ܦܪܽܘܡܝܽܘܢ

ܬܶܫܒܘ̣ܚܬܳܐ ܠܗܰܘ ܡܰܠܟܳܐ ܕܪܰܘܡܳܐ ܕܠܰܫܝܽܘܠ ܢܚܶܬ ܒܳܬܰܪ ܐܳܕܳܡ ܨܰܠܡܳܐ ܕܪܰܒܘ̣ܬܶܗ: ܘܝܰܘ̈ܡܶܐ ܬܠܳܬܳܐ ܥܡܰܪ ܒܳܗ̇ ܥܕܰܡܳܐ ܕܐܶܫܟܚܶܗ ܠܨܰܠܡܳܐ ܕܝ̣ܠܶܗ ܘܰܕܠܳܐ ܚܒܳܠܳܐ ܐܰܦܩܶܗ ܡܶܢ ܚܶܙܶܝ̈ܗ̇ ܕܗܳܡܳܢ: ܘܫܘ̣ܒܚܳܐ ܕܠܳܐ ܡܳܝܽܘ̣ܬܘ̣ܬܳܐ ܐܰܠܒܫܶܗ ܘܙܺܝܘܳܐ ܕܠܳܐ ܡܶܬܚܰܒܠܳܢܘ̣ܬܳܐ ܐܰܥܛܦܶܗ: ܘܥܰܠܝܶܗ ܠܪܰܘܡܳܐ ܕܰܫܡܰܝܳܐ ܒܬܶܫܒܘ̣ܚܬܳܐ ܘܐܰܩܝ̣ܡܶܗ ܡܶܢ ܝܰܡܝ̣ܢ ܐܰܒܳܐ ܒܐܝ̣ܩܳܪܳܐ: ܕܠܶܗ ܙܳܕܩܳܐ ܪܰܒܘ̣ܬ ܦܰܐܝܘ̣ܬܳܐ ܘܠܶܗ ܡܶܬܬܚܝ̣ܒܳܐ ܬܶܫܒܘ̣ܚܬܳܐ ܘܬܘ̣ܒ ܠܶܗ ܡܶܬܩܰܪܒܳܐ ܣܶܓܕܬܳܐ ܡܶܢ ܟܽܠܗܘܢ̇ ܡܣܰܟ̈ܝܰـܝ ܠܣܰܒܪܶܗ: ܕܠܶܗ ܝܳܐܶܐ ܫܘ̣ܒܚܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܐܰܠܳܗܳܐ ܗܰܘ ܓܢܝ̣ܙܳܐ ܘܠܳܐ ܡܶܬܕܰܪܟܳܢܳܐ: ܗܰܘ ܓܰܢ̱ܒܳܪܳܐ ܠܳܐ ܡܶܣܬܰܝܟܳܢܳܐ ܗܰܘ ܩܢܘ̣ܡܳܐ ܬܠܝ̣ܬܳܝܳܐ ܘܠܳܐ ܡܶܬܒܰܨܝܳܢܳܐ: ܕܰܬܠܝ̣ܬܳܐܝ̣ܬ ܐ̱ܪܳܙܳܐ ܫܒܝ̣ܚܳܐ ܕܰܡܕܰܒܪܳܢܘ̣ܬܶܗ ܡܶܢ ܚܰܙܳܝ̈ܶܐ ܘܟܳܪ̈ܘ̣ܙܶܐ ܐܶܬܛܰܦܰܣ ܘܐܶܬܶܐܪܶܙ: ܘܠܳܐܕܳܡ ܘܰܠܫܝ̣ܬ ܘܰܠܚܰܘܳܐ ܘܰܠܢܘ̣ܚ ܕܰܗܘܳܐ ܚܠܰܦܬܳܐ ܠܥܳܠܡܳܐ ܒܰܬܠܳܬ ܐܳܬܘ̈ܳܢ ܟܰܠܶܠ ܒܡܰܠܟܘ̣ܬܳܐ ܘܟܳܗܢܘ̣ܬܳܐ ܘܰܢܒܺܝܘ̣ܬܳܐ: ܠܣܘ̣ܓܳܐܐ ܕܟܺܐܢ̈ܶܐ ܨܰܒܶܬ: ܢܘ̣ܚ ܠܰܬܠܳܬ ܡܢܰܘ̈ܳܢ ܦܰܠܶܓ ܠܰܐܪܥܳܐ ܠܰܒܢܰܘ̈ܗ̱ܝ: ܠܫܝ̣ܡ ܩܰܕܡܳܝܳܐ ܘܐܰܒܳܐ ܕܫܝ̣̈ܡܳܝܶܐ ܡܨܰܥܬܳܐ ܕܐܰܪܥܳܐ ܘܪܝ̣ܫܶܗ ܕܐܳܕܳܡ: ܘܰܠܚܰܡ ܐܰܪܥܳܐ ܕܐܘ̣̈ܟܳܡܶܐ ܘܰܠܝܰܦܬ ܕܚܶܘܳܪ̈ܶܐ ܘܰܦܢܝ̣ܬܳܐ ܬܰܝܡܢܳܝܬܳܐ ܘܓܰܪܒܝܳـܝـܬܳܐ ܘܫܰܪܟܳܐ ܕܗܰܕ̈ܳܡܶܐ: ܬܳܡܳܪ ܒܰܬܠܳܬܳܐ ܪ̈ܰܗܒܘ̣ܢܶܐ ܕܢܶܣܒܰܬ݀ ܡܶܢ ܝܺܗܘ̣ܕܳܐ ܚܡܘ̣ܗ̇ ܕܙܰܢܝܰܬ݀ ܥܰܡܶܗ ܢܶܨܚܰܬ݀ : ܒܕܰܠܙܰܪܥܳܐ ܦܳܪܘ̣ܩܳܝܳܐ ܐܶܬܪܰܓܪܓܰܬ݀ : ܬܠܳܬܳܐ ܝܰܪ̈ܚܝ̣ܢ ܐܶܬܛܰܫܝ̣ ܡܽܘܫܶܐ ܢܒܺܝܳܐ ܘܰܬܠܝ̣ܬܳܐܝ̣ܬ ܡܰܠܶܠ ܥܰܡ ܥܶܠܳܝܳܐ ܕܰܢܫܰܡܠܶܐ ܠܥܰܕ̈ܥܺܐܕܶܐ ܕܐܶܬܦܰܩܰܕ: ܬܠܝ̣ܬܳܐܝ̣ܬ ܩܳܐܶܡ ܗ̱ܘܳܐ ܥܰܠ ܪܝ̣ܫ ܛܘ̣ܪܳܐ ܡܽܘܫܶܐ ܘܐܰܗܪܽܘܢ ܘܚܽܘܪ ܕܰܡܣܰܟܶܝܢ ܠܶܗ ܘܰܠܗܰܘ ܥܡܳܠܝ̣ܩ ܬܠܝ̣ܬܳܝ ܙܰܪܥܳܐ ܕܒܰܪ ܓܶܢܣܶܗ ܙܟܳܐ: ܬܠܳܬܳܐ ܝܰܘܡܝ̣̈ܢ ܕܡܰܥܰܠܬܶܗ ܕܰܠܝܽܘܪܕܢܳܢ ܐܶܫܬܰܘܕܝ̣ ܝܶܫܽܘܥ ܒܰܪܢܽܘܢ ܠܥܰܡܳܐ: ܘܰܬܠܳܬ ܩܘ̣ܪ̈ܝܳܐܐ ܐܰܩܝ̣ܡ ܠܒܶܝܬ ܓܰܘܣܳܐ ܕܩܳܛܘ̈ܠܶܐ ܐܰܝܟ ܬܠܳܬ ܕܐܰܩܝ̣ܡ ܡܽܘܫܶܐ: ܬܠܝ̣ܬܳܐܝ̣ܬ ܙܰܡܰܪ ܕܰܘܺܝܕ ܒܰܢܒܺܝܘ̣ܬܶܗ ܕܫܰܒܰܚܘ̱ ܠܡܳܪܝܳܐ ܬܶܫܒܘ̣ܚܬܳܐ ܚܕܰܬܳܐ: ܫܰܒܰܚܘ̱ ܠܡܳܪܝܳܐ ܟܽܠܳܗ̇ ܐܰܪܥܳܐ: ܫܰܒܰܚܘ̱ ܠܡܳܪܝܳܐ ܘܒܰܪܶܟܘ̱ ܠܰܫܡܶܗ: ܬܠܝ̣ܬܳܐܝ̣ܬ ܐܶܬܥܰܒܕܰܕ ܗ̱ܘܳܐ ܨܰܠܡܳܐ ܡܰܠܟܳܝܳܐ ܠܣܳܛܳܢܳܐ ܘܰܚܛܝ̣ܬܳܐ ܘܡܰܘܬܳܐ: ܘܥܰܠ ܗܳܝ ܗܽܘ̣ ܒܰܩܢܘ̣ܡܶܗ ܐܶܬܳܐ ܒܰܒܥܳܬܶܗ: ܬܠܝ̣ܬܳܐܝ̣ܬ ܐܶܬܳܐ ܝܽܘܕܳܐ ܢܟܝ̣ܠܳܐ ܡܶܢ ܠܘܳܬ ܟܳܗ̈ܢܶܐ ܘܩܰܫܝ̣̈ܫܶܐ ܘܪ̈ܰܒܰܝ ܟܳܗ̈ܢܶܐ ܒܙܰܝ̈ܢܶܐ ܬܠܳܬܳܐ ܒܢܰܗܝ̣ܪ̈ܶܐ ܘܣܰܝ̈ܦܶܐ ܘܩܰܝ̈ܣܶܐ: ܘܰܬܠܝ̣ܬܳܐܝ̣ܬ ܐܶܬܦܰܢܝ̣ ܠܶܗ ܒܢܘ̣ܫܰܩܬܳܐ ܡܰܫܠܶܡ ܐܰܢ̱ܬ ܠܶܗ ܠܰܒܪܶܗ ܕܐ̱ܢܳܫܳܐ: ܘܚܰܒܪܝ̱ ܥܰܠ ܗܳܝ ܐܶܬܰܝܬ: ܐܶܢܳܐ ܐܝ̣ܬܰܝ ܐܘ̣ܚܕܘ̣ܢܳܢܝ̱ ܘܐܰܫܠܶܡ ܢܰܦܫܶܗ ܒܐܝ̣̈ܕܰܝܗܘܢ̇: ܬܠܝ̣ܬܳܐܝ̣ܬ ܐܶܡܰܪ ܠܗܘܢ̇ ܠܡܰܢܘ̣ ܒܳܥܶܝܢ ܐܢ̱ܬܘܢ̇: ܒܫܘ̣ܐܳܠܳܐ ܩܰܕܡܳܝܳܐ ܢܰܫܩܶܗ: ܘܒܰܬܪܰܝܳܢܳܐ ܢܦܰܠܘ̱ ܥܰܠ ܐܰܦܰܝ̈ܗܘܢ̇: ܘܒܰܬܠܝ̣ܬܳܝܳܐ ܕܫܰܡܠܰܘ ܗܰܘ ܡܳܐ ܕܰܦܩܝ̣ܕܝ̣ܢ ܐܢ̱ܬܘܢ̇: ܬܠܝ̣ܬܳܐܝ̣ܬ ܓܰܙܡܘ̣ܗ̱ܝ ܡܰܪ̈ܳܚܶܐ ܕܢܶܨܛܠܶܒ: ܘܒܰܬܠܳܬ ܕܘ̣ܟ̈ܝܳܢ ܕܗܰܕܳܡܰܘ̈ܗ̱ܝ ܐܶܬܡܰܚܝ̣ ܒܐܝ̣̈ܕܰܘܗ̱ܝ ܘܰܒܪ̈ܶܓܠܰܘܗ̱ܝ ܘܰܒܕܰܦܢܶܗ: ܬܠܝ̣ܬܳܐܝ̣ܬ ܒܝܰܕ ܩܘ̈ܕܳܫܶܐ ܬܠܝ̣̈ܬܳܝܶܐ ܕܡܰܠܰܐܟ̈ܶܐ ܐܶܬܠܰܘܺܝ̣: ܘܰܒܩܰܒܪܳܐ ܬܠܝ̣ܬܳܝ ܐܰܡ̈ܶܐ ܐܶܬܬܣܝ̣ܡ: ܘܰܬܠܝ̣ܬܳܐܝ̣ܬ ܠܢܶܫ̈ܶܐ ܩܝܳܡܬܶܗ ܚܰܘܝ̣: ܬܠܳܬܳܐ ܥܝ̣ܪ̈ܶܐ ܢܚܶܬܘ̱ ܨܶܝܕ ܩܰܒܪܶܗ ܕܦܳܪܘ̣ܩܰܢ ܕܰܢܚܰܘܽܘܢ̇ ܬܠܝ̣ܬܳܝܰܐ ܗ̱ܘ ܕܐܰܠܳܗܘ̣ܬܳܐ: ܘܰܬܠܝ̣ܬܳܐܝ̣ܬ ܣܰܒܰܪܘ̱ ܠܢܶܫ̈ܶܐ ܩܝܳܡܬܳܐ ܬܠܝ̣ܬܳܝܰܬ݀ ܝܘܡ̈ܶܐ: ܬܠܝ̣ܬܳܐܝ̣ܬ ܦܰܩܶܕ ܐܶܢܶܝܢ ܕܢܺܐܙܠ̱̈ܳܢ ܢܣܰܒܪ̈ܳܢ ܠܓܘ̣ܕܳܐ ܕܰܫܠܝ̣ܚ̈ܶܐ: ܘܰܬܠܝ̣ܬܳܐܝ̣ܬ ܙܰܗܰܪ ܐܢܶܝܢ ܕܢܶܬܡܰܢܥܘܢ̇ ܟܽܠܗܘܢ̇ ܠܛܘ̣ܪܳܐ ܕܰܓܠܝ̣ܠܳܐ ܐܰܝܟ ܕܡܰܠܶܠ ܠܗܘܢ̇: ܬܠܝ̣ܬܳܐܝ̣ܬ ܐܶܙܠ̱ܰܬ݀ ܝܳܠܕܰܬ݀ ܐܰܠܳܗܳܐ ܠܩܰܒܪܳܐ: ܘܠܰܬܠܳܬܳܐ ܥܝ̣ܪ̈ܶܐ ܚܙܳܬ݀ ܕܰܡܫܰܒܚܝ̣ܢ ܬܠܝ̣ܬܳܐܝ̣ܬ: ܘܰܬܠܝ̣ܬܳܐܝ̣ܬ ܐܶܣܬܰܒܪܰܬ ܕܩܳܡ ܠܶܗ ܘܠܰܝܬܰܘܗ̱ܝ ܗܳܪܟܳܐ ܘܗܳܐ ܕܘ̣ܟܬܳܐ ܕܰܩܒܘ̣ܪܬܶܗ: ܬܠܝ̣ܬܳܐܝ̣ܬ ܒܢܰܩܝ̣ܦܘ̣ܬܳܐ ܕܡܠܰܚܡܳܐ ܩܢܰܘ ܡܣܰܒܪ̈ܳܢܶܐ ܒܢܶܩܦܶܗ ܕܚܰܝܳܐ: ܡܶܬܢܰܗܪܳܢܘ̣ܬܳܐ ܕܥܰܝ̈ܢܶܐ ܢܰܦܫܳܢܳܝ̈ܳܬܳܐ ܘܡܶܫܬܰܘܕܥܳܢܘ̣ܬܳܐ ܕܰܚܙܳܬܶܗ ܘܡܶܬܩܰܦܠܳܢܘ̣ܬܳܐ ܕܚܰܫܳܐ ܡܶܢ ܪܶܥܝܳܢܗܘܢ̇: ܬܠܝ̣ܬܳܐܝ̣ܬ ܢܰܗܰܪ ܐܶܢܘܢ̇ ܠܰܫܠܝ̣ܚ̈ܶܐ ܟܰܕ ܐܳܡܰܪ: ܚܙܰܘ ܐܝ̣ܕܰܝ̈ ܘܪ̈ܶܓܠܰܝ ܘܓܘ̣ܫܘ̣ܢܳܢܝ̱: ܘܕܰܥܘ̱ ܕܰܠܪܘ̣ܚܳܐ ܒܶܣܪܳܐ ܘܓܰܪ̈ܡܶܐ ܠܰܝܬ ܠܳܗ̇ ܐܰܟܡܳܐ ܕܚܳܙܶܝܢ ܐܢ̱ܬܘܢ̇ ܕܐܝ̣ܬ ܠܝ̣: ܬܠܝ̣ܬܳܐܝ̣ܬ ܫܰܪܰܪ ܐܶܢܘܢ̇ ܒܚܙܳܬܳܐ ܘܓܶܫܬܳܐ ܘܡܶܫܬܰܘܕܥܳܢܘ̣ܬܳܐ ܘܰܢܗܰܝܡܢܘܢ̇ ܠܰܡ ܫܰܪܝ̣ܪܳܐܝ̣ܬ ܕܰܒܝܕ ܚܙܳܬܳܐ ܘܫܶܡܥܳܐ ܘܓܶܫܬܳܐ ܡܶܫܬܰܪܰܪ ܟܽܠ ܣܘ̣ܥܪܳܢ ܘܗܳܘܶܐ: ܬܠܝ̣ܬܳܐܝ̣ܬ ܠܳܟ ܩܢܘ̣ܡܳܐ ܬܠܝ̣ܬܳܝܳܐ ܡܶܬܟܰܫܦܝ̣ܢܰܢ ܘܰܒܪܳܐ ܟܝܳܢܳܝܳܐ ܘܝܘ̣ܩܢܳܐ ܘܬܰܦܢܟܳܐ ܕܝܳܠܘ̣ܕܳܟ ܠܳܟ ܡܶܫܬܰܘܕܥܝ̣ܢܰܢ: ܬܠܝ̣ܬܳܐܝ̣ܬ ܫܰܪܰܪ ܠܰܢ ܡܳܪܝ̱ ܒܡܶܬܬܰܥܛܪܳܢܘ̣ܬܳܐ ܕܒܶܣ̈ܡܶܐ ܗܳܠܶܝܢ: ܒܫܰܪܝ̣ܪܘ̣ܬܳܐ ܕܠܶܫܳܢܰܢ ܘܰܒܕܰܟܝܘ̣ܬܳܐ ܕܦܰܓܪ̈ܰܝܢ ܘܩܰܕܝ̣ܫܘ̣ܬܳܐ ܕܢܰܦܫܰܢ: ܬܠܝ̣ܬܳܐܝ̣ܬ ܢܝܰܩܰܪ ܠܰܩܝܳܡܬܳܟ ܡܰܥܒܕܰܬ ܚܰܝ̈ܶܐ ܥܰܡ ܡܰܠܰܐܟ̈ܶܐ ܘܢܶܫ̈ܶܐ ܘܬܰܠ̈ܡܝ̣ܕܶܐ: ܘܰܬܠܝ̣ܬܳܐܝ̣ܬ ܫܰܟܶܢ ܠܰܢ ܫܰܝܢܳܐ ܕܥܶܠܴ̈ܝܶܐ: ܠܘ̣ܒܳܒܳܐ ܕܢܰܟ̈ܦܳܬܳܐ܆ ܘܰܦܨܝ̣ܚܘ̣ܬܳܐ ܕܰܫܠܝ̣̈ܚܶܐ ܩܰܕܝ̣̈ܫܶܐ: ܬܠܝ̣ܬܳܐܝ̣ܬ ܡܳܪܝܳܐ ܫܰܘܙܶܒܰܝܢ ܡܶܢ ܬܠܳܬ ܓܽܘ̈ܕܶܐ ܕܨܳܠܘ̣̈ܒܶܐ ܡܰܪ̈ܳܚܶܐ ܗܳܢܘܢ̇ ܕܰܒܩܰܢܝܳܐ ܩܰܦܚܘ̣ܟ: ܘܒܰܦܪ̈ܳܓܶܠܶܐ ܢܰܓܕܘ̣ܟ ܘܚܰܠܳܐ ܘܰܡܪܳܪ̈ܶܐ ܐܰܫܩܝܽܘ̣ܟ: ܬܠܝ̣ܬܳܐܝ̣ܬ ܣܕܘ̣ܪ ܘܛܰܟܶܣ ܠܰܢ ܒܰܚܠܘ̣ܠܳܟ ܘܣܰܡܶܟ ܠܰܢ ܥܰܠ ܦܳܬܘ̣ܪܳܟ ܒܓܽܘ̣̈ܕܶܐ ܕܰܢܒܺܝ̈ܶܐ ܘܰܒܩܰܘ̈ܡܶܐ ܕܰܫܠܝ̣ܚ̈ܶܐ ܘܰܒܟܶܢܫ̈ܶܐ ܕܩܰܕܝ̣̈ܫܶܐ: ܬܠܝ̣ܬܳܐܝ̣ܬ ܢܶܬܒܰܣܰܡ ܚܢܰܢ ܘܥܰܢܝ̈ܕܰܝܢ ܘܟܽܠܗܘܢ̇ ܝܰܠ̈ܕܶܝܗ̇ ܕܥܺܕܬܳܐ ܩܰܕܝ̣ܫܬܳܐ ܒܡܰܠܟܘ̣ܬܳܐ: ܒܦܘ̣ܪܩܳܢܳܟ ܫܒܝ̣ܚܳܐ ܘܰܚܙܳܬܶܗ ܕܐܰܒܘ̣ܟ ܣܓܝ̣ܕܳܐ ܘܚܘ̣ܕܳܬܶܗ ܕܪܘ̣ܚܳܟ: ܘܢܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀