ܦܪܽܘ̣ܡܝܽܘܢ

ܫܽܘܒ̈ܚܶܐ ܠܳܐ ܡܶܬܦܰܣ̈ܩܳܢܶܐ ܘܪܽܘܡܪ̈ܳܡܶܐ ܠܳܐ ܡܶܫܬܰܬܩ̈ܳܢܶܐ: ܠܗܰܘ ܪܺܝܫܳܐ ܕܚܰܝ̈ܶܐ ܘܠܳܐ ܡܳܝܽܘܬܽܘܬܳܐ: ܠܗܰܘ ܕܡܰܡܠܶܟ ܥܰܠ ܟܽܠ: ܗܰܘ ܕܰܒܚܰܝܠܳܐ ܕܓܰܢ̱ܒܳܪܽܘܬܶܗ ܠܰܫܝܽܘܠ ܥܳܩܰܪ: ܘܰܠܡܰܘܬܳܐ ܡܒܰܛܶܠ: ܡܺܝ̈ܬܶܐ ܕܠܳܐ ܚܒܳܠܳܐ ܡܢܰܚܶܡ: ܘܣܰܒܪܳܐ ܕܚܰܝ̈ܶܐ ܠܳܐ ܡܳܝܽܘ̈ܬܶܐ ܠܢܰܦ̈ܫܳܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ ܡܫܰܟܶܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ܀

ܣܶܕܪܳܐ

ܐܰܠܳܗܳܐ ܗܰܘ ܥܳܒܽܘܕܳܐ ܘܒܳܪܽܘܝܳܐ ܕܟܽܠ: ܡܳܪܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ ܕܓܶܢܣܳܐ ܡܳܝܽܘܬܳܐ ܘܕܰܟܝܳܢܳܐ ܐ̱ܢܳܫܳܝܳܐ: ܕܚܰܝ̈ܶܐ ܡܶܬܩܰܝܡܺܝܢ ܘܡܶܫܬܪܶܝܢ ܕܕܽܘܒܳܪ̈ܶܐ ܕܰܬܢܳܢ: ܘܫܽܘܢܳܝܳܐ ܕܰܠܗܰܠ: ܗܰܘ ܕܡܶܟܺܝܠ ܣܳܐܶܡ ܐܰܢ̱ܬ ܙܰܒܢܳܐ ܠܰܐܝܠܶܝܢ ܕܚܰܝܺܝ̈ܢ: ܘܰܡܩܺܝܡ ܐܰܢ̱ܬ ܬܚܽܘܡܳܐ ܠܐܝܠܶܝܢ ܕܥܳܢܕܺܝܢ: ܗܰܘ ܕܡܰܚܶܐ ܐܰܢ̱ܬ ܠܰܫܝܽܘܠ ܐܳܦ ܡܰܣܶܩ: ܗܰܘ ܕܰܐܢ̱ܬ ܒܚܰܝܠܳܐ ܕܺܝܠܳܟ ܡܒܰܛܶܠ ܐܰܢ̱ܬ ܠܗܽܘ̈ܠܶܐ: ܘܰܒܓܰܢ̱ܒܳܪܽܘܬܳܐ ܕܺܝܠܳܟ ܫܳܪܶܐ ܐܰܢ̱ܬ ܕܶܝܢ ܠܰܐܪ̈ܥܳܢܳܝܳܬܳܐ: ܘܰܠܗܳܠܶܝܢ ܕܰܥܬܺܝ̈ܕܳܢ ܦܳܩܚܳܐܝ̣ܬ ܡܦܰܪܢܶܣ ܐܰܢ̱ܬ: ܗܰܘ ܕܰܒܡܰܚ̈ܘܳܬܳܐ ܕܡܰܘܬܳܐ ܡܥܺܝܩ ܐܰܢ̱ܬ: ܘܰܒܣܰܒܪܳܐ ܕܰܩܝܳܡܬܳܐ ܡܚܰܕܶܐ ܐܰܢ̱ܬ: ܟܰܕ ܠܒܳܥ̈ܘܳܬܳܐ ܘܬܰܟܫ̈ܦܳܬܳܐ ܕܺܝܠܰܢ ܡܶܣ̈ܟܺܢܶܐ ܡܶܬܪܟܶܢ ܐܰܢ̱ܬ: ܘܳܐܦ ܟܰܕ ܡܶܬܚܙܶܐ ܐܰܢ̱ܬ ܡܫܰܝܢܳܐ ܘܒܰܣܺܝܡܳܐ: ܐܶܬܕܰܟܰܪ ܠܟܽܠܗܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܗܳܢܽܘܢ ܕܰܒܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ ܩܰܕܶܡܘ̱ ܚܙܰܩܘ̱ ܠܘܳܬܳܟ: ܘܰܐܢܺܝܚ ܠܟܽܠܗܽܘܢ ܫܳܘ̈ܝܰܝ ܠܰܢ ܒܓܶܢܣܳܐ: ܫܳܘ̈ܝܰܝ ܒܗܰܕ̈ܳܡܶܐ: ܫܳܘ̈ܝܰܝ ܒܫܰܪ̈ܒܳܬܳܐ: ܫܳܘ̈ܝܰܝ ܒܰܟܝܳܢܳܐ: ܫܳܘ̈ܝܰܝ ܒܛܽܘܗܡܳܐ: ܟܰܕ ܫܳܒ̇ܶܩ ܐܰܢ̱ܬ ܫܽܘܪ̈ܥܳܬܳܐ ܕܺܝܠܗܽܘܢ ܨܶܒܝܳܢ̈ܳܝܳܬܳܐ ܟܺܝܬ ܘܠܳܐ ܨܶܒܝܳܢܳܝ̈ܳܬܳܐ: ܟܰܕ ܡܰܥܒܰܪ ܐܰܢ̱ܬ ܟܽܠ ܡܶܬܥܰܒܪ̈ܳܢܘܳܬܰܢ ܕܒܺܝܕܰܥܬܳܐ ܘܰܕܠܳܐ ܒܺܝܕܰܥܬܳܐ: ܥܰܡ ܗܳܠܶܝܢ ܐܶܬܕܰܟܰܪ ܡܳܪܝܳܐ: ܘܰܠܗܳܢܽܘܢ ܕܝܰܘܡܳܢܳܐ ܥ̱ܽܘܗܕܳܢܳܐ ܘܕܽܘܟܪܳܢܳܐ ܕܺܝܠܗܽܘܢ ܡܫܰܡܠܶܝܢܰܢ: ܐܰܒܳܗ̈ܶܐ ܘܰܐܚ̈ܶܐ ܘܓܶܢܣܳܐ ܘܪ̈ܰܒܳܢܶܐ ܕܺܝܠܰܢ: ܘܰܦܩܽܘܕ ܕܢܰܦ̈ܫܳܬܳܐ ܘܪ̈ܽܘܚܳܬܳܐ ܕܺܝܠܗܽܘܢ ܒܰܐܬܪ̈ܰܘܳܬܳܐ ܪ̈ܓܺܝܓܶܐ ܢܶܬܛܰܟܣܽܘܢ: ܒܰܡ̈ܛܰܠܠܶܐ ܫܡܰܝ̈ܳܢܶܐ ܢܶܥܡܪ̈ܳܢ: ܒܡܰܪ̈ܓܶܐ ܗܰܢܺܝ̈ܰܐܝ ܪܺܝܚܳܐ ܢܶܫܪ̈ܝܳܢ ܒܕܽܘ̈ܟܝܳܬܳܐ ܕܰܟܝ̈ܳܬܳܐ ܢܶܬܰܐܡ̈ܢܳܢ: ܘܰܒܒܶܝܬ ܡܰܫܪ̈ܝܶܐ ܢܢܽܘ̈ܚܳܢ: ܒܦܽܘ̈ܢܳܩܶܐ ܕܩܰܕܺܝ̈ܫܶܐ ܢܶܬܚ̈ܰܠܛܳܢ: ܘܥܰܡ ܙܰܕܺܝ̈ܩܶܐ ܢܶܪ̈ܽܘܙܳܢ: ܘܥܰܡ ܢܒܺܝ̈ܶܐ ܘܰܫܠܺܝ̈ܚܶܐ ܢܕܽܘ̈ܨܳܢ: ܘܰܒܢܽܘܗܪܳܐ ܗܰܘ ܕܠܳܐ ܥܳܒ̇ܰܪ ܢܕܰܝܪ̈ܳܢ: ܫܰܝܢܳܐ ܢܶܫܟ̈ܚܳܢ ܐܰܡܺܝܢܳܐܝ̣ܬ: ܘܒܽܘܣܳܡܳܐ ܢܩܰܒ̈ܠܳܢ ܡܬܽܘܡܳܐܝ̣ܬ: ܐܰܝܟܳܐ ܕܰܐܒܪܳܗܳܡ ܘܺܐܝܣܚܳܩ ܥܰܡ ܝܰܥܩܽܘܒ: ܘܟܽܠܗܽܘܢ ܗܳܢܽܘܢ ܕܥܰܡ ܫܰܦܺܝܪܽܘܬ ܕܶܚܠܬܳܐ ܘܦܰܐܝܽܘܬ ܣܳܥܽܘܪܽܘܬܳܐ ܚܝܰܘ: ܐܰܝܟܳܐ ܕܒܶܝܬ ܨܰܘܒܳܐ ܪܓܺܝܓܳܐ: ܐܰܝܟܳܐ ܕܒܶܝܬ ܡܰܥܡܪܳܐ ܕܚܰܕ̈ܘܳܬܳܐ: ܡ̣ܶܢ ܐܰܝܟܳܐ ܕܰܥܪܰܩܘ̱ ܟܺܐܒ̈ܶܐ ܘܬܶܢܚ̈ܳܬܳܐ: ܬܶܫܒܽܘܚܬܳܐ ܠܳܐ ܡܶܬܚܰܒܠܳܢܺܝܬܳܐ ܐܰܡܺܝܢܳܐܝ̣ܬ ܬܽܘܒ ܩܳܛܦܺܝܢܰܢ ܠܟܽܠܗܽܘܢ ܕܶܝܢ ܗܳܠܶܝܢ ܕܥܰܡܰܢ ܐܰܟܚܕܳܐ ܩܳܝܡܺܝܢ ܟܰܕ ܡܨܰܠܶܝܢ: ܐܰܒܳܗ̈ܶܐ ܘܰܐܚ̈ܶܐ ܘܪ̈ܰܒܳܢܶܐ ܕܺܝܠܰܢ ܥܰܕܰܪ ܒܟܽܠ ܙܢܳܐ: ܘܰܒܟܽܠ ܦܽܘܪܣܳܐ ܠܗܽܘܢ ܒܰܝܰܐܐ: ܒܟܽܠ ܡܶܠܬܳܐ ܘܣܽܘܥܪܳܢܳܐ ܠܗܽܘܢ ܠܰܒܶܒ: ܟܰܕ ܡܪܺܝܡ ܐܰܢ̱ܬ ܠܥܳܩ̈ܳܬܳܐ ܡ̣ܶܢ ܠܶܒܰܘ̈ܳܬܗܽܘܢ: ܟܰܕ ܡܰܐܣܶܐ ܐܰܢ̱ܬ ܠܚܰܫܳܐ ܕܢܰܦ̈ܫܳܬܗܽܘܢ ܟܰܕ ܡܫܰܠܐܷ ܐܰܢ̱ܬ ܬܶܢܚ̈ܳܬܗܽܘܢ ܐܶܒܠܳܢܳܝ̈ܳܬܳܐ: ܟܰܕ ܥܳܛܶܐ ܐܰܢ̱ܬ ܕܶܡ̈ܥܶܐ ܕܽܐܘܠܝ̈ܳܬܗܽܘܢ: ܟܰܕ ܝܳܗܶܒ ܐܰܢ̱ܬ ܒܽܘܝܳܐܴܐ ܠܐܝܠܶܝܢ ܕܡ̣ܶܢ ܚܰܫܳܐ ܡܥܳܩܺܝܢ: ܘܰܡܫܰܟܶܢ ܐܰܢ̱ܬ ܥܽܘܕܪܳܢܳܐ ܠܰܐܝܠܶܝܢ ܕܡ̣ܶܢ ܚܰܫܳܐ ܘܟܰܪܝܽܘܬܳܐ ܢܟܺܝܬܺܝܢ: ܟܰܕ ܢܳܛܰܪ ܐܰܢ̱ܬ ܠܗܽܘܢ ܒܟܽܠ ܙܰܒܢܳܐ ܘܰܒܟܽܠ ܕܽܘܟܳܐ ܡܫܰܪܪ̈ܶܐ: ܚܠܺܝ̈ܡܶܐ ܫܰܪܺܝܪ̈ܶܐ: ܠܳܐ ܛܳܥܰܝ̈ܳܐ: ܠܳܐ ܣܓܺܝ̈ܦܶܐ: ܠܳܐ ܚܰܫܳܢܳܝ̈ܶܐ: ܠܳܐ ܟܺܐܒܬܳܢ̈ܶܐ: ܠܳܐ ܡܶܬܩܰܛܦܳܢ̈ܶܐ: ܘܥܰܡ ܟܽܠܗܽܘܢ ܩܰܕܺܝ̈ܫܰܝܟ ܠܗܽܘܢ ܘܰܠܟܽܠܰܢ ܠܛܳܒ̈ܳܬܳܐ ܠܥܳܠܰܡ ܐܰܫܘܳܐ: ܡܶܛܽܠ ܕܛܳܒܳܐ ܘܥܰܬܺܝܪ ܒܡܰܘܗ̈ܒܳܬܳܐ ܘܰܫܦܺܝܥ ܐܰܢ̱ܬ ܗ̱ܘ̣ ܐܳܘ ܡܳܪܝܳܐ ܘܠܳܟ ܫܽܘܒܚܳܐ ܡܰܣܩܺܝܢܰܢ ܘܠܰܐܒܽܘܟ ܘܰܠܪܽܘܚܳܐ ܩܰܕܺܝܫܳܐ: ܗܳܫܳܐ܀