ܐܺܝܣܚܳܩ ܢܰܟܦܳܐ ܕܰܦܟܺܝܪ ܩܕܳܡ ܣܰܟܺܝܢܳܐ ܘܓܰܠܝ̈ܳܢ ܐܰܦܰܘ̈ܗ̱ܝ ܕܶܐܬܦܰܨܺܝ ܗ̱ܘܳܐ ܒܶܐܡܪܳܐ ܕܰܕܒܰܚ ܐܰܒܽܘܗ̱ܝ ܚܠܳܦܰܘܗ̱ܝ: ܝܰܥܩܽܘܒ ܟܺܐܢܳܐ ܘܥܰܡܶܗ ܥܺܝܣܽܘ ܕܪܳܕܶܦ ܗ̱ܘܳܐ ܠܶܗ: ܝܰܘܣܶܦ ܢܰܟܦܳܐ ܘܰܟܢܺܝܟܳܐ ܘܰܐܚܰܘ̈ܗ̱ܝ ܕܙܰܒܢܽܘܗ̱ܝ ܘܗܳܝ ܡܶܨܪܳܝܬܳܐ ܕܛܶܠܡܰܬ݀ ܫܽܘܦܪܶܗ: ܘܰܠܕܰܟܝܽܘܬܶܗ ܨܒܳܬ݀ ܕܰܬܨܰܥܰܪܝ̱: ܐܳܬܶܐ ܡܽܘܫܶܐ ܘܰܐܗܪܽܘܢ ܘܥܰܡܗܽܘܢ ܦܶܪܥܽܘܢ ܡܰܪܳܚܳܐ: ܝܶܫܽܘܥ ܒܰܪܢܽܘܢ ܘܥܰܡܶܗ ܕܳܪܳܐ ܡܡܰܪܡܪܳܢܳܐ: ܫܡܽܘܐܶܝܠ ܢܒܺܝܳܐ ܘܥܰܡܶܗ ܒܢ̈ܰܝ ܥܺܝܠܺܝ ܟܳܗܢܳܐ: ܕܰܘܺܝܕ ܡܰܠܟܳܐ ܘܰܐܒܺܝܫܳܠܽܘܡ ܒܪܶܗ ܘܫܳܐܘܳܠ ܡܳܪܽܘܕܳܐ: ܐܺܠܺܝܳܐ ܢܒܺܝܳܐ ܘܥܰܡܶܗ ܐܳܚܳܒ ܡܰܠܟܳܐ ܘܺܐܝܙܒܶܝܠ ܫܳܛܺܝܬܳܐ: ܐܶܠܺܝ̣ܫܳܥ ܢܒܺܝܳܐ ܘܥܰܡܶܗ ܓܰܚܙܰܝ ܝܰܥܢܳܐ ܘܪܳܚܶܡ ܟܶܣܦܳܐ: ܐܶܪܰܡܝܳܐ ܢܒܺܝܳܐ ܘܥܰܡܶܗ ܨܶܕܰܩܝܳܐ ܡܰܠܟܳܐ ܕܣܰܚܦܶܗ ܒܓܰܘ ܣܝܳܢܳܐ: ܐܶܫܰܥܝܳܐ ܘܰܡܢܰܫܶܐ ܡܰܠܟܳܐ ܕܢܰܣܪܶܗ: ܐܳܬܶܐ ܚܰܙܩܺܝܶܐܝܠ ܢܒܺܝܳܐ ܒܓܶܠܝܳܢܰܘ̈ܗ̱ܝ ܘܰܒܢ̈ܰܝ ܥܰܡܶܗ ܒܰܚܛܳܗܰܝ̈ܗܽܘܢ ܕܳܢܺܝܶܐܝܠ ܓܰܒܪܳܐ ܕܪܶܓܬܳܐ ܘܥܰܡܶܗ ܒܳܒܠܳܝ̈ܶܐ ܕܶܐܟܰܠܘ̱ ܩܰܪ̈ܨܰܘܗ̱ܝ ܘܰܛܠܳܝ̈ܶܐ ܕܒܶܝܬ ܚܰܢܰܢܝܳܐ ܘܥܰܡܗܽܘܢ ܣܳܓ̈ܕܰܝ ܠܨܰܠܡ̈ܶܐ ܕܒܶܝܬ ܡܰܩܒܳܝ̈ܶܐ ܘܟܽܠܳܗ̇ ܛܰܡܽܐܘܬܳܐ ܕܒܶܝܬ ܐܰܢܛܺܝܰܟܳܘܣ: ܫܽܘܫܰܢ ܕܟܺܝܬܳܐ ܘܟܳܗ̈ܢܶܐ ܕܥܰܘܠܳܐ ܐܳܚܳܒ ܘܨܶܕܰܩܝܳܐ: ܐܳܬܶܐ ܝܽܘܚܰܢܳܢ ܡܰܥܡܕܳܢܳܐ ܘܥܰܡܶܗ ܗܶܪܳܘܕܺܝܰܐ ܙܰܠܺܝܠܬܳܐ ܘܗܶܪܳܘܕܶܣ ܥܰܘܳܠܳܐ: ܦܶܛܪܽܘܣ ܘܦܰܘܠܳܘܣ ܘܥܰܡܗܽܘܢ ܢܺܝܪܽܘܢ ܡܰܠܟܳܐ ܘܣܺܝܡܽܘܢ ܚܰܪܳܫܳܐ: ܐܳܬܶܝܢ ܫܠܺܝ̈ܚܶܐ ܘܥܰܡܗܽܘܢ ܕܰܝܳܢܰܝ̈ܗܽܘܢ: ܘܰܐܬܠܺܝ̈ܛܶܐ ܘܥܰܡܗܽܘܢ ܪ̈ܳܓܽܘܡܰܝܗܽܘܢ: ܐܳܬܶܝܢ ܣܳܗ̈ܕܶܐ ܘܥܰܡܗܽܘܢ ܪ̈ܳܕܽܘܦܰܝܗܽܘܢ ܐܳܬܶܝܢ ܩܛܺܝ̣̈ܠܶܐ ܘܥܰܡܗܽܘܢ ܩܳܛܽܘ̈ܠܰܝܗܽܘܢ: ܛܠܺܝ̈ܡܶܐ ܘܥܰܡܗܽܘܢ ܛܳܠܘ̣ܡܰܝ̈ܗܽܘܢ: ܟܽܠܗܽܘܢ ܝܰܠܕܰܘ̈ܗ̱ܝ ܕܳܐܕܳܡ ܫܰܘܝܳܐܝ̣ܬ: ܐܳܬܶܝܢ ܠܕܺܝܢܳܐ ܕܚܺܝ̣ܠܳܐ ܕܟܺܐܢܽܘܬܳܐ ܕܠܰܝܬ ܒܳܗ̇ ܡܰܣܰܒ ܒܰܐܦ̈ܶܐ: ܒܗܰܘ ܝܰܘܡܳܐ ܕܚܺܝ̣ܠܳܐ ܘܰܒܗܳܝ ܫܳܥܬܳܐ ܕܰܪܗܺܝܒܽܘܬܳܐ: ܕܢܳܦܩܳܐ ܒܳܗ̇ ܪܰܒܽܘܬܳܟ ܥܰܠ ܡܰܪܟܰܒܬܳܐ: ܘܡܶܫܬܡܰܥ ܩܳܠܳܐ ܕܙܰܘܥܳܐ ܡ̣ܶܢ ܒܰܝܢܳܬ ܓܺܝ̈ܓܠܶܐ ܕܫܰܠܗܶܒܺܝܬܳܐ ܪܳܗܛܺܝܢ ܫܡܰܝ̈ܳܐ: ܘܙܳܝܚܺܝܢ ܒܢ̈ܰܝ ܢܽܘܗܪܳܐ ܘܡܶܬܪܰܗܒܺܝܢ ܒܢ̈ܰܝ ܓܰܘܙܰܠܬܳܐ: ܘܡܰܘܩܕܺܝܢ ܒܢܰܒܪܰܫܬܳܐ ܠܟܽܠܗܽܘܢ ܐܰܝܠܶܝܢ ܕܰܐܪܓܶܙܘ̱ ܠܟܺܐܢܽܘܬܳܟ ܘܡܶܬܬܪܰܥ ܝܰܡܳܐ ܕܢܽܘܪܳܐ: ܘܪܳܗܛܺܝܢ ܫܶܦ̈ܥܶܐ ܕܫܰܠܗܶܒܺܝܬܳܐ ܕܰܢܫܰܢܩܽܘܢ ܠܟܽܠܗܽܘܢ ܡܳܪ̈ܽܘܕܶܐ ܘܛܳܥܰܝ̈ܳܐ: ܘܡܶܬܦܬܰܚ ܐܰܬܪܳܐ ܕܝܰܡܺܝܢܳܐ: ܘܕܳܢܰܚ ܝܰܡܳܐ ܕܫܽܘܒܚܳܐ: ܨܳܡܰܚ ܨܶܡܚܳܐ ܕܢܽܘܗܪܳܐ: ܘܡܶܬܓܠܐܷ ܛܽܘܒܳܐ ܕܡܰܠܟܽܘܬܳܐ: ܡܶܬܚܙܶܐ ܓܢܽܘܢܳܐ ܕܢܽܘܗܪܳܐ ܕܙܰܕܺܝ̈ܩܶܐ: ܘܰܐܘܘܳܢܳܐ ܕܩܰܕܺܝ̈ܫܶܐ ܘܰܣܡܳܟܳܐ ܕܰܒܬܽܘ̈ܠܶܐ: ܘܦܳܬܽܘܪ ܛܽܘ̈ܒܶܐ ܕܨܰܝ̈ܳܡܶܐ: ܕܳܢܚܳܐ ܒܝܰܡܺܝܢܳܐ ܛܰܝܒܽܘܬܳܐ ܘܪܳܥܡܳܐ ܒܰܒ̈ܢܰܝ ܣܶܡܳܠܳܐ ܟܺܐܢܽܘܬܳܐ ܩܳܝܡܺܝܢ ܪ̈ܰܫܺܝܥܶܐ ܘܡܰܪܟܰܢ ܪ̈ܺܝܫܰܝܗܽܘܢ: ܘܨܰܠܡ̈ܶܐ ܒܰܗܺܝ̈ܬܳܢ ܐܰܦܰܝ̈ܗܽܘܢ: ܟܳܦܽܘܪ̈ܶܐ ܘܠܳܐ ܡܶܬܥܢܶܐ ܩܳܠܳܐ ܕܡܰܘܕ̈ܝܳܢܘܳܬܗܽܘܢ: ܘܰܡܗܰܝ̈ܡܢܶܐ ܪܳܡ ܩܳܠܗܽܘܢ: ܘܫܰܪܺܝܪ̈ܶܐ ܢܳܨܰܚ ܫܪܳܪܗܽܘܢ: ܣܳܓ̈ܕܰܝ ܠܨܰܠܡ̈ܶܐ ܡܶܬܟܰܡܪܝ̣ܢ: ܘܚܳܕܶܝܢ ܟܺܐܢ̈ܶܐ ܒܡܰܘܕܝܳܢܽܘܬܗܽܘܢ ܫܰܪܺܝܪܬܳܐ: ܒܬܽܘ̈ܠܶܐ ܕܕܳܝܨܺܝܢ: ܘܩܰܕܺܝ̈ܫܶܐ ܕܚܳܕܶܝܢ: ܟܺܐܢ̈ܶܐ ܕܪܳܘܙܺܝܢ: ܘܙܰܕܺܝ̈ܩܶܐ ܕܡܶܬܦܰܨܚܺܝܢ: ܓܢܽܘܢܳܐ ܕܰܦܬܺܝܚ ܘܦܳܬܽܘܪܳܐ ܕܰܡܛܰܝܰܒ: ܙܡܺܝ̈ܢܶܐ ܕܢܳܦܩܺܝܢ ܘܰܩܪ̈ܰܝܳܐ ܕܥܳܐܠܺܝܢ ܠܚܰܝ̈ܶܐ ܕܰܠܥܳܠܰܡ: ܚܰܟܺܝ̈ܡܳܬܳܐ ܕܚܳܕ̈ܝܳܢ ܒܠܰܡܦܺܐܕܰܝ̈ܗܶܝܢ: ܘܣܰܟ̈ܠܳܬܳܐ ܕܚܶܫܽܘ̈ܟܳܢ ܫܪ̈ܳܓܰܝܗܶܝܢ: ܓܺܗܰܢܳܐ ܕܡܰܘܩܕܳܐ: ܘܡܰܠܟܽܘܬܳܐ ܕܡܰܦܪܓܳܐ: ܫܠܺܝ̈ܚܶܐ ܕܕܳܝܢܺܝܢ: ܘܫܰܒ̈ܛܶܐ ܕܺܐܝܣܪܳܐܶܝܠ ܡܶܬܬܕܺܝܢܺܝܢ: ܫܝܽܘܠ ܕܙܳܝܥܳܐ: ܘܩܰܒܪ̈ܶܐ ܕܡܶܬܦܰܬܚܺܝܢ: ܚܰܝ̈ܶܐ ܕܦܳܪܚܺܝܢ ܘܡܺܝ̈ܬܶܐ ܕܢܳܦܠܺܝܢ: ܛܳܒ̈ܶܐ ܕܡܶܬܥܰܠܶܝܢ ܠܪܰܘܡܳܐ: ܘܒܺܝ̈ܫܶܐ ܕܡܶܬܬܰܚܬܺܝܢ ܠܥܽܘܡܩܳܐ: ܕܡܶܬܚܰܙ̈ܝܳܢ ܥܳܒܪ̈ܳܢ ܘܰܕܠܳܐ ܡܶܬܚܰܙܝ̈ܳܢ ܕܰܡܟܰܬܪ̈ܳܢ: ܕܗܳܪܟܳܐ ܕܒ̈ܳܛܠܳܢ ܘܡܶܫܬܰܪ̈ܝܳܢ: ܘܬܰܡܳܢ ܕܩܳܝ̈ܡܳܢ ܘܠܳܐ ܥܳܒܪ̈ܳܢ: ܪ̈ܓܺܝܓܳܬܳܐ ܕܡܶܬܒ̈ܰܛܠܳܢ ܘܡܶܬܛܰܠܩ̈ܳܢ: ܘܒܺܝ̈ܫܳܬܳܐ ܕܠܳܐ ܓܳܡܪ̈ܳܢ: ܛܽܘ̈ܒܶܐ ܕܰܡܟܰܬܪܺܝܢ: ܘܚܰܝ̈ܶܐ ܕܡܰܡܠܟܺܝܢ: ܢܽܘܗܪܳܐ ܕܠܳܐ ܚܳܫܶܟ: ܘܬܶܫܒܽܘܚܬܳܐ ܕܠܳܐ ܡܶܫܬܰܪܝܳܐ: ܕܺܝܢܳܐ ܕܰܠܥܳܠܰܡ: ܘܚܰܝ̈ܶܐ ܕܰܠܕܳܪܕܳܪ̈ܺܝܢ: ܒܗܰܘ ܝܰܘܡܳܐ ܡܳܪܰܢ ܕܗܳܠܶܝܢ ܟܽܠܗܶܝܢ ܦܳܩܶܕ ܪܶܡܙܳܟ ܘܣܳܥܰܪ ܨܶܒܝܳܢܳܟ: ܚܽܘܣ ܥܰܠ ܓܒܺܝܠܬܳܟ ܘܥܰܠ ܨܰܠܡܰܢ ܕܶܐܬܚܰܒܰܠ ܒܰܚܛܳܗ̈ܶܐ: ܘܠܳܐ ܬܺܐܡܰܪ ܠܰܢ ܘܰܠܚܰܒܺܝ̈ܒܰܝܢ ܗܳܠܶܝܢ ܕܰܦܪܰܫܘ̱ ܡ̣ܶܢ ܒܰܝܢܳܬܰܢ ܕܠܳܐ ܝܳܕܰܥ ܐ̱ܢܳܐ ܠܟܽܘܢ: ܐܶܠܳܐ ܫܰܠܶܡ ܠܘܳܬܰܢ ܘܰܠܘܳܬܗܽܘܢ: ܡܶܠܬܳܐ ܗܳܝ ܕܶܐܡ̣ܰܪ ܦܽܘܡܳܟ ܚܰܝܳܐ ܘܩܰܕܺܝܫܳܐ: ܕܟܽܠ ܐܰܝܢܳܐ ܕܰܡܗܰܝܡܶܢ ܒܺܝ ܠܕܺܝܢܳܐ ܠܳܐ ܥܳܐܶܠ: ܐܶܠܐ ܫܰܢܺܝ ܠܶܗ ܡ̣ܶܢ ܡܰܘܬܳܐ ܠܚܰܝ̈ܶܐ: ܘܬܰܡܳܢ ܒܗܰܘ ܝܰܘܡܳܐ ܚܢܰܢ ܘܥܰܢܺܝ̈ܕܰܝܢ ܘܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܢܶܙܡܰܪ ܒܡܶܐܬܺܝܬܳܟ ܫܽܘܒܚܳܐ ܠܓܶܠܝܳܢܳܟ: ܘܬܰܘܕܺܝܬܳܐ ܠܰܐܠܳܗܽܘܬܳܟ ܡܢܰܚܡܳܢܰܢ ܡ̣ܶܢ ܓܰܘ ܫܝܽܘܠ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ: ܗܳܫܳܐ ܒܰܪܶܟܡܳܪܝ̱܀

ܥܶܛܪܳܐ

ܚܰܝܳܐ ܘܡܰܚܝܳܢܳܐ ܘܡܰܥܒܶܕ ܚܰܝ̈ܶܐ ܡܳܪܝܳܐ: ܗܰܘ ܕܰܒܥܶܛܪܳܐ ܚܰܠܝܳܐ ܕܒܰܣܺܝܡܽܘܬܶܗ ܘܰܒܪܺܝܚܳܐ ܗܰܢܺܝܳܐܐ ܕܰܡܪܰܚܡܳܢܽܘܬܶܗ: ܢܚܶܬ ܠܰܫܝܽܘܠ ܘܰܐܥܛܰܪ ܒܳܗ̇ ܢܽܘܚܳܡܳܐ ܘܚܰܝ̈ܶܐ: ܘܰܒܪܺܝܚ ܗܶܪ̈ܽܘܡܶܐ ܕܐܰܠܳܗܽܘܬܶܗ ܩܰܛܠܶܗ ܠܡܰܘܬܳܐ ܘܣܰܦܶܩ ܓܰܙܰܘ̈ܗ̱ܝ: ܘܰܐܦܶܩ ܒܢܽܘܚܳܡܶܗ ܠܰܫܟܺܝ̈ܒܰܝ ܫܝܽܘܠ: ܘܒܰܣܶܡ ܐܶܢܽܘܢ ܒܣܰܒܪܳܐ ܒܪܺܝܟܳܐ ܕܰܩܝܳܡܬܶܗ: ܒܳܟ ܡܳܪܝ̱ ܢܶܬܢܰܚܡܽܘܢ ܥܰܢܺܝ̣̈ܕܶܐ ܡܗܰܝ̈ܡܢܶܐ: ܘܒܳܟ ܢܶܬܬܢܺܝ̈ܚܳܢ ܪ̈ܽܘܚܳܬܗܽܘܢ: ܒܰܐܘ̈ܘܳܢܶܐ ܕܢܽܘܗܪܳܐ: ܘܒܳܟ ܢܶܬܦܰܨ̈ܚܳܢ ܢܰܦ̈ܫܳܬܗܽܘܢ ܒܰܐܬܪܶܗ ܕܫܽܘܒܚܳܟ ܐܰܝܟܰܢܳܐ ܕܡ̣ܶܢ ܚܰܝ̈ܶܐ: ܘܡ̣ܶܢ ܡܺܝ̈ܬܶܐ: ܬܶܫܬܰܒܰܚ ܡܳܪܽܘܬܳܟ ܘܬܶܣܬܓܶܕܝ̱ ܡܪܰܚܡܳܢܽܘܬܳܟ: ܘܬܶܬܪܰܡܪܰܡܝ̱ ܐܰܠܳܗܽܘܬܳܟ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ܀

ܚܘ̣ܬܳܡܳܐ

ܛܰܠܳܐ ܕܪ̈ܰܚܡܶܐ ܕܺܝܠܳܟ ܐܰܠܳܗܰܢ ܣܰܓܺܝ ܪ̈ܰܚܡܶܐ: ܪܽܘܣ ܓܰܪ̈ܡܶܐ ܕܰܡܗܰܝ̈ܡܢܶܐ ܕܰܨܒܺܝܥܺܝܢ ܒܰܕܡܳܐ ܕܺܝܠܳܟ ܝܰܩܺܝܪܳܐ ܘܰܪܫܺܝܡܺܝܢ ܒܪܽܘܫܡܶܗ ܕܰܨܠܺܝܒܳܟ ܙܰܟܳܝܳܐ: ܐܰܫܘܳܐ ܐܶܢܽܘܢ ܠܰܩܝܳܡܬܳܐ ܕܚܰܝ̈ܶܐ ܘܳܐܦ ܠܦܰܪܶܗܣܺܝܰܐ ܕܰܩܕܳܡܰܝܟ: ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀