ܦܪܽܘܡܝܽܘܢ

ܬܶܫܒܘ̣ܚܬܳܐ ܠܗܰܘ ܕܩܳܡ ܡܶܢ ܒܶܝܬ ܡܝ̣̈ܬܶܐ ܒܫܘ̣ܒܚܳܐ ܕܪܰܒܘ̣ܬܶܗ: ܘܐܶܬܢܰܚܰܡ ܡܶܢ ܩܰܒܪܳܐ ܠܰܬܠܳܬܳܐ ܝܰܘܡܝ̣̈ܢ ܒܙܳܟܘ̣ܬܳܐ ܕܝܰܡܝ̣ܢܶܗ: ܠܗܰܘ ܕܐܰܒܗܶܬ ܠܥܰܡܳܐ ܕܙܳܩܘ̣̈ܦܶܐ ܒܢܘ̣ܚܳܡܶܗ: ܘܠܰܛܪ̈ܘ̣ܢܶܐ ܒܥܶܠ̈ܕܒܳܒܶܐ ܐܰܪܗܶܒ ܒܰܩܝܳܡܬܶܗ: ܠܗܰܘ ܕܚܰܕܺܝ̣ ܠܬܰܠ̈ܡܝ̣ܕܰܘܗ̱ܝ ܒܰܚܙܳܬܶܗ ܘܐܰܦܨܰܚ ܠܰܡܣܰܒܪ̈ܳܢܶܐ ܒܰܣܒܰܪܬܶܗ: ܘܫܰܕܰܪ ܐܶܢܘܢ̇ ܠܰܐܪܒܰܥ ܦܶܢܝ̈ܳܢ ܕܢܰܟܪܙܽܘܢ̇ ܩܝܳܡܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ܀

ܣܶܕܪܳܐ

ܬܠܝ̣ܬܳܝܳܐ ܘܰܠܚܘ̣ܕܳܝܳܐ ܡܳܪܝܳܐ ܡܪܰܝܡܳܐ ܘܩܰܕܝ̣ܫܳܐ: ܗܰܘ ܕܒܰܢܒܺܝ̈ܰܘܳܬܳܐ ܬܠܝ̣ܬܳܐܝ̣ܬ ܐܶܬܪܫܶܡ ܘܐܶܬܶܐܪܶܙ: ܘܠܶܗ ܬܠܝ̣ܬܳܐܝ̣ܬ ܡܰܟܪ̈ܙܳܢ ܟܽܠܗܶܝܢ ܒܶܪ̈ܝܳܬܳܐ: ܒܰܣܪܝܩܘ̣ܬ ܕܶܝܢ ܡܰܚܫܰܒܬܳܐ ܥܰܒܝܰܬ݀ ܣܘ̣ܟܳܠܳܐ ܕܒܶܢܝܳܢ ܡܰܓܕܠܳܐ: ܒܒܰܪ̱ܬ ܩܳܠܳܐ ܐܰܠܳܗܳܝܬܳܐ ܕܐܶܡܪܰܬ݀ : ܕܬܰܘ ܢܶܚܘ̣ܬ ܢܦܰܠܶܓ ܠܶܫ̈ܳܢܶܐ ܬܠܝ̣ܬܳܝܽܘܬ ܩܢܘ̣̈ܡܶܐ ܫܰܘܕܰܥܬ ܘܠܝ̣ܕܰܥܬܳܐ ܐ̱ܢܳܫܳܝܬܳܐ ܚܰܟܶܡܬ: ܒܰܬܠܳܬܳܐ ܓܰܒܪ̈ܝ̣ܢ ܕܠܰܐܒܪܳܗܳܡ ܟܰܕ ܝܰܬܝ̣ܒ ܒܥܶܕܳܢ ܛܰܗܪܳܐ ܐܶܬܓܠܝ̣: ܘܐܰܝܟ ܕܰܠܚܰܕ ܣܶܓܕܬܳܐ ܠܶܗ ܐܶܬܩܰܪܰܒ ܐܳܦ ܐܶܬܕܢܝ̣: ܘܰܕܠܳܐ ܢܶܚܣܰܪ ܡܶܢ ܫܡܳܐ ܕܰܬܠܝ̣ܬܳܝܽܘܬܳܐ: ܬܠܳܬܳܐ ܣܳܐܝ̣̈ܢ ܕܩܰܡܚܳܐ ܥܒܰܕ ܠܫܳܪܘ̣ܬܶܗ: ܒܰܬܠܳܬ ܬܶܫܒ̈ܚܳܬܳܐ ܕܕܰܘܺܝܕ ܬܠܝ̣ܬܳܐܝ̣ܬ ܐܶܫܬܰܒܰܚ ܗܳܝ ܕܰܠܟܽܠ ܥܰܡ̱̈ܡܝ̣ܢ ܙܰܡܶܢ: ܕܫܰܒܰܚܘ̱ ܠܡܳܪܝܳܐ ܬܶܫܒܘ̣ܚܬܳܐ ܚܕܰܬܳܐ: ܫܰܒܰܚܘ̱ ܠܡܳܪܝܳܐ ܟܽܠܳܗ̇ ܐܰܪܥܳܐ: ܫܰܒܰܚܘ̱ ܠܡܳܪܝܳܐ ܟܽܠܳܗ̇ ܐܰܪܥܳܐ ܒܬܰܚܬܳܝܽܘܬܳܗ̇ ܘܒܰܪܶܟܘ̱ ܠܰܫܡܶܗ: ܬܠܝ̣ܬܳܐܝ̣ܬ ܐܰܟܪܶܙ ܡܽܘܫܶܐ ܡܶܬܓܰܠܝܳܢܘ̣ܬܶܗ: ܡܳܪܝܳܐ ܡܶܢ ܣܝ̣ܢܰܝ ܐܶܬܳܐ ܘܰܕܢܰܚ ܡܶܢ ܣܳܥܝ̣ܪ: ܘܐܶܬܓܠܝ̣ ܡܶܢ ܛܘ̣ܪܳܐ ܕܦܳܪܳܢ: ܬܠܳܬܳܐ ܐ̱ܪ̈ܳܙܶܐ ܛܘ̣ܦܣ̈ܳܢܳܝܶܐ ܒܩܺܒܽܘܬܳܐ ܢܳܡܘ̣ܣܳܝܬܳܐ ܡܶܬܬܣܝ̣ܡܝ̣ܢ ܗ̱ܘܰܘ: ܫܰܒܛܳܐ ܐܰܗܪܘ̣ܢܳܝܳܐ: ܘܩܶܣܛܳܐ ܕܡܰܢ̱ܢܳܐ: ܘܠܽܘ̣̈ܚܶܐ ܕܢܳܛܘ̣ܪܘ̣ܬ ܦܘ̣̈ܩܕܳܢܶܐ: ܬܠܳܬ ܐܝ̣ܩܳܪ̈ܝ̣ܢ ܘܢܶܨܚܳܢܝ̣̈ܢ ܢܣܰܒ ܦܺܝ̣ܢܚܶܣ ܟܰܕ ܛܰܢ ܘܰܩܛܰܠ ܘܚܰܣܝ̣: ܘܛܰܢܳܢܳܐ ܘܟܳܠܶܐ ܡܰܘܬܳܢܳܐ ܘܰܡܩܰܕܝܳܢܳܐ ܕܟܳܗܢܘ̣ܬܳܐ ܐܶܬܟܰܢܝ̣: ܬܠܝ̣ܬܳܐܝ̣ܬ ܫܰܕܰܪ ܡܳܪܶܐ ܟܰܪܡܳܐ ܦܳܥ̈ܠܶܐ ܠܟܰܪܡܶܗ ܟܰܕ ܨܳܒܶܐ ܒܦܘ̣ܪܩܳܢ ܥܰܡܳܐ: ܒܰܢܒܺܝ̈ܶܐ ܕܰܩܕܳܡ ܓܳܠܘ̣ܬܳܐ: ܘܰܒܕܶܢܚܶܗ ܫܒܝ̣ܚܳܐ ܕܰܬܠܝ̣ܬܳܝܳܐ ܡܶܠܬܳܐ ܡܬܘ̣ܡܳܝܳܐ: ܬܠܝ̣ܬܳܐܝ̣ܬ ܠܚܰܝ̈ܠܶܐ ܬܡܝ̣̈ܗܶܐ ܕܣܳܥܘ̣ܪܘ̣ܬܶܗ ܥܒܰܕ: ܘܰܬܠܝ̣ܬܳܐܝ̣ܬ ܦܰܠܶܬ ܠܦܶܬܓ̈ܳܡܶܐ ܕܰܣܥܰܪ ܘܡܶܣܬܰܥܪܝ̣ܢ: ܬܠܳܬ ܡܰܠ̈ܟܘܳܢ ܐܰܟܪ̈ܙܳܝܗ̱ܝ ܕܡܰܠܟܰܐ ܗ̱ܘ: ܐܺܝܪܳܘܕܶܣ ܕܡܰܠܒܶܫ ܠܶܗ ܐܰܪܓܘܳܢܳܐ ܐܱܝܟ ܕܰܒܒܶܙܚܳܐ: ܝܘ̣ܕ̈ܳܝܶܐ ܒܰܥܛܳܦܬܳܐ ܕܰܟܠܰܐܡܝ̣ܣ ܕܰܙܚܘ̣ܪܝ̣ܬܳܐ ܕܡܰܝܬܶܝܢ ܡܶܢ ܒܶܝܬ ܩܘ̣ܕܫܳܐ: ܘܪ̈ܘ̣ܡܳܝܶܐ ܕܡܰܠܒܫܝ̣ܢ ܠܶܗ: ܬܠܝ̣ܬܳܐܝ̣ܬ ܐܶܬܟܪܶܙ ܫܘ̣ܠܛܳܢܶܗ ܕܡܰܠܟܰܐ ܗ̱ܘ: ܒܬܰܠܒܶܫܬܳܐ ܕܐܰܪܓܘܳܢܳܐ: ܒܰܗܕܝ̣ܪܘ̣ܬ ܟܠܝ̣ܠܳܐ ܟܘ̣ܒܳܢܳܝܳܐ ܕܰܒܪܝ̣ܫܶܗ ܐܰܝܟ ܬܳܓܳܐ: ܒܰܠܒܘ̣ܟܝܳܐ ܕܩܰܢܝܳܐ ܒܐܝ̣ܕܶܗ ܐܰܝܟ ܬܰܩܕܳܐ ܕܰܗܒܳܢܳܝܳܐ: ܬܠܝ̣ܬܳܐܝ̣ܬ ܣܕܝ̣ܪ̈ܳܢ ܗ̱ܘܰܝ̈ ܒܩܰܢܝܳܐ ܕܰܒܝܰܡܝ̣ܢܶܗ ܠܬܰܚܘܺܝ̣ܬܳܐ ܕܫܘ̣ܠܛܳܢܶܗ ܕܠܳܐ ܥܳܒܰܪ: ܠܬܘ̣ܠܳܚ ܐܶܫܛܳܪ ܚܰܘܒܰܝ̈ܢ ܕܰܒܝܰܕ ܐܳܕܳܡ ܐܶܬܬܰܓܰܪܢܰܢ ܠܰܢ: ܠܰܕܚܝ̣ܠܘ̣ܬ ܡܚܘ̣ܬܳܐ ܕܩܶܛܠܶܗ ܕܚܶܘܝܳܐ ܕܠܰܚܶܫ ܠܚܰܘܳܐ ܕܣܰܓܝ̣ ܕܳܚܶܠ ܡܶܢܳܗ̇: ܒܰܬܠܝ̣ܬܳܝܘ̣ܬ ܝܰܘܡ̈ܶܐ ܩܛܰܠ ܘܐܰܘܒܶܕ ܘܰܣܚܰܦ: ܠܰܚܛܝ̣ܬܳܐ ܒܰܙܩܝ̣ܦܶܗ ܘܰܠܡܰܘܬܳܐ ܒܡܰܘܬܶܗ ܘܰܠܣܳܛܳܢܳܐ ܒܝܰܕ ܢܘ̣ܚܳܡܶܗ: ܒܝܰܘܡܳܐ ܩܰܕܡܳܝܳܐ ܕܰܟܝ̣ ܠܓܰܒܪ̈ܶܐ ܘܒܰܬܪܰܝܳܢܳܐ ܠܓܰܒܳܐ ܕܢܶܫ̈ܶܐ ܘܒܰܬܠܝ̣ܬܳܝܳܐ ܙܟܳܐ ܠܣܳܛܳܢܳܐ ܕܠܳܐ ܩܰܒܶܠ ܬܘ̣ܪܳܨܳܐ: ܬܠܳܬܳܐ ܝܰܘܡܝ̣̈ܢ ܩܰܘܺܝ̣ ܒܰܫܝܽܘܠ̇ ܡܶܛܽܠ ܕܰܬܠܳܬܳܐ ܗ̱ܘܰܘ ܡܩܰܒܠ̈ܳܢܶܝܗ̇ ܕܰܚܛܝ̣ܬܳܐ: ܚܰܘܳܐ ܘܐܳܕܳܡ ܘܣܳܛܳܢܳܐ: ܣܳܛܳܢܳܐ ܕܝܰܠܕܳܗ̇: ܘܚܰܘܳܐ ܕܩܰܒܶܠܬܳܗ̇ ܘܐܳܕܳܡ ܕܝܰܒܠܳܗ̇: ܬܠܳܬ ܣܶܓ̈ܕܳܢ ܐܶܬܩܰܪ̈ܰܒܝ̱ ܠܶܗ ܒܢܘ̣ܚܳܡܶܗ ܡܶܢ ܥܶܠ̈ܳܝܶܐ ܕܝܰܩܰܪܘ̱ ܢܘ̣ܚܳܡܶܗ: ܘܡܶܨܥܳܝ̈ܶܐ ܕܰܪܗܶܛܘ̱ ܠܩܰܒܪܶܗ: ܘܬܰܚ̈ܬܳܝܶܐ ܕܐܰܩܝ̣ܡ ܐܶܢܘܢ̇ ܥܰܡܶܗ: ܬܠܝ̣ܬܳܐܝ̣ܬ ܐܶܬܚܙܝ̣ ܠܡܰܓܕܠܳܝܬܳܐ ܐܳܦ ܬܠܝ̣ܬܳܐܝ̣ܬ ܠܰܫܠܝ̣ܚ̈ܶܐ ܘܠܰܬܠܳܬ ܕܘ̣ܟܝ̈ܳܢ ܕܗܰܕܳܡܰܘ̈ܗ̱ܝ ܕܰܡܡܰܚ̈ܝܳܢ ܠܗܘܢ̇ ܚܰܘܺܝ̣: ܬܠܝ̣ܬܳܐܝ̣ܬ ܥܰܡ ܬܠܳܬ ܓܘ̣̈ܕܶܐ ܕܥܝ̣ܪ̈ܶܐ ܩܳܥܶܝܢܰܢ: ܩܰܕܝ̣ܫܰܬ ܐܰܠܳܗܳܐ ܩܰܕܝ̣ܫܰܬ ܚܰܝܠܬܳܢܳܐ ܩܰܕܝ̣ܫܰܬ ܠܳܐ ܡܳܝܽܘܬܳܐ ܕܐܶܬܒܰܪܢܰܫ ܘܐܶܨܛܠܶܒ ܚܠܳܦܰܝܢ ܘܦܰܪܩܰܢ ܕܠܰܐܠܳܗܘ̣ܬܳܐ ܒܦܰܓܪܳܢܘ̣ܬܳܐ ܚܰܘܝܰܢ: ܐܳܦ ܠܚܰܝܠܬܳܢܘ̣ܬܳܐ ܒܰܡܚܝ̣ܠܘ̣ܬܳܐ ܘܰܠܠܳܐ ܡܳܝܽܘܬܘ̣ܬܳܐ ܒܡܝ̣ܬܘ̣ܬܳܐ: ܬܠܝ̣ܬܳܐܝ̣ܬ ܫܳܐܠܝ̣ܢܰܢ ܡܶܢܶܗ ܒܘ̣ܪ̈ܟܳܬܳܐ: ܘܰܬܠܝ̣ܬܳܐܝ̣ܬ ܒܳܪܟܝ̣ܢܰܢ ܟܰܕ ܡܣܰܟܶܝܢܰܢ ܠܗܘܢ̇ ܠܪ̈ܰܚܡܶܐ ܥܰܬܝ̣ܪ̈ܶܐ ܕܡܶܢܶܗ: ܬܠܝ̣ܬܳܐܝ̣ܬ ܙܳܥܶܩ ܫܝ̣ܦܘ̣ܪܳܐ ܒܕܶܢܚܶܗ ܘܰܒܫܳܥܬܳܐ ܗܳܝ ܬܠܝ̣ܬܳܝܬܳܐ ܕܠܺܠܝܳܐ ܐܰܝܟ ܢܘ̣ܚܳܡܶܗ ܕܳܢܰܚ ܠܚܘ̣ܕܳܬܳܐ ܕܰܓܒܝ̣ܠܬܶܗ: ܬܠܝ̣ܬܳܐܝ̣ܬ ܒܳܥܶܝܢܰܢ ܡܶܢܶܗ ܚܢܳܢܳܐ ܘܪ̈ܰܚܡܶܐ ܘܚܘ̣ܣܳܝܳܐ ܟܰܕ ܡܗܰܝܡܢܝ̣ܢܰܢ ܕܚܰܕ ܡܶܢ ܩܢܘ̣̈ܡܶܐ ܕܰܬܠܝ̣ܬܳܝܽܘܬܳܐ ܣܓܝ̣ܕܬܳܐ ܐܝ̣ܬܰܘܗ̱ܝ ܕܠܳܐ ܡܘ̣ܙܳܓܳܐ: ܬܠܝ̣ܬܳܐܝ̣ܬ ܢܶܬܒܰܣܰܡ ܚܢܰܢ ܘܥܰܢܝ̣̈ܕܰܝܢ ܒܡܰܠܟܘ̣ܬܶܗ ܗܳܝ ܠܳܐ ܡܶܫܬܰܪܝܳܢܝ̣ܬܳܐ: ܘܥܰܡ ܟܽܠܗܘܢ̇ ܩܰܕܝ̣̈ܫܰܝܟ ܗܳܪܟܳܐ ܘܬܰܡܳܢ ܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀