ܦܪܽܘ̣ܡܝܽܘܢ

ܠܰܬܠܳܬܳܐ ܩܢܽܘ̈ܡܶܐ ܫܘ̈ܰܝܳܐ ܘܛܽܘܒ̈ܬܳܢܶܐ: ܬܠܳܬܳܐ ܫܡܳܗ̈ܶܐ ܣܓܺܝ̈ܕܶܐ ܘܩܰܕܺܝ̈ܫܶܐ: ܕܚܰܕ ܚܰܝܠܳܐ ܘܫܽܘܠܛܳܢܳܐ ܐܺܝܬܰܝܗܽܘܢ ܘܰܚܕܳܐ ܐܽܘܣܺܝܰܐ ܘܡܶܠܬܳܐ: ܘܰܚܕܳܐ ܐܺܝܬܽܘܬܳܐ ܡܪܰܝܰܡܬܳܐ ܘܰܚܕܳܐ ܐܰܠܳܗܽܘܬܳܐ ܡܫܰܒܰܚܬܳܐ: ܕܰܠܣܳܓܽܘ̈ܕܶܝܗ̇ ܡܰܘܪܒܳܐ: ܘܰܠܒܳܨܽܘ̈ܝܶܝܗ̇ ܣܳܚܦܳܐ: ܘܠܰܐܝܠܶܝܢ ܕܡܰܘܕܶܝܢ ܒܳܗ̇ ܡܝܰܩܪܳܐ: ܘܰܠܗܳܢܽܘܢ ܕܥܰܩܒܽܘܗ̇ ܠܳܐ ܡܶܬܕܰܪܟܳܐ: ܝܰܘܡܳܢܳܐ ܕܶܝܢ ܥܰܠ ܐܰܒܳܗܰܝ̈ܢ ܩܰܕܺܝ̈ܫܶܐ ܐܰܓܢܰܬ݀ ܘܠܰܢ ܡܚܰܦܛܳܐ ܕܢܶܥܒܶܕ ܕܽܘܟܪ̈ܳܢܰܝܗܽܘܢ ܒܗܰܝܡܳܢܽܘܬܳܐ ܒܗܳܢܳܐ܀

ܣܶܕܪܳܐ

ܒܟܽܘܢ ܡܶܬܓܰܘܣܺܝܢܰܢ ܐܳܘ ܪ̈ܰܒܰܝ ܒ̈ܳܬܶܐ ܡܗܰܝ̈ܡܢܶܐ: ܘܫܰܠܺܝ̈ܛܰܝ ܥܰܠ ܒܶܝܬ ܓܰܙ̈ܶܐ ܫܡܰܝ̈ܳܢܶܐ: ܡܕܰܒܪ̈ܳܢܶܐ ܫܰܪܺܝܪ̈ܶܐ: ܘܰܡܦܰܪ̈ܢܣܳܢܶܐ ܚܰܟܺܝ̈ܡܶܐ ܟܳܪ̈ܽܘܙܶܐ ܢܰܨܺܝ̈ܚܶܐ: ܘܰܡܣܰܒܪ̈ܳܢܶܐ ܐܰܠܳܗܳܝ̈ܶܐ: ܘܡܰܠܦܳܢ̈ܶܐ ܬܪ̈ܺܝܨܶܐ: ܘܪ̈ܳܥܰܘܳܬܳܐ ܛܽܘܒ̈ܬܳܢܶܐ: ܡܰܐܪ̈ܙܳܢܶܐ ܒܚܺܝܪ̈ܶܐ: ܘܰܐܒܳܗ̈ܳܬܳܐ ܩܰܕܺܝ̈ܫܶܐ: ܐܳܣܰܘ̈ܳܬܳܐ ܡܗܺܝܪ̈ܺܐ: ܘܥܳܨܽܘ̈ܒܶܐ ܡܫܰܡ̈ܠܰܝܳܐ: ܘܓܰܢ̱ܒܳܪ̈ܶܐ ܠܒܺܝ̈ܒܶܐ: ܘܢܰܚܫܺܝܪ̈ܬܳܢܶܐ ܚܠܺܝ̈ܨܶܐ: ܟܠܺܝ̈ܠܶܐ ܡܰܦܪ̈ܓܶܐ ܕܚܰܣܝܽܘܬܳܐ: ܘܬܰܦܢ̈ܟܶܐ ܪ̈ܳܡܶܐ ܕܪܺܝܫܽܘܬ ܟܳܗܢܽܘܬܳܐ: ܫܽܘܪ̈ܶܐ ܠܳܐ ܡܶܙܕܰܥܙ̈ܥܳܢܶܐ ܕܩܽܘܫܬܳܐ: ܘܫܶܬܶܐܣ̈ܶܐ ܡܫܰܬܐܣ̈ܰܝ ܥܰܠ ܫܽܘܥܳܐ ܦܶܛܪܽܘܣܳܝܳܐ: ܐܰܘܨܪ̈ܶܐ ܕܣܺܝ̈ܡܳܬܳܐ ܕܪܽܘܚܳܐ: ܘܰܡܚܰܟܡ̈ܳܢܶܐ ܕܰܓܡܺܝܪܽܘܬܳܐ ܡܥܰܠܰܝܬܳܐ: ܘܫܽܘܪ̈ܶܝܗ̇ ܕܫܰܦܺܝܪܽܘܬ ܕܶܚܠܬܳܐ: ܘܒܶܝܬ ܨܰܘܒܳܐ ܕܟܽܠܳܗ̇ ܡܝܰܬܪܽܘܬܳܐ: ܡܶܠܚܳܐ ܡܡܰܕܟܳܢܺܝܬܳܐ ܕܟܽܠܳܗ̇ ܦܰܟܺܝܗܽܘܬ ܬܰܪܥܺܝܬܳܐ: ܢܰܗܺܝܪ̈ܶܐ ܐܳܦ ܡܰܢܗܪ̈ܳܢܶܐ: ܕܢܰܦ̈ܫܳܬܳܐ ܚܶܫܽܘ̈ܟܳܬܳܐ ܘܰܡܟܰܬܡ̈ܳܬ ܒܰܚܛܺܝܬܳܐ: ܡܰܒܽܘ̈ܥܶܐ ܡܰܚ̈ܝܳܢܶܐ ܕܰܪܕܰܘ ܡ̣ܶܢ ܐܺܝܬܽܘܬܳܐ ܡܪܰܝܰܡܬܳܐ: ܐܺܝܠܳܢ̈ܶܐ ܡܩܰܠܣ̈ܶܐ ܘܝܳܗ̈ܒܰܝ ܦܺܐܪ̈ܶܐ ܕܠܳܐ ܡܳܝܽܘܬܽܘܬܳܐ: ܓܽܘ̈ܦܢܶܐ ܫܒܺܝ̈ܚܳܬܳܐ ܘܰܡܒܰܪ̈ܟܳܬܳܐ ܕܡܰܝܬܶܝܢ ܚܰܡܪܳܐ ܕܚܰܕ̈ܘܳܬܳܐ: ܡܗܰܕܝ̈ܳܢܶܐ ܬܗܺܝܪ̈ܶܐ ܕܰܠܘܳܬ ܡܰܠܟܽܘܬܳܐ ܥܶܠܳܝܬܳܐ: ܪ̈ܰܒܰܝ ܒ̈ܳܬܶܐ ܕܡܰܫ̈ܟܢܶܐ ܓܰܘܳܝ̈ܶܐ: ܚܰܒܺܝ̈ܒܰܘܗ̱ܝ ܕܰܐܒܳܐ: ܪ̈ܚܽܘܡܰܘܗ̱ܝ ܕܰܒܪܳܐ: ܒܰܝܬܳܝ̈ܶܐ ܕܪܽܘܚܳܐ ܩܰܕܺܝܫܳܐ: ܗܘܰܘ ܗܳܟܺܝܠ ܒܰܥܳܝ̈ܶܐ ܘܰܡܦܺܝ̈ܣܳܢܶܐ ܠܳܗ̇ ܠܰܬܠܺܝܬܳܝܽܘܬܳܐ ܩܰܕܺܝܫܬܳܐ: ܡܰܐܠܽܘܢ ܕܶܝܢ ܚܕܳܐ ܐܰܠܳܗܽܘܬܳܐ ܡܪܰܝܰܡܬܳܐ: ܗܳܝ ܕܒܳܗ̇ ܐܶܫܬܰܡܠܺܝܬܽܘܢ ܘܰܓܡܺܝܪܽܘܬܳܐ ܡܫܰܡܠܳܝܬܳܐ: ܐܰܝܟܰܢܳܐ ܕܢܶܫܬܰܟܰܢ ܠܰܢ ܒܰܨܠܰܘ̈ܳܬܟܽܘܢ ܫܡܺܝ̈ܥܳܬܳܐ: ܚܰܝܠܳܐ ܕܚܶܟܡܬܳܐ: ܘܺܐܝܳܠܳܐ ܕܣܽܘ̈ܟܳܠܶܐ: ܥܰܡ ܬܰܪܥܺܝܬܳܐ ܛܳܒܬܳܐ: ܘܡܰܚܫܰܒܬܳܐ ܡܟܰܘܢܳܢܺܝܬܳܐ ܒܽܘܝܳܢܳܐ ܡܰܘܬܪܳܢܳܐ: ܘܪܶܢܝܳܐ ܒܗܳܠܶܝܢ ܕܰܡܥܰܕܪ̈ܳܢ: ܚܽܘ̈ܫܳܒܶܐ ܕܰܡܟܰܢܫܺܝܢ ܡ̣ܶܢ ܦܶܗܝܳܐ ܕܰܣܪ̈ܺܝܩܳܬܳܐ: ܘܡܰܕܥܳܐ ܕܠܰܝܬ ܒܶܗ ܟܽܘ̈ܬܡܳܬܳܐ: ܘܣܽܘܟܳܠܳܐ ܕܡܰܙܗܰܪ ܒܡ̈ܶܠܰܝ ܚܶܟܡܬܳܐ: ܘܥܶܢܝܳܢܳܐ ܕܛܳܪܶܕ ܠܰܚܛܺܝܬܳܐ ܡܰܣܠܰܝܬܳܐ: ܗܰܘܢܳܐ ܕܡܶܫܟܰܚ ܕܰܢܕܺܝܩ ܘܢܶܚܙܶܐ ܟܰܣ̈ܝܳܬܳܐ: ܘܪܶܗܛܳܐ ܐܰܡܺܝܢܳܐ ܒܦܽܘܠܚܳܢܳܐ ܕܫܰܦܺܝܪ̈ܳܬܳܐ: ܐܰܝܟܰܢܳܐ ܕܒܽܐܘܪܚܳܐ ܗܳܝ ܐܰܠܝ̣ܨܬܳܐ ܕܪܰܫܬܽܘܢ ܠܰܢ ܣܰܟܽܘܠܬܳܢܳܐܝ̣ܬ ܢܶܪܕܶܐ: ܘܳܐܕܫ̈ܶܐ ܡܥܰܠܰܝ̈ܳܐ ܕܰܡܝܰܬܪܽܘܬܳܐ ܗܳܝ ܕܚܰܘܺܝܬܽܘܢ ܠܰܢ ܦܰܐܝܳܐܝ̣ܬ ܢܶܨܛܰܒܰܬ݀ ܘܰܟܠܺܝ̈ܠܶܐ ܡܰܦܪ̈ܓܶܐ ܠܩܽܘܠܳܣܰܝ̈ܟܽܘܢ ܘܰܠܥ̱ܽܘܗܕܳܢܟܽܘܢ ܪ̈ܚܺܝܡܶܐ ܐܰܡܺܝܢܳܐܝ̣ܬ ܢܶܓܕܽܘܠ: ܘܠܰܡܢܳܬܳܐ ܕܰܢܛܺܝܪܳܐ ܠܟܽܘܢ ܒܢܽܘܗܪܳܐ ܡܬܽܘܡܳܝܳܐ ܒܒܳܥܘ̈ܳܬܟܽܘܢ ܢܶܫܬܘܶܐ: ܘܫܽܘܒ̈ܚܶܐ ܠܳܐ ܡܶܬܦܰܣ̈ܩܳܢܶܐ ܐܰܟܚܕܳܐ ܥܰܡܟܽܘܢ ܢܰܣܶܩ: ܠܰܐܒܳܐ ܓܢܺܝܙܳܐ ܕܰܩܪܳܟܽܘܢ ܠܫܽܘܒܚܶܗ: ܘܠܰܒܪܳܐ ܣܓܺܝܕܳܐ ܕܙܰܡܶܢܟܽܘܢ ܠܰܓܢܽܘܢܶܗ: ܘܰܠܪܽܘܚܳܐ ܩܰܕܺܝܫܳܐ ܕܰܐܢܗܰܪܟܽܘܢ ܒܢܽܘܗܪܶܗ: ܗܳܫܳܐ܀