ܨܠܽܘ̣ܬܳܐ ܕܫܽܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܐܡܺܝܢܳܐܝ̣ܬ ܒܕܰܟܝܽܘܬܳܐ ܘܩܰܕܺܝܫܽܘܬܳܐ ܢܫܰܡܠܐܷ ܠܕܽܘܟܪܳܢܳܐ ܕܰܪ̈ܚܽܘܡܰܝܟ: ܢܰܨܺܝ̈ܚܶܐ ܠܒܺܝ̈ܫܰܝ ܙܰܝܢܳܐ ܕܪܽܘܚܳܐ ܩܰܕܺܝܫܳܐ: ܒܰܣܶܝܠܺܝܳܘܣ ܘܰܓܪܺܝܓܳܘܪܺܝܳܘܣ ܐܰܒܳܗ̈ܳܬܳܐ ܩܰܕܺܝ̈ܫܶܐ: ܡܫܰܪ̈ܪܳܢܶܐ ܕܗܰܝܡܳܢܽܘܬܳܐ ܬܪܺܝܨܰܬ ܫܽܘܒܚܳܐ: ܘܫܰܟܶܢ ܠܰܢ ܕܰܢܡܰܪܶܐ ܒܕܽܘܒܳܪ̈ܰܝܗܽܘܢ: ܘܢܶܫܬܰܪܰܪ ܒܝܽܘܠܦܳܢܗܽܘܢ ܫܰܪܺܝܪܳܐ: ܘܰܢܫܰܒܰܚ ܠܰܫܡܳܟ ܣܓܺܝܕܳܐ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܠܗܰܘ ܡܚܰܟܡܳܢܳܐ ܕܡܰܠܦܳܢ̈ܶܐ: ܘܗܰܕܳܝܳܐ ܚܰܬܺܝܬܳܐ ܕܰܐܒܳܗ̈ܳܬܳܐ ܫܰܪܺܝܪ̈ܶܐ ܘܰܒܚܺܝܪ̈ܶܐ: ܠܗܰܘ ܪܳܥܝܳܐ ܡܠܐܷ ܚܶܟ̈ܡܳܬܳܐ: ܕܰܒܚܶܟ̈ܡܳܬܶܗ ܐܶܬܚܰܟܰܡܘ̱ ܪ̈ܳܥܰܘܳܬܳܐ ܫܰܪܺܝܪ̈ܶܐ: ܘܰܪܥܰܘ ܠܥܳܢܗܽܘܢ ܡܠܺܝܠܬܳܐ ܒܡܰܪ̈ܓܶܐ ܕܗܰܝܡܳܢܽܘܬܳܐ ܫܰܪܺܝܪܬܳܐ: ܘܰܐܪܚܩܽܘܗ̇ ܡ̣ܶܢ ܪ̈ܳܥܝܶܐ ܡܰܟܪ̈ܗܳܢܶܐ ܘܰܡܡܺܝ̈ܬܳܢܶܐ: ܠܗܰܘ ܕܡܶܢܶܗ ܡܶܫܬܰܡܗܳܐ ܟܽܠ ܐܰܒܳܗܽܘܬܳܐ ܕܒܰܫܡܰܝܳܐ ܘܒܰܐܪܥܳܐ: ܕܰܒܢܽܘܗܪܳܐ ܕܡ̣ܶܢ ܐܺܝܬܽܘܬܶܗ ܐܰܢܗܰܪ ܠܰܐܒܳܗ̈ܳܬܳܐ ܩܰܕܺܝ̈ܫܶܐ ܒܰܣܶܝܠܺܝܳܘܣ ܘܰܓܪܺܝܓܳܘܪܺܝܳܘܣ ܘܰܐܘܠܶܕܘ̱ ܘܪܰܒܺܝܘ ܘܬܰܪܣܺܝܘ ܠܰܒܢܰܝ̈ܳܐ ܪ̈ܽܘܚܳܢܳܝܶܐ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ: ܘܒܰܫܒܺܝ̈ܠܶܐ ܬܪ̈ܺܝܨܶܐ ܫܰܒܶܠܘ̱ ܐܶܢܽܘܢ ܠܗܰܝܡܳܢܽܘܬܳܐ ܫܰܪܺܝܪܬܳܐ ܕܒܶܗ: ܘܗܳܐ ܒܟܽܠ ܥܶܕܳܢ ܡܰܣܩܺܝܢ ܠܶܗ ܫܽܘܒܚܳܐ ܒܕܽܘܟܪ̈ܳܢܰܝܗܽܘܢ: ܕܠܶܗ ܝܳܐܶܐ܀

ܣܶܕܪܳܐ

ܡܳܪܝܳܐ ܡܳܪܶܐ ܟܽܠ: ܗܰܘ ܕܰܡܝܰܬܰܪ ܒܟܽܠ: ܘܰܡܫܰܒܰܚ ܒܟܽܠ: ܗܰܘ ܕܰܐܢ̱ܬ ܒܰܠܚܽܘܕܰܝܟ ܐܺܝܬܰܝܟ ܚܰܣܝܳܐ ܘܰܐܠܳܗܳܐ ܕܰܚܣ̈ܰܝܳܐ: ܘܰܠܗܳܢܽܘܢ ܕܥܰܠ ܕܶܐܬܚܰܣܺܝܘ ܘܶܐܬܩܰܕܰܫܘ̱ ܠܳܟ: ܒܰܐܪܥܳܐ ܘܒܰܫܡܰܝܳܐ ܚܰܣܝܳܐܝ̣ܬ ܡܚܰܣܶܐ ܐܰܢ̱ܬ ܘܰܡܩܰܕܶܫ: ܗܰܘ ܣܽܘܟܳܝܳܐ ܕܪܺܝܫ ܐܰܒܳܗ̈ܳܬܳܐ ܘܳܐܦ ܩܰܕܺܝܡܽܘܬ ܪ̈ܽܘܫܡܶܐ ܘܛܽܘ̈ܦܣܶܐ ܕܰܢܒܺܝ̈ܶܐ: ܫܪܳܪܳܐ ܕܰܫܠܺܝ̈ܚܶܐ ܘܟܳܪܽܘܙܽܘܬܳܐ ܕܰܫܠܺܝ̈ܚܶܐ ܕܰܡܣܰܒܪ̈ܳܢܶܐ: ܡܚܰܡܣܢܳܢܽܘܬܳܐ ܕܟܺܐܢ̈ܶܐ ܘܰܕܥܳܢܘ̈ܳܝܶܐ: ܓܰܢ̱ܒܳܪܽܘܬܳܐ ܕܰܚܠܺܝ̈ܨܶܐ: ܚܰܝܠܬܳܢܽܘܬܳܐ ܕܣܳܗ̈ܕܶܐ ܘܰܕܡܰܘ̈ܕܝܳܢܶܐ: ܝܺܕܰܥܬܳܐ ܘܚܶܟܡܬܳܐ ܠܳܐ ܛܳܥܽܘܫܬܳܐ ܕܡܰܠܦܳܢ̈ܶܐ ܫܰܪܺܝܪ̈ܶܐ ܒܰܣܶܝܠܺܝܳܘܣ ܘܰܓܪܺܝܓܳܘܪܺܝܳܘܣ: ܫܰܟܶܢ ܠܰܢ ܠܥܰܒܕ̈ܶܐ ܕܺܝܠܳܟ: ܕܰܒܟܽܠܙܒܰܢ ܕܽܘܟܪ̈ܳܢܰܝܗܽܘܢ ܕܩܰܕܺܝ̈ܫܳܝܟ ܠܳܐ ܣܰܒܥܳܐܝ̣ܬ ܢܫܰܡܠܐܷ ܘܰܢܥܰܕܥܶܕ: ܠܳܐ ܒܰܒ̈ܢܳܬ ܩ̈ܳܠܶܐ ܣܦܺܝ̈ܩܳܬܳܐ ܐܶܠܳܐ ܒܰܥܒ̈ܳܕܶܐ ܕܙܰܕܺܝܩܽܘܬܳܐ: ܠܳܐ ܒܪܶܚܡܰܬ݀ ܪ̈ܓܺܝܓܳܬܳܐ ܐܶܠܳܐ ܐܰܠܳܗܳܐܝ̣ܬ: ܠܳܐ ܥܳܠܡܳܢܳܐܝ̣ܬ ܐܶܠܳܐ ܠܥܶܠ ܡ̣ܶܢ ܥܳܠܡܳܐ: ܠܳܐ ܒܨܶܒ̈ܬܶܐ ܦܰܓܪ̈ܳܢܳܝܶܐ ܐܶܠܳܐ ܒܦܺܐܪ̈ܐ ܕܰܬܝܳܒܽܘܬܳܐ ܡܩܰܒܠܳܢܺܝܬܳܐ ܘܰܒܫܰܦܺܝܪܽܘܬ ܐܰܡ̈ܢܶܐ ܕܰܡܝܰܬܪܽܘܬܳܐ: ܠܳܐ ܒܪ̈ܶܦܣܶܐ ܙܰܠܺܝ̈ܠܶܐ ܘܰܙܢܰܝ̈ܳܐ ܠܳܐ ܡܛܰܟ̈ܣܶܐ ܐܶܠܐ ܒܙܰܘ̈ܥܶܐ ܟܢܺܝ̈ܟܶܐ ܘܰܒܗܽܘ̈ܦܳܟܶܐ ܐܰܠܳܗܳܝ̈ܶܐ: ܠܳܐ ܒܰܗܕܺܝܪܽܘܬܳܐ ܕܰܠܒܽܘ̈ܫܶܐ ܘܰܒܪ̈ܺܝܚܳܢܶܐ ܡܰܪ̈ܦܝܳܢܶܐ: ܐܶܠܳܐ ܒܣܳܥܽܘܪܽܘܬܳܐ ܕܰܥܒܳܕ̈ܶܐ ܛܳܒ̈ܶܐ: ܘܪ̈ܝ̣ܚܳܢܶܐ ܒܰܣܺܝ̈ܡܶܐ ܕܺܝܕܰܥܬܳܐ ܐܰܠܳܗܳܝܬܳܐ: ܠܳܐ ܒܦܽܘ̈ܢܳܩܶܐ ܫܳܓܽܘ̈ܫܰܝ ܟܰܪ̈ܣܶܐ ܐܶܠܳܐ ܝܰܬܺܝܪܳܐܝ̣ܬ ܒܚܽܘܕܳܬܳܐ ܕܢܰܦܫܳܐ: ܗܳܝ ܕܰܒܗܳܠܶܝܢ ܕܰܐܠܳܗܳܐ ܡܶܬܦܰܛܡܳܐ ܘܡ̣ܶܢ ܐܰܦܣܽܘ̈ܢܝܳܬܳܐ ܕܪܺܝܚܳܐ ܡܶܬܬܰܪܣܝܳܐ: ܘܚܰܘܪܳܐ ܟܽܠܶܗ ܕܬܰܪܥܺܝܬܳܐ ܒܗܳܠܶܝܢ ܫܡܰܝܳܢ̈ܝܳܬܳܐ ܡܰܩܬܳܐ: ܡܰܚܒܳܐ ܓܡܺܝܪܳܐܝ̣ܬ: ܠܰܐܝܠܶܝܢ ܕܰܐܚܒܽܘܟ ܡܕܰܡܝܳܐ ܒܰܛܢܳܢܗܽܘܢ ܕܰܚܠܳܦ ܫܰܦܺܝܪܽܘܬ ܕܶܚܠܬܳܐ: ܘܰܒܟܽܠܳܗ̇ ܕܰܟܝܽܘܬܳܐ ܕܚܰܝܰܝ̈ܗܘܢ̇: ܐܺܝܢ ܐܰܠܳܗܳܐ ܗܰܘ ܕܫܰܟܶܢܬ ܠܡܰܠܦܳܢ̈ܶܐ ܕܫܰܪܺܝܪ̈ܳܬܳܐ ܒܰܣܶܝܠܺܝܳܘܣ ܘܰܓܪܺܝܓܳܘܪܺܝܳܘܣ ܡܚܰܡܣܢܳܢܽܘܬܳܐ ܠܳܐ ܡܶܙܕܰܥܙܥܳܢܺܝܬܳܐ: ܘܦܰܪܶܗܣܺܝܰܐ ܢܳܡܽܘܣܳܝܬܳܐ ܠܽܘܩܒܰܠ ܩܰܘܡܳܐ ܕܫܺܐܕ̈ܶܐ ܘܣܰܩܽܘܒܠܳܝܽܘܬܳܐ ܕܶܝܢ ܕܰܛܪ̈ܽܘܢܶܐ: ܐܰܫܘܳܐ ܐܳܦ ܠܰܢ ܡܶܣ̈ܟܺܢܶܐ ܘܚܰܛܳܝ̈ܶܐ ܥܰܒܕܰܝ̈ܟ: ܕܰܒܚܺܝܪ̈ܶܐ ܘܰܫܒܺܝ̈ܚܶܐ ܢܶܬܚܙܶܐ ܘܢܶܙܟܶܐ ܠܟܽܠ ܨܢܺܝܥܽܘܬܳܐ ܫܺܐܕܳܢܳܝܬܳܐ: ܘܠܰܦܰܢܛܰܣܺܝܰܐ ܥܳܠܡܳܢܳܝܬܳܐ ܠܰܫܟܺܝܪܽܘܬ ܕܶܚܠܬܳܐ ܚܰܢܦܳܝܬܳܐ ܘܠܰܙܥܽܘܪܽܘܬ ܡܶܠܬܳܐ ܝܽܘܕܳܝܬܳܐ ܘܳܐܦ ܠܰܦܣܳܩܳܐ ܘܦܽܘܠܳܓܳܐ ܐܶܪܶܛܺܝܩܳܝܳܐ: ܘܰܠܚܶܡܬܳܐ ܒܰܥܪܺܝܪܳܝܬܳܐ: ܘܳܐܦ ܠܗܰܢܺܝܽܐܘܬܳܐ ܡܪܰܦܝܳܢܺܝܬܳܐ: ܠܰܣܪܺܝܩܽܘܬ ܬܶܫܒܽܘܚܬܳܐ ܕܢܰܦܫܳܐ: ܘܠܰܚܣܳܡܳܐ ܕܰܡܕܰܝܰܒ: ܘܰܠܟܽܠܳܗ̇ ܟܢܺܝܫܽܘܬܳܐ ܕܚܰܫ̈ܶܐ ܢܕܺܝ̈ܕܶܐ ܘܰܥܕܺܝ̈ܠܶܐ ܕܫܰܪܟܳܐ: ܘܗܰܒܠܰܢ ܡܳܪܝܳܐ ܕܟܰܕ ܡܶܬܩܪܶܝܢܰܢ ܕܶܝܢ ܠܣܳܗܕܽܘܬܳܐ ܕܰܚܠܳܦ ܗܰܝܡܳܢܽܘܬܳܐ ܕܒܳܟ: ܘܫܰܦܺܝܪܽܘܬ ܠܒܺܝܒܽܘܬܳܐ ܘܚܺܝܨܽܘܬܳܐ ܢܚܰܘܶܐ ܩܕܳܡ ܥܰܡ̱̈ܡܶܐ ܘܡܰܠܟ̈ܶܐ ܘܰܒܢܰܝ̈ܳܐ ܕܺܐܝܣܪܳܐܶܝܠ: ܘܠܳܐ ܟܰܕ ܟܳܘܙܺܝܢܰܢ ܡ̣ܶܢ ܓܙܳܡ̈ܶܐ ܐ̱ܢܳܫܳܝ̈ܳܐ ܘܽܐܘܠܨ̈ܳܢܶܐ ܕܰܬܢܳܢ: ܐܰܘ ܡܶܫܬܰܪܥܺܝܢܰܢ ܒܰܪ̈ܓܺܝܓܳܬܳܐ ܕܰܡܠܐܷ ܙܰܒܢܳܐ: ܕܒܰܕܡܽܘܬ ܝܽܘܪܳܩܳܐ ܕܥܶܣܒܳܐ ܚܳܡܶܝܢ: ܦܽܘܪܩܳܢܰܢ ܢܫܰܠܶܡ: ܘܢܶܬܪܰܦܶܐ ܒܬܰܘܕܺܝܬܰܢ ܢܶܐܚܽܘܕ ܕܶܝܢ ܒܟܽܠܳܗ̇ ܢܰܦܫܳܢ ܡܰܫܠܡܳܢܽܘܬܳܐ ܕܰܡܢܺܝ̈ܚܳܢܰܝܟ: ܗܳܠܶܝܢ ܕܟܰܕ ܚܰܒܺܝ̈ܒܶܐ ܕܺܝܠܳܟ ܐܺܝܬܰܝܗܽܘܢ: ܐܺܝܙܓܰܕ̈ܶܐ ܘܰܡܦܺܝ̈ܣܳܢܶܐ ܕܰܚܠܳܦܰܝܢ ܡܩܰܪܒܺܝܢܰܢ ܠܗܽܘܢ ܠܳܟ: ܐܰܝܟܰܢܳܐ ܕܰܠܟܽܠܗܶܝܢ ܐܰܝܠܶܝܢ ܕܰܚܛܰܝܢܰܢ ܠܰܢ ܐܶܢ ܒܨܶܒܝܳܢܳܐ ܘܰܕܠܳܐ ܒܨܶܒܝܳܢܳܐ: ܘܶܐܢ ܕܒܺܝܕܰܥܬܳܐ ܘܰܕܠܳܐ ܒܺܝܕܰܥܬܳܐ ܬܶܫܒܽܘܩ: ܘܒܳܥܶܝܢܰܢ ܡܶܢܳܟ ܕܰܒܝܰܕ ܨܠܰܘ̈ܳܬܗܽܘܢ ܓܗܳܝܬܳܐ ܕܡܶܢܟܽܠ ܒܺܝ̈ܫܳܢ ܢܩܰܒܶܠ: ܒܽܘܣܳܡܳܐ ܕܰܒܟܽܠ ܛܳܒ̈ܳܢ: ܟܰܕ ܡܡܰܪ̈ܝܳܢܶܐ ܕܶܝܢ ܕܰܡܝܰܬܪܽܘܬܳܐ ܕܩܰܕܺܝ̈ܫܰܝܟ ܥܳܒܶܕ ܐܰܢ̱ܬ ܠܰܢ: ܐܳܦ ܒܰܟܠܺܝ̈ܠܰܝܗܽܘܢ ܫܰܘܬܶܦ ܠܰܢ: ܘܰܒܛܳܒ̈ܳܬܳܐ ܕܗܳܠܶܝܢ ܕܰܠܥܳܠܰܡ: ܐܰܝܟܰܢܳܐ ܕܥܰܡܗܽܘܢ ܘܒܰܝܢܳܬܗܽܘܢ ܫܽܘܒܚܳܐ ܘܺܐܝܩܳܪܳܐ ܢܰܣܶܩ ܠܳܟ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܩܰܒܶܠ ܡܳܪܝܳܐ ܠܦܺܝܪܡܳܐ ܗܳܢܳܐ ܕܰܡܩܰܪܒܺܝܢܰܢ ܠܟ: ܘܟܰܠܶܠ ܒܰܟܠܺܝ̈ܠܶܐ ܕܙܳܟܽܘܬܳܐ ܘܗܰܕܰܪ ܒܦܽܘܪܥܳܢܳܐ ܕܛܽܘܒܬܳܢܽܘܬܳܐ ܕܺܝܠܳܟ ܡܳܪܝܳܐ ܠܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ: ܘܰܐܒܳܗ̈ܳܬܳܐ ܘܡܰܠܦܳܢ̈ܐܶ: ܕܰܦܠܰܚܘ̱ ܗ̱ܘܰܘ ܒܟܰܪܡܳܟ ܡ̣ܶܢ ܨܰܦܪܳܐ ܘܰܥܕܰܡܳܐ ܠܪܰܡܫܳܐ: ܘܰܒܝܰܕ ܨܠܰܘ̈ܳܬܗܽܘܢ ܐܳܦ ܠܰܢ ܠܰܐܝܠܶܝܢ ܕܰܒܫܳܥܬܳܐ ܕܰܚܕܰܥܶܣܪ̈ܶܐ ܠܘܳܬܳܟ ܦܢܰܘ ܘܶܐܬܰܘ ܒܣܶܕܪ̈ܰܝܗܽܘܢ ܛܰܟܶܣ ܘܰܡܢܺܝ ܠܰܢ: ܘܰܐܓܪܳܐ ܡܫܰܡܠܝܳܐ ܫܰܟܶܢ ܠܰܢ: ܡܳܪܰܢ ܘܰܐܠܳܗܰܢ܀